ما كان في الحسبان يقوى الهجر أعز انسان ٠ - الفصل 4 | روايتك

البارت الرابع: & : & بسم الله..استغفرالله.. لاحول ولاقوة الا بالله..سبحان الله _____ أنت من رسم طريق الفُراق بكل دقة، فلا تعتذر ولا تعد ..... من دخولهم فصل الشتا وام عادل من بدا وهي كارفه ريم تنزل ملابس الشتويه وترفع ملابس الصيفيه واليوم على كلامها بيمشون للمزرعه ومن الصبح مصحيتها هي وبنتها قمر يجهزون عفشهم وقفت بألم وهي تمسك ظهرها وتتمدد محاوله منها تخفيفه تنهدت بتعب وهي تناظر لقدور الطبخ الي طلعتهم للمزرعه همست:استغفرالله.. داهمتها ام عادل وهي تتخصر بيد وتسحب برقعها باليد الثانيه:ابك انتي ماخلصتيي ننتظرك بالسياره قلت لكك جيبي القدور بسس ماقلت اطبخي الذبيحه وجيبها معنا(وبصراخ) اخلصيييي عجلي علينا لسياره عدلة ريم نقابها ونزلت بتعب وهي ترفع القدور وتمشي متخطيه ام عادل بدون لاتنطق بكلمه ناظرت لها ام عادل من فوق لتحت ثم راحت وراها طلعت برا البيت وهي ترفع بالقدور الثقيله وهي تحس بيفلتون منها وقفها فارس ولد عمها ابو سعد وهو يمد ايده:عطيني احطهم ورا ناظرت له بأمتنان وهمست وهي تمدهم له:طيب اخذهم منها بشويش لانهم كثار ومشى متوجهه لصندوق السياره بينما ريم توجهة لسيارة الثانيه والي فيها عمتها ام عادل صعدت بجنبهم تحديدآ عند الشباك سكرت الباب وحطت راسها عليه وغمضت عيونها بألم من الصداع الي مداهمها له فتره تنهدت بانزعاج من صراخ ام عادل كالعاده مرات تحس انه عندها مشكلة باذنها مو بس هي العايله كلها لانه مو طبيعي كمية الصراخ الي مايتكلمون الا فيه مدت يدها لشنطتها وهي تطلع جوالها والي طبعا بدون نت دخلت للملاحظات وهي تناظر للرقم المكتوب بسرحان .... قبل كم يوم كالعاده طلعت للحوش قريب من بيت الجيران ناويه تشبك من النت حقهم وتكلم ماريا جلست بتعب وبجنبها سلة ملابس يحتاجون ينشرون تحت الشمس والي اخذتهم عذر تنشغل بعيد عن عيونهم اتصلت على ماريا وبابتسامه مرهقه:مارياا من ورا الخط وصل لها صوت ماريا:ياقلبي انتي كيفك مدت ريم يدها وهي تسحب العصا وتحركها علارض بهدوء:بخير كيفك انتي ماريا:الحمدالله وسط الصمت لثواني وصل لها همس ماريا:ريم عقدت حواجبها لثواني ثم همست:نعم ماريا بأسف:ريم انا مضطره اسافر برا و...(صوت تنهيده)وماراح أقدر اتواصل معك تركت ريم العصا وهي تعدل جلستها بصدمه:ماريا مو منجدك ماريا بحزن:والله مو بيدي بس ابني تعبان وبدي سافر لبرا انا وزوجي نعالجو وماعندي امكانيه اوفر شبكه تصرف كثير انتي بتعرفي كيف حالتنا ريم تنهدت بثقل :طيب..طيب ياماريا براحتك ماريا:ماتزعلي مني ريم ناظرت ريم للارض بحزن :مازعلت ولدك اهم انتبهي له ماريا بعجله وواضح عندها صوت احد يناديها:ريم ياقلبي منيح اتصلتي في هالوقت لانه كنت برسل لك اللين تشوفي الرساله انا مضطره امشي بس برسل لك رقم سلطان اذا بتحتاجي شي كلميه انا مابقدر اتواصل معاه (وبعجله)يالله ياقلبي انتبهي لي على حالك ريم بهمس:طيب..مع السلامه ماريا سكرت الجوال بينما ريم تناظر للارض بسرحان وصل لها صوت مسج نبها رفعت جوالها وهي تناظر للرقم انسخته للملاحظات ثم وقفت تخبي جوالها وترفع الملابس تكمل شغلها قبل يشوفونها وتصير لها مشكله .... فزت من ذكراها على الورع الي انحذف عليها من الكرسي الي ورا مسكته بسرعه وبألم ومنو كان غير زيد ولد عمتها ناظر لها وبضحك:شفتي حركتي القويه كنت ورا جيت قدام ودك تشوفينها مره ثانيه ابتسمت له ريم بتسليك:لا حبيبي ماودي انت بس اجلس زيد ناظر لامه بدون اهتمام:ييييمهههه ابيي مووويهههه ام عادل بانزعاج :ريم شوفي بشنطه الي عند رجلك فيها مويه عطيه ونوميه مره وحده صرخ زيد ببكى:ماراح اناااممم ابي اللعب.. سكرت ريم اذنها من صوت بكي زيد العالي وهي تاخذ نفس تحاول تخفف الصداع مدت يدها وهي تطلع المويه وتمدها لزيد وهي تمثل الدهشه:زيد شوف مويه تبي تشرب؟ لف زيد لها وهو يناظر لها ثم للمويه رفع يده وضرب علبة المويه وبعصبيه:ماابيييي لاتكلمينيي ياحماره ناظرت له بصدمه:عيب لاتقول كذا بعناد وصراخ:كيييفييييييييييييي رفعت ام عادل ولدها وهي تحطه بحضنها:قول اعوذ برب الفلق وش فيك على الولد ماتعرفين تذكرين ربك انتي ماعاد يبي مويه منك اعوذ بالله مدت يدها وهي تسحب المويه بقوه من يد ريم بينما ريم تناظر لهم بدهشه وبأسف ردت حطت راسها على الشباك مقرره تنام اللين يوصلون للمزرعه لانها لو طولت زياده صاحيه معاهم بنفس المكان ماتضمن شنو ممكن يصير مرت ربع ساعه طريق فزت كالعاده ريم من ايد اما عادل هي تهزها :رييم.. عقدت حواجبها بانزعاج وهي تناظر حولها بارهاق :وشوو ام عادل مدت الفلوس:انزلي شوفي وراك بقاله جيبي بساكيت وحلويات لزيد لفت ريم راسها لجهة الشباك وهي تحاول تستوعب همست بارهاق:طيب.. فتحت الباب ونزلت بينما ولد عمتها عادل والي كان يسوق فيهم كان نازل قبلهم يجيب كم غرض للمزرعه دخلت للبقاله وسحبت لها سله وبدت تمشي بين الارفف تختار لزيد كم شغله سحبت بساكيت وكم حلا وقفت عند العصاير وخذت مجموعه وقفت لثواني وهي تناظر للعصاير همست:انا وش جالسه اسوي.. تنهدت بضيق وهي تتذكر كيف قمر بنت عمتها راحة مع لمار بسياره بينما هي خلوها مع عمتها عشان تاكل الكرف كله ناظرت لمسكت السله بضيق وهي تضغط عليها بقوه محاوله منها تطلع ضيقها من خلال هالشي تقدر تجادل وتعلي بصوتها وتتهاوش بس مين بيخسر غيرها ومحد بياكلها حرمان وضرب غيرها فعشان كذا تتغاضى وتسكت احسن لها من لسان عمتها ام عادل و حريم عمانها لفت بهدوء للبنتين الي كانو قريب من عندها ....:هههههه اخذي اخذي كله على حساب ابوي ....:دانه لاتشيشيني الحين اشيل البقاله كلها دانه:ههههه اقول انا ماشيشك انا من جدي اتكلم ....:جدي ولا عمي ههههههههههه لاتناظريني كذا دانه:لمى حبيبتي استخيري قبل تنكتين لانه ماشفت بحياتي اسخف منك المهم بروح اشوف جهة الايسكريم عجلي انتي لانتاخر ويتصل عليك عبيد ويجلدنا لمى وهي تاخذ من المشروبات الغازيه:طييب ناظرت ريم لجوالها بسرحان ثم ل لمى وبتردد تقدمت لها:سلامم ناظرت لها لمى باستغراب وهي تناظر حولها لثواني ثم لريم:وعليكم السلام ريم بخجل وهي تعض على شفتها من تحت النقاب بحيره :ممكن جوالك لمى باستغراب اكثر:جوالي انا!! ريم باحراج:اذا مافي ازعاج بس ضيعت اهلي وبتصل عليهم نزلت لمى سلتها والمشروب الي بيدها وفكت شنطتها وهي تمد جوالها:اكيد تفضلي اخذت ريم الجوال وبهدوء ردت: دام فضلك طلعت جوالها ودخلت للملاحظات وهي تكتب رقم سلطان بتدقيق رفعت الجوال وهي تعطي لمى جنبها ويدها على طرف نقابها وبتأمل انه يرد عليها لانه ماعندها اماكنيه تتصل عليه ابدا خاصه بـ وضع عمانها مع الجوالات يمكن كانت فكره غلط وجدا انها تتصل عليه لكنها تعبت وكثيير تحس نفسها منهلك والخوف ماكلها انها بتعيش باقي عمرها كذا وبأمل انه لو سلطان عرف كيف وضعها معهم يمكن..يمكن يطلعها من عندهم فزت بفرح بس رد:الوو.. همست ودموع تجمعت بعيونها:سلطاان ...:استغفرالله.. ريم بألم:سلطان انا ريم ....:يا اختي انا مو سلطان الرقم تغير صاحبه كل شوي واحد متصل يقول سلطان من ذا ريم بصدمه همست:تغير؟ ....:ايوا والرجاء لعاد تتصلون اذيتوني ردت ريم بألم:ماعليش اخوي بعدت الجوال وهي تسكر الخط رفعت راسها لفوق لثواني بمحاوله انها توقف دموعها تنزل اخذت نفس ولفت ل لمى قربت لها وهي تمد الجوال:يعطيك العافيه اخرتك معي لمى باستغراب من عيون ريم :لا عادي رفعت ريم سلتها وبهمس:شكرا.. ناظرت لمى لريم الي مشت بعيد عنها باستغراب همست:تبكي؟ رفعت جوالها وهي تناظر للرقم الي كانت متصله عليه لثواني عقدت حواجبها باستغراب وبسرحان برقم المكتوب قاطعتها دانه الي ضربتها عالخفيف من كتفها:هيه هذا وانا قايله لاتتاخرين اثاريك ماسويتي شي لمى بغير اهتمام همست:دانه تعرفين رقم عمي سلطان القديم؟ دانه باستغراب:ايوا ليش؟ لمى باستعجال:جد طيب وريني بشوفه دانه وهي ترفع بسلتها :مو هنا جوالي بسياره اذا ركبنا وريتك الرقم بس ماقلتي لي ليش لمى وهي تنزل وترفع سلتها:اقول لك بعدين ..... حلمت حلما في زمان ما كان عندها مستحيلا بحب من دون أثمان وللمغفرة ألف وسيلة حلمت بريعان الشباب ما كان فيه للخوف مكانا لم تغلق فيه الابواب والقسم يكفينا برهانا تقدمت من سيارة عادل ولد عمتها فكت الباب على صوت عمتها:كل هذاا تشترين الي قلت لك عليه عزالله انك رفله وما منك فايده مغير مأخرتنه بهدوء تقدمت ريم وهي تحط الاغراض وتصعد وتسكر الباب بعدم اهتمام لعمتها الي مكمله تشره عليها بينما هي تناظر لجوالها بألم بكذا انقطع اخر امل لها انها تطلع من الي هي عايشه فيه ماريا انقطعت عنها وسلطان تغير رقمه جدتها توفت من زمان منطقتها تغيرت خوياتها ماعاد تقدر تتواصل معهم وام وابو نفس العالم ماعندها ابتسمت بحسره وضيق بينما الدموع ردت لمكانها المعتاد لفتره غير معلومه بكل مره تقولب بالموضوع حقها يمين ويسار لكن ماتلقى حل ماهو طبيعي كمية الكرف والتعب الي جالسه تعيشه لو كانت امها كان سكتت وقالت امها لو كان ابوها كان قالت قاسي وربي يعوضني لكن لهم هذا ولا هذا تحس نفسها بينهم غريبه مستعده تحلف انها ماتهمهم محد بينهم يحبها او يخاف عليها محد يحسسها انها جد بين اهلها عقدت حواجبها بألم من بطنها لثواني مسحت عليه وهي تزفر انفاسها اللين خف تنسدت على ورا وهي تناظر الطريق جلست تستغفر مستغله طول الوقت دخلت السياره حدود المزرعه ووقفت قدام البيوت الصغيره بالمنتصف بدو ينزلون ويشيلون عفشهم بينما ريم نزلت بهدوء وراحت لورا تكمل تشيل معهم اخذت اخف شي ومشت ورا قمر تحط معها الاغراض وكلها ربع ساعه وخلصو دخلت للغرفه الي بتنام فيها اليوم ومعها ام عادل:جيبي المكنسه يبي لها كنس ومسح الغرفه مليانه غبار ناظرت لها ريم بتعب:طيب بس وين ام عادل وهي تعلق عباتها:بالمطبخ اكيد اسألي قمر تعرف وينهم طلعت ريم وهي تعدل طرحتها ورا قمر الي دخلت للمطبخ ترتبه:قمر وين المكنسه والمساحه ناظرت لها قمر الي جالسه وتفرز المواعين:هاه ...اييه ايه ورا الباب كملت ترتب بالمواعين بتركيز وريم سكرت الباب لثواني اخذتهم ثم طلعت للغرفه دخلت بعد ماخلت المساحه برا نزلت عبايتها وعلقتها بينما الطرحه خلتها تسكر نص وجها عن الغبار جلست تكنس بالغرفه لمده وهي تندب حظها على دخول ام عادل:انتي ماخلصتي وقفت ريم بتعب وهي تحط يدها جهة ظهرها:عمه جالسه انظف يعني ماتشوفين ناظرت لها ام عادل بعيونها المبققه:لا تعالي واضربيني بعد وش رايك؟؟ تنهدت ريم وهي تلف وجها وتستغفر بهمس:استغفرالله العلي العظيم.. ام عادل وهي تتخصر لها:اقول ابروح انا افتح الخيمه واشوفها لخلصتي كنس ومسح رتبي الاغراض وروحي للمطبخ جيبي المبخر والبخور بخري هنا ومن ثم تعالي لي بالخيمهه طيب؟؟ ريم وهي تناظر المكنسه بيدها لثواني ثم لم عادل بصبر:طيب.. طلعت ام عادل بينما طلعت ريم واخذت المساحه دخلت للحمام واخذت المويه وصابون الارضيه وبدت تمسح وهي تنتظر بس متى تخلص الجو كان بارد لكن مع الشغل ماحست بلاجواء هذي واخيرا بعد الكرف ذا كله خلصت وطلعت ترجع المكنسه والمساحه للمطبخ وتاخذ مثل ماقالت لها ام عادل المبخر وتبخر وصلت للمطبخ الي كانت قمر الا الان فيه ومعها لمار يشتغلون بشويش ويسولفون ويتهامسون مابينهم قمر بهمس:بعد شوي اذا نامو نتصل من البرنامج لمار:اييه احسنن مشت ريم قدامهم بهدوء وهي تشب الفحم وببالها تفكر في مين ناوين يتصلون قمر ناظرت لريم:اقول ريم لفت لها ريم بهدوء:هلا قمر ناظرت لها لثواني بتفكير:امم وش رايك تسهرين معنا اليوم ريم بستغراب:وش عندكم؟ قمر:فعاليه بتعجبك صدقيني ناظرت ريم للفحمه الي خلصت رفعتها وحطتها بالمبخروهي ناويه تطلع ردت عليهم:اشوف طلعت عنهم متوجهه للغرفه تبخرها وبعدها للخيمه وقفت لثواني وهي تاخذ نفس ويدها على جنب بطنها بالم:ياربي وش ذا ..... الساعه١ الليل دخلت ريم للخيمه بعد ماسهرو عماتها وحريم اعمامها فيها طلعو يكملون السهره داخل بينما بقو فيها قمر ولمار ناظرت لها قمر وبحماس:حيا الله ريم سكري باب الخيمه ناظرتهم ريم بستغراب:ليش الجو حلو وبارد لمار بملل واستعجال:اخلصيي يووه لفت ريم باستغراب اكثر وسكرت الباب راحت لهم وجلست معهم:ايوا وش فعاليتكم طلعت قمر جوالها وفتحت الكتم:هههه الوو تسمعني ...:من ذي الي دخلت لمار وهي تقرب للجوال:اختنا ..:ماشاءالله كلكم خوات؟ قمر:ايوا ....:اييه سلمى قمر:هلاا ..:الحين الي عندك خديجه بس الي دخلت وش اسمها قمر ناظرت لريم لثواني:اسمها منيره ...:اييه منيره وينها ماسمع صوتها قمر نغزت ريم المصدومه عشان ترد عليه ناظرت لهم ريم بصدمه وبهمس:من ذا لمار بحماس وهي تهمس:واحد تعرفنا عليه ببرنامج ريم ناظرتهم لهم بصدمه وهمس:وش انتم ماتخافون قمر بملل وهي تبعد الجوال وتهمس:عادي وش بك نستمتع ناظرت لهم ريم بخيبه وهمس:ذي فعاليتكم اجل(قامت وهي تلف شالها)خليها لكم انا ماحب هسوالف طلعت على لمار الي تكش عليها:مالت عليك يا سخيفه ناظرت لقمر وبقهر وهي تهمس:قلت لك ذي خبله وتافهه لي ناديتيها قمر باستغراب:وشووو وش يدريني انها كذا احسب نفس جونا وبعدين لاتصرخين علي .....:اقول تراني هنا وش بكم سحبتو علي لمار وهي تنعم صوتها:لا معك بس كان في نقاش بسيط لمار وهي تعدل جلستها:ايواا اخبارك ..... طلعت ريم من الحمام توحهة لفراشها وهي تجلس وتدفي نفسها من البرد ويدها على بطنها من الالم:ياربي ذي وقتها بعد تشرف الحين وقفت وهي ماهي قادره تتحمل كمية الالم اخذت شالها ولبسته وطلعت متوجهه للمطبخ دخلت وجلست بعد ماركبت لها شاهي اعشاب ناظرت لباب المطبخ والي كان يطل على المزرعه من ورا والاشجار الي كانت موجوده اطول من البيت نفسه والضباب شبهه نازل بما انه اخر الليل سرحت وكالعاده بحالها وبكل مره تقلب بموضوعها لكن ماهي لاقيه صرفه له ولا لكيف بتكمل بروحها باقي عمرها ذا وخاصه معهم وقفت بعد ما الشاهي خلص اخذت لها بكوب شاي اعشاب وطلعت تمشي بهدوء وهي تشد الشال عليها دخلت لغرفتها المشتركه مع البنات ثم لفراشها دخلت تدفي نفسها وتشرب من الشاهي رجف جسمها لثواني والالم زاد عليها اكثر همست باستغراب ويدها على بطنها:اول مره كذا تعورنيي اخذت شاي الاعشاب وشربت شوي بس وقفت بلوعه من ريحتها بعد ماحطته على جنب ركضت للحمام فكت الباب وجلست وطلعت كل الي ببطنها وهي تبكي اكثر شي تكرهه هو الاستفراغ قبل كانت ماريا وجدتها يوقفون عندها ويخففون عنها وهي تبكي لكن هالمره تبكي بروحها :اهى اخخ ....كح هدت شوي وبدت تاخذ انفاسها وقفت عند المغسله تمضمضت بالمويه وبدل لايخف الالم زاد عليها طلعت من الحمام لفراشها وهي تحاول تدفي نفسها ويدها على بطنها بألم:ماهو طبيعيي وش ذاا اخخ ياربي جلست تبكي بألم رجلها كلها تألمها وبطنها وظهرها كانه سكاكين داخله فيها اخذت شاهي ناويه تشرب يمكن يخفف لو شويه لكن حست بلوعه للمره الثانيه قامت بتعب ودوخه للحمام وللمره الثانيه استفرغت جلست تبكي على ارضية الحمام الالم مو راضي يروح دخلت ام عادل للغرفه وهي تسمع صوت بكي:من الي بالحمام غسلت ريم فمها وطلعت ويدها على بطنها بألم:انا.. ناظرت لها ام عادل باستغراب:وش بك مستفرغه؟ ريم بألم وهي تستند على الباب:اييه ام عادل وهي تناظر وجها الي قالب اصفر من التعب:الدوره؟ ريم وهي تدخل فراشها تبكي ويدها على بطنها:ايييه ام عادل بتفهم:ااييه عادي كل سنينه نتقلب ونستفرغ لين روحنا تطلع وننام ريم بكت زياده:ابي اروح للطبيب ام عادل بدون اهتمام: عن الدلع الزايد مافيك شي نامي لك شوي تصيرين مافيك الا العافيه بكت ريم بألم :اخخ ابي امووت اهى ناظرت ام عادل لها بصدمه:وش ذا التهاويل اقول استغفري بس استغفري صرخت ريم بألم :ااخخ اهى ابي الط... قامت بسرعه للحمام وهي تستفرغ للمره الثالثه ناظرت لها ام عادل بضيق:استغفرالله جايين نتونس ضيقتي صدورنا حسبيى الله عليكك بسسس خلاصص يووه طلعت ام عادل بانزعاج بينما ريم طلعت بألم وهي تتسند على الباب ماقدر تمشي رجولها ماتشيلها طاحت مكانها وهي تمسك بطنها بألم وتعب .... بأطياف تطفو سودا تجرف أيامي كالسيل قصر أحلامي انهدا قد يغفو بجانبي مرتاح حلمي وقد يهز سريري دخلت ام عادل بضيق للمجلس الداخلي:استغفرالله ياربي ام ثامر باستغراب: وش بك جلست ام عادل ببتسامه:يالله حيا فارس وينك مانشوفك فارس وهو يقولب بشاهي:موجود مارحت بعيد مدت ام عادل يدها لشاهي وهي تناظر ام ثامر:اييه اقول ريم اذتني مغير تصيح من بطنها دخلت عليها تستفرغ بالحمام ام سعد دخلت وبيدها فطاير وهي تجلس وتمد لولدها فارس:يووه و وش سويتي معها ام عادل وهي تدخل الفطيره بفمها: وش بعد قلت لها تخمد وجلست العوبه (شفطت لها من الشاهي)تصيحح وش طول لسانها الي ماتستحي فارس بضيق:يمكن جد تعبانه ام عادل بانزعاج:يووه مغير دلع بنات ضيقت خلقي بصراخها تقل تولد تحمحم فارس :انا اجل ماشي تبين شي يمه مسحت ام سعد على كتفهه بحب:ابي سلامتك ياقلبي انت قام فارس مستعجل وبيده جواله .... صرخت لمار بضحك:لااااا هههههههههه وشوووووو هههههههههه خيرر ....:ههههههههه الا اذا شفتك بخمك يالنتفهه لمار بدلع:من قال اني نتفه تراني طويله قمر بسخريه:اي خيير ان شاءالله والله انها نتفه تكذب عليك ....:خدييجه لمار وهي تقرب من الجوال:وشوو ....:اقص يدي اذا طولك تعدى١٥٠ جات لمار بترد بس قاطعهم صوت فارس:لمااار ياا لماااار فزت لمار من مكانها بسرعه وهي تطيح وترجع تقوم بسرعه لعمها فارس بينما قمر سكرت الخط بسرعه وهي تعدل جلستها وتطلع الاوراق والقلم وتسوي نفسها ترسم طلعت لمار لعمها برتباك:هلا عميي ناظر لها باستعجال:تعالي ابيك تشوفين ريم لمار باسغراب:ليش وش بها فارس بانزعاج:اخلصيي يووه قولي لها فارس ولد عمك بياخذك الطبيب خالتلبس عبايتها وتجيب بطاقتها معها لمار بملل همست:طيبب يوه لاتنافخ علي .... ريم كانت منسدحه على جنب فراشها بتعب ويدها على بطنها وضامه مخدتها وكل شوي تهمس يارب اموت من الالم الي تعيشه والبرد زاد عليها وشوي تستغفر وتدعي ربي يخفف عليه الالم دخلت لمار وهي تتراكا على الباب:رييممم رفعت ريم نفسها ويدها على بطنها وبضيق:خيرر لمار وهي تلعب بطرف شعرها:فارس عمي يقول اللبسي عباتك وجيبي بطاقتك بياخذك للطبيب ريم والي حست الفرج جا لها:صدق؟ لمار:ايوا استعجلي عليه ثم طلعت بغير اهتمام بينما ريم فزت بتعب وهي تسحب عبايتها المعلقه وتلبسها وتحط الطرحه اي كلام ماهي قادره تلبس نقابها تحس بخنقه مشت بتعب وهي تاخذ شنطتها لبست صندل اسهل لها وطلعت بعد ماخذت معها كيس ومويه احتياط ناظرت لسياره البعيده وهمست بتعب:يووه بعيده مشت بشويش ويدها على بطنها وتشد على الكيس بطلت الباب الخلفي وجلست بتعب ودوخه همست:ماعليش اعذرني بس بنسدح والله مافيني حيل اجلس كذا فارس وهو يعدل المرايه بعيد عنها:اخذي راحتك غطت وجها بطرحه ويدها على بطنها وجت بتنسدح وقبل يحرك فارس صرخت بلوع مفاجئه:اخخ دقييققههه ياربي رحمتك فكت الباب بسرعه وهي تطيح علارض وتستفرغ بالكيس الي بيدها :كحح صد فارس عنها بضيق وهو يناظر بعيد همس:وتقول دلع بنات لاحول ولا قوة الا بالله الله يكون بعونك رفعت ريم نفسها بعد مامسحت وجها بالمويه مشت بشويش ورمت الكيس بالزباله ثم رجعت لسياره وهي تجلس بتعب وتسكر الباب راكت راسها وغطت وجها وهي تتنهد بارهاق حرك فارس متوجهه للمستشفى بدون لا يتكلم بس وصل وقف جهة الطوارئ ونزل بعد ما اشر بيده للعامل يجيب الكرسي المتحرك تقدم العامل وفك الباب من جهة ريم الي نزلت بتعب وهي تجلس وتغطي وجها كويس مشى بجنبه ووقف عند الموظفين مد يده ياخذ بطاقتها :بطاقتك مدت ريم له البطاقه مدها للموظف الي قدامه سجل له عند اقرب غرفه ثم عطاهم الرقم مع البطاقه راح فارس لصوب الغرفه ووراه العامل وريم بالكرسي المتحرك ويد على راسها ويد على بطنها بألم وعلى حظها ماكان في الا واحد قدامها وطلع قبل ينتظرون دخل فارس وهو يفك الباب للعامل وريم وقف العامل كرسي ريم بجنب الدكتوره وطلع ينتظر برا ناظرت الدكتوره للكمبيوتر ثم لريم:ايوا يا ريم وش مشكلتك ريم بضيق وارهاق:الم ببطني واستفراغ الدكتوره وهي تكتب بالكمبيوتر وبستفسار:دوره شهريه؟ ناظرت ريم بطرف عينها لفارس ثم همست بحراج:ايوا تحمحم فارس وهو يعدل نسفته:انا برا انتظرك ناظرت لها دكتوره بعد ماطلع فارس:كم مره استفراغ ريم وهي تمسك بطنها بألم:اربع تنهدت الدكتوره بضيق وهي ترد تكتب ثم قربت لريم وهي تمسك جهة بطنها وتضغط عليه عالخفيف:عندك حساسيه من اكله معينه؟ ريم بتفكير وهي تاخذ نفس من ضغط الدكتوره الي يألم:لا ماعندي الدكتوره وهي تناظرها وبجديه:اولآ هذا الم دوره طبيعي زياده عليه الم قولون عصبي انتي قلتي ماعندك حساسيه من اكله معينه هذا يدل تهيج القولون عندك بسبب نفسيه وكثرة التفكير شوفي كيف وجهك قالب اصفر من كثر الاستفراغ لانه القولون يضغط زياده مع الالم دوره يخليك ماتتحملين الم زياده ويضغط على المعده ويخليك تستفرغين انتي صغيره على النفسيه والتفكير والتوتر وش خليتي لبعدين ناظرت لها ريم بتعب:طيب تنهدت الدكتوره بضيق وهي تسحب مال الضغط وتلفه على يدها وهي تقيس ضغطها لثواني انتظرت:ضغطك منخفض لكن سبب مؤقت ماهو شي دائم بسبب كثرة الاستفراغ بعدت عنها وهي تكتب لها على ورقه:بحط لك مغذي ومهدئ تاخذينهم عند الملاحظه اهتمي بصحتك النفسيه لانه تاثر عليك من داخل ايضا واكلي عدل همست ريم بضيق من كلام الدكتوره:طيب ضغطت الدكتوره على زر المريض التالي دخل فارس وهو ياشر على العامل ياخذ ريم مدة له الدكتوره الورقه:هي ان شاءالله بخير بس تنتبه لاكلها ونفسيتها تقدر تاخذها على الملاحظه يعطونها مغذي ومهدئ اخذ فارس الورقه منها:ان شاءالله يعطيك العافيه الدكتوره لفت وهي تجهز للمريض الجاي:يعافيك وماتشوف شر مشى فارس بجنب العامل اللين وصلو لغرفة الملاحظة الخاصه بنساء وقف لانه ممنوع يدخلون مد الورقه لريم واشر للممرضه تجي تدخلها دخلت ريم مع الممرضه ومدت الورقه لها ناظرت الممرضه للورقه لدقايق وهي تتناقش مع الي بجنبها ثم اخذو ريم لسرير وساعدوها تتمدد عليه غطت ريم نفسها وهي تغمض عيونها بتعب جت لها الممرضه وهي تحط علبة الابر والمغذي سحبت يدها وهي تلف الشريط وتمسح جهة الي بتدخل الابره فيها وجلست دقايق تدور المكان الصح غطت ريم وجها بتوتر وخوف اللين حطو المغذي بيدها ودخلو معه مهدئ:بس يخلص هذا محلول انا يجي يشيل اوكي ناظرت ريم للمحلول ثم لها:اوكي ثواني اللين تنهدت ريم براحه بعد ماختفى الالم:ياربي لك الحمد وشكر غمضت عيونها مقرره تنام لها شوي على مايخلص .... برا بسيارة فارس:اييه يبه شوي بجيبها ابو سعد:مره ثانيه تعطينا خبره ماهو كذا تروح ولا تعلمنا فارس بضيق وهو يمسح بين حواجبه:يبه البنت تصيح زين ما ماتت عليكم وانتم كلن لاهي بحياته وبعدين انت وعمي ابو ثامر رايحين تسهرون عند. ابو مجبل وين يمديكم توصلون للمزرعه وتودونها ابو سعد بعدم اهتمام:طيب طيب خلاص اذا خلصتو ودها لعمتك من اول تتصل تسأل وين اذلفت استغفر فارس بهمس:استغفرالله ..طيب..توصي شي؟ ابو سعد وصوت واحد من الرجال يناديه:لاا يالله سكرر بعد فارس الجوال وهو يتنهد وعينه على الاتصالات الي كانت من امه وعمته :وينكم يوم تصيح سكر جواله وتراكا على ورا ينتظر العامل الي وصاه يقول للممرضه بس تخلص يطلعها ويجيبها له ..... اليوم الثاني الصباح كانت ريم بالغرفه ترتب الفراشات بعد ماردت امس من الملاحظه ونامت صارت احسن من بعد ماخذت المهدئ وتحس بنشاط وهي تدعي بقلبها لفارس ولد عمها لولا الله ثم هو ماتدري وش بيكون وضعها بينما في مكان ثاني بالبر تحديدا عند الشباب الي يهجولون بسياراتهم ويهايطون بتفحيط حقهم نزل عمر من سيارته بغرور وبجنبه عادل وهو يناظر الي قدامه:اخبارك يا زياد تقدم زياد له وشماغه على كتفه:يسرك الحال هاه تتحداني اليوم؟ ضحك عمر بخبث:اتحداك وبس الا اكسر خشمك بعد زياد وهو يرفع مفتاحه بسخريه:نشوف هه الميدان بيحدد لف عمر وهو يتفل بجنبه ثم يناظر عادل:تركب معي؟ عادل بقلق:هاه ايي عمر وهو يلف يناظر زياد الي ركب سيارته وبيده دخانه:والله ماكون ولد ابوي ان ماطلعته خسران اليوم راح لسيارته ومعه عادل الي ركب بجنبه شغل عمر السياره وهو بدا يطلع فيها اصوات دليل على بداية تفحيطه والجمهور متجمهر على جنب البعض يشجع عمر الي فاز في جوله من قبل والبعض جاي مع زياد ويشجع له بدا عمر يفحط ويدور اكثر من دوره وزياد بجنبيه ويتحداه بسرعه صرخ عادل بخوف: عمرررر خففف بنصدممممم ضحك عمر بحماس وهو يلف الدركسوون مره يمين ومره يسار بجنون:تخسيييي ماصدم انا هههههههههههههه شووف شوفف الورع تمسك عادل برعب وهو يشوف زياد الي تقدم قدامهم بسرعه وكان راح يصدم لولا انه عمر بعد عنه:عمررررر ياحمااارررررر وقف عمر السياره بسررعه وضيق وعادل كان بيصفق بالشباك قدامه:انزلل اجل ولا تزعجنيي كذاا ناظر له عادل وبتوتر:ههه وش بك كمل والله امزح معك ناظر له عمر بضيق وهو يرجع يحرك عالخفيف:نشوف كمل عمر يفحط بجنون وكان باقي اخر لفه والجمهور من برا يصرخون بتشجيع وحماس ابتسم عمر بحماس وهو قرب يفوز على زياد لف على عادل:شفف شفف الفرخ بنفووز ع..... وسع عيونه بصدمه من زياد الي جا مسرع من جهة عادل لكن على المقاعد الخلفيه وصدمهم وقلبت سياره.. مره.... مرتين ....ثلاث ثم وقفت بالمقلوب دخان ثم بدت تحترق على تجمهر الشباب الي كانو قريب والي نزل من الجبال المرتفعه يحلقون عليهم ____________________________________ نوقف هنا.. ريم؟؟ وش توقعاتكم بيصير بلاحداث الجايه؟ فارس؟؟ اعمام ريم وعماتها؟ سلطان.!!! عمر وعادل؟! قمر ولمار؟ دانه ولمى؟!