الفصل1
*البـاࢪت1 🌚💖 ".*
*ࢪوايـة / غابه إبينج 🌚💖 ".*
*
سوء الأحوال في بلدي هو الليـ أدى بيا لكل المصايب الليـ حصلت... بعد تخرجي من كلية التجارة حاولت ألاقي شغل بكل الطرق الممكنة لكن للأسف كل محاولاتي فشلت ومن حظي ان شخص ليا في الخارج قدر يطلعني..أخدت زوجتي وسافرنا من بلد لبلد وربنا كرمني لحد ما إستقريت في إنجلترا انا ومراتي..الحمدلله ربنا كرمني بأحمد و أسماء..أحمد كان عنده 16 سنة في حين أسماء 14...
كنت في الشغل في يوم في الشركة الليـ شغال فيها وكنت مرهق جدا وطلبت من المدير أجازة 4 أيام كدا... في البداية كان رافض لكن بعد إلحاح كتير قالي مش مشكلة تقدر تاخد ودا كان نظرا لمجهودي..
لكن المرة دي مكنتش حابب أقضي الأجازة في البيت..عايز أخد عيلتي ونروح أي مكان كنوع من التجديد..رجعت أكمل شغلي وانا شغال كنت بكلم أصحاب الشغل عن اللي عايز أعمله وكلهم قعدوا يقترحوا عليا أماكن أروحها ولكن كنت روحت الأماكن دي قبل كدا ومن ضمن الناس دي صديقي حسام..وكان معاية في الشغل واحد إسمه إسحق
إسحق شخص صامت عمره ما نطق بحرف..لأنه حسب معتقدات كل الليـ في الشغل إنه أبكم .. الإبتسامة مكنتش بتفارق وشه وكان دايما مبتسم..يخلص شغله ويمشي..يجي في معاد الشغل مضبوط..كان إسحق زي الإنسان الآلي الحقيقة...
وكان حاجات كتير بتتقال عليه من أساطير وبتاع وإن أهله إتقتلوا قدامه وإن معمول عليه سحر وكلام كتير..لكني مكنتش مصدق كلمة من كلام الناس..وكنت بتعامل مع إسحق دايما بشكل لطيف وكنت حابب شخصيته لاني كنت شايفه شخصية محترمة ..المهم إسحق سمع كلامي لما كنت بحكي إني عايز أطلع أجازة..ولأول مرة تحصل أنزل من الشركة ألاقي إسحق مستني تحت...
رحت ناحيته وبدأت أكلمه..
-غريبة ... دي أول مرة تنتظر..دايما كنت تخلص شغلك وتمشي علطول....
-أنت مستني حد ولا أيه ؟
-لقيته بيهز رأسه بأنه أه مستني حد..
-- ومستني مين يا ترى؟
لقيته بيشاور عليا...
وبيشاور على العربية بتعتي....
فهمت من كلامه ممكن عايزني أوصله....
-طيب انت عايزني أوصلك ؟
-عمل حركة بإيده كأنه بيقلي..حاجة زي كدا....
--تمام تعال
ركبنا العربية وقعد يشاورلي على الطرق الليـ أمشي فيها.... لحد ما وصنا لمكان مهجور تقريبا.......
-أيه المكان دا يا إسحق...
--- أصل كنت محتاج أتكلم معاك
بصيت عليه في ذهول شديد..واللي هو مش مصدق أن في صوت طلع منه لدرجة اني حسيت في حد معانا.... لأن يستحيل دا يكون يصوت إسحق..دا صوت راجل ممكن عنده 70 سنة....
--مالك يا محمود ؟ متستغربش...
-أ..أنت بتتكلم؟..
---أيوى..لكن مينفعش حد يعرف.... انا قلتلك لأني بثق فيك وأنت إنسان أمين..... طبعا زي ما انت شايف صوتي عامل إزاي..عملت عملية في فترة من فترات عمري وبسببها صوتي بقى بالشكل دا...عشان كدا قررت متكلمش ولا أسمع حد صوتي..ومحدش قتل عيلتي ولا التخاريف دي....
- انا كنت حاسس كدا برضو وكنت متوقع ان كل دا تخاريف... مبسوط جدا والله اني شفتك بتتكلم..
- -- وانا كان نفسي أكلمك من زمان بس كنت مستني مناسبة كويسة
كنت سامعك النهاردة بتقول انك عايز تطلع اجازة في مكان جديد..في مكان أعرفه حلو جدا لكن محدش بيروحوا لان زي ما انت شفت الناس بتخرف يا محمود بيقولو المكان مكسون وبتاع وفي الحقيقة هو مكان عادي جدا..
- مكان ايه دا ؟
- -- غابة إبينج.... هناك في فيلا جميلة جدا صاحبها سايبها وبيأجرها ببلاش ... كل اللي عليك بتتصل على صاحبها قبل ما تروح وتقله انا هقضي فيها مثلا إسبوع وأسيبها وهو بيقبل كل الناس ومش بياخد أي فلوس والفيلا مجهزة بكل حاجة....
-غريبة بصراحة انا أول مرة أسمع عن حاجة زي كدا .... طيب وايه المميز هناك ....
---انا كنت بروح هناك اوقات اقضي ايام..كان مكان جميل وعشان أكون صريح معاك فيه شوية غموض..بتسمع أصوات بليل للحيوانات كلها منبعثة من جوا الغابة..تحس الغابة كدا فيها شوية إثارة بما أنك طالب التجديد....
فكرت شوية في كلامه يعني حسيت ان ممكن يكون تغيير كويس فعلا.... وأخدت رقم صاحب الفيلا ولقيته بيقلي..
--محدش يعرف اني بتكلم... انا قلتلك لأني بثق فيك وحبيت أتكلم معاك بصراحة..انا واثق إنك هتحفظ سري..
-من غير ما تقول يا إسحق...
-وصلت إسحق البيت وروحت قعدت من زوجتي وأولادي وقلتلهم إن شاء الله من بكرا هنأخد أجازة في مكان كويس أحنا الأربعة وحدنا..
-ردت زوجتي وقالت..
----مكان أيه دا ؟
-غابة إسمها إبينج واحد زميلي في الشغل قالي عليها ...
----هتودينا نقضي الأجازة في غابة ؟
-في فيلا هناك ومن غير أجر دا حسب كلام صاحبي احنا نقدر نطلع في الصبح وبليل نفضل قاعدين في البيت مع بعض..
-زوجتي بعد ما فكرت لقيت الموضوع لطيف..
-الساعة كانت 10 بليل كدا..قلت أتصل على صاحب الفيلا وأسال...
-إتصلت ولقيت الخط فتح ولقيت حد بيتكلم..
-=ألو.
-في اللحظة دي ملامح وشي إتغيرت واللي زوجتي بصتلي بإستغراب..وبتشاورلي بتقلي رد..رد....
-وانا كان جوايا سؤال واحد بس.... دا صوت بني أدم ؟
-=ألو...
--أ..ألو..حضرتك صاحب الفيلا الموجودة في إبينج
=يااه..دا أول إتصال يجيني من 4 سنين..... أه أنا صاحبها..
صوته مكنش طبيعي خالص لدرجة إني مكنتش متحمله... صوت تخين ومع كلامه تحس فيه زي صوت زفير حيوان....
-انا سمعت ان الفيلا بتاعت حضرتك بتتأجر للعائلات .. كنت حابب أستأجرها أربع أيام
-طبعا انا عارف ان الفيلا بدون أجر لكن محبتش أجيبها من الناحية دي..
-=اكيد الليـ قالك كدا..قالك على مكان الفيلا..تقدر تروح وتقعد هناك براحتك..مع السلامة
-وقفل السكة في وشي... مفهمتش ايه الداعي لكدا بس أحسن انا مش عايز أسمع صوت أهله أساسا....
----حصل أيه يا محمود ؟
-متقلقيش محصلش حاجة..بكرا هنجهز الشنط ونروح....
في اليوم اللي بعده صحينا بدري وجهزنا شنطنا وشيكنا على كل حاجة ومشيت بالعربية... شغلت الGPS في العربية لاني معرفش المكان بالتحديد ولقيت نفسي وانا ماشي داخل هعدي على جسر قديم مليان تراب كأن مفيش اي بني أدم بيجي هنا....
مكتوب يافطة بايظة على جمب Epping Forest
كملت طريقي..لكن حصل حاجة غريبة جدا بعد ما عبرت الجسر بشوية لقيت الضباب منتشر جدا جوا...
انا متوقعتش كدا خالص..بصيت على مراتي لقيتها متوترة ورجعت قعدت مع العيال في الكرسي الليـ ورا.....
حسيت إني أخدت خطوة مش مضبوطة... مكنش ينفع اجي المكان دا.....
كملت طريقي وكلي أمل إني ألاقي البيت.... لقيت نفسي مشيت مسافة كبيرة جدا... وكل ما أمشي أكتر كل ما الظلام بيزيد أكتر... المكان دا في حاجة غلط.... لحد ما لمحت نور جاي من قدام.... مشيت ناحية النور لقيت نفسي وصلت للفيلا....
الحمدلله
-إطمنوا الحمدلله وصلنا....
-كنت بقول كدا وانا من جوايا مش خايف انا مرعوب... بصيت في ساعتي لقيتها 10 الصبح.........
-أيه دا.... احنا صاحين على الساعة 6 وطلعنا من البيت الساعة 7 والمشوار فعلا 3 ساعات.... ازاي احنا في وقت الليل دلوقتي..... قلت لمراتي وولادي يلا ندخل الشنط..
-دخلنا الشنط كلها والفيلا الحقيقة كانت فخمة جدا وشكلها عظيم مراتي لما دخلتها نسيت الخوف والولاد فرحوا لكن كان جوايا احساس مش لطيف....
-انا ومراتي كنا بنتفرج عليها وسايبين الولاد يلعبوا... ولقينا أحمد داخل يتفرج معانا...
--فين أختك يا أحمد..؟.
--معرفش انا سبتها تحت..
في اللحظة دي جاني احساس ان في حاجة هتحصل ونزلت جري وانا بنادي يا أسماء يا أسماء..وابص يمين وشمال ولمحت باب الفيلا مفتوح.....
جريت برا الفيلا وبنادي يا أسماء..يا أسماء....... لكن الظلام حالك بشكل متخلف.....
مراتي قالتلي..
--- إهدى يا محمود مستحيل البنت تكون طلعت أصلا دا هي بتخاف من أقل حاجة..تلاقيها مستخبية تعال ندور عليها....
رحنا انا ومراتي ندور عليها في الادوار اللي فوق لكن مفيش أثر وسبت إبني أحمد تحت.....
وبمجرد ما طلعت البلكونه بتاعت الفيلا لقيت أحمد داخل الغابة بيجري...
نزلت وراه بسرعة وقلت لمراتي خليكي هنا وأوعي تتحركي...
يظهر إني إتسرعت لما دخلتها...... لأني حسيت إني مش لوحدي وكمان جيت أفتح الفون مش بيفتح......
ايه اللي بيحصل هنا..... بقيت لوحدي في الظلمة... حاسس بحد معاية معرفش شكله ولا مكانه..مش دي المصيبة.... المصيبة إن إبني في نفس المكان.... يا ترى هو حاسس بأيه ؟ بدأت أبص يمين وشمال ومبقتش عارف راسي من رجلي..
مكنتش عايز أتحرك يمين أو شمال عشان أعرف أرجع..لأن للأسف الضباب كثيف جدا في المكان دا..... حسيت بصوت حركة جاية ناحيتي...
وقفت مكاني ونزلت قعدت على الأرض جمب شجرة..لكن مقدرتش أحدد مكان الصوت..كنت باصص قدامي ولمحت عين بيضا فتحت.....
فهمت ان كان في شخص واقف لكن كان مغمض عينه ودلوقتي فتحها وباصص عليا... في شعره طويل وبيتحرك في إيقاع ثابت...
ولقيت حد حط إيده على كتفي....
صرخت وإتفزعت عشان ألاقي إبني وراية ومعاه عروسة....
*يـتـبـع.....🌚💖 ".*