الفصل 2
قمت من مكاني خايف و جريت ناحية باب مكتب جوزيف بسرعة ، الصوت بيقرب مني و اللمبات بتتكسر و الضلمة بتسود المكان كله و خوفي بيزيد حاولت أفتح مكتب جوزيف لكنه كان مقفول كويس ، في اللحظة دي سمعت حد ورايا بيهمسلي في ودني بصوت عمري ما هنساه : " أحسنلك ... تهرب ... حالًا !! "جريت الناحية التانية ، جريت ناحية باب الخروج ، مفكرتش أبص ورايا ، الصوت بيجري ورايا و فيه صوت صريخ عنيف ، حاسس بحاجة مخيفة بتجري ورايا ، إحساس داخلي قالي إني لو وقفت مش هعيش تاني ، قبل ما أخرج من باب الشركة حسيت بحاجة بتضربني علي رقبتي ، الحمد لله مقدرش يمسكني !.لما روحت لقيت علامة حرق رهيبة في رقبتي علي شكل إيد بشرية ، مش عارف سببها ، العلامة دي مراحتش إلا بعملية تجميل ، مش عارف إيه اللي حصل و لا إيه سببه ... عارف بس إني مرجعتش الشركة من يومها و مش راجع تاني