اكتب الشعر لعيونك باعذب الحانه * مميزه * - ❴🔢❵☟الــبـــــ❴7️⃣3️⃣❵ـــــــارت☟ - مكتملة

❴🔢❵☟الــبـــــ❴7️⃣3️⃣❵ـــــــارت☟

ابتسم وهو يبتعد عن جديلة ويقفل الباب ويناظرها : رايّح أشطب على أموري ، لأجل تكون هنا معي بأقرب وقت دخل مجلس الشيخ راجح ، وناظر نظره سريعة للجالسين فيه ، تنهد وهو يقرب ويدخل وأول ماشافه راجح قطع كلامه ولف له وهو يبتسم وعبد العزيز من لمح إبتـسامته تبسم داخله وأقترب وهو يحب كتفه : مسّيت بالرضا يا شيخ الديّرة أتسـعت إبتسامة راجح وقال : عسى هالوجه ما يبلى يا عـز بن راجح هز رأسه بإبتسامة وألـتفت وهو يناظر لأبو ساجي اللي يسولف ويضحك مع هذا وذاك ، ولا كأنه شيّع جنازه قلوب إثنين ليلة البارح ، تحسّب على العادات اللي ما يقدر يغير فيها شيء ، لام نفسه ان ماله قدره يقول والله ما يأخذها إلا سنـد ، ألتفت على كلام أبو سند اللي قال : عز يا بوي ، بديت تتحرى عن الغدّارين ، خبري ان الضباط اللي تولو المهمة قفلو القضية يوم انك رجعت ناظره عبد العزيز وسكت للحظات بضيق من تذكر سند ، مع ذلك قال : جيّت أسلم على الشيخ ، وطالع من هالمجلس للمحطة اللي أعلنت خبر وفاتي ، بتقصّى عن اللي وصل الخبر لهم ابو ساجي قال : سألوهم ، وحققو لين قالو آمين ، ولكن مديرها خسيس يقول ما يعرف من هو ، ولا رضى يقِر ويعترف هز رأسه وهو يوقف ويعدل عصبة رأسه ، وهو يبتسم : أنا ماني والباقين سوى ، طرق على خشمه بيقول أستأذن منهم ، ومشى على طول وهو يتجه لهـادي ! ركب مع هادي السيارة وتوجهو للمحطة ، ومن نزل وقف وهو ينفض التراب من على ثوبه الأسود ، وعدل غترته السوداء وهو يعقد حواجبه ويناظر للنظرات من حواليّـه ، صحيح الخبر شاع بالديّر كلها ، ولكن وجوده كان كافي يخلق صـدمة ! ما أهتـم لهم ، دخل وهو يفتح باب المحـطة ، ويدور بعيونه لأخوه سعـود ، اللي كان شارهه عليـه إنه هو اللي أعلن خبر وفاته ، ولكن من درى إنه مشقوق حظ ، وعاش الصدمة والحدث غصب عنه تضايق وعاتب قلبه ، ليه يشره على أخوه ؟ عقد حواجبه وهو يلتفت ويقول لأول شخص لقاه : سعود بن راجح وينه ؟ أبتسم اللي وقف وناظره ثم قال : سعود ترك المحطة ، بعدما قطع البث وخرج يوم أنعرف خبر انك بخير تضايق من هالموضوع مع ذلك طلب منه يدله على مكتب مدير المحطة ، بعدها وقف وهو يدق الباب بهدوء ، ومن سمع صوته يأذن له بالدخول ، دخل بهيبته المعتادة اللي تجبر اللي قاعد يوقف على حِيله ، قال المدير بعدما وقف بصدمة : عز بن راجح ؟ عز الله انك ترحب ملايين ولا يكفون ! أنت تدق الباب ؟ أنت تضربه برجلك وتدخل هذا بيتك ومطرحك ناظره عبد العزيز وأبتسم مجاملة وهو يجلس : المرحب باقِي ، ولكنك أكيد تدري بسبب حضوري ؟ المدير جلس وهو يشبك يدينه ببعض : أدري ، وواضح من جيتك بهالوقت ، ولكن صدقني إللي قلته للشيخ والضباط ولخويّك برجع أقوله أنا الخبر أستلمته من شخص ما أعرفه ، كان ملثم وترك المكتوب بيدي وانطلق بحال سبيله أبتسم عبد العزيز وهو يرجع ظهره لورى ويناظره بهدوء : أنا مصـيري أعرف من هو الغدّار ، هالوقت والا بعدين ، ولكن لو عرفت إنك تدري وسكت عن الموضوع ، تعرف عز بن راجح وش بيسوي ؟ بقلب هالمحطة على رأسـك ، بشلها من جذورها وأنهيـها عن الوجود ، أنا أصلا أدور عذر بعد موقفك مع سعـود عقد حواجبه وتقدم وهو يحط يدينه على مكتبه : حط عيني في عينك ، أنت ما تخاف الله ؟ مخليَ أخوي يعلن خبر وفاتي المدير بلع ريقه وقال : هذا عمل يا عز ، لازم نفرق بين حياتنا الشخصية والعمل هز رأسه : أنت والله تردّيت بهالحركة ، وانا ماهي من اطباعي ارد العيب بالعيب روحي جميله واكسب الناس بالطيب وقف وهو يكتف يدينه : أنا بصدقك لأنه عيب أظن إنك كذاب والشنب يملىء وجهك ، ولكنّي حذرتك لو دريت إنك تعرف ، يشهد الله ان كلامي ماراح يبقى كلام وبيتحول لفعل هز رأسه بتوتر وهو يقول : بدري ، زيارتك ما نبيها تكون خفيفة ، اشرب قهوتنا رفع يدينه وقال : قهوتكم مشروبة وكثر الله خيـرك ! - - { نسيم } لابسه ثوب هادي بلون الزهر ، ولابسه عليه مريّلة تغطيه وتحميه من التراب ، ولامه خصل شعرها الامامية لورى بشال بنفسجي ، جالسه بين ورد بيتهم ، بوسط ويحفها من كل مكان وبيدها مجرفة صغيره ، وعلبة صغيرة ، داخلها نوع ورد جديد ، كانت متكفلة بحديقة هالورد اللي ببيتهم ، مثل ما عز متكفل بمرزرعة جدِيلة كل واحد متكفل بالشيء اللي يحبه ، مسكت العلبة بكفينها اللي لابسه عليها القفاز الاسود الكبير وأخذت بيدها الثانية المجرفة وهي تشيل الوردة رمت العلبة قريب منها وأنحنت وهي تزرعها بمكانها اللي فرغت التراب منه ، سحبت إبريق الموية وهي ترش على الورد ، ثم أبتسمت بفرحة وهي تترك الإبريق على جنب وتناظر للوردة : هلا بك ببيتك الجديد ياوردتي ..