❴🔢❵☟الــبــــ❴ ألأخير ❵ــــــارت☟
*ـ ࢪواية. حكايتي مع الجن🥳🥀↻≯🍒⸙•♡»»)) 5/6/7الاخير
غرام الروايات
تابع قناة غـ͓̽ـرٍآمـ͓̽ـ آلَرٍوٌآيـ͓̽ـآتـ͓̽ـ 🧚♀️📚💅💫 في واتساب: https://whatsapp.com/channel/0029VakuN1aHwXbJf5jj7w0J
#حكاية_مع_الجن_في_شقتي_الزوجيه "الجزء الخامس".
(قصه حقيقيه، حدثت بالفعل)
الجزء ده هيكون تجميع لأكتر المواقف المرعبه اللي حصلت معايا علي مدار الخمس سنين اللي عيشتهم في الشقه ديه و أزاي اتعاملت فيها و اتعودت و عشت عادي مع العفاريت و مبقيتش أخاف منهم.
_زي ما قلت لكم إني رجعت شقتي تاني بعد ما قعدت عند أهلي أسبوع و بدأت اتظاهر بعدم الخوف و اتصرف عادي "و أهم حاجه كنت مركزه فيها المحافظه عالأذكار و الصلاه في مواعيدها و بالذات أذكار النوم و آية الكرسي عالطول في لساني"، و بدأ جوزي يشغل سورة البقره عاللاب و اللاب يطفي بعد شويه قمت مشغله التسجيل علي إذاعة القرآن الكريم و قلت وروني بقي هتطفوه ازاي؟
و حصل حاجه غريبه جدااا.
و بعدها حاجات مش حاجه واحده منها اللي كان بيتكرر و منها اللي حصل مره واحده بس ! هحاول اذكرهم بالترتيب.
١. لما كنا نسيب الراديو شغال علي إذاعة القرآن الكريم و نخرج نرجع نلاقيه متحول علي إذاعة الأغاني ! و ده من المواقف اللي كانت بتتكرر.
٢. لما اكون في المطبخ اسمع صوت تكسير جامد في الصاله بره أكن النيش وقع باللي فيه اتفشفش كله، اطلع ملاقيش حاجه، ده كان الهزار بتاعهم حاجه خفيفه كده بعد كده لو سمعت اي صوت تكسير و انا في المطبخ ببقي عارفه انهم بيلعبوا بره فكنت بطنش. و ده برضو من المواقف اللي كانت بتتكرر.
٣. الكوابيس المستمرة !!!
و ديه بقي حدث و لا حرج....
_كنت دائما احلم بواحد بيخوفني و افضل اقرأ عليه آية الكرسي و هوه يقرأ معايا لحد ما اوصل لحد "ولا يؤده حفظهما" يختفي و اصحي من النوم وده كان بيتكرر دايما.
_و مره حلمت أن فيه واحد اخدني نزل بيا في ركن الحيطه تحت الارض.
_و مره حلمت بستات كتير لابسين اسود و وشهم متغطي قاعدين حوالين السرير بتاعي و انا كنت مفزوعه جدا من منظرهم.
_و كتير بقي كنت احلم إني صاحيه في مكاني عالسرير بس مش قادره احرك جسمي و لا اقوم من السرير و أكن عيني مفتحه و شايفه كل حاجه حواليا بس مش قادره اتكلم و لا أنادي علي حد و أفضل علي كده متكتفه في مكاني لحد ما أقرأ آية الكرسي كلها و أول ما اخلصها جسمي يفك و أصحي، بعد كده عرفت إن ده اسمه "الجاثوم".
٤. مره كنت مسافره عند اهلي و جوزي حكالي أنه أول ما دخل ينام حلم بواحده شبهي لابسه لبسي و ماشيه في الشقه فاستغرب ازاي كده و انا عند أهلي فسألها هو انت فلانه؟ "اللي هوه أنا يعني" قالت له: اه أنا فلانه، بصوت مخيف و راحت تنام جمبه عالسرير و فجأه بدأت تخنق فيه و هوه يحاول يبعدها عنه و فضل يعافر معاها لحد ما صحي.
_بعد ما خلفت أصحابنا خفوا شويه عني و لكن برضو كان ليهم حركات من حين لآخر.
٥. مره بنتي كان عندها شهرين و كنت برضو لوحدي في الشقه و جوزي كان مسافر و كانت جمبي بتعيط فبشيلها عشان اسكتها لقيت اللي بيقولي "يا ماما" !!!
اتفزعت و فضلت متنحه و باصه لها دقيقتين كده و هيه لسه بتعيط و بعد كده استوعبت أنهم بيهزروا معايا، بلعت ريقي و اخدت بنتي في حضني و استعذت بالله من الشيطان الرجيم. و معادوهاش تاني.
٦. ابقي منيمه بنتي في سريرها و هيه بيبي برضو في أمان الله و عامله لها كل اللازم و اروح المطبخ عشان اعمل الغدا و اول ما اندمج اسمع صوت صريخها جايب من آخر الشقه أسيب اللي في أيدي جري و اروح اشوف مالها، الاقيها في سابع نومه !!! بقيت أخدها معايا المطبخ في الكاريكوت بتاعها تبقي ادام عيني، و اسيبهم يلعبوا براحتهم بره و اطنش.
٧. بنتي أول ما بدأت تحبي مره كانت قدامي و سرحت من الصاله لحد باب الحمام و اول ما عدت من الطرقه اللي قدامه علي اوضة الاطفال و غابت عن عيني لحظه واحده بس لقيتها بتصرخ جامد جدااا و راجعه جري و علامات الفزع علي وشها و لونها مخطوف معرفش شافت ايه.
٨. مره كنت بره و راجعه البيت فسبقت عالسلم عشان كنت عايزه ادخل الحمام و كنت مستعجله، حطيت المفتاح في الباب و بفتح و لسه هنطلق عالحمام سمعت صوت واحد بيتكلم جاي من اوضة نومي و كنت مطفيه النور قبل منزل، قلت معقوله حد من أهل جوزي أخد منه المفتاح و جه من غير ما يقول و كمان قاعد في اوضة نومي بيتكلم في التليفون !!! الكلام ده خد أقل من نص دقيقه تفكير في دماغي و فضلت متسمره في مكاني في الصاله بفكر ادخل عليه و لا استناه لما يخلص و يطلع و نسيت بقي أني كنت عايزه ادخل الحمام اصلا، المهم قلت لازم أواجه مبدهاش و يطلع زي ما يطلع و استعذت بالله من الشيطان و سميت الله و مشيت ناحية اوضة نومي بالراحه و مديت أيدي علي كوبس النور بالراحه و قمت مولعاه فجأه و أنا حابسه انفاسي و الدم هربان من عروقي من الخضه، و برضو ملقيتش حاجه رجعت قعدت عالكنبه اخد نفسي من الموقف، بس المره ديه كان هزارهم تقيل سيكا، خضوني بجد و الحمام راح لحاله من الخضه.
٩.عيالي قبل ما يعرفوا يتكلموا و يفسروا الكلام كويس كانوا دايما يشاورولي عالشباك بتاع الصاله و مره بنتي قالت لي "عمو" !!!
١٠. الساعه ٢ الصبح كنت اسمع صوت مفتاح في طبلة الباب أكن حد بيفتح الباب، طب ها افتح و ادخل اهلا وسهلا تعالي، برضو مفيش حد، و يوميا علي كده، بعد كده بقيت عارفه الميعاد بتاعهم فبقيت اطنش، و عيالي يجروا عالباب يفتكروا إن ابوهم عالباب و يبقوا عايزين يفتحوا، اقولهم لا تعالوا لو بابا هوه هيفتح و يدخل.
١١. مره كنت نايمه بابني في أوضة الأطفال و انا نايمه حسيت اني حاطه أيدي علي رأس ابني و ماسكه شعره و هوه علي يميني وصحيت و أنا حاسه أيدي لسه في شعره ببص لقيت ابني نايم علي شمالي مش علي يميني.
١٢. لما كنت بنام في أوضة الأطفال غالبا ما كنت بسمع صوت شخير راجل عالي جدا جاي من عند البلكونه، قلت عادي ممكن يكون جارنا اللي فوقينا هوه اقرب واحد لينا، و لما جوزي كان بيام فيها و مبيقوليش أنه سامع حاجه كنت بقول يبقوا أصحابنا و بيزاولوني فكنت بطنش زي باقي الحاجات اللي كنت بطنشها في الشقه الغريبه ديه، لحد ما في مره كنا نايمين مع الولاد في أوضتهم قبل ما اسيب الشقه بحوالي ٦ شهور كده، و الشيخر اشتغل ! لقيت جوزي بيقولي هوه جارنا اللي فوقينا ده مش لاقي حته ينام فيها غير جمب البلكونه و يقرفنا بصوت شخيره لحد هنا؟ قلت له: علي فكره جارنا عزل من شهرين و شفت عفشه و هوه نازل من الشباك و انت كنت مسافر و نسيت أقولك !!!
أتاريه كان سامعه كل السنين اللي فاتت ديه زيي، و قسما بالله جارنا ده كنت بصحي ساعات علي صوته كذا مره بيزعق بطريقه هستيريه مع مراته و عياله و بيكسر في الشقه حرفيا لدرجة كنت بخاف و الله و اقول لجوزي اطلع حوشه ليعمل في مراته و عياله حاجه و هوه يقولي ملناش دعوه، تقريبا كان بيتعمل معاه الواجب برضو من أصحابنا لحد ما ساب الشقه و عزل.
_و بعد ما عدي خمس سنين عالوضع ده (و ده اللي افتكرته من اللي كان بيحصل معايا من تفاصيل تانيه كتييير) حصلت ظروف و كان لازم أنقل و أرجع محافظتي مش بسبب إن الشقه مسكونه و الكلام ده، لاء !!! لأن زي ما قلت لكم جوزي في أول الجواز كان بيحاول يأكد لي و لكل الناس إني مسحوره و العيب فيا و جايبه العفاريت معايا عشان ميتحكمش عليه يبيعها و يجيب غيرها و أنا في المقابل طول الخمس سنين مكنتش بتكلم و لا بحكي اي حاجه من اللي بتحصل معايا بعد موقف الحمام اللي كل الناس عرفته و بعدها رجعت شقتي و اتقفل الكلام في موضوع الجن و العفاريت ده تماما لحد ما سبتها و عزلت منها، و أهلي طبعا كانوا مش بيزوروني كتير خالص كام مره يتعدوا عالصوابع خلال خمس سنين و أمي بالذات كانت بتخاف تيجي عندي و لما رجعت محافظتي تاني معاهم برضو كانت بتخاف تيجي لي بيتي أو تاخد أي حاجه من عندي باعتبار إني جايه من شقه مسكونه و جايبه العفاريت معايا في العزال !!!
حتي اللي كان بيزورني أحيانا لما الليل يدخل و الهدوء يعم المكان أغلبهم كانوا يقولوا لي هيه الشقه القعده فيها بالنهار حلوه و الشمس داخلاها بس بالليل الجو ده مخيف ازاي بتباتي فيها لوحدك و جوزك مسافر !!!
و فعلا بدأت أحضر حاجتي عشان أنقل لمحافظتي و واحد قريب جوزي عريس لسه خاطب هوه اللي كان هياخدها بعدنا يسكن فيها و يبدأ حياته مع عروسته.
و طبعا كان سامع عن الشقه و اللي حصل معايا فيها أول الجواز لأن ده كل الناس عرفته وقتها و طبعا بسبب موقع الشقه الجميل و مساحتها الواسعه اختار أنه يصدق جوزي و إن أنا اللي أكيد المشكله فيا و الشقه مفيهاش حاجه.
و مشيت من الشقه أنا، و العريس بدأ يوضب من أول و جديد لو هقولكم أنه حرفيا هدها و بناها من جديد مش هكون مبالغه و الله مسابش حاجه إلا ما عملها سيراميك غير، حيطان هد، و فتح مطبخ امريكاني، و هد حيطين و قفل الوميتال من الأرض للسقف عشان الفيو يبقي احلي، غير الحيطان اللي اتبيضت من أول و جديد و حولها تماما و غير معالمها أكنها شقه جديده تشطيب سوبر لوكس عالمفتاح.
بس اللي حصل فيها بعد كده و اللي جوزي عرفه و جه حكاهولي خلاني أتأكد أن المشكله مش عندي و خلاني أسأل بقلب جامد و أعرف الشقه ديه حكايتها أيه؟
و ده اللي اكتشفت إن جوزي كان عارفه من البدايه و مخبيه عني طول السنين اللي فاتت !!! يتبع
=لو عجبتكم لازم تدعموني وتعملوا لاف وكومنت القصه ، والشير بيفرح واشاره لاصدقائكم خليهم يقروا معاكم. ..والناس ال بتابع ف صمت تظهر وتتفاعل عشان اعرف القصه بتوصل لمين.. وشكرا مقدما ❤️
#يوسف_مصطفى
#حكاية_مع_الجن_في_شقتي_الزوجيه"الجزء السادس".
(قصه حقيقيه، حدثت بالفعل)
_بعد ما عزلت من الشقه و رجعت محافظتي و العريس قريب جوزي أخدها و وضبها من أول و جديد و تجاهل الكلام اللي سمعه عن اللي حصل لي في الشقه في أول جوازي و دخل بقلب جامد حصلت المفاجأه و جوزي جه جري يحكي لي !!!
_صاحبنا اتجوز من هنا و أصحابنا بدأوا يلاعبوه من هنا.
راح جري علي جوزي يسأله ازاي كنا عايشين في الشقه ديه ٥ سنين و هوه عروسته طفشت عند أمها من اول اسبوع و رافضه ترجع إلا أما حد يجي يقيم معاها اقامه كامله او يبيع الشقه و يشوف غيرها.
جوزي سأله: ليه كده؟
قاله: إن عروسته كانت قاعده في أمان الله مره في الصاله، و مره واحده لقيته معدي ادامها جاي من اوضة النوم دخل المطبخ، راحت قامت تشوفه عاوز ايه ملقتوش في المطبخ رجعت لقيته لسه نايم في اوضة النوم !!!
و عليها، راحت واخده بعضها و طالعه علي أمها عدل و رافضه ترجع، و هوه مش عارف يعمل ايه ؟
_رحت قعدت و سندت ضهري عالكنبه و خدت نفس عميييييق كده، و بكل هدوء قلت لجوزي:
احكي لي بقي بالراحه كده الشقه ديه حكايتها ايه و ايه اللي تعرفه عنها؟ و انت اشترتها من مين؟ و مين اللي كان عايش فيها قبل ما أنا ادخلها؟ و كان بيحصل فيها ايه الشقه ديه؟
قالي: حاضر، حكي لك كل اللي اعرفه.
و بدأ يحكي: أنه قبل جوازنا بخمس سنين لقي أعلان في الوسيط عنها و كان سعرها قليل بالنسبه لمساحتها و موقعها فلقاها فرصه متتعوضش و لما راح يشوفها فوجئ إنها كانت لسه متأجره لمكتب دعايه و أعلان و كان فيه يافطه اعلانيه كبيره حديد مصروف عليها و متكلفه علي سطح العماره باسم المكتب ده و الغريب أن أصحاب المكتب سابوا اليافطه زي ما هيه و مشيوا و هوه محطش في باله و قال انا كده كسبت يافطه كمان ممكن يأجرها لاي حد و يكسب من وراها فلوس، و بعد كده عاش فيها هوه و اخوه و عملوها مكتب شغل برضو و كان بيدخلها أصناف و اشكال و أخر اليوم يناموا في اوض النوم و كمان كانوا بياجروا الاوضتين بتوع النوم كفندق لأي عميل جاي من محافظه تانيه و عايز يبات.
و حكي له أنه مره نزل يجيب أكل و كان أخوه لوحده في الشقه رجع لقاه واقع ادام باب الحمام دماغه مفتوحه و سايح في دمه و مغمي عليه و لولا أنه لحقه كان ممكن يموت و بعد ما فاق قاله: انا مش عارف ايه اللي حصل بس انا اتزحلقت معرفش ازاي و مش فاكر حاجه.
(للعلم نفس المكان ده أنا وقعت فيه مرتين و انكسر دراعاتي الاتنين و اتجبست في المرتين مره علي باب الحمام و مره قدام الحمام و اتزحلقت برضو معرفش ازاي !!!)
و حكي لي إن مره تانيه كانت أخته و ابنها في الشقه و الولد نزل يشتري حاجه و هيه كانت فارده عالسرير عادي مش عايزه تنام و لا حاجه لقيت نفسها مش عارفه هيه نايمه و لا صاحيه و ابنها جاي من وراها بسكينه عايز يدبحها و مثبتها و مش عارفه تدور وشها تشوفه و تقوله: بقي تعمل كده في امك؟ يقولها: اه، و هيه تعافر بتحاول تخلص منه لحد ما فتحت عينها و عرفت أنه كان كابوس طلعت تجري من الأوضه، لقيت ابنها بيخبط عالباب عشان تفتح له.
(أوضة الأطفال برضو !!! للناس اللي متابعه معايا من الاول)
غير بقي الموقفين اللي حصلوا معاه هوه شخصيا و اللي ذكرتهم في الجزء الأول (للناس المتابعه برضو)
_قلت له: و بعدين، كمل !!!
قالي: الصراحه أنا رحت سألت البواب عن العماره و أصحاب الشقه ديه بالذات، و عرفت أن العماره ديه اتبنت في بداية التمانينات و اصحابها الأصليين اللي باعوا لي همه اول ناس سكنوا فيها و عاشوا فيها حوالي ١٥ سنه و بعد كده نقلوا منطقه تانيه و قفلوا الشقه قيمة سنتين كده و بعد كده أجروها لواحد قريبهم عريس جديد يتجوز فيها و عاش فيها حوالي ٥ سنين و سابها و مشي برضو معرفش ايه السبب؟، و بعد كده بقوا يأجروها لأي حد يقعد شويه و يمشي لحد آخر ناس أصحاب مكتب الدعايه و الأعلان مكملوش ٦ شهور و صرفوا و عملوا يافطه و سابوها باليافطه و مشيوا !!!، بعدها أصحابها عرضوها للبيع نهائي بمبلغ مش كبير و أنا شفت إعلانها في الوسيط لقيتها لقطه اشتريتها.
قلت له: و مسمعتش عنها أي حاجه غريبه؟ حادثه مثلا حصلت فيها، او الناس دول كان ليهم علاقه بالسحره مثلا كانوا بيعملوا فيها حاجه؟ قالي: لا مسمعتش أي كلام غريب عنها غير إن كل اللي سكنها بعد ما أصحابها الأصليين مشيوا منها كان يسكن شويه و يمشي ايه السبب؟ الله اعلم !!!
رحت حلفته عالمصحف و بأيمانات ربنا كلها إنه لما كان قاعد فيها هوه و اخوه محصلش مره و جابوا فيها بنات و لا عملوا فيها حاجه غلط ( مع إني متاكده أنه ملوش في الكلام ده بس دماغي هتشت عايزه اعرف مشكلتها ايه الشقه ديه) !!!
راح حلف أنه محصلش حاجه من ديه و الناس كانت تطلب لهم البوليس.
بس مره كان فيه واحد صاحبه قصده في خدمه إنه كان معاه ثلاثه او اربعه معارفه علي سفر و عايزين مكان يباتوا فيه، فبيتهم في الشقه، بس كان فيهم واحده بتاعت سحر و أعمال و كانت عينها من جوزي و لمحت له لما شافته لما جه عشان يفتح لهم و قعدت اتكلمت معاه كتير بس هوه مدهاش وش و شاكك أنها عملت حاجه في الشقه أو عملت له هوه حاجه، (بس أنا قلت برضو مش للدرجه ديه و ممكن هوه موهوم بكده عشان هيه بتاعت سحر و كده).
_المهم خلص كلامه علي كده،
و أنا بعد ما سمعت منه قلت له الصفحه ديه اتقفلت خلاص و الحمد لله إن أنا خرجت سليمه أنا و عيالي و متجبليش سيرة الشقه ديه تاني.
راح قالي: عامتا أنا فيه واحد صاحبي يعرف واحد بيقول أن معاه جن مسلم بيساعده و انا هاخد العريس و صاحبي و هنروح له أحنا الثلاثه و هنخليه يكشف عالشقه ديه و يقولنا ايه اللي فيها !!!
يتبع، في "الجزء السابع" و الأخير إن شاء الله.
=لو عجبتكم متبخلوش عليا وادعموني بالاف وكومنت برايكم وشير...وبعتذر ليكم بعد القصه دي ممكن اغيب فتره منزلش قصص ..افتكروني بالخير دايما ..اتمني اكون فرحتكم بقصصي..♥️
#يوسف_مصطفى
#حكايتي_مع_الجن_في_شقتي_الزوجيه"الجزء السابع والاخير".
(قصه حقيقيه، حدثت بالفعل)
_بعد ما عزلت و استقريت في شقتي الجديده و اتأكدت إن الشقه الاولانيه فعلا كان فيها حاجه غلط من كلام جوزي و من اختفاء الظواهر الغريبه اللي كانت بتحصل في الشقه القديمه و فعلا حسيت بفرق ملحوظ بعد ما نقلت، قلت الحمد لله انها عدت علي كده و طلعت منها سليمه بكامل قواي العقليه،
بس جوزي كان عنده فضول و أخد العريس و صاحبه و طلعوا عالراجل اللي صاحبه قاله إنه معاه جن مسلم و هيكشف له عالشقه.
و حكي لي الأتي:
_الراجل سأله علي عنوان الشقه و مكانها بالضبط و سكت شويه كده و بعدين قاله: الشقه ديه مسكونه، و مش من جن و لا اتنين، لااا ديه فيها قبيله عايشه فيها و الله يكون في عون اللي قاعد فيها.
أنا طبعا سمعت الكلام و بدأت استرجع الشريط تاني كله من خمس سنين و حمدت ربنا إنه هيأ لي الظروف و مشيت منها، بعد ما اتدعكت مع الجن و العفاريت و بقيت خبره بالتجربة و السماع و القراءه في الباب ده بصفه عامه.
و طبعا كانت تجربه صعبه استخلصت منها الآتي:
١. لما تحب تسكن في شقه أو تنقل لشقه يفضل إنك تكون أول واحد يدخلها لأنك متعرفش مين سكنها قبلك و لا حصل معاه ايه و لا كان بيعمل فيها ايه !
و ده ليه بقي؟ عشان رقم
٢. إن "الجن أنواع".
و منهم "عمار البيوت" و دول موجودين في كل البيوت و بيسكنوا سقف البيت و ممنوع عليهم يظهروا بصورتهم الحقيقيه لأهل البيت (زي ما هو ممنوع علي كل أصناف الجن بصفه عامه و بيشوفونا لكن احنا منشوفهمش بنص القرآن {إِنَّهُ يَرَاكُمْ هُوَ وَقَبِيلُهُ مِنْ حَيْثُ لَا تَرَوْنَهُمْ ۗ إِنَّا جَعَلْنَا الشَّيَاطِينَ أَوْلِيَاءَ لِلَّذِينَ لَا يُؤْمِنُونَ} لكن ممكن يتجسدوا في صورة كلب أسود أو حيه أو ثعبان و ده ثابت في السنه، لكن يتجسدوا في صورة بني آدمين و يعيشوا ما بينا متحصلش و اللي يقولك غير كده كذاب في أصل وشه).
و العمار بيكونوا تبع حال أهل البيت من حيث الصلاح و عكسه (عشان كده لما تسكن في شقه كان فيها حد قبلك أنت متعرفش الناس دول كانوا علي طاعه و لا معصيه و بناء عليه عمار البيت كانوا طيبين و لا أشرار).
و الجن منه المسلم و الكافر، و الطائع و العاصي.
و الخبيث منهم اسمه "شيطان" و ده اللي بيكون مؤذي و أشدهم أجراما يسمي "مارد"، و من يتميز بقدرات خارقه أكثر يسمي "عفريت" زي اللي كان في قصة سيدنا "سليمان" و "بلقيس" ملكة سبأ.
أما "القرين" فهو اللي بيكون ملازم للإنسان منذ ولادته و هوه اللي بيوسوس له و عمره اطول من عمر الانسان، يعني ممكن الإنسان يموت عادي و قرينه لسه مماتش، و الله أعلم ده بقي اللي ممكن يظهر في المكان اللي بيحصل فيه حادثه أو جريمة قتل و الناس تقولك روح القتيل مش مرتاحه بتحوم حوالين المكان، الروح بتروح للي خالقها و بتفضل في عالم البرزخ لحد ما القيامه تقوم ترجع تاني للجسد عشان الحساب و موصلناش عنها عن رسولنا غير كده {وَيَسْأَلُونَكَ عَنِ الرُّوحِ ۖ قُلِ الرُّوحُ مِنْ أَمْرِ رَبِّي وَمَا أُوتِيتُمْ مِنَ الْعِلْمِ إِلَّا قَلِيلًا}.
٣. الشقه المسكونه هتسمع فيها أصوات، و ممكن تشوف فيها خيالات معديه بسرعه و أول ما تنتبه مش هتلاقي حاجه، و ممكن تحس إن جسمك سخن أو سقع فجأه و جالك قشعريره.
٤. الشقه المسكونه هتشوف فيها كوابيس غريبه باستمرار.
هتشوف حد بيخنقك، حد بيخوفك أو بيطاردك و بيجري وراك، حد بيحاول يقتلك، و في الغالب لو أنت معاك حد تاني في الشقه ديه مفيش غيركم، هتحلم بيه أنه بيأذيك و هوه برضو غالبا ما هيحلم بكده عشان الشياطين يحرشوا ما بينكم و يكرهوكم في بعض لو مأذيتوش بعض أقلها تمشوا و تسيبوا الشقه.
و ده اللي حصل معايا لما حلمت بواحد شبه جوزي بيشدني لتحت السرير و اللي حصل معاه لما كنت عند أهلي و حلم بواحده شبهي بتحاول تخنقه و اللي حصل مع اخته و ابنها لما شافته بيحاول يقتلها و جوزي كمان راح مكمل و قايلي أنه في أول كام يوم لينا في الشقه لما كان الليل يدخل و يبص لي كان بيحس بخوف مني و أنا افتكرت أنه مره قاللي انا خايف لتقتليني! و كنت فاكراه بيهزر بس واضح أنه وقتها كان خايف مني بجد، و الله اعلم التانيين اللي كانوا بيسكنوا شويه و يمشوا حصل معاهم ايه !!!
٥. "أوعي تسلم دقنك لحد".
أوعي تروح لأي حد يقولك أنا شيخ و بطلع الجن إلا أما تتأكد من دينه و يكون حد موثوق فيه، لأن أغلب اللي بيشتغلوا الشغلانه ديه نصابين و دجالين و مخاويين جن و عاملينها سبوبه، هتقولي: طب و لو الجن مسلم؟، هقولك: و أنت ايش عرفك أنه مسلم؟ هتقولي: هوه قال كده، هقولك: ارجع لقصة الرسول صلي الله عليه وسلم مع سيدنا أبو هريره عن الجن اللي كان بيسرق من بيت المال و أبو هريره لما راح حكي للرسول الرسول قاله: "صدقك و هو كذوب" يعني الجن بيخدع الإنسان و بيكذب عليه عشان كده ربنا قال في سورة الجن {وَأَنَّهُ كَانَ رِجَالٌ مِنَ الْإِنْسِ يَعُوذُونَ بِرِجَالٍ مِنَ الْجِنِّ فَزَادُوهُمْ رَهَقًا} يعني من الأخر كده ممنوع تتعامل مع الجن و لا تصدق حد يقولك أنا معايا جن طيب و بعالج بيه، أي حد بيتعامل وش مع الجن يبقي مخاوي و ساحر عالطول، هتقولي: و أنا أعرفه أزاي؟ هقولك: حاجتين ملهمش تالت: هيسأل عن أسم أمك، و هيطلب منك فلوس !!!
هتقول طب و ايه العمل و احمي نفسي ازاي من أذي الجن؟
ده اللي هتعرفه في رقم
٦. "المواجهه خير من الدفاع" و سلاحك "القرآن، الأذكار".
الحل المناسب لحل أي مشكله و عن تجربه سواء مع الجن أو في الحياه بصفه عامه هوه المواجهه مش الهروب و أنك تكون واثق في ربنا أنه هيساعدك تحل أي مشكله تقابلك.
{الَّذِينَ آمَنُوا وَتَطْمَئِنُّ قُلُوبُهُمْ بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ}.
أنت لو جبت شيخ هيعمل أيه غير أنه يقرأ الرقيه الشرعيه و شوية قرآن و بعد كده يقولك مبروك البيت مسكون أو انت ملبوس أو مسحور ؟
يبقي انت يا بطل اللي تقرأ "الرقيه الشرعيه" بنفسك و ده الأفضل، طب لو مش قادر و الجن متسلط عليك جامد؟ هقولك شغلها صوت اسمعها و عليك بسورة "البقره" عالطول شغاله في البيت و "القرآن" عموما فيه بركه و بيطرد الشياطين.
و آية الكرسي، آية الكرسي، آية الكرسي...
عالطول في بؤك صبح و ليل و بعد الصلوات و قبل ما تنام و المحافظه عالأذكار بالذات "أذكار النوم" و المحافظه عالصلوات و تجنب المعاصي بكافة أشكالها لأن الشيطاين بتحضر في الأماكن اللي بيعصي الله فيها.
٧. " الآذان يطرد الجن"
لو دخلت أي مكان و حسيت بحاجه غريبه فيه و شاكك أن فيه جن أذن بصوت عالي الشيطان بيهرب من صوت الآذان و الكلام ده فيه حديث ممكن تبحث عنه.
٨. "دعاء دخول الخلاء".
مهم جداً تقوله قبل دخول الحمام، و أوعي تكب ميه سخنه أو زيت مغلي فيه من غير ما تكون محصن نفسك بالدعاء و الافضل متكبش أي حاجه مغليه في الحمام، ممكن تأذي حد من الجن دون أن تدري و يكون سبب في عداوة الجن لك و تسلطه عليك للانتقام منك.
٩."الجن العاشق".
التسميه قبل خلع الملابس لأن ذكرك اسم الله عند خلعك ثيابك هوه الستر ما بينك و بين أعين الجن، و كذلك "دعاء النظر في المرآه أوعي" تنساه، و التهاون في الكلام ده هوه اللي بيسبب الجن العاشق و الله أعلم.
و بقول تاني الأذكار، الأذكار، الأذكار هيه حصنك الحصين.
١٠. "الجاثوم".
قد يكون بسبب ضغوطات نفسيه و علماء النفس سموه ب"شلل النوم" و تقدروا تبحثوا عنه، و قد يكون تسلط من الشيطان، و في كلا الحالتين أيا ما كان هو أنا مخلصتش منه إلا بالمحافظة علي أذكار النوم و ده عن تجربه.
١١. "رقية الأطفال".
الأطفال الصغيرين يا جماعه أحنا بنقصر معاهم، لازم عالطول نرقيهم، صبح و ليل و قبل ما يناموا، و لما تبقوا خارجين و لا رايحين تزوروا حد و لا حد هيشوفهم لأول مره أرقوهم قبل ما تدخلوا بيهم علي أي حد و لا حد يجيلكم، همه أضعف منا بالذات السن الصغير ما دون الكلام أحوج للرقيه من العين و الحسد و شياطين الإنس و الجن و مياكلوش و لا يشربوا من أيد أي حد، لازم بيت واثقين في أهله و الأفضل متسيبوهمش عند حد لا قريب و لا غريب عيلك في أيدك تحت عينك.
١٢. "حرص و لا تخونش"
بلاش حد غريب يدخل أوض نومكم و لا يفتح دواليبكم و لا ياخد حاجه من هدوكم بالذات اللي فيها ريحتكم، و بلاش ننزل صورنا و صور عيالنا عالفيس أبوس أيديكم لو مش هتاخد عين و لا حد هيحسدك و ده العادي طبعا ممكن حد نفسه ضعيفه ياخدها يعملك بيها سحر و لو بنت ممكن كمان يتفبرك لها صور فيديوهات يبتزوها بيها و في كل الأحوال احنا اللي بنجيب الأذي لنفسنا لما حياتنا تبقي مفتوحه عالسوشيال ميديا و أمة لا إله إلا الله كلها شايفانا أكنهم قاعدين معانا في بيوتنا بالظبط و بعد كده نقول هيه المصايب نازله علينا و حياتنا متعطله و واقفه كده ليه !!!
١٣. "المس" فقط مذكور في القرآن.
ميجيش بقي حد يقولي فلان "ملبوس" ! أسمها "ممسوس"
لكن السحر مذكور في القرآن عشان كده ممكن تقول فلان "مسحور" و حتي المسحور لو لجأ لله بصدق و حافظ عالصلوات و الأذكار و بعد عن المعاصي هيضعف خادم السحر اللي ملازمه و ممكن بعون الله السحر كمان يتخلص منه و ينفك لوحده و مفيش حاجه كبيره علي ربنا {إِنَّ اللَّهَ عَلَىٰ كُلِّ شَيْءٍ قَدِيرٌ}.
١٤. "سحر و لا مرض نفسي".
بعض أعراض المس و السحر و تسلط الجن عالانسان بتشبه أعراض بعض الأمراض النفسيه، عشان كده مش أول ما تحس أنك متغير أو مخنوق أو ملكش نفس تعمل أي حاجه و أحيانا ممكن توصل إنك تسمع أصوات أو تتكلم مع ناس تطلع تجري عالدجالين و أنا مسحور و لا معمولي عمل !!!
راجع طبيب نفسي و أتأكد الأول أنك مش بتعاني من أي أمراض نفسيه و لا عضويه كمان أنت متعرفهاش و بعد كده أبدأ فكر إنك محسود أو ممسوس أو حد ساحر لك، و بفكرك تاني محدش هيساعدك غير نفسك لازم أنت اللي تاخد القرار و تبدأ تعالج نفسك بالرقيه الشرعيه و المداومه عالصلاه و الأذكار و القرآن !!!
١٥. "اللي يخاف من العفريت يطلع له".
مقصدش المعني الحرفي للجمله بس أنت لو خفت خيالك هيشتغل و هتتوهم و هتتصور حاجات مش موجوده أصلا.
عشان كده جمد قلبك و الشيطان بيخاف من اللي مش بيخاف منه زي ما كان بيخاف من سيدنا عمر رضي الله عنه.
و خليك فاكر {إِنَّ كَيْدَ الشَّيْطَانِ كَانَ ضَعِيفًا}.
١٦. "اللي مبيخافش من حاجه، الناس بتخاف منه".
و ديه بقولها و أنا حزينه بجد.
إن الناس بتخاف من الشخص اللي اتعرف عنه أنه اتعامل مع ظواهر غريبه بالذات عالم الجن و العفاريت (زي ما الناس كانت بتخاف تيجي تزورني حتي أقرب الناس ليا كانوا يخافوا يجوا عندي)، و مش بعيد كمان يقوله عليه مخاوي جن (و ده للأسف اللي جوزي قالهولي بعد ما رجع من عند الراجل اللي كشف عالشقه، قالي: أنت اكيد معاكي جن ملازمك أقوي من اللي كانوا في الشقه عشان كده عرفتي تعيشي فيها ٥ سنين و مكنش فارق لك!)،
و الكلام ده مش صح طبعا،،،
أنا لجأت لربنا بالذكر و القرآن و الدعاء و هوه اللي حماني لحد ما عديت التجربه الصعبه ديه، و الكلام ده بيفكرني بقصة "دراكولا" الراجل اللي كان عايش وحيد في بيت لوحده بعيد عن العمار فالناس خافت منه و طلعت عليه قصص و أساطير.
١٧. و ديه بقي "الزتونه".
إنك بعد ما بتواجه مخاوفك أيا كانت حاجز الخوف بيتكسر جواك، و بعدها بتلاقي نفسك خلاص مش خايف من اللي كنت خايف منه قبل كده، في اللحظه ديه لازم تكون فخور بنفسك إن علي أد ما مريت بتجربه صعبه علي أد ما خرجت منها حد تاني أقوي و أكثر صلابه، و ده محض اختيار من ربنا لازم تشكره عليه، و عشان كده لازم تكون ملهم لغيرك و متبخلش علي حد بأي حاجه أنت اتعلمتها تقدر تساعده بيها و تنور له بيها الطريق.
١٨. و ديه مترتبه عاللي قبلها.
إني بفضل الله مبقتش بخاف من الجن و العفاريت و انتصرت علي مخاوفي و بكتب البوست ده و انا قاعده لوحدي في البيت الساعه ٣ الفجر معييش غير ربنا مطمنه بيه و بالقرآن، بس للأسف بقيت أخاف من البني آدمين أكتر و بقيت أبعد عن الناس لأني اكتشفت أن الأشرار منهم مؤذيين مليون مره أكتر من ميت عفريت و ما أكثرهم في أيامنا ديه !!!
فبقيت أفضل الوحده أكتر و مبخافش و أنا قاعده لوحدي و بجد مش عارفه ديه حاجه كويسه و لا وحشه ؟؟؟
و بس كده ديه كانت حكايتي،
و أتمني أكون أفدتكم بخلاصة تجربتي.
و ألقاكم في سلسله أخري من "قصص حقيقيه عن الجن و العفاريت" ..لو عجبتكم وافدتكم اتمني متبخلوش عليا بلاف وكومنت القصه ، والناس ال بتابع ف صمت تظهر وتتفاعل وشكرا مقدما ❤️
#يوسف_مصطفى