❴🔢❵☟الــبــــــ❴ 2️⃣ ❵ـــــــارت☟
*ـ ࢪواية. حكايتي مع الجن🥳🥀↻≯🍒⸙•♡»»)) 3/4
غرام الروايات
تابع قناة غـ͓̽ـرٍآمـ͓̽ـ آلَرٍوٌآيـ͓̽ـآتـ͓̽ـ 🧚♀️📚💅💫 في واتساب: https://whatsapp.com/channel/0029VakuN1aHwXbJf5jj7w0J
#حكايتي_مع_الجن_في_شقتي_الزوجيه "الجزء الثالث".
( قصه حقيقه، حدثت بالفعل)
زي ما قلت لكم في الجزء الأول أنا اتجوزت في محافظه تانيه غير محافظتي، يعني مشكله تانيه لوحدها و أهل جوزي كمان في محافظه تالته، يعني بطولي في المكان ده و لو حصل لي حاجه محدش هيلحقني !!!
نكمل باقي الحكايه.
_بعد ما طلعت أجري من الشقه و جوزي يجري ورايا أخدت السلم ٣ ادوار فوريره لحد ما خرجت من العماره و وقفت في الشارع تحت بعيد عنها أخد نفسي و انا ببص عالشقه فوق و في حاله من الذهول مش عارفه افكر اسافر لاهلي و لا اروح افين و معداش علي جوازي اسبوع الناس هتقول ايه !!!
_راح جوزي قاللي طب عايزه تروحي فين دلوقت؟
قلت له أنا مش عارفه افكر اصلا، مش عارفه اتلم علي جسمي و اعصابي سايبه، راح قايلي تيجي نزور امي؟
قلت له ماشي اهو امشي من المكان ده لحد ما ما اهدي و افكر هعمل ايه في المصيبه ديه و من جوايا بقول يارب يكون كل ده تهيؤات و يكون جوزي بيهزر معايا، بس بيهزر معايا ازاي !
و لو عديت موقف الباب و الحمام و قلت هوه اللي مرتبه بطريقه أو بأخرى طب الموقف اللي حصلي و انا ممدده عالسرير ده هيعمله ازاي؟ و دماغي فضلت تودي و تجيب هتجنن من التفكير بحاول ادور علي أي أسباب منطقية للي بيحصل لان مبصدقش في الحاجات ديه و عندي كل حاجه اكيد لها سبب، بس للاسف مش لاقيه اي تفسير منطقي للي حصل و ده خلاني خفت اكتر للحكايات اللي كنت بسمعها عن الجن و العفاريت تطلع بجد !
_المهم ركبنا العربيه و احنا في الطريق افتكرت أن فيه شيخ في الأزهر معرفتنا في محافظه جنبنا قلت له ممكن نعدي عليه الاول قبل ما نطلع علي امك؟ قالي: ماشي، و مسكنا الطريق وصلنا عنده عالعصر كده، قعدت حكيت له اللي حصل معايا و قلت له أنا عقلي رافض يصدق الكلام ده و في نفس الوقت خفت من اللي حصل و اخاف يحصل تاني و مش عارفه ابعاد الموقف ايه و ايه اللي ممكن اواجهه؟
الراجل هدا
ني و قاللي متخافيش و الشيطان ده أضعف ما يكون ميقدرش حتي يحرك كوباية ينقلها من هنا لهنا و كان ادامه كوباية عالمكتب مثل عليها،، قلت له و اللي حصل معايا ده تفسيره ايه؟
قالي حاجه عدت و خلاص و إن شاء الله مفيش حاجه تحصل تاني و متخافيش منهم همه ضعفاء ميقدروش يعملوا حاجه و أبقي شغلي قران في الشقه و خلاص،، (كلامه مأقنعنيش اوي الصراحه و حسيت أنه كان عايز يطمني و خلاص و لو كان شاف اللي انا شفته اكيد كان قال كلام غير ده !)
المهم الراجل ضايفنا و قالنا مينفعش تسافروا بالليل كده لازم تباتوا و سافروا الصبح،، قلنا ماشي،، حط لنا اكلنا و انا دخلت قعدت مع اهل بيته و سبت جوزي معاه في اوضه تانيه و انا قاعده مع أهله لقيت واحده من بناته داخله علينا ماسكه المصحف و بتقرأ قرآن بصوت عالي فانا استغربت بتعمل كده ليه؟
متروح تقرأ في حته تانيه ! شويه و فهمت أنها كانت بتقرأ عليا من غير ما تحسسني بكده لان جوزي كان مفهمهم أن المشكله فيا و انا مسحوره و الشقه مفيهاش حاجه و ده اللي عرفته بعدين !!!
المهم قعدت تقرأ المعوذات بصوت عالي و انا عملت نفسي مش فاهمه هيه بتعمل ايه و طبعا محصلش حاجه ليا و فضلت تكرر فيهم برضو بصوت عالي لحد ما خلصت و طلعت، بعدها جوزي دخل نمنا و صحينا مسكنا الطريق رحنا عند أمه قعدنا يومين ثلاثه كده.
_بعدها قالي تروحي بيتك؟ قلت له لا انا لسه مش قادره اتلم علي اعصابي وديني عند اهلي و خلاص و اللي يحصل يحصل الناس كده كده بتكلم محدش له عندي حاجه.
_رحنا مسافرين علي اهلي و اتفاجأوا بيا قلت لهم أنتم وحشتوني و احنا كنا عالطريق قلت اجي اسلم عليكم فاستغربوا، و جوزي سابني عندهم و سافر هوه عشان شغله و قالي لما تحبي اجي اخدك كلميني و مشي،، و انا من كتر الرعب مقدرتش انام لوحدي و رحت نمت وسط ابويا و امي،،
لقيتهم الصبح بيصحوني بابا عمال يهز فيا جامد و يزعق لي و يقولي اسكتي و بيحط أيده علي بؤي و انا بفتح عيني مش فاهمه ايه اللي بيحصل اتاريني كنت عماله اصوت جامد و انا مش حاسه و باصه ناحية ماما و أقسم بالله مش شايفه شكلها اصلا و شايفه شكل واحد تاني علي هيئة اللي كان بيشدني من دراعي و انا في شقتي علي السرير و كنت فاكراها هوه و كانت نايمه علي نفس الجنب اللي كان بيشدني منه
(و هوه كان متشبه بشكل جوزي بس علي شكل وحش اوي)
و مكنتش مدركه انا فين في شقتي و لا عند أهلي لحد ما فقت علي شخط ابويا فيا و ببص عالناحيه التانيه لقيت امي و اللي كان بيشدني اختفي، قلت لهم هوه فيه ايه؟ قالولي انتي اللي فيه ايه؟
عماله تصرخي صحيتيني انا و امك و سمعتي الجيران بينا كنتي هتلمي الناس علينا يقولوا بتصوت ليه ديه عالصبح كده؟ قلت لهم أنا أصلا مكنتش حاسه بحاجه (و طبعا اول مره يحصل لي كده عندهم)
و الاتنين بيبصوا لي و مستغربين، راحوا سألوني انتي كنتي بتصوتي من ايه؟ قلت لهم انا هحكي لكم كل حاجه و بدأت احكي اللي حصل معايا كله و همه يسمعوا في استغراب !!! يتبع
=لو وصلت لحد هنا لازم تعمل لاف وكومنت برايك وتدعمني عشان لو لقيت دعم كتير هنزل الجزء الرابع النهارده ..والناس ال بتابع ف صمت تظهر وتتفاعل عشان يوصلكم باقي الاجزاء ..وشكرا مقدما ❤️
#حكاوي_المرعبين
#يوسف_مصطفى
#حكاية_مع_الجن_في_شقتي_الزوجيه"الجزء الرابع".
(قصه حقيقيه، حدثت بالفعل)
الجزء ده أهم جزء في الحكايه عشان هقولكم ازاي كسرت حاجز الخوف و واجهت الجن و العفاريت و مبقيتش أخاف بعد كده من أي حاجه.
زي ما قلتلكم إني قعدت أحكي لأهلي اللي حصل معايا في أول أسبوع جواز و طبعا كانوا مستغربين و شبه مش مصدقين و والدي قالي ممكن يكون جوزك هوه اللي بيهزر معاكي بس هزار بايخ شويه .
(هوه مصدق في الجن بس تقريبا كان بيحاول يطمني) في حين أن أمي خافت بجد هيه و أختي، مش بس خافوا دول اترعبوا من اللي سمعوه !
المهم قلتلهم طب لو علي كلامكم هنفترض اللي كان بيحصل و أنا صاحيه ده من تدبيره طب و اللي كان بيحصل لي و انا نايمه هيتدخل فيه ازاي !!!
المهم كلامهم بردوا مأقنعنيش و بقيت تايهه مش عارفه فيه ايه و لا ايه اللي بيحصل ده و تفسيره ايه؟
في اللحظه ديه قررت إني لازم أواجه عشان اعرف الحقيقه فين لأن مبحبش الهروب؟
بس انا لسه خايفه و مش مستعده ارجع شقتي، اعمل ايه !!!
دخلت اوضتي و قعدت افكر و جوزي كان بيتصل عادي يسأل عليا و انا أقوله إني بخير بس سيبني شويه عند اهلي، قالي براحتك.
المهم قلت لازم ابدأ أواجه مخاوفي بالتدريج حبه حبه و هتدرب من دلوقت علي مواقف الخوف و اعرض نفسي ليها عشان لما ارجع شقتي و ابقي في أرض المعركه مخافش .
و بدأت بأكتر حاجه كنت بخاف منها و هيه افلام الرعب اللي فيها جن و اماكن مسكونه و كده لكن الزومبي و مصاصين الدماء و كائنات خرافيه مكنتش بتخوفني عشان ببقي عارفه أن كلها أساطير خياليه لكن الجن موجود بالفعل بس انا اللي مكنتش بقابله قبل كده!
رحت طفيت نور اوضتي و كان فيه تليفزيون والدي كان حطه عندي و رحت مشغلاه علي قناة "Top movies" و بدأت اتفرج علي كل افلام الرعب اللي بتحكي عن الأماكن المسكونه و الجن و العوالم الخفيه و علي حظي كان فيلم "الغرفه 1408" أول فيلم أقابله في وشي و كان بالنسبه لي مرعب جدا وقتها !
وفضلت علي كده من فيلم لفيلم ليل نهار و امي تلمحني و هيه معديه من جمب باب اوضتي تصرخ و تقولي أطفي الزفت ده هتجيبي لنا العفاريت في البيت و اختي تيجي علي صوتها تساعد معاها و الاتنين طبعا خايفين و مرعوبين.
المهم قلت اكيد مش هيحصلي اكتر من اللي اتفرجت عليه تقريبا كل القصص المرعبه اتهرست في كل الافلام الاجنبي و اخترعوا قصص كمان من عندهم، فالعفاريت اكيد معندهمش حاجه جديده، و كل ما الفكره تتعاد في فيلم تاني الاقي درجة الخوف قلت لحد ما بدأت امسك نفسي شويه و استعيد توازني من تاني.
و عدي عليا اسبوع علي كده لحد ما جوزي اتصل يسأل عليا قلت له تعالي خدني..
قالي ازاي و مش ازاي و لازم نوديكي لشيخ شكلك مسحوره و اخاف اسيبك في الشقه لوحدك تطلع لك حاجه قلبك يقف و تموتي فيها !!!
(و طبعا كان بيجيب المشكله فيا عشان ميتحكمش عليه يبيع الشقه و يجيب غيرها).
قلت له لا متقلقش تعالي انت بس خدني بكره.
حضرت شنطتي و امي و ابويا طمنوني و ادوني تسجيل معايا اشغل عليه إذاعة القرآن الكريم في شقتي و قالوا لي متضحكيش الناس عليكي انت حافظه القرآن و جن أيه ده اللي يخوفك ده انت تحرقيه بالقرآن اللي انتي حافظاه،
و واحده صاحبة أمي كانت بنتها مرت بتجربة شبه بتاعتي في شقتها برضو و هيه عروسه و أخدتها لشيخ في الأزهر سألوه فعرفت حكايتي راحت بعتت لي كتاب عن الرقيه الشرعيه من السحر و الجن، و انا اصلا كان عندي كتاب عن الجن، بس و لا ركزت اقرأ و لو كلمه واحده و طبعا اللي عدي بتجربه شبهي هيفهم كلامي ده لأن اللي في المشكله مش زي اللي براها، الكل بيتكلم حلو اوي و يفكر و يدي نصايح طول ما هوه مش صاحب المشكله لكن اللي في المشكله نفسها في الغالب مش بيبقي عارف يفكر كويس من الضغط اللي متعرض له.
و انا بقي اخدت الموضوع تحدي و قلت يا قاتل يا مقتول في الشقه ديه و لازم اتاكد فيه ايه و المشكله فيها و لا فيه و لا في جوزي و لا فين بالظبط !.
المهم سافرت و سميت و دخلت و اتظاهرت بعدم الخوف و بدأت اتصرف عادي خالص و كانت كنبة الانتريه في مواجهة باب الحمام علي بعد أمتار منه عملتها قعدتي و بقيت قاعده أغلب الوقت عليها عيني عالحمام و مركزه و فاتحه بابه و مستنيه راجل يطلع لي و لا حد يعدي تاني زي اللي عدي قبل كده و انا في الحمام و انا بقي هشتبك معاه و اللي يحصل يحصل و قلت هاتوا اخركم معايا يا انا يا انتم في الشقه ديه و كل ما كان الوقت يعدي و انا علي وضعي ده و مشوفش حاجه كان الخوف يقل جوايا لأن اهوه انا جت لكم وروني نفسكم بقي، بس محدش ظهر !!!
اما جوزي بدأ يشغل القرآن علي سورة البقره عاللاب بتاعه كانت السوره تشتغل شويه بعد كده اللاب يطفي لوحده مع أنه بيقعد يشتغل عليه بالساعات مبيفصلش !
المهم جرب تاني و تالت و عاشر نفس الحوار السوره تشتغل شويه بعد كده اللاب يفصل !
وقتها افتكرت الكاسيت اللي اهلي ادوهولي و أنا ماشيه و بدأت اشغله علي إذاعة القرآن الكريم و قلت بلاها اللاب خالص بس اللي حصل بعد كده مكنتش أتوقعه..يتبع
=لو عجبتكم لازم تعملوا لاف وتقولولي رايكم في الكومنتات ،والشير بيفرق معايا جدا ..والناس ال بتابع ف صمت تظهر وتتفاعل وتقول رأيها.. وشكرا مقدما ❤️
#يوسف_مصطفى