❴🔢❵☟الــبــــ❴ ألأخير ❵ــــــارت☟
*_روايه برءاه روح_*🎠💜 "))
▪️الفصل 20✔️
▪️الفصل 21✔️
⏬⏬⏬⏬⏬⏬⏬
*تـــــــــــم مشاركه الروايه من قناه عشاق الروايات من الواتساب* .
تابع قناة 💞✨عشاق الروايات ✨💞 في واتساب: https://whatsapp.com/channel/0029VagXtIfDTkK4hvsE821q
⏫⏫⏫⏫⏫⏫⏫
رواية براءة روح
الفصل العشرون20
بقلم اسماء عبد الهادي
انخرطت في موجة بكا ملهاش اول من آخر..... وأونس كانت فاتحة بؤها من الحقيقة اللي سمعتها مني... فضلت تهديني استغرقت ساعات علشان أهدى وكل ده ومانعة أي حد يدخلي غير اونس وبس
ولما هديت من الحالة اللي انتابتني
اونس بدأت تتكلم معايا بعقلانية قالت
_طيب ليه مقلتيش الحقيقة اول ما اتكلمتي
_ مش عارفة يمكن ... كنت عايزة أحس ولو شوية بأمان العيلة والأسرة....
ويمكن لأني حبيت فعلا على وروؤف وأشجان وجاسر لانهم طبيبن اوي حبيت حبهم ليا اللي عمري ما حسيت بيه ...فمرضتش أكسر بفرحتهم بسرعة كدا قلت أسيبهم يفرحوا شوية... كنت بتشعبط في دفء العيلة وبحاول أشبع منه على قد ما أقدر ...كنت كل لما أحاول أقول الحقيقة حتى لنفسي ألاقي اللي بيمنعني... لكني خلاص مبقتش قادرة أخبي أكتر فحكيت ليكي ....ساعديني يا أونس أنا بضيع من تاني
أونس خدتني في حضنها وطمنتني وقدّرت جدا موقفي واني خفت اتكلم اتحرم من الحب والأمان اللي كنت عايشة فيه لكنها قالت بلوم
_ولما هو الوضع كدا ياروح... ليه سمحتي لناس غريبة تقربلك بالشكل ده... انتي تقريبا مكنتيش بتخرجي من حضن على ولا رؤوف .
أخدت نفس طويل وخرجته بكل غلب
انا عارفة اني غلطانة لكن كان عندي عذري او دا اللي اوهمت نفسي بيه
_أنا لما دخلت الفيلا مع جاسر مهخبيش عليكي اني اتغريت بروعة المكان... بيت فخم عمري ما كنت أحلم بيه وكمان عيلة بتدور عليا وملهوفة تشوفني ..حبيت أعيش الإحساس ده... افهميني أنا عشت عمري محرومة منه عارفة اني غلطانة وكنت بتقطع من جوايا... لكن أقولهم أزاي وانا مش بتكلم كنت بحارب نفسي هل استمر ف المسرحية دي وأكمل على اني بنت أخوهم ولا ارفض الاستمرار في الوضع ده... حقيقي مكنش عندي أي خيارات تانية أنا كدا كدا... عارفة ان زين كان هيأخدني السجن ....
اونس قاطعتني وقالتلي لاول مرة بصوت كله غضب
_روح مش بقولك على أول مرة مش هلومك معذورة... محرومة واول ما لقيتي الاهتمام والحضن شبطتي... لكن بعدين ليه متكلمتيش ليه سمحتي لنفسك كل شوية تكوني في حضن علي وروؤف ..أنا هتجنن كل لما أفتكر انك عملتي كدا وانتي عارفة انك مش بنت سعيد...ليه يا روح ليه.
اتكلمت بهدوء بعكس العصبية اللي أول مرة أشوفها في أونس
_ما انتي لو مكنتيش قاطعتيني كنت هقولك... ان من أول يوم ليا ف الفيلا لما طنط نادية كانت بتعرفني على الفيلا... شفت صورة أبوهم صالح واللي كان فيا ملامح كبيرة أوي منه حتى طنط نادية قالتلي يومها ده هيه كمان... اني أشبه صالح ..ساعتها اتأكدت اني انتمي للعيلة دي ...لكن بنت مين فيهم معرفش... هل أنا بنت سعيد فعلا بردو معرفش ..فهمتي ليه .
أونس أحتارت أكتر لكن زعلها مني خف لإني عندي مبرر للي عملته ... بدأت تفكر تاني
_روح احنا لازم نعرف انتي بنت مين .... والأول لازم نعرف اسم المستشفي اللي حصل التبديل فيها ...أنا بفكر أسأل والد زين لأنه كان الأقرب لأخوه سعيد
_ لا اوعي تقولي ليه هيزعل وهيتأثر....احنا مش هنقول لحد غير لما نعرف الحقيقة كاملة وانتي هتساعديني في دا ..مش كدا يا أونث.
أونس هزتلي دماغها بمعنى انها طبعا هتساعدني ووقفت جنب شباك الأوضة بتبص على الطريق بتفكر في حل ولما لقته بصتلي بحماس
_روح ايه رأيك نسأل واحدة من الدادات اللي ف الفيلا سنهم كبير وأكيد يعرفوا حاجة... مين في العيلة اللي أنجبت بنت ميتة.. واللي انتي هتكوني اتبدلتي معاها
أنا اتفزعت اول ما قالتلي كدا وبدأت أقولها على شكوكي واللي مستغربة ازاي محدش لاحظ ان كل الحوادث اللي بتحصلي كانت بفعل فاعل
_لااااا.. واوعي
_في ايه مالك اترعبتي ليه
_أونث انا شاكة ان واحدة من الدادات بتحاول تقتلني وبالأخص انيثة
اونس برقت وبوؤها كان خلاص هيوصل للأرض
_نعم!
_فاكرة حادثة ثقوط النجفة ...خبطت فيها او هيه اللي خبطت فيا وقالتلي هروح اجيب مقشة وجاروف... تفتكري صدفة تخبطني في المكان ده وان النجفة كدا تقع من الباب للطاق ..طب بلاش النجفة
الترابزين لما زين لحقني ثمعت جاثر بيعاتب الدادة يقولها أنه مش قالها تنبه على كل أهل البيت.... والكل كان طالع نازل عادي معنى كدا انهم كلهم عارفين الا أنا... قصدها اني معرفش علشان أقع
اونس كملت وهيه مصدومة
_وقت قطع الكهربا هيه كانت عند أوضتك وعاملة انها بتمسح ....معنى كدا انها هيه اللي اتعمدت تنزل سكينة الكهربا وتقفل عليكي الباب بعد ما عرفت إنك عندك فوبيا من الضلمة والأماكن المغلقة ....
باااس كدا الحقيقة كلها عندها أكيد تعرف حاجة ومخبياها .... أكيد انتي بتمثلي مصدر تهديد ليها فحبت تتخلص منك بس لازم نتأكد أكتر من شكوكنا .
أونس رجعت تفكر تاني وسرحت في حاجة وبعدها قالت بهدوء لان كان في دماغها دوامة تفكير
_روح ممكن تشرحي عملتي ايه ف تهاني بالظبط اول ما سمعتي مكالمتها
بدأت أحكي تاني لأونس اللي حصل وبحاول افتكر كل لحظة بالتفصيل
بعدها أونس قالتلي
_التقرير بيقول ان تهاني لما اتقتلت كان فيه دم حواليها .
حاولت افتكر هل فعلا كان فيه دم ولا لأ
_ممم ... مفيش دم نزل منها على الأرض دم بسيط كان في دماغها شوفته لما حطت ايدها على شعرها ولقيتها متلخطة دم ... يمكن الدم نزل بعد فترة.
بس اونس شكت ان في حد تاني هو اللي قتل تهاني مش انا .
_ممم .. روح.. انا عندي احساس انك مش اللي قتلتي تهاني ... بكلامك ده أكدلي ان في طرف تاني جه وقتلها... وممكن يكون الحد ده اللي كانت بتكلمها في الموبايل واحتمال كبيرة تكون الدادة اللي شاكين فيها
انا بحلقت وضربات قلبي زادت ... _معقول انا مقتلتش تهاني... يارب فعلا أكون بريئة من دمها
_ان شاء الله .. كلامك اللي قلتيه هيفتح ملف القضية من تاني كل الحسابات كلها هتتعاد من الأول
_وهنعمل ايه دلوقتي..انا مش عايزة أي حد يعرف الا لما نكشف الحقيقة .
_اول حاجة هنراقب الدادة كويس بس من غير ما تحس طبعا .. وخدي بالك لأنها هتحاول تقتلك تاني بس مأظنش دلوقتي علشان متلفتش الانظار ...
حسيت اني تايهة ضايعة لا عارفة اهلي ولا حتى عارفة أنا مين... شعور بالضياع غطى على كل روحي ... حياتي الهادية اللي بحلم بيها مازالت حلم صعب المنال أنا ليه بيحصلي كل ده اللي اتحملته ميتحملوش عاقل أبدا بس الأكيد ان ربنا هيعوض صبري خير.
طأطأت راسي وانا حاسة بهم... هرجع ازاي الفيلا وازاي هتعامل معاهم عادي ..فأونس فكرت
_رووح... انا جتلي فكرة ممكن تقعدى مع طنط نادية او طنط فريدة وتطلبي منها تحكيلك عن أيام زمان وكدا يمكن واحدة فيهم تذكر ان ليها بنت ميتة... او ممكن تحكي مع يمنى او طنط أشجان .
أخدت نفس وطلعته بهم كبير اوي
_مش عارفة.. هحاول .. حاسة اني مش هقدر اتكلم مع اي حد منهم.
_حاولي ياروح ومتستسلميش علشان نعرف انتي بنت مين.
في اللحظة دي زين فاض بيه ومش عاجبه اننا حابسين نفسنا في الاوضة لوحدنا ومش سامحين لحد انه يدخل... وخبط جامد .. فأنا واونس لبسنا حجابنا .. زين لو كنت لوحدي أكيد كان هيقتحم الأوضة زي عادته بس عمل حساب لأونس علشان كدا خبط.
اتكلم بغيظ
_ايه في ايه قافلين على نفسكم ومانعين حد من انه يدخل ليه.
أونس اتكلمت باعتذار
_أنا أسفة والله بس روح كانت محتاجة تختلي بنفسها شوية.
_طيب اجهزوا يلا لأننا راجعين الفيلا دلوقتي... انا خليت الكل يسبقنا على هناك وجاسر راح يجهز العربية ...قدامكم خمس دقايق بالظبط .
اونس اتكلمت وانا حقيقي مكانش فيا اي حيل للكلام
_حاضر يا زين هنجهز حالا.
زين خرج واونس بدات تساعدني أجهز ولمت كل متعلقاتي في الأوضة وخلاص جهزنا وخرجنا لزين اللي كان منتظر برا .
نزلنا تحت من غير ما حد يتكلم خالص
زين وجاسر قدام وأنا واونس قعدنا في الكرسي الخلفي.
جاسر كان بيسوق بص في المراية وابتسملي
_حمدا لله على السلامة يا روح .
بصتله أنا كمان من المراية حتى البسمة مقدرتش اطلعها.. حقيقي كنت تعبانة نفسيا وخايفة الحلم الجميل والعيلة والأمان اتحرم منهم ومطلعش قريبة للعيلة من أصله .
جاسر كشر وقال
_ لا انتي الظاهر النهاردة زعلانة مني في حاجة اول مرة تشوفيني ومتبتسميش ... يابنتي انا كنت مفكر مكتوب على وشي ابتسم الصورة تطلع حلوة ... بس بعد النهاردة خليتي الفكرة تختلف تماما ... اوعي يكون مكتوب ع وشي... ممنوع الضحك!!.. ازعل اوي
انا وأونس كنا عارفين ان جاسر حابب يخرجني من المود لانه شايفني مش بعادتي معاه
لكن كلامه ضايق زين او بالاصح حسسه بالغيرة فلكزه في دراعه وقاله وهو بيكز على سنانه
_حط لسانك جوة بؤقك يا جاسر وسوق وانت ساكت أحسنلك.
جاسر كشر تاني وعمل انه متضايق وقال
_يا اخي طب اعملي اي بستريج قدام خطيبتي... كدا تقول عليا مش مسيطر وبأخد على قفايا .
زين اول ما سمع كدا ضربه على قفاه وقال
_ما انت فعلا بتأخد على قفاك ايه الجديد..بعدين اونس مش غريبة يعني ومش تايهة .
جاسر لف وشه وبص لأونس وقال
_معلش هتضطري تقبليني على عيبي بقا... منه لله اللي ضيع هيبتي .
أونس ضحكت حتى أنا كمان ابتسمت وخاصة لما لقيت ضحكة اونس طالعة من قلبها... اونس قدرت تشوف لمعة الحب في عنين جاسر من غير ما يتكلم او يبين بس عينيه كانت فاضحاه فقلبها انشرح انه بدأ يعجب بيها زي ما هيه معجبة بيه.
أسماء عبد الهادي
وصلنا الفيلا واول ما وصلنا أونس قررت تمشي علشان مامتها ..سايباها من الصبح وعايزة تطمن عليها ... لكن انا مقدرتش أفضل في الفيلا من غيرها ... مش هعرف اتصرف... وتصرفاتي هتكون مكشوفة... لا أنا عايزة أونس ..لإما أروح أقعد معاها في بيتها
لكن اونس قالتلي
_ مينفعش... لازم تفضلي في الفيلا امال مين هيراقب الدادة
_طيب خليكي معايا
_مش هينفع ياروح ياريت كان ينفع مكنتش هتأخر
لما عرفت ان أونس مش هتفضل معايا مهما حاولت ...فقررت اني ألجأ لزين لاول مرة.. كان لسه واقف عند العربية مع جاسر اللي مستنى أونس علشان يروحها البيت
_زين من فضلك أنا عايزة اونث تبات معايا كم يوم ... مش فضلك اطلب منها تفضل معايا... وانت يا جاثر اقنعها علشان خاطري.
اونس بصتلي بعتاب لإنها هتتحرج وكمان مامتها مش هينفع تسيبها
زين قال
_ها ايه رأيك يا أونس... روح محتاجاكي معاها .
وجاسر قال
_اونس لو ينفع تفضلي مع روح.. وانا بنفسي هستأذن والدتك
اونس بصتلي وقالت
_والله روح انتي عارفة عمري ما اتأخر عنك... بس ماما مش هقدر اسيبها تبات في البيت لوحدها .. أخاف عليها .
زين
_بسيطة نجيب والدتك معانا هنا ...الأوض فوق كتير.
بعدها بصلي وقال بهيام
_وكله علشان راحة روح.
انا مهتمتش باللي قاله واترجيت اونس
_علشان خاطري يا أونث .
أونس مبقتش عارفة تقول ايه
_تمام اللي تشوفيه... بس الأول نأخد رأي ماما... لو وافقت تمام .
قلت بلهفة
_انا بنفسي هأجي معاكي اقنعها .
بالفعل روحت وطلبت منها يجوا الفيلا لكم يوم وهيه مقدرتش ترفضلي طلب واونس أخيرا جت معايا ومش هكون لوحدي... وطلبت منها تقعد معايا في اوضتي كمان .
عدى كم يوم كنت بقضيه معظمه فوق بس بننزل الا بسيط علشان نشوف تصرفات انيسة او حتى يمكن يبان عليها أي حاجة.
لكن كانت تصرفاتها عادية جدا ومفيش أي حاجة تدعوا للشك .
واستغربنا كمان حاجة الهدوء العجيب اللي كان على يارا تجاهي بس مكناش نعرف انها أخدة تحذيرات مشددة من زين انها تقربي ولو بنظرة بس
عدت الأيام ومفيش أي جديد ظل الوضع كما هو عليه... حتى زين حسيته بعيد رغم ان ساعات بشوفه قريب جدا مني ومهتم ...فعلا انسان غريب يحمل الشىء ونقيضه... لكن...جت سيدة كبيرة في السن تزورهم لاول مرة ... انا مكنتش اعرف مين هيه لانها مجتش قبل كدا وأنا موجودة في الفيلا...
اسماء عبد الهادى
بعد كدا عرفت انها حنان أخت صالح جد زين وجاسر وعمة على ورؤوف وأشجان
قضت معاهم كم يوم
وفي مرة واحنا كلنا قاعدين مع بعض كل نساء العيلة
فحنان قالت
ان بنت بنتها خلفت طفل اتولد ليوم واحد و بعدها مات ف حفيدتها تعبت جامد وانهارت وكانت هتروح فيها ...بس الحمد لله ربنا ستر
بعدها ابتسمت وهي بتفتكر زمان
_منساش اليوم يا أشجان اللي ولدتي فيه بنتك ميتة رغم إنها كانت طبيعية وانتي بتتابعي مع الدكتور وطمنك عليها وعلى صحتها وقد ايه كنتي صابرة ومتحسبة وربنا كان رابط على قلبك ساعتها لما سمعتي انها نازلة ميتة.
انا واونس بصينا لبعض واحنا الاتنين مصدومين واللي جه في تفكيرنا واحد
_معقول ممكن اللي بنفكر فيه صح
_معقول أنا أكون بنت أشجان!!
بدأت اونس تسألها راسمة على وشها ابتسامة ودودة وكأنها بتسأل من باب الفضول مش أكتر
_الكلام ده امتا بعد يمنى ولا ايه؟
_لا بنتي البكرية اللي اتولدت ميتة بعدها ربنا رزقني بيارا ويمنى
_ربنا يباركلك فيهم يا طنط
_ربنا يخليكي يا جميلة
_وحضرتك كنتي بتولدي في مستشفى عام ولا خاص.. مش عارفة زمان كان النظام ايه
_لا مستشفى خاص اللي رجحها لينا سعيد ابوكي الله يرحمه ياروح... ومحبيناش نكسفه.
الموضوع بقا فعلا شبه مؤكد اني بنت أشجان بقيت أبصلها وانا خلاص على أخري حاسة اني هنهار... هجري عليها واقولها أنا بنتك أنا أهو قدامك مش ميتة
لكن اونس شددت على ايدي وفوقتني في أخر لحظة وبصتلي بعنيها انه مينفعش نتكلم دلوقتي الا اما نتأكد .
استاذنا منهم ووقفت انا وهيه على جنب واتأكدنا ان محدش بيسمعنا وقالت
_هروح بنفسي المستشفى دي وهتأكد... انتي المطلوب منك تأخد بالك من تصرفات الدادة ... وامسكي نفسك يا روح الله يكرمك.
قلتلها وانا حاطة ايدي على قلبي وفي دنيا تانية خالص
_معقول أشجان هي ماما... معقول أخيرا هشوف أمي اللي اتحرمت منها طول عمري... أنا مش مصدقة نفسي انا حاسة اني ممكن أموت من الفرحة.
اونس كانت خايفة اتعشم بزيادة وتطلع كل شكوكنا مجرد أوهام فقالت بجدية
_روح بالله عليكي فوقي ومتتعشميش بحاجة الا لما نتأكد الأول
_نتأكد من ايه أنا خلاص لقيت أمي حاسة انها ماما... ماهو مش معقول هكون ضرة بنتها وتعاملني باللطف ده كله .. مش معقول في ناس بالطيبة دي... اكيد قلبها حاسس هيا كمان... أنا مش قادرة انتظر .
اونس مسكت ايدي الاتنين اللي كانوا زي التلج
_علشان خاطري ياروح اصبري لبكرة بس والله هرجعلك بالخبر الأكيد
انتهدت بقلة حيلة
_حاضر هثتنى ..ما انا اثتنيت كتير... مجتش على بكرة... بس أنا فرحانة اوي فرحانة.
اونس شدتني من ايدي
_روح ركزي... خدي بالك من أي لحظة غادرة من أنيسة وراقبي تصرفاتها ..هيه كانت موجودة وطنط أشجان بتتكلم وخايفة تعمل فيكي حاجة.. خليكي جنب طنط نادية طول الوقت... وانا هروح دلوقتي اتأكد من سجلات المستشفى.
انا ابتديت أخاف من أنيسة ...خفت تحاول تقتلني تاني بعد ما لقيت أمي..ففضلت لازقة في طنط نادية مسبتهاش زي ما طلبت أونس وكانت كل ما عيني تيجي على أشجان بحاول أمسك نفسي بالعافية حتى هيه لاحظت إني فيا حاجة غريبة.. لكن أنا ادعيت اني تعبانة وعندي مغص.
لاحظت ان انيسة مختفية ومش موجودة في الفيلا ودادة زينب اللي لوحدها في المطبخ فسألت طنط نادية عليها فقالت
انها استأذنت منها علشان تزور بنتها اللي متجوزة في الارياف ... ومشيت من شوية
وده أكد شكوكي أكتر ...وبدأت اترعب من اللي جاي.. ياترى عملتي
ليا فخ قبل ما تمشي... طب يا ترى هيه هتهرب ..طب نثبت ازاي الحقيقة اكيد في عندها حاجة احنا منعرفهاش..فكلمت اونس من موبايلي ...نسيت أقولكم اني لما رجعت من المستشفى لقيت جهاز موبايل جديد فى اوضتي وعرفت انه من زين اول ما فتحناه لقيناه حاطط ليا صورته خلفية🙄.. وسايب تذكير بيقول
_يارب تعجبك هديتي
لكنه ابدا عمره ما حاول يكلمني عليه ...بقولكم شخص غريب ومش مفهوم
__
أونس كانت راحت المستفى بس معرفتش تأخد أي تصريح انها تفتش في الكشوفات القديمة
فاضطرت انها تطلب المساعدة من جاسر واضطرت تحكيله كل حاجة علشان يساعدها في البحث عن الحقيقة..مكانتش صدمته بأقل مننا واستخدم سلطته في انهم يدورا على الكشوفات اللي اتولد في نفس اليوم باسم روح سعيد
بس مش لقيوا اي حاجة غير فعلا أشجان ولدت في المستشفى ومكتوب اليوم والتاريخ والدكتور اللي ولدها بس الدكتور مسافر حاليا بقاله كم سنة عايش برا.
اونس بغلب
_حتى الدكتور اللي كان ممكن يفيدنا مسافر
فحاسر قالها
_هواجه الدادة بكل اللي نعرفه وههددها كمان وهتتكلم .
ولما كلمتهم وعرفوا انها مش موجودة ومشيت فصعبت عليهم الدنيا أكتر.
جاسر بعت مصادروا لأهلها فاكتشف الحقيقة الصادمة انها عملت حادثة في الطريق وماتت.. وبكدا انقطع اي أمل ليا اني اعرف هل انا بريئة من دم تهاني او لأ
جاسر قال لأونس وهما برا في مطعم بيفكروا مع بعض
_ كدا مفيش قدامنا غير حل الdna
...بس خايف يكون كل ده مش حقيقي وانهم يعشموا عمتهم في الفاضي بعد ما كانت نست الموضوع .
في الوقت اللي اونس وجاسر بيفكروا فيه
كنت أنا سبت البيت ومشيت وقررت اني أبعد بعد ما سبت رسالة لأونس أنها متقولش لحد وطبعا مكنتش أعرف ان اونس حكت لجاسر ..
طلبت منها تنسى الموضوع خالص وتسيب الوضع زي ما هو عليه
واني همشي وأحاول أدور على الاستقرار في أي مكان... واني متى حللت حلت المشاكل ..فكفاية مشاكل وأسرار وألغاز لحد كدا انا تعبت عايزة أقضي بقية حياتها مع نفسي.. وكفاية ان عندي أمل بإن أشجان أمي وأخيرا شفتها وكلمتها كمان وده لوحده كفاية عليا .
#يتبع..
رواية براءة روح
الفصل الحادي والعشرون21والاخير
بقلم اسماء عبد الهادي
خبر اختفائي انتشر في الفيلا كلها وبدأت التساؤلات تكتر ..انا روحت فين!!... وليه أنا مشيت كدا وبدون مقدمات...وهل حد زعلني ولا أنا اللي مشيت من نفسي... ولا اتخطفت ولا في ايه .
بدأت حالة الطوارئ في الفيلا والكل بيدور عليا
جاسر بعت فرق للبحث عني في كل مكان وهو بنفسه نزل يدور عليا في الشوارع والميادين وحرفيا كان قلبه بيتقطع من الخوف عليا.
اما كل اللي ف الفيلا وخاصة نساء الفيلا طنط نادية وطنط فريدة عمتو...قصدي ماما أشجان... ياااه شعور غريب اول ما نقطت باسمها حسيت بقشعريرة لطيفة مشت في جسمي... يمكن تقولوا عليا غبية علشان سبت أمي ومشيت لكن حقيقي أنا مكنتش عارفة انا عايزة ايه او محتاجة ايه... كنت عاملة زي التايهة ..الغريق في وسط بحر ... مبيعرفش يعوم وقدامه العوامة وقارب النجاة بس مش عارفة استخدمه... من الرعب اللي أنا فيه وشعور الضياع وسط المية المحيطة بيا من جميع الجهات ومش شايفة اي شط او جزيرة للحياة ...رغم وجود وسائل الانقاذ الا ان اللخبطة اللي انا فيها مش مخلياني عارفة استخدمهم ولو استخدمتهم هغرق نفسي بنفسي... فقررت اسيب نفسي أغرق استسلمت تماماً وزي ما الموجة توديني ...يمكن والله أعلم الموجة دي توديني لشط الأمان لوحديها.
المهم كل اللي في الفيلا كانوا في حالة نحيب الا يارا كانت في قمة ارتياحها اني مشيت ماهي خلاص اتخلصت مني ..من ضرتها اللي ممكن تقاسمها في جوزها...لكن هل هي بعد ما أنا اسيب لها الجو هتعيش مع زين مبسوطة؟
اللي زود نحيب العيلة ان أونس حكتلهم على كل حاجة واول ما ماما سمعت دا شقهت جامد وقامت وقفت وهيه حاطة ايدها على بؤها وبعدها هزت راسها وهي بتقول
_لأ لأ لأ... لأ مش معقول... روح بنتي أنا ..
يعني بنتي كانت قدامي طول الوقت وأنا مش عارفة!... بنتي كانت بتاعني طول حياتها وانا مش حاسة بيها وعايشة حياتي عادي... لا لأ مستحيل... عقلي مش قادر يستوعب ازاي روح بنتي... ازاي سبتها تعاني كدا لوحدها... لأ... في حاجة غلط... أنا بنتي ماتت.. اه ماتت.. ارحم ليا من اني اعرف ان بنتي عاشت طول عمرها بتتعذب... أنا كنت بموت علشان روح وهي بنت أخويا اللي علاقتي بيه كاد تكون منعدمة... تفتكروا هيكون سهل عليا اني أعرف ان كل اللي حصل ده حصل لبنتي...لاااااااا.
قالها ووقعت مغمى عليها وفضلت طنط نادية وفريدة يفوقوا فيها لحد الحمد لله ما فاقت بس كانت دايخة وتعبانة وبتبكي وعايزة تشوفني واني ارجعلها...
يمنى كمان مكانتش مصدقة وأول ما اطمنت على مامتها... جريت بسرعة على أوضة أختها تقولها الخبر.
وأول ما يارا شافتها بتنهج جامد كدا ووشها أصفر كأنه مخضوض فضحكت وقالت
_ايه خميرة العكننة ماتت... قولي اه علشان اقوم ارقص دلوقتي .
يمنى لأول مرة تصرخ في أختها بالشكل دا وقالت
_انتي هتفضلي حقيرة كدا لحد امتا... بقى بتتمني ليها الموت لأ وكمان مش هيتهز فيكي شعره ومش هتعملي اي اعتبار وهتقومي ترقصي... انتي ايه.. انتي مكنتيش بالشكل دا ليه اتغيري اوي وبقيتي من غير قلب كدا .
يارا بصتلها بملل وشاورت بإيدها بأنها مش مهتمة وراضية وحابة نفسها كدا .
_يمنى اسمعي.. ان كنتي جاية تقوليلي أي أخبار عن البتاعة دي فأنا مش مستعدة اسمعها.. خدي بعدك وأمشي.
يمنى فجرت الخبر في وشها على أساس انها تتهز بس متحركتش
_اللي انتي بتتمني ليها الموت دي ..طلعت أختك... روح أختنا اللي كنا مفكرين ماما ولدتها ميتة.
يارا بحلقت فيها شوية وبعدين ضحكة ضحكة طويلة كلها سخرية
_هي اللي ضحكت عليكم وقالت كدا... وانتوا طبعا صدقتوها الكدابة دي... مرة تطلعلنا بكدبة انها بنت عمنا والمرة دي أختنا... لا صراحة المرة دي فرطت معاها جامد... العبيطة محسبتهاش صح
يمنى بصتلها وهي بتبدل في عينيها يمين وشمال
_انتي بتقولي ايه!!.. بقولك روح اختنا ... اختنا افهمي .
يارا قامت منتورة وقالت بكل حدة
_فين دليلها.. ولا هو أي كدبة وخلاص.
يمنى اتكلمت بحزن
_ياريت نلاقيها علشان نتأكد .. ماما مموتة نفسها علشانها .
يارا قالت بغل وغيظ مني وكل ده وهيه مش مصدقة اني أختها
_لو ماما جرالها حاجة بسببها يا ويلها مني... مش هعمل بتحذيرات زين ولا غيره.
يمنى زهقت منها وندمت انها جتلها تبلغها من أصله فسابتها ومشيت ..تقعد مع مامتها وتطمن عليها.
ساعات عدت وأنا مختفية ومحدش لاقيني .
كل ده وزين مش موجود بالفيلا وميعرفش حاجة والكل نسي يبلغه او بالأحرى ظنوا انه عارف ونزل يدور مع جاسر اللي من لبخته عليا نسي فعلا يكلم زين .
زين اول ما رجع الفيلا حس ان الوضع غريب وفي حاجة غلط ولما مامته شافته جاي هادي جريت عليه وسألته
_ها يا زين لقيت روح .
بصلها بعدم فهم
_لقيت روح ايه!! .. مالها روح.
أمه رمشت اكتر من مرة وبعدها استوعبت انه ميعرفش فعلا ان روح مش موجودة
فقالت بتوجس علشان ميتصدمش
_زين انت متعرفش ان روح مشيت وسابت الفيلا!!
زين بحلق جامد وقال بصدمة
_نعم!! مشيت ! ومشيت امتا!! وليه
امه اتوترت لإنها عارفة انها هتواجه موجة غضب جامدة
_ ممم... من كم ساعة يا زين والكل بيدور عليها
زين انفجر في وش مامته بس مش قاصد انه يزعقلها هيه بالتحديد
_يعني ايه والكلام ده وازاي محدش بلغني... مليش لازمة انا ولا ايه.
_يازين الكل فكرك اول واحد عارف بالموضوع.
في الوقت ده زين جاله اتصال من زميل في الشغل
_زين سمعت ان روح قريبتك مفقودة وجاسر أخد فرقة للبحث عنها... هل أبعت فرقة أنا كمان للبحث.
زين اتكلم بهدوء
_لا لا ملوش لزوم ...تسلم يا مدحت ..انا متشكر ليك جدا .
_انت مش مهتم ولا ايه..مش دي قريبتك
_يابني مش مفقودة أنا عارف مكانها.. خلاص بقا .
_تمام انا بس عرفت معلومة ومفكرك مش عارف لانك كنت معانا من شوية ومجبتش سيرة .
_أصيل يا مدحت..اطمن لو احتجتك هبلغك
اول ما زين انهى الاتصال مع زميله مامته قالت بلهفة
_زين انت فعلا تعرف مكانها بالله عليك طمنا .
في الوقت ده كانت أونس وطنط فريدة نزلوا من عند ماما أشجان ولما سمعوا كدا جم يجروا وقربوا منهم .
فزين قال
_لا مش عارف مكانها بس معايا اللي هيعرفني ...أنا زارع في الموبايل اللي مع روح جهاز تتبع ...بس يارب متكونش اتخلصت من الموبايل .
الكل اتحمس جدا وزين بص في الجهاز علشان يشوف مكاني بالتحديد ولما عرفه ابتسم وقام اتحرك بسرعة من مكانه
اونس كانت عايزة تلحق بيه ...بس أول ما زين شافها زعقلها.
_محدش جاي معايا .. أنا هجيبها وارجع لوحدي.
وبالفعل انطلق زين بعربيته للمكان اللي انا كنت فيه .
مش عارفة انتوا متوقعتوش ليه... انا معرفش أماكن اروح ليها فبالتالي يوم ما أمشي هروح للمكان اللي أعرفه... امال يعني هلف في الشوارع زي الهبلة وممكن اتخطف او حد يضحك عليا او يأذيني .. روحت عِشتها .ستي اه ستي فاكرينها... المكان بعد موتها بقى مهجور اشبه بخرابة مينفعش حد يقعد فيه زواره كان الحشرات والعنكابوتات..بس انا مهتمتش... شميت ريحتها فيه وحسيت بروحها في كل ركن... أطباقها موجودة مكانها وسريرها مكانه صحيح الفرشة مش موجودة ونص السقف وقع والنص التاني ممكن يقع في أي وقت بس أنا مهتمتش ... مديت إيدي مسحت التراب والطوب المتكسر من الشلتة اللي ع الأرض الخشنة واللي كأنها معمولة من حجارة مش من قطن وقعدت وضميت رجلي وحضنتها بإيدي وفضلت قاعدة مش عارفة انا هنا بعمل ايه ولا أنا عايزة ايه او مستنية ايه او حتى هعمل ايه زي ما قلتلكم سبت نفسي الموجة توديني مكان ما توديني...فضلت مكاني ومن التعب نمت زي ما أنا صحيت على صوت حد بيزعقلي جامد وهو بيقول بحنق
_متخلفة فعلا... سايبة الفيلا وجاية تنامي هنا !!.
في الأول مكنتش مركزة مين وبعد ما دعكت عيني بإيدي وفقت بصتله وقلتله
_انت.. انت بتعمل ايه هنا ؟
شدني من ايدي بحدة وقفني قدامه وقال بكل عصبية
_انتي اللي بتعملي ايه هنا... وازاي يا متخلفة انتي تخرجي من غير إذني.. انتي ناسية اني جوزك يا هانم .
ضحكت ضحكت جامد وأنا فرحانة فيه
_جواز ايه اللي بتتكلم عنه عقد جوازنا مش صحيح ... أنا معرفش أنا مين ولا بنت مين .
زين اتفاجىء باللي بتقوله
_انتي بتخرفي تقولي ايه
_اللي سمعته يا زين... انا مش بنت سعيد وتهاني سمعتها بتقول الكلام ده بلسانها للست اللي كانت بتكلمها في الموبايل علشان كدا قتلتها... قالت انها بدلت البنت الميتة بيا وده يفسر كل اللي كانت بتعمله فيا .
زين تنح شوية وبعدين قال
_وان يكن ... أنا لما كتبت الكتاب كان قصدي عليكي انتي ونطقت اسمك انتي مش اسم ابوكي والعقد تم بشهادة الشهود .. يعني جوازنا صحيح... انا بالنسبة لمين أهلك لو كان كلامك ده صحيح فده هشوفه بعدين ...فامشي قدامي يلا على الفيلا... الكل قلقان عليكي هناك.
_مش جاية ... مش رايحة معاك في أي مكان.
فزين شدني من ايدي غصب ومن غير ولا كلمة ونزلنا لحد العربية وركبني ولف وساق بأقصى سرعة على الفيلا وهو بيقول ليا بوعيد
_حسابي معاكي بعدين.
مهتمتش لتهديده وكنت متوترة من اني هشوف ماما أشجان معقول هيا ماما فعلا ولا انا بتوهم ولا ايه .
وصلنا الفيلا ولما الكل عرف جه جري واوستقبلونب بالأحضان وماما أشجان اول عرفت ده قامت من سريرها رغم انها مكانتش قادرة تمشي ونادت وهيه لسه ع السلم باسمي
_روووح بنتي!!
ويمنى ساعدت أمها انها توصلي وسكنتني بين ذراعتها...في أكتر وقت انا حرفيا كنت محتاجاه فيه
زين طبعا وقف مكانه وتنح للمرة التانية
_مين بنت مين وازاي!!!
فحكوا ليه كل حاجة فتهجم وشه وتنح أكتر و قف مكانه زي الصنم مش قادر يتحرك من الصاعقة اللي ضربت نافوخه ...في اللحظة دي جاسر عرف من اونس اني رجعت وكان اساسا راجع يشوف اي تطورات حصلت ولما شافني جري عليا بلهفة
_روح انتي كويسة!!.. كنتي فين أنا قلبت عليكي الدنيا .
لكنه اتفاجىء بلكمة مباغتة من زين... زين كان هيفرقع ومش عارف يطلع همه ف مين فطلعه في وش جاسر كالعادة
جاسر كان هيقابله بضربه هوجاء زي ضربته لكنه لقى
زين واقف زي المغيب وبيقول
_روح بنت عمتي أشجان!!... يعني أنا متجوز أختين!!! .
في اللحظة دي عمي على..لو فعلا انا بنت أشجان هيكون خالي مش عمي
قال
_احنا لازم نعمل dna
فماما أشجان قالت وهي متمسكة بيا
_مش محتاجين نعمل ده أنا متأكدة انها بنتي... اه انا حاسة انها بنتي ..روح بنتي .
فجاسر قرب منها وكلمها بهدوء
_لازم نثبت ده علشان نأكد هوية روح قانونيا ويطلع لها شهادة ميلاد جديدة .
فوافقت ولما روحنا وعملنا التحليل انا كنت طول الوقت ساكتة ومش بتكلم خالص ... بعد فترة انتظار الكل فيها كان حاطط ايده على قلبه وخاصة زين اللي كان بيتمنى اني مطلعش بنت أشجان علشان جوازنا ميكونش باطل .
ولما طلعت النتيجة و اتضح فعلا اني بنت أشجان ... الكل صرخ من الفرحة وماما اخدتني في حضنها وانا اتصنمت مكاني... معقولة فعلا ماما موجودة وقدام عيني واخداني في حضنها كمان زي ما كنت بحلم وبتمنى ... معقول انا كنت عبيطة اوي لما سبت الفيلا في الوقت ده وكنت ممكن اتحرم من أمي تاني لو كنت روحت مكان بعيد او تهت ... اتجبست مكاني من الصدمة لبعض الوقت وبعد كدا انفجرت في البكا وماما كمان كانت بتبكي من غير توقف حتى يمنى قربت مني وخضنتي انا وماما وعيطت... الكل اتأثر وبقا يبكي من الفرحة ومن القهر ومن الصدمة معقول تهاني وصل بيها الجبروت انها تعمل اللي عملته ايا كانت اسبابها.
كانت لحظة صعبة ومؤثرة ...عليا وعلى ماما ...ومقدرناش نتخطاها او نخرج منها بسهولة
وبعد فترة هدينا وماما مكنتش راضية تسيبني من حضنها أبدا... الا علشان تروح تتوضى وتصلي شكر لربنا
رجعنا الفيلا ويارا لما سمعت الحقيقة تنحت والموبايل وقع من ايديها ومهتمتش ...تقريبا ده يوم التتنيح العالمي وبعدها جريت عليا بلهفة ووقفت قدامي وعنيها مليانة دموع ولأول مرة يصعب عليها اللي حصلي واللي شوفته في حياتي...فحست بالقهر علشاني وصرخت بإسمي
_رووح... انتي أختي !!.
واخدتني هيه كمان في حضنها وعمري ما كنت أبدا اتوقع رد الفعل ده منها.
بعد يوم مليان بالمشاعر ماما واخواتي مسابونيش لحظة ويارا فضلت طول الوقت تعتذرلي على سوء ادبها معايا وكلامها الجارح ليا وفعلا كنت شايفة في عنيها الندم على اللي كانت بتعمله فيا .
تاني يوم زين طلعلنا يطمن عليا وانا اول ما شفته ابتسمتله بشماتة وقلتله
_عقدنا باطل .
حسيت جواه وجع غريب ومبقاش عارف يقول ايه عينه بتزوغ هنا وهناك ... مكانش عايز كدا مكانش في نيته انه يطلقني ... كان بيخطط انه هيطلق يارا ونتجوز إحنا هل تفكيره ده بناء على حبه ليا ولا لا هو نفسه مكانش عارف ده ...لكن دلوقتي احنا يعتبر مكناش متجوزين من أصله وهو حاليا متجوز يارا وبس .
بصراحة انا كنت فرحانة لانه اتجوزني غصب عني وكمان استحالة بعد ما عرفت ان يارا أختي اسمح اني اكون ضرتها حتى لو كان ده ينفع ومش حرام ... في كلا الأحوال انا وزين مش لبعض .
زين حس بالخنقة ومبقاش عارف يقول ايه الا انه بصلي بعتاب ومشي من غير ولا كلمة .
يارا طلعت تجري وراه وهي بتنادي عليه
_زين ... زين طلقني واتجوز روح أختي .
زين بلع ريقه وفرح جدا في نفسه بس مرضيش طبعا يبين ده ليارا علشان متزعلش
يارا عملت كدا يمكن تحس انها كفرت بده عن ذنبها تجاهي
ولما لقت زين واقف مبلم مش بينطق
فاتكلمت
_زين انت عارف ان الحياة ما بينا كانت مستحيلة وانا كنت طالبة الطلاق قبل كدا ..فطلقني واتجوز روح وعوضها عن اللي شافته ده رجائي عندك يا زين .... وانا كمان علشانها هتغير وهكون حد الكل راضي عنه وعن تصرفاته وهحاول أعوض أختي عن اللي عملته
زين بصراحة رحب بالفكرة جدا وابتسملها وقال بفرحة هتنط من قلبه هو حبني بس بيعاند او بيكابر او مش عارف ومستحي يقول ده صراحية
_موافق يا يارا .
ولما الخبر انتشر .. اللي هو طلاق زين ويارا
انا رفضت رفضا قاطع ان ده يحصل معقول انا اكون بالأنانية والدناءة دي... افرح بطلاق أختي واتجوز جوزها... استحالة انا أعمل كدا حتى لو كنت بغشق زين مش بحبه بس ... وكمان كان انا كنت رافضاه قبل ما اعرف انها أختي فلما بقت أختي وحبتني ومعاملتها ليا أحسن ما يكون اوجعها وافرح فيها بالشكل ده لا مش هيحصل
زين حاول يتكلم معايا ويقنعني
_روح اسمعي انا من زمان كنت هطلق يارا قبل انتي ما تطلعي من المستشفى يعني طلاقنا كان مسألة وقت .
_لا يا زين .. يارا بدأت تتغير... معلش اتحملها وهتكونلك أحسن ما يكون ..بس انا استحالة أوافق انك تطلق أختي
_حتى لو هيه عايزة دا ...حتى لو قلتلك اني عايزك انتي .
_انت مش عارف انت عايز ايه!! وع العموم يا سيدي شكرا... انا مش عايزة اتجوز من أصله .. انا مش مؤهلة لجواز ولا غيره ولا بفكر ولا عمري هفكر فيه... أنا أقصى أمنياتي أعيش بقية حياتي وسط أهلي وبس..
_يا روح فكري بالله عليكي
_ده أخر كلام عندي يا زين
_طب ايه رأيك انا هطلق يارا
_افهم حتى لو طلقتها مش هنتجوز أنا مش عايزة اتجوز الجواز مش في خططي الجاية
_روح انتي كدا بتظلميني!
_وهظلم نفسي لو قلتلك غير كدا .. انا منفكعش صدقني... يارا بتحبك حاول تحبها زي ما بتحبك. رجائي عندك يا زين اوعى تطلق يارا واعطيها فرصة تانية... وربنا يسعدكم يا زين وانت هتفضل ابن خالي اللي بحترمه وبحترم تفانيه في شغله.
سبته ومشيت وهو كان حاسس اني أخدت روحه معايا.. المية جفت من حلقه وحس بغصة كبيرة واقفة في زوره مش عارف يبلع او يتنفس... حس اني ضعت منه واني كنت كنز كبير هو فقده ومعندوش القدرة انه يرجعه تاني..
بعد كدا اكتشفنا ان زين بعد الحوادث اللي عملتها أنيسة شك فيها وبدأ يراقبها علشان يشوف اي دليل يوصله لأي معلومة لانه شك انها هي الست اللي تهاني كانت بتكلمها في الموبايل فأكيد وراها حاجة وكبيرة كمان ولما هيه حست بده هربت وهو كان بيلاحقها ولما طلبت من السواق يزود السرعة والسواق رفض مسكت هيه دركسيون العربية وطبعا معندهاش اي فكرة عن السواقة فلخبطت السواق فاتخانق معاها ...العربية حودت بيهم وخبطت في حيطة ...السواق جاله ردود وكدمات اما هيه فماتت...وبكدا الدليل اللي منه هنتأكد هل انا اللي قتلت تهاني ولا لأ مبهم... هتقولوا عايزة أعرف ليه ما كدا كدا أنا خصلت عقوبتي ...هقولكم اني لسه لحد دلوقتي شايلة الذنب ده وحاسة انه حمل كابس على نفسي ومش قادرة اتخلص منه .
زين مقدرش يطلق يارا ومجالوش عين يعملها في الوقت ده وانا كنت مبسوطة لأختي جدا
أما أونس فقررت أنها تنفصل عن جاسر لإنها عارفه انه كان عايز يتجوزني أنا بس لما لقا زين اتجوزني فخطبها هيه وقررت انها تعطي فرصة لجاسر من تاني انه يرجعلي
فأنا قلتلها
_يابنتي افهمي كل ده كان مجرد شفقة جاسر بيحبني زي اخته زي ما أنا بحبه زي أخويا بالظبط .
بس اونس مكانتش مقتنعة وكانت حاسة نفسها عائق في سبيل فرحتي
قلتلها
_ بردو لو سبيتيه مش هتجوزه
اسمعي الكلام ..جاسر طيب ولو كان بيحبني فعلا كان عافر علشاني علشان بس تعرفي إنه مجرد شفقة وعطف وان كنت شاكة فحبه ليكي فالحب بينكم هيجي بعد الجواز والعشرة وانتي يا أونس مفيش حد ممكن يعاشرك وميحبكيش.... ولو اني متأكدة انك بدأتي تشوفي تعلقه بيكي وبداية حبه ليكي .
اونس سكتت فأنا غمزت لها وقلت وانا بضحك
_تنكري
فأونس قالت بهم
_أنا مستعدة أضحي علشان سعادتك ياروح .
_وانا سعادتي في سعادتك انتي وكل اللي بيحبوني..بحبك في الله يا أغلى وأعز صديقة .
عدت الأيام وفضل زين ليارا
وجاسر لأونس
وبعد فترة من إلحاحي عليهم اتجوزوا
و قررت أنا اني مش هتتجوز وان في حياتي تفاصيل كتير لازم أعيشها من أول وجديد....
تمت