و ان خان الزمن بقول وافي.. ماني بتركي ولا اظنك سعود ! - الفصل 6 - بقلم غياهب | روايتك

انتبهت اصايل للشهقه الخفيه الي صدرت بتحفظ شديد من الجوهرة بجانبها.. انتبهت بكامل جوارحها و إلتفتت بفزع.. / وش فيـك.. ؟؟ الجوهرة و عينها على الهاتف.. تتفحص الصورة ذاتها الي مرت على متعب و فيصل.. / ما فيني شي بس.. بس شوفي.. شوفي فهد مين مصور.. شافت اصايل و اجابتها ببرود بعد ركود اعصابها.. / احسب عندك سالفه.. و اذا يعني.. ؟؟ ما تحسين انك تبالغين برد فعلك تجاه اي شي له علاقه فيه.. رجال و متجمعه مع بعضها وش الي صاير يعني ما فهمت.. لكن الجوهرة.. و ابتسامه الجوهرة و لهفتها و فضووولها.. اخذوها لبعيـــد.. خارج حدود السيارة و الشارع الي تمر به حاليا.. ودها تسابق الوقت و من يقدر على سباقه.. ؟؟ و كما جرت العادة.. ما فات انتباه اصايل حالها المتقلب.. و كأنها و لعلها قرأت افكارها.. لتهمس.. / تبين انزلك اول.. ؟؟ التفتت الجوهرة بارتياب.. / ليـه.. ؟؟ بيتك قبلي و مو من بعد المسافه وش مستعجله عليه.. اصايل بابتسامه تحاول مداراة مواري الخبث فيها.. / ما ادري عنك.. عيونك تتلاقط تدور اسوار البيت و باقي عليه 20 كيلـو.. دارت ضحكتها و دارتها إلى ان استسلمت.. و صدحت في ارجاء السيارة بصخب انعش روح اصايل الي غابت عنها هالضحكه من فتـره.. ضحكه احب و اقرب الناس لها و من اغلى.. والله ما فيه يالجوهــرة.. ما فيه اغلى منك يا روح روحــي.. تكفين اتركيه و اتركي متابع اخباره.. اتركيه جعل ربي يعوضك خير العوض الي ينسيك اياه و كأنه ما صـار ولا قام ولا قعد عندك.. اتركـيــــه.. كانت نص ساعه او اكثر بقليل لما وقفت السياره امام البوابه الداخليه و قبل لا تترجل منها دارت بعيونها جهة المجالس و كانت الانوار مطفيه.. وحده اضاءات الممر الحجري الممتد من البوابة الخارجية إلى الداخلية و يتفرع كل 6 امتار فرع يوزع على مرافق المنزل.. المجالس و الساحة الخلفية و الكاراج و غرف العمالة و المسبح و و و …… إنارات خافته جداً هدفها اضاءه الطريق و من خلالها تبين لها ان لا احد في المنزل اليوم و خصوصا الشباب.. واضح الجمعة الليله برى.. يا رب انه رجـــع.. انحنت لداخل السياره بعد ان ترجلت منها و وادعت اصايل.. / بكره بمرك موجوده صح.. ؟؟ اصايل.. / اكيـد وين بكون يعني.. الجوهرة.. / تمـام يالله Good night.. اغلقت الباب و دخلت داخل و تفتحت اساريرها و اشرقت من منظر المجلس المنــور بفعل الانوار و حضرة شقيقها المنشووود.. اقتربت بحماس لا مبرر له امام فهد الذي انتفض لصوتها العالي بعد ان كان في هواجيس لا بداية ولا نهاية لها لولا الجوهرة.. / مرحبــــا.. فهد.. / هلا والله.. بغيتي تاخذين عقلي الناس تصفق الباب بقوه ولا تمشي بلباده اي شي المهم احس بجيتك مب كذا.. جلست الجوهرة و نزلت كعبها الي كانت حاملته بيدها.. / منزلته من وانا بالسياره كسرني.. العلوووم.. فهد.. / ويومه مكسركم وش حادكم عليه.. والله لا جديد.. اليوم بالبيت كله ما طلعت الا مع عبدالرحمن جاء الرياض دريتي به.. ؟؟ الجوهرة ببرود مبالغ فيه قد يعكس ما بداخلها من لهفه للنبيه.. / ايـه.. و وش عنده عاد.. فهد.. / جاي ياخذ اوراق يقول ابوي طالبها منه و نسينا ان سعود مغيرها اصلا والله يا هو فصـل على فيصل هههههههههه و سعود ما يرد بعد.. ضرب مشوار ع الفاضي.. تجهم وجهها و خابت آمالها الي كانت اصلا شبه آمال و اقرب للاوهام بإنه ولو بالغلط.. ولو بالغلط جاء عشانها.. تنحنت و اكملت استفساراتها.. / ما قال لكم وش الاوراق.. ؟؟ فهد.. / لا.. انتي الي عطينا علومك.. من وين جايه.. ؟؟ الجوهرة.. / عرس آل##### الله يبارك لهم و يهنيهم شي ما صاار ولا استوى تبارك الرحمن عرس من وحي الخيال ذوووق في ذوق في ذوق.. فهد و قد تذكر وليته لم يفعل.. / يالله عقبالي.. اولى على العشاء طرينا موضوع زواج عبدالرحمن انا علمتك انه خاطب.. ؟؟ كذا ع الصامت لا حس ولا خبر صدمني اقسم بالله اخر واحد توقعته يعرس من العيال هو.. عاد يالله خذ لك توّاق بيعرس و الحين عبدالرحمن ماشي على خطاه ما بقى الا انا اصبح على وجه فيصل و امسي على وجهك ما اقول غير الله يمد بعمر سلطان و يعافيه ثم والله ان اول شي اسويه بعد ما تخطي رجوله الرياض ان اخذه ببشته يطق باب اطلق شنب و اخذ بنت الرجال الي كريم نسبها و اعيشها حياة موب ورديـه.. وش اقول بس تكفين خليني ساكت والا اقول برقى احط راسي قبل لا تقروش مخي الهواجيــس.. تبين شي يالشيخـه.. هزّت راسها بلا و غادر.. غادر لاهي بجواله ولا انتبه - و لحسن حظها - ما انتبه لهـا.. ما انتبه للانهار الي سالت مجرد ما غادر المجلس بانسيابيه.. تركت كعبها و شالها على الكنب و طلعت لغرفتها على عجل تبي تختلي بنفسها قبل لا تفضحها ملامحها امام اي احد محتمل حضوره في هالوقت و ابرزهم فيصل.. دخلت الغرفه و توجهت بخطوات اقرب للهروله لدورة المياه و استلقت في وسط حوض الاستحمام بعد ما ادارت صنبور الماء الدافي و بدون ما تبدل او تنزع فستانها الحرير المنسوج نسج يدوي.. مكلـف وتفاصيله مكلفه و اسم المصمم ما يستحق هذي المعامله منها لو كانت في وعيها لكنها مو في وعيها.. بل هي ابعد ما تكون عن الوعي في هاللحظـه.. اخذت نص ساعه في الحوض مستلقيه بلا حراك و فجأة.. و كأنما ردت لها الرووح.. فزت من محلها و بدلت و جففت شعرها و انجزت روتينها المسائي للعنايه بالبشره و بعد ذلك اتجهت للجلسة الداخليه الفاصله بين غرفة نومها و غرفة الملابس.. كوب بابونج دافئ و جرّت معه في طريقها لغرفة النوم وشاح دافي و ثقيل ناويه تغادر اسوار الغرفة المكتومـــه إلى حد الضغط على انفاسها و خنقها للشرفه.. و كأن شيئاً لم يكن.. تتأمل السماء و القمرى و الساحة المظلمة و انوار خافته تضيئ الممر الحجري وحده.. غمضت عيونها لتلقي القبض بفعلتها هذه على دمعه متمرده انتهى زمنها منذ مغادرتها لزنزانة حوض الاستحمام.. حبست نفسها هناك نصف ساعه استنفدت فيها كامل مشاعرها و انتهــى.. الليله فعلا انتهى كل شي كانت تتمنى لو ينتهي و انتهى.. الامنيه اصبحت واقع.. امنيه خمس سنوات في 5 دقائق محادثه اصبحت واقع.. فتحت عيونها تبي تشرب قبل يبرد و بعد ما الدمعه بردت فعلا.. و جفّت مكانها.. مثل ما جفت بقايا مشاعرها تجاه الزول الي حضر فجأة في الساحه و يبدو مشغول في هاتفه.. بلا شعور وبلا تفكير دخلت داخل لتبحث عن هاتفها و ها هو بين يديها الآن.. اتصلت و رجعت مكانها في الشرفه تنتظر رده.. / هـلا.. الجوهرة.. بلا مقدمات.. / تدري.. اول ما شفتك بعد كل هالمدة كرهت نفسي لاني كنت عايشه في وهم اسميه وهم الـ ) نسيــته (.. احسب اني فعلا نسيتك و تخطيت كل شي كان بيني و بينك او على الاقل اني تخطيت حركة اخذ اغراضي و اضرب الباب و اغادر بدون ما ابرر لاي احد لاني عبدالرحمن اتصرف بدون ما افكر الا في نفسي.. من يومك اناني بس مشكلتي توهمت اني فوق الكل وفوق انانيتك كنت اشوف بعيونك و بتصرفاتك حب مستحيل اكون واهمته.. ولا تخاف ادري انه انتهى.. انا الليله بس تأكدت انه انتهى و رغم انك ما قدرت تكرمني على الاقل و تكون رجال و تواجهني باسبابك و تقول تراي ما عاد ابيك لان والله يا بنت الناس كذا و كذا و كذا انا صنعت لك اسباب من راسي و 5 سنين اجاهد نفسي عشان لا اصدقها و اسامحك و يوم شفتك امس صدقتـها.. و رجعت اضعف و ارخم من اول احبك ولا ابي غيـرك.. عبدالرحمن.. / ا…… الجوهرة.. / لمرة وحده بحياتك خلني اكمل ولا تقاطعني ما طلبتك تواجه ارتاح و اسمع بس بكل الاحوال هذي آخر مره تسمعني فيها.. فاسمــع.. تخيل حتى اليوم بالزواج اتصدد عن الحريم ما ابي وحده منهم تتأمل فيني خير لولدها لاني برده لو ان ما اطيب منه فالرجال غير ابوي برضو بـــرده.. مبيته النيه لانك مسيطر و مستحوذ على نيتي ما اعتقتها ولا فكرت ولا رحمتني و جيت قلت ما ابيك لا لا.. قلت احبك و ابيك و مشيت بعدها باسبوع و تركت الرياض و المملكه بكبرها حتى قبر تركي ما بعد جفت تربته و مع ذلك ما استحيت ولا قدرت.. و الحين بتتزوج.. ؟؟ اقسم لك بالله ماني بزعلانه ولا عتبانه بالعكس لاول مره احسك رجــال.. رجال مع غيري لانك وعدت و وفيت بوعدك لها و يمكن انا الي ضغطت عليك فعلا يمكن انا حملتك شي فوق قدرتك والا انت مين وانا مين.. انت عبدالرحمن بس و انا الجوهرة بنت سلطان بن فيصل بن مقرن آل…… فعــلا.. ما فيه اي تكافؤ في النسب و افهم شعورك مع فارق المنزله طبعا لكن افهمه.. كنت خايف اكون اكبر منك و كثيره عليك و كنت فعلا.. تصدق..؟؟ الليــله بس فهمتك.. و يمكن انها اول مره افهمك.. الف الف مبــروك.. مبروك يا عبدالرحمن.. . . . . التفت ناحيه شرفة غرفتها ولمح زولها رغم الظلام الدامس و انسحابها داخل بعد إلتفاتته.. همس.. / الله يبارك بتركي و متعب والا انا مسير.. اخترت اكون مسير لخاطرك و خاطرك يسوووى.. ما ادري متى يعتقني لسانك و اخلاقك الي ماهيب اطيب منه لكن ما عليه.. اهون علي اجرحك و تنسين بكره ولا تجرحيني و ما انساها لك لين اموت.. لولا هالعرس والا نزلت قبر تركي بداله يا بنت وش الي تدرين عنه انتي و وش تعرفين غير انت و انا.. غرورك سهل استفزازه و تقولين احبك.. كبيـره هالمشاعر على اهل الدراهم.. كبيره عليك و على الي خلفوك.. استغفر عن آخر جملة قالها لعيون سلطان.. الغالي سلطان.. انفرطت اعصابه و نسى نفسه و الا هل حصل قط و قلل من احترامه لابو تركي.. ؟؟ ما حصل.. لكن كل شي استثنائي يبدر منه و يحصل في حياته بشكل او بآخر كان مرتبط فيها.. توجه للمجالس الخارجيه حيث يقطن مؤقتاً بعدما فقد الأمل بالوصول لسعود رغم فارق التوقيت الا انه كان مضطر يحاول على الأقل و باءت محاولاته بالفشـل و زيادة عليها اتصال الجوهرة الي فعلا زاد الطين بلّه و انهى الليله بشكل تراجيدي حكم عليه بالسهر و غياب النوم قطعياً.. يا نعنبو ذا الراس يا فهد ما تمسك العلم.. ولو انها بكل الاحوال تبي تدري بس كان بدري مره.. بدري علي اخسرها.. كنت شبه خسران و الحين خسران و خسران و خســــران.. البرود بصوتها و ثباته و كلامها الواضح و تصريحها بمشاعرها كلها دليـــل.. الجوهرة الي تحب حساسه.. اضعف من هالمواجهه.. لكن هذي الجوهرة ثانيــه.. مختلفه بكل تفاصيلها.. الله يرحم اخوك الي تبكينه و يبكيك على حسابي.. الله يرحم المتسبب و يرحم حال المتوهق الي لا يبي العرس ولا يقدر يفك نفسه.. لو تـدرين بس.. لو تدريـن.. كانت هذي افكاره في طريقه للمجالس و استمرت تصول و تجول في ذهنه حتى غاب عن الوعي مرهقاً اخاك لا بطـل.. . . . . انتبهت لرنين هاتفها على بعد عدة امتار عن دورة المياه فقد كانت هي الاخرى تستعد للخلود إلى النوم بعد ليـله طويله حافله بالزينه و مساحيق التجميل إلى حد انها استدعت خطوات طويله و مكثفه من روتين العناية بالبشرة و لحسن الحظ جاء الاتصال مع آخر الخطوات و هو القناع الذي لا يمنع ولا يعيقها من التحرك فيه بسهوله بل حتى ان تجيـب على الاتصال الوارد من الشخص الوحيد الذي قد تفعل هذا من أجلـه.. هو الاستثناء الوحيد في حياتها من فئه الذكور.. / تدري اني ما اعطي وجه لاي احد في وقتي الخـاص ولا ما تدري.. ؟؟ لا و الساعه شوي و تدخل 3 و مع ذلك ما قويت اتجاهل اتصالك.. محظوووظ.. توّاق بضحكه جاءت باارده جداً لمسامعها الحساسة تجاهه.. / هههههه ايـه والله محظوظ و محسود و معيون و الله لا يحرمني هالصوت و راعيه الخفيف الي ما يقوى يتجاهل و #### في الثقل و اهله وش نبي بهم يا حب.. علومك.. و كيف الزواج عسى ما احد حط عينه عليك عشان اكسر عينه و عين من جابه.. تجاهلت كل ماذكر.. / توّاق وش فيه صوتك.. ؟؟ توّاق يقاوم.. / ما فيه الا العافيه وش فيه صوتي.. اصايل.. / ما ادري بس فيه شي ولا تخبي علي انا اصلا مستغربه اتصالك في هالوقت و صوتك اثبت لي شكوكي.. صاير شي مع العيال.. ؟؟ العمل.. ؟؟ توّاق.. / اصايل.. اصايل.. / لبيـه.. توّاق بتعب يصعب على اصايل تحديد مصدره.. / احبـك.. و احب فيك اهتمامك بالتفاصيل الي انا بنفسي ما ادري عنها ولا تهمني.. و احب فضولك و لقافتك و عسل على قلبي دامها في اشياء تخصني و من غلاك لي.. اقسم بالله احبك.. و… يصمت قليلا و تتحدث بالنيابه عنه اصايل.. / و ايش.. ؟؟ وراك تكلمني زي الي يوادع ترى شايفه هالسيناريو في المسلسلات واجد فلا تعكر لي مزاجي و تشغلني توّاق في ذمتك وش صاير.. ؟؟ توّاق بضحكه تبدو هالمره حقيقيه و نابعه من القلب.. / ههههههه يا بنت الحلال وش وداعه ما ياخذني عنك الا الموت و هذا علمه عند الله و النعم بالله و الا انك بنفسك تقولين طلـــّق.. غير كذا ما مـن وداع.. معك معك وين ما ذعذع هواك و مالت الفيّه.. - اقتبس الجملة الاخيرة من قصيدة للشاعر الكبير ضيدان بن قضعان.. - اصايل.. / و ليه اقولها.. ؟؟ انت ما انت بصاحي اليوم اقسم بالله مو طبيـعي.. وش هالهبد هذا كله وينك فيه الحين.. ؟؟ توّاق يتجاهل سؤالها.. / و ليه ما تقولينها.. ؟؟ اصايل.. / يعني تبي اقولها.. ؟؟ توّاق.. / لا تتلاعبين بسؤالي تراه واضح.. اصايل.. / توّاق قاعد توترني.. متصل علي الساعه 3 الفجر و مشربك المواضيع ببعضها و تقول احب فيك الشي الفلاني و العلاني و بتقولين طلقني.. ايــش فيه.. وش تبي توصل له عطني من الآخر.. توّاق.. / يا بنت الحلال وراك متوجسه ما فيه شي و كلامي رد عليك.. قلت لك ما يوقف بيني وبينك غير امرين و واحد منها انتي.. كان انك تبين الطلاق هذا الفاصل الوحيد بيننا و رديتي علي قلتي ليه اقولها و هذاني اعيد السؤال.. و ليـه ما تقولين.. ؟؟ ابي اتطمن علي عندك ابي اسمع منك شرح وافي يمنعك تطلبين الطلاق مستقبلاً ابي اراهن على هالزواج.. بــس.. اصايل تجاريه بشي من القلق بعثه السؤال في نفسها.. / و ليه اطلب الطلاق اذا انك تحبني و بتخاف الله في العشره الي بيننا و بتصونني و تصون قدري و تحفظه ولا تتزوج علي و لا تخون و لا تمد يدك ولا تجرحني بكلمه ما لها اي داعي.. و هذي كلها امور انا ما اتخيلها تصدر منك و استبعدها كلياً و عشاني مستبعدتها قلت لك قبل شوي ليه اقولها و استنكرت كلمتك لاني على الاقل حالياً و حتى هاللحظه مسيو توّاق ما افكر ولا راح اطلب الانفصال و الله لا يجيبه فراهن و انت مرتاح.. توّاق.. / هذي كلها امور مشتركه بيني وبينك و معاهدين فيها الله سبحانه.. لكن.. انا اقصد امور شخصيه تخصني ما قد سألتك و احس انك ما قد فكرتي.. اصايل لو فيني عذروب ما يترقع مثلا و لكني مخبيه و مداريه عنك زين لدرجه ما لاحظتيه ولا بتلاحظينه.. بيتغير شي في كلامك.. ؟؟ اصايل.. / عذروب مثل.. ؟؟ توّاق.. / يعني خلينا نقول اني ادخن مثلا.. اصايل.. / توّاق.. اسألك بالله كل هالمقدمات عشان دخان.. ؟؟ عادي بتقلع عنه و بسامحك و امر الله من سعه والا هذي هواجيس ما قبل الملكه.. ؟؟ اذا متوتر يمديك تنسحب ترى عادي.. توّاق.. / ارفعي علومك ماهوب انا الي يرجع عن كلامه.. صدق اني توهقت بس برضو مش هرقع عنو.. اصايل.. / ههههههههه يلا الحمد لله زوج المستقبل طلع ريّال.. متوهق بس ريّال و كلمته وحده ولا يثنيــهاااا.. فديـــته.. توّاق.. / احبـك.. اصايل.. / و انا احبك بس لو تفكني من افكارك الغريبه هذي الي تفاجئني بها كل فتره كان احبك اكثر.. علمني بس وش سويت اليوم.. وين رحت و وين جيت.. توّاق.. / الي يدور علومي يجي ياخذها.. عاد توووني واصل و المجالس فاضيه.. اصايل بخجل.. / نجووم السما اقرب لك.. وخر بس عطيتك وجه و نسيت وجهي.. اغلقت الهاتف و عادت للانشغال بوجهها و ما تبقى من خطوات العنايه و ذهنها مشغوووول بالحوار الذي دار قبل قليل بينها وبين توّاق.. استشعرت حاستها السادسه والتي لم تخذلها من قبل بإن كلمات توّاق تحمل معاني اعمق بكثير من ظاهرها.. وش العذروب الي مشغل عقلك و مشغلني معك يا توّاق.. ماهي اول مره تطري هالموضوع.. ما هي اول مره و لا اظن بتكون الاخيره لين اعرفه و نتواجـه.. . . . . مع بداية صباح يوم الثلاثاء.. قررت مضاوي ان تأخذ وعد في رحله سياحيه للمدينه بعد ما علمت انها الزيارة الاولى لها و غادرت الشقه مبكراً لشراء بعض اللوازم لوجبه الفطور فقد قررت مسبقاً جدول اليوم و البدايه من الشقه حيث تكون وجبه الافطار فيها لئلا توقظ وعد التي بانت آثار الارهاق عليها بوضوووح من منظر السرير المنقلب رأساً على عقب.. اما وعد فقد استيقظت بعد دقائق من مغادرة مضاوي فهي تضبط منبه الساعه على 8 دائماً و ها هو يرن ولا يرحم حالتها الاستثنائيه اليوم فقد كانت الرحله طوووويله و مرهقه فعلا و مع ذلك استجابت له و نهضت تبحث عن مضاوي ولا اثر لها فقررت استغلال غيابها في اخذ حمام دافئ منعش مع بداية اليوم.. أما إنجل ( العامله المنزليه ) و التي اعتادت على فتح الباب لثلاثة رجال فقط حينما يقرع الجرس و لم يجري تنبيهها هذه المره بدفن العادة بعد وصول وعـد فقد شرعت الباب في وجه عبدالعزيز الذي خطى خطواته ناحية الصاله بعد ان أجابها.. / as usual my dear.. فإتجهت على الفور إلى ماكينة القهوة لتحضيرها بينما عبدالعزيز يستريح في صالة الجلوس في إنتظار شقيقته.. كانت دورة المياه بعيده عنه ولكن لم تكن بعيده بالقدر الكاف لتحجب عن مسامعه صوت قطرات الماء الكثيفه ليتبادر بذلك إلى ذهنه انها في مهمة استحمام قد تطول.. نهض ليتجول في المنزل قبل ان يرده اتصال من ناصر.. / وينـك.. ؟؟ عبدالعزيز.. / عند مضاوي توني واصلها دقيت عليك ما رديت و رحت لحالي.. ناصر.. / طيب لا تبطي ابيك تمر قسم المحاسبة و تشيك لي على مستحقات نوفمبر لموظف اسمه ريتشارد بليك و ارفع لي التقرير على طول.. عبدالعزيز.. / ابشـر على خشمي.. ناصر.. / انتــظرك.. انهى الاتصال.. و ها هو يوشك ان يخطي اولى خطواته ناحية الغرفة المنشوده الا ان ذكرياتها استوقفته.. ياما هرب من مشاكل متعب و ناصر لها.. و ياما اختبئ فيها من ضغوط الحياة و متاعبها.. ملجئه الاول و الاخيـر كانت مضاوي و غرفته في شقه مضاوي.. كانت اقرب الناس له و بتبقى محتله هالمكانه في حياته إلى اجل غير مسمـى.. و قاطع سيل الذكريات الباب الي تشرع و غادره جسد رشيق بطول فارع يتجاوز طول شقيقته بأمتار و شعر بقصة صبيانية عشوائيه تتضاد بعنف مع تقاسيم الجسد الناعم إلى حد انها جعلته يتسائل ما لو كانت تسير على الارض فعلا بخفة و رشاقة حركتها.. حلقت امامه من دورة المياه إلى غرفتها الي صارت بعد هذه اللحظه من املاكه سابقا بهدوء و رقه و كأنها.. لا.. لم يجد مفرده تنصف ما شاهده و ان حاول يبحث فلا جدوى.. فمضاوي حضرت و اقتحمت خلوته في الوقت المناسب و غير المناسب في آن واحد../ والله الي صباااح الخير هالي جابك و ذكرك فينا.. اقتربت منه اكثر بعدما تخلصت من مشتريات البقالية و احتضنته بشده كتمت انفاسه.. / Missed you so bad.. ثم ابتعدت بسرعه و تسائلت بارتياب و قد استذكرت.. / وعــد.. وعد.. وش لون دخلت انت.. ؟؟ عبدالعزيز.. / دقيت الجرس و فتحت لي انجل وش لون بدخل يعني سطو.. ؟؟ مضاوي بحرج.. / و يا سبحان الله ما لقيت تزورني الا اليوم صح.. ؟؟ على الاقل اتصل طيب.. عبدالعزيز بتعجب.. / توك ترحبين و تهلين وش هالاستهبال و بعدين معودك اني اتصل يعني.. ؟؟ دايم اطب عليك وش الجديد.. تجره مضاوي جهة الباب و هي تجيبه.. / الجديـد ان فيه بنت عندي بالشقه و بتكون عندي الاربع سنوات الجايه كلها فـ وجهك هذا ما ابي اشوفه قبل تتصل و تعطيني خبر ارتب الوضع معاها موب تقلط متى ما طقت براسك احمد الله و اشكره ما تصادفتوا والا و الله غير تاخذ عقل البنت.. لعلها المره الاولى في حياته يكون بهذا المنظر الطفولي المزعج المتلكك و لا يبدو ان لديه اي رغبه بالمغادره.. / الله اكبر اخذ عقلها مره وحده ريلاكس يا دراما وش بسوي لها يعني و وش ابي بها جاي ادورك انتي و لو انك معلمتني وفرتي علي حق المشوار.. مضاوي.. / طيب انت وش تبي الحين.. ؟؟ ما يخالف تمشي.. ؟؟ بصحي البنت و ما ابيها تشوفك.. عبدالعزيز.. / انا اخوك و انا اولى جايك ابي افطر عندك و هذا ردك علي.. و الا الي لقى احبابه نسى اصحابه.. ؟؟ مضاوي.. / اقوول يالله دبر عمرك بس الله يعطينا و يعطيك.. استسلم اخيرا و غادر الا انه عاد ادراجه على الفور و قبل ان تغلق الباب.. / بنـــت.. اصبري لا تقفلين.. مضاوي.. / بتجلطني تراك بهاللباده الي فيك اليوم وش فيك متقمص شخصيه متعب.. وش تبــــي وش عندك.. ؟؟ عبدالعزيز بابتسامه فضوليه حفزت انتباه شقيقته.. / قلتي اسمها وعد.. ؟؟ مضاوي.. الذهينه مضاوي.. / يعني تصادفتوا.. ؟؟ عبدالعزيز.. / لا.. مضاوي.. / يعني تبي تقنعني انك صرت فضولي فجأة من العدم ولا هي شخصيتك ولا طبعك كذا فضول نازل من السما بدون اي سبب.. ؟؟ عبدالعزيز.. / اها يعني لو شفتها بيكون فضولي في محله فمعناته البنت حلوه.. ؟؟ مضاوي.. / بقفل الباب في وجهك ولا علي اخوي الكبير من غيره فتكلم بأدب.. عبدالعزيز.. / بتعلميني والا امشي ألحق شغلي اصرف.. ؟؟ ترى مانيب حريص ذاك الحرص سؤال و سألناه عندك جواب والا مشينا.. مضاوي.. / لا امش الله يستر عليك.. ثم استوقفته.. / عزوز.. ألتفت عبدالعزيز بصمت ينتظرها تكمل ما بعد النداء.. مضاوي.. / She’s not your type.. ( ماهي ذوقك.. ) عبدالعزيز.. / how do you know my type.. ؟؟ I’ve never had one.. ( وش عرفك بذوقي.. ؟؟ عمري ما كان عندي ذوق معين.. ) مضاوي.. / I just know.. trust me in this.. ( اعرف وبس.. صدقني.. ) فأجاب بتهرب و شيء من الحرج بعدما استوعب فضوله إلى اين انتهى به.. / طيب بالغتي تراك باقي تقولين مخطوبه و مالك نصيب و انا ما عرفت الا اسمها و مب متأكد بعد وعد والا عهد وش ابي بها يا بنت بلا دراما مضاوي عاد سويتيها سالفه على راسي.. و يالله Take care انا ماشي تأخرت على اشغالي.. مضاوي.. / you too.. اغلقت الباب و عادت ادراجه و قلبها ينبئها بما هو قادم و مع ذلك حاولت تتجاهله قدر الامكان و تنشغل مع آنجل في تحضير الفطور.. اما عبدالعزيز فلا زال تحت تأثير المشهد الساحر الفريد من نوعه و لم يشهد مثله في حياته.. على الاقل ما مرت عليه بنت بقصة الشعر المتمرده هذي.. اثارت فضوله لحد الجنون.. لحد انه طلع من طوره و قالب شخصيته المعتاد امام شقيقته و الا هو من متى فضولي.. ؟؟ من متى يسأل عن فلانه و علانه.. يا كثـــر ما مر عليه في الرياض و لندن من مزايين لكن لا لا.. هو حتى ما شاف وجهه بعد.. زولها كان كافي و شعرها الي كشف عن تفاصيل عنقها النحيل الفارع كافـــي و زياده عليه.. قرأت مره اننا ننجذب للشخص الي ياكل القطع الي نستخرجها من قطع البيتزا خاصتنا، ننجذب لاختلافه و للمسافات الطويله بيننا و نزداد حماس لها و لخوض الرحله و كل ما طالت كل ما كانت اعمق.. عبدالعزيز دايم كان متعود على نمط معين في كافة تفاصيل حياته العلمية و العملية و الشخصيـة ايضا.. كانت هي و كان منظرها نمط شاذ جداً و غريب لعيونه و لفكره و لتوقعاته حتى.. آخر شي كان يتوقعه وجود انثى آخر في الشقه عدى المالكه شقيقته بعد ما مرت 5 سنوات و العد جاري بلا اي صداقه او علاقه تذكر.. مضاوي صعبـه مثله و دقيقه و حذره لذلك كانت علاقاتها الاجتماعيه محدوده بل تكاد تكون معدومه.. فمن اين جاءت تلك.. و كيـف.. كانت هذي افكاره ولا اعمق منها فهل يعقل ان يهتم لأمر شخص ما من خلال استراق النظر اليه - و لو كان بمحظ الصدفه طبعا - لثوان معدوده.. ؟؟ دراما مضاوي كالعاده.. درامـــا.. و مع ذلك.. فلما الكذب.. ؟؟ منظر شعرها لا زال مستحوذ على تفكيره و يكاد يدفع به للجنون.. رغبه غريبـه و عارمه لمشاهدته مره آخرى بل مراااات.. . . . . رفعت راسها من صحنها بإنزعاج.. / الواحـد ما يقدر يفطر برواق يعنـي.. ؟؟ جلـــوي.. جلـــوي والله ان سويت نفسك ما تسمع اجي امعط اذونك ترى مانيب رايقه لك مع هالصباح.. شيخه في الكرسي المقابل.. / يالله صباح خير وش فيك معفسه وجهك و تصارخين.. البندري.. / راسي مصدع بمـــوت منه و هذا من اليوم يهابد في البيت وراهم موب برى.. شيخه.. / جلــوي.. جاء جلوي بعد نداء عمته الاول و كاد ان يقع ضحيه علبه المحارم الورقيه التي صوبتها البندري باتجاهه.. / يعني يوم نادتك شيخه جيت و انا لي ساعتين اصارخ ما تسمع صح.. ؟؟ جلوي.. / لاني عارف وش بتقولين.. تخفي شيخه ابتسامتها احتراما لاعصاب البندري.. / جلوي ابوي وش عندكم بالبيت.. ؟؟ مو دايم اقول لك ما ينلعب هنا صح والا لا.. ؟؟ و بعدين شوف ازعجتوا اختك و عمتك هيفاء نايمه للحين لو صحت بتزعل عليك.. تبي عمه هيفاء تزعل.. ؟؟ جلوي.. / اول شي انا كبير اسلوب الاطفال هذا ما احبه و ثاني شي كنا نلعب عند المجالس و طلع علينا تركي ولد عمي و هزأنا مع ان قسم بربي ما كنا ندري انه هناك.. إلتفتت للبندري باستغراب.. / وش عنده هناك من الصباح.. فيتطفل جلوي مشكوراً.. / كان راقـد هناك.. شيخه.. / وش دراك.. ؟؟ جلوي.. / واضح ما يبي لها طالع علينا بسروال و فانيلا و شوشته طايره اصلا عشان كذا هاوشنا يقول ازعجتوني ما خليتوني انوم زين يالله كل واحد على بيته و ما ادري وش و جينا هنا عاد تكفين عمه شيخه داخلين بطوله في اللعبه و بتبدأ بعد شوي لا تطردينا تكفين اول ما تخلص بنطلع غرفتي فوق اوعدك وعد رجال جعلها بذمتي.. البندري.. / اول شي اسمها قسم بالله او وربي اما قسم بربي هذي انا ما ادري من وين متعلمها و بتفاهم معك عليها و ثاني شي دايم اعلمك عند حركات نقالين العلوم هذي و ما تفهم لكن هين والله ما اخليك يا جليوي.. شيخه.. / روح و انا عمتك كمل لعبك و اقصروا اصواتكم اهم شي ما ابي ازعاج حبيبي.. ثم التفتت للبندري.. / هههههههه يا حلـــوه بتستانس عليه اصايل يجيب لك العلم من إلى لا ومركز على التفاصيل يمه منه على رقم بنت ههههههه.. البندري بضيق.. / كله من ابوي.. لاهي ولا يدري عنه ولا ياخذه عزايم الرجال ولا جمعات عمامي و دايم يطرده العب برى كانه بيجلس ورع طول عمره موب كفايه لاهي عني انا بعد عالاقل يناظر المسكين هذا الي ما حوله احد غير بنات و عيال عمه.. شيخه.. / البندري وش فيك اخذتي الموضوع لبعيد افطري و اذكري الله ولد مثله مثل غيره اكيد هذي اهتماماته لعب و سوالف وش تبينه يسوي لو خذاه مساعد معه يعني يقهوي الريجيل والا يضيفهم.. ؟؟ البندري بحده.. / لا حبيبتي مو مثله مثل غيره عمرك شفتي احد يبربر مثل جلوي من بين الاطفال كلهم ما غير اخوي المطفوق والا شوفي سلطان ولد تركي الله يرحمه ثقل و ركاده و عقل هذا وابوه ميت اجل الحي وش عذره.. ؟؟ اسألك بالله تقارنين بين جلوي و فيصل والا تستحين حتى من المقارنه.. ؟؟ واحد درجاته من سيئ لاسوء و الثاني الاول على التوالي و واحد انجليزيته عانينا لين طورناها و الثاني يدرس ايطالي و بلبل بالفرنسي.. لا تجلسين كل مره تدفين الموضوع و تقفلينه عشانه اخوك تراه ابوي قبلك و مقصر في حقنا و مستمر في تقصيره لانك كل مره انتي و هيفاء تتصددون عن هالنقاش و لا قابلتوه ما اشوف غير بوسة على كتفه و يا مرحبا بالغالي.. غالي عليكم انتم مب علي انا.. بطلع غرفتي ارتـاح و ان سمعت له صوت قولي له بجي اكسر راسه انا خلقه مو طايقه نفسي.. اكملت شيخه فطورها و قد اعتادت على هذا النقاش الذي في كل مره ينبثق من اللاشي.. فجأة يكون حاضر على طاولة النقاش.. و بعد ثوان من مغادرتها كانت هيفاء في محلها.. / وش فيها البندري طالعه معصبه.. ؟؟ شيخه.. / صح النووم.. ابد كالعاده.. ابـوها.. هيفاء.. / وش جاب الطاري.. شيخه.. / وانا ادري عنها فجأة كذا تفصل اعصابها و المسكين جلوي لو مانيب جالسه كان اكلته اكــل مو معقوله كل مره تبي تفرغ ضغوطها فيه هيفاء شوفيها كلميها و اجلسي معها حللي دراستك فيها عالاقل.. هيفاء.. / لا ماني جالسه معها بجلس مع مساعد و اصارحه بوضعهم الاثنين ما عاد راح اسكت ولا حتى عن وضعي لان صدق زهقت.. شيخه.. / لاحـول ولا قوة الا بالله وش فيكم اليوم انتم مو صاحيات والا هذي آثار النوم متأخر.. وش عندك انتي بعد ان شاء الله.. ؟؟ كانت مشغوله في قضم لقمتها لتقول بعدها.. / بشتغل بشهادتي.. شيخه.. / انا اقول افطري و الحقي بنت اخوك و عقليها و اعقلي معها لان هذا كله حكي فاضي لا يودي ولا يجيب و اظن ما قصر معها ولا مع اخوها ما فيه شي تطلبه و ما يحضر عندها ما غير سمي و ابشري طال عمرك وش تبي اكثر ما عادها طفله و ابي حضن بابا كل ما عصبت فكوني من المشاكل و صلوا لكم ركعتين احسن.. رمت هيفاء الملعقه بحده.. / انا اتكلم عن موضوعي الحين خليك من البندري.. شيخه.. / و موضوعك منتهي قبل تبدين فيه و انتي عارفه زين هالكلام موب يوم مابقى شي على تخرجك رجعت حليمه لعادتها القديمه عناد في عناد و مشاكل مع ابوي ترى ما عاد به حيل و حتى لو اقنعتي مساعد ابوي آخر شخص ممكن يسمع منه مساعد ما يحتاج نفصل في هالنقطه اكثر والي يسلمك هيفاء صدق صدق لا تخربون مزاجي من الصباح الواحد يقوم رايق و مستبشر خير و تحوسون يومه بلا اي داعي.. هيفاء.. / يعني مستقبلي ما له اي داعي.. ؟؟ شيخه.. / فكيني من حركات البندري الي تدور الزعل دواره تدرين ان مو هذا قصدي و مستقبلك ما هوب واقف على تخصصك الي اصلا خريجينه اكثر من المطلوب في سوق العمل يعني بتحتاجين وااااسطه تزبطك و الي هي اخوانك هذا لو لو سمح لك ابوي فلذلك وفري على نفسك الحوسه ذي كلها و توظفي عندهم و ديري رزقك و ورثك بنفسك و الا اخذي محلك في الجمعيه و حطي رجل على رجل و اطلعي من جو ابي ابني نفسي من الصفر كأنك عاد عرفتي الصفر بحياتك ما عدى الاصفار الي عاليمين طبعا والا وش رايك.. ؟؟ نهضت هيفاء و بيدها قارورة الماء.. / بكلمـه.. شيخه.. / والله عاد بكيفك انا الي عندي قلته و مب مره بعد ألف مره بس ما تسمعين.. بتروحين لها.. ؟؟ اشارت لها هيفاء بنعم قبل ان تغادر صاله الطعام باتجاه المصعد.. . . . . صاحت مناديه.. / لونـــا.. لونـا.. فجاءتها لونا على عجل.. / ايوا مس سحاب.. سحاب.. / انا بطلع للدوام لا تنتظروني للغداء و كل شوي شيكي على مدام ساره اوكيه.. ؟؟ كل شوي لونا لا تخلينها لوحدها.. واذا فيه شي اتصلي علي دايركت.. لونا.. / يس مس.. ثم استوقفتها من جديد.. / مس.. سحاب.. / ايوه لونـا.. ناولتها كرت ذبلان بفعل سائل اختلط به.. / سوري مس امس يجي لك انتي A bouquet بس لما مادام ساره fell down انكسر و هذا كارد يجي معاه مره سوري مس.. اخذت البطاقة سحاب و غادرت على عجل ولم تهتم كثيرا بالحادثة ولا بالورد و حطامه بكل الاحوال قد وصل و سترد بالشكر و الامتنان للمرسل و الاهم من هذا كله سلامة والدتها من حطام الزجاج.. و بينما هي في السيارة فغالبا لديها وقت كاف للاطلاع على هوية المرسل و تفاصيل المكتوب في البطاقة التي جاءت غير متوقعـه الحقيقه.. فاتصلت على الفور بديما و بمجرد ما فتح الخط.. / امس وصلني بوكيـه توقعي من ميــن.. ؟؟ بسرعه بدون تفكيــــر.. ديما.. / سحاب انا حتى ما ادري حنا في اي يوم توني صاحيه ايش صاير و بوكيه مين و الناس نايمييين.. سحاب باحباط.. / يا سخفك كيف بردتي حماسي.. بعدين نايمه للحين.. ؟؟ شكلي استعجلت في موضوع الشراكه.. ديما.. / يالله بس تحبين يدك وجه وقفى اني شريكتك و بعدين لا موب نايمه بس توني صاحيه بافطر و ألحقك على طول شكلك بالطريق اسمع ازعاج السياره.. سحاب.. / ايه بالطريق بس وش رايك نفطر سوى موب احسن.. ؟؟ لاني حتى انا ما افطرت.. ديما بتفكير.. / والله.. ؟؟ ويـن ودك طيب.. سحاب.. / لا لا بالمكتب ما لي خاطر افطر برى اليوم وراي شغل لين راسي فلا تتأخريـن.. ديما.. / طيب جايتك ابو نص ساعه و اكون في المكتب ان شاء الله.. سحاب.. / يالله انتظرك باااااي.. فصاحت.. / لحظـــه.. لحظه لحظه.. ما علمتيني البوكيه من مين.. ؟؟ سحاب بحماس غريب.. / لا جيتي تعرفيـــن.. ديما بلا صبر.. / سحاب بلا ثقاله دم من مـ….. فتم انهاء الاتصال.. عمداً.. هيّن يالسخيفه والله ما اخليك.. اعلمك وش لون تقفلين في وجهي بس طبعا بعد ما اعرف راعي البوكيه ذا الي مسلطك علي من صباح الله.. صدق ميـن.. ؟؟ ألف بوكيه يمر و يعدي ما تذكره ولا تجيب خبره وش السالفه لا يكون فيه احد بحياتها ما ادري عنـه.. ؟؟ لا مستحيل.. مستحيل تخبي عني سحاب تموت اذا خبت عني شي سر قرقور على قولتهم مستحيل.. والله طويله نص ساعه عشان اعرف يا ليتني داومت بدري صدق.. هل يعقل يا ديما انضباطك في العمل حافزه الوحيد معرفة مستجدات سحاب.. ؟؟ فعلا و نعم الشريـك ههههههه.. . . . . باريـــس.. 9 AM كان مشغول من بداية الصباح بعد ما فحص بريده و هاتفه و لقى اتصال فائت من عبدالرحمن و بعد حسبه بسيطه لفارق التوقيت بين باريس و الرياض كان ( 11 م ( فلا بد من وجود خطب ما.. عاود الاتصال مره و مرتين ولا رد فقرر الانخراط بجدول اعمال اليوم إلى حين ان يرده اتصال من عبدالرحمن في اي وقت.. و ها هو ذا يضيئ اسمه شاشه هاتفه من بين الاوراق.. ألقى بكل شيء في يده و أجابه على الفور.. / هلا و الله عبدالرحمن.. فيكم شي.. ؟؟ كنت نايم و الجوال صامت عسى ما به خلاف.. ؟؟ عبدالرحمن.. / لا ابد كل الامور على ما تحب.. بس ابي اكلمك بموضوع اذا عندك وقت.. سعود بحده.. / خلني من موضوعك الحين وش عندك فالرياض.. ؟؟ و بدون ما يكون عندي خبر يعني لولا اتصالك و مفتاح السعودية ما كان لك نيه تبلغني.. عبدالرحمن بلا اطاله.. / رايح انجز امور ابو تركي مانيب رايح سياحه يا سعود.. مرسلني لاوراق في مكتبه و لقيتك مغير المفتاح.. سعود.. / ايـه غيرته.. و اوراق ابوي كلها عندي وش الي تبيه منها و ابشر.. انصدم عبدالرحمن و عبر عن صدمته.. / سعود وش الي ابشر.. ؟؟ كاني غريب والا كني ماني بالرجال الي تخبره و مرافق ابوك طول عمره من متى و انت وسيط بيني و بينه.. ؟؟ بحـــق هذي يا سعود.. سعود.. / لا تكبر الامور و لا تاخذ شي بشكل شخصي و انت عارف اني ما اسمع بك و الا ما تركتك حوله و اميـنٍ عليه و مشيت اشوف شغلي و هو بهالحال اما بالنسبه للاوراق حصل خلاف مع المحامي و صرفناه و اخذتها عندي انقل الوكالات و هذي امور تاخذ وقت ويبي لها دقه و حرص و انت خابر ما يحتاج نحكي فيها و يطول الحكي.. المهم الحين ابوي وش وصاك به قل لي.. ؟؟ عبدالرحمن لم يقتنع.. بل سعود ذاته يعلم جيدا انها لم تمر مرور الكرام.. إلا انه قال.. / ما ادري قال لي فيه ملف اخضر بالدرج الثاني على اليمين عليه ختم المحامي و ختم مكتب تركـي.. انتفض سعود.. و اهتزت اركـانه.. و اشتدت اعصابه و ضاقت انفاسه.. و مع ذلك لم يجد ما يقال سوى.. / ايــه.. طيب ما يخالف انت ارجع لندن الحين و الملف عندي بجيبه بنفسي بعد الحفل.. عبدالرحمن بإصرار.. / ابو تركي حرص علي ما ارجع بدونـه يا سعود.. مانيب راجع لندن انا جايـك.. سعود بحده.. / الكلمه وحده لا تردها علي يا عبدالرحمن قلت انا الي بجيبه يعني انا الي بجيبه و ما انت بجاي احرص على سلطان مني و لا صارت الامور عائليه حاول انك تلزم حدودك فيها لا تحرج نفسك ولا تحرجني معك.. عوّد لاهلك و نلتقي على موعدنا.. لا اشوفك قبل منتصف يناير يا عبدالرحمن.. اغلق الهاتف و انهى النقاش بفعلته و لم يترك لعبدالرحمن خيارا اخر.. هذي سابقه من سعود.. سابقـه غريبه.. اما سعود فأجرى مكالمه اخرى فور ان انهى الاتصال بينه و بين عبدالرحمن و كان على الخط.. حمــود.. / هلا والله و مرحبا بشيوخ باريس.. حي والله هالصوت.. تجاهله سعود.. / معزبـك موجود.. ؟؟ حمود.. / موجود طال عمرك لكنه في اجتماع حاليا ما اعتقد بينتهي قبل 10 و نص و بعدها احسب له نص ساعه زياده لان عبدالعزيز في مكتبه ينتظره.. وش تحــب.. ودك تترك رساله والا ابلغه باتصالك.. ؟؟ سعود.. / لا ذي ولا ذي.. احجز له اقرب طياره لباريس يا حمود و لين انهى اجتماعه قله سعود ينتظرك.. حمود.. / على خشمي.. بس ان نشدني الرجال وش عنده وش اقول.. ؟؟ و انت خابر ابوفيصل ما يحتاج اعلمك فيه والله ان يقلب الدنيا على راسي ان تصرفت فيها من وراه.. سعود بحده.. / قله يقول سعود.. لك عندي امانه من تركي و جاء الوقت الي ابري ذمتي منها.. . . . . الريـــاض.. صحى من النوم بكامل طاقته و نشاطه و سعادته لليـوم.. كان مستعد للرحلة و لازعاج بسام و ثرثرته طول الطريـق و مستعد يتمرن بنفسه بدون توجيه من احد في اجازتــه و فترة راحته.. اليوم مستعد لكـــل شي.. معقوله.. ؟؟ كل هذا تأثير الفلم او الحلم الي انتجه عقله ليله امس.. ؟؟ معقوله كان يائس و بائس لهالدرجه.. ؟؟ لكن الحق يقال ما فكر ولا مرت في باله من ذيك الليله ولا لحظه لكن عقله الباطن كان اوعى منه.. كان ادرى بمصلحته.. و لعل حلم امس كانت اولى محاولاته لاستمالته ناحيتها و إنعاش قلبه من جديـــد.. لكن كيف.. ؟؟ هذا جنــوووون.. نفض راسه يبعد الافكار السابقه منه و نزل الدرج بخطوات متباعده بحيث ينزل درجتين- درجتين على عكس اي انسان بالغ عاقل متحضـر.. لقى بسام في المطبخ و ما كانت المره الاولى.. / يا اخي احيان تخليني اشك انه بيتي من كثر ما انك قاط وجهك.. بسام صارحني عمرك سمعت بشي اسمه خصوصيه او Privacy.. ؟؟ بسام مشغول في تحضير العجه.. / لا و صباح النور.. هاه شنطتك جاهزه.. ؟؟ ساري.. / لا بجهزها المغرب تو الوقت بدري.. متى جيت.. ؟؟ بسام.. / توني واصل قلت اسوي فطور و اصحيك.. ثم اكمل بامتعاض.. / و زعلان على خصوصيتك يا اخي استح على وجهك والله ما تلقى احد معطيك وجه كثري والا وش دخلني فيك تفطر ما تفطر كذا كذا راتبي بيوصلني نهاية الشهر غصبن عنك.. والا ترى اقدر اريح راسي و افطر فبيتنا ثم اجيك.. بسام.. / طيب لا تكثرها لو ما البيت بيتك ما عطيتك مفتاحه فلا تسويها سالفه يا دلوع و هات الفطور.. وش مسوي.. بيض.. ؟؟ فيهز بسام راسه بايجاب.. ساري.. / طيب تراك فقعت بطني به و تجي تمن علي انا اطبخ لك و اسوي لك.. جبت لي تلبك في المعده يا بسام قسم بالله ما امزح.. بسام.. / والله عاد ما احد طقك على يدك و قال لك صير رياضي و هيلثي و اكتم معدتك.. وش تبي تفطر اكبس لك حاشي يعني والا وش.. ساري.. / بسام عطني صحني خلني اكل راضي بالبيض خلاص بس فكني من محاضراتك.. ناوله إياه و بدأ في تناوله باستمتاع رغم الملل الذي انتابه من تكرار الوجبه الوحيده او من قلائل الوجبات التي يتقنها بسام.. برضى و استسلام.. حتى قال الآخر ليكسر الصمت من جديد.. / ساري.. ساري.. / سـم.. بسام بجديه.. / بلاش التصريحات الي ما لها داعي.. رايحين لعمل خيري و اطفال ايتام ما ابيك تطلع من الجو و تتنرفز و تقابلهم بنفس شينه.. لا ترد على اي سؤال رياضي انا طالبك.. ساري.. / حلوه ذي لا ترد على اي سؤال رياضي اجل انا رايح بأي صفه يا بسام.. ؟؟ الا برد و التصريحات اوعدك اني احاول امسك لساني بس لاحظ اني وعدتك احاول.. احــاول.. بسام.. / تحاول ايش يا حبيبي اجل انت بينك و بين الاصيل شي.. ؟؟ ساري لا ترفع ضغطي خلنا حبايب و رايقين شفني اعلمك من الحين.. سكت واجد عن تصريحاتك العشوائيه كل ما طقت براسك قطيت كلمه للاعلامي الفلاني والاعلامي العلاني و ابلشتني مع مجلس الإدارة غير المخالفات الي تنسحب من رصيدك كل شوي ترى على هالوضع بتفلس بتجلس على الحديده و انا مستحيل اسمح لك تضيع عمرك عشان الاصيل والا عشان غيره.. ساري ببرود.. / مدير اعمالي و على عيني وراسي بس القرار الاول و الاخير لــي انا يا بسام و الاصيل الي تقول ما بيني و بينه شي اذكرك اذا ناسي عرضه الاخير في الصيف.. يبيني و انا ابيه و انتقالي لصفوفه مسأله وقـــــت.. فالافضل تريح راسك من هالموضوع من الآن و تريحني معك كافي علي ضغوط المجلس مانيب ناقصك انت بعد.. بسام.. / تستهبل صح.. ؟؟ العرض الي بنفس قيمه تجديدك مع الهيصم.. ؟؟ لو يبيك عطاك صفقه من الاخر.. صفقه ما يقوى عليها الهيصم ولا اعضاء الشرف الي وراه كلهم.. ساري.. / ههههههههه و هذا الي حصل طيب لولا ابن الكلب الي سرّب قيمه الصفقه و مررها لغسان والا كان بدري عليه يقدم عرض بهالمبلغ للاعب محلي.. بس جاه دعم محترم من اعضاء الشرف وفاز بها و هالمره ان قالها الله انها الاخيره.. هذا آخر مشواري مع الهيصم لو اعتزل الكورة ولا ارجع لصفوفه يا بسام.. ف ريحنا و خلنا نفطر عشان نمشي و نلحق اشغالنا.. بسام.. / وش اشغالك الي ما ادري عنها هذي.. ؟؟ ساري بابتسامه مرح.. / بنمر تويز آر اص.. بسام.. / تكفى لاتقولي انها شركه الالعاب ذيك الي كانت تجي بالدعايات.. ساري.. / الا و الله ليه وش فيها.. ؟؟ بسام.. / تسلم عليك.. ساري الشركه اتوقع فلست و انت للحين تقول تويز آر اص.. قديم انت.. ساري.. / لا يا شيخ.. ؟؟ بزارين وش تبيني اخذ لهم معي يعني.. صكة بلوت ؟؟ بسام.. / لا خل الصكة لاهلها يابو صكة.. خذ تيشيرتات من النادي و تك معهم و وقع لين يعضّل ابهامك و كثر الله خيرك ما يبي لها سالفه.. و تويز آر اص هذي حاول تنساها.. ساري.. / اجل بعد الظهر مر النادي بالله و شوف اذا تقدر توفرها اليوم والا لا.. هم كم عددهم.. ؟؟ بسام.. / ما ادري و الله بتواصل مع الجمعية و اخذ تعدادهم لا تشيل همها.. ساري بامتنان.. / و يلوموني فيك يالشيخ.. بسام.. / منهم.. ؟؟ ساري.. / اجاملك يا رجال بس افطر.. . . . . مرت فترة الظهر بسلام.. و هدأت الانفس مع مرورها.. و راقت الاعصاب.. و مر العصر معاها.. الساعة 7 و النصف مساء.. كانت سيارة طلال في ساحة منزل تركي بن مساعد الكبير.. و في مجلس تركي يدور الحوار.. وقف و اشار بسبابته ناحية الباب.. و بصوت حاد و نبرة عاليه.. / الحشيمه لابوك و لعمي سلطان و للارادة الملكيه المرتزّه على كتوفك والا انت ما انت بكفو للحشيمه.. رجال طول بعرض شنبك مالي وجهك جايني تسحّب رجليك تشكى من قايدك ؟؟ مصيبه ان كان حتى خدمتك العسكريه ما مرجلتك مع الريجيل.. مصيـــبــه.. اطـلع بــــرى.. يحاول طلال الدفاع عن رجولته المجروحـه.. إلا ان تركي يعترض دفاعه و تزداد نبرة صوته علو.. / بـــــرى.. بـرى لاعســـكرك من جد و جديـد.. بـرى.. ليرمي طلال آخر اوراقه.. / بطلع.. مير و الله و البيت الي بناه الله لانثر علوم السرابيت الي انت ساترها عن قولة اخوي و ابن عمي و تقرير السموم الي بملفي خله محله ماهوب معذربني وانا رجال مصلي وصوام بس ورني مراجلك مع عيال عمك السكارى و على راسهم الشيخ توّاق عسى عاد عمك يوم عطاه بنته نشد عنه والا عشانه بناخيه مافوق راسه راس.. ؟؟ عمـك يدري عن نتيجة اختبار السموم الي بملفه والا ما يدري.. ؟؟ يتقرب تركي منه و يسأل بوضوح.. / لا ما يـدري.. تبي شـــي.. ؟؟ طلال.. / افا.. يعني تسوق المراجل على راسي من اليوم و انت عمك الي هو عمك ماقويت تنصفه في بنته من الحبّاب الي عندك و تقول لي تمرجل.. ؟؟ اجل انت اقول لك تـ########.. ( حبّاب : لفظ عامي دارج يطلق على من يتعاطى الحبوب المخدرة بكافة انواعها.. ) احكم تركي قبضته على عنقه بغمضة عين بمجرد ما انهى جملته الاخيرة بعنف كاد ان يودي بحياته فاخذه بسهوله للخارج ثم ألقى به و ختم زيارته قائلاً.. / فـــــــــــارق.. فارق لا علي بالطلاق ان تمسي في قبرك و امسي ودمك فرقبتي يا مسلم.. فارق و فكني شرك.. فــــارق.. اغلق تركي الباب في وجهه و اتصل على البوابه و وجه امر باخراج طلال و منعه من دخول البيت مجددا امر قطعـي و بعدها على الفور جاءت اوامره لتوّاق الذي حاول ان يستفسر.. / ابشـر دقايق و اكون عندك بس علامك وراه صوتك.. ؟؟ صاير شي.. ؟؟ تركي بغضب.. / لا منك جيت نبي نتفاهم لا تستعجل على رزقك بس اعجل.. اعجل تراني انتظرك.. كان توّاق في انتظار اتصاله.. كان واثق ان تركي بيرفض طلب طلال و بناء على الرفض بيفضح امره نكاية فيه و هذا ما حصل.. الله يكفيني شرك يا تركي و ابن الـ##### هذا والله ما اعديها له والا تراني رخمه من ظهر حرمـه.. الله يكفيني شرك.. . . . . منزل سلطان الكبيـر.. صالة الجلـوس.. فيصل.. / يعني فجأة كذا صحيتي من النوم ابي امشي.. ؟؟ الجوهرة.. / لا موب فجأة تراي اجاملكم على حساب نفسي والا نفسيتي تعبانه يا فيصل ما عاد اقدر اتحمل اكثر خلاااااص وصلت حدي ابي ابعد عن البيت شوي ابي اشوف ابوي و دام عبدالرحمن موجود و بيرجع له بروح معاه ما فيه شي يقلقك علي عبدالرحمن وموجود وش تبي اكثر فيصل ما عادني بنت الـ 10 اعوام تداريني ترى اختنقت و الله اختنقــــت.. فيصل.. / على خشمي… بس لا تكثرينها علي ترى والله ما يرضيني اسمع هالحكي منك انا قصرت عليك بشي بعد ابوي.. ؟؟ وش فيها نفسيتك يالجوهـرة.. فزت من محلها و قبلت راسه.. / لا والله رايتك بيضا يابو سلطان ما يجي منك قصور جعلني فدوتك.. بس اشتقت لابوي.. كلكم شفتوه الا انا من سافر و هذا آخر عهدي به.. كلمه تكفى قول له يحجز لي معه لا يروح قبل لا تبلغه و حنا ما ندري تراه جني يحضر فجأة و يختفي فجأة موب صاحي.. فيصل.. / هههههههههه خلاص قلت لك على خشمي بتروحين يعني بتروحين لو يرجع و ياخذك نرجعه لخاطرك.. خليك بدق عليه الحين قدامك.. عبدالرحمن.. / يا مرحبا.. فيصل../ المرحب باقي.. وينك.. ؟؟ عبدالرحمن.. / بالطريق للمقبره قلت اسلم على تركي قبل امشي.. فيصل بتأثر واضح.. / الله يبيض وجهك ويجزاك خير.. وافـــي يابو داحم.. وافـــي.. اجل لا خلصت كلمني ابيك.. عبدالرحمن.. / لا باقي بالطريق اقولك آمرني يابوي.. فيصل.. / ما يامر عليك ظالم.. اسمع وش بقولك عبدالرحمن متى بتمشي.. ؟؟ عبدالرحمن بتوجس.. / ما ادري للحين ما دورت حجز بس على اقرب رحله ان شاء الله ليه فيه شي.. ؟؟ فيصل.. / الجوهرة تبي تنزل معك.. تبي تشوف ابوي حبسناها عنه بما فيه الكفايه هالمره بتروح و بتعين خير ان شاء الله و ابوي هين ما بيطمع بشوفتها يا رجال خل ينشرح صدره شوي قد مل من وجهك و وجه سعود.. فاحسب حسابها.. تمام يا حب.. ؟؟ عبدالرحمن بنبرة اقرب للهمس.. / تمام.. فيصل.. / و سلم لي على الشيـخ و قل له بجيه قريب.. عبدالرحمن.. / يوصل يابو سلطان يوصل.. يالله اجل اذا ما تبي شي ثاني خلني اقفل لان هذاني عند اللفه.. فيصل.. / سلامتك يابوي.. انهى الاتصال من جهة و ترجل من جهة من السياره ولا وقت لديه ولا مشاعر اليوم لاستنزافها في سبيل الموقف الي تركه فيه فيصل.. الجوهرة و رعايتها و مرافقتها بعد المواجهة الاخيره.. صعـب لكن مو اصعب من لقاء تركي بعد كل هالفترة.. تقدم من البوابة و مرر معلومات القبر و تاريخ الوفاة و بعض الاجراءات البسيطه قبل ان يتمكن من الوقوف على قبره.. فك شماغه و عدله على وجهه بحيث اصبح مثل اللثام.. يغطي به ضعفه و يداري به دموعه رغم خلو المقبره الا منه وحده.. ثم سلم بعد محاولات عدة في ضبط نبرة صوته.. / السلام عليكم و رحمة الله.. انا عبدالرحمن يا تركي.. عساك بخير و في خير و لخير يا طيــب.. وحشتني يابوي.. وحشتني لين ضاقت علي من بعدك.. رحت و تركتني وراك اتخبط يمين و يسار.. اقسم بالله اتخبط يا تركي اتخبـــط ولا ادري وش اسوي و اذا الي اسويه صح والا اسويه بــر فيك لاني استحي منك و انت حي و استحي منك ميت.. استحي اعصي امرك و انت الكريم ابن الكرام الي ربيت و عشت في خيره و خير ابوه من قبله.. و ابتعب ما لحقت طيبك لين اموت لكن العرس بيتـم يالشيخ.. بتزوجها خلاص و بكفل لها حياة كريمه و اعوضها.. بس انا.. انا من يعوضـــني.. ؟؟ اذكر يوم قلت لي بيجيك العوض بس اصبر و رحت قبل لا تعوضني و للحين صابــــر.. للحين احس انك ما تركتني خالي وفاض ما تسويها و تظلمني يا تركي.. ما تسويها يا حبيبي انت.. و لولاي استحي منك و الا كان رجعت و طلبت الجوهـرة و كافئت نفسي.. اسألك بالله ما استاهلها.. ؟؟ ادري اني وعدتك و ادري انك وعدتني.. ما نسيت شي من ذيك الليله ولا بنسى لين يصلون علي المسلمين جنبك بس عاد اجبر بخاطرٍ تعب ما لقى جبره يا تركي.. اجبر بخاطري وقل تستاهلها و ماهيب بتلقى راسٍ اطيـب من راسك.. يتنهد و يصمت ثوان يجمع فيها شتات افكاره و مشاعره.. و يكمل.. / احس ان فيه حلقه مفقوده ماني قادر الاقيها فيه شي ناقص.. كل الي صار فيه شي ناقص شي ضايع بالنص كيف حياتنا انقلبت فوق تحت عشان حبة و سهره شباب.. ؟؟ فيه شي ناقص يا تركي لكن عجزت اكمله.. و سعود كل ماله يبعدني اكثر.. اخرتها اليوم الصباح اطلبه اوراق طالبني اياها ابوك و يصرفني و انا ادري انه يصرفني و هو يدري.. بس ما عاد اقدر احرج نفسي اكثر.. ولا عاد ابي اعرف وش الي صار بالضبط ابي اعرس و ابعـــــد.. ابدأ حياة جديدة و شغل جديد.. كيف ما ادري عاد لا تسألني و تحرجني هههههههه بس ببدأ ان شاء الله و ربك بيعين.. و ترى ناصر ما قصر معي اذا انك شايل همي فارتاح ولو اني رجال قايم بنفسي ما احتاج احد بس عاد قصدي على موضوع الوظيفه تراني ماخذ حقي و زيادة يا رب لك الحمد و الله يبيض وجهه بس اقول لك شي.. ؟؟ انشهد ان متعب عاقبني في حياتي يا تركي ولا تضحك تراك ما تدري عن الي يدور بيني وبينه بشكل شبه يومي.. بس ارحمه احيان اذا تبي الحقيقة.. هو مدرك ان الجوهرة لو ما بقى على الارض رجال غيره ما رضت فيه و لقاني الدلو الي يفرغ فيه و جيت على جوه ماني قليل شر و ابيها مثل ما يبيها و خذلك مصارعه حره على اتفه الاسباب.. بس عاد الله يعظم اجر عبدالعزيز هههههههههه الرجال ما اعرس للحين متوهق فينا يدارينا تقول وراعيـن.. ايه و ابوك طيب ابشرك و لا تسألني وش الي جاه ما احد يدري غير سعود و سبحان الله يا سعود ما عرف الغموض الا يوم عينوه قنصل و عاش الدور على روسنا بس المره الجايه اجيك انا وسلطان باذن واحد احد و تاخذ العلم من راسه لراسك يابوي.. اما الحين استأذنك و عسى ربي يجمعني بك في جناته و نتواجه و تعوضني في الجوهرة ههههههه لا تظن انه بيطيب خاطري منها دامني حي.. اشهد انك اغلى من فقدته و اشهد ان ما تعوضني فيك الدنيا باهلها لكن نبي نلتقي يا حبيبي.. نبي نلتقي على خير.. استودعتك الله يا تركي.. . . . . . ورشـة هيفاء.. كانت حصه تراقبها و هي لاهيه مع لوحتها، ترسم بشكل عشوائي و سريع مما جعلها و كأنها في صراع معها اكثر من انسجام.. فقالت.. / وش صاير.. ؟؟ التفتت لها هيفاء.. / بـ ايش بالضبط.. ؟؟ حصه.. / هيفاء لا تلفين وتدورين اعرفك اكثر من شيخه اختك لك نص ساعه ساكته من جيتك و انتي لاهيه بذا اللوحه تراك عاقبتيها يا بنت الحلال وش مسويه لك الضعيفه اتركيها عنك.. هيفاء.. / لوحـه ما تحس.. حصه.. / و انتي وش الي تحسين به و مخليك تفرغين بها كذا.. ؟؟ تعالي اجلسي و خلينا نحكي زي الاوادم بدال ما كل وحده بجهه كذا.. تركت هيفاء الفرشاة و البالته ثم نزعت المأزر و اتجهت ناحيتها باستسلام لرغبتها و حاجتها للكلام فعلاً.. تنهيدة طويله سبقت قولها.. / الصراحه ما فيني شي كايد بس تواجهت مع مساعد اليوم و رجعت افتح موضوع الوظيفه الي تخبرينه.. حصه بذهول.. / لا اله الا الله يا هيفاء للحينك على نفس الموال.. ؟؟ الى متى يا اختي.. عاد وش رد عليك.. ؟؟ هيفاء.. / و لبكره و لبعد سنه و سنتين بازعجهم لين يملون و يعطوني حريتي غصب هذا مستقبلي و انا حره فييييه يا حصه.. ثم اكملت باحباط.. / ما قال شي يقول تخرجي و نتفاهم يسكتني بس يبي ينهي الموضوع.. حصه.. / لا ما يسكتك مساعد لو ما فيه شي براسه ما كان عشمك كان انهى الموضوع في لحظتها و ما ترك لك خط رجعـه فعشان كذا روقينا و روقي و عيني من الله خير ما يصير الا الي ربي كاتبه وبعدين فرضا يعني ترك لك عمي حرية الاختيار وين تبين تتوظفين ودي اعرف على هالعناد كله اكيد طموحك مجلس الشيوخ الامريكي.. هيفاء.. / لا يخسي ماهوب حولي ولا حول طموحي.. اممم بصراحه ما فكرت عاد بس ودي افكر براحتي على الاقل ابي احس بشعور ان لي حق تحديد المصير فهمتي.. ؟؟ اني اختار وين اروح و لوين بوصل.. حصه.. / يعني كل هالزحمه الي مسويتها اخر شي طلعتي حتى مو عارفه وش تبين.. ؟؟ يا صبري عليك بس.. ضحكت هيفاء و من قلب.. / هههههههههه طيب احبك.. الحمد لله انك جيتي والله كان مزاجي زي الزفت مو طايقه حتى نفسي.. بعدين صدق ما وراك رحله.. ؟؟ حصه بابتسامه واسعه.. / وراي ونص.. و عشان كذا جيتك.. ثم استدركت.. / لا لا اول شي جيت عشانه اكيد عشان اتطمن عليك يا حبي ثــــم عاد جيت عشان اطلب منك خدمه صغيره لا تذكر.. هيفاء.. / مو مشكله كنت حاسه انك ما جيتي الا و وراك شي لكن الشرهه علي الي فتحت لك صدري.. حصه.. / طيب بلا دراما موب وقته اسمعيني ابي اسوي للاطفال فعاليه من عندي انا فهمتي يعني مالها علاقه بالجمعية لا ابيها مبادره شخصيه بس ما عندي افكار.. موب مزعجتنا بتخصصك لك 4 سنوات يالله هذا وقتك كشري عن انيابك و ساعديني.. هيفاء.. / حصه تراني اخصائيه نفسيه وش دخلني بإدارة الفعاليات.. ؟؟ حصه.. / ايتام و اطفال وش لون ممكن احفز مواهبهم و احتوي نشاطهم او بمعنى اصح اسخّره لخدمه الجمعيه حتى لو بشكل رمزي فهمتي علي هيوف.. ؟؟ هيفاء بعد تفكير وبحث و بعد ما دارت عيونها الورشه بكامل تفاصيلها.. / رســـم.. خليهم يرسمون.. و كرموا هالرسومات بتعليقها مثلا على حائط بارز او انشريها على السوشال ميديا.. و بعدين لك كم شهر تخططين تو الحين يوم ضاق الوقت طرت على بالك الفكره.. ؟؟ حصه.. / لا يا اختي في فعاليات واجد بس اني بغيت ازيد و اضيف شي يملئ الوقت لان بنكون معهم 5 - 6 ساعات وش احط وش اخلي ما ابيهم يملون.. طيب من وين اجيب اللوح والالوان و الحوسه ذي كلها.. ؟؟ لا لا شوفي لي فكره ثانيه ما عندي وقت اطلع اتقضى الحين لازم امشي بعد ساعه.. هيفاء و لعل طاري الالوان و الرسم حفز رغبتها الخامله في مرافقه حصه.. / ما عليك هذي كلها امرها سهل اعرف معارض فنيه تبيع بالجمله و قريبه برسل سواقي يجيب الاغراض بس كم طفل عندك.. ؟؟ حصه.. / 36 طفل.. يمديك متاكده.. ؟؟ فزت واقفه.. / ايه برسل له قائمه بالي احتاجه الحين و نص ساعه و تكون عندك لا تشيلين همها.. حصه.. / طيب والله ما تدفعينها شوفيني حلفت يا هيفاء اول ما يوصل قولي له يجيب الفاتورة و انا احاسبه.. هيفاء.. / استحي على وجهك اجل انا و اياك بيننا فلوس و حسابات يا حصه.. المهم بطلع اتجهز و اجيك تبين اخلي ماري تسوي لك شي.. ؟؟ حصه و تو انتبهت لوقوفها.. / على وين ان شاء الله.. ؟؟ مب تقولين بترسلين السواق.. هيفاء.. / بخاويك والا ما تبيني.. ؟؟ حصه بحماس.. / صااااادقه.. ؟؟ قولي والله.. ؟؟ هيفاء.. / هههههههه والله العظيم اصلا بكل الاحوال كنت ادور الهجه من البيت اليوم.. محتاجه صدق اهـــج.. يالله ما بطول نص ساعه و انزل لك بنجلس يوم موب اكثر صح.. ؟؟ حصه لا توهقيني قولي الصدق.. حصه.. / والله العظيم موب اكثر و بعدين رايحين بسياره متى ما طقت براسك لو انا قررت اجلس خذي سواقي و ارجعي الرياض و انا ارجع طياره يعني سهالاااات بس اطلعي اجهزي قبل لا تهونين و تخرب.. غادرت الورشه و تركتها خاليه لحصه الي قررت تستغل الوقت الفارغ مع الاولاد برى لمصلحتها الشخصيـــه.. طلعت راسها من الشباك و نادت على اول واحد فيهم لمحته عينها.. / سلطــان.. تعالوا كلكــم ابيكم.. و جاؤها يتدافعون حماسه و طاقه و فضول.. هذي اول مره يقتربون فيها من ورشه هيفاء الي يعتبروها ارض الاحلام.. مليانه بكل الالوان و اللوح و المعدات الفنيه و ممنوعه.. و لعل حظرها عليهم هو الي زاد قيمتها في اعينهم الفضوليه.. حصه بابتسامه.. / وش تسوون.. ؟؟ جلوي.. / نلعـب كوره و تراك قطعتي هجمتي.. حصه.. / والله ما ادري وش تقول بس ما علينا انا مناديتكم اصلا عشان الكوره ابي فزعتكم.. ليبدي كل فرد منهم استعداده و رغبته بالفزعه و لو اضطروا الى القتال عليها فتدخلت حصه على الفور.. / وجــع اركد انت واياه خلاص ما ابي شي الحمد لله و الشكر ما مداني هرجت تلاقطتوا.. ثم صاحت بحده.. / جلوي و سعـود.. اتكلم عربي انا صح.. ؟؟ فابتعد كل منهما عن الآخر و التزم الصمت.. لتكمل الحديث.. / بوريكم صورة لاعب في نادي الهيصم اتوقع كذا اسمه.. فتقدم جلوي ونفخ صدره ليبرز شعار النادي اكثر.. / انا انا انا هيصمي اعرف كل اللاعبين حتى الي فالدكه وش تبين اي واحد بس.. وش مركــزه.. ؟؟ سعود.. / حتى انا اعرف موب بس انت.. جلوي.. / ما احد هرجك انت يا اصيلي.. حصه و لعل الصداع بدأ يداهمها.. / لا اله الا الله.. ممكن تنطمون لين اخلص كلامي.. ؟؟ ناظروا هذا هو ( عرضت لهم صوره له بالجوال ) عرفتوه.. ؟؟ من منظر جلوي و يده الي ماسكه راسه و فمه المفتوح 6 اشبار فاكيـد يعرفوه.. صاح سلطان و الحماس يكاد يقتلع مقلتيه.. / تستهبليـــــن هذا ساري لاعب وسط في الهيصم افضل لاعب في الدوري السعودي كله و اسألي ابـوي.. كتمت حصه ضحكتها عن تعبيره بـ ( اسألي ابوي.. ) و كأنها تحل لابوه والا كأن ابوه مرجع موثوق ولكن لطيفه هذي الثقه منه تجاه والده.. جدا لطيــفه.. بينما جلوي كاد ان يسقط طريح الحماس المبالغ فيه.. / يا ويلي يا حصه انتي ما تعرفين هذا من.. ؟؟ هذا افضل صانع لعب فالكره الارضيه موب عشانه في فريقي اقسم بربي انه افضل لاعب وسط يا جعل سعود للموت ان كنت اكذب.. فكاد ان ينقض سعود عليه لولا تدخل حصه بينهم.. / جلوي والله ان عاد سمعتك تدعي بالموت على احد لاعلم عمتك شيخه و اخليها توصلها لابوك ثم يجلدك لين تعرف ان الله حق فاهـم.. ؟؟ الموت ما فيه مزح خير ان شاء الله.. ؟؟ جلوي بلكاعه.. / طيب و انا صادق في كلامي يعني ما راح يموت هههههههه.. سلطان.. / ليه ليه تسئلين عنه ما علمتينا انت تشجعين الهيصم.. ؟؟ حصه.. / والله يا سلطان اخر همي الهيصم و الكوره كلها بس عندنا شغل معه و ابي اعرف معلومات عنه عشان ما اصير غبيه قدامه فيالله اشوف درسوني وش يعني وسط و صانع لعب و كم رقمه.. انهار جلوي على الارض بدراميته المعتاده.. / يا قلبي قلباه تكفين يا حصه الله يجعلك والديك بالجنه ابي اخاويك تكفيـــــــــن.. اقسم بربي ما اطلع صوت لاجلس منطم طول الطريق شوفيني حلفت يا جعلني بالمـ….. خلاص استغفر الله نسيت بس تكفين تكفين بنخاويك.. سعود.. / ايـــه والله غير نجلس ساكتين ولا تسمعين لنا حس تكفين.. حصه.. / الحين انا سألتكم سؤال صح.. ؟؟ و بعدين ما فيه وقت لا استأذنت من امهاتكم ولا عطيت ابوانكم خبر وين تبون تروحون ان شاء الله جاوبوا على سؤالي بس.. وش يعني وسط و صانع لعب.. ؟؟ سلطان و تجاهل متكرر لسؤالها.. / يعني انتي مشكلتك اننا ما استأذنا.. ؟؟ حصه.. / ايـه و……. في غمضه عين اختفى الجميع من امامها.. كل واحد متجه لاولياء امره يسابق الريح و الساعه.. تبي الاذن.. ؟؟ نبي نجيبـه.. اما حصه فلعلها تورطت ورطه ما عنها مناص.. لو اني داخله قوقل ماهوب ابرك.. ؟؟ الا والله ابرك و اصرف لي من هالورطه.. . . . . في مقهى محلي متواضع و حميمي ببساطته.. كانت الجلسه اكثـر حميميه.. تسائلت مضاوي.. / طيب وش الي خلاك تقصينه.. ؟؟ وعد بشيء من الندم.. / ما ادري يا اختي كذا طقت براسي ليله السفر اجدعه كله و انطلق بشخصيه جديده على قولت حقين تحرري من طاقتك السلبيه وليتني ما تحررت.. قلبي موجعني اليوم و انا اخذ شاور مو مستوعبه انه ما عاد عندي اطراف جلست امرر الشامبو في الفراغ ههههههه.. والله ندمانه يبي لي اشرب الخروع موب احطه عليه و بس.. مضاوي باعجاب.. / لا والله بالعكس ما اتخيل الطويل عليك شكلك كذا ياخذ العقل و مبرز جمال وطول رقبتك الا حمستيني اقص والله بس مشكلتي خوافه ما احب اغير.. وعد.. / انا خوافه اكثر منك بس عاد حلوه التجربه و حلو الجنون اللحظي الي يجيك و يخليك تتصرفين بدون تفكير في لحظتها و تندمين عليه بعدين.. مضاوي.. / صادقه.. دايم ودي اجرب و يمنعني خوفي ما اتكلم عن الشعر وبس لا بشكل عام و احسد اخوي متعب على هالصفه يشابهك فيها.. متعب اي شي يجي براسه يسويه ما عنده حدود للخوف عكس عزوز.. عزوز يشبهني كثيـــر و اشوف نفسي فيه راكد و خطوته محسوبه و ما اذكر انه غير ستايله ولا فكر… من يوم جابته امي و هو نفس الشكل اللهم يزداد ضخامه ههههههه.. وعد.. / الله يخليهم لك و يحفظهم.. مين الاكبر.. ؟؟ مضاوي.. / لا اكبر واحد فينا ناصر بعدين عزوز بعدين متعب وانا عاد آخر العنقود سكر معقووود.. و انتي.. ؟؟ اذكر قلتي لي عندك اخت صح.. ؟؟ وعد بحنين.. / ايــه رغد فديتها و فديت طاريها.. ما نتشابه لا بالشكل ولا بالشخصيات هي شرق و انا غرب بس احب هالاختلاف احسه هو الي يربطنا ببعض.. مضاوي.. / الله يخليها لك و يجمعكم على خير.. وعد.. / اميـن و يحفظ لك اهلك و احبابك.. ثم اكملت بقولها.. / مضاوي تسمحين لي بسؤال.. ؟؟ مضاوي بمزح.. / اجل انتي بقيتي شي.. ؟؟ جلسه تعارف على مستوى ما خلينا شي ما حكينا فيه اكيـــد اسمح.. وعد.. / ههههههههه ايه والله بس استحيت شوي على وجهي قلت استئذن لا اكون زودتها.. مضاوي.. / تمونـــين.. اسئلي الي ودك.. وعد.. / ليه استقريتوا بلندن.. ؟؟ بعيد عن الاهل و الجماعه احس صعب.. مضاوي.. / اما صعب ففعلا صعب بس تعودنا.. و بالنسبه لـ ليه فخليني اقولك فيه اسباب كثيره ابرزها مرض ابوي و كنا اصلا نتردد على لندن كثير و ارهقنا السفر فخلاص اخترنا نستقر هنا لعلها تزين الامور و فعلا زانت الحمد لله على الاقل بالنسبه لابوي.. وعد.. / الف لا بأس عليه ما يشوف شر يارب و كيفه حاليا كيف صحته.. ؟؟ مضاوي باسى.. / كان طيب فتره طويله الحمد لله بس رجع ينتكس قبل كم شهر وللحين على وضعه.. خلاص غيري الموضوع بدينا ندخل في شوارع سودا علميني بس مستعده للدوام.. ؟؟ وعد.. / لا و افكر اكنسل الفكره قبل لا تبدأ و ارجع حضن امي بلا طموح بلا هم.. مضاوي.. / هههههههههه طيب على الاقل خلي اول كورس يعدي على طول كذا انسحاب.. ؟؟ وعد بتأثر.. / وحشتني امي و استوحشت الغربه يا اختي.. مضاوي.. / طيب انا معك لين تقضين مشوارك و بسوي الي اقدر عليه كله بس لا تحبطين نفسك كذا من اول يوم هذا وانا احاول اسوي لك فعاليات و ارفه عنك.. بدى الامتنان واضح في نبرة وعد و في ملامحها.. / لا خــلا ولا عدم يا مضاوي والله العظيم مو محفزني الا وجودك بس اكيد قد مريتي بالدراما الي انا فيها حاليا.. كانت بترد عليها مضاوي لكن اتصال عبدالعزيز قاطعها.. اجابته بعد ما استأذنت وعد.. / اهليـن عزوز.. عبدالعزيز.. / هلابك يا حب.. وينك.. ؟؟ مضاوي.. / طالعه مع صديقتي.. عبدالعزيز بفضول لا ينفك عنه و السبب لا زال مجهوووول.. / الي وش اسمها.. ؟؟ مضاوي.. / عبدالعزيز تبي شي.. ؟؟ عبدالعزيز.. / هههههههههه بصراحه ايه ابي اغراضي الي كانت عندك.. هنا اضطرت ان تستئذن وعد لاكمال المكالمه على انفراد و غادرت الطاوله لتأخذ حريتها بالتنفيس عن غضبها.. / انت انهبلت اليوم موب صاحي اقسم بالله وش حركات الاطفال هذي يوم عرفت ان عندي ضيف اشغلتني في نفسي والا ايش و بعدين الله و الاغراض كلها كم تيشيرت و تراوزر و صورتين.. عبدالعزيز حجته ضعيــــفه و يدري بضعفها بس ما لقى غيرها.. غير انه فعلا مهتم بالصور.. / طيب ترى وحده صورتي بروب التخرج و الثانيه مع ابوي واخواني مب حي الله صور و غير اني مخليها امانه عندك ردي الامانات لاصحابها لا تبقى في ذمتك.. مضاوي.. / خلاص برسلها لك مع سواقي لا تشغلنا.. عبدالعزيز باصرار.. / والله ما ترسلينها معه بجي انا ادل الدرب و سيارتي تحت رجلي بس جهزيها.. مضاوي.. / انت وضعك مريب و مصيري بعرف وش الي يدور في راسك بس عموما تعال بكره وخذ عفشك ثم الوجه من الوجه ابيض يا عزيّز و ورني بعدها وش العذر الي بيجيبك للشقه عاد.. ضحك عبدالعزيز من قلبــــه.. ضحك على ردة فعل مضاوي الظريفه.. من الصباح و هي ماخذه دور الحارس الشخصي لهذيك.. هذيك الي حفزت كل ذرة فضول كانت خامله باعماقــه.. ليه و كيف.. ما يعــرف.. لكنه ناوي يعرف اذا قدر يتعدى مضاوي و يجتاز حصونها المنيعه الي تشيدها حولها.. الله يشغل هالراس يا مضاوي كانك اشغلتيني.. . . . . باريــس.. مســـاءاً.. رفع راسه عن اوراقه.. / ادخــــل.. و كان الطارق رئيس افراد الحماية الشخصيه.. دخل بخطوات عجله تكفيـه ليتسائل../ وش العلـم يا فارس.. ؟؟ رئيس الرقباء فارس و بعد صرف التحيه العكسريه.. / طال عمرك رصدنا تحركات مشبوهه و تواصلنا مع السلطات الفرنسيه لتمشيط المنطقه لذلك انا اقترح نتأنى في مغادرة المقـر الى ما يوصلنا تقرير بتمام عملية التمشيط و القرار في الاول والاخير يرجع لمعاليكـم.. الي تامرون فيه طال عمرك.. سعود بهدوء.. / طيب وش الجديد وانا اخوك.. هذا حال الدبلوماسيين اجمـع ماهوب سعود لحاله و الي ربي كاتبه يبي يقع لا انا ولا انت بنـرده.. ثم قال بارهـاق استنفد كامل قواه.. / جهز السياره وانا جايك بخلص هالورقه في يدي و نمشي.. فارس باصرار.. / يا معاليك انا مقدر تعبكم الله يجزاكم عن المسلمين خير الجزا لكن…… سعود.. / السيـارة يا فارس.. و هذا امر مانيب اشاورك.. فارس.. / ابشــر.. سم.. و غادر فارس لاحضار السياره في حين ان شعور ما بالخطر يتربص بحدسه الذي لم يخذله يوما.. الا انه عبدا مأمور ليس الا.. ينتهي الجـــزء إلى هنا.. التقيكم على خيــــر..