خريف الحب "مميز" - الفصل الثالث عشر - بقلم خياله.. والخيل عشقي | روايتك

عائله ابو علي(عبدالله) خال جوري ام علي(ورده) امها بالرضاعه (الاولاد) علي، وزوجته بشاير عبدالملك. احلام. مروان رجعت جوري عند امها والبنات اللي يحطوا الفطور.. بشايربفرح/الف مبروك.. متى العرس.. ام علي/ على ايش مستعجله.. البنت عادها امس ملكت.. بشاير/ مش مستعجله بس اشتي اعرف هتسكن معاه في جده ولا بتجلس عندنا. . سوت نفسها ماسمعت وشغلت نفسها بتوزيع كاسات الشاي.. أحلام/ جوجو.. جبتي الملخصات معك.. جوري بسرعه/ ايووه ..تمام أنك ذكرتيني.. أحلام/تعالي غرفتي علشان تأخذي باقي الواجبات وتشرحي لي فقره مافهمتها.. وقفت أحلام وسحبت جوري معاها وراحوا غرفتها وقفلوا الباب.. ضمتها جوري بأمتنان/ فديت اللي تحس فيني، وتنقذني من الأحراج.. أحلام بعتاب/ تحسبي أني صدقت الجنان اللي سويتيه مع علي،بس قلت بشوف آخرتها معك.. جوري وهي لسا في حضنها/ عاد هو اللي جاء في وجهي.. كنت حاسه بضيقه ومكتومه، وارتحت شويه بعد ماجننته، بس بعد كلام بشاير،رجعت ضيقتي أكبر من أول. مسحت على شعرها بحب/ قلت لك آخرتك بتتزوجي، والبنت مالها غير بيت زوجها،بس انتي الله يهديكي ركبتي رأسك واقنعتي نفسك أنك بتجلسي بدون زواج،والأن شوفي النتيجه، منتي متقبله زواجك وزعلانه. بعدت جوري عنها بقوه ووقفت وصارت تدور في الغرفه وبخنقه/ كيف اتقبله وأبي زوجني بدون مايقول، زوجني وأنا فعلا نايمه في العسل..أنا عارفه أنه ماشاور وداد وعلياء في زواجهم.. لكن قلهم قبلها،اعطاهم خبر، واتقبلوا الموضوع،عملوا خطبه.. ومدري ايش حصلهم ..المهم كانوا فرحانات.. لكن أنا حرمني حتى من أني اعرف.. نمت وقمت لقيت نفسي متزوجه.. كيف اتقبل قولي لي.. ليش يحسسني أني ثقيله عليهم.. خلاص البيت مايوسعني، ولا جننتهم أني ماأشبه أخواتي.. طيب أنا ربي خلقني كذا ..مرجوجه ولساني طويل وما أقر في مكان.. ليش لازم اكون مثل وداد هاديه ومالي حس ولا اكون مثل علياءاحب الخرجات والزيارات.. ههههههههه ولا مثل شيماء مايعجبني شي ودلوعه.. هم ربي خلقهم كذا.. دلوعات وحساسات... أحلام بصدمه/ انت من قلك ذا الكلام الفاضي، من قال انك مثقله عليهم ولا متضايقين منك لأنك مش باقي أخواتك.. والله خالي صالح لو سمعك لايزعل منك.. جوري ببكى/ كلهم يقولوا أني مش مثل البنات.. معاذ دايما يصيح عليا لأني بلعب مع العيال كره، ولما يشوفني العب بالاثقال حق عبدالرحمن يأخذها مني، حتى لما كنت العب واتسابق معاهم يضحك عليا ويقول أني مش بنت.. ليش ماتكوني رقيقه ودلوعه مثلهم.. مسكتها أحلام/ بلا هباله.. انتي عارفه انه يمزح معك، حتى علي شوفي كيف بتتضاربي معه،لكن والله انه يحبك ويقول أنك احسن وحده في البنات، وحلف إذا بشاير ولدت بنت هيسميها جوري علشان تطلع مثلك.. تابعت بهدوء واقناع/ والله ذي كلها اوهام في راسك لأنك زعلانه من خالي بس. جوري وهي تمسح دموعها/ حتى لو كان صح ومش اوهام، انابسوي الحاجات اللي احبها،مادام ماتضرني ولا تضر أحد ولا بسوي غلط، ليش لازم اغير نفسي علشان اكون مثلهم.. أحلام/ اصلا محد بيسمح لك تغيري نفسك لأن الكل يحبك مثل منتي، لأنك جوري ومحد شبهك، ولا أحد يقدر يجي ربعك.. جوري بضيق/ طيب خلينا من الكلام الفاضي ، ذحين ايش اسوي..زواج مابتزوج.. انا بجلس هنا معاكم.. كيف اروح معاهم جده.. وانتوا بتكونوا هنا.. كيف بعيش وانا بعيده عنكم… وانتي كيف بتعيشي بدوني.. رجعت تبكي بقهر وبكت أختها معاها وتابعت من بين دموعها/ انا بسافر بلاد ثانيه غير اليمن.. مابشوفكم ولا اكلمكم،وهناك الهواء غير والناس غير،الشوارع والبيوت كلها غير.. مابتزوج.. مابتزوج.. ضمتها أحلام بقوه وهي حاسه فيها.. كيف ماتحس وهي اختها.. اتقاسموا كل شي من يوم ماانولدت جوري.. اتقاسمت معها حليب أمهاواتقاسمت معها المها وحزنها وفرحها.. حتى عماها اتقاسمته معاها ورفضت تخليها لحالها في ظلامها.. ( أحلام صار لها حادث بعمر السنتين ودخلت في غيبوبه لمدة خمس شهور، ووقتها انولدت جوري، فقررت أم جوري أنها تخلي أم أحلام ترضعها كتعويض عن غياب أحلام وعلشان تساعدها تتخطى محنتها وفقدها لبنتها، اللي للأسف الحادث أثر عليها وافقدها البصر) حست جوري براحه بعد ماتكلمت مع أحلام وطلعت شويه من اللي داخلها.. كانت متأكده انها بترتاح إذا شافتها وذا اللي صار.. أحلام بمزح/ سبحان الله أنتي ماتبكي طول السنه، كأنك تجمعي دموعك ولما تبكي مره تغرقينا.. جوري بأبتسامه/ اتخيليني ابكي مثل شيماء صاحت أحلام / لااااا تقولي، الله يحفظك غرقيني مره في السنه ولا تغثيني كل خمس دقايق.. لا صدق شيماء كيف عايشه طبيعي كذا.. جوري/ هههههههههه والله يختي ذا سلاحها السري.. كل ماصار شي قامت توون وكل شي يجيها، لكن عبادي فديت قلبه.. ممشيها عالصراط.. يوووه نسيت.. فتحت شنطتها وطلعت اوراق ودفاتر وبهدوء/ شوفي ياحلوه… الدفاتر كملتها، سلميها بكره علشان اتأخرت وابله نور مارصدت درجتك.. وطبعت ملخصات علم النفس والنصوص والأحياء،ذاكري منها للأختبارت الشهريه،طبعا الاسئله المهمه كالعاده عل… قاطعتها أحلام بصوت عالي/عليها ورده أنتي حفظتها.. جوري باستهبال/ معكي اين ماكنتي…. ههههههههه أحلام بصدق/ شكرا حبيبتي، اكيد اصابعك وجعتك من الطباعه ، انتي لو تسمعي كلامي وتخليني اعطيها احد من المعهد يطبعها… . قاطعتها جوري بحزم/ لا تخليني أحلف ..أن دريت أنك أعطيتي كتبك لأحد لساني مايخاطب لسانك طول عمري يعني حاسدتني عالراحه والسعاده اللي احسها لما أقدر اسوي لك شي.. أحلام بضيق/ والله مو قصدي.. بس أنتي بتتعبي معي ،انتي مستوعبه أنك بتدرسي كتب لمرحله غير مرحلتك.. بتكتبي لي واجباتي كل اسبوع،وتلخصي لي المواد وفوق ذا كله تطبعيها بالأله الكاتبه.. غير مذاكرتك وشغل البيت.. والله حرام عليكي نفسك.. شوفي كيف جسمك جلد على عظم.. شهقت جوري/ ذي اسمها رشاقه.. لياقه.. مرونه.. مش جلد على عظم.. وذي الألعاب و التمارين اللي بسويها ايش فايدتها.. انا بتجهز للأولمبيات.. ومحد مركز... بعدين إذا اشتكيت وتعبت بوقف من حالي… تمام .. أحلام بضحك / تمام يا أولمبيات.. كملوا ضحكهم وسواليفهم بعد مانضموا للبقيه وبعد الغداء وداهم علي الملاهي بعد ماحكى له عبدالرحمن اللي صار فحب يغير نفسية جوري اللي فعلا نست أو تناست ،علشان تنبسط في يومها .. انتهى البارت لا إله إلا أنت.. سبحانك أني كنت من الظالمين