«كُرسي أمام المقبرة»
«بعد عودة چوزيف من المطار ذهب إلىٰ قبر جدّه مرّة أخرىٰ ومعه كرسي كان ذلك في تمام السّاعة الرابعة عصرًا »
ها ياجدّو عامل أيه جبت كرسي أهو وهقعد قدّام قبرك شويّة أكلّمك عارف إنّك أكيد سامعني كويّس أنت أكيد كنت فرحان أوّل ما عرفت إن اللي بيزورك النهاردة هيَّ راجية معاك حق أنا لو مكان كنت هكون فرحان بس ياجدّو هيَّ عكسك أنت طاير من الفرحة لأنّك شوفتها في حين إنّها مش فرحانة ولا حاجة إنّها جات المكان ده ماشوفتش مشيت بسرعة ازاي ! طيب. أنا عارف وفاهم كل اللي أنت عانيت بيه أنا فعلًا فهمك بس في الأوّل وفي الآخر مانقدرش نجبر اللي بنحبّهم علىٰ إنّهم يحبّونا صح؟ عارف عارف واللّه إن أد أيه الشعور ده بيوجع لأقصىٰ حد فكرة إنّك تحب حد مايحبكش دي فكرة صعبة فعلًا ،فكرة إنّك تعيط علىٰ حد في صلاتك علشان نفسك فيه وحد تانِ ياخده بالسّاهل عارف أنت المقولة اللي بتقول تذهب أحلامنا الّتي تمنّيناها لأشخاص لم يتمنّوها أبدًا
أنا فاهمك على ٰ فكرة فاهم شعورك إنك دايمًا خايف وفجأة لقيت حاجة مش هتخاف منها فماصدقت تلاقيها وفاهم إن من يوميها وأنت عمّال ترسم في دماغك حياتك الورديّة مع الشخص ده وفاهم شعورك في كل مرّة الشخص ده بيعمل حاجات تكاد تكون عاديّة وأنت من فرط ما أنت بتحبّه بتكون مفكّر إنّه كمان بيحبّك ،وفاهم شعورك وأنت بتمثّل قدّام اللي بتحبّه إنّك فرحان وبتتمنّاله الخير مع الشّخص اللي بيحبّه وأنت جوّاك بتتحرق ،وفاهم شعورك وأنت كل مرّة بتصلّي فيها وبتدعي وأنت عارف إن الشخص ده بيحب حد غيرك واللي بيحبّه هو كمان بيحبّه فأنت تحس إن مالوش لازمة خلاص ولازم ترضىٰ رغم إنّك عاوز الحاجة دي الفكرة نفسها فكرة إنّك تقتنع قدام نفسك إن الحاجة اللي أنت عايزها مش عايزاك دي في حد ذاتها فكرة مُميتة ،فكرة إن الشّخص اللي قدّامك يقدم حاجة بسيطة أو عاديّة جدًا ويكون عادي وأنت من فرط حبّك تفهم إن هوَ بدأ يحبّك أيوه أيوه وتقعد بقىٰ تتوهّم وتحتفظ بذكريات هيَّ في الأصل مش موجودة أنا عارف شعورك كان عامل ازّاي أوّل ما سمعت من اللي بتحبّها عن اللي بتحبّه عارف ساعتها قاعدت تقول يعني كل حاجة كانت وهم ده انا كنت فكرك بتحبّيني ،أنا فاهم كويس أوي شعورك وأنت كل حاجة تكون هتموت وتاخدها مش بتتحقّق وفاهم شعورك بردو وأنت كل ما تحب ماتتحبّش فتفكّر إن ما جايز أنا اللي ماتحبّش فعلًا والعيب فيّا وفاهم بردو شعورك وأنت بتدّي اللي قدّامك مشاعر جايز جايز في يوم يحبّك وفاهم شعورك وأنت كل يوم بتسمع أغاني حب وتفتكر الشخص ده وهو أصلًا مش بيحبّك ،وفاهم شعورك لما كنت تهتم بأدق تفاصيله كلّها لمّا يحكي وأنت لما تحكي مايكونش حابب يسمعك أو مافيش أهتمام زي أهتمامك وفاهم شعورك وأنت وصلت إنّك خلاص مش عاوز حاجة تانِ وفاهم شعورك ساعة ماكونت بتحاول تبعد فترة علشان خاطر عاوز تنسىٰ أيوه عارف أنا فكرة تبعد عن حاجة غصبن عنّك دي وعارف شعورك إنّك بتحس كأنّك مخذول بتحس كأن الوقت واقف وأنت مش حاسس بيه وعارفه شعورك لما تفكّر إن الشخص ده عوضك ويطلع لاء مش عوضك ولا حاجة وعارف أد أيه شعور صعب أوي التوهان اللي أنت كنت بتحس بيه ساعتها وعارف كويّس شعورك وأنت زعلان بسبب حاجة معيّنة تقوم تفتكر كل الحاجات اللي بتزعّلك كلّها ،أصل ياجدّو ماينفاعش تحاول مع حد مش بيحاول علشانك بايخة أوي في حق نفسك ،أنا عارف إن شعور صعب لما تدرك إن لما جيه الشخص الصح بالنسبة ليك ماكونتش أنت الشخص الصح بالنسبة له، تخيّل إنّي عارف إن ساعات بدل ما تعيّط من الزّعل كنت بتضحك ضحك هستيري ، عارف إن ساعات كنت بتتخيّل بردو إن الشخص ده بيحبّك وأنت عارف إنّه مش بيحبّك ،وفاهمك بردو وأنت مش لاقي حد تحكيله ولو حكيت لحد في فترة هيزهق أو هيواسيك بكلام وخلاص أو هيقولك بعض الكلام اللي يخلّيك تندم إنّك قرّرت تقول له حاجة في مرّة،عارف شعورك بردو إنّك تعبان أوي ومع ذلك الأيام بتمشي ،عارف أنا إن كان نفسك اللي بتعمله ماتكونش مجبر عليه ،عارفك كنت كل ما قلبك يوجعك تتخيل سيناريوهات وهميّة،أنا متأكّد إنّك كنت بتروح لمحمّد وتقول له علىٰ مواقف ماحصلتش تبيّن أد أيه راجية بتحبّك أو تخلّيه بس يقتنع إن راجية بتحبّك ف يقولك كده أو يعيش معاك الشّعور اللي نفسك فيه ،عارف إن من جوّاك كنت بتعيّط ومن برّة وشّك كان عادي ،بس في الآخر هتعمل أيه مافيش حاجة تقدر تعملها غير إنّك ترضىٰ عارف إنّها مش بالساهل وهتعيّط كتير بس دي أقدارنا وأكيد كان فيها خير ياجدّي
ودلوقت همشي بس هاجي مرّة تانية وفضفض معاك عارف إنك بتخاف تكون لوحدك