الفصل الخامس
_*ࢪوايه المنتقبه الحسناء*_ 🍒⸙♡»)
🔴🔴🔴🔴🔴🔴🔴🔴🔴🔴
🟣🟣🟣🟣🟣🟣🟣🟣🟣🟣
البارت 22 ↻≯🍒⸙•♡»»))
البارت 23 ↻≯🍒⸙•♡»»))
البارت 24 ↻≯🍒⸙•♡»»))
البارت 25 ↻≯🍒⸙•♡»»))
`البــ♡♡ــارت«22»`
قالت بإحراج: "ممكن أستعير كشكول صفية؟!! وأوعدك إني هرجعه تاني بعد أما أخلص قراءة فيه؟!"
صمتت قليلا؛ وأمسكت الكشكول ونظرت له بحنين؛ ثم قالت: "موافقة؛ بس بالله عليكِ يا بنتي تحافظي عليه؛ أنا لما باقرأ كلماتها بحس إنها بتكلمني وحاسة بيا"..
أومأت حسناء برأسها بالإيجاب؛ ثم قالت: "ما تقلقيش يا خالة؛ هاحافظ عليه وهارجعه لحضرتك في أقرب وقت"..
مريم بابتسامة: "يا ريت عشان نشوفك تاني؛ ما تتأخريش علينا يا حسناء"..
احتضنت مريم وقبلتها؛ ثم قالت بسعادة: "حاسة إني أعرفك من زمان أوي؛ أنتي طيبة أوي يا مريم"..
ردت بخجل وتواضع: "جزاكي الله خيرا, وأنتي أطيب مني"..
******************
(أمسكت بهاتفها وظلت تبحث عن اسمه في دليل الهاتف؛ ثم ضغطت على زر الاتصال.)..حاولت أن تكون هادئة: "السلام عليكم؛ إزيك يا زياد.؟! عامل إيه؟!!"
ضغط زياد على أسنانه بغيظ: "الحمد لله كويس؛ إيه اللي بيحصل عندكم ده يا أمي؟!"
والدته بهدوء: "كل خير يا ابني؛ والدك طلع قاعد عند عمك ومريض؛ وما ينفعش حد غير أولاده يخدمه؛ ولا إيه؟"
قال بعصبية: "يعني بعد أما يسيبنا بصحته واحنا محتاجينه يرجع وهو مريض عشان نخدمه؟! ما ينفعش يا أمي؛ أنا رافض الوضع ده؛ يروح يقعد عند عمي تاني!!"
قالت بحدة: "ده موضوع ما فيهوش نقاش يا زياد؛ والدك هيفضل هنا؛ وانتم اللي هتخدموه؛ أنا ربيتكم على التسامح والعفو؛ إذا كنت أنت بأه عايز تغضب ربنا ساعتها مش هاقدر غير إني أدعيلك بالهداية والرجوع لطريق الله!!"
قال وعيناه تملؤها الدموع: "يا أمي أنتي أكتر واحدة تعبتي بعد ما سابنا؛ وكل واحد فينا طلع معقد بسبب النقطة دي؛ إزاي عايزة نتعامل معاه بكل بساطة كده.؟! صعب جدا!"
تنهدت بهدوء؛ ثم قالت: "عارفة إنه صعب؛ بس ليه ما تحاولش ترضي ربنا وتبقى بار بينا؟!"
استكملت كلامها بتنهيدة حزينة: "يا زياد سامح واصفح عشان ربنا يوفقك في حياتك"..
زياد بحزن: "خلاص يا أمي؛ اللي يرضيكي اعمليه؛ أنا ما أقدرش أزعلك؛ بس ما تطلبيش مني أكلمه لأني مش هاقدر"..
ظهر على ملامحها الحزن؛ ثم قالت: "كنت فاكرة إني عرفت أربيكم وأطلعك أنت وأختك بقلب نضيف؛ بس يا خسارة تعبي طول السنين دي".
قال بندم: "ما تقوليش كده يا أمي؛ أرجوكي"..
قالت وقلبها يعتصر ألما: "عايزني أفرح لما أشوفك أنت وأختك بتعقوا والدكم؛ يا ابني عقوق الوالدين من الكبائر"..
زياد بضيق: "أعوذ بالله يا أمي؛ اللهم اغفر تقصيري"..
قالت بدهشة: "بتدعي ربنا وأنت بتعصيه؟! طيب ما أنت بإيدك ترضي ربنا عشان يغفرلك تقصيرك؛ اتعلم من أخوك علي؛ يااااه على طيبة قلبه وصفاء قلبه؛ نفسي تكون زيه أنت وأختك"..
تنهد بقوة: "أوعدك يا أمي إني أتغير؛ وصدقيني قريب أوي هرضيكي وأفرحك؛ بس أرجوكي يا أمي ما تبطليش تدعيلي"..
قالت بهدوء: "ربنا يهديك يا ابني أنت وحسناء؛ ويحنن قلوبكم"..
زياد بصوت حزين: "اللهم آمين يا رب العالمين؛ هاستأذنك يا أمي؛ هاقفل عشان الحق أنام؛ عندي شغل الصبح"..
-تصبح على خير..
زياد بابتسامة: "وحضرتك من أهل الجنة يا غالية"..
والدته: "في حفظ الله يا ابني، السلام عليكم"..
- يا رب, وعليكم السلام..
******************
"علي شكله إنسان محترم أوي يا أم صفية وملتزم كده ما شاء الله؛ وأكيد حسناء أخته كده بردو بغض النظر عن لبسها".
نظرت له والدة صفية بابتسامة: "فعلا حسناء طيبة أوي؛ بس ربنا يهديها وهي واحدة واحدة هتتغير؛ وفاة صفية أثر فينا كلنا وأكيد أثر فيها هي كمان!!"
دق قلب مريم فرحا؛ ونظرت لوالدها ثم قالت بابتسامة: "أنا حبيت حسناء جدا؛ وأسلوبها جميل؛ دي طلعت بتكتب خواطر وقصايد زي صفية بالضبط؛ وعندها صفحة على الفيس كمان!"
والدها بدهشة: "ما شاء الله"..
نظرت مريم لوالدتها بتعجب وقالت: "بس غريبة يا ماما إنك وافقتي إنها تستعير الكشكول؟!"
التفتت إليها والدتها؛ وقالت: "حسيت إن خواطر صفية هتفيدها كتير؛ وبكده صفية تكسب ثواب بعد وفاتها كمان؛ وتكون كلماتها صدقة جارية لكل اللي يقرأها"
مريم بدهشة: "أنا كده فهمت؛ ده أنا كنت مستغربة جداً لأنك مش بتبطلي قراءة في الكشكول كل شوية!!"
والد صفية نظر لزوجته بابتسامة: "جزاكي الله خيرا؛ ربنا يبارك فيكي"..
والدة صفية بابتسامة حزينة: "وجزاكَ مثله؛ كان نفسي مريم هي اللي تلبس فستان زفاف صفية؛ بس أعمل إيه؟ صفية قالتلي أعطيه لحسناء..
اغرورقت عين مريم بالدموع: "ما تزعليش يا ماما؛ بكرة أجيب فستان؛ بس لما ربنا يرزقني الزوج الصالح الأول"..
تنهدت بهدوء وقالت: "نفسي أفرح بيكي والله يا بنتي؛ ربنا يرزقك الزوج الصالح يا رب"..
والد صفية: "آمين يا رب"..
والدة صفية: "يلا يا مريم قومي نامي عشان تصحي بدري وماتتأخريش على شغلك"..
نهضت ثم قبلت يد والدها ووالدتها وهي تقول بابتسامة: "حاضر؛ يلا تصبحوا على خير"..
والديها في نفس واحد: "وأنتي من أهله يا بنتي"..
(دخلت مريم غرفتها وهي في قمة سعادتها؛ هذه أول مرة تشعر بالسعادة بعد وفاة أختها صفية؛ ذهبت إلى سريرها واستعدت للنوم؛ وظلت تدعو كثيرا أن يرزقها الله بعلي زوجا لها..)
(بعد أن خرجا من بيت صفية؛ استقلا المترو.)
علي بابتسامة: "سمسمة؛ ممكن أتكلم معاكي شوية.؟!"
حسناء بمكر: "عارفة؛ البنت زي القمر ومؤدبة"..
علي بدهشة: "بنت مين؟!"
غمزت له وهي تقول: "مريم أخت صفية؛ وزميلتك في الشغل! لحقت تنسى؟!"
علي باستغراب: "مالها؟ وإيه جاب سيرتها أصلا؟!"
رفعت حاجبها وقالت بدهشة: "ده أنت في الطراوة؛ أومال موضوع إيه اللي عايز تكلمني فيه؟!"
ضحك وقال: "آآآه؛ هو أنتي افتكرتيني هاكلمك عن مريم؟!"
أومأت برأسها بالإيجاب: "أيوه!"
علي بابتسامة: "مع إني ماكنتش هاجيب سيرتها؛ بس بصراحة البنت وأهلها ملتزمين جدا ومحترمين"..
حسناء بفرح: "جدا ما شاء الله عليهم؛ ما هو أنا أقصد ليه ما تخطبش مريم.؟! أنت شايف أخلاقها واحترامها أهو؛ وكمان أنت عايز بنت يكون عندها النية في لبس النقاب؛ هي منى عينها تلبسه؛ بس بتقول إنه ممنوع في الشركة؛ ده اللي مانعها!"
علي بحزن: "بصراحة البنت كويسة جدا؛ بس للأسف ما ينفعش؛ هي حاصلة على كلية وأنا ثانوية عامة؛ وماكملتش الكلية؛ ما أنفعش؛ هابقى أقل منها وأكيد هترفضني"..
حسناء بحيرة: "لا ما أعتقدتش؛ هما بيبصوا للزوج الصالح ومش مهم عندهم الشهادة"..
- "لا ما ينفعش؛ هيبقى في فرق تعليم وما احبش أكون أقل من زوجتي"..
تنهدت بشدة؛ ثم قالت بحنين: "عارف يا علي.؟! أنا باحبك أوي, أنت تعبت كتييير أوي عشاني أنا وزياد؛ أنا بجد نفسي أردلك الجميل وأحس إني قدرت أفرحك وأسعدك ولو بحاجة بسيطة!"
علي بابتسامة: "يااااااه؛ أنتي فعلا فرحتيني بكلامك الجميل ده؛ وأنا كمان باحبك جداً"..
ابتسمت وقالت: "طيب إيه رأيك أنا أخدت رقم مريم أتكلم معاها لو وافقت يبقى على خيرة الله تروح تتقدم لها؛ لو مش وافقت يبقى خلاص كل شيء قسمة ونصيب.؟!"
صمت علي قليلا؛ ثم قال بتردد: "بصراحة البنت خسارة؛ خلاص على خيرة الله؛ بس لما نروح ناخد رأي الوالدين؛ واستني أصلي استخارة وأرد عليكي؛ وبعدين توكلي على الله وكلميها!!"
حسناء بدهشة وغضب: "طيب ناخد رأي ماما وماشي؛ إنما ناخد رأيه هو ليه بأه؟!"
نظر لها؛ ثم قال بجدية: "تعالي هنا صحيح؛ أنتي مش من شوية بتقولي نفسي أسعدك وأفرحك؟!"
أومأت حسناء برأسها إيجابا: "أيوة طبعا!!"
علي بعطف: "بالله عليكي يا حسناء سامحي أبوكي؛ لو بجد بتحبيني وعايزة تسعديني"..
حسناء بحزن: "أقولك سر يا علي؛ بس اوعدني ما تقولش لحد.؟!"
علي بجدية: "طبعا وعد.."
حسناء بحنين: "أنا أول لما شفته صعب عليا أوي؛ وحسيت إنه واحشني أوي؛ وافتكرت في لحظة قفص العصافير لما جابهولي لما فضلت أعيط وشبطت فيه..!"
علي بابتسامة: "ياااااه؛ أنتي لسة فاكرة العصافير.؟!"
حسناء وقد اغرورقت عيناها بالدموع: "وعمري ما نسيت أي حاجة هو جابهالي؛ بس معرفش ليه قلت له الكلام ده واتعصبت ساعتها كده..؟"
قال بتفاؤل: "بس كلامك ده بيقول إنك ممكن تسامحيه؛ حاولي يا سمسمة وفرحيني زي ما قولتي!!"
تنهدت حسناء بحزن وتذكرت كلمات صفية التي قرأتها بالكشكول وهي تقول: "هاحاول؛ عشان بس أرضي ربنا"
تذكر علي شيئا؛ ثم نظر لحسناء وقال: "صحيح إيه حكاية الأحلام اللي بقيتي تشوفيها كتير دي؟!"
حسناء بخوف وقلق: "بصراحة مش عارفة؛ بس حاسة إنها رسايل من ربنا"..
قال بجدية: "مش عارف؛ بس بصراحة أنا فكرت آخدك ونروح لدكتور يشوفك!"
رفعت حاجبها ثم قالت بتعجب: "دكتور.؟!! مرة واحدة.؟!"
علي بقلق: "عشان بس نطمن عليكي"..
حسناء بابتسامة: "مفيش داعي، ما تقلقش؛ أنا بدأت أفهم كل رؤيا باشوفها كويس"..
علي: "ربنا يهدي الأمور ويبعد عنك القلق ده"..
غمزت له قائلة: "ماتقلقش يا عريس"..
ابتسم بدهشة وقال: "خلاص خلتيني عريس.؟!"
حسناء بجدية: "وأجمل عريس في الدنيا؛ هو حد يطول يا ابني عريس زيك.؟!"
علي بقلق: "تفتكري ممكن توافق؟"
حسناء بابتسامة: "عندي إحساس إنها بتتمنى كده هي كمان.!!"
علي والحيرة تظهر على ملامحه: "بس فرق التعليم ده هيبقى عامل مشكلة بينا لو حصل نصيب واتجوزنا صح.؟! ولا إيه رأيك؟"
حسناء بطمأنينة: "لا طبعا مفيش مشكلة ولا حاجة؛ أهم شيء الحب والتفاهم؛ ومريم مع إني ما شفتهاش غير مرة واحدة بس حاسة إنها عاقلة جدا؛ أحب أطمنك ما تقلقش خالص"..
اطمئن قلبه قليلا ثم قال: "ربنا يقدم اللي فيه الخير؛ لما أروح هصلي استخارة بردو ونمشي في الموضوع؛ وربنا يسهل الأمور"..
وفجأة خطرت ببال حسناء فكرة؛ فنظرت إلى علي وقالت: "بقولك إيه يا علي؟"
******************
****يتبع****
🔴🔴🔴🔴🔴🔴🔴🔴🔴🔴
🟣🟣🟣🟣🟣🟣🟣🟣🟣🟣
`البــ♡♡ــارت«23»`
-إيه رأيك تكمل تعليمك وتدخل الكلية اللي بتحبها؟!!!
التفت ونظر لها بدهشة: "أكمل تعليمي دلوقتي.؟! صعب يا بنتي"..
قالت بجدية: "صعب ليه بس.؟! أنت كنت متفوق جدا في الثانوية وجايب مجموع حلو كمان؛ يعني ممكن تقدم في كلية تعليم مفتوح وتدرس وأنت بتشتغل بردو"..
صمت قليلاً بعد أن حن قلبه لحلم حياته؛ ثم قال: "هي فكرة كويسة! بس تفتكري ينفع؟!"
حسناء بجدية: "أيوة ينفع؛ حتى لما تتقدم لمريم ونقول إنك بتكمل تعليمك هيوافقوا على طول بدون تردد؛ وما تبقاش أقل منها زي ما بتقول!"
علي بفرح: "طب يا ريت؛ بس أروح أقدم فين؟!"
- سيب الموضوع على ربنا؛ هيسهل الأمور بإذن الله؛ احنا خلاص الامتحانات قربت؛ والسنة قربت تخلص؛ أنت تقدم من أول السنة الجاية بإذن الله؛ بس أنت انوي..
علي بابتسامة: "نويت بإذن الله؛ وبردو هاصلي استخارة وأمشي في الموضوع"..
حسناء: "حلو أوي؛ وربنا يوفقك يا حبيبي"..
علي بابتسامة:"آمين يا رب؛ يلا استعدي عشان وصلنا أهو.."
حسناء: "حاضر؛ الله المستعان"..
******************
نظرت لهم بقلق وهتفت: "إيه يا ولاد اتأخرتوا كده ليه؟! قلقت عليكم أوي!"
حسناء بابتسامة: "معلش يا ماما بأه؛ بصراحة القعدة مع أسرة صفية جميلة أوي"..
علي بإمتنان: "عندك حق يا سمسمة؛ ناس يا أمي طيبين أوي؛ أنا قعدت مع والدها ما شبعتش منه؛ كلامه جميل أوي؛ تحسي إنه داعية إسلامي؛ وبيحبب الناس في طريقة دعوته كده مش ينفروا منه".
والدتهم بدهشة: "بسم الله ما شاء الله؛ ربنا يبارك لهم ويصبرهم يا رب"..
غمزت لعلي؛ ثم التفتت لوالدتها وهي تقول بابتسامة: "ده حضرتك ما تعرفيش كمان المفاجأة الغريبة اللي حصلت لعلي ومريم"..
قالت بدهشة: "مريم.؟!!! ومين مريم دي؟!"
حسناء بفرح: "أخت صفية؛ طلعت بتشتغل مع علي فى حسابات الشركة"..
قالت بتعجب ودهشة: "سبحان الله؛ إيه الصدفة العجيبة دي.؟!"
علي بدهشة: "آآه والله يا أمي؛ أنا لحد دلوقتي مستغرب"..
بدأ علي يحكي لهم ماذا حدث لمريم؛ وموقفه معها..
والدتهم باستغراب: "وفي نفس الوقت اللي تكتشف إنها بتشتغل في الشركة؛ تكتشف بردو إنها أخت صفية.؟!"
علي بحيرة: "هي حاجة غريبة فعلا!!"
حسناء بجدية: "مش حاجة غريبة ولا حاجة؛ لو فكرنا فيها ممكن تكون مريم دي ربنا بعتهالك في الوقت المناسب عشان تكون من نصيبك وتتجوزها..!"
أومأت زينب برأسها إيجاباً؛ ثم قالت: "ليه لا؟!! شكلهم أسرة طيبة وملتزمة؛ طب يا ريت يا علي"..
غمزت لعلي: "فعلا يا ماما؛ أنا اتكلمت مع علي في الطريق واتفقنا إنه هيصلي استخارة وبعد كده هيرد عليا عشان أتكلم مع مريم في الموضوع ونسألها الأول؛ وبعد كده يتقدملها"..
علي بفرح: "الله المستعان؛ وكمان يا أمي بافكر أكمل دراستي وأدخل جامعة مفتوحة؛ خصوصا إن مريم تعليم عالي كمان؛ على الأقل أبقى في مستوى تعليمها"..
والدتهم بفرح: "ده أجمل خبر سمعته في حياتي؛ يا رب يا ابني يحقق مطلبك ويسعدك"..
قبل يد والدته: "آمين يا أغلى أم في الدنيا"..
نظرت إلى حسناء وقالت: "طلعي الفستان أشوفه يا بنتي!!"
علي: "آآه صحيح؛ عايز أشوفه أنا كمان!!"
فتحت حسناء الشنطة وأخرجت منها الفستان؛ فنظرت له والدتها وهي تقول في انبهار: "يا الله! فستان جميل أوي ورقيق جدا؛ أنا ما توقعتش إنه يكون حلو كده؛ ما شاء الله"..
علي بدهشة: "فعلا جميل أوي؛ يا رب يرزقك بزوج صالح عن قريب يا سمسمتي وتلبسيه؛ هيبقى حلو أوي عليكي"..
والدتهم: "يا رب عن قريب"..
مدت يدها وأخرجت الطرحة والنقاب؛ ثم قالت: "دي طرحته؛ وده النقاب بتاع صفية!!"
مد علي يده وأخذه وهو يقول: "ما شاء الله اللهم بارك؛ عقبالك يا حسناء أما ربنا يمن عليكِ بارتداء النقاب؛ والله يا بنتي ده عزة وفخر وتاج على راس كل منتقبة"..
والدتهم وقد اغرورقت عيناها بالدموع؛ قالت بحنين: "نفسي أشوفك في بيت جوزك يا بنتي"..
ضغطت على أسنانها وقالت بغيظ: "ابقى لبسه لـمريم يا أخويا؛ وامشي يلا بأه؛ عايزة أنااااااااااام"..
علي بفخر: "طبعاً ده شرطي الأساسي؛ ربنا يقدم اللي فيه الخير؛ بس هي توافق على جوازي منها؟!"
حسناء بـثقة: "هتوافق يا ابني؛ وهتفرح كمان.!"
والدتهم: "قدموا بس المشيئة؛ وربنا يسهل كل الأمور"..
علي: "إن شاء الله يا أمي؛ صحيح هو فين بابا؟!"
والدته بابتسامة: "في الأوضة مُنتظرك؛ عامل ليك مفاجأة جميلة!"
علي بدهشة: "إيه يوم المفاجأت العالمي ده؟!!"
حسناء بضيق: "روح يلا عايزة أناااام بأه.!!"
علي بابتسامة: "ماشي؛ يلا تصبحي على خير"..
قالت وهي تتثاءب: "وأنت من أهل الخير"..
قبلت خد ابنتها: "تصبحي على خير يا سمسمة"..
قالت والنوم يداعب عينيها: "وأنتي من أهل الجنة يا ماما"..
******************
علي بابتسامة: "السلام عليكم يا راجل يا طيب.!"
والده بابتسامة: "وعليكم السلام؛ اتأخرت كده ليه يا ابني.؟! ده أنا قاعد أنام على نفسي"..
علي بزعل وتأنيب ضمير: "أنا آسف حقك عليا؛ تعالى يلا أساعدك تطلع السرير"..
والده بابتسامة: "لا يا ابني؛ أنا أصلاً مُنتظرك!!"
قال بتعجب: "صحيح أنا سمعت إن في مفاجأة؛ يا ترى إيه هي؟!"
أومأ برأسه إيجابا؛ ثم مد يده وأعطى علي بعض الأوراق..
علي باستغراب يقلب في الورق؛ ثم قال متسائلا: "ورق إيه ده يا والدي؟!"
والده بابتسامة: "اقرأ وأنت تفهم!!"
بدأ يقرأ بصوت خافت؛ ثم رفع رأسه بدهشة: "دي وديعة باسمي بمية ألف جنيه.؟!!!"
والده بفرح: "أيوه يا ابني؛ وأنت خلاص بلغت السن القانوني؛ ممكن تروح تاخدها في أي وقت"..
أعطى الورق لوالده وقال: "لا يا والدي؛ هدية مش مقبولة!
والده بحزن: "ليه يا ابني كده؟!"
اغرورقت عيناه بالدموع: "كفاية عليا رجوعك وحبك لينا ده مكفيني؛ ومش محتاج فلوس عشان أبرك وآخد بالي منك؛ أنا عملي ده وخدمتي ليك خالصة لوجه الله الكريم"
تساقطت من عينيه الدموع: "ياااااه يا ابني؛ أنا فخور بيك أوي؛ ربنا يسعدك؛ بس بردو ده ما يمنعش إنك تقبل الهدية من أبوك؛ ما تكسفنيش يا ابني؛ وبعدين أنت لازم تدور على عروسة بأه وتتجوز؛ والفلوس دي هتساعدك؛ بالله عليك يا ابني وافق"..
قال بابتسامة: "عشان بس ما تزعلش يا والدي؛ صحيح مش أنا لقيت العروسة أخيرا؟!!"
والده بسعادة: "أيوة كده فرح قلبي؛ يا ترى مين العروسة؟!
ظل علي يحكي لوالده ماذا حدث؛ وبعد قليل غفلت عينا علي؛ وقد لاحظها والده؛ فضحك وقال: "قوم يا علي نام عشان شغلك؛ تصبح على خير"..
تثاءب وهو مغمض العينين: "وحضرتك من أهل الخير"..
******************
نظر إليها بحزن وقال: "مالك يا حبيبتي؟ ليه دايما شايفك حزينة.؟"
حسناء بحزن وحيرة: "مش عارفة مالي؛ خليك معايا يا أسعد؛ اوعى تسيبني"..
أسعد بابتسامة وثقة: "عمري ما هابعد عنك أبدا؛ بس اهدي وماتخافيش أنا جنبك"..
التفتت له وهي ترتدي فستان زفاف وتدور حول نفسها بضحكات عالية؛ ويضحك أسعد ويوقفها ويمسك يديها ثم يقول بحب: "أنا مش مصدق نفسي؛ احنا فعلا كتبنا الكتاب واتجوزنا؟!! ده أنتي كنتي حلم صعب أوي"..
أمسك يديها ودار بها وضحكاتهم تتعالى وتتعالى؛ ثم قال بصوت عالٍ: "باحبببببببببببببك"..
وضعت يدها على أذنها؛ ثم قالت بصوت عالٍ: "إيه بتقول إيه؟! مش سامعة!"
اقترب من أذنيها وهمس قائلا: "باحبك؛ باحبك؛ بحبببببك.
وفجأة استيقظ على صوت آذان الفجر؛ ثم نهض وأسند رأسه على ظهر السرير بفرح؛ محدثا نفسه وهو في قمة سعادته: اللهم اجعله خير يا رب؛ رؤيا جميلة أوي؛ يا رب حققها وحسناء توافق على جوازي منها..
ثم نهض وتوضأ ونزل المسجد يصلي الفجر وظل يدعو ربه أن يحقق حلم حياته..
******************
(بعد مرور أسبوع)
علي بابتسامة: "حسناء أنا خلاص صليت كام مرة استخارة وقلبي مرتاح الحمد لله؛ عايزك تتصلي بمريم وتاخدي ميعاد تروحي لهم؛ اتكلمي معاها هي ووالدتها ونديلهم فرصة بردو يفكروا مع بعض"..
تنهدت بارتياح؛ ثم قالت بفرح: "هو ده الكلام؛ أيوة كدة يا عليوة؛ فرحت قلبي"..
والدتهم بسعادة: "ألف مبروك مقدما يا حبيبي"..
قال بفرح: "ربنا يبارك فيكي يا أمي".
والدته بقلق: "أخدت رأي أبوك يا ابني.؟"
أومأ علي برأسه إيجاباً: "طبعا يا أمي؛ أنا أنسى حاجة زي دي بردو؟!"
زينب باطمئنان: "الحمد لله يا ابني؛ ربنا يقدم اللي فيه الخير."
علي: "آمين يا رب"..
حسناء بجدية: "هاستأذنكم أنا بأه؛ هدخل أذاكر شوية؛ الامتحانات كمان كام يوم؛ ادعولي"..
والدتها برجاء: "ربنا ينجحك يا بنتي"..
رفع علي حاجبه: "لا ما هو النجاح مضمون؛ أنا عايز تقدير يا لمضة أنتي".
ابتسمت؛ ثم قالت بقلق: "الله المستعان"..
دخلت حسناء غرفتها وظلت مندمجة في المذاكرة؛ وبعد ساعة توقفت لتستريح قليلا ثم تعود للمذاكرة بعد قليل؛ تذكرت كشكول صفية؛ ثم قامت وأخرجته من حقيبتها وفتحته تتصفح به قليلا؛ لفت انتباهها عنوان خاطرة تسمى: (قَالوا عَنْ حِجَابي) وبدأت تقرأ..
<قَالُوا عَنْ حِجَابي خنقة وَحرّ .. اكشفي جمَالكَ وَوَري الكَُل
بَجيب عَلَى الركبة وَنَصُّ كَمْ .. أحمر خُدود وَفي عينك كُحل
بيني شِعرك وَياَ جَمَالك .. آآه مِن ضَحكَتها وَيا دلالها..!!
لِيه مَدَارية بَس جَمَالَكَ..؟!!
بَحتة قماشة مخبية عِنَا .. يلا شيلِيهَا وعيشي أيامك
وبِشبَابِكَ كيدي عزالك .. وَخَلي الحِجاب آخر أحلامك
اوعي تمشي على مزاجهم .. سيبك منهم وارضي ربك
الشيطان هيفضل يقولك .. اغضبي ربك وانسي صلاتك
فكرك يعني هتعيشي مرتاحة..؟!!!
بس خلاص وبلاش زن .. ولا في لسة كلام ممل
أقولكم بأه أنا الأهم .. تَاج عَلَى راسي وده الْمُهِم
مَلِكة وفخورة أنا بحجَابي .. ومش مهم عندي الكُل
رِضا ربَي هُوَ الأهم .. عندي الدُنيا دي مش مُهِم
هي الآخرة أكبر هَمي .. أصل هي أبقى وأهم
وَعِلى الصرَاط أمشي طريقي .. وَعلى بَاب الجنة ألقى أحبابي
وفي الجنة هاعيش حياتي .. وَسط أمهات المؤمنين سعادتي
قدوتي عَائشة ومريم وخديجة .. وقدام رسولي هفضل فخورة
صل الله عليه وسلم .. عشان في الدنيا نفذت كَلاَمَه
عليه أسلم بس نفسي .. وبرؤيته بكيت مكاني
نسيت كل الخنقة والحر..!!
أما أنتم يهديكم ربي
الشيطان فضل وراكم .. كل همه يضحك عليكم
بس راحت فين عقولكم؟!!
نسيتوا الله إزاي حبيبكم .. بكرمه وفضله عايشين في ضله
عايزين تمشونا على مزاجكم .. بس ويلكم من عقابكم
رضا ربنا هو هدفنا .. وفي الجنة نعيش حياتنا
راضيين بفخر نرضي رسولنا .. عزة وكرامة هو حجابنا>
(اعتصر قلبها ألما؛ واغرورقت عيناها بالدموع؛ فقد أحست أنها مذنبة؛ كلمات صفية أثرت عليها بالإيجاب؛ وها هي النتيجة.. بدأت بالتفكير فى تغيير مسار حياتها وتغيير ملابسها الضيقة..)
تمتمت حسناء محدثة نفسها: "ليه ما أبقاش زي صفية؟! ليه مش عايزة أرضي ربنا؟! ليه أنا عارفة إن لبسي ضيق وبيغضب ربنا وإنه حرام وبردو بلبسه وأقول ربنا يغفرلي بأه؟!! طيب لو أنا مت دلوقتي وربنا أخد روحي؛ يا ترى هادخل الجنة؛ ولا النار؟!!
لازم أعاند شيطاني؛ مش هسمح له يضحك عليا تاني؛ كفاااية لحد كده؛ كفايه ذنوب بأه.!!"
رفعت يدها بطريقة عفوية؛ ثم رددت: "اللهم ألهمني رشدي؛ وأعوذ بك من شر نفسي؛ اللهم تب علينا لنتوب"..
دخلت والدتها الغرفة ولم تشعر بها حسناء؛ ابتسمت بفرح شديد عندما سمعت حسناء؛ ثم قالت بابتسامة وفرح: "آمين يا رب العالمين؛ ربنا يتوب عليكي يا بنتي ويغفرلك ويثبت خطاكي"..
تفاجأت حسناء والتقطت منديلًا تجفف دموعها سريعا؛ ثم قالت: "ماما.؟! أنتي هنا من أمتى.؟! ما خدتش بالي خالص.!!"
والدتها بابتسامة: "من شوية صغيرين"..
حسناء بدهشة: "لابسة كده ورايحة على فين؟!"
والدتها: "هاروح أزور جارتنا أم محمد اللي فى الشارع اللي ورانا تعبانة شوية؛ وهاشتري شوية طلبات للبيت؛ وهاجي على طول"..
حسناء بزعل: "ألف سلامة عليها؛ ربنا يشفيها ويعافيها يارب".
والدتها: "آمين يا رب؛ أخوكي علي لسة ما جاش من الشغل؛ لما يجي حضري له الأكل؛ اوعي تنسي"..
حسناء بقلق: "وهتسبيني لوحدي مع بابا؟!!"
قالت بتعجب وفرح: "أخيرا قلتي بابا؟! وبعدين إيه المشكلة إني أسيبك لوحدك مع أبوكي.؟! بطلي دلع بأه!!"
تنهدت بقوة: "خلاص يا ماما؛ كده كده أصلا مش هاخرج من أوضتي؛ هقوم أصلي العشا وبعدين هافتح نت شوية وبعدين أرجع أذاكر تاني"..
قالت باهتمام: "ما تطوليش وتنسي نفسك والمذاكرة"..
حسناء بابتسامة: "لا ما تقلقيش"..
والدتها: "ماشي مش هاقلق؛ أما أشوف آخرتها إيه معاكي؛ عايزة تقدير امتياز؛ أنتي حرة بأه؛ يلا السلام عليكم؛ مش هاتأخر"..
حسناء بابتسامة: "الله يسلمك حبيبتي"..
(أغلقت حسناء باب غرفتها؛ وبعد أداء صلاة العشاء ذهبت على الفور وجلست أمام حاسبها؛ عندما فتحت صفحة الفيس بوك الخاصة بها وجدت مريم بعثت لها طلب صداقة؛ فقبلت الطلب وبدأت تتكلم معها عندما رأتها أون لاين..)
حسناء: "السلام عليكم؛ إزيك يا مريم.؟ وحشاني جدا والله"..
مريم بفرح: "وعليكم السلام؛ الحمد لله أنا بخير؛ وأنتي وحشاني جدا"..
حسناء: "أنا آسفة إني اتأخرت عليكي في قبول طلب الصداقة؛ من يومها مش فتحت نت؛ باذاكر بأه؛ خلاص الامتحانات كمان كام يوم؛ ادعيلي.!!"
- ولا يهمك يا حبيبتي؛ ربنا معاكي وبالتوفيق.
حسناء باهتمام: "بصي؛ أنا عايزة أرجع الكشكول؛ هاشوف يوم كده واتصل بيكي أقولك هاجي امتى عشان كمان عايزاكي في موضوع!"
مريم بدهشة: "تنوري في أي وقت؛ بس خير؟! موضوع إيه؟!"
-خير إن شاء الله, هتعرفي لما أجيلك و......
لم تستكمل كلامها؛ ارتعدت فجأة عندما سمعت صوت زجاج ينكسر بخارج الغرفة؛ فتحت باب غرفتها ولم تجد أحدًا في الصالة؛ ذهبت مسرعة إلى غرفة علي؛ وفجأة صرخت بصوت عالٍ وهستريا بكاء شديد؛ وارتعش جسدها بأكمله..!!
******************
****يتبع****
🔴🔴🔴🔴🔴🔴🔴🔴🔴🔴
🟣🟣🟣🟣🟣🟣🟣🟣🟣🟣
`البــ♡♡ــارت«24»`
وضعت يديها على أذنيها وظلت تصرخ بقوة وكأنها طفل صغير لم يتعلم الكلام بعد؛ رأت والدها ملقى على الأرض والدماء تسيل من رأسه؛ ذهبت إليه مسرعة؛ حاولت أن ترفعه قليلا وبدأت تمسح دماءه بكم إسدالها ودموعها تتساقط وتنادي عليه: يا بابا اصحى؛ اصحى يا بابا؛ أنا مسامحاك صدقني؛ اصحى بأه أرجوك؛ يعني بعد أما رجعت تسيبني تاني.؟!
وفجأة رن جرس الباب معلنا قدوم أحدهم فنهضت وهرولت مسرعة وفتحت الباب..
أسعد بهلع وخوف عندما رأى على يديها الدماء: "مالك يا حسناء في إيه؟!"
التقطت أنفاسها بصعوبة وقالت بصوت مبحوح: "بابا واقع على الأرض ومتعور".
جرى أسعد إلى الغرفة وحمل عمه حتى يأخذه إلى المستشفى؛ وقال: "ما تقلقيش خير إن شاء الله؛ خليكي هنا واقفلي الباب كويس"..
قالت ببكاء: "أنا هاجي معاك مش هاسيب بابا لوحده"..
وأقفلت الباب ونزلت معهم.
رأت جارتهم بالدورالأول أسعد وهو حامل عمه وحسناء تمشي بجانبهم تبكي؛ هرعت إليها وسألت بقلق: "في إيه يا بنتي؟! خير؟!"
بصوت مبحوح: "بابا وقع واتعور؛ يا خالة بالله عليكي لما ماما تيجي؛ قوليلها تتصل بأسعد"..
جارتها بقلق: "حاضر يا حبيبتى ما تقلقيش؛ خير بإذن الله".
(استقلوا السيارة؛ كانت حسناء مع والدها بالمقعد الخلفي؛ أسندت رأسه على فخذها وهي تغطي الجرح بمنديل وظلت تبكي طيلة الطريق؛ أما أسعد ظل يضغط "بكلاكس" تلو الآخر بطريقة عشوائية ليظهر للجميع أن معه حالة حرجة وهو قلق جدا وقلبه يعتصر ألما على عمه؛ وصلوا أخيرا إلى المستشفى حيث تم الاسراع به إلى غرفة العمليات؛ وظلت حسناء واقفة ترتعش لا تجف دموعها.)
ذهب إليها أسعد وهو ينظر في الأرض؛ ثم قال بحزن: "ما تقلقيش خير إن شاء الله؛ ادعيله بس, وأرجوكي بطلي بكاء وتعالي اقعدي ارتاحي شوية".
قالت بحزن وهي تلتقط أنفاسها بصعوبة: "أنا مش عايزة أقعد؛ أنا خايفة أوي على بابا؛ خايفة يا أسعد خايفة أوي؛ لو حصل له حاجة مش هاسامح نفسي أبدا"..
قال بحزن: "ما تخافيش, بإذن الله خير؛ علي وخالة زينب اتصلوا بيا وعرفتهم عنوان المستشفى؛ وهما جايين في الطريق دلوقتي"..
أومأت حسناء برأسها بالإيجاب وهمست: "ماشي"..
(بعد قليل وصل علي ووالدته؛ عندما رأتهم حسناء أسرعت إلى والدتها وارتمت في حضنها تبكي.)
والدتها بحزن تحاول أن تتماسك: "ما تخافيش يا حبيبتي؛ خير إن شاء الله".
نظر علي إلى أسعد ثم سأل بقلق: "مفيش دكتور يخرج يطمنا ولا حاجة.؟! أنا قلقان أوي".
ربت على كتفه: "سيبها على الله,خير بإذن الله"..
تنهد بقلق وهو يبتهل: "يا رب سلم؛ يا رب سلم".
نظرت حسناء إلى والدتها وقالت: "أنا كنت في أوضتي وسمعت صوت إزاز اتكسر بصوت عالي أوي؛ جريت على صوت الإزاز لقيت بابا واقع على الأرض وراسه عمالة تنزل دم؛ اتخضيت وما عرفتش أتصرف"...
صمتت قليلا لتلتقط أنفاسها وأكملت: "قلبي كان هيقف؛ فضلت أصحي فيه وأمسح الدم بكم الإسدال وضغطت عليه عشان يبطل نزيف لحد أما أسعد جه لحقنا؛ معرفش لو أسعد مكانش جه كان إيه حصل؛ كنت عاجزة مش قادرة أتصرف ولا أتحرك؛ أنا أكتشفت إني باحبه أوي يا ماما"..
احتضنتها وعيناها تتساقط منها الدموع: "خلاص اهدي يا حبيبتي؛ خير إن شاء الله".
بعد قليل خرج الطبيب من غرفة العمليات وقال: "الحمد لله يا جماعة,خيطنا الجرح وهو فاق الحمد الله, هو بس غاب عن الوعي من شدة الوجع"..
هتف الجميع بارتياح: "الحمد لله؛ ربنا كريم".
قال أسعد بقلق: "طيب يا دكتور ممكن نشوفه؟"
الطبيب بابتسامة: "هو هيخرج حالا وهيروح معاكم كمان؛ أهم شيء أنا كتبتله على علاج ومضاد حيوي لازم ياخده بانتظام عشان الجرح يلم بسرعة وما يحصلش فيه تلوث؛ وألف سلامة عليه؛ وأرجوكم خدوا بالكم منه بعد كده ما ينفعش يبقى لوحده"..
هز علي برأسه إيجابا وقال بامتنان: "حاضر يا دكتور؛ وشكرا لحضرتك؛ جزاك الله خيرا"..
الطبيب: "وجزاك مثله؛ عن إذنكم"..
الجميع: "اتفضل".
جلست حسناء على الكرسي وتنهدت بارتياح وقالت باطمئنان: "الحمد لله"..
******************
(ظلت مريم تكلم حسناء على الشات ثم عاودت الاتصال بها كثيراً حتى تطمئن عليها لكن دون جدوى.)
محدثة نفسها: "هي حسناء مش بترد ليه.؟! اختفت فجأة كده؛ بس الغريبة إن الشات لسة أون لاين, يا ترى في إيه؟!"
دخلت والدتها ضحكت وسألت: "بتكلمي نفسك يا مريم.؟!!"
مريم بابتسامة وقد ظهر على ملامحها بعض القلق: "حسناء كانت بتكلمني؛ وفجأة سكتت ومش بترد!"
والدتها: "يمكن النت فصل عندها"..
مريم: "لا يا ماما؛ هي أون لاين لسة".
والدتها بهدوء: "يمكن معلق ولا حاجة, ما تقلقيش خير إن شاء الله".
مريم بقلق: "دي حتى مش بترد على تليفونها!"
والدتها بابتسامة: "يمكن التليفون صامت أو مش جنبها أو يمكن نامت".
زفرت بضيق: "يمكن، على العموم بكرة إن شاء الله هاتصل بيها أطمن عليها؛ على فكرة كانت بتقولي عايزة تيجي ترجع الكشكول؛ وقالتلي إنها عايزاني في موضوع, يا ترى إيه؟!"
والدتها برزانة وهدوء: "بكرة تعرفي يا بنتي؛ يلا قومي نامي بأه عشان شغلك"..
مريم بابتسامة: "حاضر؛ تصبحي على خير يا ماما"..
والدتها بابتسامة: "وأنتي من أهله يا حبيبتي".
******************
(خرج والدهم من غرفة العمليات؛ نهض الجميع ودخلوا معه غرفة الإفاقة باستثناء حسناء؛ ظلت جالسة مكانها تبكي.)
قبل علي يد والده: "ألف سلامة عليك يا والدي؛ جات سليمة الحمد لله"..
قال بتنهيدة متعبة: "الحمد لله".
أسعد بقلق: "لا بأس طهور إن شاء الله يا عمي".
ثم قالت زينب: "الحمد لله؛ ربنا يتم شفاك على خير".
علي بدهشة: "هو إيه اللي حصل يا والدي.؟! إزاي وقعت بالطريقة دي واتعورت كده؟!"
قال وهو ينظر لأسعد: "لما اتصلت بيا يا أسعد وقولتلي إنك جاي في الطريق؛ كنت نايم على السرير، حاولت أقوم أقعد على الكرسي؛ سندت على الترابيزة لكن ما أعرفش إيه حصل؛ وقعت والترابيزة وقعت عليا بلوح الإزاز؛ بس أنا فرحان أوي يا ولاد إني حصلي كده.
نظر الجميع بتعجب وسألوا في نفس واحد: "فرحان! إزاي؟!"
تنهد واستكمل كلامه بابتسامة: "أنا قبل ماأغيب عن الوعي؛ لقيت حسناء جريت عليا وفضلت تقولي أنا مسمحاك؛ اصحى يا بابا؛ ومسحت الدم اللي كان نازل على وشي؛ بعدها ما حستش بحاجة خالص"..
يستكمل أسعد: "بعدها أنا وصلت ولقيت حسناء بتبكي وتصرخ ولقيت إيدها كلها غرقانة دم؛ جريت عليك وأخدتك ونزلنا على المستشفى؛ الحمد لله حصل خير."
نظر والدهم يمينا ويسارا يبحث عن حسناء بالغرفة ثم سأل بقلق: "هي حسناء ما جاتش؟! فضلت في البيت؟!"
التفت الجميع ولاحظوا عدم وجود حسناء.. علي بتعجب: "صحيح هي فين حسناء؟!"
والدته بحزن: "حسناء قاعدة في الاستراحة برة".
هم علي بالخروج: "أنا هاروح أنادي عليها"..
خرج إلى حسناء وسألها بدهشة: "إيه يا حسناء ما دخلتيش ليه؟!"
حسناء بخجل: "محرجة من نفسي أوي يا علي؛ وبصراحة مش عارفة أتكلم مع بابا إزاي!!"
قال بابتسامة بعد أن أمسك يدها: "قومي تعالي وأنا هاقولك إزاي!"
أفلتت يدها من يد علي وهي تقول: "استنى بس يا علي هافهمك".
أومأ علي برأسه نافيا وأمسك يدها ودخل الغرفة صائحا: "يا والدي حسناء مكسوفة؛ بتقولي مش عارفة أتكلم مع بابا إزاي"..
(احمر وجه حسناء خجلا ودق قلبها وظلت تتسارع دقاته؛ ثم تبادل علي النظرات مع أسعد وزينب وإيماءة اتفاق أن يخرجوا من الغرفة؛ ثم ترك يد حسناء وانسحب للخارج وأغلق الباب.)
والدها بابتسامة حنين: "تعالي يا حسناء؛ عايز أقولك حاجة؛ قربي هنا!"
اقتربت بخجل وما زالت تتساقط من عينيها الدموع؛ وعندما اقتربت همس: "سامحتيني يا بنتي؟!"
حسناء ببكاء: "المهم تكون بخير"..
كرر نفس السؤال: "ما تهربيش من السؤال ردي عليا!"
لم تجف عينيها من الدموع وهي تقول: "لما شوفتك واقع على الأرض ومتعور والدم نازل اترعبت عليك أوي؛ آآه خفت؛ أنا ما صدقت إنك رجعت وسطنا حتى لو كنت باحسسك إني مش عايزاك بس من جوايا ببكي ومحتاجة لحضنك"..
وارتمت بحضنه وهي تبكي بشدة..ربت على كتفها وقال:
"ياااااه يا بنتي؛ ما تعرفيش كنت محتاج للحضن ده أد إيه؛ أنا أسعد واحد في الدنيا إنك سامحتيني؛ أوعدك إني أعوضك عن كل لحظة كنت بعيد فيها عنك"..
حسناء بابتسامة حزينة:"اوعى تسيبنا تاني يا بابا؛ أرجوك".
والدها بتنهيدة متعبة: "أسيبكم.؟! طب ده أنا ما صدقت أرجعلكم, ربنا يتقبل توبتي ويسامحني"..
دخل الجميع الغرفة، عندما رأتهم زينب فرحت كثيرا ثم تنهدت بارتياح وقالت: "ياااااه أنا كده ارتحت؛ ده أنا كنت شايلة هم كبير أوي بسببك يا حسناء"..
احتضنت حسناء والدتها وقبلتها: "سامحيني يا ماما تعبتك معايا"..
قالت بابتسامة: "مسمحاكي يا بنتي, ربنا يخلينا كلنا لبعض".
أسعد بابتسامة فرح: "يلا يا جماعة نروح ونكمل كلامنا هناك أحسن الوقت اتأخر أوي؛ يلا يا علي همتك معايا نشيل والدك لحد العربية".
ربت علي على كتف أسعد بكل ثقة وقال بمرح: "وسع كده يا عم؛ أنت قادر تشيل نفسك؛ أنا خلاص اتعودت أشيله لوحدي كل يوم!"
أسعد بدهشة: "تشيله كل يوم ليه؟!"
قال عمه بابتسامة: "علي كل يوم بياخدني معاه المسجد نروح نصلي الفجر"..
أسعد في ذهول وفرحة: "الله أكبر؛ الحمد لله دائما وأبدا؛ جدع يا علي ربنا يجعله في ميزان حسناتك"..
(ذهب الجميع للبيت وبعد أن وصلوا استأذن أسعد للذهاب لبيته؛ وظلت حسناء تجلس بجانب والدها.)
ضغط علي على أسنانه بغيظ وقال: "أنا كده هاغير, قومي بأه روحي أوضتك نامي وسيبيني أقعد جانب بابا حبيبي"..
قالت وهي تتثاءب: "أنا هقوم بس عشان أنام, مش عشانك يعني".
علي بسخرية: "أحسن بردو".
والدهم: "تصبحي على خير يا بنتي".
حسناء بابتسامة: "وحضرتك من أهل الجنة".
(دخلت حسناء غرفتها؛ نظرت في هاتفها حتى تعرف كم الساعة الآن؛ وجدت مريم اتصلت بها أكثر من مرة؛ تذكرت وقتئذ أنها كانت تكلمها وقت وقوع الحادثة.)
ثم قالت محدثة نفسها وهي تتثاءب: "هاتصل بيكي بكرة بأه يا مريم؛ مش قادرة أتصل دلوقتي وكمان زمانك نايمة"...
******************
وجاء صباح يوم جديد ينبعث منه الأمل، بعد أن استيقظت حسناء في العاشرة صباحا ذهبت وتوضأت وصلت صلاة الضحى؛ وبعد ذلك دخلت المطبخ فوجدت والدتها تحضر الإفطار..
انحنت على خد والدتها وقبلتها ثم قالت بابتسامة: "صباح الورد يا ورد".
قالت بفرحة تظهر على نبرات صوتها: "صباحك سكر يا سكر؛ صاحية بدري ليه؟!"
أومأت برأسها بابتسامة: "نمت ساعتين قبل الفجر وقمت صليته ورجعت عشان أنام تاني ما عرفتش وفضلت صاحية"..
قالت بقلق: "بس ليه نومك بأه كله قلق كده؟!"
تنهدت بحيرة وقالت: "مش عارفة؛ وبعدين كنت بافكر في حاجة كده فـقلقت وما عرفتش أنام"..
والدتها بدهشة:"حاجة إيه دي اللي طيرت النوم من عينك؟!"
حسناء بابتسامة: "بافكر أغير لبسي خالص والبس النقاب"..
تركت ما بيديها ونظرت لحسناء بذهول ثم قالت في دهشة: "نقااااااااااب؟!! بتتكلمي جد يا بنتي.؟!"
أومأت برأسها إيجابا ثم قالت: "قلبي بيحن له أوي يا ماما؛ حاسة إنه طهارة وعفة وحاسة إن حياتي هتتغير لما ألبسه للأحلى"..
والدتها بفرح: "وكمان هتقتدي بأمهات المؤمنين؛ يا ريت تاخدي الخطوة دي؛ ربنا يثبتك يا بنتي"..
حسناء بابتسامة: "يا رب يا ماما عن قريب؛ الله المستعان؛ بس ادعيلي آخد قرار بجدية عشان لما ألبسه ما افكرش أقلعه تاني ويبقى حرام عليا"..
قالت بحماس: "بإذن الله يا بنتي؛ بس جددي دايما نيتك إنك هتلبسيه لوجه الله وبنية إنك ترضي ربنا"..
حسناء: "بإذن الله يا ماما؛ قوليلي أساعدك في إيه عشان هاخد الفطار وأفطر مع بابا"..
نظرت بفرح: "خلاص أنا خلصت؛ خدي الصنية بالأكل؛ وما تنسيش تفكريه ياخد العلاج"..
حسناء بثقة: "طبعا مش هانسى؛ مش هتيجي تفطري معانا.؟!"
والدتها: "أنا سبقتكم من زماااان.!"
حسناء بابتسامة: "ألف هنا يا حبيبتي"..
دخلت حسناء الغرفة لوالدها ثم قالت: "صباح الخير يا بابا؛ أنا جايبة الفطار عشان نفطر سوا!"
والدها بابتسامة: "صباح الخيرات؛ هو أنا كنت أطول أفطر معاكي؟! طبعا موافق ونفسي مفتوحة جدا"..
وبعد الإفطار, أعطت حسناء الدواء لوالدها..
-قوليلي يا بنتي؛ مش محتاجة تفهمي حاجة في أي مادة.؟!
حسناء بسخرية: "قول أنتي فاهمة إيه؟!"
والدها بتعجب: "بتتكلمي جد؟!"
حسناء بابتسامة: "لا طبعا؛ بس في بعض حاجات واقفة قدامي ومها ربنا يكرمها كانت بتفهمهالي بس هي بردو مش فاهمة النقط دي"..
والدها بحماس: "طيب إيه رأيك تيجي أنتي ومها أراجع معاكم النقط اللي مش فاهمينها؟!"
حسناء بفرح: "يا ريت, خلاص أنا هاروح اتصل بمها واتفق معاها؛ ونبلغ حضرتك بالميعاد"..
- تمام؛ اتفقنا.
قالت بابتسامة: "تحب تشرب شاي أو أي حاجة سخنة أعملها لحضرتك؟!"
هز رأسه نافيا: "لا يا بنتي؛ ممنوع من الشاي".
ثم أشار بيده إلى الدولاب وهو يقول: "افتحي يا بنتي الدولاب؛ هتلاقي شنطة لاب توب هاتيها"..
ذهبت وفتحت الدولاب ثم قالت بدهشة: "هو حضرتك عندك لاب توب يا بابا؟!!"
والدها بابتسامة: "أيوة؛ بس ما بقتش محتاجه خلاص؛ خديه يا بنتي؛ ده هدية مني ليكي"..
قالت بإحراج: "لا شكرا يا بابا؛ أنا عندي كمبيوتر"..
والدها بتكشيرة: "يعني هتكسفيني؛ ما تعمليش فرق بينا يا بنتي؛ لما أبوكي يديكي حاجة؛ تاخديها على طول"..
حسناء بابتسامة: "حااااااااضر؛ بصراحة هدية جميلة أوي؛ شكرا يا بابا؛ هروح بأه أفتحه وأجربه على النت جوا؛ ويا رب يشتغل ما يبقاش لسة عايز نسخة وبرامج"..
والدها: "ما تقلقيش؛ هو فيه كل البرامج وكنت بادخل منه نت كمان"..
حسناء بدهشة: "كنت بتفتح نت؟!!"
والدها: "أنتي فاكراني كبير ولا إيه؟؟ ومش بافهم فيه.؟ ده أنا عندي فيس بوك كمان!"
عقدت حاجبيها ثم قالت بتعجب: "بجد؟!!! طب قولي اسمك إيه على الفيس عشان أضيفك عندي"..
والدها بجدية: "لا؛ ما أنا كنت عندك فعلا".
قالت بتعجب: "عندي.؟! إزاي؟! "
والدها: "هاقولك وأمري لله؛ فاكرة اسم (توبة رجل) اللي كان بيبتعتلك رسايل.؟!"
وضعت يدها على خدها وهي تقول في ذهول: "هو أنت (توبة رجل)؟ يا خبر؛ إزاي ما جاش في بالي.؟! ده أنا فضلت أفكر كتير يا ترى مين ده!"
والدها بحزن: "كان نفسي أعرف أخبارك يا بنتي؛ وأطمن عليكي".
حسناء بحيرة: "طب عرفت إزاي إيميلي؟!!"
والدها بابتسامة: "بصراحة من أسعد."
رفعت حاجبها وقالت بتعجب: "غريبة! أسعد يعرف إيميلي إزاي؟!"
والدها: "مش هو ضايف زياد عنده؛ وأنتي عند زياد.؟ جابك من عنده؛ مش محتاجة تفكير"..
هزت رأسها وقالت: "أيوة صح فعلا, عمري ما أخدت بالي إن أسعد صديق عند زياد!"
والدها بابتسامة: "بس أنتي بتكتبي كويس جدا؛ أول لما دخلت صفحتك ولقيت قصايدك والخواطر فرحت أوي؛ بصراحة أنا فخور بيكي أوي؛ بس...."
قاطعته: "بس إيه؟!"
والدها بحزن: "لما قرأت الخاطرة اللي كنتي كتباها عشاني بكيت كتير أوي"..
ربتت على كتف والدها وقالت بحزن: "خلاص بأه يا بابا؛ مش احنا اللي فات مات والمسامح كريم.؟!"
والدها بفرح: "ماشي خلاص".
قالت بدلع: "ربنا يخليك لينا يا رب أنت وماما؛ أنا هاروح بأه أجرب اللاب توب واتصل بمها؛ ولا رجعت في كلامك؟!"
والدها بضحكة عفوية: "لا طبعا؛ يلا روحي"..
خرجت حسناء من غرفة والدها؛ ودخلت سريعا إلى غرفتها وفتحت اللاب توب؛ واذا بالهاتف يرن..
تمتمت محدثة نفسها بصوت خافت: "يووووه هو ده وقته.؟! أما أقوم أشوف مين بيتصل؛ دي مها؛ والله بنت حلال يا ميهو"..
حسناء بحنين: "وحشتيني أووووووووي يا ميهو".
مها بتكشيرة: "السلام عليكم".
حسناء بدهشة: "وعليكم السلام؛ مال صوتك يا بنتي؟ خير؟!!"
مها بزعل: "لو كنت وحشتك كنتي سألتي عليا؛ أنا زعلانة منك أوي!!"
قالت بتكشيرة: "سامحيني؛ والله حصلت حااااااجات كتيرة شغلتني خالص؛ ما تزعليش بالله عليكِ لو عرفتي مش هتزعلي".
مها بقلق: "خير يا حبيبتي؟ مالك؟ طمنيني عليكي"..
قالت بسعادة وفرح قد ظهر على نبرات صوتها: "أنا وبابا اتصالحنا يا ميهو؛ أنا فرحااااانة أوي واكتشفت إني باحبه جدا".
قالت بتعجب وسعادة في نفس الوقت: "أنا مش مصدقة نفسي؛ ياااااه؛ أخيرا؛ ده أجمل خبر سمعته في حياتي؛ بس احكيلي بالتفصيل إيه حصل؟!"
- لا؛ ده موضوع كبير لما تيجيلي هحكيلك كل حاجة.
مها بتكشيرة: "أنا بجيلك كتير؛ وأنتي مش بتعبريني؛ تعالي أنتي يا أختي".
ضحكت بسخرية ثم قالت: "وأنتي اللي هتيجي على طول؛ حظك كده بأه أعمل إيه؟!"
ارتسمت على وجهها الحيرة وقالت: "مش فاهمة؛ وهاجي على طول ليه بأه؟!"
حسناء بهدوء: "عشان بابا هيذاكر لنا احنا الاتنين النقط اللي احنا مش فاهمينها خالص دي؛ براحتك أقوله إنك مش جاية وعيدي السنة عادي يعني".
مها بجدية: "بعد الشر يا أختي؛ ده أنا هاجي في طياااااارة".
حسناء بضحكة عفوية: "خلاص ماشي خلينا نبدأ من النهاردة؛ وكمان عايزاكي تيجي معايا بكرة مشوار ضروري".
مها بدهشة: "مشوار إيه؟!"
حسناء بابتسامة: "يا ستي هنروح أنا وأنتي نخطب لعلي؛ إيه رأيك؟"
مها بفرح: "يا سلام هو ده الكلام؛ موافقة طبعا هاجي معاكي؛ يا ترى مين العروسة؟!"
حسناء: "مش هتصدقي!!"
مها بإلحاح: "قولي بأه مين؟!"
قالت بابتسامة: "طلعت مريم أخت صفية بتشتغل مع علي في الشركة, وهنروح أنا وأنتي أعرفك عليها وافتح معاها الموضوع وأسيبها تفكر ولما توافق بإذن الله نتفق على ميعاد نروح كلنا نطلب إيدها رسمي".
مها بـذهول: "يا الله! إيه المفاجأت الجميلة دي؟ ربنا يقدم اللي فيه الخير".
حسناء بابتسامة: "آمين يا رب؛ ها قوليلي هتيجي الساعة كام؟!"
مها: "خلاص هاجيلك الساعة أربعة ناخد الدرس وبعدين نتفق هنروح بكرة امتى؛ ماشي؟"
حسناء: "تمام؛ هانتظرك ما تتأخريش بأه".
-مش هتأخر بإذن الله؛ مع السلامة.
-الله يسلمك.
(أغلقت الهاتف وبدأت بفتح اللاب توب وهي سعيدة جدا؛ وبدأت تكتب رسالة لمريم تشرح لها ما حدث البارحة وبلغتها بأنها سوف تزورها غدا؛ ثم دخلت صفحتها وبدأت تكتب ما شعرت به من سعادة.)
<الحب في الله أجره كبير أوي عند ربنا؛ لما تحبي الناس ويبقى بينكم ود ورحمة؛ لما تعيشي وقلبك عامر بالحب وبعيد عن أي بغض وغل..
عشان تلاقي الحب منهم لازم تحبيهم الأول؛ قال الله عز وجل: "المتحابون في جلالي لهم منابر من نور يغبطهم النبيون والشهداء".>
بعد أن انتهت ذهبت إلى محرك البحث وبدأت تبحث عنه..
تمتمت محدثة نفسها: "يا ترى كاتب اسمك أسعد ولا كاتب إيه؟!.. أيوة كده؛ أهو أسعد المنياوي؛ وكمان حاطط صورتك.؟!
وفجأة وصل إليها إشعار بأن أحدًا علق على خاطرتها القصيرة التي كتبتها منذ قليل؛ نظرت في ذهول قائلة.....
******************
****يتبع****
🔴🔴🔴🔴🔴🔴🔴🔴🔴🔴
🟣🟣🟣🟣🟣🟣🟣🟣🟣🟣
`البــ♡♡ــارت«25»`
(أنصحك تكتبي عن حسن الخلق وتقتدي به؛ وتعرفي تتعاملي مع الناس باحترام؛ ما ينفعش تكتبي كلام جميل زي ده وأنتي بتتعاملي مع غيرك بكبرياء وغرور.)
قرأت في ذهول ثم حدثت نفسها: "إيه التعليق ده؟!! ومين حسام نور الدين ده؟!! ده بيتكلم كأنه يعرفني؛ أما أكبر صورة بروفايله دي, تقريبا حاطط صورته".
استكملت كلماتها بدهشة واتسعت عيناها: افتكري يا حسناء شفتي الشكل ده فين, مش غريب عليا خالص! يا ترى شفته فين؟!! آآآه؛ ده زميلي في الكلية اللي حصل معاه الموقف إياه لما قلتله ما كنتش أعرف إن نظرك ضعيف؛ يا نهار أبيض حقه والله ياخد عني الفكرة دي؛ طب أرد عليه ولا أعمل إيه؟!! مش متعودة أرد على شباب كتير؛ أنا جاتلي فكرة أكتب مقولة صغيرة كده عن حسن الخلق وفيها اعتذار غير مباشر وهو يفهمه لوحده؛ طب أكتب إيه؟!! أنا الكلمات كلها اتمسحت من عقلي بسبب تعليقة ده؛ يا الله؛ اللهم ألهمني رشدي وأعوذ بك من شر نفسي.
بدأت تكتب حسناء على صفحتها بكل ثقة:
<البنت المسلمة هي اللي بتصنع من نفسها عزة نفس وكرامة؛ هي اللي بتفضل غالية بحجابها اللي بيتوج راسها؛ هي اللي بتواضعها بتخلي الكل يحبها لأنها بتحافظ على قلبها ما يدخلش فيه الغل والكره؛ بتحفظ قلبها وتدخل فيه الحب وتبعد عنه أي كبر وغرور؛ دايما بإسلامها وحبها لله ربنا بيزرع الحب والحنان والطيبة في قلبها الأبيض لأنها حبت غيرها عشان كده ربنا عوضها بحب الناس ليها..
عشان كده لو أي بنت فينا حاسة إن مفيهاش الصفات والمميزات دي لازم تراجع نفسها؛ مش عيب إننا نغلط العيب إننا نستمر في الغلط؛ خليكي مثل أعلى وقدوة حسنة لأخواتِك وأصدقائك في الله وبنات المسلمين..
أوقات فعلا بنغلط بس أكيد بدون قصد؛ باعتذر لأي إنسان أخطأت في حقه بقصد أو بدون قصد؛ يا رب قدرني أن أكون كما تحب أن أكون.>
بعد أن انتهت حسناء حدثت نفسها: "أعتقد بأه كده رسالتي وصلت لزميلي بطريقة غير مباشرة".
وصل لها إشعار آخر على هذه المقولة...
حسام نور الدين: "مش عيب إننا نعترف بغلطنا؛ الرسالة وصلت، جزاكي الله خيرا".
تمتمت بابتسامة: "المقولة جابت نتيجة؛ الحمد لله، أما أقفل بأه وأقعد أذاكر شوية على ما مها تيجي"..
******************
محدثا نفسه: "البنت دي فعلا محترمة؛ يعني لو كانت قليلة الذوق زي ما أنا كنت فاكر؛ كانت ردت على تعليقي وحش؛ لكن أسلوبها ده بيقول إنها مكانتش تقصد إهانتي؛ خلاص بأه يا حسام البنت عملت اللي عليها واعتذرت"..
قالت من وراء ظهره: "يا ترى مين واخد عقلك كده يا سي حسام؟!"
انتبه حسام والتفت إلى أخته وهو يقول بابتسامة: "حسناء"..
ظهرت على ملامحها الدهشة وقالت: "حسناء مين؟!! أنت وقعت ولا إيه؟"
ضحك بصوت عالٍ: "يخرب عقلك؛ وقعت مين يا بنت أنتي؛ يلا روحي ذاكري؛ ما بقاش فاضل على امتحاناتك إلا أسبوعين وعايزك تجيبي مجموع كبير يدخلك طب إن شاء الله"..
قالت بابتسامة: "قول يا رب وما تضيعش الموضوع؛ مين حسناء دي؟ وعرفتها إزاي بأه؟! وأدي قاعدة مش هاقوم إلا لما تحكي كل حاجة بالتفصيل الممل كمان"..
حسام بحيرة: "فاكرة البنت اللي أهانت كرامتي من فترة لما طلبت إني أقعد مكانها, وكلمتني وحش ساعتها, وبعدين جاتلي الكافيتريا تعتذر؛ أتاريها كانت جاية تتريق عليا؟"
رفعت حاجبها وقالت: "أيوة فاكرة, مالها بأه؟!"
قال بتنهيدة ارتياح: "سألت عليها بنت زميلتنا وقالتلي دي حسناء المنياوي وبصراحة شكرت فيها جدا, وقالتلي إنها عاملة صفحة على الفيس بتكتب فيها خواطر باسمها".
قالت بتعجب: "كمل؛ وبعدين.؟!"
نظرات حيرة ترتسم على وجهه: "بحثت على اسمها وبقيت متابعها على طول؛ هي مكانتش بتفتح كتير؛ ومن شوية لقتها فتحت وكتبت خاطرة علقت عليها؛ بصي كده علقت قلت إيه"..
تمتمت بصوت خافت ثم نظرت له بجدية: "يا نهار أبيض, أنت أهنتها خالص, ده تلاقيها لما تشوف تعليقك ده هتهزقك وتبهدلك؛ الحق امسح التعليق ده بسرعة"..
قهقه بصوت عالٍ وقال: "بالعكس؛ هي فعلا شافت التعليق ومن احترامها ما ردتش خالص؛ بس نزلت مقولة بعد دقايق من تعليقي وفيها اعتذار لو كانت أساءت لأي إنسان؛ وطبعا أكيد تقصدني!!"
عقدت حاجبيها وقالت بامتنان: "بجد.؟! هو فين كلامها ده.؟! وريهولي كده"..
أشار بالماوس على كلمات حسناء: "أهو يا ستي"..
هزت رأسها وقالت في ثقة: "البنت دي بجد محترمة جدا ما شاء الله عليها؛ ما حبتش ترد على تعليقك وكتبت مقولة وفيها اعتذار غير مباشر؛ برافو عليها"..
حسام بندم: "وأنا اللي كنت ظالمها.!!"
ربتت على كتفه: "ولا ظلم ولا حاجة, ده مجرد سوء تفاهم وراح لحاله بعد اعتذارها؛ كبر دماغك بأه وما تحاولش تضايقها تاني بتعليقاتك"..
حسام بابتسامة: "أكيد هاعمل كده؛ لأنها ما تستاهلش إني أضايقها؛ بصراحة ربنا يجازيها خير ويهديها ويهدينا جميعا"..
******************
-السلام عليكم؛ وحشتيني أوي يا ميهو؛ كده متسأليش بقالك أسبوع.؟!
رق قلبها عندما سمعت صوت زياد؛ ثم قالت بحنين: "وعليكم السلام؛ سيبتك تاخد فرصة تفكر"..
زياد بحزن: "حتى لو كده بردو؛ حتى اطمني عليا.!!"
مها بهدوء: "أنا آسفة جدا؛ والله قلبي كان واجعني عليك جدا؛ بس قلت أنت لما تهدى هتتصل بيا"..
تنهد بقوة وقال: "خلاص حصل خير؛ المهم أنتي عاملة إيه؟! احكيلي"..
مها بجدية: "الحمدلله؛ قولي فكرت وأخدت قرار ولا لسة؟"
همس بصوت خافت: "مش هاقولك إلا لما تفكي التكشيرة دي"..
مها بابتسامة: "يلا قول بأه؛ ده أنا عندي ليك كام مفاجأة جميلة جدا؛ بس مش هاقول إلا لما تقول أنت الأول"..
زياد بابتسامة وجدية: "بصي يا مها؛ بصراحة آخر مرة كلامك فوقني من معصية كبيرة وهي عقوق الوالدين؛ والحمد لله فضلت أدعي ربنا يغفرلي ويهديني؛ وخلاص أنا قررت بعد أما أقفل معاكي هاتصل بوالدي وأتكلم معاه".
هللت بفرح؛: "الله أكبر؛ الحمد لله يا رب"..
زياد بضحكة عفوية: "أد كده فرحانة؟!!"
ظهرت على نبرات صوتها السعادة: "فرحانة جدا؛ ده أنا هاصلي ركعتين شكر لله"..
اغرورقت عيناه بالدموع؛ ثم قال بصوت خافت: "عارفة يا مها؟ أنا سعيد جدا بيكي؛ وباحمد ربنا كل يوم إنه رزقني بزوجة زيك"..
مها بخجل: "وأنا باحمد ربنا إنه رزقني بزوج صالح زيك"..
زياد بابتسامة: "قوليلي بأه؛ إيه هي المفاجأت الجميلة دي؟!
(بدأت تحكي له ما حدث لوالده وماذا فعلت حسناء ومدى تحسن العلاقة بأبيها؛ ثم حدثته عن مريم أخت صفية وأن علي سيطلب يدها للزواج.)
قال في ذهول: "لا إله إلا الله؛ سبحانك ربي ما أعظمك؛ شفتي يا مها تدبير ربنا وحكمته؟ والدي يقع ويتعور وحسناء تحاول تسعفه ويرجع الحب في قلبها تاني له؛ يا الله"..
قالت بفرح: "سبحان الله؛ أنا لما حسناء حكت لي ماكنتش مصدقة؛ الحمد لله"..
قال بدهشة: "وموضوع مريم إنها تطلع أخت صفية وبتشتغل في نفس شركة علي ده بردو رزق وتدبير من ربنا؛ أنا فرحان جدا عشان علي؛ ربنا يوفقه ويسعده؛ هو تعب معانا أوي طول السنين اللي فاتت؛ ربنا يجبر بخاطره ومريم توافق على الزواج"..
قالت بدلع: "أنا وحسناء هنروح بكرة لمريم ونتكلم معاها بإذن الله"..
ضحك بعفوية: "هتعملوا فيها بأه حماوات.؟!"
مها بابتسامة: "آآه؛ ونديها بندق تكسره بأسنانها وكده يعني"..
ضحك بصوت عالٍ وقال: "دمك زي العسل؛ يلا ربنا يقدم اللي فيه الخير"..
قالت باستعجال: "يلا بأه اقفل عشان هاروح عندكم كمان شوية؛ عشان عمو عبد الرحمن هيديني أنا وحسناء درس؛ أئأ أئأ.!!"
زياد بدهشة: "كمان؟ إيه الهنا ده كله؟ يعني مالكيش حجة أنتي وحسناء امتياز وما ينفعش أقل من كده؛ مفهوم؟!!"
مها بثقة: "طبعا؛ يلا هاقفل بأه عشان أحضر نفسي"..
زياد بابتسامة: "اتفضلي, وخدي بالك من نفسك، وأول لما توصلي عندنا رني عليا عشان أطمن عليكِ، مفهوم؟!"
مها بحب: "حاضر؛ السلام عليكم"..
-وعليكم السلام..
******************
مها بابتسامة: "ألف سلامة عليك يا عمو؛ لا بأس طهور إن شاء الله"..
والد زياد بامتنان: "الحمد لله يا بنتي؛ أنتي عاملة إيه؟ ووالدك كيف أحواله؟ وحشني أوي والله"..
-الحمد لله يا عمو بخير؛ وبابا كويس الحمد لله؛ ما يعرفش اللي حصل؛ بس هاقوله وهخليه يجي لحضرتك"..
هز رأسه نافيا: "لا يا بنتي؛ ما تتعبهوش وتقلقيه عليا؛ أنا هابقى اتصل بيه"..
حسناء بجدية: "يلا بأه ناخد الدرس يا بابا"..
والدها بابتسامة: "ماشي اتفضلوا اقعدوا يا بنات وصحصحوا معايا كده؛ عايز تركيز"..
مها وحسناء بابتسامة وفي نفس واحد: "حاضر كُلنا أذان صاغية؛ اتفضل اشرح واحنا هنفهم على طول"..
(بعد مرور ساعة انتهى الدرس وفجأة رن هاتف مها.)
مها بدهشة: "إيه يا زياد نسيت تقولي حاجة ولا إيه؟! رصيدك كده هيخلص!!"
زياد بجدية: "أنتي جانب بابا يا مها؟!!"
قالت بسعادة: "أيوة؛ لسة مخلصين الدرس حالا, خير في حاجة؟!"
زياد بثقة: "كل خير إن شاء الله؛ ممكن تعطي التليفون لبابا؟!!"
أعطت مها الهاتف لوالده: "يا عمو؛ زياد عايز يكلم حضرتك"..
قلق كثيرا، اعتقد أن زياد سوف يصرخ في وجهه؛ أخذ الهاتف: "السلام عليكم؛ إزيك يا ابني.؟"
اغرورقت عيناه بالدموع وقال: "وعليكم السلام؛ عايز أقول لحضرتك تلات حاجات؛ ممكن تسمعني؟"
والده بقلق ودهشة معا: "اتفضل يا ابني!"
زياد بحب: "أولا: أنا آسف على رد فعلي الخاطئ المكالمة اللي فاتت..
ثانيا: ألف سلامة على حضرتك؛ وربنا يتم شفاءك على خير..
ثالثا بأه وده الأهم: أنا باحبك أوي وكنت مشتاق لحضرتك من زمان أوي؛ ويا ريتني كنت عندك دلوقتي كنت أخدتك بالحضن"..
بكى والده بصوت عالٍ وتساقطت الدموع من عينيه؛ وقال بفرح: "وأنا باحبك أوي؛ وكنت مشتاق لك ونفسي أشوفك أوي؛ ربنا يجبر بخاطرك يا ابني زي ما فرحتني بكلامك الجميل ده"..
قال ببكاء وحنين: "أنا هنا حاسس إني لوحدي كان نفسي أبقى معاكم أوي؛ الغربة وحشة أوي يا بابا"..
والده بحنين: "معلش يا ابني اصبر وربنا معاك يخفف عنك ويصبرك على غربتك"..
زياد بابتسامة: "يا رب يا بابا؛ أسيبك بأه عشان أكمل شغل وهاحاول اتصل بحضرتك على طول بإذن الله أطمن عليك".
والده بفرح: "كتر خيرك يا ابني؛ خد بالك من نفسك؛ في رعاية الله".
- الله المستعان؛ السلام عليكم.
-وعليكم السلام.
(أغلق الهاتف وأعطاه لمها؛ ثم اتفقت حسناء مع مها على موعدهم غدا في الخامسة مساءً لتذهبا إلى مريم؛ قبل انصراف مها إلى بيتها.)
******************
(في مساء اليوم التالي ذهبت حسناء ومها إلى بيت مريم؛ وبعد أن وصلتا دقت حسناء جرس الباب.)
والد صفية ومريم من وراء الباب: "مين؟!!"
حسناء بخجل: "السلام عليكم؛ أنا حسناء"..
فتح الباب وهو ينظر إلى الأرض: "وعليكم السلام؛ ثواني أنادي على مريم".
-يا مريم تعالي؛ جايلك ضيوف.
ظهرت مريم وهي تقول بفرح: "أكيد حسناااااااء!"
والدها بابتسامة: "أيوه فعلا".
قالت بابتسامة: "حسناء؛ حبيبة قلبي؛ وحشتيني جداً".
احتضنتها حسناء وقالت بابتسامة: "وأنتي كمان وحشتيني أوي".
نظرت إلى مها وسألت بابتسامة: "أكيد دي مها؛ صح؟!"
مها بابتسامة: "صح؛ إزيك يا حبيبتي.؟!"
مريم بامتنان: "الحمد لله؛ تعالوا اتفضلوا ندخل أوضتي عشان نبقى براحتنا"..
بعد أن دخلوا الغرفة؛ قالت حسناء: "هي والدتك فين.؟! دي وحشتني أوي!"
مريم بابتسامة: "زمانها هتيجي حالا أول لما بابا يبلغها إنك هنا"..
حسناء بحنين: "يا ريت تيجي بسرعة بأه؛ وحشتني".
ضحكت مها ثم قالت برجاء: "نفسي أشوفها أنا كمان؛ دي حسناء مش بتبطل تحكي عنها".
مريم بكسوف: "ربنا يخليكي ويحفظلك والدتك يا مها".
أحنت مها رأسها بحزن؛ فقالت لها حسناء بألم: "والدة مها توفيت من كام شهر؛ الله يرحمها كانت من أطيب الناس اللي أعرفهم؛ ربنا يدخلها فسيح جناته"..
ربتت على