الفصل الثاني
**روايه قطر الموت💀_*
..قطرالموت
الجزء التاني
اسف مش هقول اسم المكان.. عشان الخصوصية وعشان مش لازم حد يروح هناك ويعيش نفس المعاناة
الي عشتها انا.. لكن خليني اقولكم هي قرية اولها حرف ط
...
رجعت البيت بعد ما سمعت الي حصل مع عم عبدالباسط سواق القطر.. وطبعا كلامه اتصور صوت وصورة.. بدأت افرغ الفيديو واسمعه.. مرة واتنين عشان اسمع التفاصيل كويس
وكلامه لسه بيرن في وداني.. التحذير واضح اني مروحش هناك.. لكن انا لازم هروح مينفعش اقتل الفضول الي عندي ده.. لازم اعرف الحقيقة كاملة
..
اتصلت بسليم وقولتله
_ جهز نفسك احنا رايحين بكرة القرية
_انت مصمم تروح بعد الي سمعته يا حمزة
_ايوة مصمم اروح.. ده تحقيق هيقلب الدنيا
_ مش عارف ليه حاسس انه هيقلب حياتنا احنا شخصيا
_جمد قلبك يا سليم شوية.. مش هينفع كده
_ حاضر يا سيدي خليني وراك لما نشوف اخرتها
...
قفلت مع سليم.. وانا خلاص واخد القرار.. انا هروح يعني هروح مفهاش كلام
نمت وظبطت المنبه علي 8 الصبح.. نمت نوم عميق
وصحيت علي رنة المنبه
اتصلت بسليم وقولتله
_يلا قوم وجهز نفسك
_حاضر اديني قايم اهو
_ماشي.. اجهز ورن عليا
...
بعد شوية سليم رن عليا ونزلت عديت عليه وبدأنا رحلتنا للقرية... عندي شعور بالشغف والخوف في نفس الوقت
ركبنا عربية وعرفنا ان المسافة للقرية 7 ساعات تقريباً
قولت انام شوية.. وفعلا نمت
صحيت.. بتلفت حواليا.. اي ده انا مش في العربية
انا في مكان ضلمة مش شايف حتي ايدي
اتكلمت بصوت عالي وقولت.. أنا فين واي الي جابني هنا
انت فين يا سليم انت فين؟
لكن فجأة حاجة نورت في وشي.. وشوفت اكتر منظر مرعب شوفته في حياتي!!.. سليم كان واقف ووشه كان محروق جداً.. وعينيه جحزة وشكلها غريب وصرخ في وشي صرخ
..
وصحيت مش فاهم اي حاجة.. ومش عارف اي الي حصل.. لقيت نفسي في العربية وسليم نايم جمبي
اخدت نفس عميق وقولت.. الحمدلله انه كابوس
الحمد لله
لكن كده انا بدأت اقلق من المشوار.. اصل انا واحد من الناس المؤمنة بوجود علامات قبل المصايب
...
المهم وصلنا القرية.. قرية كبيرة البيوت فيها من دورين وتلاتة وعلي يميني في ترعة كبيرة.. لكن الي اخدت بالي منه ان البلد فاضية مفيش حد ظاهر في البلد نهائي.. رغم ان الساعة دلوقتي 6 المغرب يعني
لكن اكتشفت اني كنت غلطان.. البلد كلها متجمعة قدام بيت خارج منه صراخ رهيب ومفزع
مكنتش فاهم في اي بالظبط
اتحركنا ناحية لمة الناس دي عشان نفهم.. وبدأنا نسأل هو في اي.. اي الي بيحصل بالظبط
..
الاول كانت الناس بتبصلنا وتسكت.. لحد ما خرج واحد كده من البيت، شكله شيخ من مظهره كده
الدقن الجلبية والسبحة وقال
محدش يدخل عنده دلوقتي خالص.. وانا بكرة هاجي تاني عشان نكمل الجلسة
..
مكنتش فاهم.. في أي وجلسة أي.. واحد من الناس الي واقفة بصلنا وقال
_انتوا مين يا اساتذة وبتعملوا اي هنا؟
_انا اسمي حمزة.. وده سليم.. احنا معانا قناة وعاوزين نسأل عن المخزن الموجود في القطارات المتكهنة
_مخزن اي وقطارات اي؟!! امشوا من هنا معندناش حاجة نقولها
_عيب المعاملة دي.. ده احنا ضيوف عندكم
_أنا اسف مقصدتش.. بس كفاية الاذي الي احنا فيه
كفاية الي بيحصل ده.. احنا مش عاوزين نتكلم في الموضوع ده
_تمام بس اي الي بيحصل بالظبط؟
...
في الوقت ده.. ادخل الشيخ وقال
_ تعالوا معايا يبني.. انا الشيخ نور الدين، تعالوا معايا
انا هفهمكم كل حاجة
...
فعلاً روحنا مع الشيخ نور الدين.. وقعدنا في مكان زي مندرة كده لاستقبال الضيوف.. وبعدين واجب الضيافة
اتكلم وقال
_شوفوا يا اساتذة.. الموضوع ده بدأ من بداية ما اتعمل المخزن ده.. واتقال انه هيتكهن فيه القطارات الي عملت حوادث
وفعلا.. بعد فترة بدأت تتنقل القطارات دي للمخزن.. والمخزن طبعاً كان عليه حارس
والدنيا ماشية تمام لحد كدة.. لحد ما في يوم سمعنا عن قطر حصلت في حاجات غريبة.. ناس نطت منه وواحدة جوزها قتلها.. والقطر رغم انه جديد.. لكن قرروا انه يتكهن مع القطارات الموجودة في المخزن
..
اليوم ده انا فاكروا كويس كأنه كان امبارح.. صحينا على صوت خبط ورزع على البابان.. فتحنا لقينا.. حارس المخزن الي بالمناسبة اسمه عيد.. كان بيترعش وبيقول
في حاجة مش طبيعية في المخزن.. في اصوات جوه.. اصوات صراخ وناس بتتكلم.. في عفاريت جوه
..
طبعاً الناس مصدقتش حاجة من الكلام ده.. خصوصا لما راح معاه عدد من الناس ومسمعوش اي حاجة وقالوا عليه بيتخيل او مجنون.. وعلى فكرة عيد ده من اهل البلد.. وهو الي انا كنت خارج من بيته دلوقتي
...
سألت الشيخ وقولتله
_هو عيد ده اتلبس يعني؟
_عيد اتمس من الجن.. وانا دلوقتي بحاول اعالجه.. لكن صدقوني الي هحكيه دلوقتي حصل وبشهادة البلد كلها
..
لما الناس مشيوا وقالوا عليه مجنون.. هو مسكتش وحاول يعرف اي الي سمعوه ده
وقرر يدخل المخزن
بعد ساعة بالظبط.. سمعنا صراخ.. صراخ مفزع من الشارع.. خرجنا نجري عشان نعرف اي الصراخ ده؟
كان عيد.. وشه مليان جروح.. وكان بيقول كلام غريب محدش كان فاهم منه حاجة
كان بيقول.. الست جوه القطر مدبوحة وعايشة
الدم في القطر كتير.. الكمسري ميت
..
بدأت اقري عليه آيات من القرآن الكريم.. فضل جسمه يترعش ويتشنج.. وبعدها اتكلم بصوت مش صوته وقال.. اللي هيقرب مني هحرقه مش هخرج هو اللي اذانا.. هو اللي اذانا
عينين عيد بدأت تنزف دم.. كنت أول مرة اشوف حالة بالصعوبة دي.. ولسه هفكر لقيت عيد هجم عليا وبدأ يخنق فيا.. اهل البلد ادخلوا وشلوه من فوقي بالعافية وربطوه في السرير
بعد اسبوع بالظبط.. خرج والد عيد وفي ايده جركن بنزين.. وقال انه هيولع في المخزن
خرجت عشان الحقه لكن اللي حصل كان ولا اللي بيحصل في افلام الرعب.. الراجل وقف قدام المخزن وجسمه اتخشب ورفع الجركن ودلق البنزين علي نفسه
وخرج الكبريت وولع في نفسه.. منظر صعب مش اي حد يتحمله.. ومن يوم الحادثة دي وانا بحاول اعالج عيد.. بس لسه هو محتاج جلسات كتير عشان يتعافي
...
في الوقت ده انا قولت للشيخ نور الدين
_ انا عايز ادخل المخزن ده واشوف بنفسي؟
_ تشوف اي؟ بعد اللي حكيته ده عاوز تدخل.. مستحيل طبعا
_ ارجوك يا..
..
ملحقتش اكمل عشان صوت صراخ الناس ملي الشارع.. فتح الشيخ الباب واحنا وراه وكانت الصدمة.. يتبع الجزء الثالث والاخير
...