أقدار - الفصل 96 - بقلم ضاقت انفاسي - مكتملة | روايتك

عمار وهو ماسك نفسه عن جدته إلي قدمت شكوى على ساره انها تهجمت عليها وضربتها و شتمتها ... طالع ساره الواقفه بثقه يا ارض اشتدي ما عليك احد قدي،! يبغى يخلص الموضوع بسرعه وكلام عمته اميره يتردد لو عرف زوجها انها بمركز الشرطه ما رح يسكت ! ابو عزام بقهر من ام محمد : وش هالحركات هذي يا خالتي ؟! فكينا من هالمشاكل ! وطالع وليد : تحرك عاجبك الوضع .. قاطعته ام محمد بردح : والله ما اسقطها ورب الكعبه ! انا هالبزر تمد يدها علي ! عمار همس لساره : سلمت يدك ! وبنظره لجدته :والله عيب هالحركات يا جده ..كبري عقلك واتركينا من المشاكل والفضايح تراك جدتي وهذي عمتي الخبله ! ابتسمت ساره بدون نفس وما تكلمت ! سرعان ما حست الدم تجمد بعروقها لما دخل ابو فهد وملامحه ما تبشر بخير ! عمار تأفف وبهمس لساره : هذا وش جابه ؟! وش عرفه بالسالفه ؟! اسمعي ما عليك منه ..وان تفلسف اقولك للحين بيتي مفتوح لك لا تذلين لنفسك لاحد وترضي بالذل بحجة وين اروح ! فاهمه ! هزت راسها وقلبها يدق بقوة من ملامحه الغاضبه !!! ام محمد قلبها دق خوف من ملامحه وخاصه لما تقدم منها وتكلم معها : وش حركات البزران هذي ؟ الحين تتنازلين و فكونا من المشاكل وهذي الخلافات نحلها بين بعضنا ! ما له داعي للفضايح ! ام محمد بخبث تمثل الطيبه : انا ما ابغى المشاكل بس زوجتك ما تركتني بحالي رشتني بالعصير وضربتني قدام الحضور ! انا بعمر جدتها تمد يدها علي ! ترضاها علي ؟! اعطى ساره نظرات توعد دوبه منبه عليها حركات الصيع والضرب ما يبغاها ! رمت كلامه بعرض الحائط ولا كأنه كلمها بشيء !- رجع طالع ام محمد وهو كاتم غيضه: ما ارضاها يا خاله ! والحين تتنازلين وفكونا من هالفضايح ! ام محمد تمثل الطيبه تنازلت عن القضيه بدون معارضه ! عمار همس لساره محاوله اقناعها : بعدك مصممه! خلاص فكينا من المشاكل ! ساره بتصميم: لو على رقبتي ما رح افوت الفرصه جاءت لي على طبق من ذهب ! ابو فهد اقترب منها وبنبره فيها حده : يلا امشي ! اعتدلت بوقفتها وبقوه تكلمت بدون ما تناظره : ما كملنا شغل ! وسلطت نظرها لام محمد : الحين رح ارفع عليك قضيه شرف «قذف» والشهود كثير ! ام محمد انخطف وجهها من الخوف وبصوت متقطع : بس انا تنازلت عنك ساره بلامبالاه : مشكلتك ما هي مشكلتي ! وحقي رح اخذه من عيونك ! ابو فهد بحده : اقول امشي ونحل هالسوالف برا ! وليد طول الوقت ساكت يحضر هالمهزله بعد ما سمع ابوه انها اخته مشتكيه على ساره اتصل فيه يحل السالفه بدون محاكم بس عمته رفضت .... ارتفع ضغطه منهم ما صدق عمته تتنازل والحين تبدا قضيه ثانيه : وشهوله ترفعين قضيه على عمتي وانت ضاربيتها ؟! ساره رفعت اصبعها : الف مره قلت لك انت بالذات لا تتدخل وما تحشر خ سكتت لما نزل يدها ابو فهد وبفحيح من مرادده الرجال : لهنا وكافي ! امشي دام النفس عليك طيبه ! ساره مستحيل تتنازل عن حقها : ما رح اتحرك الا لما ارفع قضيه ابو فهد طالع عمار الواقف وملامحه تدل على رضاه بتصرفاتها : عاجبك كلام عمتك ؟! ام محمد بغضب : الكلب اكيد مشيشها علي ! اذا ما اتصلت بمحمد وخبرته بسواد وجهك انت وسوير ما اكون ام محمد ! مسكت ساره بيد عمار : تعال سحبها من يدها بقوه: اقول امشي قدامي وانا اخذ حقك منها بدون محاكم ! فك عمار يد ابو فهد عنها وبقوه تكلم : لا تمسكها كذا ! اذا هالمكان مو من مستواك تقدر تتفضل وحنا نكمل شغلنا هنا ! ابو فهد والغضب يتصاعد الدخان من راسه وبقوه تكلم : لما تكون زوجتك تكلم كذا تفهم ! وسحبها من يدها بقوه وتوجه خارج المركز ...فتح السياره ودفها داخلها وقفل السياره ورجع لداخل المركز وملامحه ما تبشر بخير ! ** ** ** اوجعتها خاصرتها من الدفه ...عفست ملامحها بألم وهي ضاغطه عليها... تبغى تنفجر من تحكمه فيها ....ما له دخل فيها !! للحين النار بقلبها وما فرغت قهرها وحرتها مثل ما تبغى ! زمت شفتها تمنع نزول الدموع ...مقهورة وموجوعه ... كلام ام محمد ضربها بالصميم ! كيف تناظر اهل زوجها بعد كلامها ! معقول يصدقون هالكلام !! غمضت عيونها وهي تفكر بحياتها ... متى تنتهي قصه اوجاعها ؟! دامها ام محمد موجوده ما رح تخلص منها ! مسحت بخفه نزلت من عيونها لما حسته فتح باب السياره ! تآكدت انه للحين غاضب من تقفيل باب السياره بقوه ! حرك وصدره يرتفع ويهبط من الغضب ... تكلم والدخان يتصاعد من راسه : ما في زوج عندك تكلميه وتقولين له انها الكلبه مشتكيه عليك ! ما تعرفين تتصلين وتعطيني خبر...... علشان اكسر رجلها قبل ما تفكر تروح تشتكي عليك للشرطه ! والا قالوا لك عني رجل طاوله بالبيت ...وانت رجال البيت تطلعين وتتحركين على كيفك ! والا عاجبك الوضع تدخلين المركز اخر الليل ! وما شاء الله عليك كاشفه هالعيون وحاطه كحل ! انا ما ادري انت ما تفهمين الكلام والا وش سالفتك ؟! انا تغاضيت عن امور كثيره لكن هالمره ما رح اتغاضى عن هالتصرف ! علشان مره ثانيه قبل اي تصرف تحسبين حساب انه لك زوج و ما تتصرفين على كيفك ! ولما اقول شيء يتنفذ مو تردين كلامي وكآني بزر ! تنهد وللحين بداخله نار : يصير خير نضرب... ونرادد الرجال.... ما شاء الله ... يصير خير ساره وقلبها يدق طبول من غضبه ومع ذلك ما سكتت لانها تحس النار إلي بداخلها ما انطفت للحين : انا هذي حياتي ومو عاجبك الحين رجعني لبيت اخوي ! طالعها بحده : انكتمي ... تابع كلامه : ليه ارجعك ؟! رح ارجع اربيك من اول وجديد دامك تربيه ام أميره ! وش رح آلقى فيك ؟!! ساره انقهرت من كلامه : مربيه غصب عن الكل ! اكون مثلك اذا جلست في بيتك دقيقه ! مط شفته بسخريه بالرغم من ملامحه الغاضبه : احلامك اكبر منك بكثير ...احلمي تطلعين من بيتي ..او يفترق اسمك عن اسمي يا ابنة عمتي ! وشد على اخر حرف بتحدي ! ساره والغضب إلي بداخله يزيد : مو على كيفك ! ما لك سلطه علي ! وحقي رح أخذه بيدي وما رح اسمح لاحد يوقف بوجهي ! لهنا كافي ! تاركني معلقه على ذمتك سنين ..والحين جاي تفرض نفسك ! الحين تذكرت انه لك زوجه تركتها خلفك تعيش الفقر والحرمان تلبي طلبات بناتك ...وانت عايش حياتك بالخمر والله يستر من المستور ! اصل قاطعها وهو يمسك يدها بقوه : ولا كلمه ! «شين وقوي عين » فوق سواد وجهك ولك عين تتكلمين ؟! احمدي ربك إني للحين ماسك نفسي عليك ! وسوالف الماضي ما له داعي كل شوي وتعيدي نفس الشريط ! ما توقعتك هيمانه وتتحسفي على ذيك الايام إلي تركتك فيها ! ألف مره قلتلك حطي اللوم على اخوك إلي يعرضك على الناس ! لا تظنين اني ابغى اذلك بهذا الكلام ! لا بس انا ابغى اذكرك انه لي فضل عليك انقذتك من شر اخوك ! لو ما تزوجتك يمكن صار مزوجك 10 ! امور ما تعرفيها لا تتكلمين فيها ....ولا تخلطين مشكله اليوم بالماضي لاني ما رح اتغاضى عن حركتك ابدا ! وولد أخوك عمار هذا عديم الرجوله لو اشوفك عتبتي باب بيته اكسر رجلك ! طالعته بغبن وغضب : ما يطلعلك تحرمني من اهلي ! طالعها باستخفاف : اهلك ؟! محمد مسافر وزوجة ابوك علاقتكم كثير حلوه وعمك ابو راكان علاقتك فيه مو ذاك الزود واميره جنبك ساكنه ...وين اهلك إلي تتكلمين عنهم ؟! حنا اهلك وغير كذا ما اعرف ! ولد اخوك ييجي يزورك ما رح اطرده بس انت تروحين هناك ممنوع !، وباب البيت ممنوع توصلينه الا بإذني ! اجلسي في بيتك وانتبهي لبناتك ودراستك وانتهينا ! طلعات ومشاكل انا مو فاضي اركض من مركز لمركز اخر الليل ! لفت وجهها بقهر بعد ما حررت يدها بقوه : اشتري علبه وخللني فيها يكون افضل ! تنهد وبهمس ما وصل لمسامعها : يا ليت لو يطلع بيدي ! وبصوت اعلى : مو حاسه انه لسانك طويل ! ترى انا ما احب الزوجه إلي لسانها طويل وصاحبه مشاكل ! قاطعته بقرف : عمرك لا حبيتني ! مو عاجبك طلق وانتهينا ! مط شفته : ليه اطلق وانا اقدر اقصه ؟! وقف السياره واشر لها تنزل بعد ما وصلوا : انزلي وكلام زايد قدام اهلي ما ابغى اسمع ! مطت شفتها بقرف ونزلت وتقدمته بخطوات ... دخلت بهدوء وعيونها تراقب اذا فيه احد او لا ! تفاجأت بوجود ابو نورس وام سالم وكأنهم ينتظرون رجوعهم ! ابو نورس باهتمام : وش صار معكم ؟! عسى الحربايه تنازلت ! ام سالم بزعل طالعت ساره وما تكلمت ! ساره تنهدت وردت بهمس: تنازلت ! دخل خلفها ورد السلام بخفوت ،! ام سالم مطت شفتها : وعليكم السلام ! ابو نورس : كيف اقنعتها تتنازل ؟! رد وللحين نبرته غاضبه : أبغى افهم هالسوسه ليه تعزمينها يمه ؟! وقسم بالله لو اشوفها معتبه باب بيتنا الا اطردها بنفسي ! وما علي من احد ! وش هالناس الحثاله ؟! ام سالم : خلاص اقطعوا علاقتكم فيها ! مو ناقصنا كل يوم بالمركز ! ابو فهد بتأكيد: وهذا إلي رح يصير ... ام سالم : المفروض الحين تكون نايم ومرتاح قبل السفر ! تنهد بضيق : اجلنا السفره ..يمكن اسافر بعد اسبوع او اسبوعين للحين ما حددنا ! ابو نورس : على خير ان شاء الله ... هز راسه و استأذن واشر لها تمشي معه ! مر من جنبها وهي واقفه بمكانها مصدومه «يسافر » دوبها لقته والحين يتركها ! سحبها من يدها بخفه وبهمس : مطوله وانت واقفه ! اول ما دخلوا الجناح شنت هجومها : تبغى تسافر ؟!! وانا اخر من يعلم ! قالوا لك اني جدار بالبيت ؟! تكتف وطالعها باستخفاف : صدق ؟! نسيت اقولك توقعين موافقه على سفري ؟! وبجديه سحبها لاقرب كنبه وجلس : شوفي يا ابنة الناس ...انا شغلي الحين مضطر اسافر من وقت لاخر ....فسالفه سفري شيء عادي ..احيانا اغيب اسبوع او شهر حسب الاشغال ...سفرتي هذي يمكن تطول شوي ما ادري بالضبط ! اليوم المفروض اجلس معك واتكلم بس اشغلتنا خالتك ! عموما إلي ابغاه منك تهتمين بالتوام بغيابي وتهتمين بدراستك وابعدي عن المشاكل والشر ... وانا رح ارسل لكم المصروف واتواصل معكم ! حتى لو كنت مسافر أي طلعه خلاف الجامعه تعطيني خبر ! ومشكله اليوم ما رح اتغاضى عنها ..... ** ** ** عمار وهو يضحك بقوه : اخخخ لو شفتم شكل جدتي ! لما قال انه رح يقدم شكوى عليها لانها تقذف زوجته ؟!! سلمان بلقافه : وش قالت ؟! عمار بضحكه : لو شفتها كيف نزلت ترتجي فيه وتحلف ايمان ما تعيدها ولا تتدخل بساره ! ومع ذلك صمم انه يشتكي وتدخل وليد وابوك حتى يتراجع عن قراره وبطلوع الروح وافق ! عبدالرحمن : هو صدق ناوي يشتكي عليها ؟! عمار : اكيد لا لانها ساره بالسياره اتوقع مجرد تهديد ونجح فيه ! ماجد بشماته : تستاهل تراها ما تركت احد من شرها ! ** ** ** ام راكان بانتقاد : الله يسامحها كيف فضحتنا بالعزيمه ! حتى كلامها استغفر الله وفوق هذا مشتكيه على ساره ! ام ماجد : انا لو مكان ساره مو اضربها بس الا اكسرها ! كلامها ثقيل كثير قدام المعازيم واهل زوجها ! عائشه بانفعال : اخخ يا ليتني كنت موجوده علشان امسح فيها الارض ! ام ماجد : انت لا تتدخلين بلاه ماجد يعمل لك قصه ! عائشه ابتسمت بانفعال : صديقتي وما اسمح لاحد يضايقها ! ام راكان ناظرت ساعتها : المفروض اليوم يرجع ابو راكان ما ادري وش فيهم... قلبي يقول عندهم سالفه ! ** ** **