أقدار - الفصل 95 - بقلم ضاقت انفاسي - مكتملة | روايتك

دخل بهدوء الغرفه : بعدك جالسه !! وقفت بضجر : انتظرك ! تقدم وطالعها بتقييم وبخفه غطى وجهها بالكامل ما يبان منها شيء : كذا افضل ونزل لمستوى حور بابتسامة دافيه : احملك والا تمشين يا بطله ؟! رفعت حور يدينها بدلع وعيونها ذابلة من المرض ! حملها بعد ما قبلها بخدها : اموت على الحلوين يا ناس ! ساره بتأفف جمعت الاغراض ! رفع حاجب : وش فيك تتأففين ؟!، ساره مطت شفتها : انتظر مسلسل الاب الحنون يخلص ! تنهد وبهدوء : اعطيني الأغراض احملهم وما اعطاها فرصه تتكلم تناول الاغراض منها بيده واشر لها بعيونه تمشي ! طالعته وهو حامل حور وبيده الاغراض انبها ضميرها كثير عليه وبرقه تكلمت : اعطيني الاغراض احملهم عنك ! ابتسم بروقان : ما نبغى نتعبك يا عروس ! يلا ما نبغى نتأخر على العزيمه ! ما تدري ليه التمست بكلامه السخريه ...طالعته لما تقدمها بخطوات للخارج تبعته بهدوء ومشاعرها متبعثره ...لكن إلي تأكدت منه انها تميل له من ايام جنونه .... ** ** ** فاطمه طالعت ساعتها : وينها ما جت للحين ! ام سالم وهي تناظر حفيداتها متشيكات : يمكن على وصول ! ام سلوى مطت شفتها بغرور : ما يمديها تتجهز جايه من المستشفى الحين تلاقين حالتها حاله ! ام وسيم تناظر ساعتها : اذا وصلت الحين في وقت تجهز نفسها ! انا اقول ننزل نشرف على التجهيزات قبل وصول المعازيم ! ام سالم هزت راسها : انا هنا رح انتظر ساره ! بعد وقت ام سالم بتذمر : ذول وينهم ؟! قبل نص ساعه طلعوا من المستشفى ! ما بقى وقت على حضور المعازيم ! طلعت جوالها واتصلت على ولدها وبعد عدة رنات وصلها صوته : هلا يمه ردت بنبره غضب مكتومه : انت وينك ؟!!! تأخرتم ؟! رد بهدوء : بنشر العجل والحمد لله كل شيء تمام شوي ونكون عندكم ! ام سالم تأففت : طيب كان قلت لاحد يأخذ زوجتك ما بقى وقت ! رد ببرود : حصل خير ...دقائق واكون عندك بإذن الله ..تبغين شيء يالغاليه ؟! ام سالم : سلامتك ! قفلت الخط وطالعت حفيداتها: والله ما في وقت تتجهز ...الله يسامحها قلت لها ترجع الصبح وارسل احد عند البنت بس رفضت ! وش هالعناد إلي في عائلتهم ؟! ديما بدفاع: تراها يا جده ام كيف تبغينها تترك ابنتها وتيجي تضبط نفسها ! ما ردت ام سالم وهي تناظر الساعه ! دقائق ودخل حامل حور والاغراض بيده : السلام عليكم ! ام سالم وقفت وناظرته وبعتب : وينكم ؟!! تقدمت ساره من خلفه وبصوت جامد :،السلام عليكم ! ام سالم تقدمت لحور تتطمئن عليها بعد ما ردت السلام : كيفها الحين ؟! رد بهدوء : الحين نايمه بس الحمد لله تحسن وضعها ! ام سالم : الحمد لله وطالعت ساره : ما بقى وقت استعجلي ! ساره ببرود : متى العزيمه ؟! ام سالم انقهرت من برودها : بعد المغرب مباشره ..ما بقى على الاذان شيء ! وبقهر : يا برودك بعدك واقفه تحركي ! ساره بكسل : وينك وين الاذان يا خاله ؟ دوبه اذن العصر ! فاطمه : اتركوني اذبحها ! زمان صلينا العصر ! ام سالم اشرت لولدها بزعل : خلها تتحرك بعدها واقفه ما بقى وقت ! اشر لساره بحده لما شاف امه زعلت من برودها وهي ولا على بالها : تحركي ! ديما : الكوافيره تضبط خالتي ام نورس شوي وتجي لك ! ساره ببرود : ما ابغى كوافيره ! ام سالم طالعتها : تعرفين تضبطين نفسك ؟! ساره بنفس البرود : لا ام سالم ارتفع ضغطها منها : ومن يضبطك ؟! وبزعل تركتهم وغادرت ! فاطمه طالعتها بعتب : جدتي زعلت ! تقدم للجناح وتكلم بهدوء : ام فهد تعالي! ساره بنفسها «الله يأخذ هالفهد قبل ما ييجي » يرتفع ضغطها الف لما يناديها كذا ! طنشت البنات لما كلموها وتوجهت للجناح خلفه وهي تردد «الله يستر زعلنا الماما تبعته » دخلت وقفت بالصاله وناظرته لما طلع من غرفة التوأم ! تقدم نحوها وبأمر : صلحي وضعك مع امي بطريقتك ! انا ما ابغى اتدخل بذي المواضيع ! على الاقل قدري جهدها وعملت الحفله لك انت حتى تفرحك ..اتمنى ما تفشلينها بتصرفاتك ولا تزعلينها ! عقدت حواجبها وطنشت كلامه وركزت على جمله «ما تفشلينها» لانهذي الكلمه حساسه عندها كثير تسمعها كانت انها تفشل ..فكلامه ضرب على الوتر الحساس وبغضب ردت : وش شايفني حتى تقول لي هالكلام؟! دامني افشل ما رح احضر هالعزيمه قاطعها وهو يحط يده على فمها : اشششش لا تضيعين الكلام وتفسري الكلام على كيفك ! قصدي تفشلينها قدام المعازيم وما تحضرين ! وانتبهي تراك زوجتي وكل حركاتك محسوبه.... رح يقولون هذي زوجة الدكتور ابو فهد .... والحين اتركي الثرثره وجهزي نفسك ! وتركها وطلع من الجناح كشت عليه بعد ما غادر مغرور بنفسه كثير وكأنه ما احد دكتور غيره ! تثاوبت بكسل توجهت لغرفة النوم وجلست على السرير تفكر لازم تبهر الجميع بطلتها والكل يؤشر عليها بنظرات الاعجاب ! لازم تقهر خالتها ام محمد ومها وتكون نجمة الحفله ! ما رح تترك الفرصه تطير منها ! تثاوبت للمره الالف استلقت على السرير تريح جسمها المكسر من الجلوس بالمستشفى ! غمضت عيونها تخطط وش رح تعمل بالحفله وبعدها تنفذ مخططها وترتب نفسها للعزيمه ! ** ** ** ** ام سالم طالعت ساعتها : وينها للحين ما طلعت ؟! ترى اذن المغرب فاطمه حاست بوزها : طقيت على الجناح بس ما احد رد علي ! اميره عقدت حواجبها : اتصلوا بابو فهد ديما قاطعتها : عمي طلع مو هنا ! ويدي توجعني من كثر ما طقيت الباب ! ام سالم نغزها قلبها : يا رب استر اخاف اصابها شيء ! وبسرعه اتصلت على ولدها وقلبها يدق بقوة ! اميره تركتهم وتوجهت لجناح اختها تتطمئن عليها ! فاطمه وملامحها انخطفت : معقول اصابها شيء ! سلوى دفتها بقلق : وانت مثل الغراب! وتوجهت خلف اميره !! ** ** اميره طالعته وهو متوجه لهم : معك مفتاح للجناح ! هز راسه وهو يناظر هالتجمع باب جناحه ما ينكر الخوف تسلل لقلبه ما ترد على الجوال ولا على الباب ! وش صار عليها حتى ما ترد ؟! حتى حور بالجناح نايمه !! ام سالم بخوف : بسرعه يمه افتح الباب ! حاول يحط المفتاح بس ما ضبط معه : المفتاح بالباب من الداخل كيف نفتحه الحين ؟! اميره والقلق ذبحها : حاول مره ثانيه ! طالع امه : ما في حل غير نفك قاطعته بعجله : اعمل اي شيء بس لا تتأخر ! بعد وقت فتح الباب اسند ظهره واخذ نفس عميق يتلقى اي صدمه يمكن يشوفها ! تقدم بإتجاه غرفة النوم وفتح الباب وقلبه يدق بقوه ... وقع نظره عليها على السرير وكأنها جثة هامده ! تقدم وطالعها بالعبايه والشال نفس اللبس ما غيرت شيء إلتفت للخلف وطالع امه إلي تسأل بخوف وملامحها مخطوفه : وش فيها ما تتحرك ! طالع وجهها اصفر خالي من اي معالم الحياه ! جلس على طرف السرير وحط يده على قلبها إلي يدق بانتظام ...هزها بالخفيف : ساره ساره تقدمت امه وقلبها طاح للارض: وش فيها ما ترد ؟! ناظر امه: لا تخافين نايمه ..الظاهر نومها ثقيل ! رجع يهزها بأقوى وصوت اعلى : ساره ساره فتحت عيونها بشويش وهي عافسه ملامحها وبصوت مبحوح من النوم : وش فيه ؟! ناظر امه وابتسم : شوفي شغلك معها انا طالع مشغول ! ام سالم بغضب : نايمه والمعازيم إلي على وصول ! فزت ساره على حيلها لما تذكرت العزيمه : شكلي غفيت شوي ضحك على ردها : انت ما غفيت انت نمت يا الذكيه ! ام سالم والدخان يتصاعد من راسه : انا هذي الي رح ترفع ضغطي ! ساره ابتسمت بعباطه : دقائق وانزل ما رح اتأخر ! ام سالم ناظرتها ما عجبها تصرفاتها واستخفافها ! لفت وجهها وطلعت وعي تردد كلام ساره بسخريه : دقائق وانزل ما رح اتاخر المعازيم وصلوا ..يا برودها ! طالعت حفيداتها و أميره واقفات باب الجناح : وحده عندها هوس بالموضه والثانيه ما يخصها الموضوع !! أميره بقلق: وش فيها ساره ؟! ام سالم مطت شفتها بعدم رضى :-العروس نايمه للحين .... ** ** ** تنهد ولف وجه يطلع : تحركي بسرعه وانتبهي على حور انا عندي شغل ! والحين اقول لفاطمه ترسل لك اكل ... مطت شفتها بعد ما طلع مستغربه ليه منزعجين في وقت لتجهيز نفسها! قررت اول شيء تشوف حور وبعدها تروح تجهز نفسها ! نقزت على صوته وهو طالع من غرفة حور: بعدك ما تحركت ؟! ساره لا ترفعين ضغطي وبسرعه تجهزي ... ** ** ** ** ناظرت نفسها كذا جاهزه ما له داعي المكياج ! اصلا ما تعرف تحط المكياج ! مشيت خطوتين للخارج رجعت ناظرت نفسها وهي تفكر تحط بس روج ! ناظرت الالوان إلي اشتراها لها من السوق واحتارت اي لون تختار ! غمضت عيونها بتفكير وهي تتذكر اشكال البنات بالجامعه بالمكياج ! ناظرت نفسها بشرتها بيضاء اكيد يناسبها اللون الزهري الغامق او الاحمر طردت هذي الألوان تبغى شيء يكون غير وملفت للنظر حتى تتميز على مها ! حطت بين عيونها بنت بالجامعه يروق لها مكياجها قررت تحط نفسه وتشوف النتيجه ! ** ** ** مها رفعت حاجب وهمست لامها : وينها اختك ؟! العزيمه لها وللحين ما شرفت ! اميره خزتها : ما ادري ليه ما تحبين خالتك ؟! عفست ملامحها بقرف : يمه بالله لا تقولين خالتي تراني احس نفسي تقلب علي ! اميره زفرت بضيق : مها !! مها مطت شفتها : يمه انت مو حاسه فيني ...شوفي انت قاطعتيني بسببها وجدتي للحين صاده عني وحتى عمي ابوفهد يكلمني من رؤوس خشومه وكله بسببها ! اميره تنهدت : وش تبغين الحين ! كل شوي وتجيبين سيرتها وكأنها ضرتك مو خالتك ! مها وهي تناظر حولها : بصراحه متشوقه اشوف جدتي بعد ما تتفشل قدام المعازيم بشكلها تراها ما تعرف شيء اسمه اناقه وفوق هذا رفضت الكوافيره تعدلها ! اميره طالعتها : ومين رح يضبطها ؟! انا سألت جدتك بعد ما طلعت من عندها مين رح يضبطها قالت الكوافيره ! مها ابتسمت : تراها تتمسخر قالت لي ديما السالفه وترى جدتي مرتفع ضغطها منها وخاصه لما لقتها نايمه ! اميره مطت شفتها بقرف : الله يستر اذا حطت جدتك ساره براسها ! ترى ما تنطاق بتحكمها! مها باستغراب : والله جدتي عسل ما ادري ليه ما تحبون بعض ؟! اميره بنغزه : نفسك انت وساره ليه ما تحبون بعض ! ام محمد اقتربت وهي عافسه ملامحها : الحمد لله في عزايم علشان اشوفك انت وابنتك ! اميره ابتسمت : هلا يمه ! ام محمد تناظر اميره كيف مهتمه بنفسها : بعدك على ذي الحركات اذا ناسيه ترى عندك احفاد وكبرت على ذي السوالف ! اميره بدون قصد : تبغين اهمل نفسي وابو ليث يدور غيري ! ام محمد انتفخ وجهها : وش قصدك ؟! مها تغير الموضوع : توقعت ما تحضرين يا جده ! ام محمد بقهر : جيت اتشمت بجدتك وهي تعرض ساره للناس ! ابغى اشوف وجهها بعد الفشيله ! مها اشرت بعيونها على وحده معطيتهم ظهرها : مين ذيك إلي لابسه فستان اسود طويل ! إلتفتت اميره وابتسمت : ما تعرفين خالتك ؟! فتحت عيونها والغيره ذبحتها ما توقعت تطلع كذا طولها مع خصرها المنحوت وشعرها الطويل الاسود .... عضت على شفتها والغيره ذبحتها لما لفت ساره لجهتها وجهها خالي من مساحيق التجميل باستثناء احمر الشفاه وكحل ! ام محمد بغيره وحقد : وصارت تعرف تلبس هالناقه ! اميره بابتسامة صافيه وهي تناظر اختها بإعجاب : الله يحفظها ويسعدها !! ** ** ** فاطمة قرصتها بخفه : ليه ما لونت وجهك مثلنا ! ساره بثقه زائفه : احب اكون على طبيعتي ! فاطمه : اقول انقلعي عني اخاف تغطين علي وما احد يخطبني ! ساره ابتسمت بنعومه : رايحه اشوف سوار مختفيه هالبنت ! ام عمار سلمت عليها مع بناتها ! ما توقعت ساره حضور بنات خلف ! جودي بعد ما تركتهم ساره همست لامها : لو يشوفها خالي عبدالله الا يأكل اصابعه ندم ! ام عمار بهدوء : ليه الحين ما يأكل اصابعه ندم ؟!! جودي : فرط فيها من يده وما احد جبره ...والحين يتحمل نتائج تصرفاته ! ام عمار بهمس : لو كانت زوجته مو ابنة خالي ابو وليد كان من زمان رجع ساره لذمته ! بس إلي ذبحه ابنة خالي ابو الوليد ما يقدر !! ما شفت ابوي كيف عجل بموضوع ساره وسعود حتى يبعدها عن عبدالله ...تراه ما يستبعد عنه يرمي بعرض الحائط علاقتنا بخالي ويتزوج ساره ! جودي ؛ كذا افضل لها تبعد عن المشاكل ...حتى زوجها لقطه اعزب ومحترم وله سمعته ! ام عمار : ما شاء الله مقتدر ماديا فك شراكته مع خالي ابو الوليد بالمستشفى وصار المستشفى له ولاخوه ! الله يوفقها !!! *** *** *** ابتسمت مجامله لام سالم إلي تعرفها على المعازيم بفخر ... تركت ام سالم وتقدمت بخطوات ..شدت على قبضة يدها وهي كل شوي تسمع الحريم يتهامسوا بينهم : كيف متزوجه من سنين بالسر ؟! ومتزوجه اربعه ؟! ولد عمها طلقها يوم الزواج ؟! لا يغرك جمالها الله يستر علينا... خالتها تقول انها ما تترك احد من شرها ؟! حتى لو كانت جميله كيف ام سالم وافقت عليها وولدها الف وحده تتمناه ؟! على الاقل زوجته بنت تكون اول بخته ؟!! يقولون وافقت عليها لانها ابنة عمته ! مها اخت ابو فهد امها ؟!! يقولون ماتت وهي تولدها !! الله يرحمها !! اخذت نفس وهي ماسكه نفسها ما تحوس هالعزيمه ! احترام لام سالم مسكت نفسها ! تكره الاجتماعات والمناسبات ! متأكده رأس الشر خالتها هي إلي طلعت هالكلام ونشرته خاصه بين اهل زوجها ؟! كل شوي تجلس مع حرمه ! ما تدري متى تتركها ؟! طالعت خالتها ام محمد واقفه مع حرمه جديده لازم تطلع حرتها فيها ! الكلام والردح ما عاد يشفي غليلها ! تقدمت وهي تطقع اصابعها لو كانت النظرات تقتل كان قتلتها ! تناولت عصير بالتوت من احدى الطاولات وتوجهت بخبث لجهتها وبحركه مدروسه وكأنها تعثرت ثواني وكان عصير التوت من رأس ام محمد للاسفل ! شهقت ام محمد وتسلطت الانظار عليها ! عدلت وقفتها ساره بدلع بعد التعثر : اووووه اسفه خالتي ! ام محمد بغضب : صدق انك ما تربيتي يا ..... تقدمت ام سالم : حصل خير يا ام محمد تعالي قاطعتها ام محمد : انا ما اجلس بمكان انهان فيه ! شوفي زوجة ولدك تعمدت ترشني بالعصير ! الله يستر ما يكون فيه سحر او حجاب ! ترى معروف عنها هذي السوالف ام سالم بانحراج قدام المعازيم : وش هالكلام يا ام محمد ! ام محمد تبث سمومها : والا كيف تفسرين زواج ولدك منها وهو اعزب وصغير يتزوج ارمله ومطلقه وسمعتها بالحضيض ! خذي ولدك على شيخ نصيحه مني اذا ما لقيتي معمول له سحور وقتها قولي ام محمد ما قالت ! ساره بهدوء عكس النيران إلي اشتعلت بداخلها وبابتسامه مزيفه وهي تصفق لها : كملت ثرثره ! والحين تقدرين تضفين وجهك ! اشرت على نفسها باستنكار : تطرديني ؟!! ساره بدت تفقد اعصابها وبقوه وكل تصرفات خالتها قدام عيونها : واكسر راسك بعد ! ما بقى الا عجوز مخرفه نتحملها ! تراني ماسك نفسي لاخر لحظه ! والحين انقلعي قبل ما اسحبك من شعرك قاطعتها ام سالم بحده : ساره ! ما في احترام للضيوف ! وطالعت ام محمد : لا تهتمين يا ام محمد ! تعالي غسلي ساره بغضب : وقسم بالله ما تدخل والا تنقلع الحين ! اميره تدخلت مهما كان تبقى امها وما ترضى عليها : ساره وش هالكلام ! ساره طالعتها بقوه : قولي هالكلام لامك الزفته ! هذا انذار لها وقسم بالله اذا ما ابتعدت عن طريقي الا اذبحها قاطعتها ام محمد وهي تبث سمومها ومستغله تجمع الحريم : ابعد عن طريقك علشان تلعبين بذيلك ! الكل يعرف عنك يا قليله الحياء شبكتي ولد اخوي سعود وخليتيه يخطبك وانت على ذمة رجال ! ام سالم بغضب والحريم تناظر : خلاص ام محمد تكمل : ما خلصنا خلي الناس تعرف حقيقتها ليه طلقها ولد عمها ابو راكان ؟! كم جوال اخوانها كسروا لها من صياعتها ! وهذا عبدالله موجود كم جوال يشتري لها ويومين يكون مكسور من اخوانها ! روحي اسألي عن هزاع بالقريه وقصة الحب إلي عاشتها والا خطيبها الاول شبكته بالمستشفى وكا قطعت كلامها وحطت يدها على فمها بآلم من الضربه إلي حصلتها ساره بغضب : اذا انا مثل ما قلت صايعه تراني تربية يدك مثل ما كنت تعملين قلدتك ! وانا حصاد يدك ! اميره وهي تمسح الدم من فم امها وبصراخ : خلاص يا ساره ! خلاص يمه وش هالكلام الملفق ! ما ترتاحين الا لما تنشرين اشاعات من عقلك ! ام محمد دفتها عنها : روحي عني يالعاقه ! تدخلت ام راكان : ترى الظلم ظلمات يا ام محمد ! ربي يشهد ساره كانت خطيبة ولدي وعاشت قدام عيني ما عمري شفت عليها الزله ! وطلاق ولدي لها كان ظلم عاقبها بتصرف خلف اخوها وقال مثل ما طلق اختي نطلق اخته ! ام محمد : ام راكان لا تتدخل قاطعتها ام سالم وهي تناظر همس الحريم وكيف خربت العزيمه : بيتي يتعذرك يا ام محمد ...وإلي يطعن بزوجة ولدي كأنه يطعني ام محمد رفعت جوالها : طالعه بدون ما تقولين ... ما اجلس بمكان انهان فيه ! ما رح اسكت على الاهانه هذي ! تظنون ما عندي اهل يوقفونك عند حدك يا سوير ؟! تراني مو مثلك مقطوعه ما لي ام ولا اب ولا اخوان حولك ولا زوج مثل الناس ! وخلال ثواني جاءها الرد وبمبالغه : تعال يا اخوي خذني ....حسبي الله عليها سوير تهجمت علي وضربتني قدام المعازيم ...ايه عندهم ...انتظره ! وطالعت ساره بتوعد : وقسم بالله الا تندمين ! وتركتهم وطلعت ! ام سالم وملامحها ما تتفسر قررت تخلص العزيمه على خير وبعدها يصير خير ! اميره مسكت يد ساره بهدوء : تعالي معي ! فكت ساره يدها وصوتها بدأ يهتز : اتركيني ما لي خلق لاحد ! اميره بهمس : تعالي نتصرف ترى امي اعرفها ما رح تمشي السالفه كذا ! تعالي نحلها قبل ما تكبر ! هزت رأسها بالرفض : ما رح أتحرك من هنا !!! ** ** **