أقدار - الفصل 93 - بقلم ضاقت انفاسي - مكتملة | روايتك

وقفت مها بقهر :-تراك يا جدة مخدوعه فيها انا اعرفها من قبل ترى عمي الزوج الرابع ..عمي الأعزب يتزوج هذي ! كيف توافقين على ذي الزواجه وتحتفلين فيها ؟! واحب ابشرك بعد ان زوجة ولدك المبسوطه فيها كانت تشتغل بالمستشفى عاملة نظافه ! متخيله الوضع يا جدتي !!! تسلطت الانظار على ساره والاغلب كانت هذي المعلومات جديده عليهم وما يعرفون شيء عنها ! وقفت ساره وتقدمت من مها بتحدي وثقه : على بالك اذا قلت هالكلام استحي او انكر الكلام ! لا يا حلوه انا اقولها وما رح استحي من الشغل لانه ما هو عيب ولا حرام ايه انا كنت اشتغل بالمستشفى بالنظافه !!- واقولها بكل فخر ! دامك تبغين تنبشين الماضي ليه ما خبرتيهم عن عمك المجنون !! ليه ما خبرتيهم انه رماني قاطعتها ام سالم بهدوء : ما له داعي تكملين يا ساره ... رايتك بيضاء ...وما غلطت بحق احد ... ام فهد بغضب:-يمه ما سمعتيها تقول عن اخوي مجنون ! مها بفتنه: تدرين انها نشرت بين اهل امي كلهم انها متزوجه مجنون وهي قاصده عمي ! ام سالم صرخت بوجه مها: مها كافي خلاااااص ! انتفخ وجه مها بغضب كيف جدتها تصرخ بوجهها كذا بسبب ساره وبكل غضب وحقد وكره استقرت يدها على خد ساره بكل قوة : اعتبريه سداد الدين تقدمت ام فهد بإنكار : مها وش هالتصرف ! كيف تمدين يدك عليها ! مها والدخان يتصاعد من راسها: مو تقولون خالتي ما احد يتدخل بيننا ! تقدمت منها ام سالم وهي تهز راسها بعدم رضى وقفت مقابل مها بالضبط وسرعان ما استقرت يدها على خدها بكل قوه : هذي تربية ابوك تمدين يدك على زوجة عمك ! ما اسمح لك تهينين احد في بيتي تفهمين والا لا ! مها للحين مو مستوعبه جدتها تضربها ؟! طول عمرها الحفيده المدلله وكل الاحترام لها ! كذا بكل بساطه وتضربها ! علشان ساره ! ساره إلي ما تسوى فلس واحد ! وبصوت مغبون مقهور : جدة تضربيني علشان هذي ؟! ام سالم وصدرها يرتفع ويهبط من الغضب : واكسر راسك ! على بالك العالم سايب ! والحين تعتذرين من خالتك قدام الكل ! واشرت على ساره إلي واقفه مثل الصنم ويدها على خدها مو مستوعبه الموقف ! مها من الكيد والقهر إلي بقلبها بدأت تبكي وبغضب : والله ما اعتذر من هالزباله ! طب الجره على ثمها تطلع البنت لامها روحي فتشي عن ماضي زوجة ولدك وبعدها تعالي دافعي عنها ! خلها تكلمك عن هزاع قاطعتها ام سالم بصرخه غاضبه : ولا كلمه ! ضربت مها الارض بقوة واخذت أغراضها وطلعت بعد ما شدت بمشيتها! تنهدت ام سالم بقهر وطالعت ساره بعدها يتلبسها السكون وتراقب بصمت: انا اعتذر بالنيابه عنها ...وحقك علينا ! لفت ساره نفسها بهدوء وهمست بصوت حاولت يكون هادئ: مسموحه وتركتهم وتوجهت لجناحها ! قفلت الباب واسندت راسها على الباب وتناظر السقف بهدوء وبداخلها نار بدأت تشتعل ...تلوم نفسها المفروض مسحت فيها الارض وطلعت كل حرتها فيها .....ليه ما كان لها اي رد فعل ! ليه انتظرت احد يأخذ حقها ! ليه ما اخذت حقها بيدها ؟! ليه ضعفت اليوم وسكتت عن حقها ! شيء بداخلها ارغمها على السكوت حتى تشوف رد فعل من حولها ! توقعت يوقفون مع مها ضدها ! تفاجأت من موقفهم بصفها ! حتى ام فهد انكرت موقفها ! غمضت عيونها للحظات وسمحت للدموع وهي تهمس : يا الله !!! لو وقف عمها ابو راكان نفس موقف ام سالم وكان مع الحق ما كان حالها كذا ! ما رح تكون مجروحه منه هالكثر !! هز اذنها اسم هزاع !! غمضت عيونها لثواني وهي تدعي من قلب على خالتها ام محمد ما خلت احد الا وفضحتها عنده زور وبهتان : حسبي الله ونعم الوكيل فيك ..... جلست على الارض بشويش واسندت راسها على الباب وبداخلها تصرخ متى تستقر ؟! ليه بداخلها جرح ما هو راضي يطيب ! ليه يسكن بداخلها حزن عميق ! معقول يستقر وضعها مع مجنونها !! للحين ما جلسوا جلسة مصارحه ! ما خبرها كيف كان مجنون ! ولا هي خبرته بحالها بعد ما تركها ! كل واحد محتفظ بماضيه بقلبه !!! *** *** ** ** فاطمه بإعتراض : والله يا جدة ما يصير مها تعمل كذا ! ديما بتأييد : احسها تكرها ليه ؟! احد يكره خالته ؟! مع انها ساره حبوبه وطيوبه وللحين ما شفنا عليها شيء ! ام سالم بحزم : خلاص قفلوا السالفه ! فاطمه للحين متضايقه : كسرت خاطري ساره ...لو مكانها اكسر مها تكسير ! ام فهد بضجر :فاطمه خلاص ! ما مليتي هالسالفه ! فاطمه عفست ملامحها : ما مليت لاني للحين مقهوره من مها ! ام سالم رفعت حاجب : وين سلوى ؟! ديما جالت بعيونها المكان : بسم الله ! كانت هنا ! وبشهقه : اكيد راحت تنشر الخبر واولهم عمي ابو فهد ! ** ** ** ** ** في اليوم الثاني جالس بمكتبه يسمع ثرثرتها اكثر من نصف ساعه وما نطق ولا بحرف ! زفرت بقهر: وهذي كل السالفه ! طالعها لثواني وبعدها رد بنبره ارعبتها : وصلتني البارحه اخباركم ! لكن حبيت بالاول اسمع منك وبعدها احكم ! لكن قبل كل شيء اعطاها نظره قويه :«لو كان الغلط كله على زوجتي والكل شهد معك انها الغلطانه .... ما اسمح لك تمدين يدك عليها لآني رح اكسرها لك ! سواء انت او هي ! ما اسمح بحركات الصيع في بيتنا ! زوجتي غلطت عليك وتعدت بالكلام كلميني انا !! مو تمدين يدك عليها !! مها بتبرير :يا عمي تراك ماتعرفها تشتغل من تحت لتحت ! تكلم بحده : مها للحين ماسك نفسي ! لا تتدخلين بساره ! واعملي حسابك اليوم تعتذرين من خالتك ! وكمل كلامه بصرامه لما شاف ملامحهاالمعترضه : ما هو بكيفك الا غصب عنك ! والحين انا طالع انتهى دوامي راجع للبيت ! ** ** ** ابتسم لامه لما شافها جالسه تفطر : صباح الخير يمه ! ابتسمت ام سالم بثقل : صباح الخير ...تعال افطر ! طالع ساعته كانت 6:00ص : ابغى اريح وانام كم ساعه ما نمت البارحه ! وين البنات والعيال ما عندهم دوام بالجامعه ! ام سالم : بعده الوقت مبكر دوامهم متأخر شوي ! استأذن وتوجه للجناح بهدوء ! توقع تكون نايمه عند التوام اول ما دخل الجناح استغرب لما سمع حركتها بالمطبخ ! توجه للمطبخ بخطوات ثقيله وقف عند الباب و شافها واقفه تجهز القهوة وبابتسامه : صباح الورد للنشيطين ! كانت تغلي بالقهوة لما سمعت صوته إلتفتت ورفعت حاجب تتأكد اذا كان سكران الحين راجع للبيت ! اختفت ابتسامته وحل مكانها الكشره لما شاف خدها فيه احمرار ! تمنى مها تكون قدامه ويصفقها ! ومع ذلك تحامل على نفسه ورجع يبتسم: قلنا صباح الخير يا زوجتي العزيزه ! طالعته بدون نفس وبجفاء : تراك مو ملزوم تجامل ! رفع حاجب باستنكار : اجامل ؟! مطت شفتها : ايه تجامل ! توسعت ابتسامته على تفكيرها وتقدم وجلس بعد ما سحب كرسي وجلس عليه : صدق الحريم ما يجون الا بالعين الحمراء ! حطت القهوة قدامه بهدوء وملامح ميته : تفضل ! استنشق رائحه القهوه : الله !! يا زين القهوة من تحت يدينك يا ام فهد ! جلست مقابل له بدون تعليق لانها متأكده اذا ردت ما رح يمر اليوم على خير ! ارتشف من القهوة وبروقان اول مره تشوفه بهذي الحاله من لما جاءت هنا : متى طالعه للجامعه يالرسامه ! ردت بدون ما تناظره والكشره مرسومه على ملامحها : ما رح اداوم اليوم! خزها بجديه : من اول يوم كسل ! اقول تجهزي وعلى الجامعه ما ابغى غيابات من اول فصل ! باكر يقولون زوجة الدكتور قاطعته بنرفزه : ما يهمني احد سألها وكأنه جاهل السبب وهو يطالع مكان الكف : علام خدك كذا ؟! تلمست خدها وحست الحقد تجدد من جديد وحلفت يمين بنفسها الا تردها لمها اضعاف مضاعفه ...تنهدت وردت على سؤاله بهدوء : يمكن نمت عليه وصار لونه كذا ! هز راسه وكأنه صدقها : اها ! وبجديه تكلم : وش بينك وبين مها ؟! وش هالعداوه إلي بينكم ؟! وقفت بهدوء وهي ترجع خصله من شعرها خلف إذنها : ما في بيني وبينها شيء ! وما احد يتدخل بيني وبينها ! رد بطريقه استفزتها : الظاهر انك مدمنه على كفوفها او بين قوسين نقدر نقول انك ملطشه الشاطر يفرد عليك عضلاته ! ردت بغضب : ترى سكت لهذي الزفته احترام لخالتي والا كان ضربتها مثل ذيك المره بالمستشفى وما يهمني احد قاطعها وهو يوقف اشر لها ولا كلمه وبحده: صوتك هذا ما يعلى وانا موجود ! تفهمين ! تتكلمين بهدوء وادب افضل لك ! حول نبرته وسأل باستفسار: من جدك ضربتي مها بالمستشفى ؟! ساره بقوه وهي تتكتف ما تدري من وين اجتها وطنشت تهديده : ايه ضربتها قدام الدكاتره والمراجعين وكل الناس قاطعها بغضب : ومبسوطه على نفسك ؟! وش حركات الصيع هذي ؟! وقسم بالله لو اسمع بحركات عيال الشوارع هذي ما يصير خير ! قلت لك من البدايه تحترمين اهلي وخلافاتك مع مها ما ابغى اشوفها هنا ! تحترمون المكان إلي انتم فيه ! طالعته وبدون نفس : قول هذا الكلام للزفته مها ال بلعت باقي كلامه بعد صرخته : ولا كلمه ! أنا دوبني اقولك احترمي اهلي وبوعيد : ساره لا تخليني اقلب وجهي الثاني ! خلي هالحياة تعدي على خير ! واتقي شري احسن لك ! تراك ما تعرفيني ! والحين جهزي نفسك واطلعي مع البنات للجامعه ! ساره بدأت تتنرفز : انا اقولك ما ابغى اداوم ! حمل فنجان القهوه بعد ما وضع جوالها على الطاوله : اذا صحيت ولقيتك بالبيت ما تلومين الا نفسك ! وهذا جوالك المره هذي سحبته المره الثانيه اكسره ! تركها وتوجه لغرفة النوم ! ضربت الارض بقهر ما لها خلق للدوام ! وش يبغى فيها تداوم تعطل هذا الشيء راجع لها ! ما له يفرض رأيه عليها ! ** ** ** ** ابو راكان طالع ابو ماجد بعدم تصديق : تشوف إلي اشوفه ! ابو ماجد بتأمل : مستحيل ! طالع ابوه بعم تصديق: كيف يبه ؟! هز راسه ابو راكان : ما ادري ..احس نفسي بحلم !!! وطالعه وجسمه يرتجف : احجزلي لذي المنطقه بأسرع وقت احس عقلي ما هو قادر يستوعب ! ابو ماجد شد على يده : انت بخير يبه ! غمض عيونها لثواني وهو يحاول يهدي ضربات قلبه : بخير بخير ! فتح عيونه وبحرص : هالموضوع ما يطلع من هنا الا لما نتأكد وقتها يصير خير ! ** ** ** ام محمد بغضب قفلت الخط :،انا رح تجلطني هالاميره ! ما ادري واقفه ضد ابنتها مع سوير الناقه ! وليد بضحكه : بالله يا عمتي لا تقولين ناقه ! ما ادري وين وجه الشبه بينهم ؟! ابو الوليد خزه : وليد ! ام محمد والنار بقلبها : ام سالم تبغى تعمل لها حفلة ! لكن اذا ما خربتها ما اكون ام محمد ! والا هذي الجوكر تطلع متزوجه هالقمر ! وليد خزها بضحكه : اذا عاجبك نزوجك إياه بلع كلامه لما تذكر وجود ابوه إلي بادله بنظرات ناريه ! ام وليد بهدوء : خالتي ام سالم تمدح فيها وحتى ام وسيم نفس الشيء تمدحها تقول مؤدبه وهاديه وتجلس معهم دوم وما تكف نفسها عنهم ابدا ! وكآنها فرد من هالعائله ! وليد : الله يوفقها مطت شفتها بحقد وما عجبها كلامهم !! ** ** ** ساره بضيق وقفت : نعسانه ! عائشه بنشاط : وش هالكسل إلي عليك ! المفروض اليوم تكونين بكامل نشاطك وحيويتك بما انه اول يوم ! ساره وهي تثاوب : متى اتخرج وارتاح قرفت الدراسه ! عائشه مسكت يدها : صادقه متى نكمل دراسه ؟! الفصل الماضي قرفت الدراسه لاجل الدكتور شاهين والدكتور نواف ! والفصل هذا ما ادري مين يطلع لنا اغلب الشعب غير محدد ! ساره بضحكه : تخيلي يطلع لك هالفصل سعود وشاهين ونواف ! عائشه مدت بوزها : حرام عليك يكفي تقديري إلي نزل بسببهم ! تدرين الدكتور شاهين يتحدى الطلاب احد يحصل علامه عنده ! والا سعود وقسم بالله يقهرون ! تابعت خطواتها ساره واشرت على مقعد تحت الشجره : المشكله مو بالدكاتره ! المشكله بعقلك المصدي من بعد زواجك انخفض مستواك الدراسي ! الظاهر ماجدوووو اخذ عقلك ! خزتها عائشه وجلست : الا قولي طير عقلي بحركاته ! وبتحقيق : صحيح ما قلت لي عن مجنونك ! تنهدت ساره : اويلييييييي مجنوني رح يجنني ! عصبي حيل ! اذا ابتسم ألتفت حولي اتأكد يمكن رجع لجنونه ! عائشه عقدت حواجبها : يعني ما انت مرتاحه معه ! هزت كتوفها ساره : ما ادري بالضبط ! انا ما اشوفه كثير ! طول وقته برا البيت ! بس إلي ترجمه عقلي من كلامه وحركاته اذا ابغى اعيش بهدوء وسعاده اسلم السلطه له وما اناقش بشيء يعني بين قوسين هو إلي كلمته تمشي بس ! وعنده قوانين صارمه يرتفع صوتي بوجوده ممنوع عائشه ابتسمت : بسيطه بغيابه جيبي سماعه ولفي البيت كله وطلعي الكبت طول فتره وجوده !، ابتسمت ساره : نفسي اجيب السماعه إلي يمسكونها باليد واحطها على اذنه واصرخ بأعلى صوتي : مالك دخل بام امي ! خففت نبرتها وطالعت عائشه وبضياع تكلمت : انا ما ادري وش ابغى من الدنيا !! بالاول كان هدفي اكمل دراسه واشتري بيت واعيش مع بناتي بسلام .....لكن الحين بظهور مجنوني ...عقلي متوقف ما ادري وش ابغى ؟!! مليت من التفكير .....مليت هالحياه ..... نفسي اعيش باستقرار اسري بعيد عن المشاكل والمتاعب ! خلاص قرفت حياتي ! من لما ماتت جدتي ام سعيد ماتت اشياء كثير بداخلي ! مع الايام تنكشف ورق ماضيه ....تدرين اني اكره ابوي .....لما كنت صغيره كنت اتمنى اعرف عنه شيء ووقتها كانت تصدني جدتي ام سعيد ....لما انتقلت عند اخواني وللصدفه شفت صورته كانت صدمه بالنسبه لي !، ابوي شايب !! ليه ما عندي اب مثل ابوك يا عائشه ! حز بخاطري انه ابوي شايب .....حتى وصلت لمرحلة استحي احد يعرف ابوي الشايب ! ومع الايام تناسيت وجوده...وتابعت حياتي وتأقلمت على الحياه بدون ام او اب ! مع اني احيانا تمنيت وجوده في بعض مواقف تعرضت لها تمنيت وجوده يوقف معي ويأخذ حقي من كل شخص ظلمني ! ومع ذلك دفنت هالشعور وكملت باقي الحياه ...لكن بالفتره الاخيره كرهته من قلبي ! احسه استغل وضع امي ! امي إلي ماتت بحسرتها وقهرها ! ماتت مظلومه ! وما احد انصفها ! اكره الرجال كلهم ! انظلمنا بسببهم و قطعت كلامها وصدت بوجهها تمسح دمعه خانتها ! تنهدت عائشه بضيق : صدقيني ما بعد الضيق الا الفرج ! ولا تظلمين ابوك ما تدرين وش الظروف إلي حدته على ذي الزواجه ! ما لك الا تقولين الله يرحمه ! والرجال ما تحكمين على الجميع لانه اصابع يدك مو وحده ! ما ادري احسك محظوظه بزوجك هذي فرصه جديده لك استغليها ....ولا تضيعينها من يدك ....الي يخاف عليك ويحرص عليك فهذا دليل انه يحبك ! مطت ساره شفتها بألم : يحبني ! تراه يبغى وحده عنده بالمستشفى ! عائشه رفعت حاجب : مين قال هالكلام ؟! ساره بقهر : الزفته مها قالت هالكلام قدامه وما انكر ...حتى امه حاولت تغير الموضوع ! ويقول اني عاديه واقل من عادي كثير بنات احلى مني ! يعني انسان ما هو مقتنع فيني وماني عاجبته اكيد رح عيونه تطلع لبرا يدور على إلي تملي عينه ! عائشه بتفكير : وانت وش رايك بشخصيته ؟! ساره مطت شفتها بغيره لانه بنظرها احلى منها : عادي ! وشايف نفسه كثير !، ومتسلط وعصبي ويرفع الضغط قاطعتها عائشه : حبه حبه علامك هبيتي كذا ! مين احلى انت والا هو ؟! ساره بإحباط نزلت يدها :اكيد هو ! ما الومه لما يقول عني عاديه ...احيانا اطالع نفسي بالمرايه اتخرع ! واكثر شيء يقهرني اناقته واهتمامه بنفسه ! إلي يشوفه يقول عنده مقابله ! عائشه بضحكه خفيفه : اشم ريحه غيره ! ساره باستسلام : اعتبريها غيره ! وما ألومه اذا خطب وحده ثانيه اكيد يبغى وحده يباهي فيها ! وبقلب ميت : انا خلاص ما ابغى لا زوج ولا شيء ! سرعان ما رفعت راسها وهي تمسح على راسها بوجع : ليه ضربتيني ! نزلت عائشه الدفتر : علشان تصحين يالغبيه! انا ما كنت ابغى ماجد وخاصه لما قابلته ما في بيننا نقاط تشابه انا بجهة وهو بجهة ! ومع ذلك لما تم الزواج خلاص رضيت بقدري وما تدرين كم كرهتك وتمنيت اكسرك لما قال انه يحبك ! ما اسمح له يروح لغيري ! افقع عيونه اذا ناظر غيري ! هذا زوجك وتملكيه انت الحين بس ! تعالي شوفي ماجد اول ما يدخل البيت يسأل عني ...حتى لو كابر يظهر بعيونه الحب والاهتمام ....تحسنت علاقتنا في بعض كثير ....فتحنا صفحه جديده ...وكل واحد اعتذر عن الماضي ..... وانت تقدرين تبدين صفحه جديده ! اشرت ساره لها بإحباط : انت حلوه وغصب عنه ينعجب فيك ! خزتها عائشه بقهر : ما احد يلومني لما اقول عنك غبيه ! والحين قومي نشوف محاضره ونحضرها ترى من اول ماوصلنا وحنا نلف ولا حضرنا اي محاضره ! على الاقل نحضر وحده ! ساره بكسل : خلينا نسحب على الدوام طول الاسبوع ! لاحقين على القرف والتعب ! تكتفت عائشه باستسلام : وش علينا نسحب على ام المحاضرات كلها !! والحين تعالي نشتري فطور اخاف يتعب البيبي من الجوع ! واشرت على بطنها بدلع ! ساره ابتسمت بحنين للماضي :كبرنا وتغيرت الايام والحين نصير امهات ! عائشه بحنين : ايام راحت عسى الأيام الجايه احلى !!! وطالعت ساره بانتقاد : اما تكشفي او تغطي وجهك مثل العالم والناس ! شوفي ترى نص خدودك طالعه ! ساره وهي تسبل عيونها بدلع : حلوه صح ! مالت شفتها بقرف : الا تقرفين ! وينه مجنونك عنك ؟ ! ساره بجديه : لو يدري عني الا يذبحني ! تدرين انه بالسوق بالغصب غطيت كامل حتى عيوني ما تنشاف ! وقدام اخوانه ممنوع اكشف ! عائشه طالعتها : وليه لابسه كذا دام زوجك ما يقبل قاطعتها ساره بلامبالاه : ما ادري شيء بداخلي يرفض بالخضوع لاوامره ! للحين ما استقرت حياتي معه حتى انفذ اموره ! سحبتها عائشه من ذراعها: اقول امشي يا حظي ! انت ونهى ما تيجون الا بالعين الحمراء ! ** ** ** ** دخلت البيت وخلفها البنات مندمجات بالكلام عن احداث اليوم بالجامعه ! سوار رمت نفسها بحضن امها : ماما وين رحت ؟! مسحت على راسها وقبلت راسها لما بكت سوار : بالجامعه يا ماما ! وش فيك تبكين؟! احد زعلك ؟! سوار رفعت راسها وهي تمسح دموعها بيدها الصغيره : صحيت وما لقيتك ام سالم طالعتهم : الله يصلح هالتوأم بهذلوني ! يظنون انك تركتيهم هنا ! ابتسمت ساره بعد ما نزلت النقاب : السموحه يا خالتي ! نسيت اخبرهم اني طالعه ! ام سالم بإعجاب وهي تناظر ساره : حصل خير ! جهزي نفسك للغداء ! ساره بهدوء وقفت ومسكت يد سوار : ما لي نفس بالغداء يا خالتي ! البنات اكلو قاطعتها ام سالم : بطلوع الروح حتى تغدوا ! الا لما كلمهم ابوهم وعدهم يأخذهم للالعاب ! ساره بعتاب : سوار وش هالحركات ! سوار مدت بوزها بطفولها وتمسكت بعبايتها !! ساره بهدوء : تبغين شيء خالتي! ام سالم : سلامتك يا ابنتي ! روحي ارتاحي الحين ! *** ** **