أقدار - الفصل 89 - بقلم ضاقت انفاسي - مكتملة | روايتك

ثالث شيء ممنوع تكشفين مثل اختك وابنتها ! هذي الحركات ما هي عندي ! اخر شيء تمشين بنظام البيت تأكلين معهم وتشربين معهم وتعيشين وكأنك فرد من افرادهم ! حركات التحيز والاحزاب ما أبغى اشوفها او اسمعها ! تعايشي معنا وكأنك عايشه هنا من سنين ! طالعها يشوف رد فعلها : اتفقنا ؟! تناظر الارض بتفكير ....إما توافق وتكمل حياتها هنا او ترفض وترجع سرحت عند نقطة الرجوع ....ترجع عند عمار ؟! ما بقى عليه شيء ويتزوج ويبدأ حياة جديده ..واكيد زوجته ما تقبل بوجودها ! ترجع عند محمد وتسافر وتترك المكان إلي عاشت كل سنينها فيه ؟! وبناتها لو رجعت محمد اكيد المجنون ما رح يقبل تأخذهم ؟! ولعمها ابو راكان مستحيل ترجع ! لمتى تعيش مشرده هنا وهنا ؟! حانت اللحظة إلي تستقر فيها وتعيش بجو اسري تصنعه بنفسه ! اخذت نفس وقلبها يدق بقوة ....طالعته بتوتر لما شافته يتأملها ...تكلمت تقطع تأمله : اتفقنا بس عندي سؤال ؟! هز رأسه بتفهم واشر لها تتكلم : تفضلي وش سؤالك ؟!! ساره بتردد وهي منزله عيونها : ءء انت كيف وصلت لخلف ؟! قصدي كيف تزوجتني قطعت كلامها لما رفعت راسها و شافت تحول ملامحه شتمت نفسها على لقافتها ! وقف وهو يحاول يمسك اعصابه وبنبره حازمه تكلم : اضيفي هذي النقطه «ما احب اللقافه والحرمه الثرثاره ونقل الكلام » مطت شفتها وبنفسها «مالت عليك يا متخلف ! » ** ** ** ** اميره فتحت عيونها باستنكار وعدلت جلستها : الحين أختي ساره تكون ابنة عمتك ؟! كيف ؟! اول مره اسمع بذي السالفه ؟! هز راسه يشرح لها السالفه : انا ما كنت ادري عن شيء ! اليوم كلمتني امي بالموضوع ! لما شافت ساره ظنتها «مها» ام ساره ! اميره عقدت حواجبها بعدم فهم : كيف انا اول مره اسمع بعمتك ذي ؟! علشان كذا اخترت اسم ابنتك عليها ؟! وش قصتها بالضبط ؟! تنهد وهو يتذكر كلام امه : جدي الله يرحمه تزوج جدتي إلي تكون ابنة عمه وربنا رزقهم بعيال وعاشوا حياتهم مثل اي زوجين ! بس جدي الله يرحمه كان يحب وحده من عائله ثانيه ومنطقه ثانيه! واهله رفضوا زواجه منها ! يقولون بعد سنين حن جدي لذي البنت ورجع خطبها بعد ما مات ابوه وما احد يمنعه ! وقتها صك عمرها البنت 40 كبيره قاطعته باندماج : يعني ما تزوجت وهي تنتظره ؟! هز كتوفه بعدم معرفه : والله ما ادري ولا خطر في بالي أسأل هذا السؤال ! انتم الحريم عليكم لقافه بالاسئله ! مطت شفتها : طيب كمل وبعدين انتقد الحريم ! تنهد بهدوء : المهم الاغلب وقف بوجهه حتى ما يتزوجها وخاصه انها كبيره بالسن ومن هذا الكلام ! بس جدي صمم وتزوجها وكانت منبوذه من كل العائله ! بعد زواجه سبحان حملت والكل يتكلم انه رح يطلع إلي في بطنها منغولي ! بس جدي رمى كلامهم بعرض الحائط وما اهتم ! المهم خلفت زوجة جدي بنت وكان اسمها «مها » كان جدي مهتم فيها كثير وكأنه ما انجب طفل غيرها ! وسحب على عياله كلهم وأحفاده وصب كل اهتمامه ب «مها » كانت زوجة جدي ام سعيد تعيش في شقه لوحدها مع مها واغلب الأيام جدي معهم ! وهجر جدتي ولا يسأل عنها ! هنا تولد الحقد لام سعيد ومها من إلي حولها ! اميره بمقاطعه : انت تعرفها عمتك مها ؟! رد وهو يحك ذقنه : ايه اعرفها انا اكبر منها وكان جدي يجيبها عند جدتي ! كبرت مها وهي تشعر بدلالها وجمالها ولا كأنه احد بالكون مثلها ! مات جدي الله يرحمه وانقطعت العلاقه ما احد يشوف مها وام سعيد ! ليوم جاء خبر انه مها على علاقه مع شاب ومن هذي الخرابيط ! والمعلومه وصلت لابوي الله يرحمه اشتط من الغضب وتكتم على الموضوع ونشر بين قرايبنا انها تزوجت ابن صديقه وسافرت لانه مستعجل يبغى يكمل دراسه ! عقدت حواجبها : طيب كيف مها صارت زوجة ابوي ؟! تنهد بضيق : امي تقول وقتها ابوي ما خبر احد بالعريس وتكتم على الموضوع حتى امي ما كان عندها علم بالسالفه ! لكن اليوم لما شافت ساره وشافت الشبه الكبير بمها ! سألت ابو فهد وتأكدت معه من اسم ام ساره وطلعت نفسها عمتي مها ! اميره بتأثر : كم عمرها ذاك الوقت ؟! رد بتفكير : ما ادري بالضبط كنا متزوجين ومستقرين بالخارج وقالوا وقتها انها تزوجت وما هو من زود العلاقه حتى اهتم ! يمكن وقتها كان عمرها بأول العشرين ! تزوجها ابوك يستر على الموضوع ! شهرين وبعدها توفى ! تنهدت وطالعته بجديه : اكيد خالي صالح و ابو الوليد يعرفون بذي السالفه لانه بعد موت ابوي قالوا انهم راحوا لمها وخلوها تتنازل عن كل شيء بمقابل تبقى البنت معها ! وبنبره باكيه : سبحان الله ماتت وقت الولاده و ما شافت ضناها ! ماتت يمكن وهي مظلومه ابو ليث مسح على وجهه بضيق : الله يرحمها اميره مسحت دمعها خانتها : تحرقني ساره ما تدري عن امها وما تعرفها ولا تدري عن شيء ! ** ** ** ** نزلت معه بتوتر وتنرفزت من سوار وثرثرتها وهي متعلقه بيد ابوها : بابا انا احب الفطور ! علشان اصير قويه ! واضرب البنات إلي يقولون عنك مجنون ! وقف ونزل لمستواها : مين يقول عني مجنون ؟!! سوار طالعته : ندى عبدالله وندى عزام ولجين اختها رفع حاجب : وش قلت لهم لما قالوا لك كذا ؟! سوار مطت شفتها : قلت لماما ! بس ماما تقول بابا مجنون واحلى مجنون ! حست وجهها ولع من الاحراج وش هالكلام ؟! ما تذكر انها قالت هالكلام ! حتى لو قالت ... قطعت افكارها وهو يكلمها : هذا إلي طلع معك ! حور مسكت يد ساره بتملك : انا اقول لماما وماما تضربهم ! طالعت ساره حور بمحبه تستاهل بوسه مو مثل سوار ام لسان ! سوار بتذكر : احيانا تضربهم وتمنعنا نلعب معهم ! بس عمو سعود يقول لنا إلعبوا مع بعض ! اخذت نفس وهي ماسكه يدها ما تضرب سوار على لسانها المنفلت اليوم وخاصه لما شافت نظراته تحولت للغضب ! تنهدت براحه لما مشى متوجه لصالة الاكل ! حلفت بنفسها الا تطق سوار على لسانها الطويل ! دخلت الصاله وألقت نظره سريعه على الوجوه الجديده ! وسرعان ما جلست جنب فاطمه بعد ما ردت السلام بصوت خافت ! ام سالم بهدوء : وعليكم السلام ! واشرت لساره : اجلسي عند زوجك انت والبنات ! همست لها فاطمه : هذا النظام ! ردت ساره بتوتر من الاجواء : مرتاحه هنا ! تحاشت النظر لجهة زوجها حتى ما تشوف نظرته المرعبه ! ام سالم بتفهم لاحراجها : المره الجايه تجلسين عند زوجك ! ساره بهدوء : ان شاء الله ! انشغلت بالتوأم وطلباتهم على الفطور ! همست لها فاطمه باستغراب : افطري ما اكلتي شيء ! ساره ما تعرف تأكل وهي متغطيه ردت بمجامله : ملحقه على الفطور الاهم التوأم ! بعد وقت قصير بدأ الاغلب ينسحب من المكان ! ما انتبهت على خروجه من المكان ! تنهدت بعد ما طلعت فاطمه ما اخذت راحتها من وجودها ! حور بهدوء : خلاص ماما شبعت ! مدت اللقمه لسوار هزت راسها بالرفض : خلاص ماما هنا وصل الاكل ! واشرت على حلقها ! وقفت تغسل للتوأم وبعدها ترجع تأكل لقمتين ! رجعت لصالة الاكل وتفاجأت بالخدم يرتبون المكان ! عقدت جواجبها وش هالسرعه بالتنظيف ؟! طلعت بدون اهتمام لانه الاكل اخر اهتماماتها ! تعودت بالسنين الماضيه على الجوع وقلة الاكل حتى صارت معدتها تكتفي طول اليوم بكم لقمة ! سألت عن مكانهم وتوجهت تجلس معهم حسب الاوامر ! سلوى بابتسامة : سوير تعالي سلمي على امي وزوجات البابا ! تقدمت بهدوء وسلمت على زوجات ابو نورس و بنفسها تبتسم بسخريه وهي تتخيل نفسها الرابعه ! سلوى بابتسامة : وهذا بابا ! طالعتها ساره وبنفسها« يا ثقل طينتك مين طلب منها ابغى اسلم على احد » وبمجامله بدون ما تناظره سلمت عن بعد وتوجهت لزوجها وجلست وقلبها يدق ملامحه ما طمنتها وكأنها اقترفت خطأ ! ام سالم بهدوء،: عساك مرتاحه بيننا ! ساره تحس بعدم راحه تحس كل كلمه محاسبه عليها وبنبره هاديه: الحمد لله ! تنهدت براحه لما وقف وهم بالمغادره : تبغين شيء يمه ؟! ام سالم بمحبه : سلامتك يمه ! سوار وقفت : بابا نروح معك ! ام وسيم بضحكه : هذي تعلمت لك ! رد بابتسامة : كذا الظاهر قاطعهم دخولها وهي عافسه ملامحها توسعت ابتسامته بترحيب : هلا بأم فهد ! عقدت ساره حواجبها وبنفسها «هذي زوجته ؟! مطت شفتها بقهر وغيره وهي تناظره يضحك معها » ام فهد بضجر : خيانه ما انتظرتوني على الفطور ! ودوبها انتبهت على وجود ساره والتوأم : ذول بناتك ! ابتسم : يجننون صح ؟! ام وسيم : ابوك يالثقه ! مزيونات مثل خالتي ام سالم ! تقدمت ام فهد واشرت على ساره بعدم رضى : وهذي زوجتك ؟! مدت ام فهد يدها تسلم وتفاجأت لما مدت ساره يدها ببرود وما كلفت نفسها توقف بوجهها ! تعمدت ساره هالحركه بعد ما شافت نظرات عدم الرضى من ام فهد ! هز راسه بدون كلام وطالع التوأم بتنبيه : لا تبتعدوا عن الماما ..مفهوم ! وطالع ساره : تبغين شيء يا ام فهد ؟! بلعت ريقها من نظراته وحست انها ارتكبت غلطه كبيره ! اخذت نفسها تقوي نفسها ما عملت شيء غلط وبهدوء : سلامتك ! ورفعت راسها باستنكار ليه يقول لها ام فهد ! ام سلوى بابتسامه بعد ما طلع : مستعجل على العيال يناديك «ام فهد » سلوى تكتفت : عمي طول عمره الكل يناديه ابو فهد على اسم جدي ! يا ويل إلي يناديه بإسمه ! ام فهد بابتسامة : عاد انا سبقته وسميت ولدي على اسم ابوي قبله ! محتكر هالاسم لنفسه وهو جالس لا زواج ولا بطيخ ! حتى سمعنا بالصدفه انه متزوج وحنا على بالنا انه عزابي ندور له عروس ! رفعت ساره حاجب وبنفسها «هذي اخته... » ما هي قادره تستوعب انه ما هو متزوج ! وهي اول حظ له ! بس كيف تزوجها وهو اعزب ! هذا السؤال إلي ما رح تلقى له جواب دام خلف مختفي ! حست سمعها انشل لما تكلمت ام فهد : والبنت إلي خطبناها له ...وش نقول للجماعه ؟! ابو نورس بتدخل : وش فيها كملوا الموضوع وتكون الثانيه ! طالعته ساره بكره وبنفسها «يا زينك وانت ساكت يا ابو الحريم» ام فهد : ما رح اكمل حتى اخذ منه الموافقه ! ما رح نتفشل يمكن يهون عن الخطوبه ! وخاصه اذا انحكم مثل ابو ليث ! طالعتها ساره وهي رافعه حاجب علامها داخله فيها بوز ؟! كل هذا لانها ما وقفت بوجهها ! ام سالم بهدوء : خذيها مني كنسلي الموضوع ...دام زوجته موجودة ليه يتزوج الثانيه ؟! فاطمه بغمزه : اشوف جدتي بصف سوير ! اعطتها ام سالم نظره بمعنى «انكتمي » حست بالضجر والاختناق وهي جالسه ومتغطيه والسيد ابو نورس مبلط بالمكان وما له ناوي يطلع ! رفعت حاجب باستنكار للصوت النشاز إلي سمعته ! إلتفتت باستنكار لها وهي داخله والدخان يتصاعد من راسها : وينها وينها ام سالم ؟! اميره من خلفها متفشله :،يمه بعدين معك ؟! ام محمد بغضب : اتركيني ! وتقدمت والشر يطلع من عيونها : انا تستغفليني طول وقتي ! ساعات اجلس معك يا الخاينه ولا تقولين لي انه ضرتي الحيه تكون اخت رجلك ! ام سالم بهدوء : اجلسي يا محمد وخلينا نتفاهم ! ام محمد بنبره غاضبه : اي تفاهم وانت مستغفليتني! الحين ضرتي تكون مها ؟! مها ما غيرها البزر ؟!!! وعضت على اصبعها بقهر: اخخخخ يالقهر ! انا يتركني ويتزوج علي بزر ! وينجب منها هالناقة ! ابو نورس طالعها لقلة عقلها : ترى كل إلي تتكلمين عنهم الله يرحمهم ! يعني هالثرثره على الفاضي ! لا زوجك راجع لك ولا ابنة زوجك مختفيه من الدنيا ! جالت بنظرها تبحث عن ساره واخيرا استقر نظرها عليها جالسه تطالعهم بعدم فهم ! تقدمت ام محمد منها : حسبي الله عليك وعلى امك ! تسرقون الرجال من زوجته ! ابو نورس وقف وبحده تكلم : وقسم بالله يا ام محمد كلمة زايده توجهينها لابنة عمتي ما يصير خير ! طالعته ام محمد وخافت من نبرة صوته التوعده وبصوت فيه رجفه : الحين صارت ابنة عمتك ! دامك مهتم فيها هالكثر ليه رفضتها لما خطبتها ام وسيم لك ! طالعها بلا مبالاه : ما كنت ادري انها ابنة عمتي مها ! ولو كنت ادري من قبل يمين بالله الا اسحبها تعيش عندنا معززه مكرمه ! ام محمد : ليه احد خبرك انها مذلوله ! تراها حيه قاطعها بتحقير لكلامها : دامك زوجة ابوها ما ظنيت شافت الخير منك والحين تجلسين ضيفه بإحترامك أهلا وسهلا كلام زايد مع السلامه والباب يوسع جمل ! اميره طالعته بحده : تكلم مع امي زين قاطعها بحده اقوى : لما امك قاطعتهم ام سالم وهي تسحب ام محمد معها لمجلس الحريم : تعالي يا ام محمد ! استجابت ام محمد لها وطلعت وتبعتهم ام وسيم وزوجات ابو نورس ! اعطت اميره نظره ناريه لابو نورس وطلعت ! مط شفته بقرف : وش هالحريم ذول ؟!!!! طالع سلوى بتحريص : اذا رجعت ام محمد هنا ..ناديني انا إلي اوقفها عند حدها ! وطالع ساره بإهتمام : خذي راحتك البيت بيتك ...وما عليك منها تراها عجوز مخرفه ! استأذن وطلع بعدها بخطوات ثابته ! تناظر الارض وتحس عقلها بدوامه ما هي فاهمه شيء ! وش يثرثرون فوق راسها ؟! يتكلمون عن امها والا تتخيل ؟! رفعت نظرها على سلوى إلي واقفه تناظرها ومبتسمه ! زفرت بضجر ساره ما لها خلق ! سلوى بسعاده : يا بختك بابا يدافع عنك ! وقبل ما ترد دخلت اميره بخطوات هاديه وتكلمت : سوار وحور اطلعوا للحديقه البزران برا ! وطالعت ساره بحنيه : تعالي معي يا ساره ! ساره طالعتها بضياع : انا مليت ! اميره سحبتها بشويش : تعالي ابغى اجلس معك لوحدنا ! سلوى تخصرت : يا سلام ..انا ابغى ساره اجلس معها واتعرف عليها ! اميره خزتها بدون نفس : ملحقه رح تملي وهي بوجهك ! ** ** ** ** من لما رجعت ما سكتت وهي تبربر وللحين ما طلعت حرتهت ! ابو الوليد بضجر : وبعدين ؟!! ام محمد ضربت على صدرها : اخخخ يا حرقة قلبي وانت مو حاس فيني ! طول هالسنين تعرف مين ضرتي وساكت ! ولا فتحت فمك بحرف ! ابو الوليد بضجر : وهذي انت عرفتي وش صار بالدنيا ؟!! ام محمد بقهر: انا ما يقهرني الا حظها هالساره ! لو شفت كيف مهتمين فيها وكأنها قاطعتها ام الوليد : الله يوفقها ...انت وش حارق بصلتك ! ام محمد بحقد : هذي شايب وكثير عليها مثل امها ! وبتذكر ابغى اسألك ابو راكان يدري مين ام ساره ؟! أبو الوليد بهدوء : ما احد يدري الا انا واخوي صالح وفهد الله يرحمه ! وليد رفع حاجب بانتقاد : واجبرتوها تتنازل عن حقوقها قاطعه ابو الوليد بتبرير : مو حنا إلي اجبرناها ! لما بغينا نتكلم معها بهذا الموضوع لقينا خلف سبقنا واجبرها تتنازل عن كل شيء ! ام محمد جحظت عيونها : والكلب خلف يدري وما خبرني ! ابو الوليد تنهد : خلاص ماضي وانتهى ليه تفتحين صفحات ماضيه ! ام محمد بغضب : دامك تعرف ماضي ام ساره ليه تخطبها لولدك ؟!! ما جاك العلم انها مثل امها وأزفت منها ! نادر اكيد مات من سواد وجهها ! كم جلست تلعب من خلف ظهورنا بحجة زياره زوجها المجنون ؟! جاوبني ! وليد طالعها بضيق : يا عمة ما يصير تطعني بالعرض ! والميت الله يرحمه ! وساره عمري ما شفت عليها الشينه لا تتبلي عليها بلاه ربنا يعجل عقوبة هاللسان ! ام وليد بتأكيد : كل شيء ولا الشرف يا ام محمد ! ام محمد وقفت بغطرسه : انا إلي رح اكون شوكه بحلقها! ** ** ** تناظر اميره بعد ما انتهت من السرد وبصوت مخنوق : قولي قسم ما اخفيت شيء عني ! اميره بعد إلحاح من ساره اعطتها السالفه بالتفصيل تسمعها منها ولا تسمعها من غيرهاوبنبره صادقه : وقسم بالله هذا كل إلي اعرفه ! زمت شفتها ساره بقوه تحاول تمنع سيل الدموع بعد ما سمعت قصة امها حاولت تمسك نفسها اكثر بس فشلت وطلعت شهقه منها غصب عنها ! اميره بتأثر : ساره ! ساره وهي تمسح دموعها وبصوت باكي : كانت دوم جدتي ام سعيد توصف لي امي وكأنها ملاك نازل من السماء ! تدرين ليه ؟! لانها متأكده من براءتها ! اكيد ظلموها مثل ما ظلمني خلف ! تدرين انا اكره ابوي كيف يستغل وضعها ويتزوجها بهذا العمر ! صادقه لما كانت جدتي تذمه ! انا اكره قاطعتها اميره وهي تحط يدها فم ساره : اششششش حرام ما يصير تراه ابونا ! صدقيني لو عشتي مع ابوي بتحبيه قاطعتها وهي تبكي : وأمي وش ذنبها ؟!! اكره خالي فهد لانه ظلمها ! ودمرها ! طالعت اميره وعيونها كلها حقد : المجنون يبغى يسمي على اسم ابوه ! لو يموت ما يحمل واحد من عيالي هالاسم ! اميره تخفف عنها : حنا وين وانت وين؟! وبغمزه : تتكلمين وكأنك حامل ! ترى ما امدا قاطعتها ساره بحرج والدموع ما زلت تشق طريقها بخدها : اميره ! اميره تنهدت : الماضي راح ...ما في داعي نعيش على أطيافه ...انا ما كنت ابغى السالفه تطلع بس الزفته مها سمعت كلام ابوها وهو يكلمني ونقلته لامي ! حتى خالتي ام سالم تقول بعد موت مها ظهرت الحقيقه انها مظلومه ! علشان كذا تلاقين كل عيال عمي فهد يحبون مها ولها معزه خاصه لانها مظلومه ! ساره مطت شفتها بحزن: وش استفادت امي من هالمعزه ! ماتت بقهرها وحسرتها ! اميره حطت يدها على كتف ساره : الله يرحمها ! الميت الحين ما يبغى لا انتقام ولا شيء الا الدعاء والصدقه الجاريه ! امك الحين محتاجه الدعاء منك ! دموعك هذي ما رح تفيدك ولا تفيدها إلا زياده الحزن بقلبك ! قومي يا ساره صلي ركعتين وادعي لامك وجدتك وابوي ! *** *** ** ** ** عبدالله بعدم تصديق : الحين فهد خالها ؟!!! عزام هز راسه بتأكيد : سبحان الله كيف الصدف ! نصيبها تكون مع ابن خالها ! ام راكان بهدوء : سبحان الله صبرت ونالت ! عسى تتهنى باقي عمرها ! ويقدرها ويحترمها زوجها ! الكل يمدح بأخلاقه لولا حبتين الغرور إلي عنده ! عفس عبدالله ملامحه بغيره : شايف نفسه على الفاضي ! ابو راكان خزه : ابو فهد شايف نفسه على الفاضي ! اقول خلاص قفلوا السالفه البنت راحت لزوجها واهل امها ! الله يوفقها !! طالعته ام راكان بعدم تصديق لاخر جمله ! ** ** ** ** جالسه عند امها وتقلب بضجر طالعتها امها : وش فيك ؟! عائشة بضيق : ساره من لما رجعت لزوجها سحبت علي ! ام سعود عفست ملامحها : عشتوووو ! الظاهر رح يرجع موال زمان من جديد ! عائشه ابتسمت : احبها وش اعمل ؟! ام سعود بلامبالاه : وين زوجك ؟! عائشه براحه صار اخف من اول وحياتهم افضل بكثير وخاصه بعد حملها : مع ربعه ! ام سعود بحرص : باكر لازم نروح للدكتوره وتفتح لك ملف ! مسحت على بطنها بفرح ما هي مصدقه خلاص كبرت ورح تصير ام : ان شاء الله ! ** ** **