أقدار - الفصل 71 - بقلم ضاقت انفاسي - مكتملة | روايتك

زواج ماجد طالعت صاحبة الصالون لما اشرت لي انها انهت شغلها ! ابتسمت بإعجاب بالتوأم ! بالميك اب والتسريحات والفستان الابيض يأخذون العقل اقتربت وحصنتهم من العين عيون الناس ما ترحم ! حور بحماس : ماما انا عروس ! سوار مسكت يدها : وانا عروس،! احس بفرح يداعب روحي وانا اشوف فرحتهم ! احاول كل شيء انحرمت منه بطفولتي اعمله للتوأم ! ما انسى كانت امنيتي بطفولتي أعمل تسريحه وألبس فستان وأكون مثل العروس ! تنهدت ايام مرت وما تعود اتذكر لماكانت عائشه تقولي لما تتزوج ح تخليني اجلس على الكوشه عندها ! طردت ذكريات الماضي واتصلت بسلمان يوصلني للقاعه بما انه تبرع بهذي المهمه ! وبعدها وقفت اعدل الشيله قبل وصوله ! مر وقت الانتظار وانا اناظر سوار وحور ! وعقلي بعالم اخر احاول اتصور صوره عائشه كيف حيكون شكلها ! متردده اروح لها وابارك لها ! كيف حيكون الوضع بالقاعه ؟! وقفت لما اتصل سلمان ينتظرني بالخارج ! ركبت السياره من الامام وألقيت السلام بهدوء رد سلمان بروقان : هلا والله ! حاس نفسي سائق سياره العروس ! واشر بيده للخلف على التوآم ! وبجديه تكلم : ترى العين حق حصنيهم ! وبمرح كلم التوأم : مين العروس ؟!! سوار بحماس : انا العروس ! حور بنفس الحماس: ماما قالت انا عروس !. سلمان ابتسم : وين العريس ما اشوفه ؟! سوار بتفكير : ما نبغى عريس ماما تقول عريس عيب ! بس نلعب عروس بدون عريس صح ماما ؟! طالعني سلمان وضحك : وش هالكلام ؟! تتذكرين لما عملنا زواج وحنا صغار وحضرتك فتنتي قاطعته بتهكم : انا ما فتنت على احد ! طالعني وضحك : ايام راحت وما ترجع ! اكلنا طق بسببك ! رديت بدون ما اناظره : تستاهل !، طالعني وكأنه تذكر شيء ابتسم وهو يغمز : عمي مناف يسأل عنك ! اليوم وصل قاطعته بلا مبالاة: وش يخصني فيه ؟! تكلم بجديه : تدرين للحين متفشل كلما اشوفه اتذكر السروال إلي كنت لابسيته لما صار مع عزام حادث قاطعته بضجر من هالذكريات : سلمان رأسي مصدع ...فكني من هالذكريات ! رفع حاجب وهو يسترق النظر لي : اوكي ننسى الماضي ! وخلينا بالحاضر غريبه ما اشوف ألوان الطيف بوجهك ؟! لا تقولين ما رح تحضرين ؟! هزيت راسي بالنفي : اكيد ح احضر الحفله ! عقد حواجبه : اجل ليه مو متزينه ؟!! طالعته بتعجب : يعني لازم بالزواج كل وحده تدهن وجهها بجميع الالوان ؟!! وال قاطعني : انا إلي اعرفه لازم تطرشين وجهك بكل انواع الدهانات قصدي بالمكياج ! حتى تكون مميزه بالحفله ! رديت بثقة ظاهره :وانا مميزه بالحفله بدون هالخرابيط ! صفر سلمان : اموت على الواثق ! وبجديه كمل : تدرين انك عاقله وتفهمين ! لو تشوفين نسرين ما تعرفينها ملامحها مطموسه ! وعزام مسح فيها الارض وغصب عنها خففت من المكياج ! لو تشوفينها تموتين من الضحك على شكلها ! عفست ملامحي من تسلط عزام ! انسب لقب يناسبه «متسلط» يظن كل الناس تمشي بأمره وحسب مزاجه ! نزلت من السياره بعد ما وقف سلمان السياره ! نزلت التوأم مع بعض تنبيهات خفيفه للتوأم ! سلمان وقف جنبي : ماني قادر استوعب انك ام مثاليه ؟!،- امم المفروض لما نعرض صورك القديمه يكون شكل عيالك بشعر منفوش ! واشر على انفه بطريقه مضحكه : ومن هنا شلالات بعدة الوان ابيض اخضر قاطعته وانا عافسه ملامحي بقرف : مقرف ! رفعت حاجب وانا اشوف ضحكته ! تنهدت بنرفزه : صدق سخيف ! حور تسحب يدي : ماما بسرعه الحين ينتهي الزواج ! سوار بتأييد : بسرعه ماما الحين العريس يهرب ! سلمان بضحكه : من وين يهرب وعمي ابو ماجد ساحبه خلفه مثل الخروف ! استغربت كلامه وسألت بشك : ليه ماجد مغص قاطعني صوت من خلفي : سلمان انا ادورك واتصل فيك وحضرتك طاقها سوالف ! ما إلتفت لاني عرفت الشخص من صوته ! تقدم وجلس على مستوى التوأم : بسم الله ما شاء الله ربي يحفظهم ! سوار بابتسامه : عمي مين احلى انا والا حور ؟!! سعود بضحكه قصيره : والله ما ادري مين حور ومين سوار ! عفست ملامحي بكره لهذا الشخص رافع خشومه للسماء مالت عليك وانت هالنظارات ! ابو 44 عين ! مشيت خطوتين بأمر : يلا يا حور ،سوار ! وتوجهت لداخل القاعه بخطوات هاديه ! قررت اتوجه لغرفة العروس ما ادري قلبي دق طبول ما أدري وش السبب !! معقول من رهبة لقاء عائشه بعد سنين طويله مضت !!! *** *** *** *** ام سعود بصرخه : انكتمي ! فتحت عيوني باستنكار ما احد محترمني وهذا وانا عروس : تراها مو حلوه منك يا ماما تكلميني كذا وانا عروس ! ام سعود انضغطت من عائشه وطلباتها : عائشه ترى هذا عقوق غثتيني بطلباتك يايمه ! عائشه بندم : اسفه ماما والله مو قصدي ! اسماء خزتها : تراك عروس لا تفضحينا اذا دخل احد من اهل العريس ! مطيت شفتي بانزعاج من هالزواج ومراسيمه بس بنفس الوقت احس بفرحه اني عروس: تبغون تذلوني لاني مربطه بهذا الفستان ؟! وزفرت بملل ! رفعت حاجب وانا اشوف حماتي داخله وخلفها بنت طويله ومعهم بنوتين نفس الشكل ! ام ماجد سلمت علي والفرح يتراقص بعيونها ! استغربت البنت إلي معها احسها متوتره ومتردده بالسلام علي ! ام ماجد أشرت عليها بتعريف : هذي ابنة عم ابو ماجد ! امي تعذرت : والله ما اعرفها من قبل ! ام ماجد بتأكيد : الا تعرفينها اذكر كنتم عندنا ودخلت وسلمت عليكم في بيت عمي ابو راكان ! بس يمكن مستغربين كانت امتن من كذا ! طالعت البنت وهي تناظر ام ماجد والظاهر ما عجبها كلامها ! بس لحظه لحظه كأني تذكرتها ! هذي حبيبة ماجد ؟! الا هي ! وانا اقول ليه تناظرني ومتردده تسلم علي !! مديت يدي لما اقتربت تسلم علي وباركت لي وكأنها مجبوره ! وش قصتها معي ؟ ! ما احد جابرها تيجي لغرفه العروس وتبارك لي ! اكيد عندها سالفه ! يمكن تبغى تشوف عروس ماجد إلي هي انا عن قرب ! ما ادري قلبي ما ارتاح لها وماني طايقها وبسرعه سحبت يدي منها وتشاغلت مع اختي اسماء ! شفتها وهي طالعه من الغرفه بهدوء حتى ما سلمت على امي واخواتي ؟! وش هالنفسيه هذي ؟! افففف غثيثه ! معقول اغار منها لانه ماجد يبغاها ! ما انكر جمالها الرباني طول وخصرها باين بالرغم من العبايه الواسعه ! إلتفت على امي إلي تتكلم مع حماتي : ما تذكرتها ! ام ماجد ردت : تراها كانت خطيبة عبدالله سلفي وطلقها ! فتحت أمي فمها بتذكر : ايه ايه تذكرتها ! ذول بناتها ؟! ام ماجد : ايه بناتها تراها متزوجه واحد مجنون ! اسماء اختي انفعلت : كل هالجمال لواحد مجنون ! ابتسمت على انفعال اسماء المبالغ فيه ! ليه لازم كل وحده حلوه تأخذ انسان عاقل ! هذي انا حلوه ومزيونه ومتزوجه واحد متخلف ! المجنون ارحم منه ! اتركوني من هالبنت وخلوني بهمي «ماجد » هذا اكبر هم بالحياه ! تدرون نسيت اشتري صبر يمكن يزيد قوة الصبر عندي ! ادري اني سخيفه بس من التوتر كلما اتذكر قرب موعد الزفه ! _علشان ييجي ماجد ويتصور ! لقطت اذني هذي الجمله ! نعم يتصور ؟! ما بقى الا المتخلف يتصور معي! وبسرعه طالعت حماتي وطار كل التوتر والخوف وهذي الخرابيط : لا تتصلين بأحد انا ما ابغى صور ! شفت أمي تؤشر لي بعيونها بمعنى «انكتمي» طنشتها وطالعت ام ماجد المتفاجئة من كلامي : بس حنا اتفقنا مع المصوره ! رديت بكل برود : عادي نلغي الحجز ما في اي مشكله ! ام ماجد صار وجهها بالالوان والظاهر ما عجبها كلامي : ليه ما تبغين ؟! ترى حلو الصور للتذكار ! مطيت شفتي امحق ذكرى والعريس ولدك ومع ذلك حاولت اتصنع الذوق بالرد : الذكريات الحلوه ما هي بحاجه للصور بالاتفاق والمحبه نكرر كل لحظه حلوه ! وبداخلي اعزي نفسي على هذا الزواج ! امي تكلمت وقهرتني بكلامها : ما عليك منها خلهم يتصورون قاطعتها بنرفزه : ماما ! طالعتني ونظراتها تقول «نعامه ترفسك» ترى حنا نفهم معنى النظرات بدون الكلام ! تابعت كلامي متجاهل نظراتها : وقسم بالله اذا دخلت المصوره من هنا ما اجلس ولا دقيقه ! اسماء تستخف دمها : خلاص نقول لها تدخل من هنا ! واشرت على باب ثاني ! ام ماجد وجهها احمر من القهر بس اضطرت تمشي الموضوع حتى يتم الزواج على خير : خلاص على راحتك ! تنهدت براحه ايوه كذا ! ابتسمت على نظرات امي المتحلفه لي وانشغلت مع اسماء إلي تتأكد من شكلي قبل وقت الزفه ! رفعت نظري على دخول اخوات العريس انا ما عرفتهم بس لما كلمتهم ام ماجد عرفت انهم اخوات ماجد ! _ ما بقى شيء على الزفه اتصلي بماجد يا يمه ! طالعتها وانا رافعه حاجب : نعم ؟! حولت نظرها علي لما سمعت صوتي وواضح اني اكلمها ! بس ناظرتني وكأنها تتأكد : فيه شيء ؟ ! خففت شوي من حدتي وحاولت اكون لبقه شوي : ايوه فيه شيء ! انا ما ابغى العريس يدخل ! بغيت اضحك لما سمعت ردها انقلبت الايه لما قالت : نعم ؟؟! كيف العريس ما يدخل ؟!! ام ماجد ما عجبتها هالنقطه تكلمت بإعتراض : تبغين الناس تتكلم علينا ! ماجد اكيد رح ينزف تراه مومطلق ولا ارمل حتى يتزوج كذا،! انا سكتت عن الصور احترام لرغبتك بس انه ما ينزف ما اقبل ! وطالعت امي : وش رايك يا ام سعود ! ابتسمت امي مجامله لها ؛ ايه اكيد رح ينزف ! اخت العريس_:وبعدين وش سالفه الصور ؟! للحين ما تصو قاطعتها ام ماجد : خلاص يا راما انسي سالفه الصور ! وخلينا بالزفه ! ما عجبني نظرات راما لي وكأني حشره قدامها بس مو انا عائشه إلي اسمح لها تناظرني كذا ! وبجزم تكلمت وانا امط بالكلام اغيظها : الزفه وماجد معي لاااا ما ادري ليه ابغى اغيضها مع اني ما اعرفها من قبل ! راما بغضب : والله هذا زواجنا ونعمله مثل ما نبغى ! وماجد رح ينزف غصب عن الراضي والزعلان ! طالعتها ببرود اقهرها : ذيك الطريق روحي زفيه الله يسهل دربكم ! انا انتظركم هنا ! ردت علي بحده والظاهر انها تبغى المشاكل : مو بكيفك ! طالعتها بتحدي ونسيت اني عروس ! ما ادري ليه لما اشوف احد من اهل ماجد او ماجد اتنرفز وافقد صبري : اشوف كيف رح تجبريني ؟!!! اقتربت امي وقرصتني بخفه بدون احد يلاحظ : اختصري المشاكل وامشي مثل ما يبغون اهل زوجك ! هزيت راسي بعناد وطالعت حماتي : يا خالتي هذا زواجي ابغى يكون مثل ما رسمت له ! يا ليت ما تضغطون علي ! ردت حماتي ووجهها منتفخ من الغضب بس ما اظهرت وردت بهدوء: خلاص بكيفك ! شفت نظرات بناتها شوي ويذبحوني بس ما اهتميت اهم شيء نفذت كلامي !!!! ما ادري ليه اتصرف كذا؟!!! يمكن لانه بظني انها خاربه خاربه ومتأكده ماجد حيعمل حركة نذاله ورح ارجع مع اهلي اليوم حدسي يقول كذا ! ** ** ** ** ** *** *** *** جلست على احدى الطاولات بضيق وانا للحين مو مستوعبه نظرات عيشه لي ؟! نفس البنت لما كنت في بيت عمي ابو راكان ! نفسها «عائشه » وقتها حسيت شكل ام سعود مألوف لي ! وما خاب ظني ! تنهدت بعمق وقلبي انجرح من نظراتها لي ! المره الثانيه اقابلها وتناظرني بنفس النظرات ! وش سبب هالنظرات ! عضيت على شفتي بقهر من غبائي المتفاقم راز وجهي عندها ! خابت ظنوني فيها وانكسر آخر جسر للصداقه ! غمضت عيوني واحس بحقد وكره يتولد بداخلي لشيء اسمه «عائشه» ليه الناس بطبعها الغدر !!! ليه كلمة الوفاء محذوفه من قاموس الصداقه ؟ !! ناظرت شروق لابسه فستان سكري طويل بأكمام شيفون جسمها ممتلئ شوي ! اقل وصف لها «عاديه» هذي إلي فضلها عبدالله وطلقني علشانها ! هذي المتعلمه الفهمانه المتحضره ! وانا الغبيه الجاهله الاميه المتخلفه ! عضيت بشفتي وانا اتوعد رح تشوفون ساره إلي الكل تمسخر عليها ! رح ابدع بمجال الدراسه وبنفس الوقت ابذل اقصى جهدي بتربية التوأم ! واثبت لهم انه الزواج بالحياه مو كل شيء!!! خلاص طابت نفسي من هالامور ! واكتفيت من حظي السيء ! حولت نظري لنوره واقفه مع شروق والغرور يشع منها ! ما ادري على وش شايفه نفسها ؟!! ما احد صار دكتوره غيرها ؟! انغثيت من شوفتهم وابعدت نظري للجهة الثانيه وانا أشوف ابغض وجه بالنسبه لي ! عفست ملامحي هذي وش جابها لهنا ؟! وش تقرب لهم ؟؟؟؟ استغربت جلوسها مع خالتي ام محمد ومندمجه معها بالسوالف ! وخالتي ماده للبوزه والظاهر زعلانه من شيء وهذي تبرر لها ! افففف وش هالحفله كل الوجوه تغث ! جلست عندي مريم بابتسامه : متى وصلتي ؟! رديت عليها بهدوء : قبل شوي ! تكلمت وعيونها على التوام : ربي يحفظهم ! علامك مو متزينه ؟! طالعتها بكامل زينتها ما شاء الله عليها حلوه واللون الخمري عاكس على بشرتها يمكن مريم اكثر شخص استلطفته في بيت ابو الوليد ! طنشت سؤالها ورديت بسؤال : متى الزفة ؟! هزت كتوفها : ما أدري المفروض انزفت بس ما ادري حاسه في مشاكل بس ما احد متكلم ! ما ادري بداخلي رددت «من هالحال و اردى» صايره شريره اتمنى الشر لغيري ! ما ادري اتمنى شيء يخرب هالزواج حتى ينكسر خشم ابو ماجد ماادري على وش شايف نفسه ! افففف ما ينبلع «يا ارض اشتدي ما عليك احد قدي » باءت امنيتي بالفشل لما تكلمت مريم بحماس : الحين الزفه ! هزيت راسي وانا اتابع بصمت ! *** *** *** *** *** انزفيت على انشوده ألف الصلاه والسلام عليك يا حبيب الله محمد ! اول ما وصلت الكوشه بدات الاغاني تعج بالمكان ! وقفت وانا اكلم امي : وش هذا ؟! امي متورطه ما تدري وش تعمل : خلاص مشيها يمه ! رديت بحزم : لا ! قولي لهم يغيرونه الحين ! هزت امي راسها ؛ انا اتصرف الحين ! بس انت انكتمي فضحتينا ! لا تناظروني كذا ! هذا زواجي وانا اعمله مثل ما ابغى ! الظاهر وصل الكلام لراما تقدمت نحوي وما هي ناويه على خير : وهذا تبغين تتحكمين فيه بعد ؟! لكن حامض على بوزك ! رديت بنبره هاديه : بس هذا شرطنا واتوقع اعطيتكم خبر من قبل ! ام ماجد احسها رح تنفجر فيني : خلاص مشيها يا عائشه ! راما ردت بثقه : اصلا ماجد كسر اشرطتك ! قاطعتها بغضب وفقدت اعصابي خلاص ابغى اخرب هالزواج وارتاح من هالكابوس : كسر يكسر يدينه ! تقدمت راما وهي تردح : احترمي نفسك احسن لك ! انا اول مره أشوف عروس وقحه كذا ! ردي كان بنبره اعلى : ما رح ارد عليك وانزل مستواي لك ! واشبعي بالعرس انت واخوك ! وتحركت خلاص ناويه اغادر ابغى ارجع بيتنا واهرب بأي طريقه ! عقلي توقف عن التفكير الفكره إلي تجول بخاطري ارجع لغرفتي وانام على سريري ! ما ابغى اتزوج ! وقفتني امي : عائشه ! راما : بقلعتها ! ام ماجد تلم الموضوع : خلاص فضحتونا ! ام راكان سحبت عائشه : ارجعي مكانك ولا تخربين يوم زواجك ! رديت بحده : ينطفى الزفت قاطعتني اخت ماجد ما أدري وش اسمها : اتركيها ..وش هالتخلف ! كبرت المشكله طبعا بتدخل نهى إلي كانت ساكته طول الوقت وما لها اي نشاط بالحفله ! والظاهر رح تطلع كل كبت زوجها واهلها الحين ! بصراحه كنت ابغى اضحك وانا اشوف الاحذيه تتطاير بالاجواء الله يستر لو ييجي على راس احد الا يكسر راسه وخاصه مع هالكعب وكأنه مسمار ! ما ادري كيف صارت هالحفله حوسه والصراخ والصياح يعم المكان بصراحه انبسطت خلاص ضمنت رجوعي لاهلي ! وخاصه لما تشادت امي وحريم اعمامي مع ام ماجد وقريباتها ! اندمجت وانا اشوف اسماء مع راما يا كرهي لها من انفعالي ناديت بصوت عالي : احلى يا أسماااااااء ما كملت الكلمه الا حسيت بيد قويه تلفني وكف يعدل ملامحي ! ناظرت متى دخلوا الرجال ما ادري ! الظاهر كنت منفعله زياده ! فتحت عيوني بصدمه بعد الكف تلقائيا عيوني طافوا بكل القاعه ! والكل جالس يناظر ! والكل يسجل هالحدث التاريخي ! العريس يضرب العروس على الكوشه ! تعلقت الدموع بعيوني موقف صعب جدا ! تقدم ابو ماجد وناظر ماجد بغضب والظاهر اجل الحسابات وتكلم بحزم : خذ عروستك وروح للفندق وفكونا من المشاكل ! دورت بنظراتي ابحث عن ابوي ييجي يشوف هالمهزله تقدمت امي بعد ما تغطت : تخسون عائشه تمشي شبر واحد مع ولدك هذا ! ضارب ابنتي و قاطعها ابو ماجد بغضب مكتوم : كل شيء ينحل بعدين ! سحبتني امي بقوه : امشي يا عائشه معي ! متى ما عرفوا قدرك يدلون بيتك ! بس ابو ماجد سحبني اقوى من يد امي الله ستر والا وقعت على وجهي ! حتى تكمل الصوره ! الشاطر يسحبني لجهته ! تكلم بصوت منخفض يصل لمسمع امي : لا تشوهين سمعة ابنتك بتهورك ! وطالع ماجد بحزم : خذ عروستك يا ماجد ! لحظه لحظه بس انا ابغى الطلاق من كل عقلي ! كيف فشل المخطط ما ادري ! تكلم ابو ماجد بصوته الجهوري الحاد : ترى ما صار الا خير سوء فهم وانحل بفضل الله يا حريم صلوا على النبي ترى العين حق ! حاوطني ابو ماجد بيده وهمس برجاء : اذا لي خاطر عندك مشي الموضوع وخليك العاقله بينهم ! وما تركوا لي فرصه اتكلم واخذوني وطلعت من القاعه لتنسدل ستاره « زواج فاشل » *** *** ***