أقدار - الفصل 68 - بقلم ضاقت انفاسي - مكتملة | روايتك

ما ترك احد الا وعزمه بمناسبة رجوع ماجد ولده البكر ! عم الحديقه بشخصيات مرموقه ! اجواء المكان توحي بالراحه مع الاضاءة إلي زادت المكان جمال ! طالع المكان بإعجاب من حظ ابنته تعيش بهذا المكان وقف قريب من ابو ماجد و يشعر بالفخر بما انه نسيبه وقريب من ابو ماجد ! ما ينكر استفاد كثير من هالخطوبه ! ومستحيل يفرط بهذا الخير ! بغض النظر عن ماجد إلي ما يطيقه لا من باب ولا من طاقه بس مضطر يجامله مقابل مصلحته ! رفع نظره لما دخل ماجد نافش ريشه يسلم على المعازيم لما وصل عنده سلم عليه وبنبره اقرب للسخرية : هلا بعمي ابو سعود «يا كرهي لك » وبمجامله: الحمد لله على سلامتك ! ما بغيت ترجع انقلب وجه أبو سعود وهو يشعر بالاحراج لما شافه تركه يكمل السلام على باقي الرجاجيل بدون ما يعبره ! ~~ ~~ ~~ انقلب وجه ابو راكان لما شاف محمد وعياله يدخلون إلتفت لابو الوليد ومتأكد كله تخطيط من تحت راسه ! اشاح ابو الوليد وجهه ببراءه ولا كأنه عمل شيء ! اضطر ابو راكان يبلع غضبه ما يقدر يتكلم بحرف دام الرجال موجودين الحين ! واضطر يسلم مجامله على محمد وعياله ! محمد ينتظر ينتهي العشاء ويغادر الرجال ويتكلم مع عمه ! ويحط النقاط على الحروف بعد مرور وقت ما بقى بالمكان الا ابو راكان وعياله وابو الوليد وعياله ! ابو الوليد وقف بهدوء وتكلم بنبره واثقه : يا ابو راكان ! طالعه ابو راكان بغضب بس ما تكلم ! تابع حديثه ابو الوليد : صل على النبي قبل ما ابدأ كلامي ! عم المكان بأصوات متفرقه بالصلاه على النبي ! ابو الوليد يوزع نظره على الموجودين : قال تعالى : ( لا خَيْرَ فِي كَثِيرٍ مِنْ نَجْوَاهُمْ إِلا مَنْ أَمَرَ بِصَدَقَةٍ أَوْ مَعْرُوفٍ أَوْ إِصلاحٍ بَيْنَ النَّاسِ وَمَنْ يَفْعَلْ ذَلِكَ ابْتِغَاءَ مَرْضَاةِ اللَّهِ فَسَوْفَ نُؤْتِيهِ أَجْرًا عَظِيمًا ) النساء/114  وبهذا الموقف نسعى للاصلاح عسى ربنا يكتب لنا اجر الاصلاح ! حدد نظره على ابو راكان : يا ابو راكان اسمع هالحديث إلي درسناه ايام المدارس واغلب الناس تحفظه بس قليل من يطبقه ! عن أبي هريرة رضي الله عنه قال : قال النبي صلى الله عليه وسلم : ( لا تَبَاغَضُوا ، وَلا تَحَاسَدُوا ، وَلا تَدَابَرُوا ، وَكُونُوا عِبَادَ اللَّهِ إِخْوَانًا ، وَلا يَحِلُّ لِمُسْلِمٍ أَنْ يَهْجُرَ أَخَاهُ فَوْقَ ثَلاثَةِ أَيَّامٍ ) رواه البخاري (6065) ومسلم (2559) . ما يحل تهجر اخوك اكثر من ثلاث ايام فكيف إلي هجر والقطاعه استمرت سنوات ! ترى هالحال ما يرضي رب العباد وهذي خطوات شيطان زينها في قلوبنا بعد ما امتلئ القلب بالحقد والبغضاء ! ايام عدت وانتهت وأنهت الماضي إلي مستحيل يتغير ويعود وحنا بعدنا واقفين على نفس السالفه ! عيال اخوك من لحمك ودمك انت شيخهم وعزوتهم ! الظفر ما يطلع عن اللحم ! وعمر الدم ما صار مويه ! من الليلة اتمنى يندفن الماضي ونعيش الحاضر بدون عتابات وفتح صفحات الماضي ! وخلاص نرجع مثل ايام قبل لا حواجز ولا مشاكل ونكون بيت واحد ! هذا ابو خالد من الليله يبغى الصلح وينمحي الاسى بين العائلتين ! واتمنى ما تفشلنا يا ابو راكان ! ابو راكان بملامح جامده : بس خلف ما قصر فينا كيف نن قاطعه محمد بصوت قوي : يا عم لمتى هالقطاعه والسبب خلف ؟!! خلف الله يستر على عباده ما احد سلم من شره ! اغلب الموجودين وصلهم ضرر من خلف خالي ابو الوليد وعياله وعيال عمي وحتى ام عمار تضررت منه كثير وعلى راس القائمه بالضرر «أختي ساره» ابو راكان بتهكم : بس ساره مشتركه معه بالمشكلة الاخيره ولولا الاوراق إلي اعطتها لخلف كان ما صار إلي صار ! محمد هز راسه بتفهم : انا السالفه كلها ما كنت موجود عليها ولما اتصلت فيني يمكن اخطأت بالرد بس انا انفجرت من كثر الشكاوي إلي تصلني بسببه ! بس انا متأكد ساره قاطعه ابو الوليد : ما نبغى نفتح صفحات الماضي يا ابو خالد ! ترى ما صارت هالفتنه الا من هالنصاب خلف ! وبعدين يا ابو راكان سبحان الله يمكن السالفه إلي صارت خير ربنا فك ام عمار منه وتزوجت مهند انتفخ مو عاجبه كل هالموضوع : سبحان الله خير ام عمار انفكت منه وعمتي تطلقت بيوم زواجها بعد خير قاطعه محمد بحزم : مهند ! ابو الوليد يلم الموضوع : يا جماعه ما نبغى نفتح صفحات الماضي ! عبدالله طالع مهند بنظرات بارده وما علق على الموضوع ! ابو الوليد : والحين خلاص نبغى الصلح ! ابو ماجد بنبره جاده تحمس للصلح : وانا مع الصلح ! وما ننسى الحديث «وخيركم الذي يبدأ بالسلام » ابو عزام بتأييد : وانا مع ابو ماجد الصلح خير وحنا عيال عم ! عزام طالع ابوه باستغراب ما كان كلامه كذا ! ابو الوليد طالع ابو راكان يحثه على الصلح ! ابو راكان وقف بعد ما تنهد يحس حطوه بالامر الواقع : على خير بس خلف وساره ما ابغى اشوف رقعة قاطعه ابو الوليد : مالك لواء يا ابو راكان ! خلف كلنا معك ما أحد يبغى يشوف رقعة وجهه بس ساره لنفترض انها فعلا هي إلي اعطت الاوراق لخلف تراها بذاك الوقت صغيره جاهله ويمكن خلف استغفلها ما تدري وش الوضع كان بالضبط ! وكلنا نعرف طبع خلف غني عن الوصف !! البنت الحين كبرت وعندها عيال وانت عمها المفروض تكون جنبها حتى لو غلطت تعلمها الصح من الغلط ! ابغى الصلح يكون للكل ! وام الوليد تولت صلح الحريم ! وان شاء الله ترجع المياه لمجاريها ! ابو ماجد طالع محمد : المفروض ساره تيجي هنا وتصلح ابوي وتعتذر منه ! مهند عفس ملامحه بقرف وبنفسه «اقول تلايط من هنا ....تصلح ابوي وتعتذر منه» ابو الوليد بتأييد : وهذا إلي رح يصير تراه عمها وما ينقص قدرها بالاعتذار بالعكس عمها وله حق عليها ! ناظر عمار : ادخل للحريم وخلي ساره تيجي هنا ! عمار بتردد : ساره ما جاءت لهنا! ابو الوليد ناظر محمد بنظرات معناها مو هذا الاتفاق ! محمد بترقيع : وحده من البنات عليها حراره وما قدرت تيجي،! لكن الحين اروح اجيبها يمكن البنت تحسنت ! وقف عمار استأذن وطلع بعد محمد ! مهند همس لخالد : لو فيها خير ترفض هالصلح ! خالد بذات الهمس : انت لا تتدخل *** ** *** *** عند الحريم بعد ما تم الصلح ام محمد بانتقاد لحفيداتها : صدق ما تستحن مقاطعيني ام راكان مستانسه بالصلح : خلاص يا ام محمد جودي بتبربر : حنا ما قاطعناك يا جدتي بس انت إلي هجيتي وما رجعت الا قبل فتره ! ليان : الواحد عنده مشاغل ام الوليد بابتسامه : والله ما في اجمل من الصلح ! والقلوب تكون صافيه مو حقوده ! ام محمد وهي تؤشر على نفسها : الحمد لله ماني بحقوده وقلبي ابيض مو مثل سوير الناقه ! رفضت الصلح وما تبغى تشوف رقعة وجه احد فيكم ! جودي لوت بوزها : يقال ميتين عليها هالناقه ! ليان بترفع : حتى لو جاءت خاطر لخالتي ام الوليد اسلم عليها والا هي تستحق أتفل عليها ام عمار بهدوء : ليان ! ليان طالعت امها : اشوفك حنيتي على الناقه ؟!! مو كأنها هي إلي قاطعتها ام عمار : خلاص قفلي هالموضوع ! جودي بشماته : سبحان الله اخذت جزاها طلاق بيوم الزواج وتتزوج واحد مجنون ! ام عمار بتأنيب : ما نبغى الشماته يا جودي ! ام ماجد هزت راسها بتأييد : جودي صادقه ظلمتك بالاوراق ام راكان تكدر خاطرها : استغفر الله ! والله قلبي متقطع عليها ومشتاقه لها ! شروق طالعت عمتها وكتمت قهرها كل هالصلح ما تبغاه بس وش يطلع بيدها ؟!! ام الوليد : الله يصلح الوضع بينهم ! وباستغراب : اقول يا ام ماجد كنتك ما اشوفها جاءت تتحمد لخطيبها بالسلامه ؟!! ولا امها كلفت نفسها تيجي،! حتى الحريم يسألون عنها ما دريت وش ارقع عنها ! ام ماجد بترقيع : امها تعبانه وما تقدر تحضر بدون امها الناس تنقد عليها ! ام راكان هزت رأسها : صادقه الناس تنقد عليها جايه لبيت خطيبها لوحدها ! ام محمد بضربه : هذي الناس إلي تفهم بالاصول والعادات مو مثل ساره 24 ساعه كانت في بيت ابو راكان قاطعتها ام راكان بزعل وهي تشوف وجه شروق إلي انقلب وصار بالالوان : وش جهزتم لملكة عمار ؟!!! *** *** *** *** محمد ما توقع ردها : كيف يعني رافضه الصلح ؟! ساره اعتدلت بجلستها بهدوء وبداخلها نار متأججه : محمد الله يرضى عليك لا تحملني فوق طاقتي ! ما اقدر اقابلهم او اسلم عليهم ! ادري انه الصلح خير وما يجوز الهجران اكثر من 3 ايام بس انا حاليا ما اقدر ! يمكن مع الايام تتغير النفوس بس حاليا مستحيل ! محمد جلس مقابل لها وبمحاوله إقناع: انا الحين طالع من الرجال ومتكلم قدامهم ينتظروني راجع وانت معي ! كيف ارجع واقابلهم ؟! وانا إلي سعيت للصلح وكلمتي ما تمشي على اختي الصغيره ؟! تبغين تصغريني بينهم ؟! ويتشمتون فينا ؟! ليه نسمح لهم دوم يقولون عيال ابو محمد يفشلون وما في ترابط بينهم ؟! قاطعته ساره وهي تناظر الشيب غزى شعره زفرت بضيق ونزلت نظرها : قدرك كبير وعالي عندي واطلب أي شيء ورقبتي سداده الا هذا الطلب ! ما اقدر ! احس لو اشوفهم رح اذبحهم وما امسك لساني ! مستحيل ادخل بيت انطردت منه ! انت ما شفت كيف طلعت منه مذلوله بعد ما مسحوا بكرامتي الارض ! طردوني وكأني طراره عندهم ؟! وش ذنبي بخلف وافعاله ؟!! ما ابغى اشوفه ولا ابغى صلحه ! ضاق صدره محمد : كيف ارجع الحين ؟! ساره فقدت اعصابها تكلمت بغضب : ما ادري وش تبغى بهذا الصلح ! ناس حقوده ! محمد طالعها : اول شيء الصلح خير ثاني شيء عمار ! تدرين انه من اسباب رفضه الزواج هذي النقطه ! يقول كيف اخطب واهل ابوي ما في احد موجود منهم ! لمتى هالقطاعه ؟! خلاص انسي الماضي وافتحي صفحة جديده! خلي قلبك ابيض مثل زمان ! وبعدين انا ما ابرر تصرف عمي وعياله لكن تصرفهم رد فعل ! كانت تصرفاتهم بدون وعي وزاد الامر تفاقم لما وصلهم خبر انك اعطيت خلف الأوراق مطت شفتها بقرف وما علقت ! محمد رفع حاجب بتساؤل: وش سالفه الاوراق ؟! ساره بقلب ميت لاحداث الماضي : انسى سالفه صارت وإلي انكسر مستحيل ينجبر محمد قاطعها بتحدي : بينجبر يا ساره ! بس انت افتحي باب الفرص ! ساره طالعته بعيون لامعه : قلبي كان زجاج رقيق شفاف مفتوح للكل كسروه بقلب بارد ! مستحيل يرجع قاطعها وهو يمسك يدها يحثها على الوقوف : ساره بلا فلسفه بلا زجاج بلا بطيخ ساره تسحب يدها منه : محمد محمد تكتف بزعل: خلاص براحتك يا ساره ! كل هذا حتى ما تشوفين عبدالله ؟! عقدت حواجبها بانزعاج من كلامه : عبدالله ؟! محمد بتأكيد لكلامه : اكيد الكل رح يقول ما عندك الشجاعه تقابلي عبدالله يمكن للحين تبغينه قاطعته ساره : يخسى ! ما بقى الا عبدالله ! محمد باسلوب يحثها : قومي واثبت لهم انه طلاقه ما همك ! وانك قاطعته ساره بحزم : ما أبغى اشوف احد فيهم ! محمد بالله لا تزعل مني بس انا قاطعها بتفهم : براحتك ! وتركها وطلع ! ناظرت عمار إلي واقف قريب منهم مستمع فقط ! ثواني واقترب منها :ساره ! بالله انك تقومين وتكسري هالحاجز إلي بيننا ! ساره انا ساكن في بيت بروحي وانت عمتي وملزوم فيك ! وبنفس الوقت امي واخواتي يبغون زيارتي ! كيف تجتمعون ؟! ساره ببرود : ما احد مانعهم قاطعها : امي ما تدخل البيت بوجودك بس اذا تم الصلح رح تدخل ساره قاطعته : خلاص انا اطلع من هنا قاطعها بغضب : ساره لا تجلطيني ! انت تثبتين الكلام إلي وصلنا ! بعدك للحين عايشه على ذكرى خالي عبدالله قاطعته بغضب : يخلخل عظام عدوينك ! انتظر دقيقه وانا معك يا غبي ! فتح عيونه بعدم تصديق ! *** *** *** دخل محمد بحرج وهو يناظر الموجودين ! طالعه ابو الوليد بتساؤل ! اشر له بعيونه عن رفضها للصلح ! ما غابت هالحركه عن عيون اغلب الحاضرين وخاصه ابو راكان إلي حس بمويه بارده انكبت بين ضلوعه بزر ترفض تصالحه ! اي اهانه وجهتها ساره له ؟! ابو ماجد ما عجبه هالتصرف وبانتقاد : وين ساره يا ابو خالد ؟! والا تنتظر ابوي بنفسه يروح يصالحها ! عبدالله بسخريه مبطنه :،يمكن ابنتها بعدها تعبانه ! اذا لزم الامر ترى اغلب الموجودين طب يقدرون يكشفون عليها ! انهى جملته وهو يبتسم بغرور ! مهند رد بغرور اكبر : ليه تكشفون وامها موجوده ! ما احد فهم معنى تعليقه باستثناء خالد ومحمد ! سلمان وقف بابتسامه مرحه ؛ اروح اطمئن على ابنة خالتي ساره ! اعطاه ابو راكان نظره ناريه حارقه ! وبعدها إلتفت على محمد : انا ما بغيت صلحها لكن وافقت بعد ضغط واحراج منكم ! إلي يهمني الحين صلح الرجاجيل قاطعه محمد : الله يسامحك يا عمي مين قال انها رافضه الصلح ! انا ما حكيت ولا تكلمت ! وليد بتأييد : صادق يا ابو خالد انت ما تكلمت للحين ! وبنخوه : اذا البنت تعبانه انا جاهز اكشف عليها ! سعود بهمس ساخر: ذابحيتك النخوه ! وليد بذات الهمس: افضل منك يالجليد ! عزام : اذا ساره جايه انا اقول تدخل عند الحريم وبعدها جدي يسلم عليها ابو الوليد: ما في احد غريب يا عزام عيال عمها وعيالي بحسبة اخوانها ! سكت عزام وما عجبه دخولها كذا عندهم ! بس بنفس الوقت ابتسم بسخريه لانه متأكد ما حتيجي بعد ما شاف نظرات محمد الخائبه ! استغرب وهو يشوف عمار متوجه لهم وماسك بيد ساره ! تسلطت الانظار عليهم ! اقترب عمار وهو يرحب بشكل مبالغ فيه : نور المكان ! تفضلي يا احلى عمه بالدنيا ! تقدمت ساره بهدوء وناظرت محمد إلي استبشر بوجودها وسرعان ما وقف وتقدم منها : تعالي يا ساره ! مسك يدها بهدوء وتوجه لناحية ابو راكان إلي يطالع حوله الا ساره ما يبغى يشوف رقعة وجهها ! طالعت عمها إلي جالس وبالغصب رفع عيونه لها ! فتح عيونه وبانت الصدمه على ملامحه وقلبه يعتصر من الالم ! طول السنين ابتعد عنها ورفض شوفتها حتى ما يضعف ويرجعها لجناحه! بس الحين إلي يشوفه كسره ! هذي ساره ؟! يا ويل حاله عليها ...اي مجاعه اصابتها حتى صارت بهذا النحف ؟! اي سنين عجاف عاشتها ؟!!!! وين الخدود الموردات ؟!! ما يشوف الا ظل لساره القديمه نحف وشحوب تجهم حقد وكره!!! نعم نظراتها مليئه بالحقد والكره ؟! ما توقع نظرات ساره له كذا ! الطفله إلي احبها وحاول يعوضها عن فقدان أبوها تناظره كذا ؟! اي صلح هذا والقلوب باللون الاسود امتزجت ؟!! قطع افكاره محمد : يا عمي سلم على ساره ! عدل ملامحه وتحولت للجمود مد يده يسلم عليها انصعق من كتلة البرود إلي حاوطت يده ! وسرعان ما سحبت يدها بسرعه بس وقفها صوت وليد : هذ ما يعتبر سلام ! حبي راس عمك يا ام سوار ! ابو راكان بعبوس : والله ما ادري وش هالصلح جايه وماده البوز تناظرنا وكأننا ماكلين حلالها ! ساره طالعته وبعدها ناظرت محمد إلي بنظراته يتوسل لها تتم الصلح على خير تكلمت وهي تناظر التوأم : اي صلح والحقوق ما رجعت لاهلها رفعت نظرها لعمها بنظره قويه متحديه ! ابو راكان بعد نظراتها رد بغضب: اي حقوق تتكلمين عنها ! صدق المثل شين وقوة عين ! فوق إني تغاضيت عن غدرك وخيانتك لنا جايه تبغين حقوق ؟! انا لو ابغى احطك برأسي كان رفعت عليك قضيه سرقه ! بس سكتت وبلعت قهري احترام لاخوي إلي تحت التراب المفروض من زمان تيجي وتعتذرين لام عمار إلي تعرضت لجنون اخوك بسببك ! والحين جايه تتكلمين عن الحقوق ! اي حقوق تبغينها ! وبقهر كرر : اي حقوق ؟!! رددت بصوت بارد : «حقوق المظلوم » عقد حواجبه بعدم فهم وقبل ما يتكلم تقدمت منه وقبلت راسه وبهمس: رح اكون افضل منكم واقابل السيئة بالحسنه ! طالعها بدون اي كلمه ! تقدم منها سلمان وسحبها لجهته يسلم عليها : هلا والله بخالتي ! عبدالرحمن بابتسامه سلم عليها : اخبارك يا حلوة ! ماجد وقف بجانبهم : هلا والله بسارونه وبمزح : وانا اول ما دخل عمار اناظر خلفه ادور على الناقه ! طلعت الناقه صايبيتها مجاعه ! وطالع بناتها : يا عمري على الجمال ! الظاهر ابوهم مز قاطعه سلمان وهو يمسح على رأس التوأم: ساره كيف تميزين بين التوأم ! وقف أبو ماجد بانتقاد : مطولين سوالف واقفين وك قاطعه ماجد : السموحه يبه بس شوفة ساره كانت مفاجئه حلوه ! ما انتبه على العيون إلي تناظره بغضب ! ابو الوليد بهدوء : بهذي المناسبه ترى عشاكم باكر عندي ! ابو راكان وملامحه لا تفسر : على هير ان شاء الله محمد : وين خالتي ام راكان نسلم عليها ؟! ابو راكان بهدوء اشر لسلمان إلي واقف يهمس لساره : سلمان نادي جدتك ام راكان وام محمد هز راسه وغادر ! ابو تالا بهمس لابو عزام : سبحان الله لو شفتها بالشارع ما عرفتها ! ابو عزام : الله يوفقها ! ابو الوليد يغتنم الفرصه : والحين نبغى نصالح عزام وعمار ! عمار بهدوء : انا مو حامل عليه شيء ! ابو الوليد : مو مشكله ابغى تسلمون على بعض ! ابو راكان هز براسه لعزام يحثه على السلام ! بعد السلام تكلم وليد بابتسامه : ام سوار وعزام لازم يتصالحون بعد ! انقلبت ملامح ساره من لقافة الوليد حاشر نفسه بكل شيء ! عكس سعود جالس وما تدخل لو بكلمه ! المره الثالثه ما ح تسكت له حتطقه على راسه ! استغربت لما بادر عزام بالسلام وتقدم منها ! سلمت عليه ببرود للحين قلبها ما هو صافي له ! همس لها بأمر : قبل ما ترجعين ابغاك بسالفه ! طالعته ورفعت حاجب : ما عندي وقت ! وتركته وتوجهت عند عيال محمد وجلست بينهم ! همس لها مهند بقهر : غبيه ! حسبتك قد كلمتك وما ح تيجين ! تنهدت ساره وبذات الهمس :ما حبيت افشل ابوك بالمجلس واخلي إلي يسوى وما يسوى يتكلم على محمد و كسر خاطري عمار ! مهند مط شفته : عجلي بدراستك وتعالي عندنا صدقيني ح تنبسطين هناك ! ساره همست : يصير خير ! »«» '»« «»» يسترق النظرات لها وعقله مو قادر يصدق هذي ساره ! نغزه ماجد بهمس ساخر : لا تناظر يا عمي وتتحسر خلاص طارت منك ! طالعه بنظرات ناريه وبهمس : انكتم شايفني ذابح نفسي عليها ؟! ماجد بسخريه همس: وليه تسترق النظر عليها ؟! فتح عيونه عبدالله الظاهر ماجد جالس له مراقبه وبهمس رد : فضول اشوف شكل الناقه بعد هالسنوات ! ماجد بذات السخريه : ترى هالناقه ما عبرتك ولا هي مهتمه اذا انك موجود او لا ! عبدالله انتفخ من كلام ماجد وبهمس: تراك مسختها وانا اعطيتك وجه ! عندي إلي تسواها وتسوى عشره من امثالها !، فلا تجلس تطلع كلام من عقلك ! ماجد بخبث بهمس: شوف خالي وليد كل شوي يطالعها الظاهر رسم عليها ! تراه يبحث عن الثانيه ! عبدالله متأكد ماجد يبغى يستفزه وببرود رد : الله يوفقه بس قبل ما يخطبها يطلقها من المجنون ! ابو الوليد باقتراح : انا اقول ام سوار ادخلي عند الحريم محمد بهدوء: تسلم على خالتي بالاول وبعدها تدخل عند الحريم ! ناظرت ساعتها ما هي طايقه الجلسه هنا ! تحس بالاختناق والانظار تسترق لها ! حتى عمها ابو راكان اكثر من مره جاءت عينها بعينه ! سرعان ما يبعد عيونه عنها بملامح جامده ! تحس بعيونه كلام بس اختصره ! لفت نظرها ماجد إلي اشر لها بابتسامه ! زاد ضيقها وهي تشوف عبدالله جنبه ويناظرها بتقييم ! عفست ملامحها بقرف«ما بقى الا عبدالله يقيمها ..مالت عليك يا متخلف » سبحان الله كل الحب والموده إلي كانت تحمله له تحول لكره وحقد ! طنشت ماجد مو فايقه لسخافته ما تنكر ما تحمل بقلبها حقد او كره لسلمان وماجد وعبدالرحمن لكن قلبها ميت وما لها خلق لاحد ! *** *** *** *** دخل سلمان بعد ما استأذن : يا جدتي يقولك جدي تعالي سلمي على خالي محمد وعياله ! وطالع ام محمد : وانت يا جده تعالي بعد ! ام خالد بابتسامه : وحنا ما لنا دعوة ! سلمان هز كتوفه وهو يمثل انه يطالع ورقه بيده : والله هذا المكتوب بالورقه ام محمد وام راكان وبس ! ويمكن يسمحون لعمتي ام عمار بالدخول ! وقفت ام عمار بعد ما كشت عليه : مالت عليك ! ومين قالك اني انتظر موافقه علشان اروح ؟! وناظرت امها : قومي يمه نروح عندهم ! سلمان بتنبيه : ترى ساره برااا! جودي عفست ملامحها بتكبر ! كش عليها سلمان : انتبهي ليطق لك عرق ! عفستي ملامحك مثل البقره لما يمنعون عنها البرسيم ! جودي طالعته : صدق انك وقح وما تحترم احد ! ام عزام : سلمان متى تحترم بنات خالك ؟!! تراكم كبرتم مو بزران ! ام راكان متحمسه : فكونا منكم ويلا نطلع لهم ! شروق عفست ملامحها من القهر وهمست لنوره : وش جابها هالزفته ! الحين تلاقينه جالس يطالعها ! نوره : وين ثقتك بزوجك ؟! لا تخلين هالبزر تزعزع هالثقه ! اذا استمريت على هذا التفكير رح تخربين بيتك ! شروق بخنقه : اخاف يحن لها بعد هالسنين ! لو متزوجه واحد عدل كان قفلت حلقي ! اكيد اخوها حيطلقها من المجنون ! بنفس المكان ام تالا عفست ملامحها بعد ما رجع لها هالكابوس ! ساره اكبر كابوس ! بالرغم انها انجبت ولدين الا انها ما هي مرتاحه تخاف زوجها يرجع لها مره ثانيه ! وش رجعها بعد هالسنين ؟!!! زفرت بضيق وهي تردد بنفسها «يا رب تطلعها من عقل زوجي » ** ** ** ** وقف محمد لما شاف خالته اقتربت منهم ! ابتسم بهدوء وتقدم منها وسلم عليها بمحبه ! وبعدها عياله تقدموا منها وسلموا عليها وبالمقابل سلمت ام محمد على عيال ابو راكان ! وقفت ساره وسلمت على ام راكان وكأنها ما تعرفها ! حز بخاطرها ام راكان هالسلام حتى ما كلفت نفسها تسألها عن حالها ! ومع ذلك ابتسمت ام راكان : عساك بخير يا ابنتي ! ساره بهمس يا دوب وصل لمسامعها : بخير ام راكان انحنت على بنات ساره ملتصقات فيها : ما شاء الله ذول بناتك !! ربي يحفظهم يشبهون بعض كثير ! وبعدها ناظرت ساره وقلبها يعتصر نفس ابو راكان وش إلي شافته حتى تفقد وزنها وتصير بهذا النحف ؟! ما تنكر انها صارت أجمل ! بس قلبها تقطع وهي تفكر بالمصاعب إلي واجهتها حتى صارت كذا ! تنهدت بضيق ام راكان والغصه بحلقها والدموع تنذر بالنزول : تعالي يمه عند الحريم ! هزت راسها بدون نفس بس وقفها الكلام : انا ابغى ساره تجلس عندي ........