أقدار - الفصل 62 - بقلم ضاقت انفاسي - مكتملة | روايتك

اخذت الطلب بهدوء وتحركت خارج المطعم رفعت نظرها وتجمدت عيونها للحظات وهي تشوف عزام !! ما تدري وش يعمل هنا ؟!! وجهت نظرها للشخص إلي واقف معه ويضحك ! ما تنكر انها عرفته و يا ليتها ما شافته !! وكأن الماضي يتراقص قدامها الحين !! تركوا لها ذكرى أليمه مستحيل تنساها ! صحيح نسيت الماضي وطوت الصفحة بس مستحيل تنسى وش عملوا فيها !! من لما شافتهم تجدد الكره والحقد إلي بداخلها !! تابعت خطواتها بهدوء وهي تخمد بالكره والحقد إلي يسري بعروقها بقوه ! ضغطت على قبضة يدها وهي تسمعه يتكلم : هههه والله ندى نشبت فيني تبغى الالعاب تقول عيال عمي عزام رايحين للالعاب ! اخذت نفس بهدوء اكيد ندى ابنته ! طلعت خارج المطعم وقفت بهدوء وهي تناظر السماء وتكلم نفسها :« مايهموني ابدا !! يا ربي اكرهم وما رح اسامحهم ... رح اثبت للجميع اني قادره اكمل حياتي بدونهم ورح يكون لي مكان بالمجتمع وما احتاج احد منهم !!!» وقفها صوته من خلفها : اشوفك تسرحين وتمرحين على كيفك !!! إلتفتت بإستنكار وبهمس مسموع : عزاااام! اقترب منها وبسخريه : و كبرنا وما عدنا نقول عمي عزام ! عفست ملامحها بكره لما لمحت إلي واقف خلفه والظاهر مو فاهم شيء! تحركت ناويه تتركهم لانه بنظرها ما يستحقون تتنازل وتكلمهم !! انقهر من حركتها ومسكها من زندها : انا اكلمك وقفي بإحترام وكلميني!! حاولت تفك يده وبحده تكلمت : عزام فك يدي قبل ما ألم الناس عليك ! ضحك عزام بسخريه : اخص يالقويه ! وصرنا نهدد !! وباستمتاع : وريني وش يطلع بيدك اشوف !! تفاجئ بالصراخ : إلحقووووووني، ساعدوني ..فكنيييييييييي ...ساعدوني ثواني إلتم الناس حولها ! سحبت يدها منه بقوه وهي تشوف ملامحه إلي بهتت من هالموقف !! طالعت الرجال : ساعدوني يبغى يخطفني ! استغلت فرصه انشغال الرجال مع عزام وبسرعه هربت للشارع وقبل ما تركب بسياره الاجره في يد سحبتها بقوه وثبتتها : وين يا حلوه ؟!! ناظرته بفزع للوهله الاولى!! بعد ما تعرفت على ملامحه ارتخت ملامحها وبهدوء تكلمت : اترك يدي ! شد على يدها بأقوى وبغضب مكتوم : امشي معي اشوف !! عفست ملامحها بألم من قبضته وبصوت هادي تكلمت : اترك يدي يا عمار !! ارخى يده شويه وبهدوء تكلم عكس الغضب إلي بداخله : اتركها بس تعالي نتفاهم ! تنهدت وهي تفكر بحيله تهرب منه : على وش نتفاهم ؟!! مو انتم تبريتم مني ومن اخواني ! وش تبغون مني الحين ؟! رد عمار بقوه : عمر الظفر ما طلع عن اللحم ! ساره بمراره من كذبهم ما تصدق احد منهم : عمار اتركني بحالي! تنفس بغضب وهو ماسك اعصابه : يا بنت لا تخليني اسحبك بالشارع قدام خلق الله ! امشي معي بهدوء ابغى اجلس معك بمكان هادي ونتفاهم ! تدري بقرار نفسها انها ما تقدر توقف بوجهه الحين ويقدر يسحبها دامه قابض على يدها كذا !!! اخذت نفس عميق وبعدها ناظرته بحزم : ما أبغى اجلس بهذا المكان قاطعها وهو عافس ملامح : ومين قال ابغى اجلس هنا ؟!! وسحبها بهدوء متوجه لسيارته ! ترددت تركب او لا بس بداخلها شيء دفعها تركب معه وخاصه انه عمار ولد خلف يمكن يكون عنده علم بمكانه وهذا اهم شيء تبغى تعرفه مكان خلف !! حرك السياره بهدوء والصمت احتل المكان! وساره تناظر الطريق بدقه تبغى تعرف وين رايح إلتفتت عليه لما تكلم : وين نجلس ؟! ساره بهدوء وثقه : اي مكان ! ويا ليت تستعجل ما عندي وقت زايد اجلس معك ! صفر بإعجاب باطنها السخريه : واو مشغوله !!! طنشته ساره ورجعت تناظر الطريق بعد وقت قصير إلتفتت له لما وقف السياره تكلم بهدوء وهو يناظرها : تفضلي ناظرت الحديقه العامه ونزلت بهدوء وتوجهت لواحد من المقاعد وجلست بدون ما تناظره ! مشى خلفها بهدوء مماثل وجلس مقابل لها ! حل الصمت للحظات سرعان ما قطعته ساره باستعجال : تفضل تكلم وش عندك ؟!! عمار مو عارف اي سؤال يبدأ ؟! اسئله كثير تدور في باله !! بعد ثواني من التفكير سأل بهدوء : ممكن اعرف متى مات عمي نادر ؟ وكيف مات ؟! ساره ببرود تكتفت : ساحبني لهنا علشان تسألني كذا ؟!!! ما اذكر انه نادر يهمك ! حتى اشك اذا تعرف شكله !!! عمار بكشره يحس نفسه جالس مع وحده ثانيه مو قادر يصدق انها ساره وتتكلم كذا وبحزم تكلم : لا تلفين بالاجابه ! وللحين ما تغير شيء ما يهمني عمي نادر ابدا ! بس ابغى اوصل لإجابات من خلال هالسؤال !! ساره ناظرت ساعة اليد ما بقى على دوام المستشفى وقت تبغى تدعي على سعديه كله بسببها وبحده : انت وش تبغى بالضبط مني بدون لف ودوران؟ !! عمار بغضب ما قدر يكتمه: عمي ميت وحضرتك مطلقه ممكن اعرف وين عايشه ؟!! ساره تفاجأت من كلامه ! عمار يحث يبغى يعرف الاجابه : جاوبي يا ساره !! ساره تنهدت : لنفرض عرفت وش الفائده من معرفتك ؟! عمار بغضب : ما يهمني الحين اعرف شيء ! إلي يهمني انك ترجعين معي ومن يوم وطالع انا المسؤول عنك !! وقفت ساره بثقه : للاسف جيت متأخر ! يا ليت ترجع لبيتك وانسى انك شفتني او تعرفني،! لاني نسيتكم من اكبركم لاصغركم وما تهموني ابدا ! واتمنى ما اشوف رقعة وجهك مره ثانيه الا بحاله وحده تجيب ابوك معك ! وقتها رح يكون لي كلام ثاني معك ومع ابوك ! وقف وهو رافع حاجب مستغرب: ساره !! والله غيرك الزمن ! الحين ما عدنا نهمك ؟!!! ساره بملل تحركت خطوات بس وقفها عمار بغضب : وبعدين معك ؟! ترى ما امزح معك!! الحين ترجعين معي غصب عنك !! ساره بحده: إلزم حدودك تفهم ؟! تراني مو بزر تكلمني كذا ؟! احترم نفسك واذا ناسي اذكرك تراني «عمتك » نطقتها بطريقه تنرفز وتابعت كلامها بحده :وما تقدر تغصبني على شيء ما ابغاه لو على قص رقبتي ! انا سكتت لك بالبدايه اشوف وش اخرها معك ! اذا تفكر انك تكلم ساره الصغيره الغبيه ! أحب انبهك ترى الساره القديمه ماتت من زمان واتقي شري احسن لك ! تراني اتمنى اشوف الموت ولا اشوف واحد فيكم لاني اكرهكم !! عمار اقترب منها وهو رافع حاجب : ا الحين حنا إلي ميتين عليك ! ساره بلامبالاه : شعور متبادل ! عمار رجع مسك يدها : ترى عمي محمد يبغى يرجع هنا ويستقر ! ولا تخافين ترى جدتي خبرته بعلومك إلي تسود الوجه ! قاطعته وهي تحاول تفك يده بحده وعيونها تقدح شرار : وش المطلوب الحين؟! اخاف بعد كلامك مثلا ؟!! ومحمد وش دخله فيني ؟! تراني اعطيتك وجه !! يكون بعلمك انت ومن حولك ما لك سلطه علي ! تراني متزوجه وإلي نقل لك خبر الطلاق الظاهر ا قاطعها وهو معقد جواجبه : متزوجه ؟! لا تقولين ذاك المجنون بعدك على ذمته ؟!! ساره بملامح شرسه : ذاك المجنون إلي ما هو عاجبك يسواك ويسوى عشره من امثال قطعت كلامها وامسكت يده لما رفعها عليها يبغى يضربها وبصوت حاد نطقت: حدك لهنا ! عمار بتوعد نفض يدها بقرف لو بغى يكسر راسها ما يمنعه شيء بس اختصر وكلمها بتوعد : وقسم بالله ما تبقين على ذمة هالمجنون!! ما ادري اعمامي كيف قابلين بذي المسخره ؟!! اصحي على نفسك يا غبيه بعدك بعز شبابك بنات جيلك بالجامعه وانت دافنه نفسك مع هالمجنون ؟!!! وش هالحياه المسخره إلي تعيشينها ؟!! لا تقولين بعد عندك عيال منه ؟!! ساره بثقه تكتفت وهي رافعه حاجب : ايه عندي عيال ! واذا تبغى اعرفك على زوجي المجنون ما عندي مانع ! واعطته نظره واثقه !! طالعها بقهر من الغباء إلي فيها : ترى مو زوجك المجنون انت المجنونه ! وما ابغى هالمعرفه لاني اذا شفته رح اذبحه ! ساره تنهدت براحه من الكذبه إلي كذبتها لو وافق عمار يشوفه كانت توهقت !! عمار زفر بضيق ورجع طالعها وهو متمسك بيدها : انسي هالمجنون وتعالي عيشي عندي ! بس مجنونك خليه بالشوارع داير احسن لنا لا تجيبيه معك !! فكت يده بهدوء ورجعت للمقعد وجلست عليه بهدوء ! وداخلها دوامه من التفكير طلوع عمار بوجهها بذا الوقت يمكن يكون لها رحمه ! بهذا الوضع ما تقدر توفق بين الدراسه والشغل ! دراستها صعبه كثير ومعدلها بتراجع من ضيق الوقت !!! لازم تحبكها مضبوط وتفكر بطريقه تكون لمصلحة دراستها !! شافها جالسه على المقعد وتفكر بعمق جلس عندها يشوف نهايتها معها !!! طالعته ساره بغموض: ابوك وين ؟! عمار هز كتوفه بسخريه : البارحه تعشيت معه ؟!! وبجديه : فيه إشاعه انه ميت قاطعته بشهقه : وش تقول ؟! ماااات !! قبضت كف يدها بقهر من هالخبر : متى مات ؟! وكيف مات ؟!!! استغرب موقفها : لذي الدرجه متأثره على موته !! وبسخريه تابع: الا اذا وعدك يطلقك من هالمجنون ويزوجك قاطعته ساره بصرخه نابعه من اعماقها : انكتم !! وقفت بقهر وهي تردد بغضب : حسبي الله عليكم كلكم ! عمار بحده وهو رافع اصبعه بتهديد : احترمي نفسك والا قسم بالله اعدل ملامحك بكف سكت لما شافها ما هي مهتمه لكلامه وعقلها مشغول !! عمار اخذ نفس وبهدوء : الحين فكينا من اخوك خلف ! وخلينا بمجنونك ...وينه الحين ؟!! إلتفتت ساره عليه : وش تبغى فيه ؟!! عمار بحده : وضعك هذا ما يعجبني جالسه مع واحد مجنون ! انا من باكر رح ابدأ بقضية الطلاق قاطعته بغضب : ما هو على كيفك ؟! لا تتدخل قاطعها بغضب : انا رايح للمحكمه وما رح تقدرين تمنعيني ؟!! ساره بقهر من تدخله: انت وش تبغى مني ؟! يا ليتك مسافر للحين ونرتاح من خشتك ! عمار ما يدري بداخله يشفق على حالها بالرغم من غضبه : والله لو كنت موجود ما صارت هالمسخره كلها بحياتك ! ساره بحده : الله لا يكثر خيرك ! ويا ليت تطلع من السالفه وما تتدخل يكون افضل ! وانا لله الحمد مرتاحه بحياتي !! عمار بتصميم : والله ما يردني باكر عن المحكمة شيء الا قاطعته ساره برعب ما أظهرته : انا ما ابغى اتطلق ! ترى عندي بنات وما ابغى قاطعها بحزم : آلغي فكرة الطلاق الا بحالة وحده تلمي اغراضك انت والبنات وتعيشين عندي لوقت رجوع عمي محمد ويشوف حل لجنونك ! لاني ما اقبل تعيشين انت وبناتك بدون رجال في البيت ! ناظرته وبداخلها ابتسامه سخريه الحين تذكرها بعد كل هالسنين زفرت بضيق وردت بهدوء عكس الافكار إلي تجول بخاطرها : ما عندي مانع ! عمار يستغل موافقتها : الحين نروح وتأخذين اغراضك قاطعته بسرعه وحزم: الحين لا ! وبتفكير سريع قبل ما يتكلم : اسمع خذ رقم جوالي واعطيني رقمك وباكر اجهز نفسي والبنات واتصل عليك تمرني !! بعد ما تبادلوا الارقام طالعها بنظرات مو مصدقها : اوكي انتظر اتصال منك باكر ! لكن قسم برب الكعبه لو تلوين ذيلك من هنا او من هنا ما رح ارحمك ورح يكون حسابك عسير !!! ساره بدون اهتمام لتهديده قاطعته : بس انا عندي شرط حتى انقل عندك ! عمار مط شفته بضجر : وبعد تتشرطين ؟! قولي اشوف شرطك ! ساره تكتفت بهدوء وناظرته بقوه : ما تتدخل فيني ! وما لك كلمه علي وما تتحكم بحياتي وطلعاتي ! تراني متزوجه وبناتي طولي ! طالعها بنظره تقييم وبسخريه : ما عندي خبر انك مخلفه نياق ! ساره بحده : عمار! عمار بصراحه تكلم : والله ما اوعدك ! اي تصرف ما يعجبني توقعي اقلب البيت فوق راسك !! ساره بتفكير : بما انه محمد راجع رح اجلس عندك فتره مؤقته والله يكون بعوني من مقابلة وجهك !! رفع حاجب وهو ماسك نفسه: كأنه لسانك طولان ويبغى له قص !! ساره طالعت الساعه تأخرت على الدوام ناظرته وطنشت كلامه : معقول فيه هنا حمام ؟! طالع المكان حوله واشر لها : هناك دورات مياه للنساء !! غادرت بهدوء لدورات المياه وجلس يفكر بساره بحالها وكيف رح يتعامل معها !! المشكله قبل ما يلومها المفروض يلوم أبوه !!! استغرب تأخرها ناظر حوله وقف بسرعه لما فسر له عقله انها ضحكت عليه وخدعته !! توجه لدورات المياه مثل الثور الهايج وبداخله يتوعد فيها !!! ** ** ** ** جالسين كالعاده بالصاله وابو راكان يتكلم بغضب : انا قلت لك الف مره يا عزام اترك هالزفته ولا تتدخل فيها !! عزام بتبرير: يا جدي ثار الدم بداخلي وانا اشوفها طالعه بدون رجال مسؤول قاطعه ابو راكان بغضب : بقلعتها!! ما تهمنا ! كتم عزام غضبه ووجهه منتفخ من الغضب! ابو ماجد مقهور : وش قلة الادب عليها !! ورطتك بذي السالفه واحرجتك قدام الناس ! تقول تبغى تخطفها ؟!! ليه ما قلت لها تحتاجين شاحنه تسحبك يالناقه!! اخخخ يالقهر ! وقسم بالله لو كنت موجود ! ام راكان باستخفاف : وش يطلع بيدك تعمل ؟! تبغى تضربها ؟! تراها ما هي من محارمك !! اذا عزام خالته بالرضاعه ما خلص من هالمشكله بطلعة الروح !! ابو ماجد بثقه: اعرف اتصرف واعلمها ان الله حق !! ام عمار باستغراب : عمار كان معكم ؟!! عبدالله بتذكر : ايه والله كيف نسيت ! عمار كان قاطعه عمار وهو يدخل والغضب باين بوجهه ! رد السلام وجلس وجهه منتفخ من الغضب!! ابو راكان مقهور للحين من السالفه : وانت الثاني علامك منتفخ علينا ! ام عمار بشماته : سمعت عمتك المصون وش عملت بعزام ؟! عمار رد وهو عافس ملامحه : ادري ! وجلست معها قاطعه عزام بانفعال : وين شفتها؟! عمار مسح على وجهه بقهر : بعد موقفها معك سحبتها وجلست معها بالحديقه ام راكان باندماج : ليه ما جبتها معك ؟!! عمار بقهر من حركتها : الكلبه هربت مني ! ابو ماجد : وما كلمتها ؟! زفر عمار بضيق : جلست معها تكلمت معها واتفقت انها تنقل تعيش معي ! واتفقنا على كل شيء ! وبعدها استأذنت تبغى دورة المياه وانا الغبي صدقتها !! هربت مني !! عزام للحين مو مصدق : اعوذ بالله ! للحين مو مصدق انها ساره ! لولا عيونها كان ما عرفتها ! تتكلم وخشمها مرفوع للسماء !! عمار بتأكيد : بالضبط تتكلم معي وكأني بزر ! شايفه نفسها ما احد متزوج مجنون غيرها ! طلعت الاخت للحين متزوجة المجنون ! ورفضت تنقل عندي الا لما هددتها بالطلاق من هالمجنون ! الظاهر متعلقه فيه هالغبيه !! لا والمشكله عندها عيال منه !!! ام راكان بصدمه : عندها عيال ؟!!! عزام بإهتمام : يمكن كذابه وانت على طول صدقتها ؟!! عمار بتوعد : نهايتها توقع بيدي ووقتها وقسم بالله ما رح ارحمها !! ابو راكان بتفكير : اعطتك رقمها يا عمار ؟!! عمار هز راسه بالموافقه : ايوه بس الحيوانه اتصل على رقمها مغلق !! ابو راكان بأمر : اتصل الحين عليها وحط الجوال سبيكر !! استغرب عمار من تصرف جده وبسرعه اتصل مع انه متأكد انه مغلق !! حل الصمت على الجميع لما ردت بدلع مبالغ فيه : آلو! اشر ابو راكان للموجودين ما يتكلمون واشر بعيونه لعمار يتكلم وكأنه لوحده هز عمار راسه بتفهم ورد عليها بحده : وينك يا حيوانه !! ضحكت بسخريه ساره عليه : انتظرني بدورات المياه دقيقه واكون عندك !! عمار بتوعد من حركتها وكأنه بزر تستغفله : وقسم بالله الا تندمين ! ساره بروقان : ما احد قالك تكون مغفل وغبي !! عمار وجهه انتفخ من الغضب : جهزي نفسك باكر رح اجي اخذك ! قاطعته بانتصار : اذا عرفت مكاني تعال ! عمار بتوعد غاضب : والله لأطلعك من تحت الارض ! سكت وهو يسمع صوت طفله : ماما شوفي حور ! ساره اعطت الجوال لسوار تتكلم :-آلو عمار ناظر جده إلي اشر له يكمل معها : الو ..وين الزفته! سوار بطفوله : الزفته بالشارع وش تبغى فيها !! عمار بغضب: اعطيني ساره ! ردت ساره بروقان: نعم ؟!! عمار ولع منها : نعامه ترفسك !! اكلمك وتعطيني بزران المجنون! وبتهديد : ترى انا اتصلت بعمي محمد وخبرته بحركتك قاطعته ساره بحده: كل شوي تنط وتقول عمي محمد ؟! قلت لك من قبل والحين اكررها وخلي الكل يسمعها «تراني ما اخاف من احد ولا يهمني احد وأعمل إلي أبغاه وما عاش إلي يمشي كلمته علي ! » عمار وهو يغلي : اخخخخ لو انك قدامي !! ساره بثقه: وش يطلع بيدك ؟!! والحين متصل وش تبغى مني ؟!!! عمار زفر بقهر: متصل حتى نتفق على انتقالك باكر عندي ! ساره زفرت بملل : ابوك يالغثاااااااا مو اتفقنا باكر لما اجهز نفسي اتصل عليك !! والحين فارق مو فاضيه لك ! سلام ناظر بجوال بملامح مصدومه كيف قفلت الخط بوجهه !!! ناظر جده ينتظر تعليق منه بس تكلم ابو ماجد بتعجب : والله طال لسانها !! عزام بتوعد : وانا إلي رح اقصه لها !! ابو راكان بحزم ناظر عزام وعياله: ما ابغى احد يتدخل فيها خاصة انت يا عزام !! انقهر عزام من جده يحسه يكبله بقيود فوق طاقته ! ام راكان بقهر من برود زوجها : احر ما عندي أبرد ما عندك ! ابو راكان بجمود : هذا ولد اخوها عمار مسؤول عنها حنا ما لنا دخل وما رح اتدخل الا بالوقت المناسب ! ** ** ** قفلت الخط وعيونها مسلطه على شاشه الجوال ! ما تدري تعمل الصواب او الغلط ؟!! لما تفكر بهدوء عمار ولد اخوها ! هذي اول نقطه ! عمار ما كان موجود لما طلقها عبدالله وتدخل مثل عزام ! بغض النظر عن موقفه بذيك الايام اكيد رح يكون بصف امه ! عقلها مشوش الحين مو قادره تثبت على قرار معين ! ما تخاف من عمار وتهديداته كل خوفها يروح للمحكمه وقتها رح قطعت افكارها على حور تهز فيها : نبغى نطلع للالعاب ! زفرت ساره بضيق وناظرتها وابتسمت بالغصب : يا حبيبتي الحين الوقت متأخر وسعديه مو هنا تروح معنا !! سوار بزعل طفولي : بس انت وعدتينا لما تعطلين تآخذينا للالعاب !! تنهدت ساره وبداخلها يا ليتني ما عطلت من وين طلع لي هالزفت عمار !! واكيد رح ينخصم من الراتب لانها عطلت !! _نبغى نطلع نطلع نطلع نطلع صرخت بضجر من إلحاح التوأم على الطلعه : خلاص ولا كلمه ! ما في طلعه ! شافت صفارات الانذار وبداخلها حزن على التوآم 24 ساعه بالبيت ! بس وش يطلع بيدها ؟!! ما تنكر انها مقصره مع التوأم اقتربت وشدت من احتضان التوأم وبصوت خنقته الغصه : وعد اطلع معكم وقت ثاني ! اخاف الحين يطلع لنا الحرامي ! لما تكون سعديه موجوده رح نطلع ...اتفقنا !! ابتسمت حور بفرح : اتفقنا ! سوار بابتسامه طفوليه : الحرامي يخاف من سعديه ويهرب لما يشوف عيونها ! ضحكت ساره على تعليقها وخطر ببالها شكل سعديه بالمكياج تحط مكياج ثقيل وخاصه عند عيونها !! تبشع نفسها بالمكياج وهي تفكر نفسها حلوه ! ابتسمت ساره على نفسها ولا مره حطت على وجهها مساحيق التجميل الا مره وزادت ابتسامتها لما تذكرت ذاك الموقف وكيف طلعت جنيه !! تنهدت ايام راحت وما بقى الا الذكريات ! لازم تقابل اخوها محمد ما احد رح يساعدها غيره !! *•• *** *** ***