أقدار - الفصل 60 - بقلم ضاقت انفاسي - مكتملة | روايتك

كملت الاجراءات واخذت نفس عميق قبل ما تطلع توقفت لما سمعت صوتها الساخر من خلفها : كسرتي خاطري بعد ما طردك المدير !! إلتفتت لها بعبوس وسرعان ما استقرت كفها على خدها وبحده : وانا خاطري اودعك قبل ما اطلع ! فتحت د.مها عيونها بصدمه ويدها مكان الكف ما توقعت توصل فيها الجرأة تمد يدها عليها ! اغلب الموجودين ناظروا بعد صوت الكف بإستغراب !! د.مها بغضب : انت قد هذي الحركه ؟! ساره بحده : لو ما كنت قدها كان ما عملتها !!! اعتبريها إنذار لك ما تقتربين من صوبي لأني ما اضمن لك نفسي،! د.مها بغضب : الحين رح اشتكي عليك قاطعها نائب المدير : د.مها هدي شوي خلينا نفهم الموضوع ! سعديه تفاجأت من الموقف وبصوت هادي : ساره المدير رجعنا للوظيفه ! تبغين يرجع يفصلنا مره ثانيه !! ساره بسخريه : صدق رجعنا ! وسرعان ما تحولت ملامحها للحده : قولي له يقدر يشتغل مكاني بما اني تركت الشغل يا حظه «وظيفه شاغره » ترى لايقه عليه هالوظيفه وتناسبه كثير ! وهمت بالمغادرة بس وقفها صوت حاد: وقفي لحظه !! إلتفتت للخلف وهي رافعه حاجب من تطفله : نعم؟! تكلم نائب المدير بأمر : تفضلي معي للمكتب انت و د. مها نحل الإشكال !! ساره بنظره خاطفه حولها وهي تشوف عيون الفضوليين عليهم ردت بهدوء تنهي الموقف : ما في اشكال هذي قرصة اذن لها ! وتحركت خطوات دليل على المغادره كرهت هالمكان من كل قلبها ولولا الحاجه ما اشتغلت فيه دقيقه !!! وقفت حركتها لما مسكتها من ذراعها : على بالك تهربين الحين ؟! اخذت ساره نفس عميق وهي تعد للعشره قبل ما يصدر منها اي فعل تندم عليه وبنبره غاضبه : فكي يدي احسن لك ! نائب المدير ماسك اعصابه ما يبغى تصير مشكله وشوشره بالمستشفى : رجاء دكتوره مها ما نبغى فضايح ولا تحديني اتخذ اجراءات ما يعجبك !! اضطرت الدكتوره تفكها والشرار يطلع من عيونها ! سعديه تقدمت وهمست لساره بكلمات ارتخت ملامح ساره بعدها ! نائب المدير : تفضلي معي للمكتب ! اشرت لها سعديه برجاء ما تترك هالفرصه ! هزت راسها وتقدمت معهم للمكتب بخطوات هاديه اضطرت تتراجع لاجل إلي ينتظرونها بالبيت !! ولانها المخطئة بتصرفها واي شخص مكان المدير رح يتصرف كذا ! دخلت المكتب بهدوء وجلست مقابل للدكتوره مها إلي رافعه خشومها للسماء ! تكلم نائب المدير بعد ما جلس مكانه خلف المكتب : وش هالتصرفات ؟! حنا بمستشفى محترم مو بالشارع ! انا نفسي افهم وش سبب هالعداوه بينكم ؟!! انت تعرفينها يا دكتوره مها من قبل او بينكم قرابه ؟!! مها عفست ملامحها بقرف : اكيد لا !! تنهد نائب المدير وتكلم بهدوء وهو يناظر ساره : طيب وش سبب هالخلاف يا ردت ساره بهدوء لأنه ما يعرفها: ام سوار ! اكمل كلامه : يا ام سوار ! تكلمت ساره بهدوء : ما في بيننا شيء بس حضرتها عندها لقافه زايده وتتدخل بأمور ما تخصها ! بغت د.مها تعترض بس اشر لها الدكتور تسكت وطالع ساره تكمل حديثها !! تابعت كلامها وهي تشوف القهر بعيون د.مها : اتوقع امور النظافه مو من تخصصها ! في مشرفه علينا هي إلي تتابع شغلنا مو حضرتها ! ما لها حق تيجي تحاسبني ليه جالسه قاطعها الدكتور بتفهم : يعني هذا سبب الخلاف بينكم ؟! د. مها باعتراض : مو هذا السبب ! تراها تتصرف بطريقه ما تليق بمكان عام ! واتوقع شفت بعينك بعض تصرفاتها ولا كآنها وحده عندها بزران ! وانا هذي التصرفات ما اطيق اشوفها واسكت عنها ! انا قاطعها نائب المدير بحزم : حتى ننهي هالمشكله كل وحده تتداوم بفتره ! خلاص ام سوار تقدرين يصير شفتك بالفتره الصباحيه قاطعته ساره : صعب ما اقدر ! د.مها بعناد : وانا ما اقدر ! نائب المدير بطول بال : وليه ان شاء الله ! د.مها : انا دكتوره وعندي ارتباطات ... وما يناسبني الشفت الصباحي ! ساره طالعتها بكره : انا لو يطلع بيدي ما اشتغل هنا حتى ما اشوف رقعه وجهك مو بس احول شفتي ..اترك المستشفى كلها لاجلك ! نائب المدير بهدوء : خلاص دكتوره مها اتمنى انك ما تتدخلين فيها لا من قريب ولا من بعيد ! وانا رح اشوف المشرفه ويكون دوامك بقسم الجراحه بعيد عن الدكتوره مها ! واذا صدر اي غلط من ام سوار تقدرين تبلغين الاداره وانتهينا ! وطالع ساره : تقدرين تتفضلي لشغلك واتمنى ما أشوف حركات البزران ! ما ردت وطلعت بهدوء ! شافت سعديه واقفه عند الباب واللقافه ذابحيتها تعرف وش صار ! تكلمت ساره قبل ما تكلمها وتسأل: سعديه اختصري ولا تسألي !! ترى ما لي خلقك ! وتركتها وغادرت المكان وهي تفكر بتصرفها صح او غلط ؟! هل المفروض تركت شغلها ؟! وبنفس الوقت المدير لا يلام من تصرفاتهم ! انقهرت سعديه من تصرف ساره وحلفت بداخلها الا تطلع هالحركه من عيونها !!! ••• ••• *** •** ابو الوليد بلوم : يا ام محمد ما يصير تطردين اختك كذا !! ام راكان قلبها متوله عليك تبغى تجلس معك والله مشتاقه لك كثير !! ام محمد بحقد : ما ابغى اشوف رقعة وجهها ! بسببها فقدت عيالي ! ام الوليد اشرت لزوجها ما يجادلها الظاهر ما رح ينزل الحطب إلي برأسها !! ام محمد بضيق : الله يرحمك يا نادر !! ام الوليد : وين زوجته الحين ؟!! ابو الوليد بهدوء : سألت عنها الجيران يقولون رجعت لأهلها !! ام محمد بكره : حسبي الله عليها ذبحت ولدي وهجت !! والزفته الثانيه وين طست ؟! اكيد مات بعد ما سودت وجهه هالساره وزوجته الخاينه ما استحمل ومات ! ام الوليد رفعت حاجب : مو قلتم تزوجت ؟!! ابو الوليد تنهد وهو يناظر اخته : سألت الجيران عن بنت زوجك يقولون بعد ما تطلقت ما احد يدري عنها وين راحت ! فتحت ام محمد عيونها بصدمه : طلقها !!! حسبي الله عليها !! وين طست الحين ؟! عز الله ما رح يجينا منها الا الفضائح وبعدها وقفت على حيلها بسرعه! ابو الوليد باستغراب : وين رايحه !!! طنشته وخرجت بعجله من أمرها ! *** *** *** *** *** شروق بتعب : والله يا عمتي الشغل هد حيلي ! ام راكان بإهتمام : لو تطاوعيني تتركين الشغل وتهتمين بعيالك احسن لك ! عبدالله بتأييد : وانا اقول لها كذا ! بس رافضه ! ابو راكان : اتركها على راحتها ! ام ماجد : انا اق سكتت لما سمعت الصراخ القريب وعقدت حواجبها باستنكار : وش فيه ؟!! دخلت عليهم مثل الفزاعه وتناظر ابو راكان المتفاجئ من دخولها : جالس ومبسوط على نفسك !! ايه ما هو هامك عرضك وشرفك !! ولا سائل عن البنت إلي من لحمك ودمك !! جا قاطعها بفزع من طريقتها : الله يكفينا شرك تابعت كلامها بنبره اعلى : جايك الشر وانت جالس في بيتك وابنة اخوك من سنين دايره على راسها ما احد يدري عنها ! ويكون بعلمك جيت هنا بس اعلمك إنها ساره من سنين مطلقه وما احد يدري عنها ! الله اعلم مع مين ؟! وينها الحين ؟!! وسلامة فهمك ! يا حكيم زمانك ! ابو راكان ببرود جلس: وش دخلني فيها !! تراني قلتها من قبل والحين ارجع اقولها «متبري من كل عيال اخوي ! » ابتسمت ام محمد بخبث : باكر اذا جابت مصيبه قول للناس وقتها انك متبري من عيال اخوك !!! اعطته نظره خبيثه وطلعت بهدوء عكس ما دخلت !! جلس أبو راكان بعد ما طلعت وملامحه ما تتفسر ! ام راكان بتأثر : طلقها المجنون ؟!! حسبي الله عليك يا خلف مثل ما دمرت هالبنت !! وطالعت زوجها بقهر : اشوفك جالس روح شوف البنت وين موجوده !! الله أعلم بحالها جوعانه والا قاطعها ابو راكان بهدوء غامض : قفلي على الموضوع !! ام راكان بانفعال وقهر من بروده : تراها من لحمك ودمك ! حتى لو غلطت ما تستحق كل هالجفاء ! انت مستوعب وش قالت اختي ؟! مطلقه من سنين ! ونادر ميت الله يرحمه !! اكيد الحين لوحدها !! وطالعت عبدالله بقهر : وانت الثاني جالس ! تراها ابنة عمك يا متعلم ! من لحمك ودمك ! شروق جالسه وتراقب ملامح عبدالله وبس ! عبدالله بسخرية : يمكن اختفت مع خلف وزوجها واحد ثاني ! الله اعلم كم واحد تزوجت 7 او 8 يمكن تزوجت 10 ام راكان بغضب : لا تتمسخر ! انا اتكلم بجديه !. ابو راكان بحده : قلت لك قفلي على الموضوع وانتهينا !!! طالعته ام راكان بقهر ولفت وجهها بزعل !! *** *** ** *** اذن الفجر وهي جالسه بالغرفه وقدامها الكتاب ! تحس رأسها رح ينفجر مو قادره تركز على الامتحان ! قررت تصلي الفجر وتفطر يمكن عقلها يفتح شوي ! بعد الصلاه والفطور رجعت تتصفح الكتاب ناظرت فراشها وغمضت عيونها وهي تتمنى تكون داخله وتنام بعمق !! تمر عليها ايام كثير تكون متواصله لما ترجع من دوام المستشفى ما تنام تمسك كتبها وتحاول تنهج من الدراسه المتراكمه عليها !! تثاوبت بنعاس وبعدها وقفت تجهز نفسها للجامعه متأكده لو جلست دقيقه رح تكون تحت اللحاف ! جهزت نفسها بسرعه وطلعت من الغرفه بعد ما حطت الكتاب بشنطتها حتى ما تشوفهم سعديه وقفلت باب غرفتها كالعاده حتى ما تدخل سعديه الغرفه ! توجهت للغرفة الثانيه إلي غالبا تنام فيها مع الصغار لما ما يكون عندها امتحانات ! اقتربت بهدوء وطالعتهم بمحبه مدت يدها تعفس شعر سوار الناعم المنسدل على جبهتها لاخر لحظه سحبت يدها خافت تصحى واكيد رح تلتزق فيها الا تطلع معها ! ابتسمت وهي تناظر حور عافسه ملامحها الطفوليه ! طالعت السقف وابتسمت وهي تحمد ربها إلي رزقها هالثنائي الجميل! احلى شيء بحياتها !! طلعت من البيت بهدوء وتوجهت لام سعديه تعطيها خبر انها طالعه من البيت !!! بعد جهد وجهيد وصلت الجامعه دخلت بهدوء وتوجهت لكليتها بخطوات سريعة ! قبل ما تدخل الكليه ناظرت اللافته المكتوب عليها اسم الكليه ! ابتسمت وهي تدعي لمها زوجة نادر ! ربنا سخرها لها انها تكمل دراسه بدون علم خالتها ام محمد ! كانت تدرس بالبيت والمديره بالقريه كانت متفهمه وضعها وساعدتها كثير ! ما رح تنسى كل من ساندها لحتى وصلت لهذي الدرجه ! تنهدت ودخلت بخطوات هاديه ! جلست بالقاعه تراجع ماده الامتحان ! علاقتها بمن حولها سطحيه ! لا تثق بالصداقه ولا بمن حولها !! جلست ليلى جنبها بضجر : افففف من هذا الامتحان !! درستي؟! طالعتها ساره بهدوء : الماده صعبه !! ليلى بحسد : يقولون بشعبه ثانيه في بنت حصلت على علامه كامله ! نفسي افتح دماغها واعرف كيف يفكر !! مطت ساره شفتها وبداخلها الله «يجيرنا من عيونك يالحسوده »: الله يبارك لها ويحفظ لها عقلها من عيون الحساد ! ونغزتها بعيونها ! ليلى مطت شفتها : قصدك اني حسوده ! هزت ساره راسها بتأكيد لكلامها ! ليلى عفست ملامحها : انا ما حسدتها بس اقول لك عن العلامات ! طنشتها ساره وهي تراجع الماده مو فاضيه لثرثرتها المعروفه ! حست قلبها وقف لما شافت الدكتوره دخلت ومعها الاوراق ! حست بمغص ما ختمت الماده رفعت نظرها للسماء وهي تدعي من قلبها ربنا يوفقها بالامتحان !! *** *** *** جالسه بالبيت وبضجر من الازعاج صرخت : بس ! بعدين معك انت وهي ؟! ترى راسي مصدع ! سوار طالعتها بتكذيب : راسك يعورك ! اشربي دواء ! حور بتأكيد : ايه اشربي دواء! نبغى نلعب ! لا تزعجينا ! فتحت سعديه عيونها باستنكار:انا ازعجكم ؟! صدق قليلات ادب مثل هالساره ! وبقهر رجعت انسدحت : انا نفسي اعرف وين الصبح تنقلع ؟! خبيثه هالبنت ما تبغاني اشتغل معها الصبح ! حتى رافضه تخبرني بشغلها الظاهر انها تخاف اسرق منها شغلها ! صدق متخلفه ! وطالعت البنات بتحقيق تطبيق للمثل «خذ اسرارهم من صغارهم»: ساره وين الحين ؟! حور وهي تلعب : ما يخصك ! سوار تطالع اختها بعد ما مطت شفتها بسخريه : ملقوفه ! سعديه انقهرت : الحين ابغى اعرف مين حور ؟ فتحت عيونها باستنكار لما كل وحده رفعت يدها وتقول : انا !! سعديه وهي تخزهن : طيب مين سوار ؟! وبنفس الحركه كل وحده رفعت يد وتقول : انا !! سعديه بغضب : فنى ! جعلك بالوجع انت واياها ! هذا الي ناقصني ابتلش ببنات المجنون !! احتقن وجه سوار بغضب طفولي : لا تقولين عن بابا مجنون ! سعديه حركت حواجبها تقهرها : مجنون ومجنون ومتخلف ! حور بدفاع عن ابوها : ما يصير تشتمين الميت !! لازم تقولين الله يرحمه ! فتحت سعديه آذانها على وسعهم من هالمعلومه : وش تقولين ؟!! متى مات ابوك ؟!!! سوار بذكاء طفولي لما تذكرت تحذير امها ما يتكلمون بهذا الموضوع قدام احد مسكت يد حور بطفوله: ياغبيه قلت لك ابو سوزان إلي مات ولازم تقولين الله يرحمه مو بابا !! سعديه طالعتها وهي تقرص عيونها : يمه منك على قد صغرك بس عفريته ! ابو سوزان قلتي له ؟! يصير خير ! وطلعت سعديه من الغرفه وهي مولعه من هالبنات ! قررت ترجع تنام حتى تكون متنشطه للدوام المسائي !! *** *•• *** طلعت من الامتحان بضيق ما تتوقع تنجح ! نفسها تصفق هالدكتوره كفوف على وجهها ! ماتدري من وين تجيب لهم هالاسئله ! طالعت ساعتها بضيق باقي 5دقائق على المحاضره الثانيه ! تحس نفسها مو قادره تفتح عيونها من النعاس ! توجهت للقاعه وجلست بالمقاعد الاخيره وضعت كتبها وحطت راسها فوقهم وغمضت عيونها تغفي لو 5 دقائق تريح نفسها شوي ! تسمع صوت الازعاج والبنات من حولها بس مو قادره تفتح عيونها ! النوم كان مسيطر عليها ! تحس احد يهز بكتفها اكثر من مره اضطرت ورفعت راسها وهي مو شايفه من النعاس ! البنت برقه : ما في اليوم محاضره ! في ندوه بقاعه «....» رح تلقيها المحاضره شروق.. والحضور اختياري هزت راسها ساره بالرفض ورجعت تغط بالنوم ! تحس رقبتها اوجعتها من النوم بهذي الطريقه ! رفعت راسها وهي تتحسس رقبتها ناظرت المكان واستغربت انه فاضي ! سرعان ما تذكرت كلام البنت ! فتحت عيونها بتذكر وبإحباط ما عندها اليوم محاضرات الا الامتحان! عقلها اليوم طافي جالسه بالقاعه تنتظر محاضره باكر ! همست بنعاس : غبيه ! انا محاضراتي يا دوب احضرهم ! ضيعت ساعه على الفاضي !!! وقفت وهي تلم حاجياتها وبعدها طالعت ساعتها يا دوب تلحق على شغلها الثاني! ** ** ام الوليد تلوم فيها خايفه ترجع ساره ويرجعها عبدالله وتكون ضره لابنتها: الحين وش استفدتي يوم علمتي ابو راكان ؟! ام محمد بخبث : خليه يروح يشوف ابنة اخوه وين طست !! ام ماجد بقهر من عمتها : على بالك عمي ابو راكان اهتم ؟! الظاهر حتى ما فكر بالسالفه ! وللحين مصمم ما تدخل بيته هالساره ومتبري منها ! يعني حركتك ما لها داعي !! ام محمد بنغزه : قولي انك خايفه عبدالله يرجعها لذمته ام الوليد : اصلا عبدالله ما يقبل يجيب الضره لشروق ! بلاك ما تشوفين كيف متعلق فيها ! لو يطلع بيده ما تغيب عن عينه من كثر ما يحبها! ام محمد بخبث : بلاك ما تعرفين الرجال !!. تراهم يحنون للأولى! وخاصه انه خطب ساره بنفسه ! ولما طلقها كانت لحظة غضب ! يمكن للحين يعض اصابعه ندم انه فرط فيها ! ام ماجد انقهرت من كلامها : وليه يندم عبدالله؟! تراه ما احد جبره على طلاقها !! واختي ما شاء الله عليها ما يعيبها شيء ! ام محمد بنغزه : ينقصها الطول ! تراها مو طويله مثل ساره! ترى عبدالله ما طير عقله الا طولها والبنت الشهاده لله حلوه وما يعيبها شيء ! لو قارنتي شعرها بشعر شروق ما في مقارنه ! ساره سبحان إلي خلق شعرها اسود وطويل وناعم ! اما اختك صحيح طويل بس مو بنعومة شعر ساره ! ام ماجد بقهر من كلامها : ما اذكر انك تمدحينها ! طول عمرك تذمين شكلها ! الحين صارت زينه ! ام محمد حطت رجل على رجل بأريحيه : صحيح طول عمري اذم شكلها وللحين اذمها لاني اكرهها ! لكن انا اقول لك هالكلام من نظرة الناس لها ! ام الوليد تنهي الموضوع : عبدالله متأكد منه مستحيل يناظر غير شروق ! لو كانت ملكة جمال العالم ! وبعدين اذكر شفتها مره هالساره اقل من عادي ! بناتي احلى منها ! ام محمد بصراحه : خلينا واقعيين ! نوره زوجة عزام احلى شيء اما باقي البنات عندك عاديات واقل من عادي ! ام ماجد رفعت حاجبها بحده : مو عاجبينك يا عمتي ! ام محمد : يا ام ماجد انا ما اذمك انت واخواتك بس اقول انكم عاديات من ناحية الجمال بس اطلعي نوره ! ام الوليد ابتسمت بهدوء : صادقه ! هي نوره إلي تميزت بالجمال اما باقي بناتي عاديات بس شهادتهن واخلاقهن وادبهن زادهن جمال وتميزن على اغلب البنات ! ام محمد بتأكيد : بالضبط يا ام وليد !! ** *** ** طالعت ساعتها بضجر بقى ربع ساعه وتغادر المحل وتتوجه للمستشفى ! جلست صاحبة المحل عندها وابتسمت لها : الله يعينك يا ابنتي على هالضغط ! ساره بهدوء : ربك بفرجها ! بعدين انا اشتغل هنا يوم بعد يوم وساعات محدوده وايام دوام الجامعه ما اشتغل الا بالمستشفى ! واليوم حاله اضطراريه عندي امتحان ! صاحبة المحل : الله يوفقك ! ليه ما تشتكين على طليقك وتطالبي بنفقه للبنات على الاقل يخفف عليك من هالمصاريف !! ساره تنهدت وبداخلها تردد «خلي الطابق مستور»:يا خالتي تراه مجنون والحين تلاقينه يدور بالشوارع مو لاقي يصرف على نفسه! من وين يصرف على البنات !! هزت راسها بتأييد : صادقه !! يبغى احد يصرف عليه ! وقفت ساره لما شافت حرمه دخلت المحل !! اقتربت من الحرمه وبهدوء : اقدر اساعدك !! الحرمه وهي تناظر داخل المحل : ابغى فستان لطفله بعمر سنتين ! هزت ساره راسها بتفهم وبدأت تساعدها تختار ! بعد ما اختارت توجهت ساره تحاسبها دخل المحل بهدوء وتوجه لزوجته بهدوء : ان شاء الله لقيتي ؟! بابتسامة بانت بعيونها من تحت النقاب : ايه تعال حاسب ! واشرت على صاحبة المحل ! عزام بهدوء : كم الحساب ؟! اخبرته نوره زوجته وتوجه لصاحبة المحل يحاسب ! طلع الفلوس ومدهم بهدوء ؛ تفضلي اختي !! جالسه ساره على جنب رفعت نظرها وحست بالصدمه لما شافته ! حاولت تكون طبيعيه وما تظهر شيء! بعد ما طلع غمضت عيونها وهي تستذكر شكله ! متغير شوي بس ملامحه نفسها ما تغيرت! حمدت ربها انها تغطي وجهها حتى ما يعرفها احد! وما ناظر لجهتها مو لشيءبس ما تبغى تحتك فيهم او تشوفهم خلاص كل شيء بينهم انتهى !!! ناظرت ساعتها وقررت تطلع بعد ما خلص دوامها ! غادرت وهي تفكر بنفسها ! تذكر لما كانت تشوف عزام قلبها يرجف من الخوف ! وتخاف ترد له الكلمه !! كانت ترد لها الروح بشوفته وتفرح كثير ! اما الحين ! ولا كأنها تعرفه ! ولا يهمها امره ولا فرحت بوجوده ! تبدلت المشاعر إلي بداخلها وتحولت من محبه الى كره من بعد ما خذلها لما استنجدت فيه ...انطفت محبته من قلبها ! من بعد ما طقها ..... حذفته من قاموس حياتها ! صار ما يعني لها شيء !! طلعت من المول بهدوء تبحث عن سياره اجره تأخذها للمستشفى!! * * *