أقدار - الفصل 56 - بقلم ضاقت انفاسي - مكتملة | روايتك

الصمت فقط يغلفها كل يوم تطلع وتجلس امام السور تناظره وكأنها تتأمل لوحه فنيه ابدع الرسام بأبعادها كما ابدع الجدار بحجب الرؤيه عنها !!! تحس هالجدار شطر قلبها من النص ! تبغى تصرخ بأعلى صوتها وتنادي عمها : احبك يا عمي ! مشكلتها حبهم عشعش بقلبها كيف تنساهم بذي السهوله وتنقطع عنهم ؟! وما تقدر تستغني عنهم ! والجدار ابعدهم عنها ! تبغى تشوفهم لو من بعيد ! حتى عبدالله قطعت افكارها وهي تتنهد بألم .... متأكده ايام وتنصلح كل الامور وترجع المياه لمجاريها ! لحظة غضب ورح يبان كل شيء ويرجعون لها ! عمها يحبها ومستحيل يظلمها او يطردها من حياته للابد!! ناظرت يدها ما زال لون الازرق يحيط ببعضها ! حمدت ربها انها ما انكسرت يدها جسمها للحين يعورها من طق عزام ! اخر ما توقعته عزام يضربها كذا ؟! حتى جودي وليان يشوفونها تنطق بقوه وبدون رحمه وما يدافعون عنها ؟! لذي الدرجه كارهينها ؟!!! زفرت بضيق وهي تسمع خالتها تنادي عليها ! تحس لسانها معقود مو قادره تنطق حرف واحد ! الصمت هو جوابها ! من بعد الحادث ما نطقت بحرف واحد ! قلبها ميت وبداخله نبضة امل ترجع الامور لمجراها ! دخلت بهدوء وهي تواجه غضب ام محمد : وبعدين مع خبالك يا مخبوله ؟! 24 ساعه مقابله هالسور ؟! اكيد عقلك ضارب ؟! والا تشمي ريحه الحبايب ؟!! جلست وهي تكمل كلامها بشماته : ترى وضعك يكسر الخاطر ! ترى إلي تنتظرينه يرجعك اليوم زواجه ! وناظرت ساعتها : تراهم على وصول الزواج انتهى قبل نصف ساعه ! بهتت ملامح ساره من هالخبر إلي نزل عليها مثل الصاعقه ! مستحيل ! اكيد تكذب حتى تقهرها ! مستحيل عبدالله وعمها يتخلو عنها !! وبسرعه توجهت لخارج البيت حتى تتأكد بنفسها !! فتحت البوابه الرئيسية ووقفت بالشارع وتحس بضيق وقلبها يدق بقوه ! سرعان ما رجعت خطوه للخلف بعدم تصديق وهي تشوف السيارات المتوجهه لبيت ابو راكان ! تزوج ! وانتهى الزواج !! هي اخر من تعلم !! لذي الدرجه تكن لها بالكره خالتها اخفت عنها الامر لوقت رجوعهم حتى تقهرها ! ما تذكر انها زعلتها بشيء حتى تكرها لذي الدرجه !! رجعت خطوات خائبه للبيت بعد ما قررت الرجوع لبيت نادر ! وش الفائده من جلوسها هنا ؟! تحملت خالتها وكلامها على امل يرجعها عبدالله ! خابت ظنونها ! تحس الضيق والقهر خنقها والغصه بحلقها ! ما اذنبت حتى تلقى هذا الجزاء !!! دخلت وهي تحاول ما تظهر لها ضيقها ! ام محمد بشماته : اكيد صدقتي لما شفتي بعيونك ! تمنيت تشوفينه بالبشت وتكحلين عينك بشوفته ! ضحكت بطريقه مستفزه : عاد الحين عبدالله بأفخم الفنادق ! تدرين هذا الصح لازم من زمان طلقك تراك مو من مستواهم ! والحين اخذ وحده يتباها فيها جمال وادب واخلاق وتعليم! تدرين من تزوج ؟!!!! تزوج شروق ابنة ابو الوليد إلي يكون اخوي ! اخت نورة زوجة عزام ! تدرين اخوي وش يقول عنك ؟!! وبطريقه مستفزه : والا بلاها احطها بوجهك ! نفسها تعرف من اي طينه خلقت خالتها؟! لذي الدرجه الاحساس معدوم عندها ؟! وش إلي تبغى توصل له بالضبط ؟!! يوم ضربها عزام وألزمت تأخذها للمستشفى ظنت انها تغيرت و رق قلبها بس تفاجأت اصرت عليها تروح للمستشفى حتى تشتكي على عبدالله وعزام ! كله علشان خلف ! ما تنازلوا عن عزام وعبدالله حتى اضطر ابو راكان يتنازل عن خلف !! كل الناس مصالح ! تنرفزت من خالتها للحين ما سكتت وتقرقر فوق رأسها خلاص ما تقدر تتحمل كلامهااكثر من كذا وبدون وعي صرخت : خلاص قفلي حلقك ! تفاجأت ام محمد رد ساره ناظرتها وهي فاتحه عيونها بعدم تصديق ساره تكلمها كذا ؟!!! ساره وتتنفس بغضب :دودودودو حشى بالعه راديو ؟!! على بالك تبغين تقهريني بقرقرتك ؟! تراني مو سائله عن الدنيا كلها !!! ام محمد وللحين مستوعبه انها تكلمها كذا : انت تكلميني ! ساره بقرف من هالحياه : لا الجدار إلي خلفك !، تركتها تحت دهشتها وتوجهت للغرفه اخذت شنطة اليد وطلعت بدون ما تناظر ام محمد إلي جالسه وفاتحه فمها بعدم تصديق ! ولما استوعبت انها ساره طالعه ومعها شنطتها صرخت بغضب : يا الحيوانه وين طالعه بهذا الوقت ؟! طنشتها ساره وطلعت وبداخلها سكين تطعن فيها وسالفة زواجه مو قادره تنساها ! وقفت بالشارع ما تنكر خروجها بهذا الوقت غلط لوحدها بس ما تقدر تجلس دقيقه عند خالتها ! تبغى تطلع وتفرغ الكبت إلي بداخلها بعيد عنها !! نقزت بخوف لما حست باليد إلي مسكتها : ادخلي لا بارك الله فيك ! تبغين تفضحينا ! نفضت ساره يدها بغضب وبصوت عالي : اتركيني ! ام محمد تناظر حولها : لا تفضحينا بعد سواد وجهك ! والحين طالعه بآخر الليل ! ساره بقوه ما تدري من وين حصلتها يمكن زواج عبدالله طلعها من طورها : مو جالسه عندك دقيقه وحده ! ام محمد برجاء : تعالي نتفاهم بالداخل ! ساره بعناد : مو داخله تفهمين والا لا ؟!!! ام محمد شافت بعض السيارات تمر وتناظرهم : فضحتينا ادخلي للصبح وباكر انقلعي وين ما بغيتي ! ساره رفعت بتهديد : وقسم بالله لو تفتحين فمك بالسالفه الا قاطعتها ام محمد بقرف : مو فاتحه حلقي بس ادخلي ! لو بقيت منكتمه احسن لنا ! ما ادري من وين طلعلك هاللسان ؟! ساره بسخريه وهي تدخل : طلع من حلقي ! ام محمد بكره وهي عافسه ملامحها من خلفها : يا سخفك ! كل هالغضب لانه تزوج وحده ثانيه ؟! وبشماته :ذوقي إلي ذوقتني اياه امك .. طنشتها ساره ودخلت وهي تحمد ربها انه خالتها رجعتها! فكره مجنونه تطلع بهذا الوقت ؟!!! دخلت الغرفه واستلقت على السرير بملابسها تحس رجع اصابها البرود ! تناظر السقف لدقائق وبعدها حست بدموعها الدافئه تأخذ مجراها على خديها ! مو قادره تستوعب انه عبدالله خلاص صفحه وانطوت من حياتها ! *** *** *** *** في الصباح جالسين ينتظرون عبدالله وعروسته ! ام راكان بفرح : الحمد لله ربنا عوض عبدالله بشروق ! ابو ماجد بحماس: نفسي اعرف رد فعل خلف لما يدري ؟! عزام ابتسم : لو يدري انها ابنة عمي ابو الوليد العروس الا ينجلط ! ابو راكان بابتسامه : يمكن اكثر شيء يكره خلف خاله ابو الوليد ! ام راكان مطت شفتها: ام محمد متصله بابو الوليد ويقول مسحت فيه الارض انه وقف معي وصف ضدها ! ابو عزام بضيق من سيرتها : الله يجيرنا من شرها ؟! ساره تدري انه تزوج ؟!! ابو ماجد بتآكيد : اكيدمعها خبر ! على بالها يجلس على ذكراها ! ام ماجد بثقه : أختي رح تنسيه كل الحريم ! وبعدين عبدالله احسه كل حبه لها طار وتحول لكره بعد سواد وجهها ! ام عزام ما تدري بالرغم من توقيف عزام بالسجن بسببها بس للحين كاسره خاطرها وتتمنى لو تقدر تأخذها تعيش عندها ! متأكده مستقبلها ضاع وخاصة بعد الكلام إلي طلع عليها بعد طلاق عبدالله لها ! البارحه كان اغلب كلام الحريم بالصالة عنها ! حتى شرفها انطعن فيه والسبب عبدالله ! حتى لو اخطأت ساره ما يصل عقابها لذي الدرجه !! حرام عليه يطلقها بيوم الزواج ! بعمر الزهور ارمله ومطلقه ! ما تدري كيف رح تتحمل ساره كل هذا ؟! تكلمت بغصه والدموع تلمع بعيونها : حرام عليكم تراكم ظلمتوها اكث.. قاطعتها ام عمار بكره : ظلمناها ؟! كله من تحت راسها ام عزام بقهر : حتى لو غلطت ما توصل لذي الدرجه يطلقها بيوم الزواج ؟! 16 سنه تترمل وتتطلق ! تراها طفله ! نسرين بعمرها افكارها طفوليه وللحين اعاملها وكأنها طفله ! بس وقفوا مع الحق تراها صغيره ما تستحق كل هالعقاب ! كل الحريم البارحه يطعنون بشرفها !! حرام عليكم دمرتوا حياتها ومستقبلها ! نوره بسخريه لوت بوزها : هالمستقبل المبهر إلي ينتظرها ؟!!! ابو ماجد بسخريه : لا تخافين باكر خلف يدبر لها عريس ! ابو راكان بتأييد : صادق ! لا تخافين على هالمستقبل الزاهر ! ابو عزام بهدوء : خلاص يا ام عزام ! موضوع انتهى ! صدت بضيق ليه ما احد يوقف مع الحق؟!! قاطعهم دخول عبدالله ومعه العروس والابتسامه شاقه الحلق ! طالعه عزام بهدوء ما يدري هالابتسامه من قلب او يمثل الراحه والفرح ! معقول كل التعلق إلي يحمله لساره اختفى بلمح البصر ؟!!! وما عاد له اثر ؟! *** *** *** *** تمر الايام.......... و بالرغم من التغيرات و الظروف إلي يواجهها الانسان من خير او شر يحتم علينا الزمن التأقلم على الوضع ونسيان الماضي او تجاهله ! حطت الفطور بروتين عادي نادر ناظرها وابتسم بالرغم من تغيرها البسيط صار طبعها حاد شوي وفقدت اهم شيء كانت تزين فيه ثغرها بس الظروف إلي مرت افقدتها «الابتسامه » انطفت ابتسامتها !!!!! تميل للهدوء وقلة الكلام ! وخاصه بعد الكلام إلي انتشر بين الجيران عنها ! ما يدري من نشر هالكلام عنها ؟! قرر الرحيل حتى ما يوجع قلبها بالكلام من حولها لكنها رفضت الرحيل وهي تتكلم ببرود «إلي نشر الكلام عني حتى لو هجيت لاخر العالم رح يلحقني ويتكلم فيني خلينا هنا افضل واخرها الناس تقفل حلقها » مسكينه ان ظنت الناس ينسون الماضي ! مها بهدوء وبطنها بارز قليلا : غريبه للحين خلف مختفي ! نادر بسخريه ابتسم : ما عنده الشجاعه يقابل عيال عمه عارف رح يدوسونه ! والسالفه بعدها ما ماتت ! ارتشفت من كوب الشاهي وهي تتمنى يختفي خلف للابد ! ما تتوقع امتلاكها قوه لمواجهة خلف لتوبخه على افعاله ! دمر مستقبلها !! اي مستقبل ينتظرها الحين ؟! لابد من وقفه تعيد ترتيب حياتها من جديد ! ابتعدت عن اهل عمها ابو راكان وانقطعت اخبارهم عنها ! تحس بالبرود جهتم ! هزت رأسها بالرفض ما تشعر لجهتهم بالبرود فقط ! تشعر قلبها كره كل بيت عمها ! كرهتهم وخاصه «عبدالله » كل يوم قلبها يحقد عليه اكثر بعد ما استلمت ورقة الطلاق ! تناظرها كل فتره بتأمل وهي تفكر بالذنب العظيم الذي اقترفته حتى يعاقبها بهذا الشكل !!! مرتاحه حاليا من خالتها ام محمد من بعد ما وصلتها لبيت نادر ما شافتها ولا تبغى تشوفها حاليا ! تنهدت وناظرت مها إلي تكلمها تغصب نفسها تتكلم وتكون طبيعيه بس من الداخل نار تكويها ! *** *** ** ناظر امه بفرح وهو يدخل الصاله : الحمد لله شروق حامل ! ما احد بسعادتي رح اكون اب ! ام راكان اطلقت زغروده : مبروك يا ولدي ! الحمد لله ! عبدالله بابتسامه بعد ما جلس : ان شاء الله تكون بنت !! ماجد وهو مستلقي على الكنبه ويطقطق بالجوال : وتسميها ساره ! طالعه عبدالله بصدمه ما توقع يتكلم ماجد كذا ! ام راكان عفست ملامحها بقرف: تخسى ...هذا الناقص حفيدتي تكون على اسمها ! ما صدقنا نرتاح منها ومن سيرتها ! ماجد نزل الجوال وطالع عمه وهو رافع حاجب : تبغى تقنعني انك مو ندمان على طلاقها ؟! عبدالله بملامح غامضه : ندمان اني طلقتها والا المفروض اخليها معلقه حتى ما يستفيد خلف منها فلس واحد ! ماجد بتلاعب جاد : يعني ساره مو بقلبك الحين ؟! عبدالله : يا سخفك ! عندي إلي تسوى العالم وما فيها وش ابغى بوحده همجيه وعبيطه وبنفس الوقت خبيثه !!! ماجد اعتدل جلسته بسخريه : من لما خطبتها وحنا نقول لك تراها عبيطه وغبيه وتقول عاجبيتني والحين صارت كذا ؟! عبدالله تنرفز منه : انت مين سلطك علي ؟!! وش تبغى بالضبط مني ؟!!! ماجد طالعه بتحدي : ابغى اخطب ساره شهقت ام راكان وهي تضرب يدها على صدرها !!! دخل ابو ماجد على اخر جمله : خطبك القرد يا قليل الحياء !!! ماجد صار وجهه ألوان ما توقع تواجد ابوه بهذي اللحظه وبسرعه نطق بتبرير : والله اطقطق على عمي عبدالله ! ناظر عمه : صح يا عمي ؟! طالعه عبدالله بنظرات حاول تكون طبيعيه : اذا لقيت خلف روح اخطبها ! وبعدها وقف وهو يكمل كلامها : تراها طلعت من هنا واشر على راسه : وعافها الخاطر ! وتركهم وطلع ! ابو ماجد جلس وهو يناظره بغضب : وقسم بالله لو اسمع هالكلام مره ثانيه انه قاطعه ماجد : وقسم بالله امزح معه ! ام راكان بغضب : هذا الكلام ما فيه مزح ! ثمن كلامك قبل ما تتكلم ! ماجد مط شفته وهو طالع يهرب من نظرات ابوه : ان شاء الله ** ** ** ** ** مها رافعه حاجب ما عجبها كلام اميره : الحمد لله غيرنا مو لاقي خيمه يسكن فيها ! اميره بتحسف : كان معكم بس بسفاهتكم ضيعتو قاطعها نادر بضجر : ليه دوم لما تشوفوني لازم تسمعوني هالاسطوانه؟ !! والحين وش سبب هالزياره ؟! اميره بهدوء: يعني لما ازورك لازم يكون فيه سبب ؟! نادر رفع حاجب : والله ما عمري شفتك زرتيني فأكيد فيه سبب لزيارتك !! اميره بنغزه : ليه من قبل كنا نعرف اراضيك ؟! كل يوم كنت بديره ! مها تنهي هالموضوع : وهذا حنا استقرينا هنا ! اميره طالعت ساره بضيق وبعدها تكلمت : سمعت بالأحداث إلي صارت ! ترى امي ما خبرتني بطلاقك الا قبل فتره بسيطه ! قالت لي الزواج تكنسل لانه ام عمار تعبت ! ما كنت ادري عن شيء وبعدها سافرت نادر يقاطعها : والحين رجعتي !!! طنشت مداخلته وهي تناظر ساره : ان شاء الله ربنا يعوضك ! وبعدها ناظرت نادر : تدري انه محمد باع بيته وامي وخلف كمان !!! شهقت ساره بعدم تصديق : وش تقولين ؟! اميره بتأكيد لكلامها : مثل ما اقول لك نادر وهو عاقد حواجبه: مو تقولون خلف مختفي ؟! اميره هزت راسها : ايه مختفي بس تواصل معه خالي ابو الوليد واتفق معه يبيع البيت وينقلع ولا يشوفونه بعدها او رح يطلعونه من تحت الارض ووقتها رح يكون الموت ارحم له ! تقول امي انه خلف رفض بالبدايه بس اتصل عليه اخوي محمد واقنعه يبيع البيت ويبعد عنهم لانه بكلا الحالتين ما رح يقدر يرجع للبيت وبيت عمي متحلفين فيه ! وحتى خالي ابو الوليد قال له اذا ما تنازلت رح يرفع عليه قضيه تزوير هزت كتوفها اميره : ما ادري بالضبط وش قضية التزوير هذي ....لانه عليه قضايا بلى تزوير ونصب نادر ما اهتم لبيع البيوت : وبعدين وش صار ؟! اميره بهدوء : اضطر يوافق خلف غصب عنه وقبل اسبوع تمت عملية البيع !! وبعدها اختفى خلف! ومحمد رجع باع بيته وبعدها سافر نادر : وامي وين الحين ؟! اميره : جالسه عندي قاطعتها مها باندماج: مين اشترى البيوت؟! اميره بهدوء : خالي ابو الوليد نادر عفس ملامحه بكره : يا كرهي لهذا الخال ! رافع خشومه للسماء ! خالي صالح الله يرحمه كنت اهضمه اكثر منه ! زاد ضيقتها بعد خبر البيع ! ما تدري وش السبب يمكن تحن لمكان عاشت فيه لسنوات او قاطعت افكارها اميره وهي تناظرها : والحين جيت لساره في ابنة صديقتي عندها حفلة تخرج وابغى تحضرين معي ! ساره ما لها نفس تشوف احد و برفض : ما ابغى قاطعتها اميره بتشجيع : لازم تغيرين نفسك وما تحبسي نفسك بين هالجدران ! لا اول وحده ولا اخر وحده طلقها ولد عمها ! بعدك صغيره عيشي حياتك وانسي الماضي ! مها بتأييد : صادقة اميره لا تنكدي على نفسك إلي باعك بيعه روحي مع اميره تغيرين جو اميره بابتسامه ظهرت منها بعض التجاعيد : انا مو طالعه بدونها ! فكرت ساره للحظات ليه تدفن نفسها على ذكرى ناس باعوها بدون ذنب ! وبسرعه ناظرت اميره : متى طالعين ؟! اميره بابتسامه : الحين نطلع ونلف لوقت الحفله ! *** *** *** جلست على احدى الطاولات بهدوء وتناظر القاعه بفخامتها كل هذا علشان حفلة تخرج ؟!!! مطت شفتها بسخريه ! اميره تكلمها بجديه : وش رايك بالحفله والمكان؟! ساره تعبر عن رايها ما عاد يهمها إذا الشخص المقابل اعجبه ردها او لا او يزعل من ردها ! كل التحفظات الماضيه رمتها وتحس نفسها صارت تتكلم وما يهمها شيءوما عادت تستحي بإبداء رايها زواج عبدالله قلب حالها ناظرت حولها بتأمل : مبالغ فيها ! ليه كل هالتكلف ؟!!! اميره بابتسامة : يعني ما عجبتك ؟!! ساره بعبوس: ما احب هالاماكن او ما اعتدت دخولها ! اميره تبغى تشجعها : تدري وش قصه صاحبة هالحفله ؟! هزت راسها بعدم المعرفه ! تابعت اميره كلامها بهدوء : هذي البنت خطبها ولد خالها من لما كان عمرها 18 سنه ! وشرط عليهم ما يبغاها تكمل تعليمها ! وافقوا على شرطه وجلست بالبيت حالها حال اي بنت بدون دراسه بالرغم من عشقها للدراسه ! المهم ولد خالها قرر يكمل دراسات عليا برا ! وفعلا سافر وتركها ودوم ويتواصل مع اهله وهي تنتظره بشوق متى يرجع ! تدرين بعد غياب 10 سنوات ساره عقدت حواجبها : 10 سنوات دراسه ؟! اميره وهي تشبك يدينها ببعض : طبعا لا اكمل دراسته وقرر يأخذ خبره من هناك وتوظف ! ولما رجع هنا فسخ الخطوبه يقول يبغاها بنت صغيره ومتعلمه وحلوه ! فتحت عيونها بصدمه ساره من هالقصه ! اميره تنهدت : ضيع عمرها ودراستها وبالاخير تركها ! والحين عمرها 32سنه وتخرجت من الجامعه ! وناويه تكمل دراسات عليا ! بعد ما فسخ الخطوبه ما اعتزلت او دفنت نفسها بالعكس على طول قدمت للجامعه واكملت دراستها وقررت تصنع نفسها بنفسها وما تسمح لاحد يحطمها ! تابعت ساره بنظراتها البنت إلي تتكلم عنها اميره كيف الابتسامه ما فارقتها وتنتقل بالقاعه مثل الفراشه!!! وقفت اميره : الحين راجعه بس اسلم على صديقتي وراجعه لك ! مطت ساره شفتها اختها اميره لها صديقات ومعارف كثير عكسها ! حست قلبها يدق بقوه لما شافت ام عمار تجلس على طاوله قريبه منها مقابل لها ومعها جودي وشروق ! نزلت نظرها ما تبغى تشوفهم ما قدرت تسيطر على نظراتها وحست بوجع بقلبها لما شافت ام راكان ونوره ! ذبحها الحنين لام راكان وام عمار وبنفس الوقت كرهتهم كلهم ! مشاعر متضاربه بداخلها ! نزلت نظرها وهي تفكر بمستقبلها لازم تنسى كل الماضي والأشخاص إلي كانوا فيه ! رح تبدأ بحياه جديده تصنعها بنفسها ! وما تسمح للظروف تقهرها !! طلعت الجوال إلي اعطاها اياه عبدالله كان اخر هديه منه بعد ما كسر خلف جوالها ! اشغلت نفسها بالجوال حتى ما تناظرهم ! ** *** ** **