أقدار - الفصل 55 - بقلم ضاقت انفاسي - مكتملة | روايتك

ناظرتهم بضياع مو مصدقه شيء ! تحس نفسها بحلم ولازم تصحى منه ! صرخت بألم لما سحبها ابو راكان بقوه خارج البيت ناظرت عزام وباستنجاد صرخت : عمي عزااااام بس خاب ظنها لما اشاح بوجهه عنها ! رماها بقوه خارج البيت وبغضب : اذا شفتك عتبتي باب بيتنا اذبحك!!!! غمضت عيونها لما قفل الباب بقوه ناظرت الباب وهي تحت الصدمه مو مصدقه شيء ! خلف طلق ام عمار ؟! ليه ومتى ؟! خلاص عبدالله طلقها بدون ذنب،!! ليه يعاقبوها بفعل خلف ! نزلت نظرها للارض وهي تردد وقلبها ينفطر «اليوم الزواج » وقفت وهي تحس بطعم الاهانه ضربها وطلقها وطردها ! بدون ذنب ! بدون ذنب!!! حضنت يدها وهي عافسه ملامحها من الالم لما رماها عمها اصطدمت بالارض ! اخذت نفس عميق وهي تناظر السماء بزرقتها ! وقفت وهي محتاره وين تروح ؟!!! ضاقت الدنيا بعيونها ...كلما تقول زانت حياتها تخرب !!! وجدت نفسها تجلس على عتبة بيت ام محمد وهي تجهل الحاضر والمستقبل ! *** *** *** ابو راكان بغضب : وقسم بالله الا ادفعه الثمن غالي !!! الحين يا ابو ماجد تشوف عمال ابغى ابني سور بيننا وابغاه اليوم ينتهي بأقصى سرعه ! ابو ماجد بهدوء : ان شاء الله ! وبنبره لوم :قلت لكم من قبل نخلص من هالعلقه !! وناظر عبدالله : ناوي ترجعها لذمتك قاطعه عبدالله وللحين النار بقلبه وصوره ام عمار بذهنه : تخسى ! لو تخلص الحريم ما رجعتها لذمتي ! ام عزام بين نارين وإلي موجعها ساره ما لها ذنب وبصوت مخنوق تكلمت : ساره وش ذنبها ؟!! عبدالله والشرار يطلع من عيونه: ذنبها انها اخته ومثل ما طلق اختي نطلق اخته !! سلمان بملامح جامده : والعرس ؟! ابو راكان بحزم : ما في عرس ولا زفت ! خلاص نلغي كل شيء ! وناظر عبدالله : لا تهتم بس تطلع اختك من المستشفى رح ازوجك إلي تسواهم كلهم ! ام راكان قلبها قارصها على ام عمار : خذوني لها ! ابو تالا بهدوء : يا يمه الدكتور قال انها بخير ما له داعي هالقلق ! الاهم الحين نلاقي الكلب قاطعتهم وهي تدخل وتردح بعد ما خبرها خلف بالسالفه : ما احد كلب الا انت واخوانك ! ابو راكان وقف بغضب : صدقيني رح ييجي يوم و يتمنى الموت هالخلف ! ام راكان بغضب : الله يحرق قلبك عليه ! الله يأخذه الله قاطعتها ام محمد بصراخ : قفلي حلقك يا .... روحي شوفي ابنتك وش مهببه وبعدها تعالي تكلمي ليه عمل فيها كذا ؟! عبدالله بصراخ: اختي اشرف منكم كلكم ! ما اسمح لك تفتحي فمك عليها بحرف ! والله والله لنحرق قلبك عليه ! ام محمد بانفعال : جعلك بالنار إلي تحرقك ! يا ليته صابك فال ساره وارتحنا منك ! ام راكان وهي تدفها حتى تطلع من البيت : انقلعي لا بارك الله فيك ! الحمد لله ولدي تخلص من هالبومه وطلقها وارتحنا منكم كلكم ! ام محمد بذهول وهي تناظر عبدالله : طلقتها ؟!!! ابو راكان طالعها بكره : العين بالعين والبادي اظلم ! ام محمد بلعت صدمتها وعدلت ملامحها وهي تبتسم باستفزاز : على بالك كذا تقهر خلف لما تطلق ساره ؟!!! مسكين ترى المويه تمشي من تحتك وانت مو داري ؟! ومين قال لك انه خلف ناوي يزوجك اياها ؟! مخطط للطلاق من قبل بس وفرت عليه الخطط ! سحب الفلوس إلي يبغاها منك واكتفى ! وحط في بالك الجوالات والشبكه والفلوس إلي اعطيتهم لساره اخذهم خلف ! كانت ترسلك تبغى فلوس وخلف جنبها يضحكون عليك !! غبي اذا ظنيت ساره مهتمه لك تراها اليد اليمنى لخلف وكانت تضحك عليك وعلى اهلك قاطعها ابو تالا بغضب : تراني محترمك لاخر لحظه لأنك خالتي بلا قاطعته بسخريه وتبث سمومها : مين قدك الحين بعد ما طلقها عبدالله فضيت لك الساحه ! وتقدر تراكض خلف ساره مثل المراهقين ! عقد عبدالله حواجبه باستنكار لهذا الكلام ! ام محمد مستمره وهي تبث سمومها : تراها تضحك عليك مثل ما ضحكت على هزاع وخلته يراكض خلفها ! وحتى مناف ما خلص من ألاعيبها جرته قاطعها ابو راكان بصراخ : بس الله يجيرنا من شرك ومن قاطعته وهي متوجه للخارج : ما كذبت بكلمه وهذي ام تالا معها خبر بذي السوالف وكم مره وصلت للطلاق بينهم بسببها ولا تنكر ترى ابو تالا خطبها من خلف اعطتهم نظره كره وطلعت وهي تشتم فيهم !!! *** *** *** *** بهتت ملامحه وجلس على اقرب كنبه مو مصدق هالكلام ! معقول ساره لعوب ! لذي الدرجه كان مغمض عيونه وما يشوف ألاعيبها ؟!!! اخوانه كانوا يبغونها ! ما رح يكذب خالته لو كانت كذابه كانت انكرت ام تالا السوالف ! وابو تالا وجهه صار اسود من كلامها ! يتمنى امنيه وحده تكون قدامه ويطلع كل حرته فيها !!، اصعب شعور لما تكون مغفل !!! ام راكان جلست جنبه وحطت يدها على كتفه : لا تسمع كلامها ! ترى اخوك ابعد يدها عن كتفه بهدوء وكأن حمل الجبال على صدره : لا تبرري يا يمه !!! ما عادت تهمني او تعنيني ! الحمد لله إلي فكنا من شرهم ! اخذ نفس وتركهم وتوجه لغرفته ! وبداخله نار ما يدري وش يطفيها !!!!!! *** *** *** شافتها جالسه على عتبة البيت ومتكوره على نفسها : احلى احلى اشوفك هنا ؟! هذا إلي ناقصني ارمله ومطلقه ! الله يعيذنا من حظك النحس يا وجه البوم ! ابعدي خليني افتح الزفت ! ناظرتها ساره بصمت وابتعدت عن الباب بهدوء !! فتحت الباب وبغضب : ادخلي نشوف وش آخر هالمهزله ! جلست على الكنبه بغضب لولا تنبيه خلف عليها انها ما تفرط بساره كان طردتها يقول اذا لزم الامر يعطي ساره كم طراق ويأخذها للمستشفى ويشتكي على عبدالله انه ضاربها ! تنهدت من افكار خلف المجنونه ! ناظرتها وهي جالسه بهدوء وبشماته: اشوف العاشق الولهان طلقك يوم الزواج !!! ناظرتها ساره بملامحه هاديه وما ردت ولا كأنه احد يكلمها ! تابعت بشماته : تدري تمنيت يطلقك بالزفه ! الله لا يبلانا ! لا تناظريني كذا مثل الغبيه ! وش هالبنت المتخلفه ؟! ما ادري كيف عبدالله خطبك ؟! متأكده انه حس نفسه تورط واستغل فرصة طلاق خلف واخته وطلقك حتى يخلص نفسه من هالورطه ! استلقت على الكنبه وهي تضحك بشماته: الصراحه تكسرين الخاطر اتبعت كلامها بضحكات متتابعة وبخبث تكلمت : مسكينه بعدك ما شفت شيء !!! طالعتها ساره بقلب ميت وتوجهت لغرفتها بهدوء وكأنها بصدمه ما تدري متى تصحى منها !!! *** *** *** عقدت حواجبها باستنكار من كلام ابوها : كيف ما في زواج ؟! أبو سعود : اقولك الزواج إلتغى وعم ماجد طلقها ! ردت بصوت هامس : طلقها !! وش السبب ؟! ابو سعود هز كتوفه بنرفزه : انا وش عرفني ليه طلقها ! هذا إلي عرفته الزواج انلغى ! ام سعود بخفوت : الله يستر على بنات الناس ! ابو سعود عقد حواجبه : وش قصدك ؟! ام سعود بتفكير : طلقها يوم الزواج اكيد في شيء كايد ! لا تنسى تراها ابنة عمه ! استغفرت عائشه بداخلها وهي تتذكر علاقة ماجد بهذي البنت ! معقول كان بينهم ش قطعت افكارها وهي تستغفر بصوت مسموع ! تعوذت من الشيطان وقعها بالاثم !!! ناظرت امها : يمكن اختلفوا على امور ماديه وعصب وطلقها ! للبيوت اسرار ! ام سعود هوت راسها : الله اعلم وش صار بينهم؟!!!! اتصلي بماجد وشوفي سبب هالطلاق ! دفعها الفضول لمعرفه السبب لكن لاخر لحظه تذكرت الحديث «من حسن اسلام المرء ترك ما لا يعنيه » شيء ما يخصها ليه تتدخل بخصوصيات الناس !!!! وبصوت هادي : الله يصلح بينهم ! وبعدين يمه افرضي طلقني ماجد لازم يكون على شيء مو زين ؟! قاطعها ابو سعود بغضب : وش هالكلام ؟! وليه يطلقك ؟! بلعت ريقها وبتبرير : انا اقول افرض قصدي بس اعطي مثال ! ابو سعود بغضب : لعنبووو هالامثله ! هالسيره ما ابغى اسمعها ابدا ! فاهمه ؟! هوت راسها بطاعه : ان شاء الله تنهدت عائشه لو يدري عن اتفاقها مع ماجد على الطلاق وش رح يقول ؟!! الله يستر من القادم !!! *** *** *** ام راكان وهي تحضن ابنتها ودموعها على خدودها : جعل يده للكسر !! حسبي الله عليه هالهمجي ! ام عمار وهي تبلع ريقها بصعوبه وكل شيء بجسمها يوجعها وكأنها سقطت من اعلى الجبل ! ناظرت ابوها إلي مسح دمعه نزلت من عينه غصب عنه وبصوت ضعيف تكلمت : كله منها ! ام راكان حطت يدها على شعرها : لا تتعبي نفسك ارتاحي الحين ! ام عمار ودموعها تنزل :،شعري يوجعني ! ابعدت ام راكان يدها عن شعرها : حسبي الله عليه ! جودي جالسه على الكرسي وجهها منتفخ من كثر البكاء حال امها اوجعها ملامح وجهها مو باينه من الكدمات غير الكسور إلي سببها ابوها ! عمرها ما شافت انسان بوحشيته ! ليه يعمل فيها كذا ؟!!! تكره ابوها من كل قلبها عمرها ما حست انه ابوها دائما يعاملهم بقسوه وعنف !! زفرت بضيق وناظرت اختها ليان إلي ما كان حالها يختلف عنها ! ناظرت ام عمار بناتها : انا بخير يا ماما لا تخافون ! طلعت من ليان شهقه غصب عنها وين الخير وهي تشوف حال امها !!! *** *** *** *** فتحت عيونها بصعوبه وناظرت حولها باستغراب ! نهضت نفسها وجلست على السرير ! تنهدت براحه وهي تردد : الحمد لله حلم !! ناظرت الساعه على الحائط 10:15ص تذكرت الصلاه وبسرعه قفزت تصلي الفجر فاتتها الصلاه ! غسلت بصعوبه يدها توجعها اذا حركتها ! عقدت حواجبها باستغراب : وش سبب هالوجع ! فرشت السجاده ....اكملت صلاتها وعقلها يستذكر الاحداث ! هزت راسها بالرفض حلم ليه تحس انه واقع ؟! توجهت للشباك تناظر بيت عبدالله حتى تريح نفسها انه حلم وتخلص من هواجيسه ! رجعت للخلف خطوه بصدمه وهي تشوف عمال يشتغلون ببناء سور يفصل بينهم وبين بيت عمها ! طلعت تركض من الغرفه مو مصدقه ! ليه هذا الجدار بينهم ؟!! وقفتها ام محمد : وجع ! علامك تراكضين مثل الناقه ؟! تظنين نفسك صغيره ؟! قاطعهم دخول عزام بدون استئذان وخلفه عبدالله وبنات خلف ! استغربت تواجدهم ؟! تحس عقلها مشوش وضايعه بين الواقع والحلم ؟!!! ام محمد بغضب : نعم مدرعمين بدون احم ولا دستور ! واشرت على عبدالله : تراك طلقتها اذا ناسي وما يجوز تشوفها !! رجعت خطوه للخلف بصدمة مستحيييييل ! ما كانت تحلم ؟!! هربت للنوم من البارحه حتى ترتاح من الواقع المر ! لكن الواقع واقع ومستحيل الاحلام تمحيه ! مرت احداث الامس قدامها مثل لمح البصر ! عمرها ما توقعت عبدالله يعمل فيها كذا ؟! توقعت جاي يعتذر عن تصرفه ! ويعترف بذنبه لانها ما لها ذنب !! عزام بجمود ناظر جدته : كلمتين وطالعين ! وطالع ساره بملامحه الجامده : سؤال ويا ليت تجاوبين بكل صدق وبدون لف ودوران ! عبدالله تقدم خطوه وملامحه غامضه ما فهمتها ساره : عزام انا إلي ابغى اسألها ! ام محمد بحقد : لا تفكر اني اوافق ترجعها لذمتك قاطعها بسخريه : تراني ميت حتى ارجعها ! وبجديه ناظرها :كل شيء بيننا انتهى ! لكن ابغى اسألك واتأكد حتى ما اظلمك قاطعته ساره ولاول مره وتكلمت بمراره بعد ما تيقنت انها مو بحلم : وطلاقك مو ظلم لي بدون ذنب ؟! طالعها بجمود : هذا الموضوع انتهيت منه ! ام محمد ذبحها الفضول تعرف السؤال: خلصنا اسألها و انقلع من هنا ؟! طالعها للحظات وبعدها ناظر ساره ولاول مره يشوفها كذا بدون حجاب شعرها طويل اسود اخذ نفس وسألها : انت اعطيتي خلف الاوراق ؟! ناظرتهم الكل ينتظر الاجابه سكتت للحظات وبعدها نطقت بهدوء: ايه انا ! ب.... قطعت كلامها بعد الكف إلي حصلته منه والشرار يطلع من عيونه وهو يصرخ : اخرسي ابتسمت بألم طول فتره الخطوبه يشجعها تبدي رأيها وتبرر موقفها ومن هذي السخافات ! ولما جاءت تبرر له الموقف سكتها بكف ! سحب يده بإحكام : اتركها يا عمي ! لا توسخ يدك فيها ! ناظرها عزام بتحسف : عمر ذيل الكلب ما انعدل ! عبدالله يحاول يفلت يده من عزام : الكلبه طلاق وقليل عليها !! جودي تقدمت منها بكره : ليه تطعنين امي بظهرها؟!! كذا تعاملي إلي استقبلوك بطيبه ! ليان ناظرتها بكره : حقيره ! خلي خلف ينفعك ! ام محمد بغضب : صدق قليله ادب هذا ابوك يا قليلة التربيه ! واكيد خلف رح ينفعها احسن من هالزفته عبدالله ناظر خالته بقرف : ما رح اوسخ لساني فيك ورح احترم شيباتك ! عزام مقهور من ساره وقبل ما يطلع ناظرها : ممكن اعرف ليه عملتي كذا ؟!! قولي انه خلف غصبك واجبرك ؟! حتى لو اجبرك تعملين كذا ليه ما علمتي احد فينا حتى نتصرف معه ! جاوبيني ؟! طالعته لثواني بصمت وتحركت تبغى ترجع لغرفتها ببرود كبرود الثلج !! عزام شد قبضة يده يبغى يكسرها : وقفي يا زفته تراني اكلمك ! تراني ماسك نفسي عليك بالغصب تقدم منها وسحبها من شعرها بقوه لما طنشته : انا اكلم الجدار ؟! ترى دور المسكينه مو لايق عليك وانكشفت حقيقتك ! نطقت من الالم : اترك شعري ! مو قادر يغفر لها هالتصرف عمره ما شاف انذل منها ما قدر يمسك نفسه وبدون وعي نزل فيها طق ما صدر منها الا صرخات مكتومه من الالم ! يضرب فيها بدون رحمه وبدون ذنب ! ما في احد يحامي عنها ويدافع ! من شدة الوجع صرخت بإسم شخص الحين تحس بمعنى فقدانه : يباااااااااااااااه يبه رفعت نظرها لما توقف الطق شافت عبدالله يمسك يد عزام ! معقول تحرك قلبه وحن عليها ! تكره ضعف شخصيتها لمتى هالحال ؟! ناظرتهم واقفين فوق رأسهم يناظرونها بحده ! وجودي وليان واقفات ناظرتهم بحسافه ! تتمنى تقدر تهرب تهج وتختفي من هالدنيا ! مسحت دموعها إلي نزلت غصب عنها تشكي من ضيم الدنيا عبدالله بتوعد : هذي اعتبريها قرصة اذن ! يا ويلك اذا اقتربت من اهلي ! لاني ما رح ارحمك ! عزام ناظرها بحسافه : تمنيت اجي ويكون إلي سمعته كذب ! وكله تأليف خلف قاطعته ام محمد بغضب : والله إلي رفع سبع سموات ما غصبها ولا جبرها خلف !! لا تحطون كل شيء برقبة ولدي ! والحين انقلعوا من هنا قبل ما اتصل بالشرطه ! عبدالله بقرف: طالعين لكن بشري ولدك ما رح يتهنى ! عزام بتوعد : والله لندوسه تحت رجولنا ! ام محمد بغضب ؛ برا برا يا ..... وخلال ثواني عم الصمت المكان طلعت ام محمد تتصل بخلف تخبره بآخر المستجدات !!! *** *** *** *** ام عمار بكره : حسبي الله عليها وانا ظنيتها مسكينه وعلى نياتها ! ابو راكان بهدوء : اخذت عقابها ...طلاقها من عبدالله بيوم الزواج اكبر عقاب ! وش يخلصها من لسان الناس !! ابو الوليد بنغزه : احمد ربك تخلصت من هالنسب ! ابو راكان براحه : الحمد لله !! وان شاء الله تقوم ام عمار بالسلامه وهذا اهم شيء ! ام راكان بتعجب : وانا استغرب من سناعتها كل شيء تدخله وتنظفه طلعت هالناقه حية ! بس كيف نلقى هالخلف ؟! ملح وذاب ؟!! ام عمار بكره : عساه للموت ونرتاح من شره ! وخالتي ام محمد وش وضعها ؟! ام راكان وهي تشبر بيدينها : اعوذ بالله منها ما خلصنا منها كل شوي تطلع وتردح لنا وصوتها طالع بالشارع ! ابو الوليد : ليه ما اتصلت بمحمد وتخبره عن سواد وجه اخوه ؟! ابو راكان بكره : لما اقول لك عيال اخوي ما غيهم فائده صدقني ! قليل الخاتمه خبرته بالموضوع بيقول انا رافع يدي عن خلف وما لي علاقه فيه ! مو بزر اركض خلفه واحل مشاكله ! بصراحه استفزني وثقلت عليه الكلام وقفلت الخط بوجهه من حرتي ! ابو الوليد هز راسه : يعين الله !! ** *• ••• قفلت الخط ودخلت الصاله شافتها مكانها متكوره على نفسها كلمتها بأمر : قومي للمستشفى ! قومي بسرعه ! ناظرتها بضعف وهزت راسها بالرفض ام محمد بإصرار :-الحين اجيب لك العبايه ! مو قادره تحرك نفسها تحس جسمها تكسر ! متأكده يدها انكسرت ضربها عزام على نفس المكان لما رماها على الارض ابو راكان !! لاول مره تساعدها ام محمد ركبت السياره بمساعدتها وطالعت السواق : بسرعه حرك للمستشفى ! *** **** ابو راكان بغضب يناظر عزام : انا قلت لكم لا تروحون لها ابو ماجد بغضب مشابه لابوه : متهورين مو قلنا اتركوها خلصوا انفسكم الحين ! ابو راكان عض على شفته : انا الغبي إلي ظنيتها هبله وعلى نياتها ؟! والحين فوق سوادها تشتكي على ولدي ! دخل ماجد غرفة ام عمار بفزع : إلحقوا اشتبك عمي عبدالله مع خالتي ام محمد ! وقف بفزع ابو راكان : لا حول ولا قوه الا بالله ! ام عمار بكره : حسبي الله ونعم الوكيل !!! ** *** *** ام محمد بردح : اذا ما نمت اليوم بالسجن قاطعها عبدالله بغضب : انام بعد ما اذبحها هالخاينه ! سلمان مسكه بقوه : وين وين تبغى تدخل ؟!! عبدالله يحاول يفك نفسه : اتركني اذبحها ! ام محمد بخبث : الحين الشرطي يحقق معها ! وبعدها يجركم الاثنين للسجن مثل قاطعها بغضب : بس ! فضحتونا لا بارك الله فيك ولا بعيالك ! وين هي الزفته ساره ! طالت وشمخت وصارت تشتكي ! عبدالله وبداخله بركان من ساره واخوانها : والله لاذبحها ** ** ** ** ام راكان تبكي بعد ما اخذوا عبدالله وعزام للتوقيف : الله يأخذك يا ساره !! جعلك بالساحق الماحق قاطعتها ام عزام بصوت مخنوق على ولدها : طول وقتها تناديه عمي والحين ساحبيته للسجن ! اسيل بغضب : كله من تحت رأس جدتي ! والحل الحين ؟!!! *** ***