أقدار - الفصل 36 - بقلم ضاقت انفاسي - مكتملة | روايتك

رحلنا رحلنا نعم يا حبيب .. بقلب جريح ودمع سكيب تُرى يا حبيبي سيبقى الوداد .. ويبقى التآخي كغصن رطيب أم الدهر يأتي بما لا نريد .. تنادي طويلاً ولا من مجيب وأدعوك حيناً ولا لن أراك .. فيزداد شوقي كشوق الغريب أخي سوف أُبدي لكم ما أُطيق .. فهل سوف تبدي لأجلي النحيب لكم يا رفاقي بنفسي احترام .. كذا في فؤادي رؤىً لا تغيب...... "" """ """ في بيت ابو وليد للي اتفقوا تكون الملكه عائليه ويعملوها بالبيت ! بمجلس واسع الكل منشغل بإجراءات الخطوبه ! جالس يناظرهم بحقد وهم مبسوطين مستحيل يفوت فرصه الانتقام ورح يقهرهم مثل ما قهروه ! وخاصه وهو يشوف نظرات عيال عمه وعيال خاله ابو وليد يناظرونه باستصغار وكأنه حشره قدامهم ! حتى ولده عمار سحبوه منه وسفره ابو راكان يكمل دراسته برا وبناته زوجهم على كيفهم ! وهذي ساره على الطريق يتحكم بزواجها ! بس ما يكون خلف اذا ما كسر خشومهم ! بالاول رح يبدأ بعمه ابو عزام وعياله وبعدها يتفرغ لابو وليد وعياله ! لازم يقهرهم مثل ما قهروه ينتظر على نار بعد ما كملوا الاجراءت وتمت الملكه وانهالت المباركات على عزام للي الفرحه تشع من عيونه ! وقف بكل ثقه بصوته الجهوري: بإسمي واسم إخواني أبارك لولد أختي عزام ! صوته الجهور وهيكله الضخم اجبر الموجودين يناظرونه اغلب عيال عمه ناظروه وكأنهم يقولون ما يشرفنا وجودك ولا مباركتك خلف بشبح ابتسامه وهو يشوف نظراتهم وبداخله يتوعد انتظروا شوي وتابع كلامه بخبث متقن : بما انه حنا في مناسبه الله يكثر الافراح علينا وعليكم أبغى أبلغكم وافرحكم معي ! الكل ناظروه باستغراب وعدم راحه لكلامه ؟!!! تابع كلامه وهو يشوف نظراتهم : ولد عمي ابو راكان قبل يومين خطب اختي على سنه الله ورسوله وانا وافقت واتفقنا نعلن الخبر بهذي المناسبه ! وترى يا اخوان كل الموجودين معزومين في بيت عمي ابو راكان باكر بعد المغرب على الملكة ! صمت خيم على الحاضرين وكل الانظار على عيال ابو راكان ! ابو راكان ناظر عياله باستنكار مين فيهم للي يتصرف على كيفه بدون ما يشاوره ! وكأنه رجل طاوله !! الشخص للي استبعده من عياله ابو عزام لانه زوج اختها وما يحل لها !! موقف لا يحسد عليه قدام الناس عاجز عن النطق او على الاقل يفركش الموضوع ! تبقى ساره ابنة اخوه واي شيء يمس سمعتها يمسه ! اصابه العجز انه ينطق ويرفض هالمسخره ! كل للي قدر عليه سلط نظراته على خلف بتوعد ! ابتسم خلف وهو يشوف نظرات عمه ووجهه للي قلب اسود حرك شفتيه وهو يناظر عيال عمه ابو راكان *ابو عزام *ابو ماجد *ابو تالا *مناف *عبدالله قبل ما يتكلم قاطعه خاله ابو الوليد للي ما عجبه الموضوع وبنبره إلتمس فيها خلف السخريه: مبارك ! بس ما قلت لنا مين من عيال عمك ؟! خلف بابتسامه نرفزت ابو راكان : ولد عمي الصيدلاني ! كل الانظار تسلطت على عبدالله باستغراب طول وقته بالسفر ونادرا ما ييجي هنا ! دوبه وصل قبل ربع ساعه و بدون ما يعطي احد خبر كانت مفاجأه ! كيف ومتى شاف خلف واتفق معه ؟! وقف بهدوء معروف فيه وببرود وتكلم وهو يوزع نظراته للحاضرين يؤكد كلام خلف : تراني خطبتها من ولد عمي خلف واتفقنا على الشوفة الشرعيه الليله ! لانه من حق البنت تفكر وتعطينا رأيها وإذا تمت الموافقه من الطرفين تراكم اول المعزومين ! شاف نظرات ابوه الناريه واختتم كلامه : الله يوفق الجميع ! وجلس وهو يناظر خلف للي صار وجهه بالالوان ! طنش همسات مناف وتحقيقه وهمس بهدوء : بعدين ! ابو راكان نار مشتعله بداخله بعد كلام عبدالله ! وينتظر هالمراسم تنتهي بسرعه حتى يشوف وش هالمسخره ! ** ** ** ** ** طول الطريق بعد انتهاء الملكه وهو ساكت واول ما دخلوا البيت ناظر عياله وبعدها استقر نظره على عبدالله وبصراخ : ليه ؟!! اشر على نفسه بقهر : ليه تخليني مثل الاطرش بالزفه ! تخطب وتتفق مع ولد عمك وانا اخر من يعلم ! ما لقيت الا هالنصاب تتزوج اخته ؟! انت وين عقلك ؟! ما تعلمت انه من اسس الزواج التوافق ! انت وين وساره وين ؟! تراها مو من مستواك العلمي ! انت واحد دارس ومثقف تتزوج وحده اميه ما معها شهاده متوسط ؟! انت ما عندك عقل ؟! ابو عزام مسك يد ابوه : ارتاح يبه ! الحين يرتفع معك الضغط ! ابو راكان وهو يجلس: كيف ما يرتفع واخوك هذا رح يجلطني ! ابو تالا ناظر عبدالله بقهر : من متى إنت وخلف بينكم تواصل ؟! ومتى خطبتها منه ؟! عبدالله وهو يناظرهم باستغراب من هذا الهجوم ابو عزام نفسه يخنق هالخلف : والحين ما بقى على الشوفه وقت ! روح ... قاطعتهم ام راكان للي كانت تسمع وهي ساكته : يشوفها ؟! واذا عجبته ؟! ماجد بسخريه قاطعها : ساره الجوكر تعجبه ! وضحك بصوت عالي وسرعان ما كتمها لما شاف نظرات عمه ابو عزام الغاضبه ! تابعت ام راكان كلامها : انا ما اخرب على ساره بس في فرق كبير بالمستوى التعليمي ! قاطعها ابو راكان وهو مخنوق ويناظر عبدالله : خلاص مو انت للي خطبت من غير شورنا ! روح شوفها ....الله يوفقك عبدالله ببرود : تعالي يمه معي وانت يبه قاطعه ابو راكان بغضب : هذا الناقص اروح للمتخلف واخطب منه ! ابو عزام قاطع ابوه : خلاص ما له داعي احد يروح معك خذ امي وشوف البنت وانتهينا ! ابو ماجد بغرور : انتم من عقلكم تروحون تخطبون اخت خلف ؟!! ماجد بلقافه يناظر عبدالله : اجي معك يا عمي ! ابو تالا بغضب : انت انطق هنا ! وشهوله تروح معهم سلمان حرك حواجبه يغيض ماجد : انا رايح تراها خالتي ! ماجد انقهر : الحين اعترفت انها خالتك ؟! ام راكان بعدم اقتناع : امشي اشوف نهايه هالمهزله !! وناظرت سلمان: انت انطق هنا ! ابتسم ماجد بشماته على سلمان للي تفشل من جدته ! *** *** *** *** كملت تنظيف المطبخ وجلست على الكنبه بالصاله بضجر وهي تتخيل وتتوقع وش يعملون الحين بالملكه ! تفاجأت بدخول خالتها وهي متجهمه والغضب باين بعيونها ومن خلفها اخوها خلف ملامحه متوتره وقفت على حيلها لما صرخت خالتها : قومي عساك للهلاك ! ساره بخوف : وش فيه ؟! خلف وهو يتوجه للمجلس : اسمعي عبدالله ولد عمي خطبك وجاي الحين يشوفك بسرعه تجهزي ! ام محمد بغضب : مو داخله رآسي عبدالله الصيدلاني يخطب هذي ؟! اصلا من وين يعرفها ؟! خلف بضجر من امه : وبعدين ؟! وقسم بالله لو تخربين الموضوع الا قاطعته ام محمد بقرف : لا تخاف مناي تنقلع من وجهي! ساره تناظرهم بعدم تصديق،! عريس ؟! ولد عمها ابو راكان ؟! الصيدلاني ؟! ولا مره شافته يمكن سمعت عنه بالصدفه ! كانت ام راكان تتكلم قدامها وهي تدور له عروس ! كانت تقول تبغاها سنعه مؤدبه وبنت ناس وعالم ومتعلمه وحلوه! متأكده انها ما كانت تقصدها ! بس كيف خطبها وهو ما يعرفها ! معقول ام راكان اقترحت عليه يخطبها ! او ابو راكان ؟! كل هالاسئله تدور برأسها ما وقفها الا لما سحبتها ام محمد بقرف : تعالي معي نجهز الضيافه ! ** ** ** ** ** في بيت ام محمد ام راكان تهمس لاختها : والله عقلي مو مستوعب هالسخافه ! ام محمد بقهر : ابنك مو صاحي ! الف وحده تتمناه ! ما لقى الا ساره ! دخلت ساره بالضيافه وجلست ووجهها احمر من الاحراج والخجل وكأنها اول مره تشوف ام راكان ! ام راكان تنهدت وهي تناظرها : اسمعي يا ساره الحين يدخل عبدالله علشان يشوفك ! اذا سألك اي سؤال جاوبي عليه ولا تستحين ! ام محمد بذم : هذي ما تعرف شيء اسمه حياء ! قاطعهم صوت خلف الجهور : يالله ! ام محمد كشرت وبدون نفس ردت : ادخل ادخل دخل وخلفه عبدالله للي ترتسم ملامحه بالهدوء رد السلام وجلس ! ام محمد : اخبارك يا عبدالله ؟! وينك ما نشوفك ؟! عبدالله بصوته الهادي : الله يسلمك يا خالتي ! تعرفي مشاغل الحياه ! ام محمد : وش تبغى بالغربه خلاص تعال استقر هنا ! عبدالله : ان شاء الله قريب! ام راكان بجمود تبغى تخلص من هالسالفه : هذي العروس ! وناظرت ساره للي شوي ويوصل وجهها الارض وهي منزليته : ارفعي رأسك خله يشوفك ! ام محمد وهي تناظر عبدالله واثرثر بسرعه : هذي هي ساره ! يمكن اول مره تشوفها ! عمرها 16 سنه ! ادري انك رح تستغرب ! ما يغرك حجمها الكبير وضحكت على تعليقها ! ابتسم مجامله لخالته للي رجعت تكمل كلامها : تراها تركت الدراسه وما معها الا شهاده المتوسط ! وناظرت ساره وهي تمثل البراءه : تعرفين تكتبين يا ساره ؟! خلف ولع من كلام امه للي جالسه تخرب بالموضوع تكلم بسرعه : اصلا عبدالله ما تهمه هذي الامور ! عبدالله ناظره وابتسم بغموض : ايه صحيح ! امالت ام راكان شفتها دليل على عدم الرضى ! وقف عبدالله ناوي يطلع خلف باستغراب من خروجه السريع : وين مستعجل ؟! عبدالله بابتسامه : اليوم وصلت من السفر تعبان ابغى ارتاح !، خلف بعجله : وش ردك ؟! عبدالله طالعه بانتقاد لسؤاله : تعال نطلع برا واعطيك الجواب ! طلعوا ولحقتهم ام راكان وام محمد ! تنفست ساره بارتياح بعد خروجهم ! ما زال قلبها يدق بقوه ! وتحس وجهها مولع نار تلمست خدودها وعقلها بصراع معقول يوافق او يرفض ؟! لما تناظر نفسها تجزم انه رح يرفضها ؟! بس يبقى عندها امل اهله يقنعوه فيها ! والشكل مو ضروري اهم شيء الاخلاق ! ** ** ** وقف خلف بتوتر وهو يناظر عبدالله للي يتكلم بطريقه بارده تثير اعصابه : شوف يا خلف انا ما يهمني المستوى التعليمي كثير واقدر اتغاضى عنه! واقدر اتغاضى إنك أخوها ! واقدر اتغاضى عن صغر سنها ! لكن الجمال ! ما اقدر اتغاضى عن هذي النقطه ! بصراحه البنت ما عجبتني ! والله يوفقها مع للي يسعدها ! واختتم كلامه بابتسامه خبيثه وغادر متجه لبيته ! تنفست براحه ام راكان واسرعت الخطى خلف عبدالله !، عصب خلف من رد عبدالله ومن ابتسامة امه الشامته : هالكلب ! ويتدلل ؟! ام محمد : ايه يتدلل يطلع له ! والا انت من عقلك تبغى تلبسه بساره ؟! خلف رفع حاجب باستنكار : وش عرفك ؟! ام محمد : تبغى تقنعي انه عبدالله طلب يد ساره وهو ما يعرفها ؟!، اكيد هذي من خططك ! وقبل ما تدخل كملت : تراك أخطأت الاختيار ! غلطان اذا ظنيت انه عبدالله مسكين وهادي ! لا يغرك الهدوء للي يحاوطه تراه اذكى منك بكثير يا روح امك ! روح شوف لك صيده ثانيه احسن لك ! انقهر من كلام أمه وغادر مثل البركان !! ما توقع عبدالله بهذا الخبث ويطلع نفسه من الموضوع بذي السهولة ! ** ** ** ** جالسين بالصاله بعد ما رجع عبدالله من الشوفه ابو راكان تفاجئ : يعني انت ما خطبتها من خلف ؟! عبدالله هز راسه بالنفي : لا ما خطبتها تراني تفاجأت بالموضوع مثلكم ! كيف اخطب البنت وانا ما أعرفها ؟! ابو ماجد ابتسم : وكملت معه التمثيلية ! مناف :وخالتي وش قالت بعد ما رفضت ساره ؟! ام راكان براحه انه انتهى الموضوع : عادي ! ابو تالا : وساره تدري انك رفضتها ؟! عبدالله وقف بلامبالاه : اكيد عرفت انا مو اول واحد ولا اخر واحد يرفض العروس ! عادي شيء متداول ! الله يوفقها ! ام راكان بصراحه تتكلم : شوف يا عبدالله بغض النظر انه خلف اخوها ! لكن الشهاده لله البنت مثل العسل سنعه ومؤدبه وطيبه وبشوشه ! لو انها متعلمه الا اخطبها لك بنفسي ! بس البنت ما تناسبك حتى المظهر والعادات وافكارها تختلف سلمان كمل عن جدته باختصار : تراها خبله وغبيه وعبيطه بس حلو قاطعه مناف بعصبيه : سلمان! انت ما تستحي على وجهك تتكلم على خالتك بهذي الطريقه ! عبدالله ابتسم على انفعال اخوه : خلاص فكونا من السيره فخ وتخلصنا منه ! وان شاء الله ربنا يوفقها ! وباستغراب : عزام بعده ما رجع ؟! ابو ماجد : بعده عند خطيبته ! هذا الثقيل! ابو راكان براحه وبداخله يتوعد خلف الا يرد له هالحركه : الله يوفقه ! *** *** *** ••• في اليوم الثاني شعورها بعد الرفض لا يوصف تحس خاطرها مكسور والضيق بداخلها عكس ظاهرها ! وزاد عليها كلام خالتها والتشفي بعيونها وكلامها ! محبطه لدرجه لا توصف ! اذا كان عندها امل 2% تتزوج بعد الشوفه صار زيروووو كملت تنظيف البيت وما طلعت من الاحراج ! كيف تطلع ويناظرونها انها مرفوضه! لو كان الموضوع بالسر كان اخف عليها ! لكن للي وجع قلبها كل الناس تدري انه عبدالله رفضها بعد الشوفه ! حطها بموقف لا تحسد عليه ! ماسكه دموعها بالغصب ! اخذت نفس عميق لعل الضيق يرحل ! زاد احراجها وهي تشوف ماجد وسلمان داخلين : سلاام! وقفت ساره تبغى تخرج من المكان حتى ما تعلق بلسانهم ردت باختصار مع ابتسامه مزيفه : هلا ماجد وهو يجلس : علامك واقفه ؟! اجلسي ! ساره بهدوء : عندي شغل ! سلمان بابتسامه باطنها السخريه : الحين طلع عندك الشغل لما دخلنا ! صحيح ما قلت لنا وش صار بالشوفه ؟! ماجد بصراحه وصلت للوقاحه : شوفي لو دخلت عليه بذي الملابس معاه حق يرفضك ! ولازم ما تزعلين ! سلمان يكمل عنه : كويس ما هج عمي لما شافك ! ساره وهي تحاول تسيطر على نفسها ووجهها تحسه بالالوان : هههه سخيف ! ماجد متفاجئ : وطلع لك لسان ! ساره بقهر منهم : ليه قالوا لك ما عندي لسان ! ومدت له لسانها سلمان ضحك على تصرفها ما علق على الموقف وبسرعه انتقل لسؤال يبغى يعرف اجابته حتى يشبع فضوله : وش شعورك لما وصلك خبر الرفض ؟! ساره ببرود ظاهري : عادي اصلا لو وافق انا مو موافقه ! ماجد يصفق بقوه : احلى ! بصراحه معك حق ترفضين ! معك شهاده برفسور هالقد ! واخوانك مناصب عاليه ! وجمالك ذباح ! ضحك سلمان بصوت عالي : وقسم بالله انك نكته ! طالعتهم وما ردت عليهم وطلعت من البيت وهي تسمعهم ينادون : تعالي ضيفينا ! طنشتهم وطلعت وهي تحس الضيق زاد على صدرها من سوالفهم ! ما تدري وين تروح ؟! بيت عمها ابو راكان ما رح تطبه اكيد عريس الغفله موجود ! ترددت تروح لبيت ابو عزام ! تخاف يفتحون السيره وما تقدر تمسك نفسها وتبكي ! ابتسمت بتلقائيه لما شافت عزام طالع من بيتهم ركضت له بسرعه هز راسه بأسف ما يدري متى تعقل؟! دوم يقولها لا تركضين ما عدت البنت الصغيره ! تتأسف وبعدها ترجع لنفس العاده ! اقتربت وهي تلقط انفاسها وبابتسامه عريضه: مبارك الخطوبه ! مدت يدها وسلمت بحراره ! وتكلمت باعتذار : اسفه ما قدرت احضر الخطوبه ! ابتسم عزام وهو اصلا ما انتبه اذا حضرت او لا كل تفكيره كان عند خطيبته : وش للي منعك ؟! ضحكت ساره وهي تحك راسها ما تدري وش تقول عزام ابتسم لها وهو مستغرب من ضحكاتها وابتساماتها ! كل يوم يجزم إنها بدون احساس او مشاعر او كرامه ! البارحه انرفضت واليوم تضحك حسب معلوماته البنات يتحسسن من سالفة الرفض ! هز كتوفه وهو يقنع نفسه بعدها صغيره وما تفهم بهذي الامور ! ساره بحماس : اليوم تبغى تروح لخطيبتك خذني معك علشان ابارك لها ! عزام ميل شفته : عشتو هذا الناقص ! متى تتركين طبع اللقافه ؟! وبتحذير : لا تروحين لبيت جدي ابو راكان ! ترى عبدالله هناك ! مو حلوه تروحين وهو البارح رافضك ! بلاه يفكر انك تتميلحين عنده ! الناس كلامها ما يرحم ! صار وجهها ألوان لما جاب سيره عبدالله ! ليه يحسسونها انها لذي الدرجه ما تفهم ؟! مستحيل تتدخل بيت عمها وعبدالله موجود ! متأكده انه عزام يبغى مصلحتها بس ما تدري ليه تضايقت من هالكلام وحتى تنهي الموضوع : ان شاء الله ! مسك يدها وهو يشوفها تبغى تروح لبيت اهله : ولا تروحين لبيتنا ! ترى عمي عبدالله معزوم على الغداء عندنا !! خلاص ارجعي للبيت ! وبنرفزه : انت ما تعرفين تجلسين بالبيت ! فكت يدها منه بهدوء وبصوت هادي : ان شاء الله تحركت باتجاه بيتها والعبره خانقيتها ! وقفت قدام البيت وتذكرت وجود سلمان وماجد مو ناقصه مسخرتهم ! وبسرعه تابعت خطواتها لبيت اخوها خلف ! صحيح انه عبدالله أخو ام عمار بس متأكده مستحيل ام عمار تحرجها ! طرقت الباب بهدوء وبعدها دخلت وهي تسمع الاذن لها بالدخول ..... *** ••• *** ••• مرت ايام حاولت ساره تلتزم البيت وما دخلت بيت ابو راكان الا اليوم وصى لها ابو راكان تزوره دخلت والاحراج مخيم عليها سلمت عليهم وعيونها بالارض ابو راكان بحنان : تعالي يا ابوي اجلسي عندي ! قامت بإحراج وجلست جنبه ! وبدأ يمسح على رأسها : وينك قطعتينا ؟! رفعت نظرها بتردد واحراج وما ردت ! ام راكان ابتسمت لها : وش رأيك تتغدين معنا ؟! ساره ابتسمت لها مجامله : ما اقدر اتفقت مع خالتي اجهز لها الغداء قبل ما ترجع من زيارتها! ابو راكان بانتقاد وهو يناظر زوجته: اختك هذي ما تعرف تجلس في بيتها؟! ساره بدفاع : راحت عند اختي اميره تسلم عليها راجعه من السفر ! ام راكان بانتقاد : ليه ما تيجي اميره وتسلم على امها ؟! كان عندها ام ما تدري عنها ! طول وقتها بالسفر ! ابو راكان : زوجها ومضطره تمشي معه ! وكل واحد يركض خلف مصلحته ! شوفي عيالك ما نشوفهم الا بالمناسبات وكأنه ما عندي عيال الا ابو تالا وابو عزام ! ام راكان : عيالك يدورون باب رزقهم ! دخل ابو تالا وهو يكلم بالجوال : خلاص ان شاء الله .....طول روحك شوي ..بالتفاهم كل شيء ينحل ! ....يصير خير .....مع السلامه جلس وهو يزفر بضيق ام راكان : مين هذا ؟! ابو تالا : مناف ! ابو راكان : صاير شيء ؟! ابو تالا بانكار : لا ما في شيء مشكله بسيطه بالشغل ! وقفت ساره بابتسامه : اروح اعمل شاهي ! ابو راكان بابتسامه : يا ليت والله ! هزت رأسها وتوجهت للمطبخ ام راكان : كنت خايفه يحز بخاطرها سالفه الشوفه ! حتى توقعت انها ما تدخل بيتنا ! ابو راكان ؛ ساره طيبه وما تعرف الحقد ! بس عبدالله ما يناسبها ! ابو تالا : بس البنت ما يعيبها شيء ! وبصراحه اكبر تابع كلامه : يبه انا ابغى الولد ! هذا عمري صك 40 وما عندي ولد يحمل اسمي ! ام راكان باستنكار : تبغى تتزوج على زوجتك ! ابو راكان بتفكير : وام تالا تدري ؟! ابو تالا بلا مبالاه : اكيدرح تعرف ! وش رأيك يبه بساره ؟! ابنة عمي وانا اولى من الغريب ! واحفظها واصونها عن اخوها خلف !!! ومو مهم عندي المستوى التعليمي ام راكان هزت راسها بالرفض : الفرق بالعمر كبير بينكم ! حرام البنت صغيره ابو تالا : فرق العمر بالزواج بنظري مو مهم ! اهم شيء التفاهم ! وأنا بإذن الله مارح اظلمها ! هزت ام راكان راسها بخفيف بعد ما عرفت سبب النظرات الناريه من ام تالا لساره! الحرمه شاكه بالموضوع ! ناظرابو تالاابوه يستحثه على الكلام:وش قلت يبه ؟! ابوراكان بتفكير : اس سكت وهو يشوف ساره داخله ومبتسمه لهم! اشر لولده بعدين يتكلموا بالموضوع ! وزعت الشاهي ساره وجلست ناظرتها ام راكان وابتسمت مجامله وهي تفكر لازم تحاول تخفف من زيارات ساره لهم بعد كلام ابو تالا كانت مغفله وما انتبهت الايام الماضيه لنظرات ولدها ! على بالها ناظرها مثل ابنته او اخته ! صدق من قال هالزمان ينخاف من الرجال ! وخاصه لما يقولون مثل اختي! دخلت البيت وهي مستغربه لما سحبها خلف من يدها بقوه : انا من الصبح ادورك ؟! وين طسيتي ؟! وقبل ما تجاوب سحبها : تعالي بسرعه إلبسي عباتك بسرعه ! ما كان عندها الجرأة تسأل ليه وبسرعه توجهت لغرفتها ولبست عبايتها ! خالتها مو موجوده عند اميره بعدها ما رجعت ! معقول صار على خالتها حادث ؟! وجه خلف مخطوف وكأنه فيه مصيبه !! طلعت بسرعه وهي تسمعه يستعجلها ! ناظرت ساعتها كانت 10.30 ! زاد خوفها وهو يحرك بسرعه كبيره ! ويلتفت حوله مثل المجنون !! زاد رعبها لما وقف عند موقف السيارات تأكدت انه خالتها صايبها شيء لما شافت المبنى للي وقف عنده ؟! المستشفى !! التفتت عليه برعب وهو يكلمها بحزم : اسمعي الحين تنزلين تعملين فحص الزواج ! انزلي بسرعه علشان نلحق على المحكمه ونملك ! ناظرته بعدم استيعاب !! فحوصات ! وملكه ! كله بسرعه بسرعه وهي مثل الخروف يسحبها خلفه بدون اعتراض ! بس عليها تنفذ الكلام ! كمل الاجراءات بالمستشفى والحين واقفه باب المحكمه وكل خليه فيها ترجف ! كيف تتزوج بذي السرعه ! زواج بدون شوفة شرعيه ! كيف صارت هذي ؟! ومين العريس للي قبل فيها بدون ما يشوفها ؟! وخالتها وين موقعها بهذا الزواج ؟!! بلعت ريقها برعب وهي تتقدم ... الحين رح تلتقي بزوج المستقبل ؟!! ** ** ** **