أقدار - الفصل 23 - بقلم ضاقت انفاسي - مكتملة | روايتك

في سما دنياي انت احلى بدر ومن هموم الكون تصبح لي صدر تزرع الافراح تمنعني الكدر انت نور بدنيتي واحلى قدر انت رحمة من اله العالمين في حياتي بلسم جروح السنين من عرفتك تمسح دموع الانين انت نور بدنيتي واحلى قدر من هو غيرك يايبه في طيحتي يمسك ايديني تهمه فرحتي انت انقى لون يرسم لوحتي انت نور بدنيتي واحلى قدر قسوتك تعليم يانبع الوفا درع يحمي لي ظلالي والدفا شوفتك قربي حبيبي لي شفا انت نور بدنيتي واحلى قدر يانديم الروح ماتشكي سهر تتعب وتتحمل انواع القهر انت عنوان السعادة والطهر انت نور بدنيتي واحلى قدر كم غلطت بحق نبراس الغلا اسف اسف يابعد كل الملا مابي غيرك ابو ولا فلا انت نور بدنيتي واحلى قدر جالس بمكتبه يقلب بالاوراق قاطعه رنين الجوال رد بهدوء وخلال ثواني انقلبت ملامحه وهو يسأل :ايش اي طريق؟! وانقطع الاتصال ... وقف بقلق وهو يشوف ساعته قريب أذان المغرب قلبه قارصه من هالمشوار! وبسرعه بحث هلى رقم اسيل واتصل ** ** ** ** طلعت من البيت بحرص وهي تشد على الورقه بقوه حسب التعليمات شافته واقف قريب من البقاله وأشر لها بيده ابتسمت له وتوجهت بدون ما تنتبه للعيون للي لمحتها وقبل ما تقطع الشارع سحبها من الخلف من كتفها ولفها لها وهو مستغرب خروجها وقت المغرب حتى ما انتبهت له سألها بتحقيق : وين رايحه ؟! ارتبكت لما شافت ابوها وبسرعه خبت الورقة خلف ظهرها : للبقاله ! شك بحركتها وحس انها تخبي شيء عنه وبحزم : وش معك ؟! هزت راسها: ولا قاطعها قبل ما تكمل وهو يسحب يدها بقوه وفتحها ! عقد حواجبه وهو يشوف ورقه بيضاء مطويه معطره !! وما ترك مجال للتفكير عن محتواها بسرعه فتحها وبدأ وجهه يتغير ويتحول للاحمر من اول حرف الى اخر حرف بالرساله ! يحس الدنيا اظلمت بوجهه والسماء اطبقت فوقه فتح اول زر من قميصه وهو يحس بالاختناق كيف صار هذا الشيء ؟! من متى ؟! لذي الدرجه مغفل ؟! قبض كف يده وعصر الورقه وكل الغضب تلبسه ناظرها بصوت غاضب وعيون تقدح شرار : لمين هذي الورقه ؟! رجعت للخلف خطوه وهي تشوف نظرات ابوها اول مره تشوفه كذا ! ما تدري وش بالورقة حتى حولته كذا ؟! ردت بخوف لما هزها بقوه حتى تجاوب : نهى اعطتني اياها قالت لي اعطيها لنواف وأشرت على مكانه قبل شوي بس استغربت لما ما شافت احد وقبل ما تلتف لابوها صرخت وهي تحس يدها رح تنقطع وهو يسحب فيها بإتجاه البيت ! بكت بصوت راجي انه يتركها ... بس ابو سعود سيطر عليه غضبه وما عاد يميز شيء ! دخل البيت واول ما وصل الصاله رماها على الأرض بقوه ونزل فيها ضرب وعائشه تصرخ وتبكي وتستنجد بأمها طلعت ام سعود على صراخهم وانفجعت وهي تشوف زوجها يضرب بعائشه حاولت تبعده عنها صرخ عليها ؛ اتركيني اقولك ! صرخت ام سعود وهي تشوف صغيرتها تسقط على الارض لا حول ولا قوه لها وبسرعه دفت زوجها وحضنتها وهي تمسح على وجهها : ماما قومي ! أبو سعود بدون رحمه صرخ: جعلها تموت وهي واخواتها وارتاح منهن وبصرخه اقوى نادى : نهى نهى كانت واقفه قريب من الصاله بس من الخوف ما قدرت تتحرك شخصت عيونها وهي تشوف ابوها فوق راسها وما ترك لها فرصه تحكي او تبرر كل شيء واضح قدامه ! وهو المغفل للي المويه تمشي من تحتيه وما يدري عنها ! سحبها للغرفه وقفل الباب وهو يشوف اسماء بالغرفه ! زفر بقهر وغضب وهو يتوعد فيهن ! يبغى يبكي من القهر اصعب شعور العرض لما تحافظ على بناتك وتتفاجئ بتصرفات طايشه تنزل راسك بالارض ! صرخ صرخة موجوع بأعلى صوته : والله ما ارحمكن !!! ** ** ** ** ام سعود تعرف حركات عائشه تتظاهر انها فقدت الوعي لما تقع بذي المواقف هزتها بخفه : قومي ماما ا بوك راح !! قومي بسرعه ! فتحت عيونها وما قدرت تكتم شهقاتها غطت وجهها بصدر امها وبدأت تبكي وام سعود تمسح على رأسها : خلاص يا ماما قلبها قارصها حاسه انه في مصيبه لانه زوجها عمره ما ضرب البنات بذا الشكل ! عائشه من بين شهقاتها : ماما يدي توجعني ! طالعت ابنتها وكيف مكان الضرب بدأ ينفخ ويتلون : اشوف يدك ! مدتها ودموعها تنزل بغزاره غمضت عيونها ام سعود بوجع وهي تشوف يد عائشه منفوخه ! وبتردد سألت خايفه من الاجابه تكون صادمه: ليه ضربك ؟! عائشه بصوت مبحوح من البكاء : اعطتني نهى ورقه اعطيها لنواف وقالت لي رح يعطيك حلاوه وبابا مسك الورقه وشافها ورجعت تبكي من جديد بطفوله : انا وش دخلني ؟! ام سعود بهتت ملامحها وش هالفضيحه ؟! نهى للي بعينها طفله تعمل كذا ؟! عمرها ما قصرت معها ليه تجازيها كذا ؟! وما لقت الا نواف ؟!، امه عباره عن اذاعه رح تصير سالفتهم على كل لسان ! ضربت على جبهتها بقوه وش هالمصيبه؟! وقفت لما شافت ابو سعود طالع من الغرفه وكأنه بركان ثاير ابعدت عائشه عنها بسرعه وركضت له :وين رايح ؟! ابو سعود بغضب : والله لأذبحه ام سعود تحس الروح تطلع منها : فكنا من الفضايح تعال خذ البنت للمستشفى قاطعها وهو يناظر عائشه بكره وحقد : جعلها تموت ونرتاح من لسانها للي ما ييجي منه الا المصايب وطلع بعد ما ضرب الباب بقوه ! جالسه تناظر المشهد ونظرات ابوها واسلوبه ينعاد قدامها ! غمضت عيونها بوجع من اسلوب ابوها ومن وجع يدها للي تحسها انشلت مو قادره تتحمل الوجع وبدون شعور صرخت بقوه وبعدها احتضنت الارض بلا حراك !! *** ** ** ** ** ضرب كفر السياره برجله بقهر : افففف وقتك ! ام راكان بضجر : وبعدين معك ؟! اذكر الله ! عزام بغضب مكتوم : والنعم بالله ! بس انت شايفه الشمس قريب تغرب اسيل وهي متربعه وجالسه جنب أمها : الجو حلو يجنن ! عزام عفس ملامحه : يجنن ! الحين نشوف لما تغيب الشمس ويحل الظلام وانت جالسه ما تشوفين الا الضبع هاجم عليك ! اسيل وهي تحصن نفسها : اعوذ بكلمات الله التامات من شرما خلق ! ام عزام بنهر : ترى مو ناقصين ذي السوالف ! تراني والله خايف قاطعتها ام راكان : تعوذي من الشيطان ! ولا تخليه يلعب فيك ! ما في شيء يخوف واذا طلع ضبع ! خير يا طير ؟! الا اضربه بحجر بنص عيونه اخليه ما يشوف دربه من الخوف ! عزام ناظر خلفهم وجحظ عيونه بخوف وصوته يرتجف : بسرعه على السياره فيه ضبع جاي لجهتنا يركض قاطعته صرخات ام راكان وهي تقفز وتركض للسياره : اويلي اويلي لا بالله خلاص هذي نهايتي ! يا حسرتي على شبابي ! ودخلت السياره وهي تقفلها وجسمها ينتفض نفض ! جلس عزام على الارض وهو يضحك بقوه وماسك بطنه من الوجع : اه يا بطني ورجع يدخل بنوبة ضحك وساره جنبه تضحك : ششش شفت هههههههههه ام عزام انقهرت منهم وقلبها يدق طبول : هذا مو مقلب ؟!، ما تستحون على وجهكم ! احمدوا ربكم انه بنات خالك نايمات بالسياره والا كان انهبلوا ! شوف جدتك يا ... ضحك على امه المعصبه وناظر جدته وهي تنزل من السياره معصبه بعد ما عرفت انه مقلب : لا تكلمني يا عزام ! جلست عند ام عزام : وقسم بالله للحين قلبي يدق بقوه احسه رح يطلع من مكانه !! اسيل وهي تضحك : وين دروس الشجاعة ؟! ورجعت تضحك وهي تتخيل شكل جدتها ام راكان بقهر : ادري انه كله من تحت راسك فتحت اسيل عيونها بدهشه : انا ؟! حرام عليك يا جده هو غمز لي قاطعها عزام بخبث: لو تدرين يا جده انها صورتك بالجوال !!! ام راكان بنهر : انت ما في وجهك حياء؟، وبتوعد وقسم بالله الا اقول لابوك واذا ما خليته يلغي خطوبتك ما اكون ام راكان ! والله لأطلع هالضحك من عيونك !!! اسيل عفست ملامحها وشوي وتبكي : انت يا جده ليه تفرقي بين العيال والبنات ؟ حرام عليك ! يعني عزام للي عمل فيك مقلب وحطيتي حرتك فيني كل هذا لانه ولد ؟ ام راكان بتهكم : ايوه لانه ولد ! تراني اكره البنات ولما اسمع فلانه جابت بنت احسه يوم عزاء ! وازيدك من الشعر بيت ترى لما امك جابتك وجابت خوله يومها عزيتها وقلبت البيت مناحه ! ابغى عيال مو بنات ! ولوت بوزها مو عاجبها ! اسيل بقهر من كلامها : الظاهر يا جدتي نسيتي انك بنت !!! ما ادري ليه تميزون العيال ما ييجي من عندهم الا المشاكل !!! ام راكان ابتسمت : يا زين العيال شوفتهم تفتح النفس! واشرت على عزام ! مو مثلك انت وبنات عمك تسدون النفس!!! اسيل لوت بوزها : دامني اسد نفسك خلاص كل وجبه تلقيني بوجهك علشان تنسد نفسك وتنحفين ورفعت حاجب بخبث : علشان جدي ما يعمل مثل جدي ابو محمد ويتزوج الثانيه علشان يجدد شبابه ! ام عزام بنهر : اسيل وش هالكلام ؟! انكتمي احسن لك ! ام راكان وقلبها مولع بس مجرد فكره انه يتزوج عليها بس الكبرياء جبرها ترد على اسيل ببرود : عادي خله يتزوج ! وبثقه لانه ما رح يلاقي مثلي واصلا مستحيل جدك يعملها زفر عزام بضيق من ذي السوالف وناظر ساعته قلبه مو مرتاح لهذا المكان : علامهم تأخروا ام عزام : قريب يوصلون لا تحاتي يا ولدي !!! ،،، ،،، ،،، ،،، ،،، مها ناظرت ساره جالسه والسكوت مخيم عليها جلست جنبها على الارض ومسحت على شعرها بحنيه : وش فيك ساكته ؟! رفعت راسها وناظرتها ورسمت شبح ابتسامه : وش اقول ؟ ابتسمت لها وحست انها متضايقه تبغى تروح مع راكان لانها من لما غادروا وهي على جلستها وساكته : تبغين تروحين معهم ؟! ردت وصوتها مخنوق بس تحاول ما تظهر : ما ابغى اروح ما اقدر اترك خالتي هنا ؟! سألتها حتى تعرف مين للي منعها تروح : طيب ما قالوا لك ترجعين معهم ؟! ردت بصوت مخنوق وحابسه الدمعه : جودي قالت اروح معهم بس عمي عزام رفض سكتت وهي تزم شفايفها حتى ما تبكي !! قاطعهم دخول ام محمد وهي توجه كلامها لساره : صليتي المغرب ! هزت راسها بالرفض ام محمد بنهر : قومي لا بارك الله فيك مها ناظرت ام محمد بلوم : مو كذا الاسلوب ! انت تنفريها من الصلاه ! لازم بإسلوب قاطعتها ام محمد باستخفاف : اقول اترك عنك السوالف وقومي صلي انت الثانيه الحين يفوت وقتها ! مها: ترى يا خالتي للحين ما اقام الصلاه ! ومسكت يد ساره : تعالي نصلي وقبل ما تطلع تكلمت بنغزه : قبل ما تحاسبي هالصغيره على الصلاه شوفي ولدك نايم ما صلى ! ام محمد بفجعه : هالكذاب يقول لي صليت ! الحين اراويه يكذب علي وطلعت متوجه لنادر وهي تتحلف فيه ! ،،، ،،، ،،، ،،، ،،، ناظرت امها جالسه تنتظر يكملون تجبير يدها ودموعها تنزل بهدوء الدكتور بلطف : لا تبكين يا حلوه ! ما ردت عليه ودموعها مستمره بالنزول خال عائشه : انتبهي مره ثانيه وانت تنزلين الدرج شوفي كيف صار فيك ! ام سعود زفرت بضيق وقلبها قارصها زوجها طلع من البيت وتتصل فيه وما يرد عليها !! حتى اخوها كذبت عليه وما قالت له السالفه ما تبغى تزيد فضيحة بناتها ولما يكبرن مين يتزوجهن !! رددت بنفسها يا رب استر على بناتي ناظرت الدكتور لما كمل : سلامتها ومسح على شعر عائشه وابتسم : انتبهي مره ثانيه علشان ما تتعورين ! وتركهم وطلع ام سعود والضيق باين بصوتها : يلا يا عائشه اخوها يخفف عليها : لا تضايقين نفسك شوفيها ما فيها الا العافيه ! هزت راسها بقلب ميت وبداخلها اي عافيه ونهى واسماء ما تدري وش حالهن حملت عائشه مثل المجنونه بعد ما فقدت الوعي وقفت عائشه بتردد ما ابغى ترجع البيت تخاف ابوها يطقها مره ثانيه بس امها ما تركت لها مجال مسكت يدها السليمه وتوجهت خارج المستشفى !!! ابو سعود وهو ماسك الولد من ثوبه والناس إلتمت حولهم : والله لأذبحك واشرب من دمك الولد يحاول يفلت نفسه وبمساعده الناس للي فكت بينهم أفلت من قبضة. ابو سعود بأعجوبه !! ابو سعود بصراخ وهو يحاول يفلت نفسه من الرجال للي ماسكينه : اتركوني عليه نواف يتكلم بقوه عين : روح ربي ابنتك للي تراكض خلفي ! ابو سعود جن جنونه وللي ذبحه الرجال للي ماسكينه وش هالفضيحه هذي ؟! وقف رجال محايد : ترى يا ابو سعود الغلط عليك انا اكثر من مره اشوف ابنتك الصغيره تتلصق فيه المفروض تنتبهون لها ! وناظر نواف : وانت بنت صغيره عيب عليك تستغلها نواف يبغى يفضحها خاربه خاربه : مو الصغ عرف ابو سعود انه يبغى يقول الكبيره ويفضح ابنته بعد ما اكتشف انه الناس تفكر عائشه للي تلاحق نواف وبقوه ما يدري من وين دبت فيه هجم بقوه بعد ما حرر نفسه من الرجال وضرب نواف بوكس على فمه وبصراخ : انكتم انكتم فرقوا الناس بينهم وغادر نواف المكان وهو يهدد ويتوعد والدم ينزل من فمه ،،،، ،،،، ،،،، دخلت البيت وبعدها بدقائق. دخل ابو سعود مثل الثور الهايج : وين كنت ؟! ام سعود بصبر : للمستشفى واشرت على يد عائشه اقترب وعيونه تقدح شرار : ليه تأخذينها ؟! جعلها تموت هي والخنزيرات للي بالداخل !!!! وبصراخ اشر لعائشه : انقلعي على الغرفة ما ابغى اشوف وجهك ! ركضت عائشه للغرفه قبل ما يكمل ابوها كلامه ناظر زوجته : عجبك اخر تربيتك ؟! ردت بحده : لا تكلمني كذا؟! كأني مسكت يدها راسلي. فلان وعلان !! رفع اصبعه بإتهام : انت السبب طول وقتك على الجوال او دايره من بيت لبيت ! ناسيه انه عندك بنات لازم مراقبه قاطعته بتهجم : قول لنفسك طول الوقت على الزفت او نايم او طالع ...... ويبقى السؤال مين الشماعه للي نعلق عليها الغلط الام او الاب او المجتمع ؟؟!!!!!!