أقدار - الفصل 21 - بقلم ضاقت انفاسي - مكتملة | روايتك

تكبر احلامي يا ابتي ....والطفلة تتابع أن تكبر هل قلبك حي يشعر بي ....عيناك لحالي هل تبصر "" """ """ """ """ "" اسيل كل ما تتذكر تضحك بصوت عالي تنرفز منها عزام : وبعدين معك ؟! اسيل مسكت ضحكتها : كلما اتذكر شكلها وهي تقول لا تزعل يا عمي عزام لاني رح اروح ! ام راكان ناظرتها بانتقاد : وش للي يضحك بالموضوع ؟! اسيل وهي تضحك : تخيل شكلك يا عزام تروح تنتحر لانها راحت !! عزام بدون نفس : ههه ما تضحك ! ام عزام بشفقه : مسكينه هالبنت تدور على الحنيه ! سلمان : دوم عزام يطقها وين الحنيه ؟! اسيل ابتسمت : علامك زعلان انت الثاني ؟! لا تقول لانه ساره راحت ؟! سلمان مط شفته بقرف : ما تهمني اصلا! ام عزام : والله البنت حبوبه وهاديه شفتي كيف جوري وليان يبكون عليها !! سلمان : ايه يبكون راحت الشغاله من عندهم يبغونها للطلبات ! حتى عمار يقول لي ما ابغى تروح اذا راحت مين يشتري له من البقاله ؟! ام راكان بحيره : انا نفسي افهم وش قلب ام محمد وغيرت رأيها وراحت مع نادر ؟! وش تبغى بساره ؟! عبدالرحمن : واضح جدتي كبرت بالعمر وتبغى شغاله متنقله ههه سلمان طالعه باستصغار :-يا غبي بعدها صغيره عزام بغموض : والصغير يكبر ! ام راكان طالعته : وش قصدك ؟! عزام وقف : ولا شيء ام راكان ناظرته باستغراب وهو طالع وش يقصد بكلامه ؟! ** ** ** رتبوا الاغراض وساره بنشاط وسعاده تساعدهم استلقى على الارض بتعب : افففف تعب ! جلست ام محمد : وش اشتغلت علشان تتعب ؟! جلس وناظرها بقهر ليه تنكر تعبه : يعني انا الحين ما ساعدتكم ؟! مين حمل الحقائب ؟! مها جلست جنب ام محمد : حرام عليك يا خالتي تنكري ترى والله ساعدنا نادر طالع امه :،شفتي وش قالت لك ؟! وابتسم لمها : فديتها زوجتي قاطعته ام محمد ومطت شفتها : مالت عليك وعليها ! أصلا إنت ومها ما اشتغلتم ! مها رفعت حاجبها وفتحت عيونها : حنا ما اشتغلنا ؟! اجل انت للي اشتغلت ؟! اصلا قضيت الوقت وإنت جالسه على الكرسي وتشربين من القهوه وطاقيتها سوالف فلانه وعلانه ؟! طالعتها ام محمد بدون رد !! #ويبقى السؤال مين للي اشتغل ؟! # نادر وهو يرجع يستلقي : اصلا يمه انت ما تحركت جالسه وتقولين ساره ودي هذي وجيبي هذي ! ام محمد خزته وهي رافعه حاجب : وزوجتك ما شاء الله عليها مو كأنها نفس الشيء خذي يا ساره حطي هذا هنا وهذا هناك ! مها وهي تشبر بيدينها : يعني كم غرض قلت لها توديه قلت اني ما اشتغلت ؟! نادر ناظر ساره وابتسم : مين للي اشتغل ؟! ام محمد ناظرته باستخفاف : ما لقيت الا ذي تسأل؟! من متى رأيها مهم ؟!! نادر طنش امه وهو يناظر ساره : مين للي اشتغل؟! طالعته وهي تبتسم : كلنا اشتغلنا !! ام محمد قاطعتها : اسكتي وقلدتها بمسخره : كلنا اشتغلنا ! وبحده : حاسبه نفسك اشتغلت رتبتي كم غرض !! مها خزت ام محمد : مين للي اشتغل يا خالتي !! ام محمد تغير السالفة: وش رأيك بعد ما نرتاح نتعرف على الجيران ! نادر بملل أشر لساره : قومي يا ساره اشتري لنا شيء يبرد حلوقنا ! مها بانتقاد : روح إنت ساره ما تعرف البقاله ! نادر بكسل : ترى تعبت وانا اساعدكم ! وطالع ساره يوصف لها البقاله هزت رأسها بحماس : ان شاء الله ! نادر ناولها الفلوس : اشتري للي تبغيه تعبناك معنا اليوم ! هزت رأسها بفرح وقفتها ام محمد وهي تمسك يدها : لا تعطيها وجه ! تراها طماعه عز الله ما رح ترجع فلس واحد قاطعها نادر وهو يغمض عيونه : روحي يا ساره واشتري للي تبغينه حلالك ! احمر وجه ام محمد : ايه وتعال باكر قول ما معي فلوس نادر بلامبالاه قهر امه : اصرف ما في الجيب يأتيك ما في الغيب ! مها وهي تستند على الجدار المتهالك : الرزق بيد ربنا ! ليه نحرم نفسنا ؟! ام محمد بنغزه : للي ما توفر من شراره مقعدها بالبيت خساره! مها بدون اكتراث لكلامها : ما شفت القصور للي عايشه فيها ! كل ورث عمي طيرتوه ! شوفي الفرق بينكم وبين بيوت ابو راكان وعياله ! ام محمد بحسره :- وش أقول وش يطلع بيدي لما يكون زوجك مصرف وما يسمع كلامك! نادر ينهي الكلام :للي راح انتهى والله يرحم ابوي وجميع الموتى مها من قلبها ردت : آمين ** ** ** ** جلست عند ابوها بفرح : بابا حفظت آيه الكرسي ابو سعود مسح على رأسها : ما شاء الله تابعت عائشة بفرح: المعلمه بالمسجد قالت لنا نحفظها علشان نتحصن من الشيطان وما يضرنا ! ابو سعود باهتمام : وسمعتيها للمعلمه بدون اخطاء؟! ابتسمت: ايه حتى قالت لي من حفظك إياها البابا ؟!- ام سعود بغيره :-وش دخلها تسأل مين حفظك؟! العمى يضربها وش ملقوفه ؟! ابو سعود طالعها بإستغراب : علامك ولعت كذا ؟!، كله سؤال عادي ! ورجع ناظر عائشه بإهتمام : وش قلت لها لما سألتك مين حفظك السوره :! عائشه ابتسمت بسخريه :- قلت لها أصلا بابا مو حافظها وما يعرف يقرأ قرآن دوم يقول لنا نقرأ قران بس ما اشوفه يقرأ قرآن !! أشر على نفسه : انا ما اعرف أقرأ قران ؟! هزت راسها وهي تخزه بعيونها بطريقه طفوليه : لا تنكر بابا حتى المعلمه تعرفك قالت يدرس تربيه اسلامية وما يعرف يقرأ قرآن ؟! وقالت لي في المسجد حلقات تعليم للذكور قاطعها وهو يمسكها من إذنها : ول على ذي الملعمه ملقوفه وقليله أدب ! وش دخلها بالاصل تسأل مين حفظك السوره ! ابتسمت ام سعود بشماته : على حساب إنه سؤال عادي !! وحركت حواجبها تغيضه ! ترك إذن عائشه بقهر : اذا سمعت انك وصلت المسجد عند ذي المعلمه الا أحش رجولك ! ام سعود بإعتراض : خلها تروح أرتاح من ثرثرتها كم ساعه ! وقفت عائشه بدون اهتمام : رح اروح ما لي دخل فيك اذا انت ما تبغى تروح تتعلم القران انا ابغى أحفظ قران علشان اكون مع الكرام البررة يوم القيامه ! وإنت ادخل نار جهنم لأنك تشتم الناس ! انصعق من كلامها : حسبي الله على عدوك تبغين ادخل النار يا قليله الادب؟ ما علموك بر الوالدين ؟! سحبتها ام سعود : روحي يا ماما عز الله إن جلست أكثر هنا الا العقال ينرسم على جلدك !! عائشه ما عجبها كلام امها : انا وش قلت ؟! ام سعود ابتسمت : ولا شيء بس لازم لما تجلسين مع ابوك تقصفين جبهته ؟! ابو سعود مسك الريموت بدون ما يناظرها : طلعيها قبل ما احطها برأسي ! وش هالبنات ذول ؟! وطنش عائشه وهي تتكلم واندمج مع التي في ! ** ** ** ** ** دخلت وحبات العرق على جبينها حطت الاغراض عند نادر : تفضل ! جلس وهو متربع بعد ما كان مستلقي وفتح الاكياس وصار يناظر وش يختار ؟! وزع المشتريات وام محمد مو عاجبها : هذي العلبه الكبيره ليه اعطيتها لساره ؟! نادر ابتسم باستغراب : الله يهداك يمه هذي مثلجات للصغار قاطعته بتهكم : ما في شيء للصغار وشيء للكبار ! تفكر إني بزر تضحك علي بذا الكلام ؟! نادر وهو مندمج بالاكل : علشان أسنانك وهذي تضرك قاطعته وهي تسحب العلبه من ساره : ومين قال لك أسناني توجعني ؟! ودفت ساره بخفيف : روحي شوفي شيء ثاني خذيه ! طالعت ساره ام محمد وبدون اعتراض هزت رأسها وبداخلها تصرخ هذي حقتي بس خلاص تعودت تسكت وما تناقش لأنه بنظرها كالعاده ما يحق لها الاعتراض ؟! مها تضايقت من تصرف ام محمد وبانتقاد : تحطين عقلك بعقل طفله ؟! نادر طلع فلوس وهو يشوف ساره نفسها بذي العلبه : تعالي روحي اشتري من البقاله لك وحده مثلها ام محمد باعتراض : ليه تخسر كمان حبه ؟! خلاص تعالي يا ساره انا وانت بنفس العلبه ! حرك شفته يعترض بس ام محمد ما تركت له مجال سحبتها عندها مطت مها شفتها وما علقت ! ابتسمت ساره شبح ابتسامه وهي تشوف العلبه خلصت وما طلع لها تأكل الا مرتين،!! قاطع الهدوء صوت جوال ام محمد نادر بسخريه : اوووووه الماما مهمه ومعها جوال !! ام محمد قبل ما تفتح خط : تفكرني مثلك انت وزوجتك بالعصر الحجري ما معكم جوالات ؟!! وضغطت على الزر الاخضر وهي ترحب بأم راكان وساره من لما سمعت اسم ام راكان إلتصقت فيها وهي فرحانه ما تدري تحب بيت ابو راكان وعيالهم وتحب تجلس عندهم !! ** ** ** ** من اليوم الثاني بدأت ام محمد ومها جولاتهم عند الجيران للتعرف وساره جلست عند نادر بالبيت للي تكاسل يروح يشتري غنم وأجلها مره ثانيه ! جالسه بوسط الغرفه وتناظر السقف وتغني بصوت هادي طفولي قاطع اندماجها طرقات على باب البيت إلتفتت لنادر مغمض عيونه: في أحد على الباب !! نادر بكسل وهو مغمض عيونه : روحي شوفي نطت بفرح وهي تتخيل احد من اهل ابو راكان او بنات خلف فتحت الباب وانمحت فرحتها وهي تشوف رجال كبير بالسن لحيته بيضاء متكي على عصا تكلم بصوت ضعيف : هنا بيت نادر ؟! هزت رأسها كالعادة بابتسامه غبيه: ايه الشايب نهرها بعصاه : بسرعه نادي عليه ! دخلت بعجله وهي مستغربه منه وقفت فوق راس نادر وبصوت منخفض : في رجال برا يبغاك ! نادر تثاوب بكسل وفتح عيونه وبضجر : وش يبغى ؟! ما عرفتيه ؟! ضرب جبهته على غباء سؤاله وش عرفها فيه وحرك يده بتطنيش : قولي له إني مو هنا تلقينه الحين جاي يرحب فينا وانا ما لي خلق أقابل احد ! هزت رأسها وطلعت له وبغباء قالت : نادر يقول لك مو موجود ! قفزت لما ضربها الشايب بالعصا ونهرها : تتمسخرين علي! بسرعه خليه يقوم ! هزت رأسها بخوف وانطلقت بسرعه للداخل : قوم الشايب معصب قاطعها بضجر : اففففف وش هالناس الغثيثه ؟! الحين وقت تعارف ؟! طلع وهو مغمض عين ومفتح عين وبدون نفس وقف عند الباب : نعم ! فتح عيونه بسرعه لما ضربه الشايب بالعصا : نعامه ترفسك كذا تستقبل ضيوفك ؟! حك رأسه باحراج : اسف يا عم بس كنت نايم وما ادري وش فيه ! اعذرنا تفضل حياك الله ! الشايب بإسلوبه الجاف : اسمع كلمتين انا مو جاي لطق الحنك مو فاضي سحبه نادر: ادخل ادخل حياك الله دخل الشايب مرغم وجلس وبعد ما تقهوى تابع حديثه : انا سمعت من اهل القريه انك بدون شغل وأنا عندي حلال وكبرت بالسن وما أقدر اقوم فيه نادر وهو يحك رأسه : طيب بيعه دامك ما تقدر تقوم فيه قاطعه الشايب : صه ابيع حلالي ؟! انت مجنون والا خبل؟! نادر بضحكه قصيره :-الاثنين !! عقدالشايب حواجبه بعدم فهم : وش قلت ؟! نادر اخفى ضجره وبنفسه يا ليل ابو لمبه مصحيني من عز نومي علشان حلالك جعلك بالحريقه انت وحلالك معقول رفع نظره للشايب وهو ينهره : انا اكلمك ! ابتسم بسخريه وش هالشايب يكلمه وكأنه بزر بس مسك نفسه للمره الاخيره وهو متحلف فيه : وش قلت يا عمي ما سمعتك سرحت شوي ! ** ** ** ** ** دخلت مها وخلفها ام محمد وهي رافعه حاجب باستغراب وهي تشوف نادر حامل ساره على أكتافه ويلف ويغني ام محمد شهقت وحطت يدها على صدرها : عز الله ولدي انجن ! او تلبسه جني ! انا كل هالبيت مو مرتاحه له اكيد انه مسكن للجن !! مها بضجر من ثرثرتها : اسكتي خلينا نفهم السالفة ! نادر نزل ساره على الارض وبفرح : باركولي ام محمد ناظرت مها وبعدها لنادر : نبارك لك يعني أعرست !؟! خزتها مها بحده : علشان ازفه لقبره قبل ما ينزف لها قاطعهم نادر : بلا عرس بلا خرابيط بس جاني الشغل لباب بيتي ! مها عقدت حواجبها : كيف ؟! خبرهم بكل شيء صار وبفرح : تخيلي راتب شهري والفطور والعشاء من عنده !! ام محمد بغضب : هذي اخرتها تشتغل عند الناس راعي ! نادر بسخريه : للي يسمعك يقول شهادتي عرض الحائط مها :- طيب وين المشكله؟! الشغل مش عيب ! وابنك مو احسن من الرسول عليه السلام قاطعتها ام محمد :ما يشتغل عند الناس حنا اتفقنا يشتري غنم له نادر قاطعها : من وين لي الفلوس ؟! الحين سألت ذاك الشايب سعر الحلال بالعالي والفلوس للي معي ما تكفي ! ام محمد مضطره : خلاص انا اعطيك فلوس واشتري بس ما تشتغل عند احد مها ناظرتها باستغراب : طيب ليه انت معارضه ؟! ام محمد بحسره : اسباب كثيره واهم سبب انه نادر مو خادم نفسه حتى يقوم ب 500 رأس من الحلال !! رح يموتن ومن وين نجيب فلوس تعويض للحلال !! مها بإقتناع : صادقه يا خالتي اول مره تقولين شيء صحيح ! نادر ابتسم بغباء : تدرين الحين استوعبت انه 500 راس يبغى هالشايب يضحك علي ويستغل اني عاطل عن العمل !! بس بعيده عن شاربه الحين رح اروح له وارفض هالوظيفه! واشتري الحين حلال واقترب من امه اعطيني فلوس ! ام محمد تورطت طلعت فلوس بدون نفس وناظرته بوعيد : يا ويلك لو رجعت بدون شيء والفلوس مصرفهن ! نادر بحماس : لا تخافين بس اعطيني ! ضحكت مها وهي تشوف يدين ام محمد ترتجف على الفلوس وتناظرهن بحسره! *** **** ** ** ** ام عزام باعتراض : طبعا مو موافقه اذا أمي انجنت نلحقها ؟! ام راكان بإقناع :للي يسمعك يقول رايحين نعيش هناك !! ترى كلها زياره عندي فضول أشوف المكان للي اختارته اختي ! عزام : طيب قولي لها تصور البيت وترسل الصور !! ام راكان حاست بوزها : رفضت تقول تعالي ! ام عزام بتردد: خايفه اندم على ذا المشوار ! ومين يأخذنا ؟! ام راكان ابتسمت وهي تؤشر على عزام : هذا المزيون ! عزام باعتراض : ليه انا؟ ! ام راكان باستعطاف : كل اعمامك يا ولدي مسافرين حتى جدك وابوك ! قاطعها بدون اهتمام: والله اعتذر عندي الاسبوع هذا ضغط خليكم للاسبوع الجاي يكون واحد من اعمامي هنا او ابوي ! ام راكان بزعل : هذا وانا اقول اغلى واحد علي بالاحفاد عزام ! قاطعها سلمان بتكذيب : البارحه سمعتك تقولين لعمي انه اغلى واحد خزها عزام : جده ام راكان حاست بوزها : تبغى تذلنا على هذا المشوار؟! وبعدين انا قلت اغلى واحد بالاحفاد مو بعيالي ! عزام ابتسم : دام اعمامي اغلى خليهم يأخذونك لعند إختك وحرك حواجبه وطلع قبل ما تحرجه وتجبره على هذا المشوار اسيل بتحمس : جده فكري بأحد يأخذنا ! حتى خوله وافقت تروح معنا ! ام راكان عفست ملامحها : ما في احد يأخذنا حتى لو لقينا ما رح احد يقبل يأخذنا العدد كبير ونحتاج حافله نقل ! ام راكان ابتسمت للفكره للي طرت لها : الحين اشوف ابو راكان يشوف احد يأخذنا ! اسيل بحماس : يا رب نلاقي ! ** ** ** ** منشغل بالأوراق تأفف لما سمع جواله يرن رد بهدوء : هلا..... الحمد لله بخير ....نعم ؟؟ وليه ان شاء الله ؟! انسي الموضوع وما في روحه!.....كذا والله مزاج ... ما امداك تشتاقين لها !! .....الحين مو فاضي بعدين اكلمك .......يا صبر ايوب ! ..... خوله من متى تعرف جدتها ؟! ما اشوفها كل يوم عندها الحين اشتاقت لها ؟! .......ولا الاسبوع الجاي ......من حقي ارسلك وين ما بغيت ....هالاخت عاد من زينها والله اني استعر منهم واستحي اقول انهم عيال اخواني ! والحين لاحقيتهم هناك ......ولا ساعه انسي السالفه ....أعتبرها رحله؟! ما لقيتي الا ذاك المكان !! .....بالله ام محمد قالت الجو حلو هناك !!......وبضجر خلاص بعدين نتكلم مو فاضي الحين .......مع السلامه قفل الخط بقرف : اعوذ بالله من الحرمه اللحوحه !! ابو عزام ابتسم : وش تبغى امي ؟! ابو راكان بضجر : تبغى تزور ام محمد بالقريه ابو عزام بسخريه : صارت مشتاقه لها ؟! ابو راكان بقهر : شفت !! لا والمشكله ناويه تأخذ العائلة كلها تقول اعتبرها رحله !! ابو عزام مط شفته بسخريه : ما أدري وش للي تفكر فيه خالتي تركت بيتها وانتقلت للقريه !! او راكان ملامحه معفوسه : وزوجتك تبغى تروح معها وعيالك ! ابو عزام رجع يقلب بالاوراق :،يا ليتها ام عزام ما شربت هالحليب كان الحين خالصين من هالعلقه ابن عمي من بعيد لبعيد ابو راكان بتأييد : وقسم بالله انهم يفشلون بس ما نقول الا الله يكون بالعون !! ** ** ** ** ** تناظر بفرح وهي تشوف الغنم بالحوش رفعت يدها تعدهم بحماس : ظ، ظ¢ ظ£ ظ¤ ظ¥ وطالعت مها بابتسامه وهي تؤشر بأصابعها : 5 ام محمد واقفه بعيد منقرفه : عامله انجاز بالعد ! مالت عليك ! انقلعي بسرعه اعملي شاهي الواحد رأسه صدع ! حست بالخيبه وبطاعه : ان شاء الله نادر ناظر امه : وهذا الحلال جبته مها وهي تمسح على ظهر الغنم طالعتها ام محمد بانقراف : يععععععع كيف تلمسيها ؟! مها ناظرتها وابتسمت : عادي مثل ما تأكلين لحمها وين القرف ؟!!! ام محمد غطت انفها وفمها بكف يدها : لولا اني اعرف اهلك واصلك الا اقول جايبك نادر من البر ! ما تخافين وش هالقلب للي عليك !! مها بسخريه وهي تناظر الحلال : دخيل البرستيج انا !! نادر :،صادقه حرمتي ام محمد بنفسها حسبي الله عليها خلت ولدي خاتم بيدينها مسكته من يده للي توجعه (العيال ) نادر عقيم وصار لهم سنوات متزوجين وهو يلاحق خلفها من ديره لديره مثل الخروف !! قطعت سرحانها على صوت ساره : تفضلي ام محمد وهي تناظر ساره تبتسم هزت رأسها بأسف صدق انها خبله !!! ** ** ** ** متربع على السرير والاوراق مبعثره قدامه ويكلم بالجوال : الحمد لله بخير ! صالح بضحكه : شفت ولد خالك وش منزل على صفحته ؟ ! عزام عقد حواجبه باستغراب : مين ولد خالي ؟! صالح : علامك مسطول مهند ولد خالك محمد !! هز راسه : وش منزل اصلا ما ادخل صفحته ! صالح بضحكه صغيره،: تراه ولد خالك انهبل نزل صورة خالتك على صفحته قاطعه وهو معقد حواجبه باستنكار : وش تقول ؟!!! خالتي !!!