أقدار - الفصل 16 - بقلم ضاقت انفاسي - مكتملة | روايتك

جودي وهي ترقص بفرح : ماما مو هنا ماما مو هنا ! ليان نطت بفرح :-وش رايك نرقص ؟! جودي مطت شفتها بسخريه : ما تعرفين للرقص ! ليان مسكت ريموت التي في حق الصاله وصارت تدور بالقنوات: الحين تشوفين رقصي! استقرت على قناه جودي ما عجبتها وحاولت تسحب منها الريموت كل وحده تشد بأقوى ما عندها ! ليان وهي تسحب فيه وشاده على اسنانها: هاتي يا حيوانه! جودي شدت اقوى وما بين المد والجزر بحركه غير متوقعه طار الريموت بالجو ارتفعت الانظار عليه والشاطره تبغى تمسكه قبل الثانيه ! وسرعان ما صرخت جودي لما شافت الريموت ضرب بالفازا خلال ثواني كانت الفازا قطع متناثره على الارض شهقت جودي وليان حطت يدها على فمها بخوف وعيونها طلعت من مكانها من الخوف نزلت جودي للارض ومسكت قطعه من القطع المكسوره رفعت رأسها برعب لما شافت خلف واقف يناظرهم والنار تطلع من عيونه معصب وبصراخ : جعلكن للكسر ! مين للي كسرته ؟!!! جودي وقفت برعب ورفعت اصبعها وهو يرجف واشرت عليها فتحت ساره عيونها باستنكار : انااااااااا ليان قاطعتها بسرعه : ايه انت انا شفتك لما كسرتيها ! فتحت عيونها بصدمه من كلام ليان حست لسانها عاجز عن نطق حرف واحد يبرر موقفها بعد ما شافت نظرات خلف لها وكأنه إعصار ! ** ** ** ** دخلت البيت بصدمه وهي تشوف خلف يطق ساره بدون رحمه ركضت بسرعه وسحبت ساره والشرار يطلع من عيونها: جعل يدك للكسر ان شاء الله! خلف وهو يلهث ناظرها وللحين ما طلع حرته يتمنى ام عمار تحت يده ويطلع حرته فيها بس مستقويه بأهلها اخذ نفس ورمق ام عمار بنظرات كره : اصبري على رزقك رح ييجي يوم وأكسر كل عظمه بجسمك وبهمس لا تستعجلي على رزقك ! وتركها وطلع من البيت ناظرته وهو طالع من البيت وبنفسها جعلك ما ترد للبيت يا ناس ما اطيقه ! وش حظي للي رماني عليه ؟! يا رب لا اعتراض بس! عضت على شفتها بقهر وناظرت الكائن الصغير للي متخبي خلفها مسكت يدها وقلبها يتقطع وهي تشوفها تبكي بصمت ! تستغرب من هالطفله ما تصرخ ما تشكي مثل باقي الاطفال ! رفعت رأس ساره والدموع تنزل على خدودها بغزاره مسحت دموع ساره بحنيه : خلاص يا قلبي لا تبكي ! نزلت ساره رأسها بهدوء ودموعها رافضه الوقوف ! ام عمار بضيق على حال هالبنت : ليه ضربك ؟! ساره رفعت رأسها وبانكسار فتحت فمها ترد: للل وقطعت كلامها بشهقه ما قدرت تكتمها ! حضنتها ام عمار بقوه : خلاص جعل يده للكسر الله لا يوفقه ! ناظرت بناتها واقفات يناظرن بملامح مخطوفه سألت بهدوء: وش صار ؟! ليان بتردد: كنا قاطعتها جودي : ساره كسرت الفازا وضربها بابا ناظرت ام عمار القزاز على الارض ما انتبهت له اول ما دخلت ! رجعت ناظرت البنات ومتأكده بقرار نفسها مو ساره للي كسرتها سألت بحده: جودي انت للي كسرتيها والا ليان ؟ ! ليان بخوف وتبرير: مو انا جودي للي رمت الريموت وجاء قاطعتها جودي :كذابه هي كسرتها صرخت ام عمار والنار يطلع من عيونها : وليه حطتوها بساره ؟! وقسم بالله قاطعتها جودي وهي تبكي : والله يا ماما خفت لما شفت بابا بوجهي ! فكرت اذا قلت ساره ما يضربها لأنها أخته ! وركضت بسرعه لساره وحضنتها باعتذار : اسفه والله مو قصدي !! ناظرتها ام عمار بغضب : صدق المثل « تقتل القتيل وتمشي بجنازته » ** ** ** ** بعد العصر جالس سلمان يتكلم بحماس : وجاء خالي خلف وطقها طق ! ام عزام بانفعال : وليه جودي تكذب وتحطها بساره ؟! عبد الرحمن : علشان خالي ما يطقها ! ابو عزام كتم بداخله وهو نفسه يمسك هالخلف ويكسره تكسير ! زفرت ام عزام بضيق من تصرفات خلف عياله ما سلموا من يده ولا حتى هاليتيمه !! قاطعهم دخول ام عمار ردت السلام بدون نفس وجلست ! تقدمت ساره وهي تبتسم وسلمت على ام عزام وابو عزام تقدمت من أسيل تسلم عليها مسكت اسيل يد ساره وعفست ملامحها بقهر من خلف وهي تشوف كف يد ساره مكان العقال لون ازرق سألتها وقلبها يتقطع : يوجعك ؟! ساره ابتسمت بمكابره تحس الدموع بأي لحظه تنزل وهزت رأسها بالرفض: لا ناظرها عزام وباين البكاء بعيونها سألها بفوقيه : ليه ضربك ؟! ساره وكأنها مذنبه : لأني كسرت الفازا ! اسيل بقهر من خالها خلف : انت كسرتيها ؟! هزت رأسها بالنفي مسكها عزام من ثوبها بانقراف : تراك ترفعين ضغطي قاطعه ابو عزام بعصبية : عزام !! ناظر ابوه وهو رافع حاجب : وش فيه ؟! ابو عزام ظهر على وجهه الانفعال والزعل : عدل اسلوبك ! وقف ما عجبه كلام ابوه وبقهر دفها على الخفيف وطلع بملامح فيها الزعل ! ام عمار مطت شفتها بقهر : اعوذ بالله القسوه وراثه !! اسيل بتأييد: صادقه يا عمتي ! ما ادري على وش شايف عمره وناظرت ساره واقفه تتابع بصمت : اجلسي الله يكون بعونك ! جلست ساره وهي تبتسم وتناظرهم بهدوء ام عمار بضيق خلق: قسم بالله ما اقدر أصبر من كذا !! مو صاحي ضربه جنان بجنان !! تعالي يا ساره تقدمت ساره بهدوء عند ام عمار : نعم خالتي؟! ام عمار كشفت على ذراع ساره : شوف شوف مكان الضرب ! ومسكت فستانها ورفعته وكشفت عن ظهرها : هذا بني آدم ؟! هذا وحش !! ساره بانحراج نزلت فستانها وهمست : عيب يشوفوني ! ابو عزام بضيق : اخخخخ لو يرجع الزمن ! ام عزام :،الله يهديه تذكرين لما طق عمار وتنوم بالمستشفى ؟! ام عمار وخلقها ضايق : وقسم بالله العيال يتعقدون لما يسمعون انه جاء ! وما يرتاحون حتى يطلع ! أسيل : طيب حاولتي تكلمينه بهدوء يمكن يغير من طبعه !! ابتسمت ام عمار بسخريه : إسألي امك بما انه اخوها !! ام عزام بصراحه : والله خلف ما ينفع معه الكلام بهدوء من يومه طبعه حار وبسرعه يعصب ويضرب عكس إخواني مو مثله ! ** ** ** ** اليوم الثاني عائشه وهي حاضنه يد ساره بحزن : يعور ؟؟؟؟ ساره ابتسمت : لا !!! عائشه بتأثر : اخوك وحش !!! ليه ما ضربتيه ؟! ساره باستنكار: كيف اضربه هذا اخوي !! عائشه :،عادي انا اضرب أخوي سعود ساره : أخوي كبير عيب اضربه،! عائشه بتفكير : وش رأيك ننحاش ونعيش مع بعض لوحدنا ؟! علشان ما احد يضربنا او يتحكم فينا ؟! فتحت ساره عيونها بدهشه: وامك وابوك كيف تتركيهم؟ ! عائشه بلامبالاه : عادي ازورهم بالاسبوع ناظرتها ساره بنظرات محروم ونبره حزن : لو عندي ام واب ما اتركهم ولا لحظه اجلس معهم طول الوقت !! مطت عائشه شفتها بطفوله : لو عندك أم واب الا تهجين من كثر طلباتهم يقرفونك عائشه تعالي عائشه روحي ! وش هذا ؟! ما يملون من اسمي ؟! ساره ابتسمت بألم والدموع تلمع بعيونها : أمك وابوك يحبونك عائشه ابتسمت : وش عرفك ؟! ساره بحزن : لو احد ضربك يدافعون عنك تتذكرين لما ضربك ابن صبحيه وش عمل ابوك !! عائشه عدلت جلستها وابتسمت بفخر وهي تتذكر : شفتي كيف طقه ؟! وبصوت منخفض تابعت : اقول لك سر ؟! هزت رأسها ساره تابعت عائشة بسعاده : أحس ماما وبابا يحبوني اكثر من اخواتي !! انا سمعت امي تقول لابوي انها تحبني اكثر وحده وتنتظر رجوعي من المدرسه لانها مشتاقه لي ! حز ساره بخاطرها كلام عائشه ما في احد ينتظرها او يشتاق لها !! تكلمت ساره بضيق : حرام تنحاشي امك رح تخاف عليك ! عائشه هزت رأسها : خلاص لما نكبر رح ننحاش اتفقنا ؟! ساره ابتسمت بدون نفس وهزت رأسها بالموافقة ** ** ** ** طلعت من بيت ابو عزام وهي مبسوطة وبيدها هديه من اسيل توجهت للبيت بطريقها شافت عزام متوجه لبيت جده ابو راكان ركضت له وهي تلوح بالهديه : عزاااام عزااام وقفت عنده وهي تلهث وتبتسم بفرح : شوف اسيل وش اعطتني ؟! قاطعها صوت أخوها خلف ما تدري من وين طلع لها : ما تستحي على وجهك تنادي رجال طويل عريض باسمه ؟! قولي له عمي عزام ! ناظرته بنظره غبيه وهزت رأسها بالموافقة: ان شاء الله ورفعت نظرها لعزام بفرح طفولي : عمي عزام شوف ومدت له الهديه ناظرها بدون نفس ورجع يناظر خاله خلف مو طايقه لا هو ولا اخته ! تجاهل يد ساره الممدوده وببرود:عن اذنك يا خالي وتركهم وتوجه لبيت جده ابو راكان حز بخاطرها رد فعله نزلت يدها بخيبه ناظرها واقفه تناظر عزام وقع نظره على أماكن الضرب وركز نظره على الهديه للي بيدها سحبها بهدوء و ابتسم بمكر : ساره بلعت ريقها وناظرته وقلبها يدق طبول: نعم ! خلف : امممم بما انك كسرتي الفازا رح أخذ هذي الهدية تعويض فتحت عيونها باستنكار هذي الهديه لها ناظرته بتردد: بس مسك إذنها : اسمعي انا لما اقول شيء ما ابغى اسمع اعتراض او مبررات تنفذين وانت ساكته ! تفهمين !! هزت رأسها وتوجهت للبيت وهي تركض وبداخلها قهر !! تبغى تبكي هذي الهديه لها كيف اخذها ؟!! دخلت بهدوء وهي ماسكه نفسها ما تبكي قدام عمار و جودي ! جودي بتحقيق : وين كنتي ؟! جلست ساره جنبها وبصوت مخنوق : عند بيت عمي ابو عزام !! عمار :-سلمان بالبيت ؟! ساره ما لها نفس تتكلم ردت بصوت منخفض:ايه وقف عمار مستهم : خليني اروح له وسرعان ما جلس لما شاف ابوه خلف دخل طلعت منها آه غصب عنها لما حست شيء ضرب كتفها ناظرت خلف وهو يتكلم : اشبعي فيها على بالي شيء محرز وله قيمه!! صدق انها اسيل سخيفه ! وتوجه لغرفته عفست ملامحها بألم وهي حاطه يدها على كتفها وتناظر الهديه كيف اختربت حست بداخلها قهر بس ما تقدر تحكي او تعترض !! تناول عمار الهديه وباستغراب: هذي لك ؟! وقبل ما ترد تابع كلامه بسخريه : لا تقولين ابوي جابها لك هديه !! نزلت نظرها للارض بانكسار وفيها الغصه: هديه من اسيل ! عمار انقهر من تصرف ابوه ومد شفته مو عاجبه جودي بهمس: لازم ينكد على الكل ما يقدر يعيش عمار تأفف بضيق وهو يسمع صوت امه وابوه واصل عندهم : بدأ مسلسل النكد وقسم بالله حياه تقرف ! كله صراخ بصراخ مشاكل ! وبقهر كمل : نفسي نجتمع على سفره اكل بدون مشاكل مثل باقي الناس ! نفسي أحس اني عايش بجو اسري متفاهم قسم بالله تعقدت كل العيال مبسوطين مع اهلهم الا حنا ؟! جودي بضيق : لو عايشين ايتام احسن لنا عمار بسخريه اشر على ساره : هذي يتيمه بس ما خلصت من ابوك ! نازل فيها طق !! نزلت ساره رأسها باحراج وبحزن على حال عيال خلف ابوهم مو سائل عنهم ! بس شاطر يطقهم ! ما يهتم فيهم!! تسأل نفسها باستغراب معقول لو امها وابوها عايشين يعاملونها نفس معامله خلف لعياله !! ابتسمت بسخريه ابوها شايب كبير وامها اكيد عجوز كيف يضربونها ؟! ناظرت جودي تمسح دموعها وبصوت حزين تتكلم : نفسي احس إنه ابوي ! دوم يطقنا ويكرهنا ! ليه يعاملنا كذا ؟! قاسي وطول عمره رح يبقى قاسي ! ساره بتأثر وحزن بكت على حال عيال اخوها خيم الصمت لثواني قطعه عمار لما ضرب ساره على رقبتها بخفه : ليه تبكي يالخبله؟! سؤاله صادف مرور خلف من الصاله ناظرها وهي تبكي وبتهديد: ولا نفس ما ابغى اسمع صوت مثل البزران تبكين على هديه مقرفه ! كتمت ساره انفاسها بخوف منه اعطاهم نظره حاده : النفس ما ابغاه اسمعه منكم ! وتركهم وطلع من البيت عمار بضحكه ضرب ساره على ظهرها وهي كاتمه نفسها بيدينها : خلاص خذي النفس طلع ! وانسدح على الارض من الضحك : حتى النفس ممنوع جودي بسخريه :باكر يقول لنا النفس بفلوس !! وناظرت ساره للي مستمره بالبكاء رفعت حاجب باستغراب : ليه تبكين الحين ؟! ساره قلبها تقطع عليهم من معامله خلف لهم عمار فهم سبب البكاء تكلم بحب لأمه :، صحيح ابوي ما يحبنا وقاسي معنا ! بس ربي عوضنا بأمنا صح يا جودي ؟! جودي ابتسمت : صحيح لو ماما مو هنا كان زمان هجيت من هالبيت ! رنت بإذنها « هجيت» «هجيت » « هجيت» « هجيت» ساره بنفسها جودي جالسه بالبيت علشان أمها بس هي علشان مين جالسه هنا ؟؟؟؟ ** ** ** ** ** لابسه بيجامه باللون الزهري ومتربعه على الكنبه جنب ابوها : بابا ابو سعود وبيده الريموت : نعم !! عائشه تقلد أمها بالكلام : اطفي هالزفت خلينا نسولف مع بعض !! واشرت على التلفاز ابو سعود بدون ما يناظرها وعيونه على الشاشه : روحي نامي عائشه نفس كلام امها : يعني التي في احسن مني تسهر معه ! ابو سعود ناظر ام سعود :،البنت حافظه كلامك عن ظهر قلب !! ام سعود بدون نفس : وهي صادقه ! مو عاجبك جلستنا ! ما رد وعيونه على الشاشه عائشه : الابله تقول الاب الناجح يجلس مع عيالها ويتكلم معهم ويلاعبهم ! وبقهر : حظنا ابونا فاشل وامنا 24 على الجوال ما في احد يسمعنا ! عدل جلسته وهو رافع حاجب ما تصدق كلامها انها بهذا العمر : اوكي ! وش عندك ؟! وناظر ام سعود : خلينا نسمعها ونشوف وش عندها ؟! وباسلوب فيه سخريه : تفضلي يا حلوه فضفضي ...فشي غلك ....حنا نسمعك ! تكتفت ام سعود وهي تناظرها بابتسامه عائشه ابتسمت بفرح : اول شيء اطفي الزفت علشان اعرف اتكلم ! ابو سعود عقد حواجبه : وتتشرط بعد !! اوكي وناظرها : تفضلي المايك معك ! عائشه عقدت حواجبها : بابا ما تعرف انه الكذب حرام ؟! وين المايك ما اشوفه ؟!! ابو سعود بضجر : بدأت المحاضره !! وبعدين معك تحاسبي على الكلمه ؟!!! عائشة رفعت حاجب بانتقاد : انت ما تقبل النصيحه لانك متكبر ومغرور ! والمغرور الله ما بحبهم قاطعها وهو يسحبها من بلوزتها بغضب: الله يأخذك انقلعي على غرفتك ! صدق انك ما تنعطي وجه ! عبست ملامحها وبمسخره: وجه والا رجل وبسرعه ركضت لغرفتها لما شافت ابوها وقف معصب !! ام سعود بقهر : ليه تدعي عليها !! ابو سعود جلس وهو يزفر بضيق : قهرتني ! وبعدين انا بقلبي اقول يأخذها للمدرسه !! ام سعود وهي تثاوب : اعوذ بالله لسانها طويل اخواتها كله نايم إلا هي جالسه !! قاطعتهم وهي تتخصر : مو حرام عليك تدعي علي !! ابو سعود خزها بعيونه : تستاهلين ! يلا انقلعي لفراشك ونامي مثل اخواتك !! ونهرها لما شافها واقفه مكانها : بسرعه !! مطت شفتها مو عاجبها : انا مو مثل بناتك مثل دجاج المزارع ينامون المغرب !! وبثقه كملت : اذا نعست انت وماما خلاص روحوا ناموا انا ابغى احضر قطعت كلامها وركضت بسرعه للغرفه لما وقف ابو سعود : حسبي الله ! وش هالبنت هذي ؟! انا أعرف العيال على الساعه 8 ينامون ! وهذي طقت الساعة 1.30 بالليل وهي صاحيه ! وفاتحه عيونها مثل البومه تجح فينا !! ضحكت ام سعود على تعليقه وناظرت عائشه للي رجعت وقفت وهي تتخصر : اذا انا بومه أنتم امي وابوي !! يعني طالعه لكم ! ام سعود مسكت أبو سعود وهو ناوي يعطيها قرصة إذن : اتركها تراها صغيره ! باكر تكبر وتعقل !! تذكر نهى واسماء نفس الشيء وهم صغار ! تعوذ من الشيطان وجلس وهو يتوعد لو رجعت مره ثانية الا يكفخها!!! ** ** ** ** ابو راكان بمجامله : وينك يا خلف ما تنشاف ؟! قلنا نيجي نشوفك ! ام عمار لوت بوزها وبنفسها وش تبغى بشوفته للي تغث !! خلف ما فاته شكل ام عمار بس طنش ورد : والله مشاغل يا عمي،! ابو عزام باستغراب : علامك تركت تجاره الحلال؟! خلف : التجاره بالسيارات افضل !! ابتسم عزام بسخريه متأكد من فشله ! ام عزام بحب اخوي : الله يوفقك ! ام راكان : اخوك محمد نازل بالعطله هنا!!) خلف هز رأسه : احتمال كبير ! ام راكان : وأمك للي رافضه ترجع وابنة شريكتها هنا ! خلف بدون اهتمام : مصيرها تتقبلها !! ما تلومنا حنا ما لنا دخل ! تزعل على زوجها للي قاطعه ابو راكان بضجر : بالله تقفلوا هالموضوع ! دخلت تركض متحمسه وقفت لما كلمها خلف : ليه تركضين؟!، ساره متحمسه كثير : ابغى آخذ عصير واروح للعرس قبل ما ينتهي !! الكل عقد حواجبه باستغراب : عرس ؟!!! ساره ناظرتهم وابتسمت بفرح : عرس سلمان !!! ** ** ** ** سلمان واقف وماسك بيدها قاطعتهم ليان : خلاص الحين تنزلون عن الكوشه علشان تتصورون ! سلمان يمثل بثقل : ما نبغى صور ! عمار باعتراض : لا ابغى اتصور مع اختي !، سلمان : لا قال انا برفض الصور والحين نروح للبيت يلا جودي تعالي قطع كلمته لما حس بالنعال بنص وجهه ! ناظر جهة الضربه ونشفت عروقه من الخوف وهو يشوف العائله كلها متواجده تناظره والشرار يطلع من عيونهم وخاصه خلف !! بلع ريقه وغمض عيونه وهو يتشهد وبعدها ما يدري من وين تجيه الكفوف والرفسات !! ** ** ** بعد ما نالوا للي فيه النصيب جلس خلف وهو معصب: هالكلاب هذي نهايتها ؟!! ام راكان ما تحب احد يمد يده على الاولاد تكلمت بقهر : الخطأ راكب بناتك طول الباب ويلعبن مع العيال !! خلف بغضب : وقسم بالله للي اشوفها طالعه بدون غطاء إلا أكسر رأسها !! الحق على امهن قاطعته ام عمار تقهره : ما صار شيء تراكم مكبرين الموضوع ! البنات عقلهن طفولي ويلعبن ببراءه !! ابو عزام بحده : اوكي البنات صغيرات ؟! والعيال صغار ؟! ابو راكان بتوعد : حسابهم عندي ! وش هالمسخره هذي؟! متى يكبرون بعدهم يراكضون ويلعبون مثل البزران !! ام راكان بدفاع : اوه وبعدين ؟! تراهم صغار وش فيها ؟! عزام بكشره : بالله يا جدتي لا تدافعين عنهم تراهم زودوها طول وقتهم لعب لعب !! وهذي اخرتها الله يستر منهم ؟!! خلف قاطعه بقهر : انا ما قهرني إلا عمار الحمار !! ابتسم عزام بدون نفس وناظر ساره جالسه تناظرهم بهدوء : وانت وش دورك بالعرس ؟! اسيل وهي كاتمه ضحكتها : توزع عصير وحطت يدها على فمها تكتم ضحكتها وهي تتذكر شكل سلمان ماسك يد جوري وفرحان وجوري عامله نفسها مستحيه وفجأه النعال بنص وجهه ساره ابتسمت بهدوء : ليان قالت لي اكون الطقاقه !! خلف بغضب : قفلي حلقك وانقلعي للغرفه احسن ما اكسرك مثل الحيوانات للي بالداخل !! ناظرته باستغراب ما عملت شيء ! وبسرعه ركضت للغرفه لما صرخ عليها !! ابو راكان بلوم لخلف : ليه تصرخ عليها كذا ؟! ام عمار بقهر : ابو طبيع ما يجوز عن طبعه وتركتهم وتوجهت للمطبخ !! ** ** ** ** مرت الايام وحصلت ساره طراق من جودي وليان والعيال لانها بنظرهم هي للي فسدت عنهم !! لفت ساره الحجاب على رأسها من بعد ذيك السالفه ممنوع وحده تطلع بدون حجاب وممنوع اللعب مع العيال !! ام عمار ابتسمت لها : يا عيني وش هالقمر ؟! ابتسمت ساره وهي تعدل الشاله : عمي عزام يقول لي قمر مخسوف ! وش قصده !! ام عمار ابتسمت على كلامها: يلا جهزي نفسك اخوك محمد على وصول ابتسمت ساره بتوتر من لقاء اخوها !! كيف رح يكون فض وعصبي مثل خلف ؟!