أقدار - الفصل 15 - بقلم ضاقت انفاسي - مكتملة | روايتك

ام عمار وهي ترتب البيت صرخت : بسرعه يا جودي ! عمتك اميره على الطريق بسرعه خلصيني !! جودي بطفش : كله علي ؟! ام عمار وهي تشوف ساره ترتب معها : الله يسعدك يا ساره ! يا ليت تتعلمين منها يا جودي ! جودي بغيره وقهر: لو ابني لك قصر ما عجبك ! دخل خلف مبسوط لأول مره : جهزتي الضيافه ؟! ام عمار بدون نفس : ايه جهزتها ! خلف عفس ملامحه بكره:علامك تقولينها كذا ؟!، ام عمار لوت بوزها : كيفي ! خلف بتوعد :،يصير خير ! طنشته متأكده ما عنده سالفه ومو طالع بيده شيء اهلها عندها وإلا متأكده لو يستفرد فيها كان شافت نجوم الظهر !! دخل عمار البيت مستعجل : عمتي وصلت ! مسكه خلف من إذنه: متى تعقل وتصير رجال ؟! تراكض مثل البزران ! عنبوا إبليسك فشلتني وما صرت رجال مثلي !! ام عمار بنفسها يبقى بزر ولا يصير رجال مثلك امحق رجال !! قاطعهم دخول اميره مبتسمه : السلام عليكم خلف بفرح وبخاطره أخيرا بفتك من حمل زايد ومصاريف : هلا هلا والله بأختي العزيزه نور البيت ! رفعت حاجب اميره بتشكيك من متى هالترحيب ؟؟ السلام يا الله يرده عليها حتى لما تزورهم ما يجلس بالبيت !! وش للي استجد عليه ؟! اكيد عليه حراره ! ومع ذلك جاملته وابتسمت له : الله يطول بعمرك ! وبعدها سلمت على ام عمار وتقدموا البنات وسلموا بخجل ! تقدمت ساره من اميره بابتسامة خجوله سلمت وقبلت رأسها ! ما تنكر الصدمه للي تلقتها وهي تشوفها كبيره بالسن !! كل إخوانها كبار بالعمر ! معقول ما في اخ او اخت بعمرها ! خلف ابتسم بسخريه : هذي أختنا المنتظره ! طالعتها اميره بتفحص وبعدها ناظرت خلف : تعبت من الوقفة خلينا نجلس ! جلست اميره تسولف مع ام عمار وخلف وبعض التعليقات على العيال ! كان تهميش واضح لوجود ساره ! اما ساره كانت تناظر اميره بتمعن وتبتسم بسعاده لوجود أختها بالرغم من فارق السن ! خلف وهو قاعد على نار : وش رأيك بالعنزه الجديدة ؟! وأشر بعيونه على ساره للي توزع ابتسامات أميره بدون ما تناظر ساره تكلمت بوجع: والله يا خلف ما لي نفس اشوفها واتذكر الماضي ونكده ! ام عمار تضايقت من تشبيه خلف تكره اسلوبه الهمجي المتخلف ناظرت أميره : البنت ما لها دخل ! اميره هزت رأسها بتفهم : أدري ما لها دخل ! خلف انتفخ وجهه لما حس من كلام اميره رفض لوجود ساره وبغضب: بس هذي أختك مو أختي لوحدي ! الشاطر رماها علي اشوف !! أميره باستنكار : وش تبغى أخذها عند زوجي واربيها وانتم يا إخوانها جالسين! وإنت تعرف ما أطيق البزران ما صدقت عيالي يكبرون والكل يعرف هالشيء! أم عمار بهدوء: بس ساره غير ! بنت هاديه ومطيعه ورح ترتاحين معها ! اميره عفست ملامحها باعتراض: اشوف تبغين تتخلصين منها وترمينها علي ! بما إنها مطيعه خلها عندك ! ومطت شفتها بانتصار! ام عمار عفست ملامحها بضيق : لا تظنين اني متضايقة من وجودها بالعكس ساره حبوبه واعتبرها مثل بناتي ! ناظرتها ساره وابتسمت على كلامها متأكده يتكلمون عنها بس مو فاهمه وش السالفه بالضبط ! خلف بقهر : مو على كيفكم ! اميره انقهرت منه والحين عرفت سبب هالترحيب يبغى يدبس ساره فيها بس حامض على بوزه تكلمت وهي رافعه حاجب : لا تنسى زوجي عندي تبغى يقول وين إخوانك عن اختك راميينها ؟! خلف كتف يدينه وهو ماسك نفسه : طيب ما تبغينها على الاقل ساهمي واشر لها بالابهام والشاهد دليل على الفلوس ! فهمت من حركة اصابعه يبغى فلوس ردت وهي ماسكه نفسها من طمعه وجشعه : وش تبغاني اقول لزوجي اعطيني فلوس لأختي أخوي عجزان عن مصروفها ؟! تبغى تفشلني عند زوجي ؟! ناظرها بنظرات ناريه وبخاطره الله يفشلك انت وزوجك من زينه عاد ! ام عمار راحت تجهز الشاهي وراحت خلفها ساره تساعدها ! خلف خلاص قفلت معه : والحل ؟! اميره هزت كتوفها ما لها دخل : وش اعمل لك ؟! وبعدين وش رح يزيد مصروفها عليك ؟! اكلها من اكلكم ؟! وابتسمت بسخريه ! انقهر منها كان حاط كل آماله عليها تأخذ ساره ! عض شفته بقهر منها اميره بنبره هاديه : وبعدين لو تدري امي اني أخذتها الا تزعل مني ومو مستعده اغضب امي علشان هالمتطفله! ناظرها وللحين مقهور منها وبخاطره والله ما احد متطفل غيرك يا حشره يا بقره يا قاطعهم دخول ام عمار بالضيافة ! مد بوزه بغضب وهو يشوفها ترتشف من الشاهي يقال برستيج وحالتها حاله وبخاطره جعلك بالسم للي يهريك ! قال برستيج ! يرحم ابوك لما كنت تشربين من حنفيه الحمام ! الحين صايره برستيج مالت عليك وعلى زوجك الاهتر الحيوان ! قاطعته وهي تبتسم بطريقه قهرته : علامك تناظرتي وكأني ماكل حلالك ؟! كتم غضبه وهو يخزها : ولا شيء ! اميره شرقت بقطعة المعمول كحت بسرعه توجهت لها ساره بالمويه خلف ناظرها وابتسم بشماته وبخاطره تستاهلين وبمجامله : اشربي مويه ! شربت اميره وخزته بعيونها وبخاطرها ما احد نقم عليها غيره جالس مثل البوم يجح فيني ! والله لأكون شوكه بحلقك يظني هبله يضحك علي ! هذا الناقص اتفشل عند أهل زوجي ! خلف بمحاولة اخيره : طيب خذيها بس اسبوع قاطعته بحده : ولا يوم مستعده أخذها ! شد قبضة يده بقهر ماسك نفسه عليها فقعته تابعت كلامها : ترى امي كلمتها البارحه وتقول مستحيل ترجع وهذي هنا ! خلف انفجر : وبعدين ؟! وين اروح فيها ؟!! حسستوني اني مخلفها !! خافت اميره من عصبيته : انا وش دخلني هبيت فيني؟! خلف بغضب: الشاطر يقول ما لي دخل ! ووقعت برأسي ! خلاص خليها عند محمد علشان ما تشوف هالبومه! واشر على ساره ! استغربت ساره ليه يقول عنها بومه ! ام عمار تهدي الوضع : هدي شوي ! خلف بعصبيه : هو للي يشوفكن يبقى فيه عقل ؟!. قسم بالله تطلعون الواحد من ثوبه ! اميره بتفكير : طيب ما لها اخوال؟! خلف ناظر ساره بحده : أخوالك وين ؟! ساره ببراءه : قصدك خالي أخو أمي ؟! خلف بغضب : ايه خالك اخو امك !! ساره ببراءه : الكبير والا الصغير ؟! خلف بنفاد صبر : الكبير الصغير الزفت اي واحد فيهم !! ساره ابتسمت ببراءه : ما عندي أخوال ! ولع من هالغباء وبصرخه : انقلعي قبل ما ادفنك وقف وسحبها من طرف ثوبها وبصراخ: ليه تسألين الكبير او الصغير دام ما عندك ! وش هالغباء يا ربي ؟! ودفها بقوه : انقلعي على الغرفه ! تضايقت اميره من اسلوبه مع ساره متأكده كل عصبيته ما يبغى يصرف فلس واحد ! تكلمت بقهر منه : تعال اجلس ابغاك بسالفه ! ناظرها بعصبية وجلس وهو يزفر بغضب: نعم ؟! ابتسمت بدون نفس :،اسمع انا مستعده ارسل لها مصروف شهري وناظرت ام عمار : أي شيء يخص ساره من ملابس ومصروف كله علي ! خلف حط رجل على رجل مو عاجبه : وش تفرق ساره عن ليان وجودي ولا مره شفتك صرفتي عليهن فلس واحد ! وإلا هذي اختك وحنيتي عليها ! فتحت عيونها بصدمه صدق انه حيوان وبخيل وما يستاهل ! لو تلف العالم ما تلاقي بجشعه وطمعه ! يبغى اصرف على عياله وهو جالس لكن هين يا خلف المتخلف وقفت بعصبيه واخذت شنطتها : اقول لك ما رح اصرف لا على ساره ولا غيرها ! وما لي دخل بأحد جعلكم بالطقاق ! وتركتهم متجاهله نداء خلف خلص طق قلبها من تخلفه ! ضرب جبهته بقوه خسر عرض من الاخر بسبب جشعه وطمعه ناظر ام عمار تناظره بشماته : الله يأخذك كله منك ! ضرب الارض بقوه : كلكم ترفعون الضغط حسبي الله عليكم !! ام عمار بشماته ابتسمت وبخاطرها تستاهل من هالحال واردى ! ** ** ** ** في اليوم الثاني جالسه بالفسحه مع عائشة وتبرر موقفها : ما عندي اخوال ! من وين اجيب اخوال ! عائشه عفست ملامحها بقرف : لانه غبي ما يفهم ! ساره بضيق: الظاهر زعل مني لأنه ما عندي اخوال ؟! عائشة : بالطقاق خله يزعل ويطق راسه بأقرب طوفه ! فتحت ساره عيونها باستنكار: لا لا هذا اخوي عيب ! مالت شفتها عائشة : وش يعني اخوك ؟! المهم ليه يبغى اخوالك ؟! فتحت فمها بفهاوه: ها عائشة بتفكير : اكيد يبغى يرسلك لهم ! ساره ابتسمت على عائشه : اقول لك ما عندي اخوال كيف يرسلني لهم ؟! عائشه : تراك خبله الكل يضحك عليك ويتمسخر عليك وانت فاتحه فمك وكأنه مصيده ذبان !! ساره هزت رأسها بالرفض : لا عائشة قاطعتها: إلا بس انت ما تدرين عن هوى دارك ! صحيح ما قلت لك بابا يبغى يدرس تستر!! عقدت حواجبها ساره بعدم فهم عائشة وهي تحرك يدينها بشرح: يا غبيه تستر يعني بصير ءءءءءء سكتت ما عرفت لأنها نفسها مو فاهمه شيء وبسرعه غيرت الموضوع : بعده الغبي يجيبك المدرسه ؟! ابتسمت ساره : ايه عزام عائشه بطمع طفولي : ما قال لك انه يبغى يجيب لي لعبه ثانيه ؟! ساره هزت رأسها بالرفض : لا ما قال ** ** ** ** واقف قدام باب المدرسه بضجر حاطينه سرفيس محسسينه إنها ابنته وهو ما يدري ؟! متى ينتهي الفصل وينقلونها مع اخواتها وتنقلع من وجهه ! نزل القزاز لما سمع طق على القزاز : مرحبا ابو الشباب ! رد بطرف خشومه متعمد: نعم ؟! عائشة بفشيله : كذا تستقبلني وانا من زمان ما شفت خشتك ؟! عزام بضحكة قصيره :وش بغيتي ؟! وناظر ساره واقفه جنبها وتوزع ابتسامات: انت اركبي بسرعه ! هزت رأسها ساره وركبت بهدوء رجع ناظر عائشة : بسرعه وش بغيتي؟! عائشه ابتسمت وبانت اسنانها المقلوعه: اللعبة للي اعطيتني إياها طول الوقت تبكي ! رفع حاجب باستخفاف: والله ؟! اجيب لها رضاعه ؟! عائشه بابتسامة عريضة : لا تبغى لعبة ثانيه تلعب معها ! عزام خزها بعيونه: كأنه خلف قدامي ! اقول انقلعي من هنا اشوف ! وحرك السياره مطنشها : والله حاله! وش هالناس هذي ؟! ناظر ساره بالمرايه بعصبيه: متى يخلص هالفصل ! ساره ابتسمت ببراءه: إسأل الابلة سعاد هي تعرف ! عزام ناظرها بتوعد : تتمسخرين علي ؟! ناظرته باستغراب علامه زعل ! وقف السياره قدام البيت وقبل ما تنزل سحبها من اذنها : مو انا للي تتمسخرين عليه ! ساره بتبرير : والله ما اعرف ابله سعاد تعرف ! ترك اذنها بقرف فعلا انها خبله وعقلها ضارب : انزلي خلاص انزلي ! ناظرته وابتسمت : مو زعلان علي لاني ما اعرف متى ينتهي الفصل ! شد ثوبه بقهر : اشق الثوب واطلع منه ! وش هالهبل هذا ؟! وبصرخه : انزلي ! نزلت بخوف من صرخته وتوجهت للداخل وهي تركض بعد ما دخلت ابتسمت براحه وهي حاطه يدها على صدرها ** ** ** ** ابو سعود جالس يدرس فيها وارتفع ضغطه منه : يلا لماذا شربت سعاد الحليب ؟! عائشه : قصدك ابله سعاد ؟! ابو سعود ضغطه ارتفع : لا سعاد للي بالدرس مو ابلتك !! فتحت فمها بفهاوه : هاه ظنيتك تسألني عن ابله سعاد!! تدري بابا هذي الابله ما احبها دوم لما تشوفني تصرخ «ادخلي على فصلك » ابو سعود خزها : اتركينا من ابله سعاد وجاوبي ! عائشة عفست ملامحها بتذكر : وش السؤال؟! ابو سعود ماسك نفسه : لماذا تشرب سعاد الحليب ؟! هزت كتوفها : وش يدريني عنها؟! ما قالت لي ! ابو سعود نفذ صبره : بالدرس مكتوب هذا هو تشرب سعاد الحليب لانه مفيد قاطعته : ايه تذكرت بابا ابو سعود ارتخت ملامحه : الحمد لله انك تذكرت يلا قولي ؟! عائشه بفرح : خلف اخو ساره يدور على اخوالها صرخت بوجع لما انضرب الكتاب برأسها : انكتمي يا زفته ! لي ساعه اشرح لك وانت عقلك مع ساره الزفته ! عفست ملامحها وبدأت تبكي ابو سعود بصراخ: ولا نفس انكتمي ! ما اسمع النفس !! تخصرت ودموعها تنزل: يعني اموت وتكورت على نفسها: كلكم ما تحبوني وتضربوني وتصرخون علي ! سحبها من يدها وهو عارف عائشة وافلامها : كملي الدرس وبعدين اعملي هالفلم خلصيني! طالعته بقهر :-يعني شو شو كله دراسه دراسه دراسه ابو سعود طنشها ومسك الكتاب : ماذا تتناول سعاد بوجبة الافطار؟ عائشة بقهر : زفت بحلقها وش دخلني فيها؟! جعلها تموت وانفك منها ! اقرفتوني ماذا تشرب سعاد وماذا تأكل؟! كتم ابو سعود ضحكته عليها ام سعود جلست : احفظي الدرس علشان ما نقرفك ! ناظرها وهو ماسك ضحكته: بسرعه جاوبي قبل ما اجيب العقال ! عفست ملامحها بقهر وهي نفسها تمسك هالسعاد وتطلع حرتها فيها !! ** ** ** ** كمل دوامه بالجامعة وتوجه للبيت وهو قرفان نفسه من ضغط الدراسة دخل وشاف سلمان وعبد الرحمن يلعبون بلايستيشن وبعصبيه سحب السلك : كم مره قلت لك ممنوع اللعب حتى تكمل حل واجباتك ؟ سلمان بقهر: خلصت واجباتي! عزام بحزم : بسرعه كل واحد يقابل كتبه اشوف ! ما عندكم امتحانات؟! عبد الرحمن باعتراض: يعني كملنا وش نجلس نأكل الكتب ؟! عزام :-مو غلط تأكلهم يمكن يصير فيك فائده!! سلمان وهو شاد على يده :شاطر علينا شوف نسرين 24 ساعة على التي في وما احد يقول لها شيء ! عزام بحزم : كلامي واضح بسرعه كل واحد يقابل كتبه ! طلع سلمان بقهر وخلفه عبد الرحمن ناظرهم وهم طالعين ورمى نفسه على الكنبه بتعب اهم شيء عنده الدراسة يكره الاغبياء يبغى اخوانه يكونون من المتفوقين! بس اللعب شاغل بالهم ! دخلت ام عزام البيت وجلست عنده : يعطيك العافية يا يمه ! عزام ابتسم مجامله: الله يعافيك ! عند جدتي كنت ؟! ام عزام : لا والله عند عمتك ام عمار ! البارحه كانت خالتك اميره عندهم ! تخيل وخبرته بكل شيء صار ! عوام ابتسم بسخريه : يعني خالي خلف ما يعرف خالتي اميره ما تطيق البزران ! ويبغى يعطيها ساره !! وميل شفته بسخريه ام عزام : المشكله امي رافضه ترجع وساره موجوده !! عزام عدل جلسته :،بسيطه يرسلها عند خالي محمد وهي ترجع بيتها!! ام عزام بسخريه: الحين تظن زوجة خالك محمد تهلي وترحب مثل ام عمار !! الحين تلاقيها هي وامي مثل الديوك ! اوام عمار تقول انه خلف يقول لو لها اخوال كان ارسلها لهم ! عزام مسح على وجهه بتعب : ما علي منهم ابغى الحين الغداء ميت جوع! ام عزام وقفت بابتسامة : يخسى الجوع ** ** ** ** جالس بمكتبه وهو ماسك نفسه : يا خلف ما يصير وش هالكلام ؟! خلف بعصبيه : ام عمار قالت لك ؟! ابو عزام: لا اميره قالت لي ! تبغى تفضحنا عند اهل زوجها يقولون عنا مو قادرين نصرف على هالبنت ! خلف بقهر : ايه مو قادرين نصرف عليها ! الكل رفع يده عن الموضوع وكأني الملزوم فيها ! ابو عزام يخفف من نبره صوته: يا خلف هذي اختك قاطعه خلف : وهذي ابنة عمك وابوك عمها ! ابو عزام بهدوء: خلاص اليوم اخذها عندي وانسى انها اختك ! رح اعتبرها وحده من بناتي وأحتسب الاجر من ربي! خلف بقرف من هالموضوع ويكره المثاليه للي يحاول يظهر فيها ابو عزام : الخلاصه وش بغيت؟! ابو عزام انقهر من رده : ولا شيء خلف : خلاص خذها عندك ومبروكه عليك بس لا تيجي باكر تشتكي منها ! ابو عزام فتح عيونه باستنكار: انت بعقلك كل واحد يقول لك اخذها خلف بغضب يكره المثاليه الزائفه بنظره: شفت بس مجرد كلام ! تيجي فوق رأسي تغثني بالمثاليات وانتم شغل الكلام وعند الفعل ما نشوفكم ! على كل حال اختي عندي وانا بحل موضوعها سلام وقفل الخط ناظر ابو عزام الجوال بقهر من اسلوب خلف! مع إنه كان جاد بالموضوع بس استنكر طريقه خلف اي واحديقول له شيل ؟! وش هالناس هذي!! ما يدري ام عمار كيف متحمله للحين ؟!!!! ** ** ** ** جودي وهي ترقص بفرح : ماما مو هنا ماما مو هنا ! ليان نطت بفرح :-وش رايك نرقص ؟! جودي مطت شفتها بسخريه : ما تعرفين للرقص ! ليان مسكت ريموت التي في حق الصاله وصارت تدور بالقنوات: الحين تشوفين رقصي! استقرت على قناه جودي ما عجبتها وحاولت تسحب منها الريموت كل وحده تشد بأقوى ما عندها ! ليان وهي تسحب فيه. وشاده على اسنانها: هاتي يا حيوانه! جودي شدت اقوى وما بين المد والجزر بحركه غير متوقعه طار الريموت بالجو ارتفعت الانظار عليه والشاطره تبغى تمسكه قبل الثانيه ! وسرعان ما صرخت جودي لما شافت الريموت ضرب بالفازا خلال ثواني كانت الفازا قطع متناثره على الارض شهقت جودي وليان حطت يدها على فمها بخوف وعيونها طلعت من مكانها من الخوف نزلت جودي للارض ومسكت قطعه من القطع المكسوره رفعت رأسها برعب لما شافت خلف واقف يناظرهم والنار تطلع من عيونه معصب وبصراخ : جعلكن للكسر ! مين للي كسرته ؟!!! جودي وقفت برعب ورفعت اصبعها وهو يرجف واشرت عليها فتحت ساره عيونها باستنكار : انااااااااا *** *** ***