مبعثرة فيك ~ - الفصل الثالث عشر والرابع عشر - بقلم مجهول🖤 | روايتك

رواية مبعثر فيك : الفصل الثالث عشر : غاده .. كانت جالسه في الممر .. بتوتر .. وقلق .. وكانوا ماخذين امها لأشعه مقطعية .. ومره طولت .. وصلتها رسالة .. عقدت حواجبها .. وهي تشوف تحويل مبلغ كبير لحسابها من شاهين .. ! ظلت شوي وجاتها رسالة واتس منه: لاتقصرين ع الوالدة بشي .. شوفي وش تحتاج . . في علاجها .. ولو تطلب الوضع علاجها بالخارج .. انا اقوم فيه ..انتي لاتشيلين هم شي .. ارتجف الجوال بيدها .. كيف يبيها تطلع من حياته .. من يفكر فيها نفس شاهين .. من يسندها نفس شاهين ..! من يمسكها قبل تطيح نفسه .. مافيه ..! حتى اخواني جاوو قبل تنتهي الزياره بربع ساعه ومشوا .. ارسلت ..: ماتقصر شاهين .. بس المبلغ ماراح اقبله .. امي علاجها نفسه هنا وفي اي مكان .. بس هي اللي صارت ضعيفه ع العلاج .. وبعدين المستشفى اوك خاص .. بس يعالجونها ع التأمين .. لو احتجت .. بطلبك .. وراحت رجعت له التحويل .. عن طريق تطبيق البنك .. وسكرت الجوال .. شاهين واللي كان يشيش بالمزرعه .. مع نواف ..تنهد بضيق .. فعلا ً صاد قلبه عن غاده .. ومايبي يفتح معها اي باب .. مكتفي بجمان .. ورجعتها له .. ومايبي شي يعكر صفوهم .. بس ماقدر يصد عن غاده واحتياجها له في مرض امها .. نواف : وش فيك .. صاير شي .. شاهين : ابد .. بس مخربين الجدول شوي .. عيد زواجنا قريب .. ودي اسوي مفاجئه لجمان واسافر بها .. بس ماراح يحصل .. عندي رحله بعد ايام قليله من التاريخ .. نواف وهو يشيش : تعوضونها ان شاء الله .. ماعليه .. شاهين :على خير .. قولي اخبار فارس هالايام .. نواف بتفكير : مادري .. فارس .. قاعد يخبي عني امور .. وماهي عوايده .. شاهين : هو قطع الشيشه صدق ..؟ نواف باستخفاف : يقوول ..! شاهين : وليه تقولها كذا .. دامه قال صدقه .. نواف : شاهين .. فارس مو بعيد عنا وعن اطباعنا .. فينا رس العناد ..واللي بروسنا نمشيه .. حتى لو بحركات ملتويه .. شاهين : يابن الحلال .. احسن النيه .. فارس طينته طيبه .. ومايحب يزعل ابوه .. نواف : نقول ان شاء الله .. عاد هو طالع الليوم .. رمى اغراضه على مرت ابوه ومشى .. نشوف .. اذا صامل ولا ..اذا جا وماشيش .. بحسن النيه فيه .. ضحك شاهين : اعوذ بالله .. ........ وصل سيف .. بعد المغرب .. وصل نوف لبيته .. لانها تحججت ان خواتها بيتشمتون فيها .. ان رجعها ع طول .. ماكان يبي يتناقش معها .. نزلها الفيلا ومشى .. دخل بيتهم .. كانوا امه وخواته موجوديين.. وسيف وبنات جمان ..يلعبون.. سلم .. وسيف جاا له ركض : اووووبه ... لقفه وشاله .. وببتسامه: هلا الشيخ .. سيف ضمه: اين لحت ..؟! .. سيف جلس وحطه ع حضنه: رحت للعمل . قل لي وين امك .. وين فارس .. ؟! سيف يهز كتوفه : فالس .. ادلي .. بره .. ماما فوق .. اللتفت عليهم : وينه فارس ..؟! موضي :جا من المدرسه وطلع مع الذياب .. عاد مسيكين من رحت انت وهو مايطلع الا للمدرسه ..الليوم بس طلع .. سيف واللي كان باين مرهق .. دق عليه .. وجواله مغلق .. : مقفل جواله .. متى كلمتوه.. موضي : كلمني اول ماراح .. وقال لي .. مابغيت ادقدق عليه واحرجه عند ربعه .. اكيد فضى الشحن .. ومامعوه شاحن .. سيف .. ماعلق .. جمان غمزت بعينها له : ومهره فوق .. قم سلم عليها .. وارتاح .. باين انك تعبان.. ابتسم .. ونزل سيف من حضنه .. : تمام .. مهره فوق .. كانت متوتره وهي تدق وتدق على فارس ولايرد .. وكله مغلق .. عاد هو اول ماوصل رسل لها واتس .. ملصق استياء .. وكتب تخيلي تيم ال** موجود .. مهره توترت وكتبت له : خلاص ارجع فارس .. لاتظل .. كتب: ماعلي منه .. مهره: فارس عشاني .. ارجع .. كتب لها : لاتحاتين .. هو اصلا ً باين بيمشي .. مهره واعصابها على المحك .. مرت الساعات .. ولا جاا .. ولايرد .. سيف_* *دخلت الغرفه .. مرتبه .. ورائحتها عطور .. وفيه ورد بالفازات .. لكن .. لم تشعل مهره ولا شمعه .. وبصراحة لم يكن يلزم ذلك .. كانت واقفه هناك .. وحدها تكفي .. وحدها كل شموعي ..! لم تنتبه لدخولي .. كانت بثوب مخمل رقيق .. داكن ..رسم تفاصيلها .. اللتي تخفيها دائما ً عني .. شعرها ينساب على ظهرها .. ولونه الجميل يتجانس مع ماترتديه .. كنت امشي نحوها .. واصدرت صوت في خطواتي .. فالتفتت مهرتي .. وطالعتني بعينان برزتا بالكحل .. وشفاه منفرجه دهشه .. جننتني .. !..* مهره والجوال بيدها.. راحت بخطوات سريعه له .. وقبل تتكلم .. راحت عانقته .. لفت ذراعينها خلف رقبته .. وتشبثت فيه .. سيف وقلبه ..يخفق .. يكاد يُسمع ..راسه عند رقبتها .. المكان اللذي يظل طريقه فيه .. وينسى هويته .. راح خانق جسدها بين ذراعيه وضمها بشوق اكبر .. حسته مهره رفعها عن الارض وهو يهمس في اذنها : انتي وش تبين تسوين فيني بالضبط .. ؟! همست وهي تخبي وجهها برقبته: لاتخليني وتروح عني .. لاتخليني ثاني .. لحظة صمت مرت . مهره تخفي نفسها فيه .. عن توترات نواف .. ومخاوفها .. تبي تسيطر على عصبيتها من اختفاء فارس وعدم رده .. تبي تستشعر انه قريب وبيحل كل شي خايفه منه .. سيف .. يحتفظ فيها اكثر في حضنه .. عقله يغيب عن كل شي .. يستشعر ..عظمة النعمه في امتلاكها .. مشى فيها .. لمن نزلها ع السرير .. رفع راسه .. وهي في محيط ذراعيه .. نزل راسه وقبلها بشغف .. مهره متشبثه بقميصه .. غارقه في جنون القبله .. والوله .. ! غارقه في عشقها .. ناسيه كل شيء .. بعد سيف وابتسم .. وهو يبعد خصلاتها عن وجهها .. طالع عرقها النابض في رقبتها .. يكاد يجرح جلدها ويخرج .. صدرها يعلوو ويهبط .. وانفاسها منقطعه .. همس بعبث : قلبك يبيني .. ومو خايف مثل هاك الليوم .. مهره تحاول تستعدل .. بس منعها .. : خليك ..انا على الوعد .. رفعت يدها لراسه .. غرست اصابعها في شعره ..كانت تبي تقوله كل شي .. وتشكي له .. عن الماضي والحاضر .. بس انعقد لسانها .. سيف : انتي ناذره .. تاخذين عقلي .. طالعه تجننين .. وفوقها .. تبين تبعدين .. مهره بخفوت واناملها تتحرك في رقبته وشعره .. : جُمان ..جت واصرت الا البس هالفستان .. وضبطت مكياجي وشعري .. رفع راسه يطالعها .. كيف عيونها تجنن بالكحل .. نزلت عيونها مو قادره تحدق بعيونه اكثر .. : يعني مازيني الا المكياج .. ترى كلها كحل وروج ..امسحه اجل وارجع هولا .. ضحك وهو يمسك معصمها ويثبتها ع المخده .. : من الهولااا .. من .. بالله انتي خالقك ربي عقوبة لي .. انتي انتقام لكل حد ظلمته بحياتي .. ورب الكعبه انتي دعوة مظلوم ..ووقعت علي .. توسعت عيون مهره .. وبفهاوه وبراءه : انا ..؟!! سيف : ايه انتي .. من غيرك .. لعبت فيني لعب ..بس الله حسيبك .. مهره ببراءه ونظره حايره: وانا ايش سويت ..؟! رفع حاجب .. وبتهديد : زيدي زيدي بهالنظرات ...والله اجيب العيد فيك .. مهره ابتسمت .. ورفعت راسها باست طرف خشمه: وارحب يابعد راسي .. سيف عض شفته .. وقام نزل يده عند خصرها .. مهره بتحذير .. : انت قلت ع الوعد .. سيف : مهره تراك مو خايفه .. مهره تبي تستعدل : الا والله خايفه .. شفني قمت ارجف .. سيف انصدم : ايش هالنصب والاحتيال .. رن جوالها .. اللي كان جنبها ع السرير .. يقطع اللحظه .. ويرجعها .. لقلقها على فارس .. استعدلت بسرعه وهي تبعد سيف وتاخذ الجوال .. كان السواق رشيد يتصل .. لأن الحل الاخير .. ارسلته مهره .. لاستراحة ذياب ..يشوف فارس .. سيف مسك معصمها : وش تبين تردين .. هذا وقته .. مهره بعجله: مرسلته عشان شغله .. ضروريه .. ثواني بس .. ردت : هلا رشيد .. رشيد وصوته ينسمع مع ان الجوال في اذنها : مدام .. فارس مافي استراحة ذياب .. صديق انا هناك كلام .. فارس روح ساعة ثلاث عصر .. مافيه .. توسعت عيون مهره .. وهي تقوم وبخووف : كيف رشيد .. طيب ذياب .. مافي موجود .. رشيد : فارس .. ذياب .. هذا تيم .. هيسم .. كولو روح .. سيف عقد حواجبه : وش صاير .. ؟! مهره تأشر يعني انتظر .. قالت : رشيد شوف نمبر ذياب .. من صديق انت .. رشيد : انا كلام ذياب .. نمبر سكر .. مهره تطالع سيف وتقفل الجوال .. وهو ينتظرها تتكلم .. بعصبيه: وش فيه فارس ..؟! مهره بتوتر : مافيه الا الخير ان شاء الله .. بس انا كذا اوسوس واحاتي .. قالت كذا وهي تشبك كفوفها بعصبيه .. سيف بعصبيه : مهره شسالفه ..؟! مهره مالقت مفر الا انها تقوله .. ممكن يكون فارس في مصيبه .. ولاشي .. تكلمت : جا فارس من المدرسه .. كلمه الذياب .. انو بيسون غدا بالاستراحه .. وقال لي ولانو كان مستعجل .. ماقال لجدته .. بس كلمها لمن وصل .. سيف بنفاذ صبر : اييييه .. ؟! اختصري .. مهره رفعت عيونها وبرجفه .. : رسل لي ان تيم كان هناك .. وهو بيوم اللي سافرت كان متهاوش معه هوشه كبيره .. وذاك توعده .. سيف .. قلت له يرجع .. وقال ان تيم بيمشي .. اللحين رشيد يقول انهم طلعوا سوا ..من ثلاث العصر .. هاللحين سبع .. وفارس من قبل الثلاث مايرد علي .. تعبت وانا اتصل .. لو المسئله شاحن .. مافي محل يخلو من الشواحن ..ذا اللحين .. سيف بحده وانفعال ..: الكلب قايله .. يبعد عن ولد ال *** هذا بس مايسمعني ..يعاندني السفله .. يعاندني بس انا اراويه.. مهره مسكت ذراعه وبتبكي : سيف لاتعصب منه .. والله مسكين ..شوفه .. لايكون فيه شي .. والله قلبي منقبض .. سيف ياخذ جواله .. ويدق رقم : خليني اصيده .. والله لاحسب ربي ماخلقه .. مهره ضامه كفوفها .. تطالع بخوف .. رد نواف : ارحب . بعصبية : الزفت فارس عندك.. نواف : لااا ماشفته الليوم .. باحده وانفعال: الله يلعنه .. سيف .. ياخذ مفتاح سيارته ويطلع .. وهو يتكلم مع نواف .. مهره .. تهالكت على الارض .. : ياربي اني استودعتك فارس .. ياربي من اراد به سوء فاجعل تدبيره تدميره .. ياربي .. من اراد ان يضره فاجعل كيده في نحره .. اللهم اني لا اسئلك رد القضاء .. لكني اسئلك اللطف فيه ... حست يدينها تثلج .. وقلبها ينقبض اكثر .. ........... مرت الساعات في حالة توتر وقلق على فارس اللي اختفى فعليا ً وكأن الأرض انشقت وابلعته .. مهره مع موضي والبنات في الصاله .. بلقيس قاعده قدام امها ع الطاوله : مافيه شي يمه .. لاتفاولين .. تلقينه غفى .. عند احد من ربعه .. . موضي ماسكه راسها وتبكي ..: لااا يايمه .. فيه شي .. مايخليني مايطمني ..آاااه ياقلبي يافارس .. آاااه ياعميري .. وش صار فيك .. جمان بحده : يممممه .. ! مهره بعباية وشيله .. تطلع بره وترجع ..مابقى فيها لون .. مابكت .. بس ضلوعها قربت تعصر قلبها .. الغصه بحلقها قربت تخنقها .. ! تدعي .. وتنتحب في داخلها .. انه يرجع بالسلامه .. جمان : مهره .. اقعدي .. الله يهديك .. لايجيكم شي .. سعود دخل .. وجواله باذنه : ايه هاللحين ارسلك رقم هويته .. تكفى .. تكفى .. ترى رجولنا معد تشيلنا .. يابونايف.. قفل .. ويرسل من جواله هوية فارس .. للضابط اللي يعرفه .. موضي ببكى : وش صار ياسعود .. مالقيتووه .. سعود .. : ماظل ضابط ..اعرفه الا كلمته .. ابوه وعمه وخاله .. بيجنون في الشوارع ولا لقووه .. فص ملح وذاب الله يدفع البلاا .. جمان : يالله رحمتك .. الله يحفظ وليدنا ويرده .. مهره مسكت قلبها ..وماتبي تبكي .. راحت فرت بتطلع الا فتح سيف الباب .. ومسكها .. قبل تطلع .. شاف وجهها كيف صاير ..: ويين .. ؟! مهره بعيون طايره .. وخوف: بطلع ادور فارس .. شفيكم الى الآن مالقيتوه .. والله حتى لو انه نمله ..انتوا ماتدورون عدل .. طالعت عيونه ..وبتردد مفجوع : لاااايكون صار فيه شي .. سيف يرجعها داخل..: من شوي شاهين ونواف كلموني لقووه .. موضي بصياح : ياااارب لك الحمد والشكر .. سعود تهاوى على الكنب وهو يحمدالله ويشكره .. والبنات يرددون عبارات الحمد والشكر .. ومهره طالعت وجهه الجامد .. وقلبها مرعوب .. : طيب هو ..؟! .. بخير .. ! .. سيف وباين اعصابه دمار ..والغضب لاعب فيه .. ببرود حاد :والله خوي نواف بالمرور .. كلمه .. وقال لقوه .. راح نواف وشاهين لانهم اقرب .. مهره تتشبث في ذراعه : ليش المرور .. وش صاير عليه .. صاحت : سيف شهالبرود .. ليش مارحت معهم .. سيف بحده : لاني لووو شفته هناك بدفنه بقرنته .. خلي خاله وعمه يجيبونه .. وانا اتفاهم معه هنا عن وجه الأوادم .. سعود: لا اله الا الله .. ياسيف .. لااله الا الله .. سيف بحده : يبه .. انا مخلي معكم امانه ..وش هولا تساهلتو معه .. الولد فسقان وخربان .. اجل مرور.. اخرتها مركز الشرطه .. موضي : استهدي بالله يمه .. وادعي ان ماعليه شر .. خل يجي ونشوفه .. سيف بحده : وانتي يمه .. عاجبك .. كل ماقلت باخذه معي قلتي خليه .. وهذا افعاله .. ودافعي عنه .. والله لا اوريه نجوم القايله .. جمان وبلقيس ساكتين .. قدام عصبية سيف وغضبه العارم .. ! مهره .. مو خايفه من غضب سيف وصياحه .. قد مو خايفه على فارس .. واسباب دخول المرور في الموضوع .. ! موضي : مهره امي شيلي ولدك نايم على الكنب .. لايقوم ويرتاع .. جات قدام سيف اللي منفعل ..وهمست في وجهه : سيف .. ترى كلنا قلوبنا راغت .. هد يبه هد .. ولاتتسخط عليه .. عسى الله يربط فيه ويرده .. سيف صد بوجهه .. وانفاسه متقطعه من الانفعال .. سحبت مهره جاكيته من جهة ياقته .. لمن لف وجهه عليها :تكفى عشان خاطري .. ترى امي ضغطها عالي .. من مساعه .. طالع عيونها المتوسله .. همست ثاني : انا فوجهك . . بخفوت: شيلي ولدك صعديه فوق ..ويصير خير.. تركته .. وراحت شالت سيف .. وصعدت به ..! بعد شوي .. جمان وهي تقفل جوالها : بلقيس حطي شي على راسك .. شاهين بيدخل .. موضي بهلع : الوكاد انهم جايبين خبر شين .. ياااااشيب عيني يافارس .. جمان : يممه ..الله يهديك .. مو كذا .. فارس معهم قال لي شاهين .. سيف اللي كان جالس بصمت ووجهه مايبشر بخير .. بلقيس حطة شرشف الصلاة على راسها .. ومهره الى الآن فوق .. انفتح الباب .. ودخلوا شاهين ونواف وقدامهم فارس .. ونواف اللي دفه .. : ادخل ياكلب .. ادخل .. كلهم وقفوا يشوفونه .. وموضي قبل تسرع له .. سيف وقف .. ومد يده يعني ( لاتكملين ) .. عقد حواجبه .. فارس كان راسه ملفوق بشاش .. ورقبته .. وثوبه كله دم ..عيونه ماكانت طبييعه ابد .. ولاوقوفه .. ولافهاوته .. سيف طالع نواف وهز راسه يعني : وشالسالفه .. نواف اشر بصابعه وضعية الحشيش .. ثم اشر على راسه .. يعني قصدة ( الولد مُقلع .. ومتعاطي ..) سيف انقض ناحيته : ايشششش.. شاهين وقف بينه وبين فارس : اهدا ياابوي .. الولد ترى مو في وعيه ابد .. ولا احنا حتى فاهمين وش ماخذ .. سعود : وش هاللي براسه .. هو متهاوش مع احد .. شاهين : عمي فارس صاير عليه حادث .. موضي صفعت صدرها : اااه يوووومه .. سيف واعصابه تنشحذ زياده .. وشاهين : كانو يفحطون مع ثلاث من ربعه .. قل الحمدلله ترى في واحد منهم بين الحيا والموت .. اللي يسوق واللي وراه وضعهم صعب حيل والله يستر .. سيف من بين اسنانه : ابعد ياااشاهين ... ترى ماعاد بي صبر .. جمان برجا: تكفى وانا اختك .. خليه وبكره .. تفاهم معه .. شاهين : وانا اقوله .. بكره تفاهم معه .. ترى الولد ماهو صاحي .. ويكفي اللي جاه .. سيف بدون تفاهم سحب فارس من ذراعه .. وراح مشى فيه ناحية مكتب ابوه .. موضي برجا: عشاااني يمه .. تركه .. سعود : لاتسوي شي تندم عليه .يبه. سيف بحده : ولدي.. وبتفاهم معه .. بلقيس بخوف وعبره : سيف حرام عليك .. لاتصير غلطة الشاطر بعشره .. والله فارس مسكين .. اكيد احد لعب عليه .. فارس يرفع حواجبه .. كنه يبي يركز في اللي يتكلمون .. واللي حوله .. بس واضح .. انه اصلا مايشوف زين .. سحبه سيف .. وهو يقول : اقسم بالله ..اللي بيحشر خشمه ويدخل .. لارتكب جريمه .. الليوم .. دفعه داخل المكتب .. وسكر الباب .. شوي من الكلام المنفعل والحاد اللي سمعوه .. من سيف وفارس..بعدها صوت ضربه .. وصرخه من فارس .. موضي سكرت اذانها : بلقيس قوميني .. مابي اسمع ..رجولي ماتشيلني .. بلقيس توها بتقومها.. الا مهره نازله بسرعه : وينه جاااا ...؟! جمان : ايه جاا .. مع ابوه في ... وقبل تكمل .. جات صوت ضربه ثانيه و ثالثه .. وصوت فارس يتوسل .. : تووووبه يوووبه توبه .. مهره توسعت عيونها ..وبجنون بتروح ناحية الباب: شيسوي فيه .. ليش تخلونه معه .. جمان مسكت ذراعها: لاتروحين .. سيف طالعه عفاريته ..والله يعورك .. مهره بحده اسحبت يدها :ماخليه والله لو يذبحن .. نواف جا عندها .. وبحده وغضب : ابوه ويأدبه . لاحد يحشر خشمه .. مهره بحده في وجه نواف : والله ياحسافة هالشوارب .. على وجوهكم .. متقيوين على هاليتيم الضعيف .. كل واحد يطل بجيبه ويلقى عيبه .. انصدموا من مهره واسلوبها الحاد الغريب عليهم .. وهي تروح وتفتح الباب .. سيف بكل غضبه يجلد فارس.. بالحزام .. وفارس يضم نفسه .. مهره بجنون تشوف الدم في ثوبه والضمادات براسه .. وسيف يضربه بدون رحمه .. راحت وقفت في وجهه.. ودفته بقوه عن فارس ..وصاحت فيه باهستيريا : تضربه بحزام ..بحزااام يالظالم .. اللقطت نهاية الحزام .. وبنفس الهستيريا: شووف شووف في حلقه ... والله تووجعه ..ولدك ..سيف ولدك .. ماهووو بهيييمه .. صاح في وجهها : مهره بعدي لا اوجعك .. جثت وضمت راس فارس .. وبدفاع : بتضرب اضرب .. بس والله ماهده ..والله ماخليه تحت يدك يالظالم ياللي ماتخاف الله .. صاح فيها : الكلب متعاطي مخدرات .. تراه فاقد مب صاحي .. ومفحط ومسوي حادث ..يستغفلني انه هد الشيشه .. وهو غارق بشغلات اخس .. رفعت راسها له .. وعيونها كلها دموع وكحلها سال .. وبحده : والله لو ذابح احد.. ماتكفر فيه ..لعبوو عليه .. والله فارس مايسويها ..والله وهقووه ومايسويها .. ضمته وتشبثت فيه: سيف واثقه بفارس والله .. ولدي ذا .. مايسويها ..حرام عليك ..شوفه مجروح ثوبه كله دم .. فارس بخفوت : بعدي مهره انا اتفاهم معه .. وبحده رفع عيونه : لا أحد يسوي علي شريف روما ..ماعليكم مني .. انا حر نفسي .. اسوي اللي ابي .. سيف .. مسك ذراعه يبي يسحبه من مهره.. وهي تشبكت فيه .. وتبكي .. صاحت : مب صاحي مايقصد ..والله مايقصد ... سيف بقسوة : ولك عين يالكلب ترادد .. سحبه من مهره ودفعه ع جنب : مين اللي حر نفسه . مين اللي يسوي اللي يبيه.. فارس : انا يبه .. واسوي اللي ابيه ( وسوا حركه بسبابته بخشمه) وطرررررررق .. في الصاله .. موضي حطت يديها على راسها : بيذبحه .. نواف .. شاهين يمه . دخلوا اخذوه.. مهره ماتقدر عليه .. طلع فارس من المكتب ..وبتمرد : ايه يبه.. اسوي اللي براسي وماعلي كبير .. جمان حطت كفوفها على وجهها بتوتر .. شاهين :نواف .. اخذه وصعده فوق .. نواف مسك ذراع فارس .. اللي سحبها بعنف : لاتلمسني .. عقدكم ذي .. روحوا فرغوها بالجدران ..ماسكين علي بتصير زي عساف .. سيف وقف ويدينه على خصره .. وعاقد حواجبه.. وفارس بدون وعي : يلعن عساف ويلعنكم فوقه .. كل واحد مستشرف .. على مخي .. ابوي تقول استغفلك .. وانت قاعد تستغفل مهره هالمسكينه .. سيف مو فاهم فارس وش يخربط .. مهره راحت قدام فارس .. وبتوسل : عشاني فارس .. خلاص .. بكره تكلم مع ابوك .. فارس حرك حاجبه وهو يطالعها.. : انتي مفكرته لحاله بدبي .. تراه ماخذ الساحره .. معوه.. يكذب عليك .. وانتي قاعده تبكين ع الاطلال... يامغفله .. سيف عقد حواجبه .. ومهره صاحت : خليه ياخذها .. وانت وش حارق رزك .. فارس اصعد فوق.. لاتستفز ابوك .. سيف : لا لا لايصعد .. خليه يقول اللي في بطنه ..( قال كذا وقرب منه) .. سعود : تعووذ من الشيطان ياسيف .. لاتحط راسك براسه تراه ماهو بعقله .. سيف بجمود: لا يبه اصبر .. خليه يقول اللي عنده .. مهره خلت فارس ورى ظهرها .. : سيف امانه .. اجل كل شي لبكره .. لاتسوي شي تندم عليه .. فارس بوقاحه :لاتشيش .. لاتدخن .. لاتشرب .. لاتخاوي ذا وخاوي ذا ..تراك تدخن يبه .. ونواف يشيش .. وعساف عاد اوووووه .. (وقام يضحك) .. ابوي سعود .. عاد انت ماضيك حافل .. مهره انصدمت من عيون سيف .. وعرقه اللي بجبينه ينبض .. وفارس يقول وهو يجي قدام ابوه : كلكم عندكم عيووووب لااااهناااا .. واشر على جبينه .. ويقول :غارقيييين ..بس فارس لايغلط .. وبمد : بس حششت .. وفحطت .. وطررررررررق .. سيف رفع يده .. وبكل قوته .. عطاه كف .. فارس غمض عيونه بقووه .. وموضي بصيحة : لااااا سيف .. جمان وبلقيس .. شهقوا بقووه فتح عيونه لما تنبه ان الضربه ماجااته .. الكف تلقفته مهره في وجهها لما تحركت عشان تحميه من يد ابوه .. سيف .. بصدمه يطالع نظرتها الحاده .. واصابعه اللي علمت على خدها .. عينها اللي حمرت والكدمه تحتها .. مهره بجمود : برد قلبك ..؟!!! .. بتخليه.. ولا والله بطلع فيه من البيت .. لاتفكره وحيد.. وماحد بيدافع عنه ..والله اوقف في وجهك انت واللي اكبر منك .. نواف يطالعها بصدمه .. كيف تدافع عن فارس .. بكل هالضراوة ... كلهم اذهلتهم قوتها في دفاعها عنه .. وكيف واقفه بوجه سيف .. سعود :الله يعز قدرك يامهره والله لايهينك .. امسحيها في وجهي .. يبه .. سيف.. يحدق في عيونها الحاده وجهها .. اللي تغمق الكدمه فيه تدريجي .. في ثواني .. وكيف تصير ورمه .. وتنفتح بجرح وينزل منها دم .. بعصبية : بلقيس جيبي ثلج .. مهره تلتفت .. وتمسك فارس : مابي شي .. بيض الله وجهك .. وصعدت بفارس .. وساعدته .. كان تعبان .. من الضرب اللي جاه .. والحادث ..والحشيش اللي لاعب بعقله .. سيف .. حس بصداع يداهم راسه ..ضغط على عيونه .. موضي :راضي عن نفسك اللحين .. بنت الناس ارحم على ولدك منك .. الله لايحلك ياسيف لو صار لفارس شي من ضربك .. طلع سيف وبانفعال: خلاص يمه .. خلاص .. ماني ناقصك ........... رواية مبعثر فيك : الفصل الرابع عشر : مهره دخلت بفارس غرفته .. وغصه في حلقها تكاد تدمي حنجرتها .. جلس على سريره .. ومسك راسه بقووه .. مهره راحت لدلابه تطلع له ثياب .. فارس ببكى وهو يقبض على راسه .. وكأن مخه بدا يستوعب الاحداث الي صارت ..: افففففف .. انا وش سويت .. الله يلعني .. وش سويت .. مهره جات ومعها ملابس .. مسحت دموعها بظهر كفها وحاولت تبتسم .. : بدل اللحين ونام ..وحصل خير .. رفع راسه وبفجيعه .. وعيونه تهل دموع: مهره تكومنا بالسياره .. مثل اللحم .. دمنا اختلط جميع .. كنا نصرخ .. وتيم منحشر في الحديد .. وباقي جسمه فوقي .. توسعت عيونه ..وهو يلطم وجهه : اسكتي .. ذياب .. ذياب .. شكلوو مات ..ترى ماكان بيروح .. راح عشاني .. الله يلعنك ياتيم .. كانك جبت العيد فينا ... مهره جلست جنبه ومسكت راسه ..طالعت عيونه : فارس .. ماحد مات .. ماقالوا ان احد مات .. هو بتوسل : تكفين .. تأكدي .. احس كنه حلم .. والله حلم .. بس تيم وذياب كانوا بجهة السياره .. اللي اضربت فينا .. تيم يسوق وذياب وراه .. هيثم كان معي بالمركز .. ايه .. صح معي .. لأن خذونا للتحقيق .. عشان لقوو سجاير الحشيش بالسياره .. طقطق مخابيه : جوالي .. وينه .. بتصل فيه .. وينه .. مهره دورت في جيوبه: مافي بجيوبك شي ..اصبر وانا اشوف لك الوضع ..بس بتقوول لي كل شي صار .. مسك يدها .. : شوفي لي ذياب .. خويي ..مهره .خوويي .. والله ماطلع الا عشاني .. وبقولك اللي تبين .. مهره عطته الملابس .. : قم اغسل جسمك واللبس .. بنزل اجيب لك كمادات حق ظهرك وبسئلهم .. هز راسه ايجاب .. ساعدته .. وصلته لمن دورة المياه.. مهره موجوعه .. كيف يرجف .. جسمه كله يرتعش .. كيف خايف .. وناسي حتى الوجع بجسمه ..! خافت تسئل ويجيها خبر شين عن خويه .. بس انها اطلعت ولقت موضي .. ومعها كمادات .. وادويه .. شايلتهم بصينيه ..باللهفه: عدل هو .. زين ..؟! مهره بخفوت : ايه يمه .. ان شاء الله زين .. بس يسئل عن اخوياه هاللي حصل عليهم الحادث معه وخايف .. موضي : والله يفداك الكذب مادري .. والله ماركزت وش قالوا بس الوكاد العلم عند نواف .. مهره : وينه هو . ؟! موضي : تحت .. مهره : بروح اسئله .. انتي ادخلي لفارس .. وبجيك .. نزلت مهره .. ولقت نواف .. ثاني راسه على كفوفه .. وباين متأزم من الوضع اللي صار كله .. جمان كانت تلبس عبايتها بتمشي .. جات ناحيتها .. ولمست خدها ..: اكتشفت انك شجاعه .. وماتخافين ..لله درك .. مهره عضت شفايفها .. يمكن اكبر اسباب .. دفاعها عن فارس .. كان الخوف .. الخوف عليه .. الخوف ان يذوق شي ذاقته .. الخوف من الموقف .. خوفها لمن كانت وحيده .. وماحد يوقف بوجه عساف ويدافع .. بخفوت : كلنا نخاف ياجمان .. ومخاوفنا اشكال والوان .. نواف رفع راسه : بس ترى لمن ترمين نفسك قدام واحد ثاير وتلاسنين .. ذا غباء .. مهره وثقل بصدرها وقلبها : انا جيت اسئلك .. عن وضع اللي مع فارس في الحادث .. الورع قاعد يستوعب .. وزين مايجن .. خايف انه يكون احد مات .. حسيته خايف حيل على ذياب .. نواف .. ضغط عيونه بقوه : ماحد مات .. بس تيم وذياب وضعهم صعب .. اثنينهم بالعناية .. تيم عنده ضربه في الراس وكسور .. ذياب انكسر عنده ضلعين .. اذت الرئه .. حصل عنده نزيف داخلي .. بس تداركو الوضع .. لسى تحت رحمة ربه .. مابان شي لسى ماستقر وضعه .. هيثم .. وهو.. اخف الامور .. لانهم بالجهه الثانيه .. مهره خلاص صدعت .. وجمان .. انقبض قلبها : ياربي ألطف فيهم .. مهره بغبن : يعني ولدوه طالع من حادث كذا .. بدل مايحمد ربي ويشكره .. يتولاه كذا .. نزلت دموعها : الله لايرحم اللي مايرحم .. نواف :فارس ماقصر.. الخراب اللي سواه الليوم .. ماهو شوي .. مهره وصوتها الباكي : والله ملعوب عليه .. ومظلوم ..هو مو مستوعب كلشي .. بس والله لاطلعت الحقايق .. بتندمون كلكم .. جمان مسكت يد مهره : انا معك ..فارس مايسويها .. في غلط في الموضوع .. مهره بثقه: ايه في غلط .. جمان : انا بطلع .. شاهين ينتظرني والبنات نايمات بالسياره .. مهره : تمام .. الله يحفظكم حبيبتي .. جمان بوست خدودها .. ولمست خدها .. حطي كماده بارده .. ومرهم .. لاتخلينه كذا .. هزت راسها ايجاب ... : ماعليك .. لاتحاتين .. طلعت جمان ..ومهره صعدت فوق ..! راحت .. لغرفة فارس وقبل تدخل .. سمعته يقول بحده: لاتحطين لي شي يمه .. خلاص..كلكم كنتوا موجودين ورضيتوا علي .. افتحت مهره الباب .. فارس كان متروش .. ولابس بنطلون ترنغ وجسمه كله اثار الطق من ابوه .. وموضي مافيها لون: والله ماكنت راضيه .. بس فارس تعرف ابوك .. لاصار الامر يخصك مايرضا نتدخل .. ياله يمه تكفى .. خليني احط عليك كمادات ومرهم .. لايتورم جسمك .. فارس بحده: مابي احد يلمسني .. خلوني ليتني ميت ومريحكم مني .. موضي : استغفر الله العظيم .. واتوب اليه .. رفع راسه لمهره .. اللي دخلت وباللهفه: ها مهره .. شالعلم .. ؟! مهره ومتألمه .. جلست جنبه: يقول نواف .. كلهم طلعوا من الحادث ولله الحمد .. بس عندهم اصابات .. وكذا .. فارس باللهفه: وذياب ..؟! مهره مسكت يده : ذياب تعبان شوي .. وخلوه بالعنايه .. لان صار عنده كسور ونزيف وكذا .. فارس تغيرت ملامحه .. وامتلت عيونه دموع ..وبخوف : مهره جد .. ذياب حي ولامات .. مهره ابتسمت : والله حي .. وبيطلع ان شاء الله ادعي له .. موضي بغصه : الله يحفظه لااهله .. ولايفجعهم فيه .. مهره : اللهم آمين .. فارس اخفى وجهه بركبه وقام يبكي .. موضي باست راسه : ادعي له يمه .. ادعي له .. فارس : والله لاصار لذياب شي ماراح اسامح نفسي .. موضي ومب فاهمه ليه محمل نفسه الذنب .. طالعت ظهره وذرعانه .. بحسره .. خذت كمادة ثلج .. وقربتها من كتفه .. بعد فارس وبحده ودموع: خلاص يمه اطلعي .. اتركوني في حالي ..كنتي راضيه ...لاتجين تطببين فيني ذا اللحين .. مهره حطت يدها على ذراعه : ماحد كان راضي .. ابوك تلقاه مب راضي على اللي سواه بعد .. بس ابليس حضر .. فارس رفع عيونه وكلها دموع .. للجرح اللي بوجه مهره والكدمه الزرقاء.. انقهر انو الصفعه جات لمهره .. وانها انضرت بسببه .. موضي تراشيه : يلا امي .. خليني احط لك مرهم عشان تلبس .. الغرفه بارده .. وانت مو راضي تشغل التكيف .. يدفيك .. فارس بنفاذ صبر وعصبيه : تدرين اني اختنق من المكيف الحار يمه ..والله ومخنوق بما فيه الكفايه .. خلصوا هالليوم اللي مايبي يخلص .. واطلعوا وخلوني لحالي .. مهره اشرت بعينها لموضي .. يعني خليه انا معه .. موضي : الله يهديك يمه .. ! وطلعت .. مهره في لحظة صمت مرت تطالع الأرض .. وفارس مخفي وجهه في ذرعانه اللي على ركبه .. نجي على سيف .. اللي كان طلع من البيت .. واللحين راجع .. لما ماتحمل يبعد عنهم .. كيف ضر القلبين حقينه .. فارس ومهره .. كيف غلبه الغضب لذي الدرجه .. كان يدخن ويتخيل فارس وهو يضرب فيه ..كان يقول والله ماكنت ادري .. يبه تيم نكبني .. وجعه قلبه .. وهو يتخيله ضام نفسه.. ويقول : اوجعتن يبه .. انا فارس يبه .. حس بغصه .. وثقل في قلبه .. ومهره جات في باله كيف تتشبث فيه وتدافع عنه .. كيف تلقت الكف .. طالع يده كيف ترجف .. مو مستوعب كيف فصل لذي الدرجه .. كيف عصب وبغى يموت من غياب فارس لساعات .. من الافتراضات اللي افترضها وهو يدور عليه ومو لاقيه .. كيف عصب من فكرة تفحيطه .. وانه ممكن مات من الحادث .. كيف انذبح .. من مسئلة انه يتعاطى .. وكيف عيونه صايره .. كيف تجنن من الدم في ثوبه وجبينه .. مسك قلبه وحسه بينفر من مكانه .. !. وصل البيت ونزل .. دخل .. وصعد فوق .. وراح ناحية غرفة فارس .. كان الباب شبه مفتوح .. وقف وهو يسمع مهره تتكلم معه .. سرق النظر .. كانت مهره .. كمدت الضربات وحطت مرهم على جروحه .. وفارس لبس تشترته .. واللحين قاعده تلبسه قبعه وتنزلها على اذانه .. : يعني تيم .. كان قاعد يطلب السماح منك .. وهو يخدعك .. فارس شارد : ماشفتيه يامهره كيف يتوسل ويقول اني خويه .. واعتذر كيف غشني ووداني هاك الاستراحه ..بس انا كذا قلبي قافل من ناحيته ومو راضي بالاسف .. وقلت له اني مو شايل عليه بس ابيه يظل بعيد عني .. مهره وهي تجلس يمه : طيب ..؟! فارس: خلاص .. جلسنا وكان منوه انه بيمشي .. والله وتغدينا .. وكنا قاعدين نشرب شاهي .. انا بعد الشاي انعفست .. قمت اضحك .. وطولت الاغاني وارقص .. والي مستوعبه انه ذياب .. لعن تيم .. لانه هو اللي جاب كاسات الشاي .. وتيم يقول : اوريك بخويك اللي مسوي شريف .. والله لاطلع الشرف حقه من عيونه.. بس هذا اللي اتذكره .. كيف طلعت .. كيف رحنا بسيارة تيم .. التفحيط كله ماذكر صح .. كلشي .. بس تجيني ومضات .. ان ذياب .. كان جاي انه خايف علي .. ومضات .. اني كنت اشرب زقاير وكلها كان يشبها تيم لي .. مسك راسه بقووه وهو يحاول يسترجع كلشي .. .:يضحك يضحك ومهستر هو وهيثم .. وانا خليته يوقف فتحت الباب ورجعت ..ومن قوو الترجيع .. طلع من خشمي ..حسيتني بمووت .. مسك راسه بقوه .. وبضياع: وكان يضحك .. تيم كان يضحك وانا ارجع بقووه ..ذياب يهاوشه .. يبيه ينزلنا وانه يبي يرجعني ..مو مستوعب كيف حصل الحادث .. بس اذكر صراخنا .. والدم في وجهي.. مهره حييل يخووف . غمض عيونه بقووووه .. ويحاول يربط الصور في بعض .. مهره ساعدته .. ينسدح لحفته .. : خلاص نام .. امي..لاتفكر كثير .. فارس فتح عيونه وطالعها : والله مهره كنت مبسوط .. اني معك تقدمنا بمووضوع الشيشه .. وقربت اقطع كلشي .. مهره بحنيه: وان شاء الله بنكمل . انسى اللي حصل .. فارس: عاد صدقتيني .. صدقتي انه مالي ذنب .. مهره تربت عليه كنه طفل : والله مصدقتك .. ومن البدايه قلت انه لعبو عليك .. فارس غمض عيونه .. صداع قوي .. جسمه بدا يسخن .. جسمه كله مترضرض .. ويوجعه بقووه ..وبدا النوم ياخذه .. قام يهذي .. ويقول : علمي ابوي .. كان معصب ولاصدقني .. والله تيم غشني في الشاهي .. سكت شوي .. وكمل وهويهذري: والله غشني في الشاهي ومادري وش كان حاط لي .. مادري والله .. نايم ودموعه تنزل: يبه .. بغيت اموت .. والله شفت الموت يبه .. مهره تعض شفتها .. وتحاول ماتنتحب .. وهي دموعها تنزل .. سيف .. ماسك مقبض الباب بقووه .. وحجم الندم .. والألم زلزله .. لو بس اسمعه .. لو بس استوعب الكارثه اللي حلت عليه .. اختنق .. مقهور .. موجوع .. مهره شالت الادويه والشغلات .. وراحت دورة المياه .. دخلت حطتهم .. وسكرت الباب .. وانهارت بكي .. حست بوجع بظهرها وكتوفها .. وكأن الم فارس ذكرها بألمها صراخها .. توسلها .. وكيف عساف مارحمها .. ! اما سيف .. دخل الغرفه .. وقرب من فراش فارس وجلس جنبه .. كان نايم على بطنه .. لمس ظهره .. وعلى طول فارس تحسس من اللمسه بسبة الوجع .. تحرك وهو نايم .. سيف سحب الهوى ومو قادر يطلعه .. ارخى اكواعه على ركبه .. وانحنى في جلسة انكسار ..! ظل كذا وكل شوي يلتفت يطالع وجه فارس التعبان .. والشاش على راسه .. والجروح من الحادث عند وجهه وفي رقبته .. وحتى في ذراعه وييدينه .. حس بعتامة .. في عيونه .. ويلعن اعصابه ..ويلعن نفسه ويده اللي انمدت عليه .. طلعت مهره .. من دورة المياه وبيدها كمادة ثلج صغيره حاطتها على وجهها .. وبس انتبهت .. لسيف .. اللي التفت لها ..عطت نظرة غضب .. وتوجهت للباب .. بسرعه انها بتطلع .. لحقها ومسك ذراعها ..وبخفوت : مهره .. وقفي .. مهره بخفوت وعصبيه: ابعد يدك عني .. سيف بندم : ترى كنت واقف وسمعت حكيك مع فارس .. وعرفت اللي حصل .. مهره بسخريه وعصبيه :لاااا.. بدري.. وسحبت ذراعها .. تمسك فيها : مهره لاتزيدينها علي .. بخفوت : تكفى لانصحي فارس وسيف .. خليني اطلع .. طلع معها .. ودخلوا بغرفتهم .. مهره رمت الثلج ع السرير .. وجالسه تاخذ شاحنها .. وبجامتها .. سيف : ايش هالتصرفات مهره .. اعقلي .. ترى الوضع اللي صار الليوم هو اللي طلعني من طوري .. مهره بانفعال: والله حتى البهيمه .. البهيمه .. في الشرع في لها ذبح حلال .. ولدك سيف ..انت شايف جسمه .. هو من الحادث ولا من ضربك ...الولد منجمر على ربعه .. يتكلم ويغص ..ايش هالتبلد اللي فيكم .. ايش مخلوقين منه انتوا .. سيف مسح على راسه بعصبيه : كنت شعره واجن عليه .. الساعات اللي ندور فيه .. شيبي طلع ..ماظل صورة ماجابها ابليس في وجهي ..انتي ماهو فاهمه وش فارس عندي .. انا ماصبرني على مر الدنيا الا عينه .. مهره باحده .. عروقها طلعت : واللي يحب يسوي سواك .. كان يصيح ويتوسلك .. كان سمعته .. فهمت وش يبي يقول .. سيف بحده : كان يخربط .. كان مب صاحي .. مهره بحده اكبر : من فيكم صااااحي ..كيف الواحد يستهين بروح ويضربها ولايدري وين يوقع ضربه .. ولا وش يضر .. لو طابت جروحه .. شيطيب ..خاطره ..الضرب اهانه يامريض.. سيف يتحرك بعصبيه .. يبرر لنفسه: بس في النهايه انا محذره من عيال هالحرام .. وشوفي وين وصلوه .. مهره بتهكم وغضب: برافو والله .. هذا وانت سمعت عن نكبتهم له .. بس تدري انت واخوانك .. الظاهر متعتكم في الدنيا .. انكم تخلون اللي حولكم خايفين منكم .. من ابوك لمن بلقيس .. ماحد كان متجرء يوقفك عند حدك .. قالت كذا وبتطلع .. مسكها سيف ... : مهره اصبري .. اللتفتت بحده وبعيون كلها اتهام صاحت : سيف اتركني .. مسك ذراعها زياده .. وهوو يطالع عيونها .. مهره اجتمعت الدموع في عينها .. سيف بخفوت : دام عندك الشجاعه توقفين في وجهي .. وتخطيني .. لاتهربين اللحين .. كملي جميلك .. وعالجي اللي سويته .. مهره انزلت دمووع من عيونها .. : مابي اشوفك ولا اكلمك .شكلك مايروح عن بالي .. وانت تضرب فارس .. مابغيت اشوفك بهالشكل .. سيف لمس خدها والورمه الزرقه تحت عينها .. : توجعك .. ! مهره ودموعها تزيد .. بانهيار وقهر .. سيف بحنيه : انا آسف .. مهره بنحيب : شسوي فيك .. قل لي شسوي فيك .. ؟! سيف باس راسها : سامحيني .. مهره تخبي عيونها بكفوفها وتبكي .. كنها طفله .. بكت ومو عارفه تسكت ابد .. خذها سيف وضمها .. وبكت .. وهي تنوشق .. سيف وجعه قلبه : اهدي ابوي ..تكفين .. مهره: اناا احب كيف انت مع فارس .. انت خربت كل شي يالمريض .. شوهت هالصوره .. سيف : ماعليك .. ولدي واعرف له وبكره تشوفين .. مهره بقهر : حتى لو سامحك بقووله لاتسامحه .. احد يضرب كذا .. جسمه ازرق ومجرح .. والله ذاب قلبي وانا اشوفه .. سيف ضمها اكثر: اسف ياابوي .. اسف .. ........ شاهين : اخوانك نفس عمي اول ..لاضرب كفر.. جمان كانت معطته ظهرها وحيل متأثره: اول مره يضربه بهالطريقه .. تذكر يوم يسرق فارس سلاح ابوي قبل اربع سنين .. ويقعد يطلق فيه .. ترى جا له ضرب من سيف .. بس والله مو كذا .. شاهين اللي كان متسند على ظهر السرير ومو عارف ينام .. : ترى الولد طالع من موت .. سيف ماكانت واضحه عنده الصوره .. الحادث بشع .. ورانا الضابط صور السياره ..الله اللي اخرجهم .. جمان تحدق في الفراغ .. وزفرت بصعوبه .. : بعد عمري اهوو .. وراحت استعدلت ..وخبت راسها في ركبها : ياربي مخنوووقه.. صورته ماتروح من بالي .. شاهين .. مسح على ظهرها .. : يلاا ماعليه .. يقولون كل طقه بتعلومه ..! .......... نواف .. مثل كل اللي في البيت .. ماحد منهم عرف ينام .. فارس محبوب الكل في البيت .. من انوولد .. وهو بالنسبه لهم ..ألطف هديه من رب العالمين .. كبر في حبهم ..ودلعهم كلهم .. صار اخو لاعمامه وعماته .. ولد جده وجدته ..! نواف وتحاصره عيون مهره ودفاعها .. ماكان تمثيل .. ولا اصطناع .. ! حدتها في كلامها .. فرك عيونه بقووه .. : افففف .. افففففف .. قام طلع من الغرفه .. وراح عند غرفة فارس .. كان سيف واقف والباب شبه مفتوح .. نواف بخفوت : وراك واقف هنا .. سيف : فارس مرتفعه حرارته ويهلوس .. مهره معه .. نواف: طيب ادخل .. سيف وباين متأزم : لا خليني..هنا .. نواف سمع صوت القرآن اللي مشغلته مهره عند راس فارس .. وكانت تقوله :مصايبي كثيره .. وش تبي في اكبرها .. فارس .. ببتسامه خافته وعيون ذابله : ابي اقارن .. هو سويتي شي يسوى .. وانضربتي عليه .. ولا .. مهره واصابعها شابكتهم في اصابع فارس .. وتمسج يده : لاتفكر ماجاني ضرب .. جاني ضرب حلال .. وجاني ضرب حرام .. سيف عقد حواجبه .. وحتى نواف .. وكنهم يترقبون وش بتقول .. فارس: وش الفرق .. ؟! ابتسمت : الحلال .. هو من جديده.. وياما ضربتنا .. مثلا ًمره انا وزينه اختي .. فرطنا محاصيل ثلاث شجر ليمون .. وقطفناها وهي لسى صغيرات .. مابقينا فيها شي .. شلنا حتى الزهر .. يومها كلنا ضرب حلال .. بالشبشب .. واضحكت :انا كنت مسويه ثقيله ومابي ابكي .. بس زينه .. فقدت الوعي .. فارس رفع حواجبه : من الشبشب .. ؟!. مهره وكنها تتذكر ذاك الليوم : هي بكت وشهقت .. ووقف عندها النفس .. مو من الشبشب .. فارس : اجل وش ..؟؛ مهره : من ضحك سندس علينا .. فارس بعيونه الذابله ومبتسم: كلشي ولا الكرامه .. مهره: اقسم بالله تشمتت فينا .. بعدين تقلدنا كيف نعرج واحنا نمشي .. سندس يهوديه ..وقلبها قوي مو مثلي انا وزينه .. القطو ياكل عشانا .. فارس ومستمتع رغم سخونته اللي ضربت فوق : انتوا مغفلات مثلي .. مهره : ايه مره .. ! فارس : عطينا من الضرب الحرام ..! حدقت في كف فارس .. وتنهدت : كنت ابالغ بسياغ الحديث يعني .. فارس : وابوك ..؟! مهره .. ماحبت تجرح مشاعر فارس .. لان ابوه ضربه .. بس اختصرت ..: لا ماكان يضربني .. ولو تعمقت في الحديث عن ابوها بتبكي .. ماكان يرضى حتى النسمه .. تلعوزهم .. وفعليا ً مو مبالغه .. تذكر لما شعرها يجي على وجهها ..وعيونها ويمللها وهي تحاول تزيحه .. كان يشيله كله ويربطه .. ابتسمت وتذكر مره .. مع انها كبيره بثانوي .. وفي المزرعه معه .. ادوشها شعرها .. ابوها سحب خوص نخل .. ولمه ذيل حصان وربطه .. مهره :الله يبه .. حسستني .. كيس شعير .. ابوها .. : ضبي شعرك لايذي عينك .. ولا والله بحلقه بالمكينه .. فارس وشاف مهره شارده .. : شكله كان يضربك .. وتكذبين .. مهره ابتسمت : ورب الكعبه .. ولامزح يضرب .. سيف ونواف .. سكروا الباب .. وراحوا جلسوا بالصاله .. واللتزموا الصمت .. وعليهم هاله كآبه .. ومرت تلك الليله بصعوبه ع الجميع ..! حرارة فارس كانت ترقى وتنزل .. ومهره ظلت معه .. لان كان زعلان من الكل ومايبي احد يقرب منه ..بستثناءها.. .......