مبعثرة فيك ~ - الفصل التاسع و العاشر - بقلم مجهول🖤 | روايتك

رواية مبعثر فيك : الفصل التاسع : *يدها في يدي .. غفت بعد ان هلوست من الحمى .. هلوستها تسللت حتى في مساماتي .. وهي تعبر عن شوقها وفقدي .. ! اخذت مني يمين غليضه .. الا اتركها وافجعها بسفري .. وبعدي .. كانت تهذي .. لكن . هذت بمكامن روحها .. وخبايا دواخلها .. فاسكبت من فمها اصدق فضفضه .. ! علمتني كيف عشقتني واحبتني .. جعلتني اعدها الا اقترب وان اقدر جرحها وخوفها.. من الاقتراب بعمق .. كازوج .. وعدتني هي ايضاً..ان تكون اقرب والا تكتم شي في نفسها .. حتى لاتنفجر مثلما حدث عند تركي لها وذهابي لهيا .. ! نعم .. عرفت .. ان هيا .. شرارة ذاك الليوم .. وهمست لها ..وافهمتها .. ان هيا ونوف في ذمتي الآن .. وعليها ان تتفهم .. ولاتكبت ..وتتظاهر بأن ذلك لايهمها .. وعدتني انها ستعبر .... ضحكت ..من هلوسة هذه الجميله .. (عادي رح انا متفهمه .. بس سيف .. يمكن يمكن .. اطعنك يومها ) .. ابتسمتْ وهي تبين حدودي .. *عادي تضمني .. وتبوسني .. ابي الصق فيك وماخليك .. سيف ترى من جد احبك .. مادري كذا حسيت اني مت وانت بعيد .. سيف .. وكررت (أمااانه ماتخليني) .. * لا احتاج ان تأمني .. لاطاقه لي في تركها .. فقد هزلت اعصابي من بعدها .. لم تسعني الأرض .. ولا أبعادها .. لم يسليني لاعمل ولاصديق ..لندن بحجمها لم تساعدني على التجاهل .. ولم تدعمني في ان اكون صابر ومكابر ..! ضلت تتأرجح في عقلي .. مطلقه صرير مزعج عبارة عن عتب وألم .. ! وحده وفقد ...!! عندما خلا محيطي منها .. شعرت باليُتم فجأه .. واني شخص مثير للشفقه ..الإعتراف بكل ذلك ازاح اطنان من قلبي ..! * رجعوا من المستشفى .. الساعه اربع تقريبا ً.. سيف اخذ مهره لغرفته .. حرصه الدكتور .. على حرارتها وأدويتها ..ظل يبدل لها كمادات .. تغفي .. وتصحى .. تهلوس وتهذر وترجع تنام .. نايمه على سريره ... افتحت عيونها ..وشالت الكماده من راسها.. تلفتت انتبهت للنور من النافذه .. معلن ان الشمس بدت تطلع .. سيف .. وينه ..؟! ياربي ماكون اتخيل وجوده .. وكلها من لذعة السخونه .. استعدلت بخمول .. وكلها معرقه .. مع نزول حرارتها.. مسحت رقبتها بيدها .. ونفضت تيشرتها .. من صدرها .. وهي تنادي : سيف .. ! جاها صوته: ابوي ..! اللتفتت كان متروش ولابس بنطلون ترينغ.. وتيشرت .. وينشف شعره بفوطه صغيره .. قرب منها .. وحط كفه على جبينها .. مهره رفعت عيونها له .. وكأنها بعد مانزلت حرارتها .. تستوعب وجوده صدقا ً وليس هلوسه .. ابتسم : اخيرا ً .. ياخي علقت بك السخونه وماتبي تنزل .. مهره تطالعه بصمت .. وتروح تشتت عيونها .. وبخفوت: انا كذا .. من يوم كنت صغيره .. ماتجيني انفلونزا دوم .. بس لو جات تكون مميته .. جلس جنبها : بسم الله عليك .. احسن مافي سخونتك .. انها فكت عقدة لسانك .. احمرت .. وتدري انها ماخلت في خاطرها شي .. نزلت عيونها.. سيف يطالعها بحنيه .. وهمس : وحشتيني يابعدهم .. رفعت عيونها لعيونه .. ونبضها يتسارع .. حط كفه على خدها .. :البعد فادني ..علمني ان الدنيا ماتسوا بدونك .. والله .. امتلت عيونها دموع مع كلماته .. همست بصوتها المبحوح: كنت بموت .. الايام مرت كنها سنين .. وبرجفه :سيف .. ؟! همس بحب : ياروحه .. ببحتها وتوسلها : امانه ماتخليني ..تحملني .. ولاتطفش مني .. فاجئها .. لما دخل يدينه تحت ذرعانها .. وخذها في حضنه .. ضمها بشوقه وحبه .. غمض عيونه .. يستشعر جسدها بين ضلوعه .. ارخى راسه على راسها .. : قولي لي يوم انك دخلتي هالقلب .. عارفه انك ماتقدرين تطلعين منه .. *صوته العميق.. وهمسه العاشق .. كانا كفيلين ان اتشبث به بقووه .. وان اسكب دموعا ً صامته .. ليتني استطيع ان اعطيك كلي .. آااه ليت العمر يمر بين ضلوعك .. واتنفسك .. كيف احببتك هكذا .. كيف عشقتك .. هكذا .. كيف لرجل واحد يختصر جميع الرجال .. * سيف يربت عليها .. ويخلخل كفه بشعرها .. بعدت وهي تمسح دموعها .. وضحكت بخفوت : خليني بعيده .. عشان ماعاديك.. ابتسم .. وراح حط خده على خدها .. بعدين راح باسها قريب من شفايفها : دام العدووه منك .. اروح فدا .. ! فهت وهي فاتحه فمها.. وتطالعه .. رفع حاجب : وش فيك .. ارتبكت ولمست رقبتها .. : ابي اتروش .. نزلت حرارتي وعرقت مره .. وقف وساعدها توقف ..: تمام .. ادخلي تروشي .. راح اجيب بجامه من غرفتك .. بحطها هنا .. وانزل اسوي شي تاكلينه .. مهره : لاا ماله داعي .. انا اروح اتروش هناك .. سيف ولاعليه منها .. خذ منشفه .. عطاها اياه .. وراح بها للحمام : خلصي ولاتقفلين الباب .. لازلتي تعبانه .. هزت راسها ايجاب .. ولا حيل لها للاعتراض .. ....... جمان .. طلع عليها النور وهي في مرسمها .. اشتغلت في لوحة كبيره ودقيقه .. نامت يدها .. حطت الريشه .. وفردت يدها ولاحظت كيف ترجف واعصابها دمار .. قامت جوالها .. ساكن .. لامسج ولا اتصال .. شاهين بالعاده يطمنها .. لكنه لم يفعل .. ظلت تلعن غاده في داخلها .. طاحت عينها على طرف لوحه .. راحت سحبتها .. وهي تبتسم بحنين .. الصوره عباره عن وجه .. لابس نظاره شمسيه ..بعدسه وعدسه الثانيه طايحه وباينه العين .. تأملتها وليت الماضي يعود..! حطت اللوحه في حامل اللوحات .. وجلست على كرسي مقابل .. *راحت بخيالها لساحة النافونا في روما .. حيث الرسامين .. والعشاق.. حيث الموسيقيين الجواليين .. ايامي الأولى مع شاهين .. في شهر عسل تعدا مرحلة العاشقين .. وقفت معه حيث عازف كمنجا .. كان يذوب وهو يعزف .. كان يمووت والموسيقى جدا ً حزينه .. شاهين اخذني بذراعه .. وقلوبنا تفطرت من اجله .. اذكر اني دعوت ان الله لايذيقني مرارة ماذاق .. هذا العازف .. المخذول .. ! اضن ان في ذاك الليوم .. لم يمر ملك ..ولم تكن دعوتي مستجابه .. انتهى العازف من مقطوعته .. وصفقنا مع انحناءاته .. امتلئ صندوقه المفتوح من الاوراق والقطع النقديه .. عل العاشقين .. يدفعون غربان لذاك العازف النازف .. الا يصيبهم ما اصابه .. !* مشينا انا وشاهين .. وانا امتليت طاقة سلبيه .. قرص خدي :عمري .. وش فيك .. جمان : تأثرت .. حطيت نفسي مكانه .. ضحك شاهين :والله انتوا يالفنانين ماعندكم سالفة .. جمان اللتفتت وبانفعال: ليه عساس حنا نحس بهموم بعض .. مو ماعندنا سالفة شاهين .. بس احنا حساسين بزيادة .. اي شي يجرحنا .. الحزن مو لحظي .. حتى لو مابينا داخلنا .. احنا غامضين نفس الالوان .. فينا صخب الأوتار .. فينا شموخ نفس التماثيل المصبوبه صب .. بس ترى لانجرحنا .. نكون نموت نفس اللي يعزف من شوي .. شاهين بلامبالاة ومتعمد يجننها: ياشيخة .. انتوا تحبون تقولون عن نفسكم كذا .. عشان شايفين نفسكم آخر حبه ..وانتوا من جنبها .. انفعلت وانقضت عليه بتلكمه على وجهه .. ضحك .. وهو يبعد ويمسك يدينها .. طاحت نظارته الشمسيه ..وبدون قصد داست عليها .. شهق هو معها .. وانحنى بيشيلها .. وكانت طاحت عدستها .. طالعها بنص عيون : امس شارينها .. يالفنانه المرهفه .. شوفي شسويتي .. جُمان بلامبالاة : من فدايا رجولي .. شاهين راح سحب نظارتها من عيونها .. وبشقاوة ضغط على عدستها وشالها .. ورجعها على عيونها .. جمان عيونها متوسعه .. وبانفعال: خبببل انت .. شاهين يلبس نظارته بدون عدسه : والله عاد .. من فدايا رجولي .. تجولو في النافونا .. بنظرات بعدسة واحده .. كانوا يضحكون على خبالهم .. ووقفوا ياخذون سيلفي .. قامت جُمان من تأملها للوحة .. افتحت درج صغير .. طلعت صندوق .. افتحته .. كان فيه النظارات المكسورة .. ومجموعة صور .. لشهر العسل .. وفيه قلادة بلاتين .. نفس اللي يلبسونها الجيش .. شالتها .. كانت بيانات شاهين .. تنهدت وهي تتخيل .. شكله بدون بلوزه .. والقلادة عليه .. كانوا بشاطئ ميلانو .. لما سرحت في جاذبيته..وصاير برونز من الشمس . شاهين بخبث .. قطع شرودها : عاجبك السكس باق .. هي بلامبالاة : عاجبتني قلادة الامريكان ..هي اللي محليتك .. فسخها ورماها عليها .. لقفتها ..: دام هذا اللي عاجبك هي لك .. ابتسمت بخبث : ولو عاجبني الشي الثاني .. ؟! ابتسم بعبث: هو بعد لك .. يحوي الصندوق جماليات العسل اللذي عاشوه .. كانوا عشاق .. حتى النخاع .. رفعت اسوارة مشكوكه من قواقع .. اشتراها شاهين .. من وحده تبيع .. في ميلان .. لبسها اياه .. وقال : خليها ذكرى .. لأحلى ايام حياتي .. وباس كفها .. ! لكل قطعه في الصندوق ذكرى .. وكأن ايامي الجميله جمعتها في صندوق لايفتح الا للذكرى.. جمعت كل شي وقفلت الصندوق.. ولأنها ماتقدر تجاهل ذيك الأيام .. خذت جوالها .. واتصلت عليه .. عشان تعرف تنام .. بس .. مو عشانه .. في فندق .. في زيورخ سويسرا .. وفي لحظات .. ضعفه .. مانام رغم التعب .. يدخن .. واعقاب السجائر ملت الطفايه ..جالس في الشرفه البارده .. شارد في الضياع .. ماتواصل مع احد .. يفكر يمدد رحلته .. وماياخذها عودة .. مشكلتي لاصرت طايل جُمان ولاغادة .. ولاعارف ارجع لجمان .. ولاقادر اتخلص من غادة .. غادة تعبت وهي تتصل ولا رد عليها .. بالعادة.. يطمنها ويطمن جمان .. رن جواله .. القى نظره على صورة بيان وديم اللي تطلع مع اتصال جُمان .. سحب الجوال باللهفه .. وهو يطفي السيجار .. رد وبحذر : مرحبا .. جمان ظلت ساكته .. شاهين بصوت مبحوح : جُمان .. بجمود : ليش ماكلمتني ولاارسلت .. ضحك بسخرية مريره وضغط على عيونه اللي دمعت.. وسكتوا اثنينهم .. وانفاسهم يحملها الأثير .. تكاد تحرق اذن الآخر .. شاهين وهو يشعل سيجار وبخفوت بحته: رحت ومتشفق ابوسك.. ماخفتي من الله يوم رحت وخليتيها في نفسي.. ماكسرت خاطرك.. جمان بهدوء: لا .. ماتكسر خاطري .. شاهين ضحك بوجع . وقال: ليه متصله ..؟! جمان : يمكن اعتدت انك تطمني .. ولما ماتصلت يمكن خفت من قطع هالعاده .. وبخفوت: خفت عليك .. شاهين اطلق آاااه .. : اتفائل يعني .. ؟! جمان شردت : انت قل لي .. يوم امتحنت حياتنا .. واغتصبت حبنا بغاده .. تتوقع خليت فيني شي يدعو للتفائل .. شاهين : لوو خليتها .. وطلعتها من حياتي .. تصفين لي .. جمان هالمره هي اللي ضحكت بسخرية .. وبصوت مذبوح: شاهين ابوي .. مانتظر منك كلام .. الكلام مأخوذ خيره .. ولاانتظر منك افعال في وجهي . وخبايا من وراي . انا اشوف غاده بعيونك .. افهمك لما تكون تبيني وماتبي تزعلني .. بس غادة داخل خاطرك .. شاهين : برافو والله .. وانتي ظلي على اسلوبك معي وخليني طايش بين السما والأرض .. جمان : انا انسانه ما أركض ورى احد .. ولا اساعدك انك تنسى .. ولا اسعى اني اسحبك جهتي .. يوم خذتك.. ماكنت ناويه أنافس عليك .. لو عرفت قيمة جُمان صح .. هذيك الساعه لو تجي ألف غادة وتفرش نفسها لك .. ماتشوف غيري .. شاهين بضياع: عارف قيمتك والله .. جمان : عشانك ماطلقتني تكون عارف قيمتي..غلطان ..انت بس مرعوب من فكرة انك تعرف قيمتي واكون مو في يدك .. عارف لو طلقت .. لو تنطبق السما على الأرض مارجعني ابوي لك.. شاهين ببحه : ساعديني .. احتويني .. خليك معي .. ضحكت جمان بقهر : شاهين .. اوعاا .. انا هنا .. ترى ننام بنفس الغرفه .. معك شاهين .. قصدك اعطيك كلشي وتنسى غادة .. انا في قمة عشقي لك .. لما لقيت غادة نسفتني .. انا وقت ولدت بنتك .. رحت سميتها باسمها .. تفكر لو رجعت معك زي اول ..بتنسى .. شاهين بصدق : والله انسى .. جمان تحشرج صوتها : مابي انسيك انا .. ابيك تنظف نفسك منها بنفسك .. شاهين أكش منك والله .. وهي بقلبك وعقلك .. ماتحملك .. شاهين ضحك بآااه وعيونه امتلت دموع : جمان .. تذكرين لانمتي وانتي حامل .. من شدة قربك .. كنت احس ببيان وديم كنت احس بحركتهم في بطني انا ... ماشتقتي لهالقرب .. ؟!!! اختنقت جمُان بعبرتها .. *يسئلني اذا ماشتقت .. يسئلني وانا اللي قربت اموت من بعده .. كانت بيننا بيان وبعدها ديم .. نضحك سويا ً ونحن نتحسس ركلاتهم .. اصبحت بيننا افعى .. اسمها غادة .. لاتكف عن بث سمومها ابدا ً..* شاهين بهمس : خلينا نعطي نفسنا فرصة .. لاحظت رجفته .. ثم كحته .. همست : ادخل عن البرد ولاتظل بره .. ابتسم وقال يداعبها : شفتي .. تحبيني .. جُمان :تمرض .. ثم نبلش بك . ضحك :ايه يعني خايفه علي .. جمان : هوووهووو.. خلاص خلك بالبرد يكسر عظامك .. وش دخلني عاد .. سلااام .. ضحك شاهين: مع ألف سلامة يابعدهم .. ...... رجع سيف الغرفه .. ومعه صحن صغير .. لقاها رجعت انبطحت ومغطية حتى راسها .. حط الصحن ع الكومدينا .. وجلس جنبها : قومي افطري .. مهره من تحت البطانية : ماعرف ابلع والله .. مابي .. ابي انام بس .. شال البطانية عن راسها .. ولقاها ضامه نفسها .. وتوها بتتكلم .. الا قامت تكح متواصل .. ساعدها تجلس ولمس جبينها .. ورقبتها : لازم تاكلين عشان تاخذين ادويتك .. مهره تلمس حلقها : يووجع .. ابتسم وهو يجيب الصحن قدامها: ادري انه يوجعك ..بس انا مسوي شي يصلح لحالتك .. مهره طالعت الزبديه الصغيره .. فيها حليب ..وشي ثاني .. تسائلت : ايش هذا .. سيف ترى معدتي ماتستسيغ اي شي .. ابتسم وهو يشيل لها بالملعقه : حليب وشوفان وحليته بعسل .. توسعت عيون مهره: اووووخس يالهيلثي .. ضحك وهو يحط الملعقه بفمها: مو وقت مسخرتك .. مهره حطت يدها بفمها وتكح : والله ماتمسخر ..بس فاجئتني .. كذا شوفان وحركات .. سيف: كله عشان خاطر بلاعيمك .. مهره ابتسمت وبتاخذ الملعقه: طيب هات انا آكله .. بعد يده : انا بأكلك .. ممكن ..؟! استسلمت .. وتطالعه بشرود ومشاعر غريبة .. وهو يأكلها .. وباين الارهاق على كل ملامحه .. هو جا من سفر ولا ارتاح .. واللحين الصباح ..همست: ليه مانمت ..؟! سيف بدون يدقق في عيونها: ماجاني النوم .. مهره: عشان حرارتي كانت مرتفعه صح .. حسيت فيك وانت تبدل كماداتي .. سيف : بالله ..؟! .. لا ماهو السبب .. ماجاني النوم قلت اسوي شي مفيد مهره عارفه انه يكذب .. النوم باين حتى من سواد جفونه .. خلصت أكل .. وعطاها المضاد .. مسكت يده: حرارتي زينه .. نام سيف .. طالعها بشكل مطول وهو واقف .. وبعد تفكير .. قال:مُصره يعني ..؟! مهره ببراءة هزت راسها ايجاب .. اشر بحاجبه : زيحي اجل .. مهره: طيب بعاديك كذا .. سيف: ماعليك ..ماراح تعاديني .. وراح انبطح جنبها .. وخذها بذراعه .. مهره على طول تشنجنت لقوة القرب .. اللتفتت من الجهه الثانيه.. ضمها من ظهرها .. ودس انفه في شعرها .. وكفه عند بطنها... ارتجفت: ليه لفيتني كذا .. سيف وهو مغمض: كذا لاسخنتي .. بحس ع طول .. بخفوت متوتر: كيف بنام ..؟! همس وهو يضمها اكثر: بتنامين .. انتي في اكثر مكان آمن بالدنيا ..نامي ياعينه .. *اغمضت عيني طاعه .. هو عاد ..ليس علي إلا ان اذعن .. لن اغضبه ..نبضه يصطدم بظهري .. انفاسه تحرق عنقي .. كفوفه تجمعني .. وانا اللتي انفرطت كالمسباح بدونه .. * اما سيف .. وبعد ان سهر الليالي بلندن وجافاه النوم .. وجد السكينه في رائحة شعرها .. في جسدها الحار .. وقد ذاب بين ذراعيه .. فعلا ً نام .. ولاينوي تركها .. ابدا ً.. *عندما ذهبت في ذاك الليوم مزرعة صبحا.. وعندما اتت صاحبة عيون العسل .. وحدثتني .. عندما احتد النقاش معها .. لم اضع ولا جزء من الواحد في المئة .. انها ستتملك قلبي .. وتستعمره .. ! احتلال يامهره احتلال .. ماتفعلينه .. تغتصبين ارضي .. وبشروطك ايضا ً* .......... في الصاله وبعد صلاة الجمعه .. اجتمعوا العايله وحتى جمان وبناتها .. اللي جات لان ابوها وامها جاو من الديره .. سيف ومهره مانزلوا .. فارس توه ينزل .. وسلم على الكل .. وسيف الصغير تعلق فيه .. ضمه وجلسه جنبه .. وسيف يتكلم بحماس عن الديره .. وعن النياق .. والخيول .. وعن الجده الكبيره والجد .. ويوريه كمية الحلويات والعلوك اللي عطته الجده .. فارس وهو يتفرج على كيس الحلويات .. : والله حسيتك رايح البوليع¤ارد مو الديره .. على هالحماس .. جُمان : الديره احسن من البوليع¤ارد .. فارس طالعها بنص عيون : لاتسوين نفسك البدويه المنتمية .. وان يعني ديرتي احسن مكان .. ومارتاح الا فيها.. ضحكت : والله ان الديره عندي .. تسوى مليون بوليع¤ارد . فارس : انا يعجبني ابوي .. كذا متحضر .. وماعنده في الديره ولاينتمي لها .. موضي : ترى ابوك كان اكثر واحد يحبها .. بالاجازات .. ايام المدارس كان يقضيها هناك .. ويسترجع طفولته .. يالله يرجعون هو وخالك شاهين.. فارس : كان يمه . كان .. اللحين الوضع اختلف .. تبين يتهاوش معك قولي رح الديره .. موضي تنهدت .. : الله يخلف عليه .. ماعافها .. الا من اللي صار وهو رايح لها .. سيف تلفت وبتسائل : إينه ماما .. ابي ماما .. فارس : نايمه امك .. مريضه .. عقدت موضي حواجبها : صدق ..؟! تنهد فارس : ايه مارجعنا انا وابوي معها من المستشفى الا الفجر .. البنت حرارتها فوق الاربعين ويالله نزلت . توسعت عيونهم .. وموضي بخوف:وش جاها.. وابوك ..؟! . يعني ابوك رجع ..؟! .. البنت زينه اللحين .. تكلم فارس قلبي وقع في بطني بلقيس : وويني انا مادري عن شي .. جمان : وينها اللحين .. نبي نطمن عليها .. فارس : مع ابوي .. خذها معه لغرفته .. جمان ولأنها فاهمه اللي كان حاصل .. بدهشه : مهره .. ؟! .. مع ابوك ..! .. وفي غرفته .. فارس يتمسخر : احجي فارسي آني . ايه بغرفته . زوجته ترى .. جمان : ادري انها زوجته .. اخلص .. وش صار .. فارس سولف لهم عن كل اللي صار .. وسيف النتفه .. اللي يفكرونه مب مستوعب .. تأزم وهو يسمع عن وضع امه .. ولا انتبهوا .. له .. وهو يصعد لها فوق .. ! ولأن فهم انها بغرفة سيف .. راح دخل .. وينادي بخفوت : ماما .. ماما .. ماردت .. صعد ع السرير .. وكشر لما لقى مهره مدفونه بحضن سيف .. واثنينهم متعمقين بالنوم .. هزها : مااما .. دومي .. ماما .. مهره : هااا .. سيف : انا هنا ماما .. سوفيني .. وخرت مهره عن سيف وابتسمت وهي تلتفت لولدها: جيت حبيبي ..؟ صارت على ظهرها .. سيف راح جلس فوق بطنها .. : فالس قولي انتي مليضه .. رفعت يدها لخده : لاا ياقلبي .. صرت زينه .. سيف كان فتح عيونه .. ويتأمل الموقف .. وسيف ينزل راسه ويخبية بصدرها : حفت ماما ..انتي مليضه انا ببكي .. مهره تداعب شعره الكثيف : لا ياماما .. ماني مريضه ولاشي .. يلا ولدي الشيخ بعد شوي .. عشان ماعاديك .. سيف يقرب منها زيادة وبرفض : مابي .. قامت تكح مهره متواصل .. وسيف جالس فوقها .. حاولت تبعده ومو راضي .. قام سيف .. وشاله :يلد كتمت انفاسها .. استعدلت مهره .. وخذت ماي تشرب .. سيف ربت على ظهرها: مااجوره .. سيف تأثر : ماما .. أفيك .. تموتين ..؟!!! ابتسمت مهره : مستعجل علي ..ياكثر ماتقول بتموتين .. سيف : عدوينك .. ابتسمت مهره وهي تخفض عيونها .. سيف الصغير .. : إيش تنامين .. مع أوبة .. سوين له حبيبي .. بس انا سوين لي حبيبي..(قصدة الضمه ) .. ضحكت مهره .. وتوردت خدودها .. اما سيف بنص عيون : شوفي بيجي يوم بفغص ال** هذا .. ولاتقولين ماقلت لك .. بعثرت شعر ولدها : القلب ذا .. قام سيف : يعين الله .. ...... بعد شوي نزل سيف وبعد ماسلم على الكل .. راح جهة المطبخ .. موضي : وراه يمه .. تبي شي ..تبي اجهز لك شي ؟! سيف بهدوء: مايحتاج يمه .. انا بسوي مشروب لمهره .. عشان حلقها ..لاتعبين حالك .. بلقيس وفارس افتحوا عيونهم وفيامتهم ..وموضي وجمان كذا يطالعونه بفهاوة .. موضي تلعثمت : اقعد واسويه انا.. سيف راح : خلاص انا عارف وش بسوي .. اختفى من قدامهم .. بلقيس : لا لا .. مبدل اخوي .. فارس بحماس ودهشه : يالبيه ..يابوفارس .. متخرفن .. انا اشهد انه سيد من تخرفن .. قامت جُمان : قصر حسك .. اللحين يسمعك ويهون .. راحت له المطبخ .. دخلت وسكرت الباب .. كان يعصر برتقال وليمون .. ابتسمت وراحت تسندت على الدواليب جنبه .. رفع حاجب دون يلتفت عليها : الفضوول .. جُمان : قلي .. كيف الوضع .. يبشر بخير .. سيف : الأمور طيبه .. جمان : ابي تفاصيل . ابتسم وهو يسكب الليمون في كاس كبير : عطيني زنجبيل .. مادله .. جمان ضحكت: تدري انك صاير تهوس وانت تسوي هالحركات .. سيف وهو ياخذ سكر بتهديد :جُمان .. !! طلعت له اللي يبي .. : يعني صار نقاش بينكم .. سيف : البنت محمومه هلوست .. وقالت اللي في خاطرها .. اللي قالته يكفيني .. انتظرها عمر والله .. جمان : تمام .. وايش بتسوي مع نوف وهيا .. زفر بقوووه .. عقدت حواجبها : وش.؟! سيف حكى لها وش صار مع هيا .. جمان : أوف .. عاد مو كذا .. جاته رساله في الجوال .. فتحها من هيا .. (قهرتني ياسيف .. ذبحتني من داخل .. الله يسامحك .. طلقني .. ..) سيف : استغفر الله .. جمان : هاا .. من راسل ..؟! لف الجوال عليها .. قرت .. عضت شفتها : يالله .. مسكينه .. انت كنت قاسي بكلامك معها .. . سيف يقطع الزنجبيل : يابنتي ..لايسون فيها فجعتهم .زواجي منها ومن نوف ..كذا .. وكانوا راضين .. ليه ردود الفعل البايخه هذي.. جمان : القلب ياسيف .. هم كانوا تزوجوا لنفس احتياجاتك .. بس هم مالوا وانت ضليت .. . سيف بجمود كمل : جدار ..! رفعت حاجبها ونزلته : ماقلت كذا .. سيف شال الكاس : ع العموم .. هذا كلام هيا .. باقي نوف .. الفاغرة هذي تروح تقول اللي حصل لها .. وذيك تعطي ردة فعل انو الكلام موجه لهم ثنتينهم .. وضحك : ايش هالخيبه اللي انا فيها .. جمان ابتسمت : يسعد لي جوك .. اهم شي الايجابيه .. سيف : انا بصعد .. اخذ الليمون لمهره .. ببدل وانزل معها جهزو الغدا ميت جوع .. جمان : من عيوني ياقليبي .. .......... بعد شوي في الصاله .. وفي جمعه عائلية حلووه .. مهره جالسه جنب سيف .. تضحك معهم .. ومبسوطه مع انها الى الآن تعبانه .. سيف وفارس .. يسولفون عن وضعها .. وهلوستها ويجننونها .. فارس وهو يضحك : سمعتك وانتي توصين اختك بالجوال تسدد ديونك .. وربي ماانتي صاحية .. شهقت : كذاب فارس .. تبالغ .. فارس رفع حاجب : خليني ساكت لاقول ديونك كم .. مهره بفشيلة: اي والله اسكت .. ماصدق .. ماذكر .. اني قلت لها .. احسك شاطفها علي .. سيف : بالله كم .. ؟! فارس : أقوول .. ؟! مهره صاحت : لااااا .. مااتقول .. فارس : عشان يسددها ابوي لك .. ضحك وكمل : عساس تقولين ماراح ترفع اعمالك لامتي .. من ديونك .. انصدم سيف : كم عليك .. فارس بمسخرة : واااجد .. بلقيس : كم يعني ..شارية سيارة .. داخله مشروع.. ؟! جمان: مسافرة فيهم .. كم صدق .. سيف منزل عيونه جهتها وخذها بذراعه : هامورتنا .. على ايش طاقه السلف .. سعود : عاد وش على مهرتنا دين .. انا أوفيه .. الحلال كله تحت امرك يبه .. مهره توسعت عيونها :لا يبه .. فارس يبالغ .. شفيكم .. ماهو سلف سلف .. سيف: كم يعني .. خمسين ألف .. مية .. مليون .. ابي اعرف .. مهره برعب : مليوون .. ! واللتفتت على فارس وبتحذير: فروس لو تكلمت .. بتخسرني .. توسعت عيون سيف : لذي الدرجه .. مهره: واكثر .. ديوني .. انا كفيلة فيها وبسددها كلها .. سيف بذهوول : أوووف .. وانا ابو فارس .. حرمتي مديونة .. وغارقة بديونها .. وانا اخر من يعلم .. فقع فارس ضحك : كلها اربعين ريال لأيوب هنديهم .. وجارتهم شاكه اذا عطتها قيمة طلبيتها .. مهره خبت وجهها باحراج : حيوووووووواااااااان .. فقعوا كلهم ضحك .. وموضي: ياووويلي .. وانا قلت البنت وش هي متوهقه فيه .. مهره بدفاع : والله اكثر .. زينه تلحقني بألف ..يعني مو لذي الدرجه بشيل هم اربعين ريال .. سيف داعب شعرها .. وبحنية : الدين يبقى دين .. حتى لو ريال .. مهره سكتت .. وصفنت ..خافت من هلوستها البارح .. ايش ممكن قالت بعد .. شردت بفارس .. اذا هي قالت تفاصيل سخيفه .. مثل اربعين ايوب .. ايش ممكن قالت لسيف .. فارس حرك يده : آسف مهره .وش فيك بتبكين .. مزوح ماكان قصدي .. طالعته بنص عيون : فضحتني يلد .. وش بقى بعد .. الحق علي أمنت لك .. يابخور المواقد .. توسعت عيونه .. واشر على صدره بسبابته : انااا ..؟! .. بخور . المواقد .. مهره : خلاص عرفتك .. بيرك يفوض ماله امان .. شهق : لاااااا مهره ..تكفين .. الثقه .. مهره صدت : مابقى منها شي .. تحطم فارس : لااااتقولين .. سيف مبسوط على اسلوبها مع فارس .. استمرت الحوارات الحلوه .. وقالت موضي : جدتك تبيك تروح الديره وتاخذ مهره .. عشان تشوفها .. عقد حواجبه : اقتراح مرفوض.. مهره ماراح تروح الديره .. اللي يبيها يجيها هنا .. عقدت موضي حواجبها : جدتك مافيها حيل للطريق .. ومتشفقه .. تتعرف على حرمتك ..لاتحبكها .. وروحوا عندهم كم يوم تنبسط هي .. وجدك .. سيف بعصبية وترت مهره: يمه انسي .. سعود بحده : لمتى سيف .. عمامك .. وناسك.. سنين ماتروح ..من بيوصل هلي لاغمضت عيني .. سيف بعصبيه : الله يطول بعمرك يبه .. عمام .. ماعندي الا عمي فهد .. عذرا ً بس البقية انا ماعترف فيهم.. سعود بحده : سييف ..! موضي بعصبيه : اهدو .. شجاكم .. الله يصلحكم .. جمان بانفعال: سيف صادق .. ليش تتجاهلون تصرف عمامي .. يوم وقفوا مع حمدان واهم يدرون ان صوب سيف متعمد .. لانه تزوج نجود ..اخووي بغى يمووت .. وكلهم قالوا بالخطأ ..جدي اللي مارضا ..وقال كلمة حق .. موضي بحده : جُماان .. !!! فارس بصدمه: لحظه لحظه.. من اللي صوب من ..حمدان ولد عمي فيصل .. ماغيروه ... صوب ابوي .؟! سيف رفع راسه وتنهد ومن بين اسنانه : قفلوووووها .. مهره ارتجفت.. ومب فاهمه شي .. بس الواضح ان في احد كان محاول يقتل سيف ..في الماضي .. فارس وقف وبانفعال وعصبية : واللحين ليش تو ادري .. يعني يبه .. انت مب على اصلاح مع عمامي عشان كذا .. طيب ورى انا اقابلهم .. واعطيهم وجه .. سعود بحده: هم عمامك يافارس وعمام ابوك .. مسئلة قضت مع الزمن .. سيف يطالع ابوه وبحده : كل شي يقضي الا ان حمدان كانت عينه على نجود .وهي لي .. وكل شي انساه .. الا انهم درو ان هذا السبب اللي بغى يقتلني عشانه . وقالوا شاب وعاشق .. طاش وسواها من حر قلبه .. سعود : قضى ياسيف .. ذيك سنين وراحت .. ونجود والله يرحمها واحنا عيال الليوم .. رواية مبعثر فيك : الفصل العاشر : سيف ضحك بقهر .. : من قال ان الجروح تدفن مع المووت .. والله يايبه .. لو الود ودي .. ان عساف ..عساف واهو اخوي يرجع لدنيا .. اقسم بالله .. ان كان .. مهره قاطعته .. مسكت ذراعه تنبهه ..ضغطت بقووه .. تمنعه يكمل .. سكت .. وقلبه يخفق بقوه من انفعاله .. سعود عقد حواجبه : وش كنت تبي تقول .. سيف وعشان مهره ماتزعل قال: بس .. تذكرت ان هو ونواف كانوا معي ضد اخوانك .. سعود بغضب وهو يتكى على عصاه ويقوم : والله والكوبة منكم الثلاثه .. وراح وهو يتحلطم بغضب .. بلقيس : يالله .. اللحين تزيد رجل ابوي .. من الغيض .. قامت موضي وراه عشان تهديه .. سيف فتح ازرار ثوبه ودلك رقبته .. مايحب طاري الديره وعمامه .. كانت اجمل ايامه فيها .. ومن تزوج نجود .. تتالت الاحداث السوداوية فيها .. ! .. مهره حطت يدها على كفه وهمست تداعبه : الووو .. ابتسم .. وتلاشت ابتسامته على طول .. وهو يضغط على عيونه .. والحادثه تطري عليه .. كانت بعد اسبوع من زواجه .. وكانوا رايحين الديره .. عشان عزيمة كبيرة مسوينها للعرسان .. وخلال العشا .. والاحتفال .. اطلق حمدان .. كان ناويها في قلبه بس .. !! قاطعه من شروده الحاح فارس .. اللي جثى قدامه : وين يبه وين .. وين صوبك الكلب .. ابتسم سيف بحنية له : وش لك فيها عاد .. فارس : كذا ابي اعرف .. صدمتوني .. والله حتى لو اني ولدكم بالتبني .. شي زي كذا ادري عنه صدفه .. اشر سيف على صدره فوق .. قريب عند تجويف الابط وذراعه .. قال : هنا بالضبط .. شهقت مهره وحطت كفها على فمها .. وفارس بصدمه : مو انت تقول عن الاثر انو حارقك القضا .. سيف بتنهيده: وش هالقضى اللي بيجيني هنا .. لا يبه .. هذا اثر،رصاصة حمدان .. فارس بحمية: والله لاشرب من دموووه .. سيف نبط جبهته: ولا حتى في احلامك يجيك طاري كذا .. موقف قديم وانتهى .. واساسا ً انا قاطع علاقتي فيهم .. ومانلتقي الا في عزيات .. ولا مناسبات قوية حيل .. وحتى بعد الحادثه وبس طابت جروحي .. رحت وسوا ابوي حمدان (جده ) عشى كبير .. عشان ياخذ اللي في خاطرنا انا وابوي اتجاه عمامي .. فالمسئله منتهية .. بس انا في اشياء في نفسي .. ماتنمسح بسهولة .. شرد سيف في كف مهره اللي فوق كفه.. فارس شرد في وجه ابوه .. لو صاير فيه شي .. لو ميت ابوي .. ليش ابوي دوم فرحته مكسوره .. من يكون حمدان عشان يجاكره في امي .. تخيل صورة ابوة في العرس .. كان صغير .. كيف ولد عمه اللي من دمه ولحمه .. يطلق عليه بدون رحمه .. وانا ألوم ابوي .. لاعاش بلندن وخلا كل شي وراه .. !!! بلقيس .. ولحظة الصمت ثقيله .. كل واحد في نفسه تدور امور .. وافتراضات .. قالت : وش فيكم .. حل على روسكم الطير .. سيف فاق من شروده وقام : انا بطلع ادخن .. وقام طلع .. تارك مهره .. تشعر بفجوة مكانه جنبها .. لو كان مافيه سيف .. ! كيف بتكون الدنيا ..!!! ............ نواف:ايه ادري .. بس ذا امر منتهي .. واحنا عيال عمومه .. ومابينا ثار .. فارس بعصبية: والله امشيها لهم كلهم الا انت نواف .. كيف تخبي علي شي كذا .. نواف بهدوء: وليه اقولك .. موقف حصل قبل تنولد .. ابوك عايش والله حفظه .. وهذهو عندك .. لايصير قلبك اسود .. فارس وضايق صدره: وجعني قلبي والله .. رصاصة .. وابوي .. ليتها فيني انا.. نواف .. انت فاهمني .. انا الا ابوي .. والله لو يصير،فيه شي اموت .. نواف : بالله انتوا وش فتح عندكم هالسيرة .. فارس : امي وابوي سعود .. يبون ابوي يروح الديره وياخذ مهره .. لان جدتي مزنه تبي تشوفها .. نواف : وجدتي مزنه ورى ماتجي مثل عوايدها .. كل بين كم شهر .. جات عندنا .. الا ان جدتي تبي حرش.. فارس: والله عاد ابوي مبسوط ونفسيته صايره حلوه .. من تزوج مهره .. تنهد : خلاص .. لااحد يفتح سيرة الديره لابوك .. وانت بعد لاتقعد تسأل .. وتضايقه .. جاتك **** السؤال تتصل علي واقولك اللي تبي .. فارس انصدم : نواف ..! نواف : وانا صادق .. وابوي انا اكلمه واتفاهم معه .. فارس : طيب متى بتجي انت .. نواف : قريب ان شاء الله .. ابي اقفل .. كلشي لاني ابي استقر فترة مابي اسافر .. فارس يتحرش : هااا .. هاا .. تبا تعرس .. نواف يجارية : عاااد لاقي لي كورية.. كنها لعبة ..وجهها تقل انمي .. فارس : الله ابي .. على كم .. نواف :يا ** بنت .. ماهي ميدالية .. فارس بنص عيون : ماااش .. خشتك ماتصلح مع الكوارية .. يبي لك سعودية ومن قلب الديرة والصحراء .. نواف : والله هالقطن اللي هنا حلوين .. بس ماهنا خشوم .. فارس : كيف يعني ..؟! نواف : يهمني الخشم ياعمك ..ابيه سلة سيف .. فارس بنص عيون: لاتفكر انك بتجيب وريث للعايلة احلى مني .. نواف : انسى انك حفيد البيت .. بس بذن الله بجيب اللي يدق راسك .. فارس : عندنا ولد عساف .. يشبهك .. ضحك نواف : متحمس اشووفه .. من ترسل له مقطع يفقعني ضحك .. شيتعاطى هالورع .. فارس : زااااحف .. طالع على امه .. نواف : والله ومتحمس اعرف هالمهره .. اللي صنعت المعجزات .. فارس : بتحبها .. نواف ينبه فارس : هلاا ..؟! فارس : اقصد حب اخوي مثلي معها .. ايش في مخك يشطح .. ضحك نواف: تقول كذا يم ابوك يقصني ويقصك .. ضحك :يالبى بوفارس .. ياعسى الضحكه ماتفارق فمه.. ............ دخل سيف .. بعد ماطلع وراح عند ربعه وغير جوه وتلفت : وين مهره ..؟! بلقيس : صعدت بتاخذ علاجها .. ومانزلت .. تقول بترتاح شوي ... اللتفت على سيف .. اللي جالس محزن .. وبيده لعبه .. عقد حواجبه: سيف .. وش فيك بابا.؟! تنهد ..: ماما .. تقولي .. لوح .. انا ابيها .. ابتسم وشاله وجلس وجلسه على حضنه :وليش زعلان .. هي تعبانه .. وتبي ترتاح .. سيف تنهد بصوت: تقول عاديني .. ابيها عاديني ..انا أليض .. وماما اليضه .. اثنينا أليضيين .. احبها ماما .. مسكينه ماما .. توسعت عيون سيف بدهشه .. من كلام النتفه ومنطقه .. *واجتمعنا سيفين .. في عشق مهره نتبارى * بلقيس متأثره: من مساعه وهو يقول كذا .. مهره خايفه تعاديه .. وهو من مشوا بنات جمان وهو يبيها .. سيف وقفه على حضنه وطالع عيونه : شوف ..خلينا نتفق .. لو صرت شاطر .. وطعت كلام ماما ..عشان نساعدها تطيب .. بس تصحى .. نروح كلنا المزرعه .. توسعت عيون سيف : مع ماما ..؟! : مع ماما .. : وفالس ..؟! ضحك سيف : وفارس.. : وكلهم .. وابي بيان وديم .. سيف : لو تبي الجيران بعد .. واركبك على الحصان .. ونسبح في المسبح .. .سيف راح ضم سيف بقووه .. وذرعانه .. تعتصر رقبته .. وفي لحظه ابوية جميله ضمه بحنية .. ابتسمت بلقيس .. ودخل فارس .. وشاف الوضع .. توسعت عيونه : لاااا ياشيخ .. سيف يطالعه وراس سيف الصغير في رقبته : خير في شي ..؟! فارس رمى مفتاحه على الطاوله .. ويقلد المشهوره موزه : اناااا ساكته .. ومتحمله .. ساااكته ومتحمله .. بلقيس فقعت ضحك .. وسيف اوب فاهم : وش ذا ..؟! فارس بتهديد: خير .. وش ذا الهاق .. انت حلاتك مع النتفه ذا عداوة ..سايح بحضنك اشوف.. ابتسم وهو يضمه اكثر : ورعي ذا .. جاا فارس ومسك بلوزة سيف من ورى ويسحبه: قم يالعنكبوت .. لاصق .. سيف تشبث بعمه : مااااابي .. اوووووبه .. فالس تكني..(فارس بيطقني) فارس يشده : وخر .. ذا ابوي انا ..اقسم بالله لايوصل الدم للركب .. ضحك سيف .. وطالع وجه فارس : من جدك .. ؟! فارس وعينه في عين ابوه ..وبتحدي: ايه من جدي .. وراح يمزع سيف اللي شبك.. بسيف .. وسيف الصغير يضحك ويتعلق بعمه ويحتمي فيه .. وسيف ضامه .. ولما فارس راحت جديته وقام يضحك .. راح يدقدق سيف .. اللي مات ضحك .. وفك عمه .. وفارس اسحبه ورماه ع الكنب .. وراح يتعارك معه .. واثنينهم يضحكون .. سيف شرد في الاثنين .. وبلقيس ببتسامه حلوه تطالع سيف .. وكل شيء في روحه يختلف . ويعود للجمال ..! بعد شوي صعد لغرفته .. ومالقى مهره .. طلع وراح غرفتها .. فتح بخفوت .. وسمع صوت جهاز البخار .. يشتغل ..دخل وسكر الباب .. لما حسها غافيه .. والكمام على وجهها.. ومتسنده على ظهر السرير.. وقف قريب منها .. مهره تتجزل .. وتحاول ماتشكي .. قاعده لحالها وتطبب في روحها.. لاحظ عيونها الذابله .. من مساعه تضحك وتسولف .. وهي اصلا ًتعبانه .. وقف يناظرها..شعرها الحريري .. مخنوق في مطاطة الكمام .. رموشها ساجدة في خنوع على خدها الشاحب .. تأمل عنقها .. نحرها .. وصدرها يعلو وينخفض .. وصوت انفاسها موجع .. نزل عينه على ذراعها .. واثار الابر .. متشكله في بقع زرقاء ..على بشرتها البيضاء . وصل بتأمله لكفها الجاثيه جنبها .. نصف مفتوحه .. عقد حواجبه .. لأثر نقط غريب في بطن يدها.. مد يده وفرد اصابعها .. تحسس الاثر .. بتسائل .. كذا وحده وفي اماكن متقاربه .. فجأه اسحبت مهره كفها .. وهي تستعدل.. وتشيل الكمام .. : سيف .. ! سئلها : ايش اللي في يدك.. مهره طفت جهاز البخار .. وبتسائل : وش فيها يدي .. مد كفه: هاتيها .. وانا اوريك .. ارتبكت بس مدتها .. مسكها واشر على النقط .. مهره ببتسامة حاولت تخفي ارتباكها .. : تقصد النقط هذي .. سيف وعاقد حواجبه ..: ايييه ..؟!!!! مهره ارتبكت اكثر .. بس ضحكت : طحت في مزرعتنا مره.. وقدامي نار مشبوبه .. وجات يدي على الفحم .. وبس يعني .. ظل الاثر .. سيف رفع حاجب وماصدق .. بس قال بسخرية : واضح ان الفحم مرتب ونفس المقاس ماشاء الله.. سحبت كفها .. واللتزمت الصمت .. وهي تلملم ادوات جهاز البخار .. وسيف راقبها ..وهي تتحاشى تناظره.. اللي بكفها اما بفعل فاعل .. او هي مسويته بنفسها .. كاتعبير عن حالة نفسية .. اوضغط نفسي .. تنهد وماحب يقلب الجو شحنات .. جا جلس جنبها وخذ احد الادوية : حطيتي منه في البخار .. هزت راسها ايجاب .. لمس جبينها : تراك مسخنه .. مهره: خذت بنادول اللحين تنزل .. ابتسم : وش فيك ماطالعيني طيب .. مهره تبعثر نظرها بكل شي الا وجهه .. مسك ذقنها .. ورفع راسها له : مهره ادري ان بينا بحور ودهور .. وعوالم .. الله بس اللي يدري فيها .. بس احنا اختصرنا الدنيا .. وحبينا بعض .. ومن قلب ..لما ماتبين تقولين لي الشي .. لاتقولينه .. بس لاتكذبين علي .. همست وهي تحدق في مكان الاصابة اللي درت عنها الليوم وقالت : لما قلت لفارس ان اثر الرصاصه حارقك القضا .. ليش كذبت ..؟! سيف بعثر نظره : عارف فارس بيتأثر .. وبيحط في باله .. وبيحقد .. وممكن يكبر في نفسه هالشي .. ويغلط .. ارتسمت في شفايفها ابتسامه صغيره : اممممم .. رجع طالع عيونها .. وهز راسه بتسائل .. خذت كفوفه .. واحتضنتهم بيديها .. : خليني اختصر المسافه .. رغم الوقت القصير اللي بينا .. الا اني اسئل الله ياسيف ان يجعل يومي قبل يومك . . خفق قلبه بدهشه .وبخفوت : استغفري .. فاجئته لما اندفعت لصدره وضمته : اوجعوني عليك والله.. سيف انا ابتدي عمري معك .. في اشياء كثير ابي اعيشها معك .. باقي الدنيا بتبكيني .. ابيك حولي وتمسح الدمعه .. باقي بنكسر ابي اتعكزك .. انصدم وهو يضمها ويغرس يده في شعرها : وش قصدك يامجنونه ..كل شي انتهى .. ماحد يبكيك .. والله .. ضمته اكثر .. وخفق قلبه اكثر .. همس : مهره ..!!!! رفعت راسها له وابتسمت : يالبيييه .. حط انفه على انفها: وش كنتي تقصدين .. مهره بعبث: كنت ابي احسسك بتأنيب الضمير عشان تخاف على نفسك .. وتتمسك في الحياه .. رفع حاجب ومتعمد يسئل هالسؤال: وليه اتمسك فيها .. ابتسمت ابتسامة حلووه .. وبدلع : عشاني ..! رفع حاجب .. وهذه الغزاله الصغيره .. تجيد اللعب على اوتار قلبه .. وتحترف اعتقال جوارحه .. سيف توه بيبوسها .. الا بعدت وحطت راسها على حضنه .. وقالت : انا مريضه .. المفروض ماتروح عني .. ..؟! سيف يبعد خصلاتها عن خدها .. : تدرين رحت عند اخوياي ..والجلسه عامره .. بس كنت افكر فيك والله .. رفعت عيونها له : والله .. ؟! باس خشمها : والله .. مهره سولفت معه .. مثل الطفله .. وسيف كان يداعب شعرها ..وملامحها .. ضحك من سالفه قالتها عن صبحاا .. مهره رفعت سبابتها على خده .. وضغطت على الغمازه .. وهمست : تخررررررفن .. اذا سولفت عذبه ويمطر معاها الديم ‏كأن المسامع أرض ، و الغيم شفتها ‏عليها حلا مايشبه الا " بنات الريم " ‏نعيم الحياه وغايته في ابتسامتها ........... في مساء عصبي بالنسبة لجمان .. تذاكر لبيان .. كانت تصيح بعصبيه : بيان .. ضفدع مافيه عصا .. ايش في مخك .. استوعبي جننتيني .. بيان وبتبكي : ماعرف ماما .. ضرس .. ظلام ..وتقولين ضفدع .. ضيف .. كيف اعرف هذا فيه عصا .. هذا مافيه .. جمان واللي كانت اعصابها فالته ضربت الدفتر بكفها : ركزي بنطقي .. اللحين لما اقول ضـ .. ضـففففدع .. نفس لما اقوول ظظظظظظبي .. ديم طايره عيونها .. تطالع امها بخووف .. وخايفه على اختها .. بيان قامت تبكي : ماعرف ماما.. جمان تضرب جبين بيان : خزني في مخك المصدي .. تعبت وانا اعيد .. بيان قامت تبكي بصوت .. واكتبت ضفدع صح .. جمان تضرب الدفتر : اكتبي ظلال .. اشوف .. بيان اكتبتها بدون عصا .. وصرخت جمان ..: بيااااان ... انفتح الباب .. ودخل شاهين .. بيان وديم في وقت واحد اللتفتوا .. وبصيحه ملهووفه : بااابااااا ... ركضت ديم بسرعة البرق .. ولقفها .. وشالها فوووق .. وبشوق : عين بابا .. بيان ركضت له .. وجمان .. مارفعت راسها له .. ماتبي عيونها تفضحها.. كان المفروض يجي من اربع ايام.. ولاجا .. واتصلت عليه وكله جواله مغلق .. خافت .. انرعبت من فكرة انه صار فيه شي .. تزداد ضربات قلبها مع صوته .. ومداعباته لابيان وديم .. وهم يشكون له عصبيتها وصراخها عليهم .. قرب ناحيتها وهي جالسه ع الارض مقابله الطاوله .. قال يداعبها : وش فيك مستشره على بناتي .. وبيان تقول بانفعال : بابا .. ماما تقول عن مخي مصدي .. ديم : بابا مااما تقول شعري مدهن .. تقول شعري مو.. موو .. مو حلوو .. جمان مارفعت عينها له .. وهي تعض شفتها السفليه شوي وتقطعها .. بيان : بابا ماما شقت مريولي ورمته بزباله لاني وسخته بالحبر .. وشاهين يناظرها .. وينتظر منها كلمه .. نزل ديم اللي بتشكي بعد وقال : كيكاتي .. ممكن تخلوني مع ماما شوي .. وغمز لهم وبهمس : اصعدوو فوق ولو اقنعنا ماما ممكن نروح الملاهي .. توسعت عيونهم : والله ..؟! باسهم : اذا وافقت ماما .. راحو ثنتينهم صعدوو .. وقبل يتكلم .. قامت جمان بسرعه .. وراحت اتجاه مرسمها .. لحقها ودخل وراها قبل تسكر الباب .. جمان بدون تلتفت : خليني لحالي .. سكر الباب .. وعقد حواجبه : وش فيك مع البنات .. ماهو عوايدك هالأسلوب .. صاحت بانفعال : شاهيين اطلع بره .. راح لها وسحبها من ذراعها ولفها جهته وبانفعال: كلميني .. وش فيك .. وش صار لك .. جمان رفعت عيونها .... له وصاحت .. وهي تدفعه من صدره: ارجع من مكان ماجيت .. ليش رجعت ..اخر اتصال بينا .. بينت لك اني متضايقه انك ماطمنتني .. وتروح تطفي جوالاتك .. وفوقها .. تأخر جيتك اربع ايام .. يعني عساس عرفنا نقطة ضعفها ندوسها .. توسعت عيونه .. ومسك معصمها .. وهي مستمره تضربه على صدره ..: والله ماكان قصدي كذا .. . صاحت وهي تنهار دموع : شاهين ماخذت منك الا العذاب .. الله يلعنك كثر ماتمسكت فيك .. يالخاين يالجلف .. يالعاهه .. انقضت عليه .. وهي تضربه وتسبه وتشتمه .. وشاهين قلبه ينبض بقووه وثوره .. لهفتها .. حرقتها .. خوفها عليه.. الفاظها الغريبه على لسانها .. ماطلعت الا من قوو حبها وعشقها .. دموعها الفيصل .. دموعها غسلت غاده من قلبه .. اندفاعها .. ضربها المؤلم .. مسكها بقوووه وضمهاااا .. وهي تتفلت منه بكل ماأوتيت من قوه .. *ضممتها بنية دفنها في جسدي .. كيف شككت .. في عشقي لها .. كيف جلست في خلوتي .. واعتزلت الجميع .. لأرى كفة من ترجح .. ياثقل عشقك في قلبي ياجمان .. كفتك لم ترجح فقط .. بل زلزلت قلبي .. وكسرت حتى الميزان .. جمان .. انتي شامه في قلبي منذ الولاده ..ولدت بها واموت بها .. انتي شامه ضننت انها بي رغماً عن انفي .. لكني اكتشفت .. انها تقع في اخطر منطقه من جسمي .. ولو حاولت ان ازيلها تشوهت .. ومت ُ .* شاهين .. دفن وجهه برقبتها .. وهمس: اهدي ياروحه ..والله الدنيا ماتسوى بدونك .. انفاسه الحاره .. وهمسه .. كانتا كالبسمله والمعوذات .. على شياطينها الهائجه .. هدت وهي تسمعه .. يهمس ويضمها اكثر ..: اعتزلت العالم من بعد مكالمتك .. ماتواصلت مع احد والله .. انتي تجاكريني .. وتدفيني لغاده بجفاك .. بس يوم اختليت في نفسي .. مالقيتك الا انتي .. عيني وقلبي وعقلي .. مايبونك الا انتي والله .. همس ببحه : جُمان .. بخفوت : هممم .. بعدها وهو ماسكها .. وطالع عيونها: حبك الحقيقه بحياتي .. غيرك وهم .. عطيني فرصه واثبت لك .. ارتجفت شفايفها .. بتقويسه طفوليه وعبره : لو صدقتك وخذلتني .. بتخسرني.. شاهين بصدق: ورب البيت ماخذلك .. *في عينيه صدق ثابت .. وفي قلبي طفل يريد تصديق الأكاذيب .. قررت .. منحه الفرصه .. ومنح نفسي شاهين .. عطشته وذبلت .. اريد ان استعيده ..سأضع ثقتي على كف عفريت .. ان وقعت .. تنتهي هذه القصه * لفت ذراعيها على رقبته .. وسحبته ناحيتها .. وبكل ارادتها قبلته .. توسعت عيون شاهين ..بصرخه داخله *كم لبثناااااا*..!!! بادلها بقووة شغفه وجنونه .. وهو يرفعها عن الأرض .. في عناق كالمُسكر .. ! شهية كالعسل .. مُره كالقهوه جمان .. ونقطه ..!! ........ بالليل .. مهره في غرفتها .. وكانت تروح وتجي بتوتر . .. سيف راح لهيا .. لأنوو قال بيجلس معاها وياخذ خاطرها قبل مسئلة الطلاق .. ـــ قبل مايمشي .. هو كان يلبس الشوز ..وهي كانت جالسه جنبه ع الاريكه .. قطعت يديها ... وهي تشبكهم في بعض .. رفع حاجبه وهو يلبس كبكاته : ترى رايح عشان اطلقها .. مهره مسويه مكابره : وانا قلت شي .. عادي يعني حتى لو تفاهمت معها وراضيتها .. اللتفت ناحيتها وبتحدي: جد ..؟! مهره نزلت عيونها ..: انا مابي أحد ينظلم بسبابي .. حتى لو كان هالشي ضد رغبتي .. نزل عيونه لكفوفها اللي حمرت من ضغطها عليهم .. فك اصابعها .. ومسك كفها .. : ماحد انظلم بسببك .. ومافيه مظلوم في المسئله كلها .. البنت تبي تطلق .. وانا بطلق .. وانتهينا .. مهره رفعت راسها: مره قلت لي .. انك رجل .. وتحتاج الحرمه بحياتك .. سيف .. انا احبك .. بس مو قاعده اقوم بالدور اللي تحتاجه في حياتك .. مابي اظلمك حتى انت .. سيف وقف .. وباللهجه هاديه يوضح لها : خلينا نقول اني طول السنين اللي فاتت .. بحثت عن احتياجي .. ومارسته..جربت ماحرم نفسي .. بس ماكنت مبسوط .. ماكنت اتعلق بأحد .. ولا اشتاق .. كل شي يصير مثل الشرارة وتطفي .. حدقت فيه .. وركز بعيونها كثير .. وكمل بصدق: كلشي اختلف يوم حبيتك مهره .. طغى حبك على كل شي .. ماعدت احتاج الا قربك والله .. امتلت عيونها دموع ..: بس انااا ..؟!!! سيف خذ شماغه على كتفه .. وحط عقاله على راسه : انتظرك عمر .. بيجي الليوم .. اللي بعالج جروحك .. وانتي اللي بتجيني من كيفك .. توسعت عيونها ..: انا اجي من كيفي .. اففف يالثقه .. لااتتعشم سيف يبخ العطر على ثوبه : طيب ماراح اتعشم. باقي نوف .. موجوده .. وغمز لها .. : على اقل من مهلك حبي .. صاحت وهي تقووم : سيييييف .. ! . جا ناحيتها وضم وجهها بكفوفه وباس عيونها .. : راح ارجع .. انتظريني .. لاتنامين .. هزت راسها ايجاب .. وبودها تتشبث فيه ومايروح .. توجه للباب .. وبسرعه راحت له ووقفت قدام الباب .. وبالحاح طفولي: امانه سيف لاتتأخر هناك .. ابتسم : من عيوني .. مهره: سيف انت قلت .. تنتظرني عمر .. سيف : وانا قد الوعد .. تحرك خطوه للباب .. ومنعته وكفوفها على صدره : سيف .. ! سيف ذايب عليها : ابوووي .. مهره ومحتاسه بنفسها :والله احبك .. والله والله .. سيف بحنية : وانا اعشقك .. مو بس احبك .. وتقدم خطوة للباب .. ومنعته: سيف .. !.. ضحك بحيرة .. لتصرفاتها الطفوليه .. اللي قيدت حركته : مهره خليني اروح عشان ماتأخر .. والله راجع لك .. مهره بعدت عن الباب: في أمان الله .. بعثر شعرها : في امان الكريم .. الوقت اللي غابه سيف مو طويل .. لكن احس انه مرت سنه .. وانا ماتصل .. لمراعاة الذوق في الموضوع .. فجأه تطلع قرينتي الشيطانه .. وتضحك ضحكة الساحرات .. ( هو لك .. لك لحالك .. انتي تحبينه وهو يحبك .. لاهيا ولانوف .. ولا اي حرمه في الدنيا تنافسك .. وش فيها اذا انتي نفسيه وماعطيتيه حقوقه .. هي الحياه بس هالشي ..) بعدها طلعت قرينتي الملاك .. (انتي جيتي اخر شي وتبين تتملكينه .. هو رجل ..ودامك مترهبنه .. خليه يعيش حياته .. وهم زوجاته وبالحلال ..) وصرخت الشيطانه(تخسيييين زوجاته .. كانووو .. انتي زوجته بس .. انتي قلبه .. انتي اللي يشوف الدنيا من عيونك .. انتبهي تتنازلين عنه .. لأي زفت في الدنيا .. وحتى في الاخره .. انتبهي له من الحور العين ..) .. جات الملاك ودعست الشيطانه .. وشاتتها ..(مهره .. لاتصيرين انانيه .. دامك ناويه تحبينه على الناشف خليه يعيش ..) هاجت الشيطانه وبصياح(خليها تقنعك .. وخليه عندها .. ياهبله .. شكله صالح هيا .. وشكله نام في العسل معها ..وخلي ام الجناحين تلعب عليك ) شهقت مهره : ايييييييييشششششش ..؟؟!؟؟ وفي الكراج سيف وقف بسيارته .. وظل شارد ومانزل على طول .. قبل شوي كان الوداع مع هيا مؤثر نوعا ً ما .. بس ماقدر يكذب عليها ويعشمها .. وهي اختارت الانفصال .. لما وصلت لنتيجه انه حاله ميؤوس منها .. اجمعت كل شي يخصها من بيته .. ولما كانوا الخدمات يركبون اشياءها بالسياره .. ابتسمت وببحه: بوفارس .. سيف : يالبيه .. كانت بعبايتها والشيله على كتوفها .. امتلت عيونها دموع : الله يوفقك .. واذا في البنت اللي علقتك فيها خير .. ان الله يتمم لكم ويبارك لكم .. سيف بخفوت: الله يجزاك خير .. سامحيني هيا .. بغصه وابتسامه: والله ماشيل عليك .. مد يده بيصافحها .. صافحته .. وشاف دموعها كيف انزلت .. زفر بثقل قلبه وخذها ضمها : هيا .. تكفين .. لاتبكين .. ولو تتراجعين عن قرارك .. والله البيت بيتك .. وما انتي رخيصه عندي .. ابتعدت .. وهي تمسح عيونها .. وابتسمت : اول مره اتخذ هالقرار بكل هالقناعه ..صدقني مو زعلانه ولاندمانه .. باللعكس اتمنى انك تلقى نفسك صدق .. والله تستاهل كل خير ياسيف .. ابتسم لها : وانتي تستاهلين كل خير والله .. تنهد بقوه .. وطفى السياره ونزل .. دخل اللبيت وصعد ..ودخل غرفته ..مهره كانت مو في الغرفه .. كانت طلعت تطمن على سيف النايم بغرفة فارس .. ابتسم وهو يشوف اكوام ورق الملاحظات اللي مقطعين .. مو بس مقطعين منتفيين على الطاوله اللي مقابله الاريكه .. كان واقف .. وسمع صوتها داخله من باب الجناح وتتحلطم بعصبيه..: يقووول رايح يطلق .. النصاب .. الى الان ماجاا ..اكيد تدلعت عليه .. وهون .. استغفر الله .. انا ليش جالسه انتظر .. كان مستمتع وهو يسمعها .. وشكلها قعدت بغرفة الجلوس .. وتكلم نفسها : كيف صدقتي هالجلف ..يمووت بالحريم .. يبي كذا.. مره هيا ومره نوف .. ومره انتي يكذب عليك ويقولك احبك وانتظرك عمر .. توسعت عيونه ..ورفع حواجبه .. مهره افتحت جوالها .. : عاد قلنا ذوق ومو رانه عليه .. بس خير يعني .. والله لاتصل واخرب عليه كل شي .. ورن جواله .. مهره انصدمت .. لما الصوت جا من الغرفه .. تيبست مكانها .. وخاصه لما طل سيف من الفتحه .. وبتهكم : اجل انا امووت في الحريم .. ؟! .. وانا نصاب .. وجلف بعد .. رفعت عيونها له وعضت شفتها : متى جيت ..؟! سيف بجمود .. عطاها نظره حارقه .. وراح رجع في الغرفه : مو شغلك .. توسعت عيونها .. وقامت لحقته .. وقف يشبك جواله بالشاحن .. ومهره :والله موقصدي .. سيف فتح علبة ماي شرب منها .. : هذا رايك فيني يعني .. مهره خلاص بتبكي :لا والله .. انا كذا كنت اتحلطم.. آسفه .. ياليتني نمت .. جلس سيف على سريره وتسند .. وببرود : ايه والله ليتك نايمه ولاسمعت منك هالكلام اللي يسم البدن ..شيلي هالقراطيس اللي قطعتيها .. وارميها بزباله .. مهره انصدمت .. اول مره سيف يكون جدي معها كذا .. طالعت عيونه ودموعها تجتمع .. في كثير اسئله في بالها .. بس مزاجه مايساعد .. وهي طينتها بكلامها .. تكونت غصه بحلقها .. وسيف يطالعها بجمود .. راح يفتح كبكاته .. وتوها مهره بتروح تشيل الاوراق المقطعه ..ناداها ..: تعالي خذي كبكاتي حطيهم بالعلبه لايضيعون .. توسعت عيونها بدون تلتفت .. بس اللتزمت الصمت .. وقامت وراحت له .. وهو ماد كفه وفيهم الكبكات .. وتوها بتاخذهم قفل يده وبعدها عنها. عقدت حواجبها.. وهو يقول :انا جلف ..؟! مهره بخفوت: لا .. رفع حاجب : انا نصاب .. ؟! مهره وفمها يتقوس : لا .. مد كفه بالكبكات .. وتوها بتاخذهم الا مسك معصمها وسحبها .. طاحت على صدره .. وصاحت لان خشمها ضرب بصدره : وجعععع .. وتوها بتقوم ..الا كبل حركتها برجله .. وتمسك فيها .. وقال : خليك .. ابيك بسالفة .. مهره : وخر عني .. تقعد تهاوشني .. كني اصغر عيالك .. سيف بنص عيون :ليش كنتي تسبيني في حلطمتك .. مهره منزله عيونها: لانك قهرتني .. سيف : قهرتك بوش ..؟! مهره:ولاشي .. سيف : طيب قولي لأني اغار عليك وابيك لنفسي بس .. سكتت مهره .. بس انفاسها كانت تلهب رقبته .. والقرب كذا مزعج.. وسيف جاذبيته لعينه .. همس : تغارين .. ؟! . قوليها .. وخفتي ارجع لهيا.. مهره مستوا عينها رقبته .. ذقنه .. فمه .. حاولت تبعد .. ومسكها .. رفعت عيونها : سيف فكني .. تكفى .. ابتسم وحرك حاجبه: ماراح اسوي لك شي .. عندي كنترول .. مهره رجعت سكتت.. سيف نفخ على جبينها .. : قولي .. واسئلي .. لاتتحلطمين لحالك .. عضت شفتها ببتسامه ..:يعني مازعلت مني .. هز راسه نفي .. وباس خشمها : باللعكس .. كنت اضحك على كلامك .. مهره بدلع عفوي :وليه تسوي فيني هالحركات ..وقعت قلبي.. سيف : عشان اجننك كذا .. لاخفتي تصيرين كنك بزر عامله عمله .. مهره : ياشيخ .. !! وبتبعد .. ومسكها من جديد .. : اذا عندك اسئله .. سئليها وانتي هنا .. لابعدتي .. ماعندي ايجابات .. مهره بعصبيه: كيف اسئل ماعرف ... ماركز .. اصلا ً عورتني .. فكني عشان اعرف اسولف .. سيف : اففففف يالعياره .. اللحين كذا عورتك .. مهره شتت نظرها : طيب قول لي .. وش صار مع هيا .. سيف : انفصلنا .. باسلوب مره حضاري .. مهره : كيف يعني حضاري ..؟! سيف : يعني سامحنا بعض .. وكل واحد خذ خاطر الثاني .. مهره : اهاا كويس .. عقدت حواجبها وهي تلاحظ الشي على كتفه .. وتغيرت ملامحها .. ظ،ظ¨ظ درجه .. سيف بقلق: وش فيك .. هزت راسها نفي : مافيني شي .. خلاص سيف ابعد ابي استعدل تضايقت .. فكها .. وراحت جلست .. لاحظ سيف توترها وهي ترتب شعرها .. وتلمس رقبتها .. سيف وهو يجلس : .. وش فيك تعكرتي .. هزت راسها نفي ... وقامت وبدون تلتفت: ارمي ثوبك مع الغسيل لاتلبسه ثاني .. عشان فيه آثار الانفصال الحضاري .. عقد حواجبه وهو يشيك في ثوبه .. وشاف بقايا الروج والكحل .. وفي داخله اففففف .. مهره صدت وبتمشي .. ناداها: مهره .. وقفي .. مو مثل ماشطح مخك .. مهره بدون تلتفت : ماشاء الله هذا رايح تطلقها كذا .. لو رايح تصالحها كيف .. راح ومسك كتوفها .. : ماني متعود ابرر اي تصرف .. اتصرفه .. بس مهره عشانك انتي وعشان شانك عندي .. راح ابرر . هيا حيل تأثرت وبكت يوم صافحتها قبل تمشي ..ضميتها من باب المواساه .. ناظرت عيونه .. مايحق لها التبرير .. ولاتستحقه .. لكن سيف يلتهمني كالاعصار .. ويجذبني الا مركزه فقط .. يصبح محوري .. مهما كابرت وابتعدت ..* مشاعرها متضاربه .. خايفه من انانيتها ..خايفه تكون ظالمه .. بس غصب عنها .. مو بيدها .. ماهي قادره تتحمل فكرة اي انثى معه .. لاحظ ملامحها وحيرتها .. حط يديه على خدودها وباس جبينها .. : غيرتك .. وانانيتك فيني .. ارحب فيها .. قولي مابدا لك .. ودافعي عن حقوقك .. ابتسمت وامتلت عيونها دموع .. وحركت شفايفها : احبك .. همس: قوليها بصوت .. مهره ببحه: أحبك سيف .. احبك وربي .. خذها ضمها : يابعد الدنياا .. ــــــ بعد شوي .. نزلت مهره لما درت ان سيف جايع وماكل .. راحت تسوي له شي خفيف .. كنت في المطبخ .. هدووء .. وليله بارده من ايام الشتاء الاولى .. ارتب الصينيه .. مبتسمه .. وحاسه براحه نفسيه .. قرب سيف نساني الهم والماضي وكل شي .. متأكده ان مع الوقت .. راح يطيح كل حاجز بينا .. سيف ماراح يخذلني .. ولايتركني .. سيف اليد اللي ماراح تتخلى عني .. كنت احط اللمسات الأخيره في الصينيه .. لما حسيت في صوت حركة في الصاله .. ابتسمت .. اكيد سيف نزل .. مع اني قلت له بآخذ له الصينيه فووق .. رحت والاناره خفيفه .. لكن ..!! هناك كيان واقف ومعطيني قفاه وشكله يطالع شي بالجوال .. ماهو سيف .. وجل قلبي من القامه .. والوقفه .. واستعذت من الشيطان في داخلي .. وببحه : انت مين ..؟! اللتفت .. لأشهق كالمصروعه .. اتسعت عيناي .. حتى كادتا تخرج من محجرهما .. قلبي سيقفز من قفصي الصدري .. رعب .. هلع .. جنووون .. لااااا .. كابوس .. ليس واقع ..!!!!! ذاك الواقف .. ميت .. والله مات .. كيف عاد .. هززت رأسي أنفي التصديق .. وهو امامي عاقد حاجبيه وينظر اللي بذهول وتسائل .. تقدم نحوي وبخفوت :انتي ..؟! مهره ابتعدت مثل المجنونه .. وصعدت فوق تركض .. افتحت غرفة سيف .. كان توه طالع من الحمام .. ومبدل . مهره اندفعت له وكأن كل اشباح العالم تطاردها .. وبهلع كانت تقول : ماماااات .. سيف .. تحت .. شفته .. عقد حواجبه وهو يمسكها بخوف : مهره اهدي .. من شفتي .. مهره تأشر مثل الخبله: الا أهوو .. والله .. والله شفته .. كان ميت .. هو مات .. سيف خاااف عليها مسك راسها ..ويمسح على شعرها : بسم الله عليك مهره .. تعوذي من الشيطان .. مهره مرعوبه وترجف .. قامت تبكي : يمممه شي يخوووف .. والله شي يخووف.. اهو انا ماجنيت ..ترى انا صاحيه .. سيف مسك وجهها وركز بعيونها وبحده: مهره .. طالعيني .. فهميني .. من شفتي .. مهره برجفه .. وسبابتها تأشر جهة الباب : عساااف ..عساف تحت .. عساف بالصالة ياسيف ...