الفصل الثاني
*أحببته قاࢪئاً*🦋📖
*
_*الباࢪت الخامس 🦋📖*_
_*الباࢪت الـسادس🦋📖*_
_*الباࢪت الـسابع 🦋📖*_
_*الـباࢪت الـثامن 🦋📖*_
#بارت5
#أحببتهُ_قارئاً
ــــــــــــــــــــــــــــــــــــــــــــــــــــــــــــــــــــــــــــــــــــــ
عدت سنه واللى كانت زى الحلم بالنسبالى وخلصت الروايه بتاعتى وبعتها واتنشرت،، مش قادرة انسي حفل توقيع الكتاب والناس اللى بتجيلى وهى ماسكه روايتي وعاوزين اوقع لهم... ياربي هو ده حلم مش كدة! انا فرحانه لدرجه انى خايفه... خايفه ان كل ده ينتهى ويختفى، لكن برجع واقول لنفسي الايه الكريمه فى سورة فُصلت
"ذلك رب العالمين" سبحانه وتعالى عوضنى.. عوضنى جداً
بعد وفاة بابا الله يرحمه كنت مكسورة وفاكرة ان العوض هلاقيه في الناس او فى شخص يحبني لكن العوض بيكون اكتر من كدة بكتير... لما الانسان بيتصدم فى وفاة حد او. فى اى حدث بيحصل فى حياته بيكون فاكر انه الناس هتعوضه لكن العوض الحقيقى هو انه ربنا ينور بصيرتك ويورك الطريق وزى ما قال النبي محمد صلى الله عليه وسلم
" من يُرد الله به خيراً يُفقهُ فى الدين"
فلازم تحمد ربنا انه اختارك انت بالذات من وسط ملايين الناس علشان يعلمك دينه وكلامه..
الحمدلله الروايه بتاعتى انتشرت بشكل سريع وحققت نجاح مبهر بالنسبه لكاتبه تنشر اول روايه ليها... اى نعم مكنش فيه ناس كتير فى حفل توقيع الكتاب وطبيعي انه يحصل لانه انا جديدة، لكن كنت مبسوطه بردت الفعل بعدين
اكتر من مجله كتبوا عنى وفيه جريدة نزلت خبر عن الكُتاب الشباب وكنت انا منهم وده فى حد ذاته مخليني متاكدة انى بحلم! 😂 لا وكمان خلصت روايتي التانيه وهتتعرض فى معرض الكتاب بعد شهر لا لا والكبيرة بقه انه لما بروح الكليه فيه ناس بتيجي تسلم عليا وناس بتكون معاها الروايه بتاعتى وبوقع عليها وبقه عندى متابعين كتير وده مكنش شيء مفرحنى الحقيقه.. لانه مش عارفه اخد راحتى واشير بوستس كتير 😂 لكن كنت مبسوطه وانا شايفه ماما فخورة بيا وبنتها اتغيرت 10000 درجه، حسيت قد ايه مكنتش قد المسئولية وكنت انانيه جدا، اذا كان انا فقدت بابا ف هما كمان فقدوه وعلشان كدة قررت اقرب من اهلى تانى واكسر الحاجز اللى حطيته بدون سبب!
فتحت الاكونت بتاعه واللى الحقيقه بفتحه فى اليوم 7 او 8 مرات وده غصب عنى...حاولت كتير ابعد وهو انا اصلا بعيدة واساسا هو ميعرفش انى كائن موجود فى الدنيا😂
كنت بدعى كل يوم مع كل فرض ان ربنا ينزع من قلبي الشعور ده واللى حقيقى مش فاهمه ايه هو خالص
ممكن ده يكون اختبار ليا وابتلائي جالى فى قلبي
عامةً هو الناس كلها إبتلائها فى قلوبها
بمجرد ما القلب بيتعلق باى شيءفى الدنيا ربنا بيحب يطهره ويعلمه ميحبش الحاجات الفانيه للدرجادى وانه يحبها وهو حا فى دماغه انه مفارقها،،المشكله انى عارفه وفاهمه ان ده غلط انى اعلق قلبي لكن ده شيء خارج عن ارادتى وربنا يعلم
_ أمنيه!!
_ أيوة دقيقه يا اسلام........... اتفضل ادخل
_ يعني لازم اخبط على الباب يعني لما ادخل اوضتك
ما انتى قردة فى كل حالاتك😂 لازمتها ايه الخصوصيه دى
_ اقول ايه ياربى ولا اعمل ايه...مهو اخويا ولازم استحمل غباءه
_ بت!!!
_ اهدى يا كابتن بهزر وانجز عاوز ايه😂
_ هو انتِ متأكدة انه مفيش حد ممكن يتصور معاكى
فى حفله التوقيع
_ لا طبعاً...اكيد الناس هتحب تتصور معايا
_ نعم!!!
_ انا مش هوافق يا اسلام زى ما اتفقنا ومتخفش الناس هتعرفنى باسمى وبس وزى ما قولنا محدش هيعرف عنى
او عن حياتنا اى حاجه خالص.
_ اه تمام،، انا خايف عليكي بس...
_ عارفه يا اسلام واساسا انا مش فارق معايا، المهم الناس تشوف كلماتى وتفهمها وتوصل لقلوبهم ده هدفى،،مش مهم يعرفوا مين كتبها المهم تغيرهم ويكونوا افضل بسببها
_ ربنا هيكرمك يا أمنيه والله
_ وانا مش عاوزة غير كدة...ان ربنا يجعل موضوع الكتابه ده هو سبب فى دخولى الجنه ونجاتى من النار
_ بإذن الله..ومتخافيش من اى حاجة انا معاكى وسندك
فى الدنيا، انا عارف انك اكتر واحدة كنتى بتحبي بابا
الله يرحمه ولكن دى سُنه الحياة يا أمنيه وكلنا هنموت
_(يا محمد احبب من شئت فإنك مُفارقهُ)
_ عليه افضل الصلاة والسلام،، ربنا ينورلك طريقك واشوفك مبسوطه دايما يا بنتي
_ ويخليك ليا يا اسلام...ويلا اتفضل بقه علشان عاوزة انام
_ نكديه بس عسل😂
_ ماشى يا سيدى الله يكرمك😂
مشى اسلام وسابلى ابتسامه مرسومه على قلبي قبل وشى هو اطيب حد فى الدنيا ومفيش حد زيه فى الدنيا الا واحدة بس وهى مريم....دول اكتر اتنين بحبهم واتمنى انى اشوفهم مع بعض واللى خلانى افكر كدة هو انى لما بجيب سيرة اسلام قدام مريم بحسها عاوزة تقفل على السيرة ووشها بيتغير.. للفرح طبعا ولكنها بتحب تخبي واسلام برضو سالنى عنها قبل كدة وبحسه مهتم بيها،،، نمت وانا بفكر فى روايتي
لانه بكرة هيبعتولى نسخه منها علشان اشوفها لو عاوزة اعمل فيها اى تعديل قبل ما تنزل فى معرض الكتاب الشهر اللى جاى...... وكل اللى كان شاغل بالى قلبي اللى اتغير
كنت حاسه انى ببالغ احيانا لكن انا اللى حاسه بنفسي
انا مكنتش كدة زمان..انا حاسه كانى خرجت من جسم واحدة ودخلت جسم واحدة تانية..حاسه بقلبي اللى بيحب كل الناس وبيتمنى ليهم الخير، حاسه بالرضا اللى مش مفارقنى فى كل تفصيله فى حياتى حاسه بالانجاز واهمهم انى لما بحط دماغى على المخدة ببقه راضيه عن نفسي
راضيه عن يومي وانى مسبتش فرض ولا سنه ولا سبت اذكار الصباح والمساء كنت فرحانه ان ربنا موفقنى لطاعته كل الفترة دى وانه هيفضل موفقنى طول حياتى وده ظنى بربنا
الدنيا كلها هتخلص وهتنتهى واحنا هنمشي وكل حاجه فعلا هتخلص...لكن اللى باقى هو حبك الازلى لربنا،، لما تحبه
و انك عاوز يوم القيامه يجى علشان تفضل جنبه ومش مهم الجنه ولا النعيم ولا اى حاجه فيها،، المهم انك تقعد جنبه وتفضل جنبه وتشوفه وتحبه ويحبك ويكرمك
سبحانه وتعالى.
هو بجد فيه ايه افضل من ان ربنا يحبك...كلنا فى الحياة بندور على شريك يكون كامل ومميز علشان يحبنا من كل قلبه وبنبقي فرحانين انه الشخص الجامد ده واللى اى حد يتمناه بيحبنى انا وشريكي انا ف اتخيل لما صاحب الكمال والملكوت والرحمه واللى خلقك بايده الكريمه بيحبك ومن قبل ما يخلقك بيحبك، تخيل مدى سعادتك انه اصطفاك عن باقى الناس وحب قلبك انت بالذات والله سعادة ما بعدها سعادة......... ربنا يحبنا جميعاً💖
# يتبع
🎀🎀🎀🎀🎀🎀🎀
#بارت6
#أحببتهُ_قارئاً
وصلت معرض الكتاب ودخلت بسرعه لانى كنت متأخرة وقالولى عن رقم الجناح فى صالة المعرض... وانا ماشيه وببص علشان اتاكد هو كل الناس اللى هناك دى واقفين علشانى.. كلهم مستيني اجى واوقع لهم!!
حسيت انى عاوزة اعيط لكنى مسكت نفسي وقابلت الجميع بابتسامه وبدات اوقع على الروايه وكان المحرج بالنسبالى هو الصور... ببقه مكسوفه وانا برفض انى اتصور، طبعا برفض بشكل لطيف بحيث محرجش اللى قدامى وعامةً مفيش حد كان بيطلب منى بعد ما شافونى مش بوافق..الله يجزيك
يا اسلام على الاحراج اللى حاططنى فيه😂💔
كانوا بنات كتير وشباب برضو ف كنت واخدة راحتى طبعا مع البنات اما اللى بيجى شاب عاوز اوقع ليه ف مكنتش ببص اصلا وده لانى كنت واخده عهد على نفسي اغض بصرى
ايدى وجعتنى من الكتابه لان العدد كان كبير جداً 😂
وفى لحظه جى دور واحد علشان امضيله حط الكتاب على المكتب اللى انا قاعده عليه شديت الكتاب وانا طبعا مببصش خالص...مسكت القلم علشان اكتب فسألته
_أسم حضرتك؟
_كريم عبدالله
ايه.. هو قال كريم... ده... كنت هبص لكنى مسكت نفسي
ده انا كنت بغض بصرى علشان مشفهوش... بالنسبالى انا مش شايفه اى حد اصلا قدامى حتى لو كنت حاطه جهاز رؤيه اللى هو بيكبر الوشوش فى عنيا والله مكنش هيهمنى لكنى كنت بغض بصرى علشانه هو وبس.. لانى مش عاوزة اشوفه!
استجمعت نفسي وكتبتله عبارة
"أبقي كما عرفك الجميع اول مرة،لا تجعل النور فى قلبك ينطفئ لانه يُضيع عتمت الآخريين،،إلى القارئ كريم عبدالله"
زقيت الكتاب لقدام على المكتب فهو خد الكتاب ومشي
لكنى كنت متوترة جدا واعتقد انه بان عليا لكن حبيت اخبي توترى فى انى اتكلمت مع البنت اللى عليها الدور
وضحكنا مع بعض
بعدها بشويه جت واحدة وقالتلى انها من الامن وانه فيه واحد بره بيقول انه عاوز يدخل وانه كان هنا من دقيقتين ولكنه نسي يقولك حاجة
_ واحد مين ده؟
_ معرفش، لكن قال انه عاوز يشوفك
_ هو فين؟
_ انا مرضيتش ادخله وهو واقف بره عند المدخل
_ تمام
فى الحقيقه مكنتش عاوزة اخرج واروح وخصوصا انا مش متاكدة انه هو،، لا هيكون هو ليه يعني...ممكن يكون حد تانى
لكن قررت اروح اشوف مين.....
خرجت وقبل ما اوصل المدخل كان فيه شباك.مشيت ناحيته وبصيت لقيته هو اللى واقف، لكنه مكنش وحده كان فيه واحد واقف معاه والواحد ده انا اعرفه كويس هو صديقه وادمن الجروب وكمان هما الاتنين مكنوش لوحدهم كان فيه ناس كتير حواليهم بيتصوروا معاه..للحظه حسيت ان قلبي واجعنى......مكنتش غيرة عليه خالص لكنى كنت حاسه احساس وحش اوى وهو انى بنت عاديه وبسيطه جدا
انا بروح كافيهات بسيطه وبطلب طلبات بسيطه ومتأكدة انى لو دخلت اى كافيه كويس او مطعم انا مش هعرف اطلب حاجة وده من كميه الاسماء والحاجات اللى انا مش عارفاها واللى ناس كتير تعرفها جدا وبالنسبالهم هى حاجة عاديه، انا لا فاشونستا ولا بتكلم انجليزي كويس، انا مبنزلش ستورى كتير ولا اعرف اضحك على حد بالكلام الحلو...انا عاديه لدرجه مستفزة وممله جداً....انا كنت رايحه بس لما شوفت كل الناس اللى حواليه واللى اغلبهم بنات افتكرت انا ايه وانى مش لازم انسي نفسي....هو حواليه ناس كتير ومبسوط بيهم وبحياته...اديته ضهرى ورجعت مكانى وكملت اللى كنت بعمله
بالليل الناس خفت شويه وبعض الكُتاب مشيوا ، وانا كنت مستنيه اسلام علشان يجي ياخدنى ونروح ولكنه اتاخر اتصلت بيه وجالى وروحنا البيت، كنت حزينه... حزينه اوى
اتوضيت وصليت وفضلت باصه للسما وبدعيله يارب خرجه من حياتى ومن قلبي... يارب اهو قلبي بين ايديك نقيه ومتخليهوش يحب. حد غيرك.. يارب ارزقنى راحة البال
خلصت صلاة ونمت معيطه وانا بتمنى ان تحصل المعجزة وانسى.... لكن ربنا كان ليه حكمه وليه قدر تانى كتبهولى علشان يرضى قلبي
صحيت الصبح على صوت ماما وهى.....مش بتزعق!!!
لا بجد ماما صحتنى عادى النهاردة....قومت وغلست وشي ودخلت احضر معاها الفطار وكانت هاديه جدا، كنت كل شويه ببصلها وهى خدت بالها قامت ضحكتلى وقالتلى
_ مالك يا بت، منا مخلفه عرة!
_ ماما هو انتِ كويسه؟
_ ايوة كويسه..ليه فيه حاجه!
_ لا مفيش
ابتسمتلى...
_ ماما انا عارفه الابتسامه دى كويس وعارفه المعامله دى وحفظاها...النهاردة صحتيني بهدوء ومزعقتيش ولا مرة
ماما....خدى منه الجاتوه وقوليله.مش موافقه!😂
_ انتِ شوفتيه الاول...ده عريس محترم وابن ناس..شوفيه وبعدين ارفضى
_ لا انا مش هقعد مع حد يا ماما وانا قولتلك قبل كدة مفيش خطوبه الا لما اخلص جامعه
_ يا امنيه متتعبنيش، مش هتخسري حاجة يعني هما دقيقتين اقعديهم معاه وبعدين ارفضى او اقبلى..كله براحتك
_ حاضر يا ماما...بس دى اخر مرة علفكرة..بعد كدة مش هقعد مع حد الا لما اخلص جامعه
_ ان شاءالله مش هتقعدى مع حد،ويكون العريس ده
من نصيبك
سكت طبعا وانا بحاول اتجاهل الموضوع ،تانى يوم بالليل جى العريس وانا مش فارق معايا خالص..لبست الدريس والخمار وروحت علشان اساعد ماما وطبعاً هى مخلتنيش اعمل حاجه علشان انا العروسه🙂
بعد ما اخواتى قعدوا معاه وقدمنا واجب الضيافه
جى اسلام وفاتح بوقه نص متر
_ فيه ايه يا اسلام...براحه يا اخويا متفرحش كدة انا قعدالك ومش خارجه من الاوضه اللى انت هتمت وتاخدها منى🙂😂
_ طيب يلا يا اطلعى علشان تقعدى مع العريس وبلاش الاسئلة بتاعتك دى...ها؟
_ بص انا هبهرك 😂
_ يبقه نويتي تطفشيه يا بومه
مشيت والاحساس السخيف بتاع كل مرة ده وهو انتى اتوتر وحاسه دلوقتى انى قلبي هيقف...جرا ايه يا امنيه هى دى كانت اول مرة اجمدى يا بت اهو كلب وهتطفشيه اقصد عريس وهتطفشيه😂 دخلت الصاله وعيونى بتتامل السجاد
_ السلام عليكم
_ وعليكم السلام ورحمةالله وبركاته
انا سمعت الصوت ده فين..طب ابص ..لا يا بت اثبتى مش من الاول كدة....فضلنا ساكتين حبه محترمين كده وبعدين..
_ لسه زى ما انتِ يا أمنيه
لا مبدهاش بقه انا هبص.......
_ أنت!.....انت بتعمل ايه هنا؟
_ جاى اخدك واهرب بيكى بعيد
_ لو سمحت احترم نفسك
_ كنت مبسوط وفرحان بيكي وانا شايفك فى الشارع وانتى ماشيه زى الملكه بلبسك المحترم والساتر ..كنت مبسوط وغيران فى نفس الوقت، غيران من هدايه ربنا ليكي وثباتك على الطاعه وانى بجد كان نفسي اوصل لربع اللى وصلتيه
انا جايلك يا أمنيه وندمان، كنت صغير وطايش لكن دلوقتى انا مُدرك وعارف انتى ايه ومين
= هتفضلى ساكته كدة؟
_ عاوزنى اقول ايه؟
_ قولى اللى فى نفسك
_ انا دلوقتى حاسه بخزى..وانت بتكلمنى دلوقتى وتقولى عن علاقة حرام كانت فى حياتى اومال لما اقف بين ايدين ربنا هبقي مكسوفه ازاى،، ده يارب الارض تتشق وتبلعنى
يارب اختفى ولا انى اشوف الموقف ده
_ انا اسف
_ متعتتذرش...
=حسام، انا مش مستوعبه لدلوقتي انك هنا وجاى تتطلب ايدي..لو كان حد مكانى هيشوف ان ده عوض ربنا وانه من ترك شيئاً لله عوضه الله خيراً منه، لكن واعذرنى على اللى هقوله..وجودك هنا فكرنى بنسخه وحشه من نفسي انا كنت بجاهد علشان انساها..ده بعد ما انفصلنا انا غيرت حتى صوت المسج...لانه كل ما يجيلى مسج بفتكرك وبفتكر الضلال اللى كنت فيه...غيرت هدومى وموبايلى بعدين غيرته وحتى قعدتى فى البلكونه لما كنت بكلمك مبقتش اقعدها لانه مش هقولك ندمانه انا كنت قرفانه...قرفانه من نفسي ومن كل اللى عملته ف كنت ببعد علشان اقدر اعيش واستوعب الحته الحلوة اللى لسه فاضله فيا،،
=انت كبرت فى نظرى برضو انك.جيت واتقدمت وصدقني قليلين اوى اللى بيعملوا كدة وكتر خيرك انك جيت لواحدة كنت تعرفها زمان...
_ انتِ انضف حد انا اعرفه وحتى احسن وافضل منى وده مش مجامله ده حقيقه
_ ربنا يكرمك...وربنا يقدم ما فيه الخير
قومت ودخلت اوضتى وانا حرفيا عاوزة اعيط
ماما دخلت ورايا علشان تتطمن قولتلها سيبوني افكر
وانا طبعاً مقررة انى هرفضه لكن قولتلها كدة علشان عاوزة اقعد لوحدى
قلبي فرحان لان ربنا عوضنى والاحساس اللى كنت بحسه زمان انى رخيصه وانى كنت على علاقه بحد ده كان اكتر احساس تاعبني وكنت بفكر هو كان شايفني ازاى وبيفكر فيا ازاى...لكن ربنا اكرمنى واهو حسام بنفسه جى وهو شايفنى انى هصونله بيته واولادى وشايفنى افضل من الاول
لكن فى نفس الوقت حاسه بالخجل من ربنا
كان نفسي ان اول علاقة ليا تكون مع الشخص اللى هكمل معاه حياتى...كان نفسي اعرف الحب معاه هو وبس واقوله وبكل ثقه وفخر ان انا محبتش قبلك وانت اول شخص فى حياتى، لكن انا ندمانه وربنا عالم باللى فى قلبي
تانى يوم قولت لماما انى مش موافقه وطبعاً كانت خناقه كبيرة لكنها مرت على كل حال
#يتبع
🎀🎀🎀🎀🎀🎀
#بارت7
#أحببتهُ_قارئاً
مريم:- أمنيااااه، ياربي هعيط😭
وجات وحضنتنى وحقيقي انا مكنتش عاوزة اسيبها لكن احنا كنا فى الشارع فقولتلها..
_ طيب كفايه يا مريم احنا فى الشارع😂 تعالى ندخل الكافيه واعملى اللى أنتِ عاوزاه جوه😂
_ تصدقى انتِ بومه، مش عارفه والله بحبك على ايه
بس بحبك🥺
دخلنا الكافيه وانا بجد طايرة من الفرح،،انا و مريم تقريباً لينا سنه مشوفناش بعض وده لان مريم فى جامعه فى محافظه تانيه ف مبتجيش الا اخر السنه،، اتكلمنا كتير وحكينا لبعض حاجات كتير السوشيال ميديا مبتقدرش توصلها بنفس الاحساس،، وعلشان كدة كنت اغلب الوقت بتصل بيها واقولها كل حاجة بصوتى لانه بحس الرسايل جافه ومبتوصلش احساسي وتقريبا معظم العلاقات حصل فيها شرخ بسبب ان حد يشوف الرسالة وميردش فيقوم التانى يزعل ويبعد بدون ما حتى يعاتب.... رغم انه لو كان عاتب وسأل كان عرف ان التانى عنده ظروف، علشان كدة اى علاقه مفيهاش مُعاتبه هى علاقة محكوم عليها بالموت ولو بعد حين
وفى وسط كلامنا سألتنى مريم
_ انتِ رفضتى حُسام ليه؟
بصيتلها وانا مستغربه
_ وأنتِ مين قالك؟
بعدين حطيت ايدي على دماغى اشارة على انى افتكرت
ان حسام ابن عمها لمريم واكيد هتكون عرفت من اخته
بصيتلها وقولتلها وانا بحاول اخبى اللى جوايا
_ علشان الجامعه والكتابه وبجد حياتى مشغولة جدا ومش عاوزة اتخطب لحد واظلمه معايا
.
_طيب وهتفضلى كدة لحد امتى
_ ايه هو انا كبرت اوى كدة؟😅
_اقصد ناويه تتخطبي امتى
_لما ربنا يأذن.....مريم هو ايه الاسئلة دى؟😐
_اصل كنت حاسه ان حسام بيحبك ده غير انه انسان كويس وبصراحة كنت متوقعه انك هتوافقى.
_ لا مفيش الكلام ده...انا قلبي حديد،، صحبتك زى الفل
ومهما جى حد واتقدملها هترفضه😁
_ اه مهو الست هانم مشهورة دلوقتى وهتدلع براحتها
_ اسكتى يا مريم انا مش مصدقة والله😂، الاكونت بتاعى عليه 100 الف دول جوا منين، بعد روايتى التانيه العدد كل يوم بيزيد لحد ما وصلوا للرقم ده.
_ربنا يباركلك يارب ويوفقك، انا فخورة بيكى يا امنيه وفرحتى بيكى متتوصفش
_ياحبيبتي انتِ ربنا يحفظك ويباركلى فيكى🥺
_طيب قوليلى هتعملى ايه الخطوة الجايه
_بصى من كام يوم فى ناس عرضوا عليا يسجلوا الرواية بتاعتى على هيئة محتوى صوتى ولسه مردتش عليهم
_طيب حلو...وافقى
_لسه بفكر...هو اكيد حاجة حلوة لانهم بيساعدوا المكفوفين انهم يسمعوا روايات بس كمان لان الروايه جديده ف حابه أأجل الموضوع ده
_ هو لازم تسجلى الروايه الجديدة؟ ممكن تعملى القديمه والجديدة بعدين
_ايوة ممكن،، بس هيحتاج منى وقت، لانه لازم اروح واحضر علشان اتاكد انهم مش هيغيروا حاجة فيها
_يا بنتى كلها ساعه ولا حاجة...وافقى لانها خطوة مهمه وهتساعدك فى مشوارك
_بإذن الله
_طيب بقولك ايه...انا اسفه بس لازم امشي دلوقتى لانه اخويا وولاده هيجوا عندنا ف عاوزة الحقهم
_تمام يا مريم، مش هقولك حاجة بس لازم نشوف بعض تانى🥺
_ اوعدك
مشينا وانا كنت متضايقه لانى مخبيه موضوع حسام عن مريم.... الحاجة الوحيدة اللى خبيتها عنها وده لان حسام
ابن عمها فمكنتش بقولها زمان علشان علاقتى بيها متتأثرش
بعدها بيومين روحت الاستوديو علشان اتابع الروايه بتاعتى واللى وافقت انى اسجلها بعد إلحاح شديد من مريم
كانوا الناس كويسين ومنضبطين فى شغلهم ف اتفقت معاهم انى هاجى اتابع معاهم كل جمعه وده لانى فاضيه يوم الجمعه بس،، ف الراجل كتر خيره وافق رغم ان ده هو يوم اجازته الوحيد
كل جمعه الساعة 10 بكون موجودة فى الاستوديو والحقيقه الموضوع كان اصعب مما تخيلت...لانه فيه ناس بيغلطوا
فى نطق بعد الكلمات اللغويه البحته واحيانا كنا بنعيد التسجيل تانى لانه الاداء مش احترافي فضلت شهر بروح كل يوم...على قد ما كان الموضوع مضايقني فى الاول الا انى حبيت المشوار ده اوى وكنت حابه روح الفريق اللى بينا
وقدرت افضى نفسي يوم تانى ف بقينا نسجل الخميس العصر والجمعه الصبح
النهاردة روحت الاستوديو علشان اتابع زى ما متعودة
بعد ما دخلت لقيت السكرتيرة..... اه السكرتيرة! 😂
مهو المكان نضيف وكبير وهما بيسجلوا روايات كتير يعني يعتبر زى مجموعة استوديوهات فى استوديو واحد
قالتلى انه الاستاذ خالد عاوزنى فى مكتبه طبعاً كنت مستغربه لانه انا مقابلتش استاذ خالد ده الا مرة واحدة
لما اتفقت معاه على تسجيل الروايه طلعتله ومكتبه كان
فى الدور الرابع وانا عندى فوبيا من الاماكن الضيقه ف اضطريت اطلع بالسلم🙂
وصلت الرابع وانا متبهدله جدا ف روحت ادور على تواليت اغسل فيه وشى واظبط الخمار.. وبالفعل حصل
سألت عن مكتب الاستاذ خالد وواحد من الموظفين وصلنى خبطت الباب ودخلت بعد ما اذنلى
أمنيه:-السلام عليكم ورحمة الله وبركاته
الاستاذ خالد:- وعليكم السلام ورحمة الله وبركاته
اهلا بيكي يا استاذة أمنيه اتفضلى
أمنيه:- يزيد فضلك
قعدت وخدت بالى ان فيه حد بيتكلم فى الفون وواقف
فى البلكونه بتاعت المكتب،،للحظه اتضايقت لانه انا
فى مكان مع شخصين غريبين عليا والباب مقفول وده يمكن كان واضح عليا
فعكيت الدنيا والاستاذ خالد سألنى لو متضايقه من حاجة
او لو حابه نتكلم تحت فى الكافيه لكن طبعاً هو احرجنى بسؤاله ف قولتله انى عندى فوبيا من الاماكن المغلقه
ولو ينفع نفتح الباب،ابتسملى وحسيته مبسوط قام وفتح الباب ورجع قعد على مكتبه
الاستاذ خالد:-كنت عاوزك فى موضوع
أمنيه:- اتفضل حضرتك...سمعاك
الاستاذ خالد:- كنت محتاج تكتبي قصيدة لشخص عزيز عليا الحقيقه انا سالت وقالولى انك كاتبه شعر ممتازة ف بعد اذنك لو تشوفيلنا وقت وتكتبي انشودة وان شاء الله نتفق على المقابل
أمنيه:- اشكرك جداً ده من ذوق حضرتك...وطبعاًمفيش مانع
لكن طالما هى انشودة دينيه ف انا هطلب طلب واتمنى حضرتك متعارضنيش وهو انى مش عاوزة مقابل..خليها لوجه الله ده شرطى الوحيد
وقبل ما يرد عليا دخل الشخص اللى كان واقف فى البكونه للحظه قلبي كان هيقف وحسيت انى متلخبطه
ده هو....اثبتى يا أمنيه.....ياربي خرجنى من الورطه دى
لقيت الاستاذ خالد بيبص عليه وقاله سمعت يا كريم بتقول مش عاوزة مقابل
بصلى وقال طيب مش تعرفنا الاول..(هو بيستظرف مش كدة
اومال مين اللى بعتلى الامن وقال انه مستنيني)
قام الاستاذ خالد عرفنا على بعض وشاور بايده عليا وقال
الأستاذ خالد:- الكاتبه والروائيه أمنيه عبدالعظيم
استاذة أمنيه ده القارئ كريم عبدالله لو تعرفيه او سمعتى صوته
أمنيه:- الحقيقه محصليش الشرف
ايوة طبعا مش هبين انى اعرفه...
كريم:- لكن انا حصلى الشرف واعرف حضرتك ومتابع كتاباتك....حقيقي حضرتك موهوبه وهيكونك مستقبل حلو فى مجال الكتابه....
انا اتصدمت من كلامه وسكت كتير على ما استوعبت انى لازم ارد ف رديت بصوت متقطع
أمنيه:-شكراً لحضرتك
الاستاذ خالد:- الانشودة اللى هتكتبيها هى خاصه بكريم
أمنيه:- ااا والله...طيب..... طيب كويس
(منك لله يا امنيااااه ياربي ايه اللى أنا هببته ده ازاى اوافق من الاول كدة منغير ما اعرف اللى هكتبه هكتبه لمين
ياربي على الغباء..هعمل ايه انا دلوقتى... مش هعرف ارفض بعد ما قبلت)
الاستاذ خالد:- فيه مشكلة يا استاذة أمنيه
أمنيه:- لا ابدا....... والقصيدة عاوزينها امتى
الاستاذ خالد:- انا بقه خرجونى من الموضوع اهو اتفقتلك
يا كريم وحضرتك وافقتى يا استاذة أمنيه يبقه تتفقوا انتوا هتعملوها امتى والتفاصيل بتاعتها كلها
بصلى وقال اللى انا كنت خايفه منه
كريم:- هو لو ينفع حضرتك تقوليلى الايميل بتاعك او اى جهه تواصل علشان نقدر نتفق على التفاصيل
وشي جاب الوان وفضلت ساكته ومخضوضه وأخيراً اتمالكت نفسي واتكلمت
امنيه:- احممم..... اعتقد لو اتفقنا
يتبع ...