❴🔢❵☟الــبــــــ❴ 2️⃣ ❵ـــــــارت☟
رواية زواج بالاتفاق🤍🤍🤩💫🖇️⤵️📌
8/9/10/11/12/13
٨/٩/١٠
زواج بالاتفاق
البارت الثامن
صلي علي رسول اللّه.. 💙
لتانى مره وانا معاه معرفش فوقت بعد اي ، فايقه ناسيه كل ال حصل ، لحظه، اتنين، وكان كل ال حصل بيتعاد قدام عينى من اول وجديد كانه لسه بيحصل ، عيطت تانى كان ال حصل لسه بيحصل دلوقتى ، كأنى لسه قدام طارق بيحاول يعتدى عليا
اخدت بالى من يونس ال قاعد سرحان ع الكرسى ف المستشفى ، وال لسه م اخدش باله من انى صحيت، وانا بحاول اتعدل ، الكانولا ال ف ايدى وجعتنى ، اتاوهت بصوت واطى بس كان كفيل يفوق يونس ، بصيتله لقيته بيبصلى ، ولتانى مره وتقريبا ف نفس المكان يبصلى بطريقه غريبه
بس المرادى عرفت افسرها، كان متعصب ، عروق رقبته باينه كانه مصارع داخل مواجهه ف حلبه، ايده مشدوده كأن بيضرب المنافس ال قدامه، عنيه الرصاصي اصبحت فاجاه شديده السواد،، بس ف حاجه كمان غير العصبيه ، نظرته كانت فيها حنيه ، واسف ، كأنه.. كأنه بيتاسف ع حاجه انا مش عارفاها ، او حاجه هو معملهاش أصلا
_ محتاجه اساعدك ف حاجه؟
= نادي بس الممرضه تسندنى عشان اقعد
_ طب مانا ممكن اساعدك ، هاتي ايدك
= تانى ي يونس؟!
_ خلاص خلاص ، استني
نادي الممرضه وجت ساعدتني بعد م قالت اني عادى امشي مجرد م المحاليل ال ف ايدي تخلص
سندت ضهرى ع السرير مستنيه المحاليل تخلص وغمضت عينى ، قبل م اخد بالي انه مركز معايا ومنزلش عينه من عليا
_ مي
رديت وانا مازلت مغمضه عينى، انا خايفه ، خايفه نظره عينه تتغير
= هممم
_ بصيلى
= غض البصر ي يونس!!
_ تمام تمام ، احنا محتاجين نتكلم
قبل م اقول حاجه ولا هو يقول حاجه كنت فتحت عينى ، قلعت دبلتى ، وحطتها قدامه من غير كلام
= مش ده ال عايزنا نتكلم فيه ؟
قبل م يقول حاجه ولا انا اقول حاجه لقيته مسك الدبله تانى وحطها قدام ايدى من غير م يلمسني
بصيتله ب استغراب_ اي ده؟
= البسي دبلتك ي مي و لأ مش ده ال عايز نتكلم فيه
من غير م اتكلم كنت لبستها وانا ساكته، انا مش حمل مناهده ولا انه يزعق ، نزعق بعدين لكن دلوقتي مش قادره
_ مي
= ايوه ي يونس
_ انا اسف
= ع ؟!
_ ع إنى كان ممكن ملحقكيش ، ع انك واجهتى ده لوحدك ، ع رعبك خلاص اللحظات ال مكنتش فيهاا معاكي ، ع انك حسيتى انى ممكن مجيش ولو للحظه ، ع ان كلب زي ده بصلك ، ع انه حاول يلمسك ، ع انه خلاكي تبكى ، ع إنى قولت هخرج بس اجيب حاجه وارجعلك قبل م تخلصي السكشن ، ع انى معرفتكيش إنى كنت مستنيكي عشان اوصلك لما تخلصي
= واحناا هناك سألتك سؤال وانت مردتش عليا ، ممكن اعرف اجابته دلوقتي؟
= المحاليل خلصت ، يلا عشان نمشى
مسحت دموعى ، واتنهدت بياس وحاولت اقوم دوخت ، سندت ع الجدار ولتالت مره مد ايده عشان يسندني ، مردتش عليه ولا بصيتله وقومت ، انا عايزه أعيط تانى ، عايزه اعيط اوي ، انا مش فهمانى ولا فهماه ، طيب هو مصدقنى ولا لا ؟ مصدق كلام طارق ولا مكدبه؟ واثق فيا ولا لا ؟ عايز يتجوزني عشان انتقامه ده لا لا ؟
بس انا لو مفهمتوش ده طبيعي ، انما انى مفهمش نفسي ده قمه الجنان والله ، انا.. انا مش عارفه انا عايزه اي؟ مش عارفه عايزاه يصدقنى لي ؟ انا مش عايزه ابان قدامه مجرد واحده منافقه ، بتخدع ال حواليها باللبس وهى دايره ع حل شعرها زى م هايدى قالت ، وزى م طارق حاول يثبت ده النهارده بكلامه،، بس هل ده السبب الوحيد ؟ ،، مش عارفه..
نزلنا تحت ببطئ لأنى مش قادره امشي اصلا ، واحنا خارجين دفع حساب المستشفى ونزلنا
اتكلمت بخفوت _ هي الساعه كام؟
= 11
_ محدش من البيت رن؟
= مامتك رنت وانا رديت عليها وقولتلها انك تعبتى شويه وانا معاكى
_ تمام ، فين شنطتى ؟
= ف العربيه تعالي
نزلنا ووصلنا عند العربيه ، فتحلي الباب وركبت ولف ركب ومشينا ، طول الطريق متكلمناش ، بيتهيألي دموعي بس هي ال كانت بتتكلم ، حاولت اوقفها مقدرتش ، مش متخيله اي كان هيحصلي لو مكنش جه ، مش متخيله كنت هواجهه لوحدى ازاى، مش متخيله طارق ده كان هيعمل فيا اى لو يونس اتاخر شويه ، ولاول مره أعترف اني لقيت الأمان ، انى ممكن اطمن انى هلاقي حد جمبي ، ولتانى مره اقلق من الإحساس ال وصلتله ، قاطع سيل تفكيرى صوت يونس
_ بالنسبه لسؤالك ال قلتيه فانا هجاوبك عليه بس لما نوصل البيت
هزيت رأسي من غير م اتكلم وسكت
جه قدام محل ملابس ووقف ، بصيلته بأستغراب
_ هنجيبلك هدوم بدل هدومك دى
اخدت بالي انى لابسه الجاكيت بتاعه
سألته وانا بدعي ربنا ان الاجابه تطلع عكس ال ف دماغي
_ هو مين ال لبسني الجاكيت ده؟
= احم ، انا
_ نعم؟ ،، ليييي
= مكنش ينفع ندخل المستشفى بهدومك المتقطعه ي مي ، المستشفى كانت أكيد هتبلغ ، وكان هيبقى فيها محضر وانا مكنتش هرضى ان ده يحصل فعملت كده
_ ده ع اساس انه وهما بيكشفوا م اخدوش بالهم
= أولا ال كشف عليكى دكتوره مش دكتور، اكيد مكنتش هسيب دكتور يكشف عليكي يعني فقولتلها انك بس محتاجة محاليل لان الحاله دي بتحصلك لما بتهملي ف اكلك،، ولان ده حصل قبل كده يوم م كنا بنجيب الشبكه فكان سهل اقولها نفس الكلام ال الدكتور قاله يوميها،، وكمان كنت عارف ان ده فعلا سببه اهمالك ف اكلك ، فركبنا المحاليل واستنيتك تفوقي ، وبس
اتخرست ، مش معقول يعني اخد باله من كل ده،، أكيد صدف يعني ، مش معقول مركز مع كل ده
فوقت وهو بيمدلى ايده بمنديل ،
_ اي ده؟
= امسحي وشك ، انتى مبطلتيش عياط من ساعه م فوقتي
خدته ومسحت وشي ونزلنا عشان نجيب اى هدوم ليا بدل م ادخل ع اهلى والجيران بالهدوم دي
دخلنا ولقينا بنت ف المحل ، بس انا ك مي ، بنظرتى كده بقول ان مبدئيا كده البت دى مسهوكه،، وشكلنا كده هنخرج من المحل ده بشعرها ف ايدي
اتكلمت مع يونس بابتسامه سمجه وتجاهلتنى خالص ولا كأنى واقفه جمبه
* اتفضل ي فندم،، المحل كله تحت امر حضرتك
نهت كلامها بابتسامه رخمممه ، وباااارده وساقعااااه
ع الرغم من كل الحزن ال كنت فيه بس مقدرتش اسكت
= انا معاه ع فكره لو تاخدي بالك
* سوري ي فندم م اخدتش بالي من حضرتك
رديت ف سري عشان مبانش انى متضايقه = مهو طبيعى متاخديش بالك مني وانتى مبحلقه فيه كده ، ده انتى بتبصليه بهيام وانا لسه مبصتلوش البصه ده،، بس لحظه.. وانا ابصله البصه دي لي اصلا؟
لقيت يونس بيبتسم بمجامله ورد عليها
_ عايزين بس نروح قسم الدريسات والاخمره
* اتفضل ي فندم من هنا
لقيت يونس بصلي _ يلا ي مي
مشيت وراه من غير م اتكلم، اشترينا دريس وخمار ولبستهم ومشيت، وصلنا البيت ركن العربيه ولقيته بينزل
_ هو انت رايح فين؟ مش هتوصلنى وتروح
= عايز اتكلم مع عمي ف حاجه
فهمت أنه اكيد هينهي ال بينا،، بس لو منههوش ف المستشفى مردتش وطلعت وسبته ع م يخلص ويحصلنى، مكنتش قادره اقف ، انا مش قادره اتكلم اصلا، ده فضل من عند ربنا انى لسه قادره اقف ع رجلي لحد دلوقتي اصلا
طلعت واول م وصلت ، خبطت ع الباب ولقيت امى بتفتح الباب ،
_ اي ده يبت ، انتى مبهدله كده لي؟ ، وفين هدومك ، انتى مكنتيش خارجه بالهدوم دى؟ م تردى اى ال حصل
خصلت كلامها ودخلت ورايا وسابت الباب مفتوح
= مفيش حاجه
مسكت دراعي بعصبيه _ لا فيه ، م تردى ف اي؟
صرخت فيها _ مفيش كان فيه واحد هيعتدى عليا ، استريحتي
ضربت بايدها ع صدرها = ي مصيبتى ي مصيبتى ، ي خرابى اي ال حصل ، عملك حاجه يبت ، انتى لسه زى م انتى ولا اي ال حصل ، يلهوى الجيران هتقول علينا اي لما يعرفوا ، ي خرابي ولا خطيبك
بصتلي
= خطيبك عرف ي بت، عرف صح
اتجمدت مكانى ، معقول تفكيرها كله محصور ف الجيران وخطيبى ، انا مفرقش معاها خالص ، مفرقش معاها ال شوفته وال كان هيجرالي وخايفه من كلام الناس ، طب مخافتش عليا
رديت بلامبالاه عشان مصرخش دلوقتي _ ايوه عرف وطالع ورايا
= ي مصيبتى زمانه عايز يفسخ الخطوبه ، مهو طبيعي مين هيقبل بيكى بعد كده
اي كميه الوجع ال انا فيها دى ، انا كنت متعشمه انها تحن عليا ولو لمره ، انا كنت ف أمس الحاجه انها تتطبطب ع قلبى ، تاخدنى ف حضنها وتقولى انها جمبى ، انها واثقه فيها واني اكيد دافعت ع شرفهم وشرفى ، تاخدنى ف حضنها وتقولى انها جمبى ومش هتسيب حقى، تقولي انها مش هتسيب ال عمل ف بنتها كده ، طب هو انا مش بنتها طيب؟ طب هي ليه قاسيه عليا كده، انا كنت عايزاها بس تبصلي حتى بحنيه،تقولى معلش حتي، تعمل اي حاجه ، تعمل اي حاجة الا انها تقولي كده ... انا... انا قلبي بيوجعنى اوي.. انا... انا عايزه أعيط
وبالفعل لقيت دموعي بتنزل بقهره ونكست رأسي بكسره وهى سابتنى واقفه مكانى ودخلت
سمعت يونس بيقول بهمس وهو قريب منى يكاد يفصل بينا خطوتين
_ اوعي اشوفك بتنزلى رأسك دى مره تانيه ، ارفعي رأسك ، مي ال اعرفها عمرها م تنزل رأسها أبداً ، مي ال أعرفها راسها دايما ف السما
كنت ممتنه للقدر ال بعتلى يونس ف الوقت ده وخلاه يقول الكلام ده
رفعت راسي ليه وانا ببكي ع حالي ، لقيت عينه بتحضنى من غير م يلمسني ، بتتطبطب ع قلبى من غير م يمد ايده زى كل مره
_ كل حاجه هتبقي بخير ي مي ، صدقيني
لقيت امي طلعت ترحب بيونس وبعدها دخل والدى وال متكلمش من ساعه ال حصل وال امى قالتهوله
اتكلم يونس بجديه وجمود كأنه مش نفس الشخص ال كان بيصبرني من دقيقه_ لو سمحت ي عمي اكيد حضرتك عرفت ال حصل ، فبعد اذنك كنت عايز اطلب منك طلب وياريت تعذرنى وتقدر موقفي ف ال هطلبه ....
#يتبع
MaiSayed
زواج بالاتفاق
البارت التاسع
صلي علي رسول اللّه.. 💚
رد والدها وهو تقريباً متوتر من ال هقوله _ اتفضل ي بنى
= هو الأول فين مي؟
ردت والدتها بطريقه مش لطيفه ، خلتنى اسأل، هي ازاى مي مستحمله انها تعيش معاهم
* مرزوعه جوا
= طيب بعد اذن حضرتك ناديها
قامت نادت مي وهى اتاخرت شويه ، دقيقه ولقيت مي داخله وباين ع ملامحها الانكسار ، لوهله حسيت اني لازم اخدها ف حضني ، لازم اخفف عنها ، لازم اشيل عنها الحزن ال هاددها ده ، لازم ترفع رأسها زى العادي ، حاولت اطنش افكارى دلوقتى عشان اركز معاهم
_ بعد اذنك ي عمي انا كنت محتاج اكتب ع مي ف اسرع وقت ، طبعاً حضرتك عرفت ال حصل النهارده ، وطبعاً مي مش هتقعد من الكليه ، فلو عملنا الفرح بسرعه هيبقى افضل ، واهو اخدها معايا الكليه وانا رايح ونرجع انا وهى سوا ، واهو هتبقى حضرتك مطمن عليها وهو معاياا
_ بس ي بنى....
وقبل م والدها يكمل كلامه كان اخوها جاي من جوا بسرعه عشان يضربها
* بقا فضحتينا ، جبتلنا العار ، لازم اخلص منك
وقبل م ايده تتمد عليها كانت مي ورايا وانا ال قدامه
_ إياك ، شوف إياك تفكر انك تمد ايدك عليهاا
اتكلمت تانى لوالد مي
_ انا كنت جاي اقول لحضرتك انى عايز نعمل الفرح بسرعه ، ولما سمعت كلام والده مي ليها قولت لحضرتك نكتب الكتاب ف وقت أسرع ودلوقتي بقولك انى هكتب ع مي واخدها معايا بكره ، انا مستحيل اسيبها اكتر من كده
* بس ي بني ازاى مي....
قاطعته والدتها * أنت لسه هتقوله ازاى ي اخويا وافق خلينا نغورها ونخلص من همها
ببص لمى ال كانت ورايا وال حسيتها اتكسرت اكتر بعد كلامهم ، وال خلتنى اصمم اكتر ع موقفي
* توافقوا اي ي ماما ، البت دى لازم تتربي الأول
كلام اخوها عصبنى أكتر ، من غير م احس لقيت نفسي بضربه بالبوكس ف وشه
_ البت ال بتقول عليها دى متربيه احسن منك ، انا هكتب الكتاب حالا ودلوقتي
ردت والدتها عشان تنهي الموضوع وعشان م نمسكش انا واخوها ف بعض من غير م تاخد بالها من المسكينه ال ورايا
* احسن ، خلينا نخلص ونرتاح
_ تمام،،، تعالي ي مي عايزك ، ده بعد اذنكو طبعاً
دخلت البلكونه عشان اكلم أدهم صاحبي واخليه يجيب الماذون ومصطفى صاحبنا عشان يبقوا شهود ، واخدت مي معايا عشان مسبهاش معاهم ، هي باين عليها انها مش حمل كلمه ولا نظره من حد منهم ، وانا مكنتش هقدر اروح البيت واسيبها معاهم بعد م شوفت كل ال عملووه ده
كلمت ادهم وطبعاا مردش من اول مره وف المره التالته رد
رد أدهم بصوت نايم _ الوو
= فوق معايا ي ادهم كده وصحصح
حسيته بيحاول يفوق فعلاً لما سمع نبره صوتي الجديه
_ ايوه ي يونس معاك ، خير ف حاجه ولا اي
= انا عايزك تتصرف حالا وتجيبلي مأذون وتيجى ع بيت مي ، وهات مصطفى معاك عشان تشهدوا ع العقد ، حالا ي أدهم
_ طب وانا هجيب ماذون منين ي يونس الساعه 12
رديت بعصبيه = م تتصرف ي أدهم ، اتصرف
_ تمام تمام ، اهدى ، نص ساعه ان شاء الله ونبقى عندك
^^^^^^^^^^^^^^^^^^^^^^^^^^^^^
" بارك الله لكما وبارك عليكما وجمع بينكما في خير "
هو اي ال حصل ولا اي ال بيحصل ، انا اتكتب كتابي ، وع يونس ، بالسرعه دى ، انا مش زعلانه والله ، انا ممتنه ليونس بال عمله ده ، انا لو كنت فضلت يوم واحد كمان هنا ولآ حتي ساعه واحده كان ممكن اعمل ف نفسي حاجه بسبب اهلي ، مكنتش هستحمل افضل معاهم ، أنا بس زعلانه عشان معرفتش افرح زى بقيه البنات ، ده حلم عمرى اليوم ده ، اليوم ال هيتكتب كتابي ع شخص يتقي ربنا فيا ، يحبنى ، ع الرغم من كل ال يونس عمله بس حاسه انه بيعمل كده بدافع الشفقه ، الجدعنه ، إنما مش بدافع الحب ، مش باين عليه ، او انا ال مش شايفه ده ، مش عارفه بس الحقيقه انى مستريحه ، كفايه انه خلصني من سجن اهلى بس يارب ميكونش هياخدنى لسجن تانى مختلف عن السجن ده بشويه ، يارب يتقى ربنا فيا حتى
ف عز سرحانى لقيت ايد بتتمد لايدى ، ايد حسيت فيها بالدفا ، ايد يونس
_ مش يلا ي حبيبتي
= احم تمام ، يلا ، هلم بس هدومي
رد بصرامه _ مش محتاجينها ، هنجيب غيرها واحنا ماشيين
_ تمام
شد ايدي وخرجنا من البيت
^^^^^^^^^^^^^^^^^^^^^^^^^^
نزلنا تحت وانا ماسك ف ايدها ، بشد عليها ف محاوله مني اني اطمنها ، ادفيها ، احاول انسيها ال حصل طول اليوم ، احاول اخفف عنها الحزن ال باين ف عنيها مهما حاولت تداريها ، ف صوتها مهما حاولت تسكت ، ف كتافها ال متهدله ، ف جسمها ال عمال يترعش ، ف ايديها ال مش قادره تحركها حتى ، ف روحها... روحها ال حسيت انها اتكسرت بعد ال شافته من اهلها فوق ، نزلنا لقيت صحابى بيباركولى
لقيت أدهم بيحضنى بعد م سيبت ايديها عشان افتحلها الباب عشان تركب
_ مبروك ي يونس
= الله يبارك فيك ي أدهم ، عقبالك
اتكلم مصطفى
_ الف مبروك ي معلم
= الله يبارك فيك ي درش ، تسلم
تسلمو ي رجاله انا عارف اني تعبتكو وصحيتكو
رد مصطفى
_ يعم براحتك انت بتصحينا كل يوم بس متكررهاش تانى بقا
= ماشي ي مصطفى ، هنفخك بس اما افوقلك
_ محتاجين نتكلم
كان صوت أدهم وهو بيهمس ف ودنى بعد م مصطفى سلم عليا وركب عربيته ومشي
= هشوف مي عشان زى م انت شايف حالتها ونبقى نتكلم ، لأن انا كمان محتاج أتكلم معاك
_ تمام ي حبيبى ، والف مبروك كمان مره ، محتاج اي حاجه
= لا ي أدهم تسلم ، تصبح علي خير
وسبته عشان اروح ل مي ال قفلت ازاز العربيه عشان مناخدش بالنا من دموعها ال موقفتش ، بس انا واخد بالي من اول م دخلتها العربيه
لفيت عشان اركب ، ركبت العربيه وماشيين عشان نروح شقتى ال المفروض كنا هنتجوز فيها ، هي مش محتاجه حاجه اصلا لأن انا كنت عايش فيها طول الوقت وال هي اصلا فوق شقه والدى ، لأنه وهو بيسكن العماره بحكم انه صاحبها رفض يسكن الشقه ال فوق عشان اتجوز فيها وابقى جمبهم
ببص ع ايد مي لقيتها بتترعش ومبطلتش عياط من اول م ركبت
تلقائي وبدون م احس لقيتنى بمسك ايديها ولاول مره متعارضش ومتزعقش ، سكتت كأنها كانت محتاجه لده فعلا
حاولت اطلعها من الصمت ال هي فيه ده
_ يعني معترضتيش اني مسكت ايدك زى كل مره؟!
ردت بخفوت وصوت مجهد
= انت بقيت زوجي ي يونس
قالت كده وسكتنا احنا الإتنين كأننا لسه مكتشفين ده دلوقتي ، ي الله ع الكلمه ، كأنها خطفت دقه من قلبي، مش مصدق أصلا انها بقت مراتي ، مش مصدق السرعه ال حصل بيها الموضوع ، ف غمضه عين بقيت مربوط بزوجه ومسؤليه ،
فضلت محافظ ع ايدها جوا ايدي طول الطريق لحد م وصلنا الشقة ، عديت ع شقه اهلي والحمدلله مكانوش صاحيين، انا لسه همهدلهم الموضوع ومعرفش هيبقى موقفهم اي ؟ واى كان موقفهم مش عايزه يبقى قدام مي ، هى مش حمل كلمه من حد دلوقتي ،
سندت ع ايدى لحد م وصلنا الشقه ودخلنا
لفيت عشان اقفل الباب لقيتها لسه واقفه مكانها بتترعش ، لوهله حبيت اضمها بس خفت من رده فعلها
_ احم،،، مي
بصتيلي من غير م ترد
_ بصي ،، الشقه زى م انتى شايفه دورين ، الدور ال تحت ف الريسبشن والمطبخ وحمام واوضه المكتب واوضه للضيوف ، اوض النوم كلها فوق ،، شوفي الاوضه ال تريحك ونامي فيها..
هزتلي رأسها وسابتنى وطلعت وانا لفيت عشان اروح اوضه المكتب
مش جايلى نوم، ومحتاج اقعد مع نفسى شويه ، محتاج افكر ف كل ال حصل ده ، هنعمل اي مع بعض الفتره الجايه ، هعمل اي مع اهلي ال ميعرفوش اني اتجوزت ، هعمل اي مع الكلب ال اسمه طارق ، والأهم من ده كله هعمل اي مع مي ، هنعيش مع بعض ازاى ؟
فضلت افكر مع نفسي لوقت معرفش اد اي
ببص ع الساعه ف ايدى لقيت فاضل ساعه ع الفجر
طلعت فوق عشان اخد دش وأنام ، كفايه كده النهارده ، وانا طالع وقبل م ادخل اوضتى سمعت صوت عياطها ،
لوهله فكرت اتجاهل واعمل نفسي مسمعتش حاجه ، وتلقائي لتانى مره ولتانى مره الاقى نفسي من غير م احس فتحت باب اوضتها ودخلت
بس لقيتها بتصلي ، برضه مقدرتش امشى ، سندت بكتفي ع الباب واستنيتها لحد م خلصت
سلمت ومخدتش بالها مني ولذلك فضلت مكمله ف عياطها ال وجع قلبى عليها اكتر
دخلت من غير م اتكلم وقعدت قدامها ، وهي فضلت موطيها رأسها وبتعيط
مقدرتش امنع ايدى من اني ارفع راسها واخليها تبص ف عينى بس فضلت حاطه عنيها ف الأرض
_ مي
همهمت ببكا وخلاص
_ بصيلى ي مي ، انا بقيت جوزك يعنى مينفعش تغضى بصرك عني
وأخيراً بصتلي ،، اخيرا شوفت عنيها ال زى فنجان قهوه ممتع ع الصبح مع صوت فيروز ف شتا جميل ف بلكونه الساعه 6 الصبح ف وسط المطر ، حاولت ابعد تفكيرى عن لون عنيها دلوقتي واشوف قلبها ال محتاج يترمم ده
_ ممكن تهدي ، كله هيبقى كويس صدقيني
= قلبى بيوجعني اوي ي يونس
قالت كده وانفجرت ف البكا اكتر ف نفس اللحظه مقدرتش امنع نفسي من انى اضمها لقلبى واطبطب عليها ، وهى كمان مقدرتش تمنع نفسها من انها تدفن نفسهاا فيها اكتر..
_ سلامه قلبك ي مي ، سلامه قلبك ي حبيبتى
حاولت اتجاهل الكلمه ال طلعت مني تلقائي لتالت مره معاها ف يوم واحد وركزت عليها هي
قولت وانا مازلت محافظ عليها جوا حضني وايدي مازالت بتطبطب عليها كانها بتطبطب ع قلبها مش ع كتفها
_ كله هيبقي بخير ي مي ، الحيوان ال عملك كده صدقينى والله م هرحمه ، واهلك معلش ، هما بس مصدومين مين ال حصل ، هما كانوا خايفين عليكي ي مي معلش
قولت الجمله التانيه وانا مش مقتنع بيها
بس ردها صدمنى ، صدمني ووجعني ف نفس الوقت....
#يتبع
MaiSayed
زواج بالاتفاق
البارت العاشر
صلي علي رسول الله.. ❤
ردت بصريخ _ بيحبوني!! دول عمرهم م حبونى ، عمرى م حسيت انى بنتهم ، دايما بيكرهوني ، دايما جايين عليا ، دايما شايفني وحشه ف كل حاجه ، دايما شايفني فاشله ف كل حاجه ، ده امي، انا كنت بحس بالوحده وانا وسطهم ي يونس ، كنت بحس انى لوحدى وانا وسط اهلى، دايماا حاسه ان المكان ده مش مكان، البيت ده مش بيتى ، حاسه انهم مش اهلى، ده انا فكرت اعمل تحليل DNA والله، محدش فيهم بيحبنى ، امي عمرها م خدتنى ف حضنها، عمرها م طبطبت عليا ، عمرهاا م سمعتني وانا بتكلم معاها او بحكيلها حاجه ، عمرها م شافتني حلوه من اى ناحيه ، دايما شايفني وحشه ، دايما بتحب اخواتى اكتر منى ، دايما بتبصلي بأرف ، ده انا لو عيطت بتزعقلي ، لو اتوجعت بتتريق عليا ، دايما بتقول عليها هبله عشان هدومى واسعه ولابسه الخمار ، عمرهاا م حببتنى ف نفسي ولا ملامحي ، دي بتعايب ع شكلي ، ع خلقه ربنا ي يونس
الوجع ال كان ف قلب مي مكانش ف قلبها لا ، ده كان ف قلبي انا ، حاسس ان حد ماسك سكينه وعمال يرشقها ف قلبي ميت مره
شديت ع حضنها اكتر ودفنت وشها ف صدرى ف محاوله أنها تهدى ، بعدها بشويه بطلت بكا بس لسه شهقاتها عماله تطلع ، محاولتش اتكلم ولا اصبرها ، مفيش اي حاجه ممكن تهديها ولا تصبرها
مفيش اي كلام ممكن يمحي ال جواها
حاولت اعدل صوتى بعد م عينى اتملت دموع عشانها
= انا جمبك ي مي ، انا جمبك ي حبيبتى ،
كل حاجه هتتصلح باذن الله ، ان مع العسر يسر ي مي ، كل حاجه هتبقي كويسه والله ، صدقيني
فضلت ماسكه ف القميص ومتحركتش ولا اتكلمت ، ولا انا بصراحه كنت عايزاها تتحرك ، انا كنت مستريح اكتر منها ، كاني انا ال محتاج حضنها مش العكس
شويه وسمعنا اذان الفجر لقيتها بتسيب القميص براحه وبتبعد عن حضنى ، لوهله كنت هقولها خليكي بس رجعت ف رأيى
_ راحه فين
= هقوم اتوضى عشان أصلي
_ تمام
جت تقوم كالعاده داخت ، بس الخارج عن العادى بقا انى سندتها ، اخدت بايديها لحد م سندتها لحد الحمام ، بالرغم من ان ف حمام ف الاوضه بس لا ، المسافه قصيره واناا كنت عايز اسندها وقت أطول من كده
اتوضت وواخدها اطلعها تانى
_ انت مش هتصلي
= ها... لا لا هصلي ، هطلعك بس واجي اتوضى
_ تمام هستناك نصلي سوا
طلعتها لفوق ودخلتها لحد الاوضة ودخلت اوضتي ، اخدت دش وغيرت هدومى وروحت عشان انام ، قبل م أروح ف النوم وقبل م اطفى النور افتكرت مي ال مستنياني عشان نصلي سوا
دخلت اتوضيت وروحتلها وانا بدعي انها تكون نامت
دخلت لقيتها قاعده ع السرير مستنيانى بعد م فرشت السجاد ومستنيه انى اجي نصلي
اتكلمت بخفوت _ مي
ردت بصوت مجهد = اتاخرت ليه؟
_ معلش حقك عليا ، قومي يلا
قامت واقمت الصلاه عشان نبدأ
الله أكبر
مع اول تكبير حسيت براحه وف نفس الوقت حزن ، احساس انى واقف قدام ربنا كان احساس مريح وف انفس الوقت مخيف ، مستريح عشان واقف قدام ربناا سبحانه وتعالي ، وخوف لاني خفت من ربناا ، لو قبض روحي هقوله اي ، هقوله مكنتش بصلي لي ، اي عذرى قدامه وهو مدينى الصحه ال تخلينى اقف ع رجلي ، اي العذر وهو مدينى كل حاجه ، صحه وبيت وشغل واسره وزوجه ، زوجه صالحه كمان
خلصناا صلاه وقومت عشان أنام ، انا منمتش طول الليل ، قبل اتحرك حاولت اتطمن ع مي من غير م اتكلم ، لقيتها قاعده زي م هيا بتسبح ع ايدها وساكته ، خرجت وروحت عشان أنام بس فعلا معرفتش انام ، فضلت حاولى نص ساعه بتقلب ف السرير وخلاص
قومت تانى عشان انزل تحت اعمل اي حاجه ، وقبل م انزل السلم سمعت صوت عياط مكتوم ، غمضت عينى بتعب واتحركت عشان اروحلها ، مش تعب منها بس تعب عليهاا ،
انا عارف ان ال شافته امبارح مش شويه بس متعيطش ، مش عايزها تعيط ، مش حابب اشوف دموعها وانهزامها ، دخلت من غير كلام لقيتها ضامه رجليها لصدرها وحاطه رأسها بينهم وهي بتحاول تكتم صوت عياطها عشان م اسمعش
من غير م اتكلم ضميتها لحضني تانى وهي سكتت وبطلت عياط ، دقيقه واحده لقيتها بتمسك ف التيشرت وبتدفن نفسهاا جوايا وصوت عياطها طلع ، فضلت احرك ايدي ع رأسها وضهرها من غير م اتكلم ، ف محاوله مني أنها تهدى
نص ساعه وكنت حسيت ان رأسها تقلت ، ببص لقيتها نامت
شيلتها عشان انيمها ع السرير وقبل م اتحرك لقيت ايدها لسه ماسكه ف التيشرت ، استغليت الفرصه ومحاولتش افك ايدها من عليا ، غطيتها واخدتها ف حضني ونمت جمبها وانا عامل حسابي انى هصحي الصبح ع خناقه جامده اوي ، بس مش مهم ، المهم اني انام دلوقتي
صحيت الصبح وانا عامل حسابي مش هروح الشغل اصلا ، صحيت ببص ف الفون لقيت الساعه 2 ، مش هستغرب اني نمت ده كله بس هستغرب انى مي لسه مصحتش ، حمدت ربنا انها مش هتعرف انى نمت جمبها وقومت
قبل م اتحرك من السرير لقيت جرس الباب بيرن
قومت بكسل عشان افتح الباب ، اي ده اي ده
ده اكيد حد من اهلى وهما ميعرفوش حوار مي
نزلت بسرعه افتح الباب عشان محدش يطلع فوق ويشوف مي
نزلت لقيتها أمي
* اي ي يونس ، مروحتش الشغل النهارده لي
_ ولا حاجه ي ماما كسلت بس والله
* يعني انت كويس ي حبيبى
_ اه ي حبيبتى الحمدلله
* طيب ي حبيبى انا نازله لو احتجت حاجه انا تحت
_ ماشي ي حبيبتى
قفلت الباب وطلعت ، فضلت طول اليوم مش عارف اعمل اي بس كنت قلقان ، مي لحد دلوقتي مصحيتش ، انا كل دقيقه ادخل اطمن عليها انها بتتنفس بس مش معقول النوم ده كله يعني ، احنا بقينا المغرب
دخلت الاوضة عشان اصحيها ، وبعد عده محاولات كانت صحيت
_ هو اي النوم ده كله ، ده انتي نمتي فوق ال 16 ساعه
اتكلمت صوت نايم = ولو كنت سبتنى اكتر مكنتش هقوم
_ وده لي بقا
= لأنى لما بزعل بنام ، ممكن افضل نايمه 3 ايام ورا بعض لو محدش صحاني
_ طب... انتى كويسه
= الحمدلله على كل حال
_ طب عايزين نتكلم
= اتفضل
اتكلمت بهدوء _ انا مش هقولك زى الروايات زى م بتقولى هطلقك بعد شهرين والجو ده ، لا انا متجوزتكيش عشان اطلقك ، انتي هتفضلي هنا معززه مكرمه، مش هلمسك غصب عنك عمرى وده وعد ، الفرح غصب عنى انه متعملش ، البيت قدامك ، غيرى فيه زى م انتى عايزه ومش هقولك بتعملي اي ، حابه ف الكليه يعرفوا اننا اتجوزنا تمام ، ساعه ويعرفوا ، مش حابه يبقى ولا كأن حد يعرف بس انا هقول عادى انك مراتي ، بس مبدئيا ، خروج من البيت من غير م اعرف ممنوع ، مش بتحكم فيكي بس عشان ابقى مطمن ، هتروحي الكليه وتيجي معاياا ، كل حاجه عنك أعرفها والحاجه ال مش حباني اعرفها مش هضغط عليكي فيها ، تمام
= تمام
وبعدين بصتلي بهدوء بعنيها ال بتوديني ف مكان تانى بدنيا تانيه
= شكراً ي يونس
رديت بمشاكسه _ والله وبقينا نقول يونس من غير دكتور
ضحكت بهدوء وسكتت
قامت عشان تصلي الفروض ال راحت عليها وانا نزلت تحت عند اهلي عشان اقولهم ع ال حصل
والدي بصراحه كان متفهم الموقف ولا كان ف مشكله ، بس المشكله كلها كانت ف والدتى ، انا عارف ان ده ال هيحصل زى م ده ال حصل برضه وانا بقولهم اني عايز اخطبها
* وبعدين اشمعنا دى فيها اي عن بنت خالتك مني يعنى ، اي ال زايد عنها
_ بحبها ي امي ، ده ال زايد عنها ، ده ال فارق مي عن منى ، ده غير ان مني عايزاني عشان انا دكتور يونس ابن العميد ، حباني عشان كده ، إنما مي معملتش كده ، دى رافضاني عشان انا ابن العميد ،، شوفتي الفرق ي امي
مش عارف قولت كده عشان اسكت امي ولا هي دى الحقيقه فعلاً ، انا مبقتش فاهم حاجه والله
خلصت كلام وطلعت فوق بتعب ، بفتح الباب لقيت مي ف وشى وباين عليها الارتباك
_ يونس
بصتلها من غير م ارد ، انا لسه متضايق من ال حصل تحت عند أمي والكلام ال قولته
_ انا سمعت ال حصل بينك وبين والدتك تحت بس والله العظيم غصب عني ، انا كنت نازله عشان اقولك انى عايزه هدوم ليا وسمعت صوتكو ،، انا مش عايزه يحصل بينك وبين والدتك مشاكل ، خاصه انى عارفه انك مش بتحبنى و قولتلها كده عشان تسكتها ، ف شهرين ولا حاجه ونطلق ، قولها انها كانت صح وان بنت خالتك احسن مني واننا متفقناش وخلاص
فضلت باصصلها وساكت
_ وف حاجه كمان عايزه اقولهالك
= اتفضلي
اتكلمت بارتباك_ باباك كان طلب مني إنى اتجوزك ، يوم ال حصل ف المكتب بس قبل م انت تيجى ، قال انه مش عاجبه حالك يعني وانه حابب يعمل بينا اتفاق انى اتجوزك واحاول اصلح حالك خاصه يعنى انى.... احم كنت اتخاتقت معاك قبل كده من غير م أخاف
خلصت كلامهاا وسكتت ، رفعت رأسها لقيتني باصصلها وساكت
اتكلمت بتردد _ يونس
=...........
#يتبع
MaiSayed
١١/١٢/١٣
زواج بالاتفاق
البارت الحادي عشر
صلي علي رسول اللّه.. 💛
اتكلمت بهدوء _ وبتقوليلي لي دلوقتي؟
ردت بحذر = عشان تعرف
_ ومين قالك اني مش عارف؟
= ها ... يعني اي؟
_ يعنى انا عارف من قبل م اتجوزك ، من قبل م اخطبك اصلا
_ والدك قالك
= لا
_ اومال اي بلاش لعب باعصابي
= ولا حاجه كل الحكايه انى سمعتك وانتي بتتكلمي مع بابا ف اليوم ده
ردت بخوف _ وانت عادى كده مش زعلان
رديت وانا برفع كتفي بلامبالاه
= لا عادي هزعل من اي
ردت براحه _ هوووف، طب الحمدلله ، انا راحه اوضتي بقا
_ تمام
وقبل م تمشى ناديت عليها تانى ، مش عارف عشان اقولها ال عايز اقولهولها ولا عشان مش عايزها تمشي وتدخل الاوضه، وتفتكر ال حصل، وتعيط ، وانا مش حاببها تعيط ، بغض النظر عن اني ببقا مستفيد احلي استفاده من عياطها ده بس لا ، متعيطش برضو
_ مي
لفتلي وهي ساكته
_ انا مش هطلقك ، لا بعد شهرين ولا بعد سنه
= طب.. طب ووالدتك
_ ال بينى انا ووالدتي هحله انا
= انا بس مش عايزاها تزعل منك بسببي
_ متقلقيش
= تمام ،، تصبح ع خير
رديت بخفوت _ وانتي من أهلي
طلعت فوق وسابتنى، بغض النظر عن اني مكنتش عايزها تسبنى بس كنت ممتن لده ، ف حاجه غريبه بتحصل ، او بمعني اصح ف حاجه غريبه بتحصلي ، محتاج افكر مع نفسي شويه ، محتاج افكر ف سبب كل ال بيحصل ده ، من اول خوفي عليها يوم الحادثه ، لحد وجعي عليها وال بيحصل لها ،
فضلت لحد الساعه 12 افكر بس مش لاقي تفسير او مش لاقى غير تفسير واحد بس بحاول ابعد عنه بقدر الامكان
قومت عشان انام بعد م عديت ع اوضتها عشان اطمن انها نامت او مش بتعيط ع الاقل ، دخلت لقيتها بتقرأ قران
_ مي
صدقت وردت عليا = نعم
_ انا داخل انام عايزه حاجه؟
= صليت فروضك؟
رديت باحراج وانا وبلعب ف شعرى وبدارى وشي منها كاني مكسوف منها ومش مكسوف من ربناا
_ احم،، لا
اتكلمت بهدوء بعد م ركنت المصحف ع جمب
= تعالي ي يونس
روحتلها بهدوء وقعدت قدامها كطفل صغير مستني العقاب من مامته مش مصدق ان 152 سم مقعدانى انا 180سم القعده دي
_ نعم
= أنت لي تارك الصلاه ، دى اهم حاجه ف حياتنا ، ده انت بتسرق وقت من الزمن تقعد فيهم مع ربناا،، تشتكيله من هموم الدنيا،، تحكيله عن زعلك وحزنك ،، تدعيله دعوه نفسك يحققها ، تشكره ع نعمه عندك مش عندك غيرك ، طب تعرف ان تارك الصلاه مصيبته اكبر من مصيبه ابليس ،، انت متخيل
رديت بفزع وخوف بان ع ملامحي
_ ايه؟!! لي؟
ردت بهدوء وحكمه كالعاده
= لأن ابليس رفض يسجد لسيدنا ادم ال هو اصلا بشر زينا وانت رافض تسجد لرب ادم ، متخيل ؟ طب اسالك سؤال وترد بصراحه
رديت بحزن ع ال وصلتله ببعدى عن ربنا
_ اتفضلي
= ربناا عملك اي عشان ترفض تقابله ؟ شوفت اي من ربناا سبحانه وتعالى يخليك ترفض انك تقف قدامه؟
_ م.. معملش
= طب احكيلك حكايه لتارك الصلاه
رديت بحزن _ احكيلي
= الشيخ أحمد المنجي كان بيحكى وبيقول انه ف شيخ ، بعتوله عشان يغسل شاب توفي ، ف المهم الشيخ ده راح بالفعل للغسل عشان يغسل الشاب ده ، ف المهم دخل البيت لقي طبعاً الصاله مليانه للمعزيين اهل المتوفي ، ف دخل اوضه الغسل ، لقاه شاب ، ف بدأ يغسل الشاب ده ، وهو بيغسله لاحظ حاجه غريبه جدا
الشاب كانت بشرته بيضا اول م بدأ يغسله الشاب ده بشرته اسودت والعياذ بالله ، كل م يغسل الشاب بشرته تسود ، لحد م قال لا ، انا لازم اعرف ف اي
ف قبل م يخلص غسل الشاب ده قام بطل وخرج الصاله عشان يسأل والده ، اصل مش طبيعي ان لما حد يغتسل يسود ، ده اي حد لو بشرته فيها تراب ولا حاجه بتنضف م جرد م يغسل وشه ، ف خرج سأل واحد ع والد الشاب ده لحد م عرفه وراحله ، ف المهم بيقوله انا عايز اعرف ابن حضرتك كان بيعمل اي قبل م يتوفي؟
قاله لي؟
قاله والله ابن حضرتك كانت بشرته بيضا م جرد م بدات اغسله بشرته اسودت ) اعاذنا الله واياكم)
قاله طيب خلص غسل عشان ندفنه وانا هقولك كان بيعمل اي؟
قاله لا ، والله العظيم م كان م خلص غير لما اعرف ابن حضرتك كان بيعمل اي؟
عارف قاله اي ي يونس؟
رديت بحزن تملكنى _ اي
= قاله والله انا ابني مكنش بيصلي ،، متخيل يحصل ده وهو لسه ف البيت ع المغسل ، لسه مدخلش القبر ولا اتعرض لسؤال الملكين ، ولا شاف اهوال القبر ولا الثعبان الاقرع
رديت والدموع ف عينى كطفل الصغير اتصدم صدمه عمره
_ يعنى انا كده ربناا مش بيحبني
ردت وهى بتمسح مكان دموعى بعد م اتحررت من عينى ونزلت ع خدى
= ربنا لو مش بيحبك مكنش خلقك ، مكنش سابك عايش لحد دلوقتي ، وجودنا ف الدنياا لحد دلوقتي مجرد فرصه اننا نرجع عن طريق الخطأ ونقرب منه ، مجرد فرصه اننا نكتشف اننا ملناش غيره مهما روحنا ولا جينا
_ ي.. يعنى ربنا هيسامحنى
= بسم آلَلَهّ الرحمن الرحيم
* نبء عبادي إني انا الغفور الرحيم وان عذابي هو العذاب الاليم *
عارف جمع الايتين مع بعض لي؟ عشان يقولك ان مهما غلطت وعملت ذنوب ف انا بغفر وارحم مجرد م ترجعلى وتتوب ، انما لو هتصر ع معصيتك فأنا عذابي اشد عذاب، عذاب عمرك م تقدر تستحمله ، تفتكر بقا احنا هنقدر ع عذاب ربنا؟
رديت وانا برتجف _ لا
ردت وهى بطبطب ع كتفي = يبقى تقوم زى الشاطر كده تتوضي وتصلي ركعتين صلح مع ربناا انك هترجعله وتقرب من طريقه وبعدين تصلي الفروض ال فاتتك النهارده، بالسنن طبعاً
رديت وانا ببوس راسها وممتن جداً انها ف حياتي ، ممتن لأهلها ال خلوها تبقى مراتي ف اقرب وقت ، ممتن لوالدى ال خلي فكره اني اتجوزها تيجى ف دماغى
_ حاضر
وقبل م اخرج قولت
_ مي
......
#يتبع
MaiSayed
زواج بالاتفاق
البارت الثاني عشر
صلي علي حبيب الله.. ❤
ردت وهي بتفتح المصحف تاني
_ نعم
= انا نازل الكليه بكره ان شاء الله ، هتنزلى اخدك معايا؟
_ لا مش هنزل ، مش حاسه انى قادره اعمل كده دلوقتي
= تمام ال يريحك ،، عايزه حاجه؟
_ شكراً ، متنساش تصلي بس اهم حاجه
= حاضر ، تصبحي علي خير
_ وأنت من أهله
قفلت الباب ورايا وروحت الاوضة عشان فعلا اعمل زي قالت ، دخلت اتوضيت وانا حاسس انى بغسل ذنوبى وانا بتوضي ، مع كل لحظه بتعدي كنت بفتكر كم الذنوب ال عملتها ، مع كل لحظه بتعدى كنت بقطع وعد مع ربناا اني مش هسيب فرض تانى ، وربناا يسامحني ف ال فات
خلصت صلاة ونمت وانا لأول مره انام وانا حاسس اني مستريح ، مستريح جداً ، إحساس القرب من ربناا ده نعمه انا ال كنت حارم نفسي منها بايدى
حسيت بحد بيهزني بهدوء بس مش عارف كان الوقت امتي
_ يونس ... يونس
ببص لقيتها مي ،، اتعدلت بخضه ليكون فيها حاجه او تعبانه ، كانت لحظه واحده بس كانت كفيله تراكم جوا دماغي اسوا التخيلات وكلها متركزه حواليها هي بس
اتعدلت بخضه وخوف اول مره احسه معاها هي بس
= مي انت كويسه ، فيكي حاجه؟
_ أيوه ايوه انا كويسه الحمدلله بس كنت بصحيك عشان صلاه الفجر
رديت بكسل = ي مي هصليه ضحى وخلاص ، انا عايز انام
_ ركعتى الفجر خير من الدنيا وما فيها ،، يلا ي يونس متكسلش
= حاضر حاضر
وبالفعل قومت اتوضيت كانت هي فرشت السجاد
صلينا وخلصنا صلاه وسبتها بتسبح كالعاده وقومت عشان انام
نمت شويه وصحيت ع صوت المنبه
قومت لبست وشربت قهوتى وعديت عليها عشان اطمن عليها قبل م امشي
اتكلمت بهدوء وانا بحاول اهز كتفها _ مي ،، مي
ردت بنوم = همممم
ردها خلاني ابتسم تلقائى من غير م احس
_ انا رايح الجامعه عايزه حاجه؟
= احم ، لا شكراً
رديت وانا ببوس راسها قبل م أمشي
_ يلا سلام
نزلت وانا بعمل الروتين المعتاد بتاع كل يوم ، ركبت العربيه ، دخلت المكتب ، طلبت قهوه تاني ، وقولت اشوف اي ال عليا النهارده ، وانا قاعد افتكرت ان المفروض نتقابل انا وادهم، انا محتاج حد اتكلم معاه ، حد يفسرلي كل ال بيحصل ده ، كل ال بيحصلي انا ده ، كلمت أدهم، أدهم ال مش عارف من غيره كنت هرجع الاقي الحيوان ال اسمه طارق لسه موجود ولا لا بالرغم من انى كنت رابطه يوميها بس برضه خوفت يهرب، خوفت معرفش اخد حقها منه كلمته لاني يوميها ولما مي دخلت المستشفى كلمته حكتله ال حصل عشان يروح يجيبه ع م افكرله ف مصيبه توديه ف داهيه ،وال بالفعل الحمدلله راحهها ، ربع ساعه ولقيته بيخبط
_ بذمتك ف عريس ينزل تانى يوم كتب كتابه
= وبذمتك انت ف عريس بيكتب كتابه الساعه 12 باليل؟
ردت وهو بيلعب ف شعره _ اممم بصراحه لا
= يبقى بديهي كده انا مش زى العرسان الطبيعين
_ ف دي بقا عندك حق ،، المهم بقا ، مالك؟
= مالي؟! مانا كويس أهو
_ انت لو كويس مكنتش بعتلي أجيلك ، خاصه يعنى انك شكلك متضايق ؟
= لا طبعا هتضايق من اي ؟ مش مضايق ولا حاجه
_ اممم طب خلينا نقول حيران؟ يونس احنا مش عشره يوم ولا سنه ، احنا عشره 10 سنين واحنا مع بعض ، انا عارفك اكتر من نفسي ، فقول بقا مالك
رديت بتنهيده = تايه
رد بخبث باين ف عنيه
_ والسبب مي طبعاً
= اي ال خلاك تقول كده
_ عنيك ، باين جداً ف عنيك ، هااا اتكلم ، انا سامعك
قال كده وهو بيفرد رجله ع الكرسي ال قصاده
قومت وقفت قصاد الشباك ال ف المكتب وانا بتكلم
= غريبه ، غريبه باختلاف ، كل حاجه فيها مختلفه ، من اول عنيها ، عنيها ال فيها مزيج غريب من قوه جباره وضعف وخوف ، قوه لو حد حاول يقرب منها ، ضعف تحسه بيناديك، او بينادينى ، بينادينى عشان امحيه ، وخوف ، خوف تحسه بيقولك طمني، طمني انا خايفه، عنيها ال مرفعتهاش فيا الا لما اتجوزنا ، غريبه ف ضحكتها ال كلها شقاوه وال بتبان مع صحابها بس، مختلفه وهي بتحط ايديها ع بوقها لو صوت ضحكتها علي ، غريبه ف ابتسامتها الهاديه ال بتظهر لو بتكلم حد غريب او متعرفوش ، ف حزنها لو ملقتش الشيبسي بالطعم ال بتحبه ، ف حزنها لو لقت طفل صغير بيشحت ف الطريق، طفله ، طفله ف ال حاجه ال بتحبها ، مش بتحب حد يوصلها غيرها ،طفله ف شقاوتها ، غريبه ف reaction وشها لو شافت بنت بتدلع قدامها، لو شافت بنت تعمل حركه مش مظبوطه ، غريبه ، ف لبسها الواسع وخمارها ال بتحافظ عليها دايما طويل ، تعرف انى مشفتهاش مره الا وهى بتشد الخمار عليها اكتر، ال هو بيبقى اصلا طويل جداً، غريبه بسترها لنفسها ف كم العري ال بقينا فيه سواء ف الجامعه او ف الشارع ، غريبه ف حنتيها ال بتظهر لاي حد محتاج اى حاجه مهما كان غريب او متعرفوش ، حنيتها ال مش عارف ازاى عندها ف كم الجفا ال عايشه فيه عند اهلها ، غريبه ف انها تمد ايدها ليا عشان تقربنى لربنا ، غريبه ف هدوؤها وهى بتتكلم معايا وبتنصحني عن اهميه الصلاه وإني لازم اقرب منهاا ، غريبه ومختلفه ف كل حاجه ، تحسها مش زى البنات ، لا دى اتخلقت عشان تبقي ستهم ، غريبه ف شعورى ناحيتها ، ف الدم ال غلي ف عروقى يوم ال الحيوان طارق حاول يعمله ، ف وجعي عليها بكلام اهلها ، ف حزنها ال بشوفه مهما حاولت تداريه وال نفسي اشيله عنها حتي لو هدفع عمرى ، ف احساسي اول مره مسكت ايديها ، اول مره اخدتها ف حضني وهى منهاره من العياط بعد موقف أهلها، غريبه انها متنبهرش بيا ك دكتور يونس ابن عميد الكليه،، ف كل حاجه بتعملها وكل كلمه بتقولها
قبل م اخلص كلام سمعت صوت تسقيف فوقنى من السرحان ال كنت فيه
_ من امتي وانت بتقول شعر ي دكتور يونس
= تصدق بالله انك رخم ي ادهم
ضحك جامد وهو بيقول
_ رخم اي بس ، ده واضح ان مي عملت شغل جامد ، بس قولى انت عرفت ده كله منين ، ده انت كاتب كتابكو اول امبارح
رديت وانا بضربه = اولا اسمها بشمهندسه مي او مدام مي ، مي دى محدش يقولها غيرى
ثانياً انا مش اول مره أشوفها يوم الامتحان او يوم الخطوبه، متنساش ان شباك المكتب بيفتح ع جنينه الكليه وال هى اصلا مكان قعدتها هي وصحابها فلفتت انتباهي من سنه أولى تقريباً
ضحك وهو بيقول _ وكمان غيران ، الله عليكى ي بشمهندسه مي الله ، وبعدين بقالك سنه مركز معاها ، لا كتير عليك ي بنى والله
= تصدق ،، انا اصلا غلطان اني بتكلم معاك
اتعدل وهو بيتكلم _ نتكلم بجد بقا؟ كل الكلام ال انت قولته ده حلو ، اي ال مخليك تايه بقا ، الكلام مفسر نفسه أصلا
= ازاي بقا ي فالح ، واي التفسير ال الكلام فسره
_ قولي الأول ، انت عملت اي ف طارق
رديت بلامبالاه = ولا اي حاجه ، لبس قضيه حلوه تقعده ف السجن حوالي 10 سنين ده طبعا بعد العلقه ال اخدها
_ طب وطارق وقولنا ماشي ، انما تغير الأمن لي؟
رديت بعصبيه = عشان لو كانوا شايفين شغلهم مكانتش هي شافت ال شافته اليوم ده
_ طب وتفتكر انت عملت كل ده ليه ، وقبل م ترد فكر الأول
رديت وانا بحاول اتجاهل قصده = عادى جدعنه
_ جدعنه بعد كل ال قولته ده ، يعنى ميمشيش معاك انك بتحبها
= هاا.. لا..لا لا طبعا مش كده
_ طب والله العظيم هو كده ، انا هسيبك دلوقتي عشان عندى سكشن المفروض يتشرح تكون فكرت ف ال قولتلك عليه
رديت بسرحان = تمام تمام
سابنى ومشى وانا رجعت اقف عند الشباك تانى افكر ف كل ال قاله
قبل م أشوف مي واقفه ف الكليه ، مع وااحد
مستنتش لحظه كمان ونزلت، مش طبيعى يعنى اقف افكر وانا شايفها واقفه مع واحد ف الكليه، بغض النظر عن انهم واقفين ف نص الجامعه بس ولو برضه
_________________________
صحيت من النوم ع صوت منبه الفجر، معرفش اى ال خلانى أروح اصحيه ، معرفش اى ال خلاني احاول معاه انى اقربه من ربناا تانى،
معرفش لى كده ومعرفش سبب اللخبطه ال انا فيها دى اى،، معرفش اى سبب خروج دقات قلبى عن المعدل الطبيعى لما باس راسي بعد م خلصت كلام معاه عن الصلاه ، معرفش اى السبب ال خلانى اتهور وامد ايدى امسحله دموعه لما بكي ،
معرفش اى السبب ف ده كله ، معنديش مبرر غير انى بحاول اردله جميله ف ال عمله معايا من يوم حادثه طارق ، ومش عايزة اعرف غير كده ، مش عايزه احبه اصلا
انا متحبش، انا وحشه، شكل وطبع وروح وملامح وحشه، ف انا متحبش ، ده ال اعرفه من يوم م اتولدت ، او بمعني اصح ده ال اتزرع جوايا من يوم م اتولدت ، وال السبب فيه كانت امي للأسف
فانا مش عايزة احبه واتكسر
انا مش حمل كسره أصلا ، ده غير أنه عمل كده جدعنه منه مش حب فيا يعنى ،، كمان هو بيحب هايدي ، ومش عارفه هنكمل انا وهو ولا لا ، خاصه انه والدته مش بتحبني ، فانا والله م حمل اى وجع قلب ، انا بحاول ارمم ال اهلي عملوه
بعد م صحانى ومشى منمتش ، قومت صليت الضحي وبعدها لقيت صاحبتى بترن عليا
_ سلام عليكم ، ازيك ي اماني
= الو ي مي انتى فين
_ ع فكره رد السلام عليه ثلاثين حسنه ، وانا ف البيت
_ وعليكم السلام ورحمة الله وبركاته ي ميوش ،، طب تعالى حالا عشان احنا عندنا امتحان والدكتور قال ال مش هيحضر هينقص 20 درجه
= لا وع اى ، هي مش ناقصه ، انا هلبس وجايه ان شاء الله
قومت لبست،، طب انا عايزه اكلم يونس اعرفه، بس مش معايا رقمه واكيد مش هطلبه من والدته
معرفتش اعمل اى فنزلت وقولت هخلص وارجع بدري ان شاء الله
روحت الكليه ومحلتش حاجه الحمدلله بس اهم حاجه إنى روحت
وانا راحه لصحابي سمعت حد بينادى عليا
ببص لقيته بشمهندس خالد زميلنا
_ بشمهندسه مي
رديت وأنا بغض بصري = خير ي بشمندس
_ لو سمحتي كنت بس عايز الكشكول بتاعك عشان انقل منه المحاضرات عشان بقالى كتير مش بنزل
رديت بأستغراب لأنى مش معروفه انى دحيحه لأنى فعلا مش دحيحه أصلا ، فبالتالى انا مش من النوع ال بيكتب ورا الدكتور والجو ده ولا كمان هو معروف عنه انه بيهتم بالكليه والجو ده
= مش معايا والله ي بشمهندس
رد وهو بيمشى بلامبالاه _ تمام ماشي
من بعيد لقيت هايدى بتبص علينا وبتضحك بشماته غريبه ع الموقف كده ، ف البدايه مفهمتش بس بعد م شوفت يونس جاي عليا بعصبيه وف شرار بيطق من عنيه عرفت السبب
اتكلمت بخفوت _ هو اليوم باين من اوله أصلا والله
اتكلم بعصبيه و صوت يخوف كالعاده = مي
........
#يتبع
Mai_Sayed
زواج بالاتفاق
البارت الثالث عشر
صلي علي رسول اللّه.. 💚
حسيت ان كلام أدهم فعلا صح لما شوفتها واقفه مع الواد ال واقف معاها ده ، حسيته صح لما الدم غلي ف عروقي لما شفته ، فكره انى بحبها ولدت جوايا شعور منعش ، بس مش وقته دلوقتى
_ مي
ردت وهي بتبصلي = نعم
رديت بحزم _ تعالي وراياا ، حالا
ردت بهمس سمعته= هو اليوم باين من اوله والله ، اصلا مكنتش عايز انزل ، م كان ف داهيه الزفت ع دماغى
حاولت اكتم ابتسامتي ع طفولتها ال باينه جدا قدامي
_ بتقولي حاجه ي مي
= بقول حاضر جايه وراك أهو
مشيت وهي مشت وراياا لحد م دخلنا المكتب ، استنيتها لما دخلت وقفلت الباب
_ انت بتقفل الباب لي ؟
= ومقفلوش ليه
_ لا افتحه مينفعش ، لو حد شافنا هيقول اي؟
= ومينفعش لي ؟ انتي مراتي لو مش واخده بالك ، وال عايز يقول حاجه يقولها، احنا مبنعملش حاجه غلط او حرام ، انتي مرااتي
قولت اخر كلمه وانا بتلذذ بنطقها ، كأنى طفل صغير بيتهجي اول حروف اللغه ، كاني طفل صغير بيكتشف حاجه حلوه ف الدنيا غير لعبه
_ بس... بس
قاطعتها وانا بمسك ايديها وبقربها مني = مبسش ، وبعدين انتى اي ال نزلك الجامعه انا مش سألتك وقولتى مش هتروحي
ردت وهى بتحاول تبعد عني بارتباك
_ كان عندي امتحان
رديت وانا بقربها الخطوه ال رجعتها
= ولما كان عندك امتحان مقولتليش لى كنت اخدتك معايا الصبح
_ ماناا مكنتش أعرف
= ده ال هو ازاى يعنى؟
_ والله م كنت اعرف ، صاحبتى هي ال رنت عليا قالتلى بعد م مشيت
= ومرنتيش عليا تقوليلى لى
_ هرن عليك ازاى وانا مش معايا رقمك ، كنت هجيبه منين يعني؟
رجعت اتكلمت بعصبيه بتزيد كل م افتكر انها اتكلمت مع ال اسمه خالد ده ، اتكلمت وانا بشد ع ايديها بدون م احس
= واي ال موقفك مع الواد ده تحت؟
_ انا موقفتش مع حد ، هو ال كان بيسألني ع كشكول محاضرات
= والله ؟ ده ع أساس انك عندك كشكول محاضرات اصلا ، ولا انه بيهتم بالمذاكرة من أساسه
ردت وهي بتشد ايديها منى بعصبيه _ والله انا مش بكذب ، عايز تصدق صدق ، مش عايز براحتك
حاولت اتراجع عن عصبيتى لما لقتها فهمتنى غلط وفكرت ان ده شك منى ، الغبيه مفكرانى بشك فيها وانا هموت من الغيره عشان كانت واقفه مع الولد ده
سبت ايديها وانا ببعد ف محاوله منها أنها تهدي
= تمام أهدي
وقفت تاخد نفسها بعصبيه وسكتت ، قربت منهاا عشان افهمها وجهت نظرى وف اللحظه ال مسكت ايديها فيها كان الباب بيتفتح وبتدخل مني
* يويو ، وحشتني
قبل م ارد لقيت مي بتشد ايديها مني بعصبيه اشد وهى بتبصلي بنظره كفيله انها تعرفني انى مش لازم ارد ع مني نهائي
_ احم اهلا ي مني ازيك
* اي ده مش هتسلم عليا ولا اي ي يويو ، وبعدين انتى ازاى ماسك ايدها كده ، هو مش حرام ولا اي ي ست مي
مدت ايديها عشان اسلم عليها وقبل م أسلم كانت مي مدت ايديها ف ايدها وردت ببرود
= هو مبدئيا كده اسمه دكتور يونس او اقل حاجه يونس ، ده اولا ، ثانياً انا ك ستك مي فعلا بقولك انه لا مش حرام ، اصل عقبالك كده يونس بقا جوزى ف اكيد مش حرام يمسك ايدى يعني
سابت ايد مي وجريت عليا تمسك ايدى وانا محاولتش امنعها ، مش عارف عشان اشوف رد فعل مي ولا عشان انا فعلا متعود انه عادى تمسك ايدى؟
* صحيح ال بتقولو ده ي يويو
_ احم ايوه
ببص ناحيه مي لقيتها بتبصلي بحزن ، كأنى خزلتها ف معركتها ، كأنى سبتها وحيده وسط معركه كل ال فيها اعداءها مفيش ليها نصير واحد
فوقت ع صوت مني وهي بتقول
* حصل إمتى ده ي يونس
_ من حوالي 3 ايام تقريبا
لقيتها بتبص لمي بسخريه وشماته
* 3 ايام ونزلت الجامعه ، هي مش مريحاك ولا اي؟
قبل م ارد لقيت مي بتقتلنى بنفس النظره ال بتبصلي بيها وبتساذن عشان تمشى من غير م ترد ، كأنها فقدت الأمل فيا ، او ف كل ال حواليها بمعنى اصح
= انا همشي عشان أصلي الظهر
ومشيت من غير م تسمعني ، بصيت لمني بعصبيه ونرفزه
_ قسما بالله العظيم لو اتكلمتى معاها كده تانى لهوريكى ال عمرك م شوفتيه ، مي خط احمر ، ولو مش باقيه ع عمرك زعليها كده تاني ، واتفضلي اطلعي بره ، ومشوفكيش هنا تانى ، والاحسن مشوفكيش خالص ، براا
مشت وانا فضلت افكر هصالح مي ازاى ، مش مصدق انى بفكر ازاى هصالح واحده، بعد م كان مبيفرقش معايا ولا بنت ، ولا كنت بعبرهم حرفياً
نص ساعه وخرجت بعد م عرفت انا هعمل اي ، روحت الاول استنيتها عشان نروح سوا
شويه ولقيتها خارجه من المسجد وعنيها باين فيهم البكا ، كان هاين عليها اقتل مني عشان ال حصل بس صبرت نفسي باني ال هعمله ليها هيفرحها
ناديت عليها عشان تقف لأنها مكانتش واخده بالها منى او كانت عامله نفسهاا مش واخده بالها
_ مي... مي
وقفت من غير م ترد ، روحت وقفت قدامها عشان تبصلي
_ وراكي حاجه تاني
ردت بخفوت وصوت مبحوح من البكا = لا
_ طب يلا عشان نروح
= انا هروح لوحدى
_ وانا اراهنك انك مش هتعرفي توصلي للبيت لوحدك ، يلا ي مي
وفعلا جت معاياا ، فتحتلها الباب وركبت ولفيت عشان اركب جمبها ، طبعاً طول الطريق ساكته وبتبص ع الشوارع وبس ، لحد م حاولت اكلمها
_ مي
بصتلي من غير م ترد
_ ع فكره انا مفيش حاجه بيني و.....
قاطعتني = انا مطلبتش من حضرتك تبرر لان ده مش من حقى ، انت شكراً ع ال عملته معايا لحد دلوقتي ،، وانا رديت عليها بحفظ بس جزء من كرامتى ال ضيعته قدام حضرتك وانت واقف ، وياريت بعد اذنك تبقى تحفظ كرامتي بس قدام الغريب ومش عايزه منك حاجه تاني
خلصت كلامها ولقيت عنيها بتتملى بالدموع ، ف نفس التانيه لقيتها لفت وشها الناحيه التانى عشان مشوفش دموعها بس شوفتها
فضلنا ساكتين لحد م وصلنا البيت نزلتها ومطلعتش وراها، وهى محاولتش تسأل انا رايح فين
___________________
مجرد م جه عليا كده عرفت هايدى كانت بتضحك لي ، اكيد شافنى واقفه مع خالد وأكيد هيزعق ، انا عارفه ال هيحصل والله ، خلص كلامه وال حصل ف المكتب ولقينا ست مني دى داخله
يويو اى دي ال بتقولهاله ، ده انا مراته ومقولتهالوش
مش مصدقه انى بقيت مراته اصلا والله ، بس انا حاسه انى قلبي هيقف من الغيره ، مني دى شعرها هيبقى نهايته ف ايدى ف يوم من الايام والله ، وكمان انا اصلا مينفعش اغير عليه ، انا مش عايزه احبه ، انا خايفه اصلا أحبه ، خايفه اتكسر قدامه بحبى ليه اكتر مانا مكسوره بعمايل اهلى ال عملوها فيا قدامه ، لما مدت ايدها ليه عشان تسلم عليها حسيت انى عايزه اكسرها بس حاولت اقصر الشر، وحبيت أعرفها انى مراته ، يعنى ليا حق فيه وهي لا ملهاش ، ملهاش اي حاجه اصلا ، لما مدت ايدها ليه تاني وهو سابها كانت دي الحاجه الوحيده ال فوقتنى ، هو لو مش موافق ومرحب بيها وبال بتعمله مكانش سابها ، انما هو موافق عادى ، لو كان خاف ع كرامتى قدامها حتى مكانش سمحلها باال هي بتعمله ده، ع الأقل قدامي، لما حسيت نفسي هعيط من كلامها سبتهم ومشيت، انا خايفه احبه، انا خايفه أكمل طريقى ف انى احبه، اول طريق الحب غيره وانا بغير عليه، بغير جدا عليه ، أنا لازم أوقف نفسي عند حدها ، مش هتكلم معاه ، مش هبصله ، علاقتنا هتبقى صباح الخير ، صباح النور بس
عشان أءمن قلبى مش اكتر
___________________
روحت جبتلها ورد وشوكليت عشان اصالحها بيهم ، بعد ال اكتشفته وانى واقع فيها حرفياً مش هقدر اقعد لحظه وانا مزعلها ، مش هقدر أصلا اشوفهاا زعلانه ، مش هقدر مخليهاش تحبنى ، لازم تحبنى ، لازم
وصلت البيت ونزلت من العربيه وانا طالع ع السلالم سمعت صوت زعيق لوالدى ووالدتي وال تقريبا نادرا م بيحصل
م حبتش اتدخل بينهم وكملت السلم عشان اصالح مي ولما ركزت ف الكلام عرفت انى اتاخرت
اتأخرت جدا
..........
#يتبع
Mai_Sayed