محاولات قتل إمرأة - ❴🔢❵☟الــبــــــ❴ 4️⃣ ❵ـــــــارت☟ - مكتملة | روايتك

الجزء الرابع عمر : طولي بالك شوي .. قربت من الباب وصرت دئ بقوة كتير وعيط بصوت عالي ( امي افتحييييييييلي ... افتحولي الباااب ) ضل عم بحكي معي وانا مو حاسة بشي حوالي ... بس شافني هيك مشى بسرعه واخفتى .. و فتحتلي امي الباب وهي خايفة ام لبنى : منال ؟ شو في لك امي ؟ كنت عم ابكي واصرخ بصوت عالي : وينا عهد ؟؟ وينا عهد فتت على البيت وصرت دور عليها وابي وراي ويقلي شو بدك باختك ... وفتت لعندا على غرفتها ومسكتها من شعرها وصرت اضربها نسيت حالي وما قدر حدا يبعدني عنها ... كنت اضربها بدون وعي من قهري من هالحياة و من الظلم الي عم عيشو احترق قلبي مو من عمر لأ .. لان ما كنت مستنيه منو شي .. بس دبحتني اختي .. اول حدا حاول يقتلني كان عمر واهلو لما خبو علي طبيعة مرض ابنهن .. وتاني مره اندبحت على ايد اختي لما سمعت غزلها هي وجوزي بالوقت الي انا برجع فيه من دوامي مكسرة تعبانه.. موجوعه وضعيفه .. كل هاد الوقت كانت عهد وعمر عم يحبو بعض بهدوء .. وانا عم موت وافني عمري بهدوء اخر شي تعبت .. وقعدت على الأرض وحسيت بوجع .. ابو لبنى : لك شو صارلك الله يكسر ايديكي ام لبنى : تعي امي .. تعي تعيييييييي اخدت امي عهد عالحمام وغسلتلها وكانت عهد كمان عم تبكي وتتوجع وما فتحت تمها بحرف .. لا هي حكت شبها ولا انا حكيت .. فتت على غرفة تانية وقفلت على حالي وضلو اهلي يحاولو يفهمو من عهد شو الي صاير وانا ما رضيت افتحلهن الباب .. ما عاد قدرت احكي او اتخانئ مع حدا خفت يصير شي لأبني .. منال : امي مشان الله اتركوني .. اتركوني بكرا منحكيييييييي ببوس ايدكن ابو لبنى : خلص تعي وبكرا الصبح منفهم منهن شبهن .. لا حول ولا قوة إلا بالله .. تمددت وحاولت اخود نفس وارتاح شوي وصرت ابكي لأن الوجع عم يزيد بالتدريج ... خفت كتير وفكرت حالي رح اجهض بعد كل هالمعاناه ضليت للساعه تلاته الفجر عم اتوجع كتمت صراخي و وجعي وخبيت راسي تحت الوساده لاقدر اصرخ شوي .. لوصلت لدرجة من الألم ما عاد قدرت اتحمل ابداً .. زحفت لعند باب الغرفة .. حاولت اوصل ايدي للمفتاح ودرتو بايدي وفتحت الباب وانا عم ابكي واتوجع كان باب الغرفة مقابل غرفة عهد .. وباب غرفتها مفتوح منال : عهد ... عهد مشان الله .. زحفت لعند غرفتها وانا عم ابكي وكانت نايمة .. بلشت صرخ وصوتي يعلى كتير وبدي حدا يقوم يحس علي .. كان نفسي عم يديئ و حاسة حرارة بكل جسمي .. اخر شي حست علي عهد .. وبس شافتني مرمية بالأرض وعم اتوجع ركضت لعند اامي وابي وصحتهن .. اسعفوني على المستشفى .. وضلينا كل الليل هنيك وانا كل شوي اسأل الممرضات بخوف ( ابني بخير ؟ ) وهن يهزو براسهن ويروحو ويجو اخر شي وعيت عليه وهن عم يقلولي ( ولادة مبكرة ) ما كان بدي ابني يجي هيك  .. لسه ماني جاهزة لاستقبلو لسه ما قدرت جيبلو تياب .. ما جبتلو العاب .. ولا غرفة .. ولا تخت .. حتى اب ما عندو هلأ !! من وين بدي جيبلو مصروف حليب وحفوظات ؟ ازا مرض من وين بدي جبل حق دوا ..لهلأ ما معي ولا ليرة .. كنت عم ابكي واترجاه لو يعطيني شوية وقت بعد .. يا امي الكل وقف بوشي ساعدني انته .. ساعدني .. بس رغبة ابني ( ضياء ) كانت اقوى من ألمي .. وبهديك الليلة .. اجا ابني وفرحة عمري .. ما قدرت شوفو لتاني يوم العصر لانو كان بالحاضنة .. ابي الله يحن عليه اخدني على احسن مستشفى خاص وهو دفع كل تكاليف الولادة .. حتى لهلأ بتزكر لما طلعت من المستشفى اخدوني على البيت وما كان لسه عمر عندو خبر .. جابلي شنتاية كبيرة كانت كلها تياب الي ولأبني ... ضميت التياب وبكيت وضحكت .. اديه كنت احلم جيبلو ياهن من تعبي بس المهم اجو !! استغربو اهلي انو عمر لهلأ ما طل علينا .. وكل ما يسألوني قلهن ما بدي اسمع سيرتو .. حسيت امي ربطت موضوع عمر وعهد ببعض يمكن كان عندها شك دفين من قبل بس كانت تكزب حالها .. اتصلت بأريج وقلتلها تقدملي إجازة امومة من الشركة و وعدتني تجي تزورني وتباركلي .. كنت كل ما نام شوي اصحى لاقي عهد عم تلاعب ابني وتكاغيلو .. ارجع اعمل حالي نايمة لتطلع من الغرفة هيك لبعد اسبوع اجت امو لعمر وخواتو وكانو طاير عقلهن من الفرحة .. جابو هداية للولد وحطتلو حماتي ليرة دهب .. مابعرف فرحت فيهن كتير .. كل الوقت كنت اطلع بعيون ابني وحسو عم يسألني ( ماما ما في حدا كان ناطر جيتي على هالدنيا ؟ ) وقبل ما تطلع مرت عمي سألتني سؤال موتني من الخوف ( منال .. انتي متأكده انو الولد سليم ؟ ) ضحكت وقلتلها ما تخافي ليكو اسم الله عليه مابو شي .. رجعت قالتلي ( بس عمر كان معو ثقب بالقلب وراثة من جدو .. لهيك كنت خايفه على الولد يجي كمان مريض قلب ) صفنت شوي بحكيها وتزكرت لما اول ما خبرت عمر با لموضوع اول كلمة قلي ياها ( من بكرا بتنزلي الولد )رجعت ضحكت وشديت ابني لحضني وكان عم يبتسم متل الملاك منال : لا ما تخافي ما فيه شي الحمدلله .. بقولو الأم لما تجيب بكرها بتضل خايفه عليه وموسوسه .. لهيك طلعت هالفكرة من راسي مشان ما فاول على ابني .. وبعد يومين اجا عمر .. سمعت صوتو لما فتحتلو امي الباب .. وصارت تقلو منال نايمة لأني كنت منبها عليها ما بدي شوف وشو قمت من فرشتي وبدلت تيابي وزبطت شكلي شوي وطلعت لعندهن عالصالة .. ام لبنى :صحيتي بنتي ؟ منال : ايه ماما صحيت .. شو ليش عهد مو قاعده معكن  ؟ .. عهد .. يااااا عهددددددد .. تعي اختي تعي بعد ما ندهتلها قريب الخمس مرات طلعت وهي متلبكة كتير .. وقعدت جنب امي .. وعيونها بالأرض منال : شو عمر ليش تأخرت لجيت تشوف ابنك ؟ عمر : انا والله يعني ابو لبنى : ما بجوز الي عملتو .. مرتك ولدت بعملية .. وهاد اول ولد .. كيف بترضاها على حالك ضل يعتزر من اهلي وصار يبرر انو انا كنت زعلانه منو وخاف يجي ويزعجني .. منال : حصل خير .. هلأ انت روح على البيت واكيد بكون صار مزبلة بغيبتي .. بتنظفو منيح وبتشتري غرفة للصغير وبتجي بكرا الصبح بتاخدني عمر : ماشي .. بدي شوفو للصبي  منال :بتشوفو بكرا .. الي نطر هالوقت بينطر لطلوع الضو ، ايه وكمان وبتجي معي عهد بتقعد عندي يومين تساعدني لاني لسه تعبانه سكت هو و استأزن وقام وعهد كانت عم تطلع فيني وهي خايفه كتير بس طلع رجعت فتت على غرفتي .. وبلشت ضب تيابي وتياب ابني ضياء .. فاتت بعد شوي وراي امي وسكرت الباب واجت قعدت جنبي وهي عم تحكي بهمس ام لبنى : هلأ بدك تحكيلي كل شي .. تركت من ايدي وبلشت قلها كل شي صار وهي عم تضرب بايديها على رجليها وعلى راسها .. وانا عم احكي ببرودة كأنو ما عاد يهمني ولا عاد اتأثر ام لبنى : يا مغضوبة يا عهد .. ياربي .. ياربي دخيلك .. ولي .. ولي شو عملت هي البنت بحالها منال : اهدي امي .. فكرك انا ليش راجعه لعند هالحقير ؟ .. بدي ارجع بلكي بتدبريلك جوازة للبنت ومنستر عليها قبل ما تفضح حالها او قبل ما عمر يعمللنا قصه .. عالأقل بخاف مني وبضل ساكت .. وبعدها بشوف شو بدي اعمل ام لبنى : يعني بدك تتحملي تعيشي مع هيك واحد كلب ؟ منال : شو بدي اعمل ؟ الله كتب علي هالحياة .. وعهد بعدها صغيره حرام نخليها تضيع حالها .. وانا ما تخافي علي من اليوم كل شي تغير انا رح اعرف اتعامل معو متل الخلئ .. ام لبنى : يعني شو بدك تعملي ؟ منال : رح تشوفي .. بس الله يعطيني القوة والصبر يارب .. بالفعل تاني يوم اجا عمر واخدني واجت معي عهد والتنين كانو ملبكين وخايفين يتطلعو ببعض تصرفت عادي وكنت عم راقبهن بهدوء وبدون ما حسسهن .. وصلت ولقيت البيت عم يضوي .. وفي اكل جاهز وجايب تخت صغير لأبني وفيه كم لعبة منال : مو قلتلك بتجبلو غرفه ؟ عمر: مام معي مصاري منال : ايوووه .. نسيت انو بعدك بلا شغل .. يلا هاليومين منحل هاد الموضوع كمان تعي عهد فوتي معي على غرفتي وغيري لضياء الحفوضة كان ضياء بحضن عمر .. وقفت عهد ساكته وعمر كمان كان خايف يعطيها الولد منال : ليش بعدك واقفه خدي الولد من عمر وتعي يلا .. عهد : م..م..ماشي .. قربت اخدت ضياء منو بسرعه وفاتت قدامي على غرفتي .. فتت وراها وسكرت الباب .. حطت عهد الولد عالتخت و كانت عم تشلحو تيابو .. يا الله شو كان هادي و ملائكي ما الو صوت ولا غلبة رحت قعدت على الجهة التانية .. وانا عم اتطلع بعهد وهي عم تحاول تعمل حالها مو منتبها علي منال : عهد عهد : اي .. منال : بتعرفي ليش جبتك معي لهون ؟ عهد : لا .. لا .. ما بعرف .. منال : ماشي . انا رح قلك يتبع