❴🔢❵☟الــبـــــ❴3️⃣4️⃣❵ـــــــارت☟
مريضتي♥️
الكاتبه: نولي
الحلقه 34
أنا وقفت و وجهي في وجه: اها عقربه و حرفه و انانيه و مراه مش اكويسه و
ما كملتش كلمتي الا و عمر يرفع يده و يعطيني كف قوي لي درجه يجيبني مقعمزه علي الكنبه يلي خلفي و من قوة كفه حسيت الدنيا برمت بيا و راسي و جعني فجاة طحت اغمي عليا
عمر قرب مني و يمس في خدي: ريم ريما اسمعي فيا يا ربي شن درت اني
و قرب مني و رفعني و نزل بيا يجري وانا لابسه زي المدرسة ما غيرتش ونزل بيا يجري و لقينا في الجنان اعميمه و رغد وحنان كيف واصله هي وصغاره
اعميمه شهقت وحطت يدها علي صدرها: هييي كنها
عمر يمشي وما ردش عليها
حنان بصدمه: كنها ريم بسمالله
اعميمه تبكي وتخبط في وجها: كله مني كله مني عطا قطعه الساني حي عليا
حنان: تي فهموني شن فيه
عمر ولا كانه يسمع فيهن حطني في السياره و مشا بيا لي المستشفي
______________________________
و صلنا المستشفي و خدوني من عمر و دخلوني اسعاف و عمر قعد ماشي جاي
عمر،،، لعنت نفسي الف مره علي مدت يدي عليها كيف تهورت و ضربتها ما نعرفش اني طول عمري نحمي فيها من الناس و ياريت حميتها من نفسي قبل الناس مافكرت ولو تفكيري ايجي يوم ونضربها و بس حتي هي الله يصلح حالها ما سكتتش و غلطت في أمي وانا مد اليد عندي كيف السلام عليكم ما نقدرش نتحكم فيها و قت نعصب أنرد عصبيتي في الضرب مش بس هي اي حد يغلبك معايه نلاقي روحي رافع يدي و ضاربه اخخخ و خلاص لو صار شي مش ح نسامح روحي اشويه وطلعت الدكتوره و مشيتلها نجري
عمر: ها شن صار طمنيني
الدكتوره: صحتها تمام ما عرفتش علاش فقدت و عيها الحمل تمام دمها تمام ضغطها تمام
عمر تنهد براحه: الحمدلله
الدكتوره عقدت حواجبها: هضا بطعن لو مش مزعلها و لا متعاركين
عمر توتر: لا جونا تمام
الدكتوره بعدم تصديق: تمام الحمدلله علي سلامتها و تقدر اتشوفها ومشت
عمر فتح الباب و خشلي لي دار و قعمز علي الكرسي و مسك يدي وانا لفيت عنه وجهي جهة الساس
عمر رفع يدي باسها: الحمدلله علي سلامتك حبيبي
انا ساكته و نشوف لي الجهه لخرا
عمر يحكي بصوت واطي: سامحيني والله سامحيني مش بقصدي بس حتي انتي يا روحي كلامك ما يتقالش هذي امي ترضي انقول علي امك هكي
أنا لفيت عليه و دموعي ينزلن و ساكته
عمر نزل راسه علي وجهي و نحس في نفسه: اششش يعطيها قطعه يدي اششش سامحيني حبيبتي
أنا بصوت واطي و نشهق: و جعتني منك
عمر رفع راسه ويبوس في راسي: اسف حبيبتي حتي انتي معاش تعاودها هذي امي احترميها و احسبيها كيف امك
أنا صبيت من السرير و قعمزت علي فخدته و هو مقعمز علي الكرسي و حضنته و راسي في رقبته
أنا بصوت بيبي: هيا انروحو حوشنا
عمر ضحك و مشا يده علي ضهري : مليتي حبيبي
أنا نحك في اعيوني: اها و نبي اننا
عمر باس خدي و نزل يدي يلي نحك بيها في اعيوني: باهي بنتي تو انروحو وما تحكيش عينك ويدك مش امعقمه تو تلتهب ديما حكيها بي منديل
انا بتجعوين : باهي هياااا انروحو
عمر ضحك و عضني في فمي: بناكلك يا شينه
أنا قعدت نضحك و غطيت وجهي بيديا
عمر صبا: هيا
أنا صبيت ومسكت يده
عمر يخشش في شعري جو الوشاح و نزلهولي لي درجة معاش نشوف في شي
أنا: هيييي ما نحقش في شي
عمر قعد يضحك: شن تبي اتحقي أنا اعيونك
أنا وخرت بي الوشاح: لالا نبي اعويناتي انا
عمر ضحك: باهي يا شيخه هيا اقدامي
و طلعنا من الغرفه و مشينا لي الرسبشن و عمر سلك و طلعنا ركبنا السياره
عمر شافلي : خاطرك في حاجه
نا ابتسمت: شاورما و شبس
عمر ضحك وحرك السياره: تمام تو انتكي علي المطعم و ناخد منه غداء شاورما
أنا: و الشبس ؟
عمر: ههههههه يا هبله الشبس في المطعم أكيد لا تو انتكي علي محل و ناخدلك بس مع ان مش اكويس
أنا هزيت اكتوفي و شبحت لقدام: يام حاجات مش اكويسه و ناكلو فيهن
عمر يسوق و شافلي علي جنب: علي سبيل المثال
أنا : الطماطم
عمر : و كنها الطماطم
أنا ببرود: ادير اديدان في البطن
عمر انصدم و شافلي: ريم
أنا: نعم
عمر: اسكتي🙂
أنا: هههههه
_______________________________
في الفيلا
اعميمه: وهضا يلي صار
حنان مصدومه و دموعها ينزلن : معقوله يا ماما انتي يطلع منك الكلام هضا
رغد: وشن نبينا انديرولها والله هبله و جايبها لنا شن نحن مصحة عقلية يمشي يطلقها و ياخد عاقله خيرله
حنان بعياط: انتي بدات تسكتي فااااهمه انتيييي سبب المشكلة مش عارفه كنك معاهاااا كيف قادره هكي اديري في العيله و عمرك بس 17 هضا اذا خشيتيلها كنك هكي مسمومه بس تمام احسابك عند عمر
رغد بخوف و بعياط : والله مانيش ساكته و ما قلتش حاجه غلط اني و
حنان اتعيط: سكري فمك و احترمي نفسك راني أكبر منك و رد بالك ترفعي صوتك عليا اخر مش كان سكتيلك معناها خايفين منك
رغد خافت و سكتت
حنان بنفعال و تحكي و تشوف لي امها و رغد: وكان مريضه البنت وين المشكلة اهي تعافت و الحمدلله عفا الله عما سلف من فينا يخلا من العيوب ها من فينا و بعدين كيف اتقولن انها مجنونه وهي مش مجنونه ها و شن شفتن منها موقف يدل علي انها مجنونه والله البنت مشالله عليها ادب و خلاق و جمال و قلبها مافيش اصفا و انضف منها اجعل المجانين كلهم كيفها كان هكي الجنون و بعدين حتي لو محنونه اهم شي عمر مرتاح معاها و سعيد و طز فينا وفي الناس اهم شي عمر الضحكه ما تفرقش وجه و متريح معاها نحن مش مهم احمدي ربي يا ماما علي النعمه يلي عطاها ليك وان عطاك كنه مافيش كيفها في يلي تزناء و تحكي مع شباب وهي علي دمت راجلها و نطلع الشيب من اعيون عمتها و تلاقي العمه ساكته و متحمله تو انتي علي مرض بسيط كيف هضا تافه اديري هكي
اعميمه امنزله راسه و بصوت واطي: معاكي حق في كل كلمه قلتيها اني ابصر كيف قلت هكي مش عارفه
حنان صبت بعصبيه و شالت ولدها في غمرها و مسكت بنتها من يدها و رقت لي دارها وهي متنرفه
_______________________________
عندي انا و عمر بعد ما روحنا و خدينا معانا غدا من المطعم رقينا طول لي شقتنا بدون ما انخشو لي الفيلا و خشيت لي الدار خديت توته سمائيه ناعمه ريش و عليها رسمت اسبنج بوب و خشيت الحمام دوشت و لبستها و عمر مشطلي شعري و طلقه ليا و طلعنا نتغدو
أنا : الحمدلله شبعت
عمر: شن كليتي انتي حتي نصك ما كملتيش
أنا: لالا نبيش ما خطريش
عمر يوكل فيا: عشان خاطري فم بس
أنا كبدي لعت و صبيت نجري لي حمام و قعدت نستفرغ و نبكي
عمر يغسل في وجهي: معليش معليش فتره و تعدي يا روحي
أنا حضنته: تعبت اني تعبت
عمر رفعني و يمشي في يده علي ضهري: معليش يا قلبي اتهون
و حطني علي السرير و رقدني في حضنه و باس خشمي
عمر ضحك: نعليا أنا من الحمره
أنا ضحكت: اها بعد نصقع وجهي يحمر
عمر : تحشمي علي وجهك في حضني و اتقولي صقعانه اهو امدفيك
أنا ضحكت: وجهي بس
عمر غمزلي: تعالي تو اندفيك كلك
أنا نضحك و نحط في يديا علي صدرها نبعد فيه : خلاص خلاص
عمر ضحك: شينه
أنا رفعت راسي و شفتله و ابتسمت
عمر يمشي في صبعه علي خدي: حبيبي الكف علم
انا خشيت في حضنه و سكتت
عمر باس راسي: اسف ♥️
________________________________
تاني يوم اتصلت بيا نور قاتلي انها جايه و اني طبعن غبت عن المدرسه علي خاطر اندير الغدا و وعيت ضميت الحوش و فطرنا أنا عمر و بديت في الغداء و عمر مقعمز علي كرسي في المطبخ و يشوفلي
عمر يشرب في قهوته: تو هكي اكويس اطلبه يقرو واني اتحوسي في المطبخ
أنا قعدت نضحك : عادي
عمر هههه: حيوانه
و قعدت انطيب درت رز مقلي و طبيخه و تبلت دجاجه و حطيتها في الفرن و درت طعميه و بوريك و بديت في السلاطات و عمر جاء صاحبه يعقوب حتي هو متغدي و درت بابا غنوج و كملت و خشيت دوشت و لبست توته سوده و درت شعري ديل احصان و كحلت و بخيت عطري أشوي و دق الباب و كان عمر في الحمام و طلع يعقوب يفتح
نور و هي فاتحه يديها و مبتسمه تحاسبها أنا: ريمييي
يعقوب حك راسه من ورا بي احراج: اممم لله اهلين ااا تفضلي
نور منحرجه و نزلت يديها و تلكلك: اااء لا مشكور كلمهالي
يعقوب انصدم: كيف 🙄
نور في خاطرها: يييي كني أنا شن كلمهالي امالاه حوشه ولا مراته كني انااا
نور ابتسمت: اممم اااه قصدي موجوده هي
يعقوب ضحك علي توترها: ههههه خشي خشي
و خشت نور وهي متزلطه
...يتبع