❴🔢❵☟الــبـــــ❴2️⃣7️⃣❵ـــــــارت☟
مريضتي♥️
الكاتبه: نولي
الحلقه27
عند يعقوب و عمر في المعرض
عمر يشرب في القهوة و يدخن و يشوف في يعقوب يلي يدخن و ساكت
عمر: تي كنك انت وين سارح ليك ساعه ما حكيت
يعقوب يدخن: والله واصله معايه حدها
عمر: كنك انشالله خير
يعقوب تنهد: من وين بيجي الخير اسمع عندك هضا يلي صار....... وقعد يحكيله
عمر ساكت وفي خاطره نصحتك الالف مره يا صاحبي بس ماحبش يزيدها عليه
عمر: كله يهون في الأول لازم من المشاكل لي ان يبدا في سو تفاهم كل طرف يبدا بتفكيره و طريقت تعامله مع المواضيع بس بعدين مع التفاهم كله يمشي و كل طرف يفهم التاني و بعدين اهم شي طلعت بنت خلاص
يعقوب: أنا ما كنتش شاك في انها مش بنت را كلمتي ليها وقت قلتلها شاك في شرفك رديتها ليها بس لي ان كلمتها صاعبه يا عمر مهياش هينه كيف اتقولي شاك في رجولتك
عمر نزل راسه و حك لحيته: هي مش ساهله بس اهو حتي انت رديتها ليها و ياسركن مشاكل عيب حتي العيب ماليكم متجوزين غير يومين
يعقوب ايدخن: انشالله انروح لي الحوش و ينتصافو
عمر : انشالله... بعد خطرها ما قتلكش احسين حبيبته تجوزت
يعقوب شرق في القهوة: كيففف
عمر: اها طلعت خاينه وكان يحكي معاها لي عند يوف فاتحتها و ما قتلاش لعند يتصف في الفيس شافها منزله زفتها و مغيره الاسم تجوزت
يعقوب وجعه صاحبه: وشن امداير هو
عمر: صدمه هي بس تمشي تحقه معاش احسين لول يلي يضحك و ينكت حدت حيله
يعقوب يدخن: بس ما تربحش هذي و نيته تو اترد عليها ومش ح تتهناء
عمر : اها و شن خلا ما دارلها حتي عمليت امها تكفل بيها و ياما صارف عليها
يعقوب: لا حول الله
و كملو هدرزه و ادن المغرب عمر سكر المعرض و يعقوب روح لي حوشه وعمر نفس الشي تكا علي المجزره خدا حولي ( اضحيه) و تكاء علي المحل خدا مشاريب و خضراء و مشا حوش هلي لي ان ح يتعشاء معانا
_______________________________
عند يعقوب و صل لي حوشهم سلم علي امه و خيته و بوه و كسد معاهم أشوي و رقاء لي المنكديه يلي عنده فوق فتح شقته و خش عليها في الصاله مقعمزه علي الكنبه و تتفرج
يعقوب ابتسم: السلام عليكم يا اصفر انت
خلود ولا كانها تشوف فيه
يعقوب قعمز جنبها: كنه الحلو زعلان
خلود ساكته
يعقوب تنهد: خلودتي اسف يا روحي بس حتي انتي عصبتيني وكلمت ماهي هينه والله ماهي هينه
خلود بدموع تماسيح: بس أنت قربت مني بدون رضاء
يعقوب: عشان نصححلك كلامك و طيرتيها ليا ومش نادم علي حركتي لي انك انتي يلي بديتي
خلود: انت جاي اتراضيني ولا اتحط اللوم عليا
يعقوب باس خدها: شن ايراضيه الزعلان ها قوليلي
خلود بخيت: اتحطلي مبلغ محترم في احسابي ما يقلش عن 2000
عمر انصدم: كيففف
خلود: اها مستكترهن عليا ولا شن وانت دكتور و بي مكانتك
يعقوب: لالا يرخصلك الغالي بس استغربت طلبك بس
خلود : وعلاش مستغربه يلي يزعل خلود يتحمل 24 سنه عند هلي ما زعلونيش تو انت تزعلني
يعقوب برفعت حاجب: وهلك قلتيلهم الكلام يلي قلتيه ليا باش تشوفي زعلوك ولالا و علي المهم خطي هل السريب يوتر فيا و بكرا تو نحطلك افلوس في احسابك
خلود ابتسمت بي انتصار وفي خاطرها...ما شفت شي صبرك بس ح نخليك حاف منتوف
خلود: و حطلعني تاخدلي دبش
يعقوب: تي دبش شن و توك واخده دبش لي العرس كله اجديد
خلود دارت روحها زعلانه: تمام ما تخدليش
يعقوب باس فمها: بلاش زعل بكرا الصبح جهزي روحك ناخدلك انتي و رهف خيتي
( يعقوب كانت خالته الماديه ممتازه)
خلود شقلبت عيونها: تو شكتلك رهف قاتلك تبي دبش
يعقوب فنص فيها و بعصبيه: ردي بالك اتحاولي اتغيريني عن هلي يا خلود ردي بالك
و صبا و خش لي الدار
خلود: لا ما قصديش حبيبي
و قعدت علي الكنبه وهي مبتسمه بنصر تفكر شن اديري بي الفلوس يلي ح يحطهن يعقوب في احسابها وكيف ح تصرفهن ومافكرتش شن ح تكون نظرة يعقوب ليها عروس من تاني يوف في عرسها ادور في الفلوس و الدبش وبلفعل يعقوب انصدم فيها وطاحت من عينه اخر حاجه كان ممكن يتوقعها انها اتكون ترضاء بحاجه كيف هكي و رجعت بيه الداكره لي كلام عمر وقت يقوله ماديه و كلبه افلوس اشوي وصبت و خشتله لي الدار خدت روب احمر و لبساته في الحمام و طلقت شعرها و تانقت و طلعت عشان تغريه
خلود مقعمزه جنبه علي السرير و تمس في لحيته: حبيبي اسفه ما قصديش نزعلك
يعقوب ضعفلها ويبحت في التلفزون
خلود باست فمه: خلاص عاد افردها وكيف ما تبي بكرا شيل معانا رهف
يعقوب ضعف و بتسملها
خلود بحركه صايعه طفت الوناسه
يعقوب بصوت واطي: راضيه اليوم
خلود ابتسمت: اها
ونزل عليها و راحو في خبر كان
________________________________
في حوشنا بعد جيتهم العشيه كنت امريفه علي خوتي واجد و ستلمتني ماما وقعدت اتقصقص شن جو عمر معاكي و امه كيف تعامل فيه عحباتك الشقه وكنها ما تعجبك اتهبل امريحك بخيل ولا كريم وووووو واني انتفخت كبدي من الاسئله بعدها قلتلها ح يتعشاء هنا صبينا خشينا المطبخ درنا عصبان و نعليا من العصبان كيف نحبه و درنا شاورما ماما شاطره فيها و طعميه و خبز بالون و سلطين بابا غنوش و سلطاء مشويه و مكرونه و مشروب اشوي و جاء عمر مع ادان العشاء وكان جايب عرم حاجات و خش هو و بابا و امين لي المربوعه و حسهم يهدرزو سياره ما سياره شركه ما شركه أشوي و جاء امين خش علينا في المطبخ
امين: تي هيا متنا جوع بابا قال مش امعشينا ولا شنو
ماما اترتب في اطيس المشروب في السفره: اهو خلاص كملنا خلاص شيل
أنا: باش رد شيل الفواكه
امين: اني جعان مش ح نرد ابعتنهن مع وسام
ماما: باهي وانت سكنت جعان جعان اصبر مافيش من مات من الجوع
امين: بري لي الصومال و شوفي كان يموتو ولالا
ماما: شيل و سكر فمك بل ملكحه شيل
وسام: ماما حناكل معاهم
ماما: تمام ماما طلع الفواكه و كول معاهم
امين: لالا يا ماما شن ياكل معانا عيل هضا
وسام يبكي: لالا راجل اني ناكل معاكم
أنا: ماتبكيش ما تعدلش عليه
ماما بعصبيه: اطلع ما تحرقش دمي و خوك ح ياكل معاكم
طلع امين وهو يتمتم و شايل السفره و وسام مسح ادموع و رفع الفواكه و طلع ونحن خدينا السفره و طلعنا كلينا في الصاله و ياسين تما يسحف وكل اشوي يخرب
أنا نشوفله ونضحك: حي يا ماما كابر
ماما ضحكت: اها
رنيم: راك ليك يومين بس متجوزه وتو باش فطنتي انه كابر
ماما أتشوف لي رنيم: وووووه منك انتي و لسانك هضا يلي تبيله قص كولي وانتي ساكته
روان طلعت سانها لي رنيم: يا امهزززبه 😝
أنا ضحكت: اسكتي يا شيطانه
ماما ماسكه ياسين: بس يا ماما خليني نعرف ناكل
انا مسحت فمي: عطيهولي كملت أنا
ماما عطاته ليا: شن كليتي انتي قصدك هذي ماكلتك حتي عند الراجل ما كنتيش تاكلي هكي
أنا انبوس في ياسين: نيتي منسده علي الأكل اليومين هدينا
كملنا ماكله و غسلنا المواعين و عمر قالي هيا خلاص نروحو لبست عبايتي و طلعنا وكانت الدنيا مطر و صقع رهيب لدرجت عمر شغل مكيف السياره علي الساخن و صلنا و رقينا شقتنا و خشينا دار النوم
أنا نسلب في دبشي: حي عليا حي عليا صقع
عمر يضحك: باهي اهي الدفايه شغاله تو تدفي
خديت توته شتويه لونها ازرق لبستها و درت شعري كعكه مانحبش نرقد بيه مطلوق يضايقني و بخيت عطر وجريت لي السرير رقدت و تغطيت وقعدت نراجي في عمر اشويه و طلع من الحمام و خش معايه في السرير وتحت الغطاء
عمر رفعلي املايتي و خشش يده في بطني ويمس فيها
أنا نضحك بصوت عالي: حي طلع يدك طلع امصقعه ههههههه
عمر : و بطنك دافيه خليها تدف أشوي ههههه
أنا نضحك و نحود في يده: تي لا حي عليا من صقاعت يدك جسمي رعش تحشم ههههههه
عمر ضحك و حسب يده و نزلي املايتي وجاء فوقي
أنا بستغراب: نعم كنك شن تبي
عمر غمزلي: تعرفي اكويس شن نبي أنا
أنا : لالا هكي واجد هي مره اصلن وانت درتها تلت مرات خلاص عيب مش ديما عيب هي مره في الحياه
عمر ضحك باعلي صوته و مباش يسكت ومستمر وهو يضحك
أنا قهرني: كنك شن في يضحك ها
عمر يضحك: من قالك مره في العمر يعطيك السلامه من قلهالك
أنا نحكي ببرود: ماما قاتلي اول يوم يقربك ليلة الدخلله ما قلتش كل يوم
عمر رد يضحك : ريمي يا روحي مش هكي فاهمه غلط لو الراجل يجامع مراته مره وحده بس كان احني مجيناش علي الدنيا كيف نتكاترو ما يصررش حمل من مرره وحده ولو صار نسبت 2% من نساء تحمل من مره وحده حشم حالك معاش اتقوليها الدوه هذي و غير هكي رغبه هي راجل كل ما يرغب مراته يقربها انشالله في اليوم عشر مرات
أنا ابتسمت: به ما كنتش نعرف
عمر رد يضحك : عليك عبط فيك كم بنعاني باش انعاني بس
أنا زعلت و حطيت يديا علي صدره وبعدته: بعد بعد من عليا تضحك عليا بعد
عمر قربني وباس راسي وسكر عليا في حضنه: اسف يا قلب عمر سكتت خلاص
أنا مزالت زعلانه
عمر يرضي فيا: وين دباديبك وين ههههه
أنا صبيت ونزل من السرير : حق حي وين دبدوبي كوتي
عمر ضحك: باهي يلي دكرتك هوينا في الشكاره ( كيس .. بورزه)
أنا شيت نجري و فتحت الشكاره و طلعت البانده ابتاعي و رديت لي السرير و تغطيت وحطيت الدب بينا
عمر: تو شن اسمه هضا
أنا ضحكت: سميته كوتي
عمر يضحك: عليك اسم
انا: أنا عاجبني
عمر: باهي يا عناد انتي
أنا.حودت الدبدوب حطيته خلفي و حضنت عمر : نحبك
عمر باس راسي : واني اكتر والله
أنا رفعت راسي ونبحت فيه : لا أنا اكتر
عمر ضحك ونزل راسه وباس فمي: باهي ريمي اكتر ارقدي خلاص
أنا خشيت في حضنه اكتر وكانه خايفه يهرب
عمر يمشي في يده علي راسي ويعاود: بناتي ما ترقديش طول اقري قران و استغفري بعدها ارقدي
أنا: نقرا المعودات و نستغفر بعدها نرقد
عمر يختبر فيا ويحول في جمتي من علي وجهي : باهي شن هما المعودات
أنا: الخلاص و الكرسي و فاتحه
عمر ضربني علي راسي: عينك يا حيوانه
أنا حطيت يدي علي راسي مكان ضربته: اي كنك
عمر: يا حيوانه المعودات ( الفلق و الناس و الكرسي ) و تستغفري و تصلي علي النبي و ترقدي
انا ضحكت: طيح سعدي قبل نقرا في هدوك
عمر باس راسي: مش مشكله
أنا خديت يده وعضيتها: معاش تضربني
عمر حسها : آه يا مكاره
أنا: تستاهل
عمر: في مرا طبيعيه اتعض جوزها
أنا بنحكي عمر سكر فمي بيده
عمر: خلاص ارقدي الساعه 1 و توقيت شتوي
و رقدنا
_________________________________
وعيت الصبح دوشت و لبست قفطان شتوي لونه احمر بنوتي لي تحت و كم و هضا وين حسيت روحي وليه حق
الكاتبه( شعور القفطان في حوشك يحسسك انك جد تميتي وليه وتحسي روحك كبيره و شعور يهبل بي الاخص وقت تكون عروس علي عكس لم اتكون مرا ليهم فتره متجوزه ما ختلفنا دلعي نفسك و جوزك البسي اتوت و شورتان و كتوت بس معليش لو مره مره كسرتي لك ولبستي قفطان ماتقوليش لالا نبان وليه كبيره كيف امي ولا حني لالا شوفي قفطان لي سنك و البسي حتي جوزك يفرح بيك ويحس بي شعور سمح ممكن ما يعرفش يعبره مش ديما مطلعتله تلت ارباع جسمك التغيير حلو♥️)
انردو لي روايتنا
كملت لبس وتعطرت و طلقت شعري و صليت و طلعت ضميت الصاله والحوش كان نضيف لي ان كل حركتنا في دار النوم و المطبخ بخرت الحوش و خشيت المطبخ درت الفطور أشوي و جاء عمر فطر و قالي مليت من قعدت الحوش ماشي المستشفي ونبدا نستلم خالتي ونشوف صارن تغييرات في حياتهم ولالا طلع واني اتصلت بي ماما قولتله شن اندير الغداء قاتلي ديري رز مقلي و دجاج و طاجين و فعلن درت يلي قاتلي معه شفت الساعه لقيت مزال عندي وقت درت بابا غنوش أشوي وجاء عمر وكانت الساعه 3 دوش و اني سخنت الرز و صبيت وتغدينا و صبيت انلم في السفره و وقفت علي الحوض وعمر يبحت فيا بعدين
عمر صبا ومسك يديا وباسهن: اميرتي تعبت واجد صح
أنا هزيتله راسي
عمر ابتسم وقرصلي خدي بشويه: عارفك يا عمري دلوعه و الشي هضا مش حمله وحوش هلك ماكنتيش متعوده ف لي هدا انتي طيبي بس والعشيه بادن الله انحيبلك غسالة اصحون ( تباسي) ما نخليش هل اليدين السماح تدبلهن آلميه الساخنه
أنا ضحكت وفرحت لي اهتمامه ليا: صاااح
عمر ابتسم: اها العشيه تو انحيبها انشالله
أنا حضنته: نحبك نحبك
عمر باس كتفي: واني انموت فيك
كملت غسل و خشينا لي دار النوم أنا و عمر و رقدنا و العشيه وعيت ما لقيت عمر اتصلت بيه قوتله نبي ننزل لي الفيلا قالي مربوحه اتصلت بي ماما قولتلها بننزل شن اندير قاتلي ديري كيكه و نزليها معاكي ودرت زي ما قالتلي و زينتها بي الشانتيل و الشكلاته و لبست عبايتي و نزلت ولقيتهم مكسدين في الدار وحتي عامر كان موجود
أنا بصوت واطي: السلام عليكم
اعميمه و عامر: و عليكم السلام
أنا سلمت عليهم بي اليد و رغد سلمت عليا بطراف اصابعهاا والكل لاحضها وهدا الشي حرجني و قعمزت
اعميمه تتغير في الجو: شن جايبتنا اكنينتنا
أنا ابتسمت: درت كيكه
عامر ضحك: جت في وقتها واني ليا ساعه نكلم في هل التنباله و شاور علي رغد نقوللها ديري كيكه ما بتش
أنا ابتسمت
رغد تحكي بتكبر: والله اني الحجات هدينا مش شوري و الطبخ و الارف هضا مش ليا اني شوري نهتم بجمالي بس
أنا نبحت و ساكته
عامر بنفعال: احترمي نفسك شن الارف نعمه هذي خير جدك انتي
اعميمه شافتلي: حطيها يا ابنيتي في المطبخ و قولي لي ماريا اتجيبها لينا مع قهوه
أنا صبيت: حاضر اعميمه
و طلعت و اعميمه استلمت رغد
اعميمه بنفعال: كنك انتي هكي حيوانه امتاع فلايط ما سدتكش هزيبة الاول امس من عمر
عامر: يا ريته والله ضربها
رغد شقلبتها اعيونها
عامر شاف لي امه: يام شن كنتي تدعي لي عمر باش ربي رزقه بي مرا جميله كيف هكي را حتي اني ولدك ادعيلي ما تنسينيش
اعميمه: طيح سعدك طيح سعدك مرات خوك يا قليل الادب نزل عينك من عليه يا صايع
عامر يضحك علي امه: تي يام واللهي نيتي صافيه ونشوف فيها خيتي كيفها كيف حنان و رغد كيف عاد رانا اكبار و نفهمو في الدين بس حتي ربي يحب الجمال
اعميمه: اها باهي طمنتيني
عامر قرب من اعميمه: باهي قتلك يام .
اعميه بدون نيه: نعم اطربني
عامر: ما عدهاش اخت و غمزلها
اعميمه خدت المخده و ضرباته بيها: صبي صبي هضا مزايد غير نجوز واحد مجنون كيفك
عامر ضحك و طلع يجري من الدار
و خشيت عليهم و رغد فايتتني وعينها في تلفونها بس انسجمت مع اعميمه وكانت واعيه بكل و هدرزتها راقيه و قعدنا حديت يجيبي حديت أشوي وجت حنان واني فرحت بكل لي ان نحبها حبابه بكل وطيبه و نحس فيها كيف خيتي ونسجمت اكتر و اكتر و حسيت عندي عيله تانيه♥️
....يتبع