❴🔢❵☟الــبـــــ❴1️⃣9️⃣❵ـــــــارت☟
مريضتي♥️
الكتابه: نولي
الحلقه 19
عند عمر بعد سكر من أمين ركب سيارته ونطلق وكان طول الطريق يجري ويسبسب
عمر يخيط علي الدومان: اني فرخه كيف هذي تكسر كلمتي اني اخر عمري &&& باهي يا ريم باهي
وصل جنب حوش اخويله ونزل يدق الباب
نور: نرمين افتحي الباب
نرمين: صبي انتي مانيش
روان صبت: اني اني نفتح
نور: نجك ليا
رنيم: قولي من قبل ست قالت ماما
روان: باهي باهي اهمنا ( فهمنا)
وطلعت روان تفتح الباب
روان ببتسامه: عمو عمر
عمر ابتسملها بي مجامله: ريونه شن جوك
روان: اكويشه
عمر: ريم وينها
روان: جو
عمر: بري كلميهالي
روان: به وخشت تجري
وكنا كلنا قعدين في الصاله لين ما خشت علينا روان تجري وتتكلم بصوت عالي
روان: ريومه ريومه عمر برا يكلم فيك
انا انصدمت و خفت في نفس الوقت: شن قلتي
ماما: روان ماما عمر من يلي برا
روان: عمر عمر يا ماما يلي جا يوم بيان ريم
خالتي غاده: مصح الله وجه شن جاي يبي
خالتي سعاد: هضا مازاد يجيها اهناي لكن ههه شكله متعود علي لخشوش و لطلوع كل يوم عليكم و اليوم اهو جاها هنا
ماما: لا والله الكلام هضا مافيش منه وعمر راجل مشالله عليه ومش امتاع السريب هضا وعمر ماجنا من بعد يوم البيان بس اكيد اليوم في حاجه مهمه هضا باش جاء
خالتي خديجه: أي اي رقعي تو
انا: ماما نطلع
ماما: اها
خالتي خديجه: تي خافي مرات شن يديرلها
ماما قصدت تقصفها: والله بعد يلي صار معاش نخاف من الغرب ما نخاف الا من القريب امنا القريب وشفتي بعينك شن دار و عمر نسيب معه ريم سنه مش ماس منها شعره
خالتي غاده: شن هل الكلام يا حنين همي تحكي مع اختك الكبيره
ماما طنشتها و شافتلي: بري ماما بري شوفيه شن يبي
انا صبيت و طلعت لبست شبشبي ونندب: حي عليا حي عليا شن يبي مني هضا والله لما يقتلني حييي
و قربت من الباب وشفت ايمين ايسار و نلقاء جنبي
انا: ن ننعم ااا روان قاتلي تكلم فياااا
عمر ماسك روحه بسيف و يحكي ومسكر على اسنونه: اركبي السياره
انا خفت ونشوف لي يده وكيف الدم جاف فيها: لا نبيش
عمر سكر يده وضربها على باب: بلا جو&&& ينعن&&& اركبي خير من نقطعك
انا قعدت نبكي وعلي اشوي اندوخ يا ماما يخوف يخوف
انا نبكي: قوتلك نبيش نبيش سيبني
عمر قرب مني ورفعني بلغصب ونا قعدت نخبط
انا نبكي ونخبط علي ضهره: نزلني نزلني
عمر بعصبيه: سكري فمك ماتجيش الا هكي انتي
انا نبكي: قوتلك نزلني
عمر بعياط: أسس
انا عضيته في كتفه: نزلني قوتلك لا نرد نعضك اخر
عمر يتألم: عن شكلك يا كلبه
انا يئست وقعدت نبكي وساكته
و قربنا من السياره فتح الباب وحطني على الكرسي وحطلي الحزام وشافلي
عمر: تعرفي تفتحي الباب ولا تحاولي تنزلي نكسرلك يدك
انا خفت وحودت يدي من الباب
( مش ح نكدب ونقوللكن الشارع فاضي كان ممكن فيه خمس شباب كل واحد مقعمز جنب حوشهم و كانو يضحكو فضييييييحه)
وركب جنبي و حرك السياره
وانا طووووول الطريق نبكي ونق وهو وساكت ومن كتر العصبيه اعروق رقبته بارزه و وجه احمر
انا نبكي: وين شتيلني وين
عمر بعياط: سكري فمك ولا نسكرهولك سكري فمك
انا نبكي: علاش اديري هكي را مانحبكش نكرهك بارد
عمر: اصلن مانبيكش تحبيني سكريلي فمك بس
انا بعياط وبكاء: علاش تجري علاش باهي
عمر عيط عيطه باعلي حسه ممكن لو السياره وقافه ماتمشيش كانو يلي برا سمعوه
عمر بعياط: تسكتي ولا اقسم بالله يا ريم الا مانكسرك اسكتي الزح ينعن&&&
انا خفت منه وسكتت وقعدت نبكي
عمر يعيط ويكسر في الدومان: انا يا ريم تكسري كلمتي انا
انا نبكي: والله ما كسرتها بس كنت نبي نغير جو
عمر يعيط: تي اما جو حوش الكلب هداك اما جو ينعن&&& نسيت شن دارلك نسيتي
انا نبكي: مانيستش بس هو امسافر
عمر بعصبيه: امسافر امسافر امسافر عذر اقبح من دنب تي نقولك ماتمشيش ما تمشيش
انا: نقعد ابروحي في الحوش
عمر يعيط: سكري خراك وما تعيطيش اسمعيني لو قلتيلي يا عمر نخاف ابروحي كنت جيت وصفيت سيارتي جنب حوشكم وقعدت نحرس فيك كيف الكلب المهم ماتمشيش
انا نرشف في خشمي: حشاك منه
عمر: قتلك سكري فمك
انا خفت سكتت
عمر: وفقوها اللبسه ال&& هذي يلي لبستها ليا ينعن جد اصلك واصلي تي قصيره لبلوزه الزف قصيره اصلك ناويه اتجيبي اخرتي انتي
انا نمسح في ادموعي
عمر: أبكي أبكي مزال ما شفتي شي
اشوي و وصلنا لي حوشنا وفرحت بكل وحسيت براحه بعد عرفت ان مش ح يشيلني لي مكان تاني كيف احمد
عمر برفعت حاجب: انزلي
انا شفتله وضحكت
عمر بعصبيه : وتضحك اخر وتضحك الصبر يا ربي الصبر
ونزالنا و طقينا الباب و بابا فتح وعلامت الصدمه على وجه
بابا بصدمه: تي شن اديري عندك هذي
عمر شافلي: خشي جو
بابا يشوفلنا ومش فاهمه شي
انا خشيت
بابا: ها عمر شن فيه انشالله خير
عمر: ريم يا عمي ريم والله ناويه اتجيب اخرتي قلتلها ماتمشيش حوش هداك الكلب حشاك كسرت كلمتي ومشت لو انتم نسيتو شن دار انا ماننساش وريم عرضي وشرفي ومانرضهاش تمشي اهناك والله ما نرضها
بابا نزل راسه: والله كل كلمه قلتها عندك حق وحتي انا مش راضي علي مشيتهم بس الصغار زنت عليا لين ما وفقت
عمر: يا عمي انا واللهي ماندخلش في هلك في الاخير حوش اختها بس ريما ماتمشيش
بابا: والله حتي انا يا عمر وافقت وندمت ونقنع فيها قعمزي مابتش وقلتلها اسالي خطيبك قاتلي قال باهيي
عمر في خاطره: وتكدبي اخر باهي يا ريم
عمر: لا ما قلتلهاش باهي اصلها عنيده وراسها يابس ولو قعدت علي تسكير راسها هضا بكرا نقرا فاتحتي عشان كلمتي تمشي عليها كيف السيف
بابا: لالالا خلينا علي الموعد لول بعد شهر وريم او نتفاهم معاها وحق علينا
عمر نزل نضارته: يلا سلام
بابا: باهي مربوحه
ومشا عمر
__________________________________________________
خالتي سعاد: وينها بنتك شن المهزله هذي وين تحساب روحها عايشه
خالتي خديجه: اكيد مشت اتصيع معه
ماما بعياط: خلاص ياسركن ياسركن وانتن مش حباتني ولا حبات عويل محترمتكن ونحبكن وكل شي ندير فيه علي خاطركن وانتن كره في اقلوبكن اتجاهي لو حسداتني علي عيشتي حتي اني يااام صبرت ويااام تحملت طلال خديته حاف منتوف ماعنده حتي ربع ومع هضا رضيت بيه قال ربي سبحانه وتعالى( تجوزو فقراه يغنيكم لله من فضله) ياااام تحملت معه ويااام شقيت بس ربي يلي يعرف كم ليله رقدنا بدون عشاء و كم قايله طويله مرت علينا بدون غدا جبنا ريم وكانت حالتنا الماديه سفر نحصلو 20 دينار نفرحو كله باش نخدولها حليب و حفاض كنا ميتين جوع انا وباتها بس نوفرولها في الحليب واللحوس جبت امين وحالنا تبهدل اكتر و كنت نشوف فيكن وحده وحده كيف عيشات و متريحات و اكل وشرب نطلب منكن تسلفني كنتن اتردن فيا وتكدبن ما عدناش ما عدناش كيف ح نعيشو عويلنا سفرنا أمريكيا مش عشان نتنزهو سافرنا عشان نعيشو وفعلن عشنا اهناك ولي أن رزق حلال ربي بارك فيه وعالجت بنتي و ردينا ليبيا واليوم راجلي واحد من التجار يلي عندهم سيط في الشرق واصلكن عمركن ما حبيتني ولا ح اتحبني وتمت تمسح في ادموعها
خالتي غاده: ييييي علي لدراما
رنيم و روان حضنات ماما ويمسحن في ادموعها
روان: ماما تبكيس
ماما بستها: مانبكيش ريشه يا ماما خشت عيني
روان: به
ماما صبت و شالت ياسين
خالاتي: وين
ماما: مروحه ماعنديش مكان بينكن وربي يدومكن لي بعضكن
خالتي خديجهه: مربوحه بري
ماما : هيا بناتي
نور تبكي وجعتها ماما وكانت ملاحضه كيف امها و خلاتها من اول المجمع كيف يلكحن في ماما
نور: اخويله قعمزي ما تمشيش
ماما: نور حبيبتي مانيش زعلانه منك
وطلعت هي وخياتي
نور تبكي: تريحتن او تريحتن حرام عليكن اختكن هذي
خالتي سعاد: كدا اسكتي انتي وفكينا من جوك
نور خشت لي غرفتها تبكي
__________________________________________________
عند ماما صبت في الجنان وتصلت بي بابا و بابا ركب سياره ومشاء جابها هي وخياتي وكان حاس ان في حاجه ماما ما حكتلاش شي دارتلنا العشاء تعشينا وهي ما كلتش خدت ياسين وخشت لي الدار النوم كملنا عشاء وغسلت الموعين انا و رنيم و كملنا وبابا ندالي وقعد يحكي معايه علي موضوع بدي وكيف نكدب وكيف نكسر كلمت عمر وووو وقعد ينصح فيا قريب ساعتين بعدها طلع ومشا لي ماما
__________________________________________________
في الفيلا
عامر كان في الدار هو وامه و رغد
عامر: يام وافقي ونبي يام
عمتي عائشه: قتلك لا يعني لا اسكت
عامر: تي علاش يام ولدك راني ولددددك
رغد: كنه يام شن يبي
عامر جدا فيها المخده: مش شورك انتي
رغد ردتها له: أي اي كسره مقوه يدك طيرت راسي
عامر يقلد فيها: اي اي ... تي ونبي سكريلي فمك مخده هي جو الكيوتات ما ديريش مش ليكي را
رغد: به حاضر.... شن يبي يام
عمتي عائشه: يحنه يبي يبدل سيارته بياخد اخر قالك هذي يلي كيفها كترو في البلاد ومعاش تلفت في نظر البنات نبي اخر افخم
عامر: وين المشكله يام ولدك اني
عمتي عائشه: ومن قالها
عامر: امالاه شن
عمتي عائشه ببرود: لالا انت تبني مش ولدي
عامر: اهااااا تمام امنوره يا غاليه
عمتي عائشه: بوجودك
عامر: ونبي يام ونبي واللهي نبي سياره من لاخير تي ولدك عنده معرض توسطيلي معه يام
عمتي عائشه: ونبي خطاني نتوسطلك مع حنك تحسابك قعدين علي بنك روما كل شهر يبي سياره
عامر: تي يام را بعد انموت تندمي واللهي تندمي تقولي ياريت خديتله وانا خايف عليك من الندم
عمتي عائشه: لا يا باتي اني نبي نندم وبعدين علاش بنندم نندم وقت اتجي تقولي يام اشريلي مصحف قران ومانشريلك شيليني لي الجامع بنتوب وما نشيلك مش سياره عطك خرا
عامر: انتي امغير خوديلي السياره يلي نبيها و او نختم المصحف
عمتي عائشه: هوينا خوك و امشيله اني مش متوسطتلك معه ايوه وشن تبي انشالله فراري ولا شن
عامر: تي امغير يام قولي اسمها صح وبعدين لالا مانبيهاش نبي هكي بجو خاطري نركب مفخره
عمتي عائشه: وشن المفخره هذي
عامر: ما سمهاش مفخره هكي بس الاسم الشئع هكي يقولولها وشني سياره يام( وسفر) صاااااروخ
عمتي عائشه خبطاته علي كتفه: تسفر جنبي يا قليل الادب ومش وخدالك شي يلي زيك بصغارهم
عامر ببرود: لا اني مراتي حامل🙂
عمتي عائشه: صبي صبي صبييييي خير من نحدف فيك الطاسه قليل ادب يلي ماعرفت نربيك
عامر صبا يجري ويضحك
__________________________________________________
عندي انا كنت نتصل بي عمر بس بدون فايده مايردش 20 مكالمه ماردش وفي الاخير قفله تنهدت وطفيت تلفوني ورقدت وانا نفكر فيه
.....يتبع