❴🔢❵☟الــبـــــ❴1️⃣7️⃣❵ـــــــارت☟
مريضتي♥️
الكاتبه: نولي
الحلقه 17
ومسك يدي وقعد يخبط علي الباب بقوه لين فتح بابا
عمر بعصبيه: السلام عليكم
بابا فاتح عيونه بصدمه: عمر!!! تي ريم شن اديري عنك
عمر معصب و وجه احمر: يا عمي بنتك كانت تلعب في الشارع في كوره مع العويل واني مخطم ماشي لي شغلي شفتها
بابا شافلي وقعد يعيط: ريم شن الكلام هضا ها قولي معقوله يا ريم اديري هكي
عمر كان معصب بكل: بالله يا عمي عينكم منها واللهي يلي يحقها ينزل من قيمتي يرا طلعتها ماهي شور شي وشعرها مفتوح مايصيرش الكلام هضا يا عمي انتبهولها اشوي
بابا عصب: والله حقك علينا فعلن مافيش من يرضي مراته المستقبليه تلعب في الشارع وناس تحقلها حقك علينا
انا نبكي ونمسح في ادموعي
عمر رخا يدي: خشي جو
بابا بعياط: خشي خشي حشم حالك
انا خشيت وانا نبكي
عمر شاف لي بابا: ماتعيطش عليها خدت حقها و هزبتها فوتها معاش ح تعيدها
بابا: انشالله هي تفضل افطر معايه
عمر: مره اخر انشالله
بابا : تمام مربوحه
وطلع عمر ركب سيارته ومشا لي معرض اسيارات و بابا خش جو وسكر الباب
بابا بعياط: ريممممم يا ريممممممم
انا قاعده خلف ماما ونبكي
بابا خش وبحت فيا وهو معصب: تعالي هنا
انا نبكي
ماما: خلاص جبيبي عشاني فوتها ليها المره هذي
بابا بعياط: تي شن نفوتها شن الفرخه تلعب في شارع كوره و عمر شافها و جاء معصب ومن حقه تي حشمتني الحيوانه
ماما تلفتت و شفتلي: تو علاش هكي يا ماما علاش بعد سيبتي اللعب علاش رديتيله وكيف تلعبي في الشارع وبمنضرك هضا
انا نبكي ونمسح في ادموعي
بابا يعيط: ريم قتلك تعاااالي
ماما: سمحها طلال اخر مره ماتكبرش الموضوع
بابا بصوت عالي: تي شن ما نكبر الموضوع شدي عندك طالعه بدون ادنا و كساره كلمتنا و تلعب مع الفروخ في الشارع و ناس تحق فيها تيي ح يردو اللوم عليا وعلي الراجل يقولو كيف عطاها وهي مزال عقلها صغير و الراجل كيف قبل بيها هكي واخر شافت اخر مره طلعت فيها بدون علمنا شن صار وكيف خطفها هداك الكلب
ماما: والله كلامك كله صح والله صح بس يلي صار صار سيبها عليا وح نفهمها كل حاجه
انا نبكي ونرعش خايفه
بابا قعمز ويمسح على وجه: لا حول الله لا حول الله وشافلي صبي خشي جو
انا صبيت نجري لي دارنا
بابا شاف لي ماما: فهميها الله ايربحك فيها راني اتعبت تصرفات اديري فيهم حتي وسام و روان ما دروهنش
ماما: حاضر والله حاضر ح نعلمها
بابا: ديري فطور
ماما: حاضر امسك ياسين بس
بابا يبوس في ياسين: ربي يحفضك ما يبكيش واجد صح
ماما ضحكت: اها مش بكاي
دارت ماما الفطور و فطرنا واني غسلت المواعين وماما قاتلي تعالي خشيت اني وياها لي دار النوم و ساعتين وهي تنصح فيا وتتكلم معايه لين راسي وجعني بعدها صبيت درت اني وياها الغدا وماما الفتره هذي كلها ضاغطه عليا واجد وتعلم فيا في الطبخ قاتلي انتي قادمه على مرحلت جواز ولازم تتعلمي كملنا الغدا وتغدينا و غسلت المواعين انا و رنيم وخشينا نرقدو اشوي
عند ماما و بابا
بابا يشرب في الشاهي: ما ردوش عليك العرب
ماما ترضع في ياسين: حي ما قتلكش امالاه
بابا: شن فيه انشالله خير
ماما: واني انطيب في الغدا اتصلت بيا امه وقالت موافقين و البيان بكرا
بابا: تمام علي خير انشالله
ماما بنجعاز: كيف يخططو من عندهم كيف ح نجهزو لي بكرا
بابا: اني عندي علم وكل شي ساهل ماتعقديش لمور و بعدين حياتك ح يسعدنك
ماما: انشالله
__________________________________________
عند عمر في معرض السيارات
الراجل: السلام عليكم
عمر و يعقوب: وعليكم السلام
الراجل: اما واحد فيكم صاحب المعرض
عمر: انا تفضل
الراجل: يزيد فضلك اني نسمع بي جودت سيراتك وجاي ناخد منك سياره وتكون مضمونه وحق اني ما نفهمش في السيارات ف خفت نمشي لي معرض اخر يغشوني يعطوني سياره مش تمام ف انا جتك انت
عمر ابتسم: شن تبي انت
الراجل: مرسيدس
عمر : تمام ولا يهمك
و تم مع الراجل وجا قعمز جنب يعقوب
عمر: ها كنك اليوم ساكت غريبه
يعقوب يدخن: قطعتني يا راجل والله قطعتني بطلباتها تبي و تبي وتبي كبدي زهقت
عمر: نصحتك يا يعقوب بدل المره الاف بس ماسمعت انشالله خير
يعقوب: والله ماني نادم والله بس نبيها تغير من نفسها اشوي نحبها وحق يلي خالقني نحبها
عمر يشوفله ومتاسف و واجعه صاحبهه
__________________________________________
كمل عمر من المعرض و روح لي الحوش لقاء حنان و صغارها
عمر طبس شال سند وباسه: سنود شن جوك خالو و يبوس فيه
عمتي عائشه: الحمدالله علي السلام
عمر يبوس في سند: الله يسلمك مزال الغدا يام
حنان: لا مزال كان اشوي
عمر قعمز: ها يام رديتي عليهم
عمتي عائشه: اها
عمر ابتسم
حنان بفرحه: مش ح نسيبو حاجه الا ما نشيلوها ههههه
عمتي عائشه: اي باش تفلسي بينا وخلاص
عمر: ماتخفيش يام كل شي من جيبي
حنان: معناها العشيه شيلنا لي السوق
عمر: تمام
عمتي عائشه: خديت دبل ؟
عمر: لا مزال تو بعدين ناخد
عمتي عائشه: خودلها تاع طرف مش تبزر افلوسك تاع طرفين ولا تلاته
عمر عصب لي ان مايحبش من يدخل في مواضيعه: يعني تو يام انتي سيبتي كل شي وفكرتي في الدبله
عمتي عائشه: باهي باهي سكت
و مشا الوقت وجت العشيه و طلعو لي السوق وخدو كل شي لي البيان و ردو لي الحوش غلفو كل شي وما قللوش من قدري خدولي كل حاجه
__________________________________________
يوم البيان الساعه 5 بتحديد♥️
جو الضيوف وصحبات ماما و جيران و الاقارب و خلاتي واني ماعنديش صحبات بحكم حالتي ف في المدرسه مافيش من مصاحبني و لتمت الناس و بنات خلاتي ماجنش نور بس جت واني كنت لابسه قفطان باربي لونه وردي طوله فوق الركبه بشوي ومنفوش و صدره فيه نقرشه بي الخرز و لبست كندره كعب ورديه و خراص و رديات و جت المزين درتلي اشوي مكياج و من غير ما نحكيلها قاتلي حلوه انتي مش ح نكترلك مكياج درتلي كحل وعيوني اكبار و زاد كبرهم ماما بخرتني قتلي را يعطوك بعين و درتلي روج بنوتي لونه وردي و مسكره وطلقتلي شعري و طلعت نهبل♥️
نور مقعمزه جنبي: حي عليك طلعتي تهبلي يا روحي
انا ابتسمتلها وخديت يدها حطيتهاا على قلبي: مسي قلبي
نور ضحكت: حي يرقص قلبك مش يدق
انا: ههههه
نور: تحبيه ريومه
انا ابتسمت وقلبي تما يدق و هزيتلها راسي
نور: نجك ليا ربي يهنيك
انا نشوفله: قصدك هكي نقعد نبحت في الناس يلي تاكل واني جيعانه
نور تضحك: حي عليكي نقصي حسك هههههههه
انا: تي جعانه بناكل بقعمز علي الطاوله هديك مافيها كرسي فاضي ناكل ونجيك
( طبعن البيان امديرينه في الجنان امتاعنا و نضام كراسي و مزينين لجنان )
نور مسكت يدي: تي قعمزي حشم حالك ماتجيش شن ناكل ما ناكل ههههههه ما تجيش
انا بزعل: علاش
نور: هكي ماتجيش وبعدين بايخه تاكلي مع الناس ومكان من يقعد فيه وتو بجو عربك تسلمي عليهم وتبوسي وريحتك اوكال
انا: ااااوف
نور: تو تمشي الناس و تاكلي
انا: به
اشوي وجت ماما: ريما عن شكلك افرديها كنك مكشره اتقول غصبينك
نور: اها قلتلها ابتسمي
ماما: اضحكي يا ماما حشمتينا
انا: 😁 هكي تمام
ماما: اها تمام امغير ردي بالك على سنونك را يكسرهم الصقعع😒
انا: وعلاش ملبستني هكي دامك خايفه عليا هكي معريتني
ماما: ما اهي الخيمه دافيه وفيها دفيات
نور تضحك:بسيف اطلع فس سبله هههههه
ماما ضحكت
و قعدنا خمس دقايق وجو هل عمر امه و خواته وعمته و خالته و بنتها
( خالت عمر نصره يلي هي اخت عمتي عائشه وعندها بنت وحده بس عبير يلي تموت في حاجه اسمها عمر ومن عمري هي )
ماما وخلاتي صبو و رحبو بيهن و قعمزو كانو جايبين سلتين فواكه مشكله و بكس شكلاته منوعه و بكس صغير امتاع ساعه بي اسوارتها وتاقم فضه اصليه سلسه و خراص و خاتم و سله فيها عصير اشوبس و سله فيها منضفات نوعين عطور و لونين ازمالتو و لوشن جسم بريحت الفراوله و التفاح و شانبو شعر منتج كامل بمشتقاته بلسم و سيريوم و شانبوات جسم و بكس صغير فيه افلوس شكلهن هكي حاجه 2000 و قفطان ♥️
عمتي سعاد: نستوناوالله
عمتي سالمه ببتسامه: الله ايئانسك
عمتي عائشه تشوف لي ماما وخلاتي: ها ما عرفتينا
ماما ببتسامه: هذي خيتي الساعده الكبيره و هذي خديجه بعدها وهذي غاده واني اصغر وحده وامي عطيتك عمرها و بوي من زمان
عمتي عائشه بغررو: تشرفنا
حنان شاورت علي خالتها: وهذي خالتي ماجتش في الخطبه وهذي بنتها عبير وهذيك اختي رغد
ماما ابتسمت: بجوده
عمتي نصره كانت مقهوره لي انها تبي عمر لي بنتها ردت بدون نيه: بيك اجود
عمتي سالمه تشوفلي ومبتسمه: الله ايبارك الله ابارك مشالله طالعه غزاله
انا ابتسمتلها هي وحنان تريحتلهم هلبا
نور نغزتني
انا فهمت عليها وقلت بصوت واطي: تسلمي من دوقك هضا
حنان: ههههه نجك ليا عرف يختار خوي والله
ماما: والله احني يلي لينا الشرف
عمتي عائشه كا عدتها بس المرا اهيا حسيتها تقبلت الوضع اشوي وكنها استلطفتناا
عمتي نصره: والله لعب هضا فرخه 16 مزالت صغيره علي شن مستعجلبن بس
خالتي غاده: واللهي صغيره ولا كبيره الجواز والموت هدينا كان ربي كتبهن لا يوخرن ولا يقدمن وهضا نصيبها
عمتي سالمه تقهر فيها: صحه السانك اي والله صدقتي
عمتي نصره انقهرت
رغد توشوش وتشوفلي بستحقار: تو هذي يبدلك بيها العميان هضا
عبير علي اشوي تبكي : اها باش تشوفي خوك الحقير
رغد بخبت: قربي اسمي شن ح نديرو
وتمن يوشوشن بعدين
رغد: ريم هضا فونك يلي مسكاته
انا: اها
رغد: كدا عطيهولي اشوي نبي نرسل منك برامج
انا: عنديش برامج اني
رغد: اكيد عندك وتساب بنرسل منك وتساب وتسابي اصداره طاح
انا ابتسمت وكيف العبيطه فتحته وعطيتهولها: تفضلي
رغد خداته مني بخبت: ح نطول اشوي علي خاطر بنرسل على البلوثوت
انا: تمام خودي راحتك
حنان شافت لي اختها: رغد شن تبي بي فون البنت
رغد: اااوف كنك هكي زقبتلي في كل شي الهي في فرخك
انا استغربت كيف تحكي هكي مع ختها الكبيره وسكتت
ماما: ريما صبي البسي قفطان عربك
انا بعبط: وعلاش نلبسه ما اهو لابسه
ماما وخلاتي تزلطن من الحشمه
عمتي عائشه: نعم نعم
خالتي خديجه: ههههه هههههه بنت اختي بسلامتها اتحب اتنكت
ماما بحراج: هههههههه اها تحب اتبصر ابنيتي
عمتي نصره: تحب تبصر ودمها تقيل
نور نغزتني وصبت: ااااء ريم تعالي معايه
وصبيت معاها وخشينا لي الدار هزبتني و سعدتني في لبس قفطانهم وكان دمي يهبل طوله لي تحت الركبه مجسم و كمه واصل لي مرفقي وصدره مفتوح فتحه بسيطه ولبست وتانقت وطلعت وصورت معاهم وقعمزت اشوي وماما قاتلي عمر ح يلبسك في المربوعه مش ح يخش ما يحبش الاجواء هذي هيييييبه♥️
لبست عبايه و شراب و بابا طلع واني خشيت
عمر صبا وقعد يكبر ومبتسم: الله اكبر الله اكبر
انا ابتسمت وكنت نرجف وقلبي يدق وعلي اشوي انطيح من طولي
عمر قعمز: تعالي قعمزي
انا قعمزت جنبه ومنزله ارسي ومبتسمه
عمر رفعلي راسي من حنكي بصبعه: وحق يلي نفخ الروح فيا نحبك
انا ابتسمت كان يحكي بحنيه و ريحته دخان وحكي بهدو و لحيته يلي تجنن وعويناته الصغار دبلات كان يهبل ما قدرتش وقربته منه وحضنته اها حضنته ♥️
عمر ابتسم و هو حضني ونزل راسه وباس كتفي و وخر لي ان ضعف و خاف عليا من نفسه
انا ابتسمت ونشوف لي اعيونه
عمر طلع خاتمين من جيبه: عطيني يدك حبيتي
انا ابتسمت وعطيته يدي ليسار
عمر ابتسم وباس يدي من جو: يدك لخرا يعمري انتي
انا ضحكت وعطيته يدي
عمر باس يدي ولبسني الدبله : ربي يخيلك عليا
انا ابتسمت وبصوت واطي ونزلت راسي: نحبك عمر
عمر داب و عيونه نعسات ويشوفلي بي حب: وانا انحبك والله
و قرب مني وباس خدي
اشوي وخش بابا وانا طلعت وخشيت جو و كلينا التورته و روحو هل عمر وخلاتي و اني وماما وخياتي ضمينا الحوش و تعشينا و خشيت نكلم عمر♥️
......يتبع
اسفه حبيباتي على التاخر بس والله ضروف و نحاول تطول في الحلقات بس ما نقدرش فوق استطاعتي والله يشهد الله نقعد نكتب بي الخمس و ست سعات نكتب اشوي و ولدي يبكي نسكته ونرد يكتب اشوي و يبيكي وعلي الحاله هذي وعلي العشاء و الحوش و البيبي متعبني والاسبوع يلي مضا كان مريض بس تو الحمدالله بطنه بس متعبته ونحاول علي قد الاستطاع نوفي بوعدي ونزل يوم بعد يوم