مريضتي ♥️ - ❴🔢❵☟الــبـــــ❴1️⃣5️⃣❵ـــــــارت☟ - مكتملة | روايتك

مريضتي♥️ الكاتبه: نولي الحلقه 15 اليوم يلي ح يجو هل عمر يخطبوني♥️ في حوش عمر عمتي عائشه وهي تلوي: والله لو ما عجبتنيش البنت ح نرفض معقوله يسيب بنت اختي ويمشي يدور علي بنات الناس هضا المتل يلي يقول خيرنا لي غيرنا حنان : يمي حرام عليك والله طلعي الموضوع من راسك عمر ما يبيهاش عبير تبيه يتجوزها ولا هو يقعد متريح ولا هي لتنين ينظلمو عمتي عائشه: هو مش عارف مصلحته حنان: تي يام اما مش عارف هضا راجل راااجل 30 سنه مش عير عشر سنوات عمتي عائشه: اسكتي اسكتي و رضعي ولدك حسه يبكي واني قتلك ما عجبتنيش بنرفض حنان خدت ولدها سند وقعدت اترضع فيه ومش عاجبها كلام امها عمتي عائشه كانت من النوعيه الانانيه و النتصلطه اشوي ومش متقبله فكرت ان عويلها كبرو وخلاص كل واحد يعرف مصلحته اشوي وعمر خش عليهم: اوووي صفونه حبيبت خالها هنا صفاء بنت حنان جرت لي عمر و شالها عمر يبوس في خدها: وينك معاش جيتينا يا شينه صفاء: بابا ما يبيس يسيلنا ليكم( ميبيش يشيلنا ) عمر باس خدها ونزلها: ريت هل فتحي لصلع و ما يطلع منه حنان تضحك وسترت صدرها و عطت ولدها الشيشه يكمل راضعه : ههههههههه نسمع فيك يا عمر عمر خش عليهم ويقعمز: واسمعي شن خايف منك انا حنان شاورت علي بنتها: راهي بتباته تو تقوله له عمر شاف لي صفاء وضحك: و تقوله مش فارقه هههههههه حنان: امتي ح تشيلنا بعدين لي هل خطيبتك عمتي عائشه لوت فهما: امتي تمت خطيبته امغير نشوفو زولها قبل هضا لو انا رضيت عمر ما عجباش الكلام و زمطها وسكت حنان تغير في الجو: بعد العصر اكويس عمر ابتسم: لالا نحسها بدري خليها السته نشيلكم باش نوصلو السته ونص حنان: تمام وشن ح تشيللها عمتي عائشه: طياره و سياره 😒 عمر بعصبيه و صوت عالي: لا الله الا الله عمتي عائشه: سكتت سكتت حنان تلطف في الجو: ها اكيد بكس شكلاطه عمر شافلها: اني قلت باقت ورد و علبه كنافه ولا بقلاوه من الحلواني و علبه شكلاطه بما ان مافيش شي رسمي مانبوش نكترو وقت الخطوبه هداك الوقت ساهل حنان ابتسمت: اي تمام و بس خود بقلاوه تحسها مرغوبه اكتر وناس تحبها اكتر عمر : تمام ديري جوك عمتي عائشه:هضا كله و ما نبيش انكتر بر ادبحلهم سقيطه خير عمر صبا وبعياط : لا الله لا الله لا الله الا الله شن تبي يا امي ها شن تبي قوليلي راك قطعتيني الزح وعلا صوته واخدها واخدها ومشيتكم هذي عشان نحطكم في الصوره بس واني والله ما نقعدش راجل لو ما ناخدها وطبق الباب ورقا لي شقته عمتي عائشه بعياط: امالاه ما نمشوش خير كان كيف وجودنا كيف بلاه نقعدو خير خصارة تربايتي فيك حنان: حتي انتي يام زودتيها الحق يقولك الراجل كل شي اختريه ليه الا كندرته و مراته بكرا بعد بكرا ايصيرن مشاكل ايجي ايلومك شن ح يكون موقفك ها قوليلي عمتي عائشه سكتت ومع هضا كله مزال مش راضيه حنان ترقد في ولدها: والله يام عمرك ما تحكي وتقولي القريب خير من البعيد مرات بنت خيتك ما ديرش فيك خير والغريبه ادير والله عمر راجل يستاهل كل خير صلاه و قران ويساعد في الناس ويطلع فيهم من يلي هما فيه ربي ح يعطيه علي قد نيته وانشالله البنت اتكون كيف ما تبي رغد: ييييي علينا اليله السمحه اتبات من مغربها ياخد عبير خيرله حنان بنفعال: انتي سكري فمك واسكتي عاد عبير كيفك مرهقات و شطنات و خبيتات وتكمل كان قعدت مرات خوك وهذينا المواضيع مش ليكي سكري فمك واسكتي ___________________________________________ في المزرعه عند عامر و صاحبه وكان يحكي مع حبيبته عامر مقعمز علي الكرسي و حاط رجليه علي الكرسي يلي مقابله : باهي عمري قتلك البنت: عيونها عامر: امتي بنشوفك البنت: كيف امتي بنشوفك شايفني انت عامر نزل التلفون وشاف لي صاحبه : يييييييييي علينا ازحلقت يا راجل اسامه ضحك: كنك عامر بصوت واطي: تي نحساب يلي تعرفت عليها امس سامه ضحك: وشن طلعت عامر: تي الزح طلعت يلي تعرفت عليها اول امس يييييي شن ايحزها البنت: الو وينك عامر: معاك معاك البنت: شن موضوع الصوره فهمني عامر يكدب: اااا لا مش هكي اني بيني وبينك عندك الشوي النسيانا ف نسيت البنت عصبت: لا نسيان ولا شي شكلك صايع ومتاع بنات ولي درجه بديت تلخبط في صورنا وحدف رقمي وسكرت في وجها عامر: الو الو تي بري&&& طارت هذي ما صارش منه بس نشهد بالله كانت طرف اسامه ضحك: هههههه اتعيش وتجيب غيرها انشالله ههههههههاي عامر يتصل: اس اس ردت ... الو يا قمر شن جوك حبيبي رويده: من قمر هذي اني رويده يا روحي عامر نزل فونه وشاف لي اسامه: تي كني اليوم شكلي خديت عين مكلم بنان ليبيا كلهن ولا عمري تلخبط تو نمشي لي الحوش انقول لي امي اتبخرني بي اللوبان اسامه: ههههههههه رويده: الللو عامر : تي يا قلبي عارفك رويده بس انتي تشبهي القمر و احلي ف لي هذا قتلك قمر يا قمري رويده دابت: نجك ليا... حبييبي ماما اتنادي اشوي ونجيك عامر: تمام يا عيون حبيبك وسكر اسامه: تي يا &&&& عطيني وحده نمشي معاها لكساد عامر يقلب في فونه: صح اني احمار ولعيب ومكلم نص بنات ليبيا بس مانحبش نعطي رقم بنت اي حد يرا عندي اشوي ضمير اسامه: اي اي ما عرفتكش يا عمر بن خطاب عامر يبربش في تلفونه: تي ندور في رقم لكبيده معاش لقيته الزح اسامه: ومن يلي كنت تكلم فيها تو عامر وعيونه في الفون: القلب هذي اسامه: ومن يلي تحكي معاها امس عامر و عيونه في الفون: جو هديكا اسامه: ويلي عطيتنني نصالحك معاها امس العشيه عامر: الحب هديك اسامه: لعنت الله عليك وعلي وجهك و هضا جو عامر اخو عمر 😂 ___________________________________________ في حوشنا وعينا بدري و ماما شاقيه قاتلي اليوم ح يجو هل عمر واني قلبي تم توك تك توك مهداش بكل ونحس في شعور مانعرفش نوصفه بس فرحانه بيه ♥️ ونظفت الحوش كله انا و ماما و رنيم و ماما كيف جايبه مزالت تعبانه كتبت انواع حلو في ورقه وعطتهم لي بابا يجيبهم من الحلواني و شكلاطه وعصائر وفي الحوش قالت انديرو المالح جاء وقت الغدا وتغدينا وخشينا المطبخ اني و ماما ماما شفتلي: شن رايك انديرو بيتزا و برويك و طعميه نظيفوهم قبل الحلو اناا: اممم تمام بس الطعميه انحسها شينه ماما ضحكت: كيف يعني انا: وانتي جايبه دارتها خالتي سعاد اخيي بكل كلها مزيته ماما ضحكت: خالتك سعاده كبيرا في العمر وممكن تعرفش اديرها بس امي اندير فيها سمحه كيف امتاع المطاعم وطعمتها خيال انا هزيت راسي: اها طيبه بكل اديري فيها باهي ماما ديري عصبان اخر ماما ضحكت بصوت عالي: هههههههههههه يا ماما هذي عشيه ماتجيش الا كان عشاء ولا غداء عرفاتك اتحبي العصبان يا شينه انتي بس ما تجيش يا ماما العشيه تبي حجات خفيفه فهمتي انا ضحكت: ماكنتش نعرف ماما شمرت اكمامها : هيا هيا ياصر ما حكينا تو يوعي ياسين معاش نلحقو علي شي وباهي اهو الحلو تو يجيبه بوك انا شمرت اكمامي: في شن نبدو ماما: لالا ريما اغسلي يديك قبل ديما يا ماما في المطبخ بدات قبل لا تبدي اغسلي يديك اكويس انا غسلت يديا: حاضر و بدينا انا و ماما في الموالح..... و كملنا وكانت الساعه خمس ماما شفتلي: بري دوشي خلاص وقت انا هزيتلها راسي و خشيت ندوش ماما بصوت عالي: رنيم يا رنيم رنيم حت تجري: هناي ماما كنت مع ياسين ماما: بري ماما بخري الحوش ريحته اوكال واني نبي اندوش رنيم: ح ندير من البخور يلي في الفازو ماما بعياط: والله نقتلك ريحته شينه ديري من يلي في السطل رنيم: باهي باهي ما قلتش شي ماما: امين امسك خوك اني ماشيه اندوش امين: به و دوشت و طلعت واني لابسه كت و شورت وقعمزت في الدار نراجي في ماما تختارلي شن نلبس كملت ماما و لبست و تنئقت وبانت كانها 25 سنه مش 35 ماما كانت جميله بكل ونحن ما خدينا من جمالها الا القليل وهضا سبب من الاسبب غيرت خلاتي منها و غير انها عايشه في حوش كبير وحلات بابا المهم ماما: كنك ما لبستيش انا طرمت شواربي: نعرفش شن نلبس قلت نرجاك ماما صبت جنب الدولاب طلعلي في دبش: ريم بنتي الكلام هضا ما يصيرش منه كبرتي انتي لازم تختاري لبس بنفسك انا بعدم اهتمام: باه ماما طلعتلي سروال جلد اسود بحكم شتاء وجو صقع و توب ابيض بسيط بس ماركه فيه سوسته وكم طبعن ونهايه الكم في ايدي في كمشه من ايده و واصل لي تحت بطني مش طويل و نهايته مكموش انشالله اتكون فهمتن المهم نظام توب و لبست خراص سود و جورب( شخشير) بيض اكيوووت واني رجلي صغيره وشعري ماما قاتلي بعض العمات يهمهن الشعر اطلقيه قلتبه نبيش قاتلي نمسكه ليك بمساكه( توكت شعر) ونطلقه قلتلها لا المهم سكرت راسي قلتلها نبي كعكه ماما درتلي كعكه عاليه و اني شعرتي سمحه سوده و غزيره و طويله و ما درتش غير كحل مانحبش المكياج و ماما قاتلي خليك على طبيعتك أحسن و الحق ربي عطيني جمال مش محتاجه تعطرت و قعدنا في الصاله نرجو ___________________________________________ حوش هل عمر رغد تبكي: ماما بنمشي حنان: هنني روحك مش امطوليين واقعدي امسكي الصغار بنسيبلك صفاء و سند رغد: مانيش ماسكتهم ارفعي افروخك ايوه وخشت لي الدار حنان تعدل في اشرابها: بتمسكيهم غصبن عنك مش برضاك عمر خش: هيا يام صفاء: نمشي معاكم حنان صبت: لالا ماما مره اخر وقت صفاء: به عمتي عائشه: نجك ليا و طلعو عمر: ح نتكي علي عمتي سالمه عمتي عائشه : وووووه من عمتك هذي كيف قاعده علي قلبي غصه عمر شاف لي امه: يعجز اللسان عن التعبير يام حنان: ربي يهديك يمي وخلاص عمتي عائشه: أي اي اتشوفو فيا هابله ( طبعن عمر من طرف بوه عنده عم بس لا عمام و لا عمات جده جاب بوه و عمته هذي بس و طيبيه بكل مشالله عليها بس فطنه و متخفاش عليها خافيه وعندها تصرفات ما تفهميهن كيف بس طيبه وتنحب وهي وعمتي عائشه مش حبايب وما يتحملن بعض وعندها ولد وبنت متحوزين وعايشه مع راجلها ) عمر خطم عليها وركبت وكملو طريقهم عمتي سالمه: والله مش امصدقه يا عمر كبرت و ح تتجوز سبحان الله لسنين كيف يجرو عمتي عائشه تلوي: حتي بنتك يلي اصغر منه تجوزت عمتي سالمه: شن حسك قلتي ؟ وبعدين يحنتي البنت مش كيف الولد حتي 15 سنه دامه حل عليها الجواز تنتلف عمتي عائشه: لي تو ما قلت شي انا عمر: يا ودي خلاص ياسركم ( تسريع الاحدات) جو هل عمر و قعدو اشوي و ضيفناهم المالح و بعده الحلو و امه كلامها قليل تبحت وتفصل تفصيل بس عمته واخته مشالله عليهم عمته: الحمدالله ضيفتونا و قمتو بي الواجب ما قصرتو و تو جيينكم لي موضوع ماما ببتسامه: تفضلي عمتي عائشه سبقتها و كلنا استغربنا لقطتها عمتي عائشه تحكي بتكبر: عندي اوليدي يحنه دكتور و بشقته و بخدمته وعنده معرض سيارات و كامل و الكمال لي ربي ماما ماستلطفتش كلامها عرفتها تفشك حنان ميته حشمه من دوت امها عمتي سالمه تشوفلها😑و في خاطرها سمسام عمتي عائشه: المهم رايد بنتكم وجينا انشوفوها انا منزله راسي وساكته ماما رجل علي رجل وتحكي بتقه ترد فيها ليه ( ان كيدهن عظيم 🤷🏻‍♀️) ماما تحكي بتقه بس مش تعلي وتكبر كيف ام عمر: والله نتشرفو بيكم وعمر حاكي لي باتها من قبل و موفقين عليه و تو الشور شوركم شوفو روحكم وردو علينا عمتي عائشه بتحكي قطعت عليها عمتي سالمه عمتي سالمه: انشالله ما نردو عليكم الا بكل خير والبنت اللهم صلي علي النبي جمال و وعيونات اتقول غزال انا شفتلها وبتسمت حنان ضحكت : نعليا غمزات نجك ليا عمتي عائشه تشوف ومش عاجبها شي اشوي وطلعت رنيم ماسكه ياسين: ماما يبيكي مباش يسكت حنان: اها مشالله عندك بيبي صغير ماما ضحكت وخدت ياسين من رنيم ورنيم خشت: اها ليا اسبوع جايبه عمتي عائشه لوت فهما عمتي سالمه تقهر في عمتي عائشه: مشالله مشالله ربي ايصون اصلن الصغر باين فيك يحنتي حنان ببتسامه: كم عندك عيل ماما تسكت في ياسين: ريم بكرتي 16 سنه بعدها آمين 14 بعدها رنيم يلي تو جت 10 بعدها توام ولد و بنت 5 سنوات واخر العنقود ياسين عمتي عائشه : اها حنان ببتسامه: ربي ايصون وطبعن احني عمر الكبير بعدها انا موليد 96 بعدها خوي عامر 99 و رغد من عمر ريم واني متجوزه وعندي بنت خمس سنوات و ولد سنه ماما ابتسمت: ربي ايخليكم لي بعض عمتي عائشه شفتلي: قربي انا شفت لي ماما ماما هزتلي راسها بمعني امشي انا قعمزت جنبها عمتي عائشه قربت مني و فكتلي شعري وانا انصدمت في حركتها عمتي سالمه بصدمه: تي شن درتي انتي عمتي عائشه: اها بنتاكد شعرها ولا باروكه ماما اضايقت: حشاها بنتي من الباروكه عمرها ما لبستها عمتي عائشه تمس في شعري يلي واصل لي خصري: امممم ماشي حاله ماما بضيقه ريم تعالي جنبي وعمتي سالمه و حنان بيموتن حشم و قعدو يهدرزو و عمتي عائشه اتهدرز اشوي اشوي وجاء عمر و روحو __________________________________________ _ عمر يسوق ويد يمشي فيها علي لحيته: ها شن عجبكم الجو عمتي سالمه اتنكت مسحت يدها علي بطنها : اهم شي شبعونا احتمال نروح حتي عشاء ما نتعشاش هههههه حنان و عمر: هههههههههههه حنان: اعميمه شفتي امها كيف جميله و راقيه و رقي واضح فيها عمتي سالمه: اها مشالله و دوق عمر: اهم شي البنت شنو عجبتكم عمتي عائشه لوت فهما عمتي سالمه: مشالله مشالله تبارك الرحمن عين الله ترعاها أخلاق و جمال وعليك اعيون اكبار فيها و سماح وبيضه اتقول تلجه وجسم عرفت تختار يا راس عمر يضحك بصوت حنان: والله حق اتهبل مشالله عليها عمتي سالمه : بس فيها شي غريب في تصرفاتها ما عرفتش شن هو يا باتي مع انها ساكته وما قلتش كلمه وتسئلها ترد علي قد السؤال بس مش عارفه تؤ فيها شي غريب ( قلتلكن فطنه) عمر زمط ريقه ومايبيش يحكيلهم علي وضعها من تو غير الكلام عمر: ها يام عجباتك عمتي عائشه: ماشي حالها وسكتت اهم شي مستواهم من مستوانا و ما حشمتناش عمر جاء بيحكي قطعاته عمتي سالمه عمتي سالمه : ااااه يا قهرتي يا ولدي امك حشمتنا و وطت راسنا تصرفات عويل درتهن كانها مراهقه صغيره وراجلها عايش وتدلع ما تقولش عجوز حنان زرتها ضحكتها عمتي عائشه: احترمي نفسك يا سالمه عمتي سالمه: اس اس خليني نحكي يلا المهم يا ولدي عمر يمشي في صوابعه لبهاهم علي حواجبه: احكي احكي يا عمتي عرفها اصلن مش راضيه احكي عمتي سالمه بدت تحكي ومش امدوره عمتي عائشه 😂 عمتي سالمه: هضا يا ولدي امك هل عقربه هذي دارت و دارت وبدت تحكيله هههه و كملت وعمر حطها في حوشها و روح بي حنان و امه وهو رقاء لي شقته وتصل بيا .......يتبع شكرا بنات علي صبركن عليا رغم تقصيري بس والله ربي شاهد عليا عندي ظروف اما كان انزل بنتظام وصح كملت امتيحنات وكنت نبي انزل كل يوم بس والله بسسبب ظروفي مش قادره و ولدي صغير مريض واليوم تحسن اشوي باش فضيت و كتبت شكرا لي متبعتكن # نوال♥️