مريضتي ♥️ - ❴🔢❵☟الــبـــــ❴1️⃣1️⃣❵ـــــــارت☟ - مكتملة | روايتك

مريضتي♥️ الكاتبه: نولي الحلقه11 الصبح الساعه 10 في العياده♥️ مشن تلت ايام علي عمر كانهن تلت اشهور و هو يراجي في رد بابا يلي لا قاله موافقين و ريح قلبه ولا مش موافقين وطلع الموضوع من راسه يعقوب فتح الباب علي عمر وبصوت عالي: حبيببببببي عمر كان يدخن و يفكر وفجاه قطع حبل افكاره حدف الدخان عليه بس يعقوب تفاده عمر: ينعن&&& يعقوب يضحك: تي كنا كنا راني ضيفك كيف جيت الزح را نطلع عمر: واطلع من مسكك هكي الناس اتخش ما تعرفش الدق الباب انت يعقوب قعمز: وعلاش اندق عمر: وكان واحد في خلوه الزح يعقوب يضحك: هههههههههه خلوه في المستشفي ههههههههه ومع مني عمر ضحك ورفع المق شرب قهوه: مش شورك ههههههه يعقوب يدور بعيونه عمر يدخن: تي كنك شن ادور يعقوب: وين اليوم ماشفتش تبسي مكسرات خبيته عني يا&&& خزو مكانش عهدي فيك هكي عمر يضحك: تي برا&& هضا يلي همك وبعدين شن بنخبي فيه انت عيل و ما نندري تم انزل لي الكفتيريا واشري يعقوب يدخن: بلاها من نيتك المهم قتلك عمر: ها يعقوب: خلود عمر وجه تغير وعصب: كنها يعقوب بكسره: ليا تلت ايام نتصل بيها ما تردش ما عرفتش كنها ومش امزعلها في حاجه عمر بهزوه: هه وشن الجديد ما كل بين فتره و فتره ادير فيها لكي يعقوب تنرفز: عمر ال&& كنك الزح اني نشكيلك وانت تحكي بي تهزي عمر انفعل: لي ان نبيك توعي علي نفسك يا يعقوب انت خوي مش بس صاحبي و مانبيش انشوفك في الحاله هذي الف مره قتلك البنت ما تحبكش مافيش بنت اتحب راجل ادير يلي قاعده ادير فيه ليك اوعي يا صاحبي البنت طامعه في افلوسك وتشوف فيك دكتور وكيف بتعيشها وبس يعقوب بعياط: كل يوم نفس السريب كل يوم ما تملش قتلك خلود اتحبني كيف ما نحبها واكتر مش عارف كنك مش زارط امها بس خلود مختلفه اشوي تصرفاتها غريبه لكن تحبني متاكد انا عمر رفع صوته اكتر: تحبني تحبني تحبني وينه حبها وينه في شن باين عليك ركبتلك الهم و النكد وخلاتك كانك عندك 60 سنه مش 30 وكل همها الهدايه ما عمريش شفتك متريح ديما تقتبسلك في اعذار ودير روحها زعلت منك عشان تفتك منك شهر ولا اتنين تي في وحده اتحب ما تحكيش مع حبيبها شهرين كملات يعقوب بعياط: سكر فمك الزح سكر فمك فاهمها غلط انت اسكت عمر بنفعال: لا مش ساكت نعرف كلامي خاش لي قلبك كيف السم لي انك حبيتها ومش متقبل فكرت حد ايجي ايعيب فيها بس تصرفاتها واضحه كيف وضوح الشمس ديما اتقولي زعلانه مني زعلانه مني تي امتي بترضي هذي يعقوب صبا وعياط: عمر ما نبيش نخربها معاك سريب خلود معاش تجبده ليا تي الحق فيا اني يلي حكيتك ينعن&&& وطلع وسيب الباب مفتوح عمر بعياط: اهرب اهرب من الحقيقه بس اني وراك وراك لين ما توعي علي نفسك ( ما تقولنش يعقوب هبل ولا علي قد نياته لا بس حب خلود سيبه هكي في المواضيع لخرا متفاهم هو وعمر وكنهم خوت مش اصحاب بس من ينفتح موضوع خلود ينقلب و يهبل وانشالله مع الحلقات تعرفن خلود شن و الحق مع عمر ولا يعقوب) ____________________________________ في حوشنا في الجنان ماما وبابا مكسدين على الكراسي ماما: مش ماشي اليوم لي الشركه ولا شن بابا يشرب في قهوه: لا ماشي امغير اشوي اخر ماما: باهي حكيت لي عمر علي الموضوع بابا: لا قلت تو بنحكي معه ماما : اي اتصل بيه وقعد بابا يتصل بي عمر عمر: الو السلام عليكم بابا: و عليكم السلام شن الخبار دكتور عمر عمر:الحمدالله شن اخبارك النت والاهم بابا: كلهم طيبين... قتلك عمر قلبه دق: ها نسمع فيك تفضل بابا : بنسبه لي موضوع ريم عمر قلبه قعد يدق و جسمه سخن و توتر : اها بابا: تقدر تقول موافقين ومش موافقين عمر عقد حواجبه: كيف جت هذي بابا: اني يا عمر ما نلقاش راجل خير منك وانت تعرف وضع ريم لو جيت وحكيتلها وقلتلها عمر ناويك بي الحلال ممكن اتقولي موافقه بابا بس مش مدركه شن معني الكلمه يلي قلتها وانها ح تحدد مصير حياتها و مستقبلها لي ان البنت مش فاهمه شي علي الجواز عمر يمشي في يده على لحيته الطويله و يعاود: اها بابا: المهم يلي نبيه منك من خلال الجلسات النفسه يلي تاخد فيهن عندك تحكيلها على الجواز و الصغار و انها سنة الحياه يعني ادخل الموضوع لي عقلها و تنظج فكرها و توعيها ان في حياه تانيه لكل بنت بعد الحياه هذي وانها مش ديما ح تعيشي مع هلها و ريم ماشيه في التحسن و الفضل يرجعلك خلاصه الكلام ان وقت تتعاف ريم تماما وتقعد تدرك وتعرف كل شي وقتها اعرف ان ريم ليك ومافيش راجل يزفها غيرك عمر عجباته الكلمه وحركت مشاعره ابتسم بابا: تو نبيك تنسي الموضوع اشوي عالجها لي عند يرد عقلها صح ح لو تمت تتصرف كيف الكبار مش ح يكون عقلها كيف اي بنت في عمرها بس اقل شي فاهمه اساسيات الحياه وامتي تتعاف هي ليك شهر شهرين سنه سنتين امتي تتعاف تعال اخطب بس تو ما نقدرش نوافق علي خطبتك البنت كيف بادي عقلها يفتح طول نصدموها بي موضوع الجواز عمر فرح و قلبه يضرب و تما يوزع في ابتسمات و فرحان ويحك في لحيته عمر ببتسامه: تمام تمام يا عمي كلامك زينت العقل تمام بكل المهم البنت ليا واني مش مستعجل بابا يضحك بصوت عالي: تو عمي يا وسخ ما كنت اتقول طلال عمر ضحك بصوت عالي: ماهو تو يفرق اشهور وناخد بنتك غصبن عني عاد بابا ضحك: انشالله انشالله عمر ببتسامه: يلا سلام وسكر ماما: ها شن بابا ضحك وصبا: تمام تفهمني وقالي كلامك زينت العقل وانه راضي بيها و ح يصبر عليها و يعالجها ماما فرحت: الحمدالله بابا ينادي بصوت عالي: هيااا أمين تاخرنا أمين طلع يجري: هيا بابا اهو جيت ماما: اللطف وين شايله بابا شاف لي آمين وضحك: ح نشيله معايه لي الشركه خلاص تما راجل خليه يشوف شغل باته كيف امين ضحك: اها راجل ماما ضحكت: نجك ليا يا راجل وطلع بابا و امين و ماما خشت جو اني جيت نجري ومسكتها من ايدها انا: ماما ماما ماما ببتسامه: نعم يا روحي انا: ح نديرلك مفاجه نبيك تقعدي في دار النوم ما تطلعيش منها لين ما نكلمك ماما: ريما شن ح ديري نخاف من مفجاتك انا انا بزعل وسيبت يدها: تمام بجوك فوتي الموضوع وكنت بنخش لي الدار مسكتني من ايدي ماما تضحك ويدها على بطنها: حي عليكي كيف تميتي زعاله هههههههههههه تي شن قلنا انا منزله راسي ماما رفعتلي راسي وباست خدي: نبصر عليك ماما ح نخش لي الدار اصلن اليوم خوك امتعبني نبي نتريح انا ضحكت و صبيت علي اصابع رجليا وبست خدها: تمام هيا خشي و خشت ماما لي الدار و اني بديت عمل المفاجه كنت امقرره اليوم النظم الحوش كامل بروحي بدون مساعده اي حد و كانت الساعه 10 صبح رنيم في الدار علي سريرها مكسده على فونها و وران و وسام طلعو يلعبو في الشارع مع العويل اول حاجه بديت فيها المطبخ كانت فيه اشوي حوسه كانن فيه امواعين الفطور بديت نغسل فيهم و غسلتهم و رتبت كل حاجه في مكانها وشفت لي الارضيه لقيتها تبي تسييق سيقتها و كملت من المطبخ و عطرته بي معطر الجو و وطلعت بعدها مشيت دار خوتي امين و وسام و كانت حايسه بكل الحيوانات كانو محوسينها قربت من سرير امين رتبته و رتبت البطانيه بعدها سرير وسام نفس الشي رتبته و رتبت البطانيه و كانت في الكاوله امتاع دراسه عليها ورق رالعب بيه وسام لميته وحطيته في سلة القمامه و في ملابس لي امين حطيتهم في دولابه و خديت مكنسه و كنست الارضيه و بخرتها و قعدت ريحتها سمحه و بعدها دارنا نحن البنات سريري كان امرتب و سرير رنيم نفس الشي قربت من سرير روان و رتبته و قربت من العابي رتبتهم و حطيتهم في السله و كنست الرضيه( الفرشه) و بخرت الدار و طلعت خشيت لي دار الضيوف لقيتها انظيفه مش محتاجه شي بخرتها و طلعت خشيت لي المربوع لقيتها اشوي نظيفه كنست الارضيه بس و بخرتها و بعدها الصاله نظمتها و كنستها و بخرتها و ما كملت الا والساعه 1 خشيت لي ماما لقيتها راقده انا انهز في ماما: ماما ماما ماما و عت: نعم ماما انا: هاتي يدك صبي ماما قعمزت براحه : يلا خلي انشوف مفجاتك انا ضحكت و طلعنا وماما شافت الحوش تفاجئت و فرحت ماما تستنشق في البخور: حي مسمح ريحته الحوش انا نضحك ماما: نعليا ماما الحوش كبير يا روحي كله رتبتيه ابروحك انا: اها كله كله شطوره اني ماما ضحكت وباست خدي: نجك ليا والله فرحتيني يا ماما انا مسكت يدها: تعالي شوفي دار خوتي كيف رتبتها ماما: هي اصلن دار خوتك ديما اتعب فيا انا: من اليوم اني يلي انظم اني الكبيره وانتي حامل ارتاحي بس ماما ماما فرحت و عيونها دمعو و حضنتني: نجك ليا الحمدالله يا رب بديتي تفهمي انا عقدت حواحبي: كيف نفهم يعني قبل ما نفهمش😕 ماما ضحكت و مسحت ادموعها: لا يشينه نبصر عليكي انا كنت بنحكي جت رنيم رنيم: ماما شوفي ريومه شن دارت ماما ابتسمت: اها شفتها وانتي ساعدتيها رنيم: كنت بنساعدها قاتلي لا انا: العشيه ح ندير كيكه ماما ضحكت: وكيكه اخر انا: اها رنيم: ح نساعدك انا: لا ابروحي اسكتي. رنيم: نننننن انا: صقع اهني هي انخشو جو وخشينا لي الدارنا ماما تشوف لي رنيم: خوتك وين رنيم: حوش جرتنا حليمه يلعبو مع اصغارها ماما بعصبيه: طيح سعدك خلاص قايله يجي باتك ما يلقاهم ايدير منااحه بري هاتيهم رنيم صبت وهي اتمتم: ااااوف تو ح نلاقي ولدهم عماد البارد و يقعد يبرد ماما: دمك و لا دمه ما تعدليش عليه و اطلعي من وجهي ما تحرقيش دمي رنيم طلعت ماما شافتلي: ريما حبيبتي ح نحكي معاكي في موضوع جدي اشوي انا: شن هو ماما: حبيبتي تو انتي معاش صغيره كبيره و تفهمي و مشالله عليك صح انا ببتسامه: اها انا كبيره و شطوره اخر ماما ابتسمت: نجك ليا المهم يا روحي نبي نهمك ان البنت اتعيش حياتين حياه مع هلها و حياه مع جوزها انا: ماما ما فهمتش ماما: عرفاتك يا ماما بس مع الوقت ح تفهمي اكتر يلي نبي انفهمه ليكي تو انتي كبيره و بالغه و عاقله يعني يا ماما مش ح تعيشي عمرك كله معانا ح يجي اليوم يلي ح تسيبينا فيه ولو بعد اسنين انا تميت نبكي: لا لا لا لا لا نبيك انا لا مش ح نسيبك لا ماما نبيك و نبي بابا و نبي خوتي ماما مسحت ادموعي: يا ماما مش قصدي هكي خلي تفهمك اكتر كل بنت بعد تكبر و يحل عليها الجواز و يجيها نصيبها و تتجوز هذي سنه الحياه ربي شرعها انتي يا ماما ح يجي اليوم يلي يجي الراجل يلي يتجوزك انا مسكت يدهاا: لا نبيكم انتم ماما فرحت حست ان فهمتها اشوي و ما تعبتها في الاسئله ماما: لا يبنتي اسمعيني ح يكون ليك حوش ابروحك و ناس جدد يقعدو عيلتك التانيه و تكوني اسره و تجيب اصغار و كل يوم جوزك ح يجيبك لينا انا سكتت خس دقايق بعدين انا: اهاااا قصدك كل ينت تتجوز كيف لم سندريلا تجوزها الأمير ماما فرحت بعد حست ان فهمت عليها: اها اها يا ماما اي نفس سندريلا اها ههههه انا: و فروزن اخر ماما بفرحه حست في تطور في حالتي: اي اي نفس سندريلا و افروزن و سالي اخر اناا: به ماما شافتلي: وكيفي اني وباتك مكناش نعرفو بعضنا تعرفنا و تجوزنا و جبناكم انا: احكيلي كيف ماما فرحت و بدت تحكيلي علي الحياه الجوزيه بس بحدود و اول مره نعرف ان في حياه جوزيه وطاااال الحديت بينا و حسيت روحي فرحانه لي أن عرفت حاجه ما كنتش نعرفها بس برضك مزال عندي نقاط استفهام علاش نتجوزو من اصله وعلاش نسكن في حوش ابروحي ووووووو .......يتبع