الفصل الثالث
البارت الثالث .
المنتقبة .
للكاتبة / فرح وحيد .
_ في صباح يوم جديد.
تستيقظ قمر من نومها وتذهب الي الحمام تتوضي وتصلي صلاة الصباح وتقرء الورد اليومي وتدعي ربها ثم ابدلت ملابسها الي ملابس بيتي فهي لن تذهب الي الجامعة اليوم .
اردفت قمر الي الصالة حيث وجدت مالك يجلس ع السفرة في انتظارها كي يأكلون مع بعضهم فوالدته ليست هنا وهو من جهز الافطار .
قمر :: يعيني يعيني الباش مهندس مالك هوة اللي عامل الفطار دة انت هتريح مراتك ع الاخر .
مالك :: ماهوة حضرتك نايمة وماما عند خالتك عشان بتولد وانا جعان اعمل ايه يعني قمت جهزت الفطار ع آخر الزمن الراجل اللي يجهز الفطار .
قمر بضحك :: ع فكرة كنت طالعة اجهزوا .
مالك :: طب كلي يا ختي .
أكلوا الأخوة مع بعضهم ثم قامت قمر وشالت السفرة الي المطبخ ثم عادت الي اخاها .
مالك :: خدي يا قمر .
قمر :: نعم .
مالك :: تعالي عايزك .
اردفت قمر الي أخاها وجلست بجانبه .
مالك :: مش هتحكيلي بقي .
قمر :: حصل مشكلة معايا في الجامعة امبارح مع شوية بنات واتضايقت جدا وكان بسبب النقاب .
مالك :: واي هيا المشكلة .
قمر :: مش مهم يا مالك مشكلة عادي يعني بس اتضايقت واديني بقيت حلوة اهو خلاص .
مالك :: طب حقك عليا اني مديت ايدي عليكي .
قمر :: كويس انك ضربتني وفوقتني من الحالة اللي كنت فيها بس ع فكرة ايدك تقيلة اوي .
مالك بضحك :: انا ! دة ايدي خفيفة خالص .
قمر :: ماهو واضح يا اخويا بالقلم اللي لسة معلم .
دق الباب .
مالك :: هقوم افتح .
أردف مالك الي الباب ليري من في الخارج ثم وجدها فتاة .
الفتاة :: السلام عليكم .
مالك :: وعليكم السلام .
الفتاة :: هيا قمر موجودة .
مالك :: اه اتفضلي .
اردفت الفتاة الي الداخل وأخبر مالك قمر ثم خرجت قمر الي الصالة بدون أن ترتدي النقاب لأن مالك اخبرها انها فتاة ويظهر عليها انها صديقتها اتصدمت قمر من وجود شهد .
مالك :: طب بعد اذنكوا عايزة حاجة يا قمر انا هنزل .
قمر :: لا يا حبيبي مع السلامة .
قمر :: خير يا آنسة شهد جايا تعملي فيا اي كمان في بيتي .
شهد وهي تشعر بالذنب :: انا اسفة يا قمر والله العظيم اسفة .
استغربت قمر مما تقوله شهد فهي تعرف أن شهد لا تحبها .
شهد :: انا عارفة يا قمر انك مستغربة من اللي بقوله بس والله العظيم انا ندمانة ع اللي عملته معاكي انا اسفة يا قمر انا والله العظيم هتغير هتغير 180 درجة انا عارفة اني اللي عملتوا انا وصحابي غلط اوي بس والله انا ندمانة ع اللي عملته وضميري بيأنبني سامحيني يا قمر ع اللي عملته .
وظلت تبكي كثيرا وقمر شعرت بصدق كلامها .
قمر :: خلاص يا شهد مسامحاكي .
شهد :: بجد .
قمر :: اه يا شهد .
شهد :: قد اي انتي إنسانة جميلة وطيبة يا قمر ياريت فيه منك كتير .
اكتفت قمر بإبتسامة .
شهد :: قمر ممكن اكون صحبتك وتدليني ع الطريق الصح وطريق الخير.
قمر بسعادة لما تسمعه :: اكيد طبعا.
شهد :: شكرا يا قمر انا هتغير يا قمر وهكون زيك وكمان هلبس النقاب .
قمر بإستغراب :: هتلبسي النقاب بجد .
شهد :: اه يا قمر هلبسه لأنه فعلا سترة للبنت وكمان هبعد عن صحابي واختار أصحاب يدلوني دايما ع الخير مش ع السوء والشر .
كانت قمر تسمع هذا الكلام من شهد وهي سعيدة أن شهد ستتغير .
قمر :: هوة دة الصح يا شهد .
شهد :: ممكن اعرف اي هوة فضل النقاب .
قمر :: بصي يا شهد النقاب دة سترة للبنت وبيحميها من عيون الطماعين وأنك تلبسي نقاب يبقي انتي كدة بتتشبهي بأمهات المؤنين وبتحمي نفسك يعني لما تلبسي نقاب هتخبي وشك ومفيش راجل هيشوفك غير محارمك بس ولا حتي يلمس ايدك يعني لما تكوني حزينة أو سعيدة أو بتبكي كل دة من ورا نقابك محدش شايفك محدش هيشوف حاجة منك النقاب دة جميل اوي يا شهد لأنه فعلا سترة وكتير اوي في فضل النقاب .
شهد :: انا فعلا هلبسه بس هقدر اتنفس فيه .
قمر :: اه هتقدري وكمان ربنا هيعينك عليه .
شهد :: بجد انا حبيت الكلام دة اوي اوعدك يا قمر اني هتغير خالص وهلبس النقاب .
قمر بحب :: أن شاء الله .
شهد :: ربنا هيغفرلي ذنوبي صح .
قمر :: ربنا غفور رحيم يعني ربنا رحيم بعباده انتي ادعي ربنا بإنه يغفرلك وباب التوبة قدامك مفتوح ربنا هيقبل توبتك .
ابتسمت شهد لقمر لهذا الكلام الجميل التي تسمعه وحقا هي نادمة لما فعلته معها ولكن سوف تتغير وتصبح صديقتها .
بعد مرور وقت غادرت شهد وحكت لها ما فعله ادم من أجل وسعدت قمر بداخلها وهي لا تعلم ما سر هذه السعادة .
_ في المساء .
ذهبت ملك الي قمر وحكت لها قمر كل ماحدث معها وايضا علي تغيير شهد .
اتصدمت ملك مما سمعته من صديقتها .
ملك :: ازاي يتجرأوا يعملوا كدة .
قمر :: يلا بقي اللي حصل حصل وخلاص .
احتضنت ملك صديقتها وهيا تربت عليها .
ملك :: خلاص يا قلبي متضايقيش .
قمر :: خلاص يا ملك مش هفتكر حاجة من اللي حصل وهما اصلا هيعتذرولي ع مسخرتهم عليا لأنهم ندمانين ع اللي عملوه .
ملك :: تفتكري شهد هتتغير فعلا .
قمر :: اه لانها صادقة جدا في كلامها .
ملك :: ربنا يهديها يارب .
قمر :: يارب .
ملك :: اسكتي نسيت اقولك .
قمر :: ايه .
ملك :: مش انا في عريس جاي يتقدملي بكرة .
مالك وهو داخل من باب المنزل :: ومين اللي انطس في عينه وهيتجوزك .
ملك :: بطل رخامة يلا .
قمر :: ومين دة ومقولتيش ليا ليه .
ملك :: بصي يا ستي امبارح ماما قالتلي عليه وأن مامته كلمت ماما وكدة وماما قالتلي هيجوا بكرة يتقدموا وابقي قرري وانا طبعا كالعادة برفض بس أصرت اوي عليا فقولت اشوفه .
قمر :: يعني هما جايين بكرة يتكلموا .
ملك وهي تاكل الكيك :: اه جايين .
قمر :: طب ماتدي نفسك فرصة يا ملك مش يمكن يطلع شاب كويس ومحترم وكمان فترة الخطوبة دي بتبقي معمولة عشان تتعرفوا وتفهموا بعض ولو مقدرتوش تفهموا بعض يبقي كل شيء قسمة ونصيب .
ملك :: تصدقي معاكي حق هفكر .
قمر بحب :: ربنا يتمملك ع خير يا قلبي .
ملك :: روحي .
اي يا شق اكيد جاي صح .
مالك :: بس يا ماما اجي فين دة انا مبصدق اجي ارتاح وانام .
ملك وهي تقف وتضع يدها في وسطها :: نعم يا حيلتها مش اي سمعني كدة تاني دة انا اقتلك لو مجيتش .
مالك :: خلاص يا هبلة اكيد جاي معقول هسيب اختي في يوم زي دة ولازم اجي طبعا عشان اشوف مين اللي انطس في عينه وعايز يتجوزك .
ملك بغيظ :: بارد .
مالك :: هيا ماما مجتش .
قمر :: لا مجتش حتي متصلتش .
ملك :: اسكتي نسيت اقولكوا مش سحر عندنا قاعدة مع ماما بيرغوا وقالتلي اقولكوا .
مالك وقمر بضحك :: يالهوي .
مالك :: ميقدروش يبعدوا عن بعض ابدا .
قمر :: يابني مش صحاب من أيام الاعداديه .
ملك :: يلا بقي ياشق ايدك ع مفتاح عربيتك وتعالا وصلني وخد امك معاك .
مالك :: امي بتعرف تيجي لوحدها والمصحف .
ملك :: يرضيك امشي لوحدي يعني يطلع عليا عصابة يخطفوني ويقع في حبي رئيسهم ويتجوزني بالغصب وبعدين نعيش اجمل قصة حب في التاريخ .
قهقه مالك وقمر بصوت عالي علي هذه المجنونة .
مالك بضحك :: ياخربيتك قدامي يلا .
اردفت ملك ومالك الي الخارج وظلت قمر جالسة تفكر في ادم وتتذكر كلام شهد كيف دافع عنها .
قمر :: اي الاحساس دة انا اول مرة في حياتي احس كدة .
نفضت قمر تلك الأفكار من خيالها ثم جلبت كتاب تقرأ فيه .
$$$$$$$
في صباح يوم جديد .
تستيقظ قمر من نومها وكعادتها تصلي صلاة الصباح وتقرأ الورد اليومي وتذكر ربها ثم تفطر مع عائلتها الصغيرة وتنزل من المنزل تلتقي بملك تأخذها وتذهب الي الجامعة .
تصل قمر وملك الي الجامعة وتدخل المحاضرة والجميع يعتذر منها لما فعلوه معها وتقبلت اعتذارهم حتي لاحظت أن كثيرا من الفتيات اللتين لم يرتدوا الحجاب أصبحوا يرتدوه وسعدت قمر كثيرا لتغير هؤلاء الفتيات وايضا شهد ارتدت الخمار وخطوة في خطوة سوف ترتدي النقاب وأصبحت شهد صديقة قمر وملك وتقربت منهم .
أردف ادم الي داخل المحاضرة وعينه علي تلك المنتقبة التي أخذت قلبه معها .
نظرت اليه قمر وتقابلت الأعين في نظرة قصيرة ثم لفتت نظرها سريعا عنه .
كان ادم يلقي عليهم المحاضرة وعينه علي قمر التي اعجب بها وبشدة حتي خطفت قلبه وتفكيره أصبح فيها فقط وقد اعترف أنه حقا حبها .
ادم :: خلصت محاضرتنا وتقدروا تتفضلوا .
آنسة قمر تعالي ع مكتبي .
اردفت قمر وراءه الي مكتبه .
قمر :: حضرتك طلبتني .
آدم :: بصي يا قمر فيه في اسكندرية في (...) محاضرة مدتها خمس ساعات والمحاضرة دي بيحضرها طلاب كلية الآداب دفعة رابعة الحاصلين علي تقدير ممتاز في سنة تالتة ودفعة تانية الحاصلين علي تقدير ممتاز في سنة اولي وهيا محاضرة مهمة ومفيدة جدا بتحضريها كأنك فعلا في التدريب وبيدربوكي وانتي بما انك حاصلة علي تقدير ممتاز في سنة تالتة فتقدري تحضريها
قمر :: طب هنروح في ايه .
ادم :: هتروحي في باص تبع الجامعة مع بقيت الطلاب .
قمر بفرحة :: تمام حضرتك موافقة بس امتي .
آدم :: بكرة وهنتحرك من قدام بوابة الجامعة الساعة 7 .
قمر :: تمام هكون موجودة ع الوقت .
آدم :: تمام تقدري تتفضلي .
اردفت قمر الي خارج مكتبه وهيا سعيدة ثم حكت لملك ماحدث وفرحت لها ملك .
قمر :: مش كنتي اتنيلتي وجيبتي امتياز عشان كنتي تيجي معايا .
ملك وهي تأكل الشوكولاته :: احسن حاجة والله اني مجبتش امتياز محاضرة اي يابنتي دي اللي انا احضرها دة انا بقعد في المحاضرة هنا بمل ملل وهبقي هزغرط لما بخرج اروح اقعد خمس ساعات ليه أن شاء الله .
قمر بغيظ من ملك :: أن الله مع الصابرين امشي قدامي يلا .
بقلم / فرح وحيد .