❴🔢❵☟الــبــــــ❴ 2️⃣ ❵ـــــــارت☟
نرجع لبطلتنا المظلومة 😔....
مرق يوم ويومين واسبوع واتنين ومطر عايشة بالقهر والظلم القديم ولساها عحالها بحزنها وكبتها لمشاعرها اللي حاولت كتير تتخلص منهن ناح عز لكن مافيها ابدا .....
عز ماكان انسان عادي بالنسبة لمطر....كان كل حياتها حب طفولتها ربيت عإيديه ...شافت الحب بعيونو وتصرفاتو قبل البو ....حست بحنانو واهتمامو وغيرتو عليها قبل ليعترف بحبو ....حبهن لبعض ماكان عادي ولا اعتيادي حبهن رب السما زرعو جواتهن من صغرهن ....عيونهن كانو بيحكو شعر وغزل نظراتهن لبعض كلها حب وشوق ....وقت تسمع صوتو بيرتعش كل بدنها كان صوتو متل سيمفونية بالنسبة الها وطلباتو اوامر ....وغيرتو عليها من اي شي اكبر دليل عحبو المجنون.
لهيك مافيها مطر تنسى عز بسهولة وببساطة ....عز محفور بالبها وغايص بأعماقها ...ومتغلغل بخلايا جسمها .
بيوم بعد ماتعبت من التنضيف رجعت لغرفتها لترتاح ....تسطحت لتريح بدنها...وغفيت عينها ونامت .
شافت بمنامها عز عم يعاتبها ويلومها عاللي عملتو معو وحاولت بالمنام تحكي لكن صوتها ماكان يطلع مامانت سامعة الا صوت عز وصوت بمت عم تضحك وكانت شايفة خيال رجال من بعيد واقف ورا عز بدو يأذيه، حاولت تنبهو لكن عز مارد عليها وضل عم يلومها ويعيط عليها .....وصوت البنت اللي عم تضحك ماغاب من بالها ...
فاقت مزعوجة كتير ...
مطر: .....ياربي ...احمي عز ياربي كون معو وبعد عنو اي حدا بدو يأذيه ...صحي انت ظلمتني ياعز لكن انت مابتعرف الحقيقة وماعطيتني مجال دافع عن حالي واثبت انو الكلام اللي انقال عني مو مزبوط ....روغم كل هاد مابتمنالك الأذى ولا بتمنى يصرلك شي لا سمح الله بتضل غالي عألبي وحبيبي اللي ظلمني واللي مافيي انساه بنوب ...(حطت ايدها عوجهها ورجعت لنوبة البكى ).
تعودت مطر عالشغل واخدت ايدها عليه وصارت اسرع من اول .
ببيت عز الدين ..
شذى: ...امي .....مشان الله خلينا ندور عمطر صرلا شهرين غايبة عن البيت ولهلأ مابنعرف وينها وشو اخبارها.
نهلة: ....من كل عقلك امي بدك اخوكي يدور عليها بعد كل اللي صار .
شذى: والله ياامي انا حاسة انو في شي مو مزبوط بالموضوع .....بعدين مو ضروري اخي اللي يدور عليها ...نحنا بطريقتنا بنظور عليها او بنكلف حدا يسأل عليها ويجيببلنا اخبارها ....ولا انضل غفلانين عنها ومابنعرف اي شي عنها .
نهلة: ..ليش فكرك يابنتي مطر بتغيب من بالي!!!!! كل هالفترة وهي قدام عيني من جهة مسدقة لأنو اخوكي شاف كل شي بعينو ومن جهة مو مسدقة لانو مطر تربايتي وبعرف قديه بتحبو لعزو ومستحيل تخونو ولا بأي شكل ......راسي رح ينفجر ماعدت عرفت الصح .
شذى: ....بترجاكي امي خلينا ندور عليها وبلا مانخبر اخي بالموضوع.
عز: ......على مين بدك اتدوري ومابدك اياني اعرف.
شذى😳: .......عز .........اااااااه لااا اخي مافي شي .كنت....
عز: ....بدك اتدوري عمطر ماااااا .
فس تمثال كان جنبو عالطاولة ضربو بأيدو ووقعو عالأرض .
جفلت شذى ورجعت لورا ..
عز: .....بدك اتدوري عليها روحي الله معك ....بس لا بقى تأرجيني وجهك انتي كمان .
شذى: .....عم بتقلعني ياعز .
عز : ....انا ماعم قلعك انا عم نبهك ازا بدرى وبعلم انك عم اتدوري عليها من وراي ماتلومي الا حالك عم تفهمي .......ماتخليني اغلط معك، بس احترمي مشاعري اللي دعست عليهن مطر ومااهتمت للجروح اللي تركتهن بألبي .
حط ايدو عوشها بحنية لشذى: ....انتي اختي ومابدي اخسرك مابدي اضعف بيوم وفكر حتى زعلك مني ....لهيك انسيلي هالموضوع بالمنيح اي .
باس جبينها وراح .
اتطلعت شذى بأمها وصارت تبكي عوضع اخوها وكمية الألم اللي مختزنة جواتو .
بيوم كانت مطر تنضف درج بناية بحي بعيد شوي عن البناية اللي قاعدة فيها اخدها عليها ابو نادر وتعودت عليها وصارت نجي لهالبناية مرة بالأسبوع ...
عم تشطف مطر وكانت بالدور التاني سمعت صورت رجال طالعة عالدرج ....
حمزة عم يحكي من تحت : .....لحظة شوي خلينا نطلع.
مطر: ....تفضل دكتور .
حمزة: ....الله يعطيكي العافية .....كيفك اليوم ان شاء الله صرتي احسن .
مطر: ....اي الحمدلله البركة فيك دكتور .
حمزة: ....لا ولوو....بس بدك تنتبهي عصحتك احسن من هيك اتفقنا .....لك يلا ياعزوز شو عم تساوي .
مطر: ....معك حدا.
حمزة: ....اي رفيقي دكتور معي هو.
طلع الشب اللي معو وعم ينفض تيابو من المي اللي احت عليهن .
عزوز: .....اي اجيت بس تعبو تيابي مي من ال......
صدمة كبيرة ....نظرات طويلة وعميقة ....جروح انفتحت اكتر من اول وزاد كبرها ....ارواح تلاقت بعد غياب شهور ...وعيون اصدمت ببعض لتحكي غضب وحقد مدفونين من وقت ....
اتطلع عز بمطر وهو مصدوم بعد هالغياب انو رح يلتقي فيها واللي جننو اكتر انو عم تشطف الدرج ....لكن فكرها وحدة من سكان البناية .
اما مطر اتطلعت فيه بنظرة كلا حزن وقهر وعيون دموع محبوسة فيها ..اتطلعت فيه وبعدت وجهها عنو لحتى ماينتبه حمزة وقت رجعلو ليقلو يدخل .
دخل عز وكانت لسا اثار الصدمة باينة عليه .
حمزة: .....خير عزوز باك شي .
عز: ......ااااااه .....لا لا ماباني شي .
مطر موومسدقة انو اللي شافتو هاد عزو حبيبها اللي كان يركض عليها ازل مايشوفها عزو اللي كانو عيونو يحكو كلام وكلام وقت يلمحها اللي كانت نظراتو جريئة وبريئة بنفس الوقت.....هلأ عم تشوف نظرات الحقد والكره بعيونو عم تشوف ملامح القسوة عوجهو .
خلصت شغلها كيف مابتعرف كان كل همها تخلص قبل لينزل عز ويشوفها ...حتى انو نسيت تاخد اجرتها من اهل البناية .
حمزة: .....لك عزوز ليه ماعم تاكول انت منيح .
عز: ...اي اي منيح ...بس كنت بدي اسألك عن البنت اللي كانت عم تنضف الدرج هيي جارتكون شي ساكنة هون يعني.
ام حمزة: .....لا ياابني هالبنت بتجي كل اسبوع بتنضف الدرج تبع بنايتنا والبناية اللي قبالنا .
عز بصدمة وقعت المعلقة من ايدو : ......
حمزة: ......لك شوباك ياصاحبي من وقت دخلت وانت هيك ملجوم ومصدوم شو صرلك بتعرفي شي لهالبنت .
عز: .......لا لا من وين بدي اعرفا .
حاول عز بهالوقت انو يختصر القعدة حب انو يلحقا ليعرف عنا اي شي .....بس للأسف بقي بعدها شي ساعة .
وصلت مطر عالمخزن بسرعة غريبة كانت تمشي بين المشي والهرولة لحتى تقدر تهرب منو ومايقدر يلحقها ...
رمت حالها عفرشتها وصارت تبكي بصوت عالي ، بكت بحرقة من البها ......
مطر: ........عزوووووووو .......ااااااه ياعزو اااه ....لك انا مطورة حبيبتك شفتني وكأني غرببة عنك وكأني عدوة الك .....وين نظراتك اللي كانت اتدوبني فيك وين لهفتك لشوفتي وين حنيتك عليي ....لك ليه هيك متغير ومسدق كل شي عني وكأنك مابتعرفني ....لك ااااااااااااااااااه لك يتمي وموت اهلي اللي مابعرفهن وحياتي وعمري وسنيني كلا بكفة وظلمك الي بكفة تانية ..
تعبها البكي واجهدها كتر التفكير وارهقها دبلان جسمها اللي ماعاد فيها تستحملو اكتر ....واللي زاد همها شوفتها لعز بعد هالوقت الطويل .
اما عزالدين وقت راح من بيت حمزة دخل غرفتو ضايج ومصدوم بنفس الوقت ، اخد وقت وهو يترجمها بعقلو انو مطر تشتغل هيك شغلة .....شافها مذلولة ، تيابها مبهدلة مبللة مختلفة متغيرة كتير ، كان الشقى والتعتير والتعب واضح عليها ....
غمض عيونو بقوة ورجع راسو لورا وسندو عالمخدة وصار يتزكر وقت اخدها بيوم مشوار وكانت بكامل اناقتها بأرقى الملابس وبأحلى طلة ، وشاف فرحتها وقت كان محضرلها مفاجأة عيد ميلادها اللي احتفلو فيه لحالهن وكيف كانت تتنطوط متل طفلة صغيرة قدامو وشعرها يطير معها ويرتمي عكتافها واتدور حواليه متل قطة اليفة وترمي حالها بحضنو وقت يزعل منها ، وتخبي حالها فيه ومنو وقت يعصب عليها وقت الغيرة ....تزكر صوتها ورقتو ونعومتو وهمساتها بأدنو وقت ترفع رجليها وتوقف عروس اصابيعها لتقلو بخجل *بحبك*...
اما اليوم ماشاف قدامو الا بنت فقيرة معدمة ماعندا شي غير الحسرة والذل والكسرة ....
زكريات حلوة وبشعة عصفت جواتو خلتو يجن عالآخر اوقات يضحك ويبتسم واوقات ينقهر ويعصب ويكسر اي شي قدامو ...
عز بصراخ: ......خرجك يامطر .....بتستاهلي ...اللي متلك كتير عليها هيك شغل اللي متلك لازم تكون عم تشحد اللقمة وتترجى الناس ليشفقو عليها ويعطوها فضلتهن .....بأيدك رفستي النعمة و بعتيني مشان كلب وحقير متل رأفت ....
هدي شوي وصار يحكي بصوت واطي ودموعو سبحت عخدو وبللت دقنو : .....ليش .....شو شفتي فيو شي مو عندي ....شو عطاكي شي وانا حرمتك منو ....حبك قدي ؟....حن عليكي متلي؟ ...جن بغرامك وفيكي وبعيونك اكتر مني؟ ....ليش يامطر عمري.....ليش لترجعي تطلعي بوشي وتخليني شوفك وانا متمني هالشي !!!ليه لتحققيلي امنيتي وتخليني شوفك!! ...ليه لتجددي جنوني فيكي اكتر وانا اللي كنت مفكر اني بلشت اتعود عغيابك وبعدك!! ...لكن اكتشفت اني لساتني مجنونك ويمكن اكتر من اول ...بس ليش ليييييييييييش...يارب ...يارب ريحني من عزابي ياربي ساعدني انساها واتخطى هالوجع ...يارب يارب.
عأثر شوفة مطر لعز تعبت كتير وارتفعت حرارتها وتعبت نفسيتا كتير ومرق الوقت عليها وهي عم تشتغل وهي محمومة وتعبانة .
خلصت شغل وحست بالجوع وهي راجعة عالمخزن راحت عالمطعم اللي اوقات بتشتري من عندو ساندويشة ...
مطر: ....يعطيك العافية عمي ....عطيني نص ساندويشة ازا ممكن .
الرجال: ....عمي انتي لمين بتاخدي نص الساندويشة.
مطر بخجل: ......الي .
الرجال: ...ونص ساندويشة بتكفيكي ؟ ليه مابتاخدي ساندويشة كاملة .
مطر: .....بتكفيني عمي .
عمللها الساندويشة وعطاها اياها.
مطر: ....عمي قلتلك نص مو كاملة .
الرجال: ....خدي ساندويشة كاملة وعطيني حق نص .
مطر: ....لأ ...يابتاخد حق كاملة يااما اقسمها وعطيني نص .
عطاها اياها كاملة وقلا: ....عمي تعي لعندي كل يوم وخدي ساندويشة كاملة ومابدي حقا.
اتطلعت فيه بحزن وتركتلو الساندويشة قدامو وراحت.
كان بالصدفة لامحها عز من بعيد وشافها دخلت المطعم وكلعت منو فاضية وعم تبكي .
نزل وراح للمطعم وسأل صاحبو.
عز: .....عم بدي اسألك ليش الصبية اللي طلعت من هون طلعت عم تبكي .
الرجال: ....رح تجنني هالبنت والله .
عز: .....ليش شو صار.
قلو الرجال عاللي صار ....وماانصدم عز من موقف مطر لانو عرف انو عزت نفسها عليها انو تتحسن الناس عليها وهي اللي كانت بنت عز ونعيم وكانت تاكل احسن اكل وكل شي يوصل لعندها واللي مايعجبها يجيها غيرو .
ماعرف يفسر اللي صار معو شفق عليها انو مامعا تشتري ساندويشة كاملة وبنفس الوقت شمت فيها لانو هي السبب بكل اللي عم تمرق فيه .
بيوم وقت العصر كانت مطر عم تشطف درج بنايه قبال بناية ام حمزه شافتها من البلكون وخبرتها انو تمرق عليها وقت تخلص شغلها .
وقت خلصت مطر راحت لعند ام حمزة ...
ام حمزة: يااهلا وسهلا تفضلي .
مطر: ....يسعد مساكي خالة .
ام حمزة: .....مساالورد يابنتي تفضلي .
دخلت مطر وماكانت بتعرف مين موجود ..
دخلتها عالصالة ...
اتفاجأت وقت لقيت عز قاعد مع حمزة واختو نبيلة .
خحلت مطر وماقدرت ترفع عينها ...
مطر: ....بعتذر مابعرف انو عندك ضيوف .
ام حمزة: لاياامي عز مو ضيف هاد ابني حمزة وبتعرفي وهاد رفيقو الدكتور عز الدين .
مطر بخجل وصوت دوبو مسموع: .........اهلا وسهلا.
ام حمزة: عزو ...هي مطر ست الصبايا.
اكتفى عز انو يزورها ويهز راسو بس .
نبيلة: ....ياهلا بالقمر ...لك مابعرف ليه يامطر بحبك من جوات البي .
مطر: ....تسلمي انسة نبيلة كلك زوء .
مطر: اي خالة قلتيلي عايزتيني خير .
ام حمزة: ....كل خير ....بدي اسألك بالأول انتي مختصرة شغلك عشطف البنايات والا بتشتغلي اي شي تاني .
مطر:....... حسب الشغل .
ام حمزة: ....هاد ياستي بنت اختي عاملة مباركة لانو ولدت وصرلا عشر ايام وبدا مين يخدم الضيوف وسألت عن بنت تشتغل وتساعدها قلتلا عندي صبية بتطير العقل عقد مو نضيفة وهادية وقلت انتي اولى من غيرك ورح تكرمك كتير شو رأيك .
عز : 😳😳
مطر😔: .......اي خالة مافي مشكلة .
ام حمزة: خلص لكان تتي لعندي الخميس الساعة خمسة لنروح سوا بحكم انك مابتعرفي البيت .
مطر: ....على عيني .
نبيلة: ....مطر ...انتي مع مين عايشة .
رفعت عينها فيها وسواد الدنيي تجمع قداما وغصة خنقت بحلقا ماقدرت عطول تحكيوخاصة انو الحكي كلو قدام عز ....
مطر: ....لحالي .
نبيلة: .....كيف يعني لحالك ...يعني امك ابوكي اخواتك .
مطر مع كل دمعة: ......امي وابي ماتو وانا صغيرة وماعندي اخوات ولا قرايبين .
ام حمزة: ....ياحبيبة البي وعايشة لحالك انتي؟
مطر: .....اي خالة .
حمزة: ......وعند مين ربيتي يعني معقول من صغرك وانتي لحالك .
مطر: ....لا وقت ماتو اهلي ربيت عند جيرانا هنن اللي ربوني وحنو عليي واهتمو فيي وماقصرو معي وكانو اعز عليي من اهلي لو موجودين ....اصلا مابعرف غيرهن .
نبيلة: ....اي طيب وليه علأ عايشة لحالك يعني ماتوو.
مطر بلهفة:.. لأ من غير شر عنهون ....بس هنن سافرو .
نبيلة: ...ايواااا طيب ليه ماسافرتي معهن.
مطر بتردد: .......لاني مو بنتهن ماقبلت الداخلية يخلوني سافر معهن قال ممنوع .
ام حمزة: ....ومن زمان مسافرين .
مطر: ......من شهور تقريبا .
نبيلة: ....طيب ماتركولك شي يعني شغل مصاري بيت اي شي .
مطر: .......امبلى تركولي .
نبيلة: ...شو تركولك .
مطر بابتسامة: ......تركولي زكريات .....زكريات طفولتي معهن الاوقات اللي كنا نقضيها سوا حبهن واهتمامهن الي .....كانت زكريات حلوة كتير صعب تنتسى ....لكن اخر زكرى ....هيي اللي قلبت كل شي وغيرت موازين حياتي .
وقت سمع كلامها عن الزكريات غمض عيونو بقوة وبعد وجهو عجنب😖.
نبيلة: ....طيب ليه بنوتة قمر متلك لهلأ ماتزوجت .
مطر: .....انا اتزوج هههه مين اللي بدو يقبل بوحدة معدمة ومعترة متلي .
ام حمزة: اسم الله عليكي بتجنني ياامي الله يبعتلك الحظ وابن الحلال .
حمزة: ....ليكي في عنا ممرض بالقسم اللي انا فيه بدو يتزوج هو شب كتير محترم وهادي ماعندو كتير يعني بس بيقدر يتزوج عقدو وبدو بنت حلال ...شو رأيك قلو عنك وهلي يجي يشوفك .
طار عقلو عز وقت سمع هالكلام من حمزة ....لكن اختصر وقت سمع مطر قالت.
مطر: .....هههه لأ دكتور انا لا اصلح للزواج .
نبيلة: ....يووو كيف يعني انتي مرتبطة شي .
مطر: ......لأ بس اللي متلي مافيها تتزوج ابدا .
ام حمزة: .....له يابنتي ليش عم تحكي هيك الف شب بيتمناكي .
مطر😔: .....بس انا لأ .
حمزة: ....شو السبب.
مطر: .....لأني مريضة يادكتور .
ام حمزة: ....مريضة !!!!شو مرضك يابنتي ماقلتيلي انك مريضة من قبل .
مطر: ......انا مريضة قلب.
فتح عز عيونو عالاخر وانصدم بكلامها .
حمزة: .....مريضة قلب ....من متى .
مطر: .....من شهور .
ام حمزة: ..وعم تتعالجي يعني .
مطر: لأ خالة انا مرضي ماالو دوا .
حمزة: ...مافي مرض مالو دوا .
مطر: ....الا مرضي ......مالو دوا .... وازا انوجد تمنو غالي كتير وانا مافييي عليه .
حمزة: قليلي شو هو دواكي وانا بجبلك اياه.
ام حمزة عم تبكي عليها وقت شافت الأسى والدموع بعيونها وهي تحكي .
ام حمزة: ....بنتي ازا مو موجود بالمشفى بخلي حمزة يجبللك اياه من برا .
مطر: .....الله يحميلك اياه ....بس والله صعب ماحدا بيقدر يجيبو غيري ولجيبو لازم قدم تنازلات .
نبيلة: .....وحدة وحدة علينا شو التنازلات اللي لازم تقدميها لتجيبي دواكي .
مطر:.....لازم دوس عكرامتي وقدمها لأقدر احصل عالدوا عرفتي شو .
نبيلة: .....شو هي حزورة ....فهميني ماعم افهم .
حمزة: ولا انا مافهمت .
عز الوحيد اللي قدر يفهم عمطر ويعرف شو مرض البها وانو دواها تترجاه وتعتذر منو وبهيك بتكون داست عكرامتها كرمال يرضى عليها .....هنن فهمو مرضها بالكلام الصريح لكن عز فهم مقصدها لأنو بيعرف مغزى كلامها .
نبيلة: ياستي وشو ماكانت التنازلات لازم تقدميها كرمال صحتك وكرمال تعيشي وتتزوجي وتجيبي ولاد .
مطر بلهجة اصرار: ......يموت البي وينتهي عزابي ولا عيش بألب سليم بدون كرامة ...وبعدين مو حرام كون انانية واعمل عيلة عودهن عليي وانا بعرف اني رح اتركهن قريب .
ام حمزة: والله يابنتي كلامك كلو الغاز ماعم افهم عليكي شي .
مطر عم تمسح دموعها : ....انسي خالة .....انسي .....المهم هلأ بعد يومين بجي لعندك لنروح سوا.....بالأزن.
ام حمزة:لحظة شوي ....انتي مامعك موبايل ؟
مطر: .....لا .
ام حمزة: هي موبايل صحي هو مو حديث بس بيقضي مصالح ....جبلك حمزة الو شريحة لحتى كل مااحتجتك اطلبك .
اتضطرت مطر تاخدو بعد خجل وتردد كتير لكن بالنهاية اخدتو .
كل الوقت اللي مرق بييت ام حمزة وكل الحديث اللي دار بينهن بوجود عز ومطر ماعطت عز ولا نظرة .....ماكان عندها استعداد تجازف بهيك مغامرة لان وقتها رح تفضح حالها وعيونها رح بيكشفو كل شي .
بعد ماراحت مطر ....
ام حمزة: ...ياالله هالدنيي شو فيها مآسي وبواب مسكرة مابتعرف شوفي وراها.
عز: .....خالة لا تأمني لأي حدا وماتسدقي اي حدا وشو مابينقال قدامك .
ام حمزة: .....قصدك انو هالبنت مو سادقة .
عز: ....انا مابعرفها لحتى احكم عليها ....بس انتي ماتسدقي اي حدا .....بكونو اللي متل هيك عندون غايات مخباية ورا اقنعة بحطوها لياخدو غرضهن منك .
ام حمزة:....انا مو بنت اليوم ياعزو لحتى مااقدر ميز الصالح من الطالح وهالبنت واضح عليها السدق .
بعد مانزلت مطر كانت عم تمشي بسرعة مامعها حدا الا دمعاتها اللي صارو رفقاتها بوقت الشدة بينزلو ليواسوها ويخبروها انو هنن معها وحاسين فيها .
بعد يومين راحت مطر لعند ام حمزة وراحو سزا لبيت بنت اختها وقضت اليوم كلو عندا ....
انبسطت فيها وشافتا كتير مؤدبة وخلوقة وقالتلا ازا احتاجتها رح تتصل فيها ....
هوا وبرد كتير الأرض ناشفة واوراق الشجر عم توقع والجو عم يعلن عن قرب فصل الشتي ...
من وقت اللي قلع عز مطر من بيتهن ماشافها شهور لكن وقت التقى فيها صدفة بييت حمزة كترت شوفاتو الها وكأنو القدر عم يحطهن بوش بعض لغايات مجهولة ....
طلع عز بسيارتو مع رفيقو بعد ماخلصو شغلهن بالمجمع الطبي ...وقتا لمح مطر عم تنضف قدام بناية كبيرة ....
بقي آترها كل الوقت بعد ما خلصت شغلها ..
وهي بالطريق حست بالبرد كتير لانو تيابا كانو مبللين قربت من مطعم كان حاطط شواية الفراريج بالشارع قدام واجهة المطعم ...وقفت جنب الشواية وصارت اتدفي بأيديها وتنفخ عليهن ..
كان عز لاحقها ليعرف وين ساكنة ، شافها وين واقفة نزل لعندها بسرعة ...
عز: .....شو عم تعملي هون .
جفلت وقت سمعت صوتو اتطلعت فيه بعيون حزينة مشتاقة معاتبة وماردت عليه😟.
عز: ....روحي من هون .
مطر: ......
عز: .....روحي من هوون بلا مانادي لصاحب المطعم وخلي يقلعك من هون روووحي .
سحبها من ايدها ودفشها لبعيد .
عطتو نظرة وقت دفشها خلت بدنو ينتفض من حزنو عليها 🥺.
مشيت شوي ورجعت اتطلعت فيه وهي عم تبكي ...ماكانت منتبهة انو قدامها في رصيف ...تفركشت فيه ووقعت عالأرض واجت على ايدها .
لا ارداي ركض عز عليها وحاول يساعدها.
عز: ....صرلك شي .
نترت ايدو عنها وقامت موجوعة .
عز: .....هاتي لشوف ايدك .
مطر بألم 😖: .....مابدي منك شي .
كان في ولاد قاعدين عزاوية الطريق صارو يضحكو عمطر وقت وقعت .
صرخ عز فيهن: ......بس انت واياه على شو عم تضحكو .
راحت فوق كسرة خاطرها اجت وقعتها قدامو .
واقف عم يتطلع عليها وهي رايحة ...
نزل رفيقو من السيارة : .....لك ليه ماخليتها اتدفي ايديها يعني لو مانها بردانة ماكانت وقفت هون .
عز: ......ماحبيت تشم ريحة الفراريج وتشتهيون ومامعها تشتري .
كان سادق بكلامو ومستغرب من حالو ليه منعها اتضل واقفة وبنفس الوقت حاقد عليها ...
رفيقو: .....بماانك شفقان عليها جيبلها نص فروجة واعطيها اياها .
عز وهو راجع عسيارتو: .....لو بعرف انو رح تقبل تاخد الوجبة مابستنى اقتراحك ....بس حتى لو ماشافت انو انا اللي حاططهن عباب بيتها رح تكبهن بالزبالة ولا تاخدهن لانو رح تعرف انو مني .
*❴🖋️❵↵يـتـبـع...*