part2
السلام عليكم نهار جديد واحداث جديدة مع جنة وادم...
نكملو منين حبسنا .
نضت الصباح على 9 على خاطر اليوم الجمعة مانقراش وبابا وخاوتي مايخدموش ثاني ..رحت غسلت وجهي وتوضيت وصليت يعني البارح من التعب مافقتش بالفجر كي اذن (يعني نحنا في عايلتنا كامل نصلو ونوضو للفجر وبابا معلمنا من الصغر الصلاة وهاذي احسن حاجة علمهالنا )كملت صليت ورحت للكوزينة لقيت ماما طيب في الفطور صبحت عليها وقعدت معاها ونهدرو على جيرانا الجدد ..قتلي راح نعرضوهم يتعشاو عندنا مباعد عباه تعاونيني على العشا ..قتلها ايه..كملت فطرت .ورحت نفرز في الدار ..ومن باعد طيبت لغذا .ودخلت دوشت
.وكملت رحت للصالة لقيت ماما سقسيتها على بابا قتلي او راح للجامع ..اذن الظهر صلينا ...ومن باعد تغدبنا وحكمت بلاصتي بقيت نقرا في سورة الكهف لين كملت وليت جبدت كراريسي بقيت نقرا شوية من باعد وليت نكونيكتي مع مريم صاحبتي تقرا معايا وفي نفس الوقت خطيبت محمد خويا ..قتلي بلي تفاهمو هي ومحمد يديرو العرس الشهر الجاي ...قتلها ماقلناش محمد ..قتلي ...ضرك يقلكم ...وليت طفيت التيليفون ورقدت شوية نضت مع اذان العصر ...رحت توضيت وصليت ....من باعدسمعت ماما تعيطلي رحت نلقاها مع بابا وخاوتي ...قتلي اقعدي جنة محمد حاب يقلنا حاجة ..تفكرت هدرت مريم قلت سير راح يهدر على هاذيك لحكاية...قعدت وكيما توقعت قلنا بلي راهم واجدين ومش حابين يطولو في الخطبة ماعندهم وعلاه يستنو والعرس بعد شهر ناضت ماما تزغرت وفرحت بزاف نهار هذاكا ...وفي الليل قاعدة نطيب في لعشا مع ماما سمعت التطبيب في الباب جيت راح نحل قلي بابا ارجعي او باين عمك السعيد وعايلته ضوك نحل انا وليت رجعت للكوزينة وقلت لماما غير نسمعو في الهدرة ودخلو للصالة قتلي ماما ارواحي نسلمو عليهم وليت رحت جيت ندخل وتلاقتةعنينا مع بعض ايه ...لي تفكرو فيه صحيح...لقيت ادم مع باباه وامه...بقيت واقفة نتصمرة في بلاصتي لين قرصتني ماما قتلي وشبيكي تصمرتي روحي سلمي عليهم وليت سلمت عليهم لين وصلت لادم بقيت باهتة فيه ذاك الزين تبدل خلاص ولا شباب بزاف الشعر لكحل واللحية الكحلة واللبسة لي لابسها خرجت معاه ..لين نطق قلي جنة صفا ...وليت مديتلو يدي تصافحنا برك...
صح انا فرحت كي شفته بصح منسيتش وش دار فيا السنين هاذم كامل ماهز تليفون وقال نعيط لجنة ولا كيما راح ومقالش ليا ..قعدو يهدرو ويضحكو وانا غير ساكتة وساعة ساعة نهز راسي نلقا ادم يشوف فيا نولي نهبط راسي ...قتلي طاطا فاطمة (ام ادم) جنة بنتي كبرتي وعدتي مرا الله يبارك قريب معرفتكش ولينا نضحكو من باعد سقساتني قتلي مازلتي تقري ووين واصلة قتلها ايه اسنا عندي لاليسونس قتلي الله يبارك كبرتي في ساع كي غير كنتي تجيني وانتي مدايرة ليكوش وتحبي ترقدي مع ادم وكي نجي نرجعك لماماك تولي تبكي نولو نخلوك ترقدي مع ادم ههههه......حرجتني قدامهم....ولت قتلها ماما ايه شفتي كانت نهار كامل وهي لاصقة غير في ادم .....ياارض انشقي وابلعيني زادت كملت عليها ماما ....قتلي طاطا فاطمة الله يبارك زينتي بزاف وليتي مرا ونص ....وبابا يسقسي في ادم قله كيفاش حتى رجعت للدزاير ...قله ادم كملت وراقيا وريقلت خدمت وجيت صيبو ماعدتش راجع لفرانسا وراح نبقا نخدم لهنا (بالمناسبة ادم يخدم رجل اعمال ) تعشينا وسهرنا ومن باعد روحو .
انتظرو الفصل الثالث قريبا ونتمنا تكون عجبتكم .واذا كاين اخطاء قولولي عباه نصلحها اني مازلت مبتدأة هذي اول حكاية نكتبها ووسعو بالكم معايا ههه😅