لعبة الأقدار - الفصل 24 - بقلم رسامة الجروح - مكتملة | روايتك

هيفاء صحت على صوت أمها وهي تمسح على جبتها وتقرأ بعض الايات القرانيه هيفاء فتحت عيونها بكسل ودارت بعيونها في الغرفه المعتفسه والفراش اللي يدل على الصراع اللي دار فيه البارحه تذكرت أحداث البارحه بأرهاق لان قواها انهارت وتحس انها ضعيفه تجاه أي شئ التفتت لامها بتثاقل لقتها مندمجه في القراءه ولاأنتبهت لها . هيفاء بصوت متعب: يما ..! أم فهد لما سمعت صوتها تأملتها بحنان:صباح الخير حبيبتي . هيفاء ابتسمت بعذوبه :صباح النور. هيفاء كانت تحس بالخوف من مواجهة امها باللي صار أمس لانها تعرف ان الخيار الوحيد قدامها هو الحقيقه وأمها ماراح تفهمها. أم فهد وهي تلمس خدها بنتها كأنها ترسل لها باصابعها حبها: وش أخبارك اليوم .. أحسن..؟ هيفاء قامت على حيلها من السريربوهن واستندت بظهرها على السرير تقنع فيها أمها بطريقه ملتويه أنها بخير:ابد يا يما مافيني .. أم فهد وهي مو مقتنعه: واللي صارأمس وش تسمينه..؟ هيفاء حست بارتباك وراحت تدور بعيونها على أجابه مرضيه : اللي صارأمس كان خوف يايما من الزواج والحياه الجديده والظروف زادت من خوفي لما تملكت العنود لاني حسيت اني بصير وحيده. أم فهد بصدمه:ليش أنتي موافقه على نواف ..؟ هيفاء جمدت وردت ببرود:أي ايما على نواف ..انا صحيح كنت هالايام متشككه انه مايبني بس الجواب جاني يثبت عكس شكوكي والدليل انه يبي يتملك علي بسرعه. أم فهد وهي تأمل وجهه بنتها تدور على دليل يثبت عكس كلامها لكن ملامحه تدل على ثقتها بالكلام اللي تقوله :أي يايما بس مو هذا كلامك قبل كم يوم لما قلت لي انك ماتبينه..؟ هيفاء نزلت رأسها تخفي الحقيقه عن أمها: هذاك أول والاول تحول. أم فهد أمسكت كتف هيفاء بعد ماأثار كلام هيفاء أعصابها :وشلون هذاك أول..هيفاء هذا زواج مو لعبه مره تقولين أبيه ومره تقولين ماأبيه..! هيفاء سحبت كتفها من يد أمها وتكلمت بحده:يما أنا كنت عميه عن الحقيقه ولاشلون أرفض واحد يحبني ويبي سعادتي قبل أي شئ في هالدنيا. أم فهد وهي تناظرها بغير صدق لان عيونها تعكس كلامها ،كانت عيونها بركة سوده من العذاب . أم فهد أستسلمت لعنادها:مادام هذا قرارك فاأنا ماعندي أي أعتراض لكن بحذرك لان خالتك لطيفه تجهز الملكه بيكون اخر هالشهر. هيفاء بققت عينها :يعني بيكون بعد أسبوعين. أم فهد بوجه صارم:هذا أنا قلتلك ولقد أعذر من انذر..الحين مادام وافقتي لازم نجهز له. هيفاء شخصت عيونها للفراغ تفكر سرعة مجرى الاحداث ماتوقعت ان موافقتها بتعكس عليها الاضراربينما أمها سحبت نفسها بهدوء وطلعت من الغرفه. ************************************************** ***** نواف كان قاعد على المكتب ويبحث بين الاوراق المبعثره على المكتب وأصوات التلفونات الصادره من المكاتب تشتت عليه انتباهه لما رن جواله الخاص فجأه. شاف الاسم على الشاشه "لولوه" عبس عن وجهه ورد على التلفون من غير نفس:الو.. وصله صوت لولوه بدلع مبالغ:الو مرحبا حبيبي.. نواف تنهد بملل:هلا.. لولوه. لولوه بغنج:وش أخبارك حبيبي ..؟ نواف تنرفز:بخير الحمدالله ..لولوه انا عندي شغل بكلمك بعدين. لولوه رفعت صوتها بحمق:وانا كل مكلمتك قلت عندي شغل متى أكلمك يعني..؟ نواف طلع زفير دليل على قلة صبره:مووقته الحين ..انا الحين في الشركه اذا رجعت البيت بنتفاهم. لولوه مدت صوتها بعناد:لا ماراح أصدقك ..نواف انت وش فيك تهرب من مكالماتي. نواف مسك أعصابه:لولوه مايصلح هالكلام هنا ..انا في مكان عمل أوعدك اذا رجعت بتصل لك. لولوه كملت بغير أقتناع:أيه العب علي بكلامك هذا ترى يانواف أنا مو غبيه مثل البنات اللي تعرفهم تلعب علي بكم كلمتين حلوين. نواف مسك رأسه من الانفجار:اللهم صبرك ياروح ..وش تبيني اقولك ..أكثر من كذا. لولوه بمكرمدروس:أبيك تقدم تطلب يدي من اهلي . نواف وكأنه لقى المفتاح:بس هذا حاضرمن عيوني ..اي أوامر ثانيه سعادتك. لولوه استنكرت كلامه:قاعد تتمصخر حضرتك ..لامشكور ماأبغى شئ. نواف بقرف:ياللللللللله مع السلامه . لولوه بخبث:الا ماقلتك شفت ست الحسن والدلال خطيبتك. نواف رد السماعه لأذنه بسرعه بصدمه:من تقصدين..هيفاء..! لولوه ابتسمت باستمتاع:أي هيفاء المقروده في غيرها. نواف عصب:احترمي نفسك هذه بتصير حرمتي. لولوه بدهشه: نعم نعم..! حرمتك وانا وين رحت..! نواف ابتسم بسخريه:حبيبتي لولوه ما تعرفين متى الواحد يعيف الواحده ..عاد أنا يا مسكينه عفتك من زمان. لولوه كملت بصراخ:أكيد ماحد غيرها غسل مخك الاهيفاء..؟ كمل نواف ببرود: سواء بوجود هيفاء أو عدمها..أنا أصلا ماكان لي نيه أتزوجك من عرفتك. لولوه بصوت يتقطعه الحزن:بس أنا أحبك يانواف . نواف حن قلبه عليها:شوفي لولوه أنا أسف صدقيني لوكنت حبيتك كان خطبتك بس ماصار النصيب. لولوه بقهر:بعد ثلاث سنين علاقه جاي تقول لي بكل ببرود ماصار النصيب هيين يانواف ان ماخليتك تندم على اللي سويته فيني. نواف مد يده بتنرفز:ياللله عاد أنا ماسويت شئ غلط ..وانتي موأول واحده تدخل في علاقه وتنتهي لكن أظاهر عقلك شوي متخلف وبعدين وش تقدرين تسوين لي واللي ماتواصلينه بيدك واصليه برجولك. لولوه بغضب واثار البكاء في صوتها:لاتنسى يانواف اني شفت هيفاء واعرفها زيييييين وأقدر أقولها كل الحقيقه. نواف أرتاع :شوفي يا لولوه أن قربت من هيفاء ولاكلمتيها.. صدقيني لا خلي فضيحتك في الديره كلها. لكن نواف لقى نفسه يكلم حاله في التلفون لانها سكرت التلفون بوجهه ،أسند رأسه بتعب لظهر الكرسي محتاروشلون ورط نفسه مع بنت تافهه مثلها كل تفكيرها محصور بالزواج. طل السكرتيرمن الباب:استاز نواف في زبون يستناك بخليه يدخل..؟ نواف تنهد بتعب :خله يدخل. ********************************************* في مكتب يقع في أحد الضواحي الراقيه بلندن ،في المكتب الرئيسي اللي يحتله مدير الشركه كان تركي معطي كل أنتباهه وتركيزه على الاوراق ويتصفحها بتوتر بالغ لدرجة أنه زميله في الشركه أيلي اللي كان قاعد قباله لاحظ تصرفاته كأنه يبي يدفن نفسه في الشغل كان ياخذ كل وقته بالشغل كأنها متعه مع أنه بعض الامور ماكانت ضروريه لكنه يتولاها . أيلي كان يتأمل تركي بتفكير:تركي شوي شوي حاسب لاتأكل الاوراق. تركي هز رأسه بتهديد:أيلي رجاء لاحد يقاطعني. أيلي بسط يده على سطح المكتب بصوت عشان ينتبه له:لا ياتركي حالتك مابينسكت عليها شوف حالك شلون صار. تركي كتف يده على صدره وابتسم بسخريه:وش فيها حالي بعد..! ألي أشر بيده لوجهه باستغراب:انت شفت حالك بالمراه قبل ماتجي دقنك صارله كم يوم ماحلقته وأكثرمن هيك تدبح نفسك بالشغل مايصح هيك ياخيي. تركي لمس ذقنه يحكها واللي أهملها بغيراهتمام لكن ألي أستعجب من بروده ورفع يده بوجهه تعبير عن وجوده:شووو وين رحت لاأنت أكيد مش تركي اللي بعرفه. تركي مسك رأسه بارهاق:أيلي وش فيك صاير مثل المرأه تتذمر واجد. أيلي لاحظ وجهه المتعب بقلق:تركي صاير شئ في البيت قلي لي ..؟ تركي تخللت يده شعره دليل على مشاعر مكبوته: وليش في شئ ما صار أكثر.. أيلي أقترب من تركي بخوف:شو خير أن شاء الله ..عمتك فيها شئ. تركي رفع عيونه لأيلي بألم:شفت شلون تفكيرك سيده راح لعمتي ماعمركم فكرتوا فيني شئ.. دايما حاطيني مثل التمثال ماأطيح بنظركم. أيلي أنتبه لنفسه بخجل:أنا أسف يا تركي ماكان قصدي. تركي ابتسم ابتسامه صفراء:لاعادي تعودت . وقف تركي ومشى لناحية حائط الزجاج اللي يطل على الشارع الرئيسي ،وقف بقامته الطويله وبنطلونه وقميصه الاسود اللي لبسهم الصبح وكانت يدينه غارقه في جيوبه وهويطالع برى،بما أنه كان يعطي أيلي ظهره ماقدر يعرف اللي تعكسه تعابيروجهه لكن شئ في وضعية كتوفه وانحناءة رأسه الاسود كان معبر بشده. تركي تكلم من غير توقع:مستعد ياأيلي تسمع قصتي. أيلي هزرأسه باستجابه سريعه:أي أكيد. انخفض ذقنه بحده وخرجت أنفاسه بقوه كأنه كان يكبتها من لمده طويله ،وبدى تركي يسرد الاحداث باختصار وأيلي مستمع بانصات وهو موجه كل أنتباهه له. تركي كمل وبصوته عاطفه جياشه وفي عيونه ضغف ماشافه ايلي من قبل:بس وهذا اللي صار..! طعنت أيلي الوحشه اللي بينت في صوته وشعر بالذنب لانه كان أعمى عن حالة رفيقه:مابعرف شو بقدر أقولك ياتركي الصراحه حالتك صعبه كتير. تنهد تركي ساحب نفس عميق مرتجف وتردد الهجران في صوته:انا تعبت ياأيلي من الوحده تعبت من الشقا والغربه حتى الانسانه الوحيده اللي حركت قلبي تخلت عني ..أنا ياأيلي طول عمري بظل وحيد ومعزول ..عمتي حاطتني صنم ماأتعب ولالي أي احتياجات أنسان قوي مايضعف لكن انا في النهايه أنسان حالي الناس أمرض واتعب ماعمرهم أسالوني تركي يبغي شئ تركي محتاج شئ لأني شماعه عندهم يطلبون مني اللي يبون . مر صمت ثقيل بالتوتر لكنه مباشرة رجع وجهه ينغلق على نفسه مستخدم الدرع عشان يمحي به ماظهر من تعابيره. أيلي تقدم لتركي يواسيه:لكن ياتركي أناغيرأناخيك بخاف على مصلحتك ..وعشان حالتك الصحيه لازم تاخود أجازه وخل الشغل عليي . تركي بقسوه: لا ماراح أخذ أجازه كفاني أجازات . أيلي حط ايده على صدره يترجاه :كرمالي ياتركي ..انا رفيقك اللي بتسند ظهرك عليه صدقني مابقدر أشوف حالك هيك واسكت. تركي تنهد باستسلام :خلاص بشوف. طمأنه أيلي بابتسامه:لاتخاف ياتركي أعتمد علي ..وهله بتروح لشقتك ترتاح ومابدي أي مناقشه. تركي ابتسم بسخريه:ماكنك مسختها شوي قمت تلعب دورعمتي لطيفه. أيلي سحبه من أيده:بلعب دور عمتك ولاخيتك..مابيهم بتروح هله على البيت. تركي ضحك وخذا معطفه واتجه للباب والتفتت لأيلي:لاتستغل فرصة اني مو موجود وتقعد تتغزل في الموظفات . أيلي ضحك ورفع يده ببراءه:لا أتطمن خيي. رفع تركي يده بتوديع:يالله باي. أيلي ابتسم برضى :باي. ************************************************** كانت العنود قاعده بغرفتها بتوتر وضامه ايدينها بقوه وهي تحاول تهدي نفسها بينما الكوافيره تحط اللمسات الاخيرة ولما خلصت قعدت تشوف نفسها بالمرايا ..والكوافيره فرحانه بالتحفه اللي سوتها:اسم الله عليكي شو بتجنني.. العنود ابتسمت بتوتر: كله من شغلك ايدك.. الكوافيره وهي تهز براسها: لا حياتي انتي اللي بتجنني.. العنود قامت من مكانها وخذت الفستان اللي كان طالع مقاسها بالضبط بعدها استئذنت الكوافيره وطلعت بينما العنود خلعت ملابسها وغاصت في طيات الفستان كانت تحاول تسكر الازرار لما دخلت امها الغرفة.. ام حمد: خليه انا بسكره .. خلصت ام حمد من شغلها و التفتت العنود لها عشان تشوفها..ام حمد اللي لما شافت شكل بنتها ماقدرت تمسك نفسها وبدت الدموع تتجمع بعيونها.. العنود تبتسم لامها بحنان:يمه شفيكي هذا بدل ماتفرحين..ترا والله بتصيحيني.. ام حمد وهي تمسح الدموع اللي نزلت: مو احسلك تبكين وتخربين هالزين كله.. العنود ضحكت:ههههههههههه.. ام حمد بابتسامه: عساها دوم هالضحكه...ها يمه انتي جاهزه.. العنود بتوتر: يمه هيفاء وينها؟ هيفاء من عند الباب: انا جيت! العنود طارت لها عند الباب: هيوووووووووووووف.. هيفاء وهي ضامتها: الله واكبر تراك بتملكين مو تتزوجين..يعني للحين انا لاصقه فيك.. العنود وهي تطالعها بعتب: والله انك سخيفه..فكرتك ماراح تجين.. هيفاء :يابنت الحلال انا ماجي هذا من سابع المستحيلات..بعدين يفوتني البوفيه.. العنود وهي تضربها: يالخايسه.. هيفاء قعدت تضحك ..ام حمد: الله يخليكم لبعض..انزين يله اجهزي عشان تنزلين.. العنود بهدوء: خلاص يمه انا جاهزه... ام حمد هزت راسها وطلعت ..وهيفاء التفتت للعنود وهي تقول بخبث: اما فواز لايشوفك بيستخف عقله عليكي.. العنود وهي تمثل بلا مباله وهي قاعده تلبس الصندل: اصلا فواز مايهمني.. هيفاء حست بالقهر منها:انا اللحين ابي اعرف انتي ليش ماتعترفين انك تحبينه.. العنود كانت بتكلم بس قطعت عليها هيفاء: اسمعي يالعنود لاتقولين انك ماتحبينه لانك لو ماتحبينه ماكنت وافقتي عليه..واسمعيها مني يالعنود لا تخربين اللي بينك وبينه بكبريائك.. العنود ظلت للحظات وهي تفكر بكلمات هيفاء وعارفه ان كلامها كله صح لانها بالفعل اكتشفت ان موافقتها بدافع الحب مو شي ثاني لانه ما كان يهمها اذا كان يحبها او لأ اهم شي انها تكون جمبه ومعاه.. هيفاء بلطف: يله خلينا نزل ترا الناس وصلوا حتى الجوهره موجوده.. العنود:اوكي ..بس انتي انزلي قبلي عشان تقولين للدي جي تحط الموسيقى اللي اخترتها.. هيفاء سبقت العنود بالنزول والعنود وقفت عند الدرج تنتظر تسمع الموسيقى ..هيفاء كانت تحت ومتجه للدي جي لما مسكتها الجوهره. الجوهره: ها ياختي وينكم ترا مره تاخرتوا.. هيفاء :واذا ماخليتيني اروح اشغل الموسيقى بنتأخر اكثر.. الجوهره لما استوعبت ابتعدت عن طريق هيفاء: ايه يله روحي بسرعه... الجوهره راحت وقعدت مكانها بينما هيفاء امرت الدي جي انها تحط الموسيقى ووقفت مكانها بترقب..صدحت الموسيقى الناعمه على كبر الصاله ونزلت العنود بهدوء ورزانه وكل العيون تصوبت نحوها تصلي على النبي وكانت العنود طالعه ايه من الجمال وكانت عيونها تدور على امها ولما شافتها لقتها تبتسم لها حنان وتأشرلها مكان ام فواز،راحت العنود لمكان ماشرت امها وحصلت ام فواز واقفه تنتظرها ولما وصلت لها العنود باستها على راسها. ام فواز بابتسامه:بسم الله عليكي ..وماشالله . ابتسمت العنود وراحت وقعدت على الكرسي المخصص لها ولما توقفت الموسيقى قاموا الحريم يسلمون عليها ويباركون لها ويتمنون لها السعاده قربت منها الجوهره وعلى وجهها ابتسامة عريضة:مبروك يامرت اخوي العنود وهي تضحك: الله يبارك بعمرك.. الجوهره وهي تمثل التكبر: شوفي عاد تراك صرتي مرت اخوي معناتها اوامري طاعه العنود:لا والله ليكون انا ماخذني اخوك عشان اصير خدامه عندك.. الجوهره تضحك:ههههههه..امزح معك يابنت الحلال..والله اني فرحانه عشانك وعشانه .. وبعدها ابتدى الرقص واول من افتتح الرقص هي هيفاء ومعاها الجوهره..وبعد ساعه قربت ام حمد من العنود:العنود يمه يله قومي معاي اخوك ينطرك بالمجلس الداخلي عشان تبصمين على ورقة الملكة.. العنود حست بالتوتر يجتاح جسمها قامت مع امها وتوجهت معاها وهي مو حاسه بالعالم اللي حوليها ولما دخلت شافت حمد قاعد وقدامه ورقه ،الورقه اللي خلاص بتقيدها بفواز طول العمر،رفعت عينها لحمد اللي كان مصدوم بجمال اخته قرب منها وباسها على خدها:مبروك يالعنود العنود ابتسمت له: الله يبارك لك..عقبالك.. حمد وهو يتنحنح: احم احم للأسف بتتحطم قلوب كثير من البنات نظرا الى اني معتزل الزواج.. العنود ضحكت وقعدت وهو بدوره قعد بجمبها بينما امها قعدت من الصوب الثاني جمبها،اشر لها حمد مكان ماتبصم جمب توقيع فواز المميز..ارتجفت ايدها وهي تبصم..بعدها وقف حمد واخذ الورقة وطلع من المجلس بينما ام حمد تعدل شعرها.. ام حمد: اسمعيني يايمه ماوصيك بالثقل ..على انك ماتحتاجين وصايه.. العنود خافت لما شافت امها وقفت،امسكت كم امها بخوف:على وين يايمه؟ ام حمد باستغراب: بطلع خلاص زوجك بيدخل اللحين. العنود بخوف: يمه واللي يسلمك اقعدي معاي.. ام حمد وهي تبتسم: اقعد ايش اسوي..سمي بالرحمن مالك شر ان شالله.. قعدت العنود لحالها وهي تتأمل ابهامها الازرق من لون الحبر حست بصوت من عند الباب رفعت راسها شافت حمد يكلم امها بتوتر وباين الغضب على ملامحه..هبط قلبها بالارض من الخوف حست ان فواز مسوي شي ولا هو وينه ماجا..معقوله فواز رحل ..معقوله يسويها ويحطم قلبها من جديد..هل ممكن يكون هذا انتقامه منها انها يتركها ليلة الملكة..تمسكت بفستانها بقوه وهي تحاول تمالك اعصابها وهي مغمضه عينها تمنع دموعها من انها تتساقط.. :العنود! العنود رفعت راسها بقوه..وشافته واقف قدامها بثوبه وشماغه وبهيبته اللي ملت المكان بوجوده..كان فواز قلبه يدق بسرعه غريبه وهو يتأمل جمالها ،هل معقوله في وحده بجمالها بلع ريقه بصعوبه واتجه لمكان ماكانت قاعده وقعد بجمبها..العنود كانت ترتجف من راسها لساسها ومنزله راسها تحاول انها تتفادى نظراته.. فواز بصوت اجش: مبروك. العنود بصوت منخفض: الله يبارك لك.. فواز من زمان كان يتمنى هاللحظه ولما صارت معد عرف ايش يقول.. العنود جمعت شجاعتها وتكلمت بصوت يرتجف: فواز.. فواز التفت عليها من غير مايقول شي ..العنود حطت عينها بعينه وهي تتكلم: فواز بالنسبه للكلام اللي قلته .. فواز وهو يهز راسه: انسي الكلام اللي قلته.. العنود قطعت عليه كلامه: لا ماقدر..انا بس ابي اسألك سؤال واحد.. فواز بهدوء: اسألي. العنود بهدوء: انت ليش سويت كذا..؟ فواز مافهم عليها فقطب جبينه بحيرة: سويت ايش؟ العنود بحزن: ساره. فواز بمراره: سارة ماضي وانتهيت منه .. العنود بصوت متهدج: وانا؟ فواز بصوت اجش: انتي..انتي الماضي والحاضر والمستقبل..تعرفين وين؟ العنود هزت راسه بعدم معرفه ..فكمل فواز وهو يأشر على قلبه: هنا.. العنود اجهشت بالبكي وماتعرف ايش تقول..فواز لما شافها تبكي فهمها غلط وقام واقف وهو يحس بالم : مايحتاج تبكين يالعنود اذا ماتبيني قوليها وخلصينا.. العنود رفعت راسها بصدمه: فواز انت ايش تقول.. فواز لف عليها بغضب: كلامي واضح ومايحتاج اي توضيح..دامك ماتحبيني ليه وافقتي من الاول..عشان تذليني؟ العنود وهي ترفرف بعينها مو مصدقه: انا ابغى اذلك ..وانا ماحبك؟ اصلا لو كنت ماحبك مارح اضيع حياتي عشان اذلك .. فواز وهو مو مستوعب اللي سامعه: يعني انتي تحبيني..؟ العنود حست باحراج شديد واللون الاحمر غطا وجهها بالكامل.. فواز ابتسم ورجع جالس جمبها: طيب يابنت الحلال ليه تسوين كذا ومعيشتنا بعذاب.. العنود بحزن:انت اللي خربت كل شي.. فواز هز راسه: صح كلامك ..بس هذاك اليوم اللي شفتيني فيه معاها كان اخر يوم اشوفها فيه ..وبرايك ماتظنين اني عوقبت عليه.. العنود ابتسمت وهي تتذكر اللي سوته فيه..فواز وهو يضحك: ايه مستانسه.. العنود بصوت رقيق: اسفه.. فواز وقف وهو يمد ايده لها..العنود حطت ايدها بايده ووقفها:تظنين ابوك بيمانع اذا عزمتك على العشا برا؟ العنود هزت كتفها: مادري..بس مو لازم فيه عشا.. فواز بخبث: مايحتاج خلاص انا اصلا بروح.. العنود مسكت كمه بسرعه: على وين بدري؟ فواز طالع ايدها على كمها..والعنود لما انتبهت سحبت ايدها بسرعه..ضحك فواز عليها: انا قصدي بروح اجيب شي من السيارة وبرجع.. العنود حست وجهها صار طماطه..طلع فواز ورجع بعدها بدقايق وفي ايده علبة صغيرة. فواز:هاتي يدك. مدت العنود ايدها بارتجاف..مسكها فواز وهو يفتح العلبه اللي بان فيه خاتم مبين عليه الغلا ،لبسها الخاتم وبعدها باس ايدها ..