يا ملاذ الحاكم يا بكر فارس - الفصل 182 - بقلم ريم سليمان - مكتملة | روايتك

‏دخلت ريف للداخل وهي تشوف الوضع عندهم رقص وضحك ، الغريب إنها ما شافت ملاذ للحين ، ولا لِمحت هتان ، نادين وشيخة يتهاوشون والكُل نوعاً ما مشغولين ، جِلست وهي تحب تختلي بنفسها كثير لكن هالأوساط ما تِسمح لها ، مرّها طيفه مباشرة يلّوح لـها وكأنه قدامها ، كِيف يبتسم ، وكيف شعره مبلول وكيف يضحك وكيف رجع يقول لها قدّ إيش هي حلوة ، قاطع حبل أفكارها أم حاكم يلي رفعت حواجبها بإستغراب : ريـف ؟ إبتسمت ريف بإستيعاب وهي تخجل من نفسها الحين فعلاً لأن الواضح أم حاكم مو أول مره تناديها : هلا ضحكت فاطمة وهي توقف من شافت توّرد ملامح ريف : عساك أخذتي الحياء وما طبّ فيك عِرق متعب وعياله الفاصخ ! تعالت ضحكاتهم مباشرة وقامت ريف بتردد وهي تبتسم : بشوف ملاذ _ ' ميّـلت شفايفها وهي ما تشُوف أصايل بمكانهم ، كانت بتدخل مع الباب الا إن حاكم يلي فتحه قبلها أرعبها ، كان الواضح إنه معصّب من شيء لكن ما تدري وش يكون بالزبط ، سألها ألف سؤال ، ليه هي بالخارج ، ومع مين ، وليه بترجع داخل ، وإذا لمحت شيء غريب وغيرها ، طمّنته إنها مع أصايل يهرجون وبترجع لأن الجو صار بارد وبتآخذ جاكيت وبترجع ثاني لعند أصايل ، أعطاها جاكيته يلي بـ إيده وقال لها لا تدخل الحين لأن التوأم موجودين ~ زفِرت وهي تشد الجاكيت عليها وتوقف بتدخل للداخل ، مِشيت بين الأشجار لأنها بتدخل من الباب الخلفي الآخر لجل تصعد لـ فوق على طول ، شهقت بذهول وهي تصد مباشرة من شافت هتان وهذام ، إشتعلت ملامحها وهي تعتذر : ما شفت شيء ، ما شفت شيء ! عضّت إصبعها وهي تبعد عنهم وتشتم نفسها كثير بعكس هتان يلي ضربت هذام مباشرة وهي تحط إيدها على ركبتها : ما تساعد بـ نِية حلوة وصافية ، وقح ! ضحك لثواني وهو يرجع رآسه للخلف : نادين ؟ هزت رآسها بالنفي وهي تغطي وجها : ليت ، ملاذ ! قام من مكانه وهو يميّل شفايفه : أوب ياساتر ، زوجة الفريق لا بالله عيب ! رفعت عيونها لأنظاره بإستغراب : حاكم ؟ هز رآسه بـ إيه وهو يتكي بعبط : عزّ الله وصل خبرنا لحاكم ، يا حيف بتطيحين من عينه وأنا بعد ناظرته لثواني بذهول وهي توقف على ركبتها يلي توجعها : ما تقول له وسّع عيونه لثواني بذهول : حاكم ؟ يوقف قدامه أحد وما يقول له شيء ! حاكم يسحب الكلام بدون لا تدرين يا حبي هتان بتردد : كيف يعني ؟ رفع أكتافه بعدم معرفة : يعني مثلاً ، أنا واقف قدامه وببالي موضوع ما أبغاه يعرف ولا أبغى أنطق عنه بحرف ، يجلس يتأمل ويعرف إنه وراك شيء وهوب قلتي له السالفة من طقطق لـ سلام عليكم ! تجمّعت الدموع بمحاجرها وهي تعفس ملامحها : أنا قلت إنه يخوف من زمان ، قلت ضحك وهو يضمّها لعنده :الحين وش سوينّا حنا ! ميّلت شفايفها بسخرية وضحك من فهم الكلمة يلي ببالها " وش ما سوينا " ، إبتسم وهو يضمّها لعنده : ما سوينا شيء ، طحتي وركُبتك تنزف وأنا جيت أقدّم العُون لك ورفعت الفستان شوي وكنت قريب من وجهك بس ما أخذت شيء ، وبس ناظرته لثواني بذهول وهي تضرب صدره وتبعد : هذام الله لا يلعنك طيب ؟ ضحك وهو يلحقها : يارب آمين ، تعالي بعدّلها لك داخل تتلوث الحين ميّلت شفايفها بحنق وسرعان ما وقفوا الإثنين من شافوا ريِهام وإلين ، ريهام ! قد إيش الإسم غريب بهاللحظة ، من زمان ما لمحوها ولا شافوها ، والحِين بهالحُلة قدامهم ، كانت مغيّرة كل شكلها ، شعرها بُوي لونه بُني غامق ، ولبسها فُستان أسود عادي بدون تكلّف ، نحِفت عن قبل كثير والواضح إنها حامل من بروز بطنها الخفيف ~ إبتسمت لهم بشحوب بدون لا تتكلم وهي تمشي بعيد مع إلين ، رفعت أنظارها له بإستغراب وهو بالمثل ، تراود لـ باله آخر حوار جادّ صار بينه وبينها ، وقت صرخ فيها " لا تدقيّن الشرف على راسي أنا مو أسامة " ، ما قالها من فراغ الإّ إنه فتش بماضيها وعرف عنها أسرار كثيرة ، أبسطها كان أبوها الظالم ، يلي زوجّها لـ واحد من أصحابه لكنه ما لمِسها أبداً إنّما إعتدى عليها ولده ، واللي طلّعها من قبضة هالولد الظالم اللي إستباح حرم أبوه كان الولد الثاني واللي لقى حتفه لأنه أنقذها من أخوه يلي مدمن تماماً وبدرب الممنوعات تايه ~ دخل هذام عند هالولد كأنه سجين وحاول يسحبه بالحكي عن ريهام ، وعن ابوه ، كان يقول له إنها هي تغويه وتبيّه يقربّها وللحين ما يدري هو صادق ولا يكذب ، لكن يلي يعرفه إنه يحس بالذنب تجاه كلمته لها " لا تدقين الشرف " ، لكنه مو نادم لأنه ما غلط ،قال حق برأيه ونظره ويمكن أقسى كلمة نطق فيها بحياته كانت هالكلمة لها ~ ضربت صدره من شافته سرح بعيد عنها وهي تدخل للداخل ، خلل إيده بشعره وهو يشوف أم جابر خرجت وفهمّها إنه لازم يصعد لها وبالفعل شافت له الطريق ~ _ « طـريق آخـر » ميّـلت شفايفها بإستغراب وهي لأول مره تمشي لهالصُوب من المزرعة ، وأول مره تشوفه أصلاً ، المفروض إنها تتراجع لكنه تجرأت وهي تمشي بدون تردد ~ دندنت بخفيف من شافت بيت صغير لكن أدواره متعددة وهي تفكّر بداخلها " أحاكي حاكم ؟ ولا أدرعم لحالي ؟" قربّت من عند الباب خطوتين وسرعان ما صرخت بذهول من إرتمى شخص قدامها ، الواضح إنه إنرمى رميّ بهالشكل ~ ، كان يمشي ووِقفت كل ملامحه من سمع صرختها وهو يركض تجاهها ، مسكها مباشرة بذهول : ملاذ ! أشرت ع الباب قدامها وسرعان ما لف أنظاره بذهول وهو يشوف باسل المرمي ع الأرض يحاول يوقف على رجوله : باسل ! خرج سيف من هالبيت ، وخلفه أصايل اللي شافت ملاذ وراحت تركض لها مباشرة بعدم إهتمام لحاكم يلي ما لمحها أصلاً ~ إحتدت ملامح حاكم مباشرة وهو يناظرهم : وش صاير هنا ! ضحك سيف بشبه سخرية : يحاول يدنّس العرض والشرف ، ترضاها يا فريق ؟ ميّل حاكم شفايفه مباشرة وسرعان ما جمِدت ملامحه بـ أكملها : والبنت ؟ إرتجفت أصايل مباشرة وهي تتمسك بـ ملاذ لأن نبرته كانت حادة فعلاً ~ سيـف وهو يشوف باسل يمسح دم أنفه : بنتنا ميّل حاكم شفايفه بهدوء وهو يحس بـ ملاذ وأصايل لا زالو خلفه : داخل ما فهمت أصايل أبداً بعكس ملاذ اللي سحبتها مباشرة معاها وهم يرجعون للداخل ~ حـاكم بهدوء : بيني وبين باسل كلمة رأس يا سيف ، إذا تسمح لف سيف أنظاره لـ مفاصل إيده يلي صار لونهم أحمر : أنا أخذت حقي ! ، ويا إنت مالك بنت عندنا ! مشى سيف وبعكس باسل يلي إحتدت نظراته تجاه حاكم ، كتّف حاكم إيديه خلف ظهره بهدوء وهو يناظره بنبرة غريبة : وش علاقتك بـ آل خالد يا باسل ؟ ناظره باسل لثواني وحسّ بإرتجاف داخله ما يدري وش سببه : مين آل خالد ؟ لف حاكم أنظاره بهدوء وهو يمررها ع المكان خلفه : إنت لا تراوغني ، ماهو بصالحك موضوعين قدامي باسل وهو يرجع للخلف : ما فهمتك ميّل حاكم شفايفه لثواني وهو يناظره بحدة : كنت بالقهوة وراي ، وسمعت إني رايح لـ آل خالد ووصلت لهم الخبر ، هذا موضوع يقصّ رأسك لحاله ، والموضوع الثاني تعتدي على بنت طرفها يمسّ آل سليمان ، وبـ وسط أرضهم ؟ إنت وش تفكّر ؟