﴾Part (24)﴿
————————————————
بعد أسبوع ونص من الإختبارات والمذاكره والمشاكل والسعاده والحزن والشوق والتعب اللي مروا به شخصيات روايتي، جاء أحلى يوم في حياة ليان وهو يوم خطوبتها وملكتها، ونقدر نقول عنها ملكة فقط، كانوا البنات كلهم في غرفة ليان يجهزونها او بالأصح يتجهزون،ههه، لأنها ما رضت تروح المشغل،وكانوا عبارة عن، فاطمه، وندى، وشيماء، وغيداء، ودعاء، ونسيبه،والعمه ساره اللي اصلا زواجها بعد أسبوع
،،،
ليان اللي خرجت من الحمام: هااا، عميمه جهزتي كل شي، مستعده
ساره الللي كانت بتحط الميك اب لليان قالت بحماس: اييه جاهزه تعالي بسرعه، متحمسه للشكل النهائي
ليان راحت وجلست جمبها: هههه، اوكي يالله بسم الله
شيماء توري البنات يختارون فستان:بنات ألبس هذا وإلا هذا
دعاء: انا اقوول الأزرق
نسيبه: وانا بعد
ندى: لا الذهبي احلى
فاطمه:هههه، انا ما اعرف
شيماء التفتت على غيداء وابتسمت بحب: وانتي غيداء وش تختارين؟
غيداء: أنا أقوول الذهبي، لأنه مناسب لبشرتك، وشكله حلو
شيماء: خلاص بالبس الذهبي
دعاء، ونسيبه بمزح: أخذت برأي غيداء،وفاطمه، واحنا طنشت رأينا
شيماء: ههههه
ليان بمزح: بنات وش ذه قلبتوا غرفتي مشغل
البنات كلهم: يعني نروح
ليان بنفس المزح: عادي
نسيبه: شوفوا شوفوا صارت تتدلع علينا، خلاص بتتزوج حبيب القلب،،،،، وقالت بدلع،،،،،، خلوووودي
ليان بمصخره: أقوول لا أحد ينطق اسم خلووودي غيري فاهمه، حتى لو هو أخوك
نسيبه: خلاص خلاص هدي هدي، وبعدين سلام انا بنزل لعند امي منتظره لها ساعه، والله بتصيح علي
ليان: هههه،اوكي
ساره بعصبيه: لياااان لا تتحركين واجد، خليني اركز بتخربين الميك اب
ليان:هههه، سوري عميمه
دعاء بصراخ،والجوال بيدها: بناااات
البنات كلهم التفتوا لها بخوف
ليان: وش في
فاطمه: دعاء هذه الكلمه دايم بطرف لسانك، لازم تخوفينا يعني
ندى: وش صار، ليه كذه مصدومه
دعاء بفرحه وصدمه والجوال بيدها: هههه، النتايج نزلت، وانا جبت94%،مو مصدقه الحمدلله ، لأني ذي السنه ما ذاكرت كويس
ليان بصدمه وتوتر: مرره نزلوا بسرعه، طيب شوفي كم جيت انا
فاطمه بنفس التوتر: وانا
وشيماء وغيداء: واحنا
ساره بمزح: حتى انا، ههههه
دعاء اللي قاعده تبحث، وضحكت وخلت البنات يتوترون: احممم احممم، بسم الله، بالأول عروستنا، جابت، جابتتتتت؟،
ليان بعصبيه وتوتر: دعاء والله بضربك قولي بسرعه
دعاء بجديه: والله ما شاء الله عليك، جبتي 95%، برافوا برافو، رغم توترك على الملكة، شديتي حيلك، وزدتي علي بدرجه، هههه
ليان صرخت بصوت عالي: يااااي الحمدلله،هههه
ساره بمزح:عروسه وهبلأ، وش ذه، ههههه
ليان: ههههه، ترى لساتها ملكه مو عرس
دعاء تكمل: فاطمه97%، شطووووره
فاطمه حضنت ندى من الفرحه، وراحت تتصل على أمها تعلمها
دعاء تكمل:شيوومه، جاتتتت93%، وغيداء 90%، مبروووك
غيداء حضنت شيماء: هههه، مبروك ي عمري، رغم إنه كان همنا العمليه وما ذاكرنا كويس لكن
الحمدلله
فاطمه: الحمدلله ما نزلنا عالتسعين
ليان: اي والله الحمدلله
غيداء: انا متحمسه اعرف العيال كم جابوا
فاطمه: اتصلت على غسان وقال إنه نتايجهم لساتها ما نزلت
ندى بفرحه: إذن يبغا لنا نسوي حفله بعد ملكة ليان
ساره: اقوول اسكتوا، انا جلست اقنع ابوي يسوي السيبرايز حقه بعد ملكة ليان بيومين عشان عرسي يكون ببداية الشهر، يعني تقريبا عرسي بعد أسبوع من الآن، إن شاء الله
فاطمه: ياااي مره حلووو، اليوم ملكة ليان، وبعد يومين بنروح مكان مفاجأه من جدو، وبعد أسبوع زواج عمتووو،،،،،وكملت تبي تنرفز ندى،،،،،، وإن شاء الله بعدها بأسبوعين ملكة ندى وغسان
ندى التفتت عليها بصدمه واستحت، لأنه فعلا يمكن يصير كذا: فطوووم
فاطمه بضحك: ههههه، فديت اللي يستحي ي نااااس
ليان بتفكير، مستنيه لعمتها اللي راحت الحمام: بنااات احس اني استعجلت بالموافقه، مو كأني لساتني صغيره، حتى ثانويه ما خلصت
فاطمه: اقوول اسكتي،ترى لساتها ملكه مو زواج، وبعدين انتي بتخلصين دراسه وبعدها تتزوجين
،،،،
وضلووا البنات يسولفون ويتجهزون ويلبسون، وبعد آذان العشاء نزلوا يشوفون الضيوف وصلوا، ما كانوا كثيير بس عباره عن الأقارب والصديقات فقط، وطبعا الملكة كانت بالبيت لأنه هذا كان طلب ليان، وقبل ما أبدأ بالتفاصيل، خلوني اشرح لكم باختصار كيف كان شكل البنات
،،،
ندى/كانت لابسه فستان بنفسجي موووف طويل ماسك على جسمها، ومفتوح من عند الركبه اليمنى لتحت، وكان ماسك من تحت الأكتاف، يعني ما كان فيه أكمام او مسكات، كان ماسك عليها بثبات،وكانت مسرحه شعرها عادي بحكم إنه قصير إلين رقبتها خلت له حريته، وغرتها اللي مثل الكوريات خلتها جميله بمعني الكلمه، ومكياجها كان عادي مرره، وخفيف ومناسب لشكلها وفستانها، وكانت جميله وبريئه مرره، وشكلها يوحي بأنها بعمر ال،15مو18
،
غيداء:كانت لابسه فستان فيروزي، قصير إلين الركبه، ماسك من الصدر والخصر، ومرتاح من تحت،وتسريحة شعرها عباره عن كعكه، وغرتها مرفوعه ما خرجت منها إلا جزء بسيط من الجهتين، ومكياجها كان ثقيل نوعا ما، لأنه يناسبها الثقيل
،
دعاء:كانت لابسه فستان أزرق بلون السماء،هادي وناعم، وطويل وماسك على الجسم،عاري الأكتاف بدون أكمام، ومكياجها ثقيل،وشعرها مسدح على ضهرها تاركه له أريحيته، وغرتها متماسكه مع تسريحه شعرها اللي كان مقصوص على شكل مدرج
،
شيماء: كانت لابسه فستان ذهبي،متناسق جدا مع لون بشرتها،وقصير إلين الركبه، وكان ماسك من الخصر ومرتاح من تحت، يشبه فستان غيداء يختلف في اللون فقط،وتسريحة شعرها عباره عن ذيل حصان، ومكياجها ناعم مررره،
،
فاطمه: كانت لابسه فستان قصير إلين فوق الركبه شوي، وماسك على الجسم، ولونه أحمر، وفيه فصوص خفيفه باللون الأبيض،وكان أجمل فستان خصوصا لونه المناسب لبشرة فاطمه البيضاء، مكياجها ثقيل وطبعا مسويه روج أحمر عشان الفستان، وشعرها المتوسط الطول منسدح ومسرح ويييف
،
نسيبه: كانت لابسه فستان أسود، ماسك من الخصر، ومرتاح من تحت، وفيه فصوص خفيفه باللون الأبيض، وكأنها نجوم في سواد سماء الليل،وكان عاري الأكتاف، ومكياجها ثقيل ويميل للون الأسود، وشعرها مسويته كعكه، وغرتها مسويتها مثل الكوريات، وكان شكلها مثل الممثلات تماما
،
عروستنا ليان:كانت لابسه فستان أحمر فاقع، وماسك على الجسم بقوة،وعلاقات الفستان منسدحه على الأكتاف،ومناسب مرره لبشرتها البيضاء، ومكياجها كان ناعم وخفيف مرره، وروجها أحمر فاقع، وشعرها المتوسط الطول، منسدح على ظهرها وغرتها متناسقه مع تسريحه الشعر
،
العمه ساره: كانت لابسه فستان بني متناسق مع بشرتها الحنطيه، وماسك على جسمها بقوه، وعاري الأكتاف، ومكياجها مسويته بنفسها،وهي طبعا سوت الميك اب لكل البنات، وكان مكياجهت أكثره مايل للبني متناسق مع بشرتها، وشعرها القصير مسرحته ويف ومنسدح، وغرتها برضوا مثل الكوريات(عاد انتوا افهموا كيف شكل غرة الكوريات،شكلها قصيره من الوسط ومن الحزئين اليمين والشمال طويله،)إن شاءالله فهمتوا،
،
أما بالنسبه للأمهات فكانوا لابسات الأغلبيه جلابيات والأغلبيه مخاور والأغلبيه فساتين، والرجال أكيد ثوب وشماغ، ههههه
،،،
البنات كانوا عباره عن: العروسه ليان، وشيماء، وفاطمه وندى، وغيداء، ونسيبه، ودعاء، والعمه ساره، وروان،بعمر19سنه(أخت أنس)،ومها، وريما (بنت خالة ليان)
،،،
الأمهات كانوا عباره عن: أم عمر، وأم غسان، وأم وليد، وأم دعاء،وأم أنس، وأم مها(خالة ليان)، وأم قصي(خالة ليان)، والجده نوره، والجده موضي(أم أم ليان)، والجده هنادي(أم أم أنس)
،،،
والرجال المعروفين هم، أبو عمر، وأبو غسان، وأبو دعاء،وأبو أنس، وأبو مها،وأبو قصي، والجد حاتم،والجد فارس(زوج موضي)، وعمر، ووليد، وغسان، وأنس، وقصي، وما ننسى عريسنا خالد
،،،
والأطفال كانوا عباره عن، شهد، وطارق، وفارس،عمره7،وصفاء عمرها،10(عيال أبو قصي)،وريان، ومروان،، التوأم،بعمر9سنين(عيال أبو أنس)
،،،
في غرفة ليان قاعده، مع عمتها تكمل لها آخر التفاصيل، تنتظر البنات يجون يقولون لها تنزل، وهذا الشيء اللي مخليها متوتره
،،،
ليان بتوتر: عميمه خلاص بكنسل ما ابغى
ساره بحده: وشووله ترى لساتها ملكه مو زواج، عشان كذه لا تخافين الزفه بسيطه والعريس ما بيدخل،،،،،، وغمزت لها،،،،،، انتي اللي راح تروحين للمجلس تقعدين معه،هههه
ليان بتوتر أكثر، مع إنها قد شافته كثير من قبل وقد شافها لكنها متوتره، لأنه اليوم غير: عميييمه لا توتريني
ساره قربت لعندها ومسكت أكتافها: ي عمري لا تتوترين كل شيء تمام، اتونسي وارقصي، واتكلمي معه،ولا تتوترين، تراني مريت بذي المرحله وحافظتها حفظ،،،،،،، وبعدها ضحكت،،،،،، وبالمناسبه لو تبغين نصايح عن الزواج، انتظريني لمن اتزوج، يعني تقريبا شهر، وبرجع اجيب لك كورس مفصل،،،،،، وغمزت لها، ههههه
ليان توترها كل شوي يزيد: عميممه ترى زودتيها
ساره بجديه: ههههه، خلاص هدي ي قلبي، ويالله خذي نفس واستريحي لأنه بيجي الكتاب الحين وبتوقعين
،،،،
نروح لعند الرجال
،،،
الكل في المجلس يسولفون بأنواع السوالف، إللي يسولف عن العمل، وإللي يسولف عن المباراة، وإللي يسولف عن المدرسه والنتايج، وإلخ، إلخ،،
خالد كان قاعد جمب أبو عمر،بثوبه وشماغه وبشته ورزته وكشخته المعروفه،وكان متوتر وخايف ما كان يدري إنه بيتوتر كذه، رغم قوته وبروده، صار الحين يرجف من التوتر، بالذات جلوسه بجانب أبو عمر، لأنه ما تكلم من أول جلس، كان بارد أبرد منه، والحمدلله انقطع السكوت، بصوت أبو عمر يردف
،،،
أبو عمر بهدوء: إييه ي خالد، المملك شوي ويجي، جاهز
خالد بنفسه”وش ذه السؤال، بدخل معه حرب ولا وش”قال ببرود وابتسامة توتر: اييه ي عمي
أبو عمر ناظر لعمر وأشر له يجي
عمر جاء: سم يبه
أبو عمر بأمر: روح شوف المملك جاء، دله عالطريق
أنس اللي كان قاعد جمب أبو عمر باليمين،قال بتأكيد: إييوه صح، روح بسرعه
عمر التفت على أنس بحقد، وقال بنفسه”وهذا وش دخله، يسوي نفسه الأخو الكبير، اوفف بس”ورجع التفت لابوه: ابشر يبه
أبو عمر التفت على خالد وقال بهدوء: متى تبغى الزواج، لأنه ترى بنتي شرطها تكمل دراستها
خالد كشر حواجبه، ورد بثقه: عادي ي عم يصير تكمل دراستها عندي
أبو عمر يصرفه: أنا مالي دخل، كلمها انت واتفاهموا
خالد هز راسه وقال بهدوء: إن شاء الله
وبعدها التفتوا للمملك إللي جاء مع عمر، وبدأ السكوت يعم، وبدأ المملك كلامه، وأنهاه بجملته الشهيره(بارك الله لكما وبارك عليكما وجمع بينكما على خير)، وبعدها الكل قام يسلم على خالد وأبو عمر،
،،،
عمر يسلم على خالد: مبرووك ي الصهيير، ما أوصييك على دلوعتنا
خالد بابتسامه: الله يبارك فيك،دلوعتكم بعيوني
قصي يسلم على خالد: مبروووك ي ولد الخاله، جعله زواج العمر يارب
خالد بنفس الإبتسامه: الله يبارك فيك، إن شاء الله
وبعدها الكل سلموا، وأتى دور أبو عمر يسلم على خالد،وضغط على كفه بقوه: مبرووك ي وليدي، ما اوصيك عليها، تراها صغيره ومكانتها عندنا كبيره، لا تغير هذه المكانه حتى عندك
خالد ابتسم: ابشر ي عم، مكانها إن شاء الله بقلبي
أبو عمر ابتسم: يالله تعال للمجلس عشان تشوفها
خالد راح معه وجلس فوق الكنبه ينتظر، أبو عمر يجي مع ليان، وكاان متوتر حييل وكأنه أول مره يشوفها، وما ينكر إنه كان متحمس لشكلها
،،،
بنفس البيت، نروح عند ليان
،
دخلوا البنات كلهم لعندها، وهم يغطرفون ويصفرون، يبشرونها إنه الكتاب جاء، وفعلا جاء أبوها وناولها الكتاب توقع، ووقعت بتوتر وعدم تصديق بأنها بتصير زوجة الشخص اللي تحبه، وبعدها غطرفوا البنات بقوه وصراخ وفرحه،
،،،
ليان قاعده،والبنات يرتبون شكلها ويتأكدون إنه كل شي تمام: بناات أحس نفسي متوتره مررره وخايفه ما ابغى انزل
ساره بعصبيه: وبعديين معاك ترى الموضوع مو لعبه
نسيبه اللي قاعده ترتبت شعره ليان قالت بتأكيد: اييه صح،،،،،،وغمزت لها،،،،،،،، وبعدين لا تتوترين الحين، اتوتري لمن تدخلين عند خالد
ليان ضربتها على كتفها بخفه وضحكت بخجل
فاطمه بهوجس: اااااه وانا متى يجي فارس احلامي
ندى تنرفزها: موجود موجود وكمان معروف وقريب
شيماء تكمل:ههه، وبعد جالس بالمجلس
فاطمه حمرت خجل لأنه كان في مها وروان وريما، وساره وما كانوا متعودين على ذي السوالف معهم، قالت بحده: استحوا على وجيهكم
ندى وشيماء: ههههه
وقطع حديثهم صوت الباب يطق وكانت أم ليان تأمرهم ينزلون
نزلت ليان بهدوء وخجل وجمال، وكانوا البنات ينتظرونها بنهاية الدرج وعمتها ساره جمبها تمسكها بشويش احتياط لو تطيح من التوتر، ههههه، نزلت على صوت زفه ملكه باسمها،وكانت بكل درجه تنزلها تحس بقلبها راح يطيح، وبالذات لمن رفعت راسها وشافت البنات يصفقون ويتبسومون لها ويصفرون والأمهات قاعدات يصفقون، وملتفتات عليها، وأخيرا وصلت لآخر درجة، أول مره تحس بأنه درج بيتهم كثير، وانزفت زفة ملكة خفيفه عاديه بفستانها الأحمر، للكوشه البيضاء الصغيره في المجلس،وراحت ام خالد تلبسها الشبكه،وبعدها راحوا الكل يسلمون عليها، لكن في سلام واحد ما عجب ليان، وزرع فيها الشك والخوف والريبه،
،،،
مها بحقد وغيره، شدت على كف ليان بقوه: مبروك ي بنت الخاله عساكي ما تتهنين، هو صح كان المفروض إللي بمكانك وحده ثانيه بس خالد السبب، اختار وحده عاديه مثلك
ليان باستفهام وغرابه وخوف، كانت تحسب انهاا تتوهم، ما صدقت إنه هذه مها بنت خالتها، لييه ما تبغاها تتهنى وتجرحها بالكلام، ردت عليها باستفهام:وش قصدك
مها ما ردت عليها، رجعت لوراء بابتسامة سخريه،وحقد، تسمع أم عمر تقول لليان تدخل عند خالد
،،،
وفعلا دخلت ليان واستبدل تعجبهاواستغرابها،لتوتر وخوف من سمعت صوته يتكلم مع أبوها قبل ما تفتح الباب تدخل،دزتها أمها بمعني تدخل،ودخلت مع أمها،وشافته يبتسم لها، شافت الشخص اللي حبته من طفولتها واللي للحين تحبه شافت الشخص اللي يأثر فيها، وينرفزها ويضحكها بنفس الوقت، شافته برزته وملامحه اللي تجذبها، وسماره اللي يعذبها من جماله، تقدمت بهدوء وخجل تجلس بكنبه قريبه منه، وقد ما تحاول ترفع راسها، وسمعت ابوها يقول بمزح: ههه، تقدمي شوي وانا ابوك، لييه كذه خايفه تراه ما يآكل بشر
راحت جلست بالكنبه الطويله قريب منه، والتفتت له كان يضحك، وعرفت إنه يضحك على هدوئها لأنه كان يعرف لسانها الطويل ودلعها، وصحت من تفكيرها على صوت أمها تقول
،
أم عمر قامت وقام معها أبو عمر: يالله إحنا نستأذن، خليكم على راحتكم
أبو عمر بمزح: عشر دقايق واجي
خالد رفع حواجبه بصدمه، وليان ساكته على خجلها
أم عمر تكمل المزح: هههه، وشوووله ي أبو عمر عشر، خليها ربع ساعه
ليان بحده: يمممه
أم عمر تقدمت لعند الباب: خلاص خلاص نمزح يالله، خذوا راحتكم،،،،،، وراحوا وسكروا الباب
عم السكوت في المجلس وما كان في إلا صوت الأغاني الخفيف المنبعثه من مجلس الحريم، قطع السكوت خالد يقول
،،،
خالد بابتسامه: مبروووك علينا ي ليان
ليان بخجل منزله راسها: الله يبارك فيك
خالد مسك دقنها ورفع راسها: ما اصدق إنك ليان الأولى أم لسانين
ليان التفتت له بصدمه، وقالت بعصبيه خفيفه: وشو ام لسانين، ترى انا هاديه وعاقله وانت تعرفني
خالد هز راسه بضحكه: هههه، ايه ايه، والتفت لها برومانسيه ومسك خصرها وقربها منه، وقال: صح إني أعرفك بس اليوم جهلتك من جمالك، طالعه تطيرين العقل، وبالذات عقلي
ليان بخجل من قربه:هههه، انا جميله دايم، واكيد اليوم بصير اجمل دامني صرت زوجتك
خالد عجبه ردها، قرب من وجهها بهدوء وبرود اربك ليان:طيب دامك تدرين انك لمن تجتمعين معي تصيرين اجمل، لييه ما خففتي من مكياجك الهالك عشان ما تهلكيني فيك
ليان توترت من قربه الزايد، ونظراته اللي على شفايفها، قالت بخجل تبغى ترجع شوي: خاالد، فكني مو حلو يجي احد يشوفنا كذه
خالد قرب أكثر وقال بهدوء: والله مو حرام حلالي وبكيفي، اسوي اللي ابغى
ليان بحده: طيب ما قلنا شي بس مو الحين
خالد ينرفزها: طيب متى
ليان بحده: خااالد
خالد قرب منها وباسها من شفايفها بخفه، وبعدها بعد:عيوون خالد
ليان فاتحه عيونها بصدمه مو مصدقه إللي صار، قالت بخجل وعصبيه: خااالد وش سويت
خالد بثقه وبرود:ههههه، بوسه، وبعدين أنا ما اتحمل اللون الأحمر الصراحه، انتي السبب لبستي أحمر وسويتي روج أحمر، وانتي تدرين إني أحبه فيك، وبعدين عادي هذه المره جات في الروج،،،،،،، والتفت على الفستان من فوق لتحت، وضحك بمكر،،،،،،، المره الثانيه بالفستان
ليان فتحت عيونها بصدمه من كلامه وعصبت: قسم انك قليل ادب
خالد بحده: عيدي اللي قولتيه
ليان بلدلع: لييه، وش بيصير
خالد بحده: عيدي وجربي حظك
ليان خافت وعارفه إنه ما بيمشيها لها، سكتت وقالت برومانسية، تشووف ردة فعله: خلوووودي فكني ما يصير نقعد كذه، يكفي
خالد التفت لها بضحكه: هههه، ما احب أحد ينادي كذا الا انتي بلسانك يصير عسل، ناويه تهلكيني اليوم، ترى والله شكلي بقدم الزواج
ليان بخوف: لاااا بلييز احنا اتفقنا يصير بعد سنه، عبال ما اخلص الثانويه
خالد بحده وبرود ومزح: بس انا ابغاه الشهر الجاي
ليان بخوف ابتعدت من حضنه وقامت من على الكنبه وقالت بعصبيه: لاااا بالله مو على كيفك ترى أنا لي رأي كمان وهذا شرط من شروطي
خالد ضحك من حركاتها وعصبيتها: ههههه، طيب أنا راضي يصير بعد سنه بس بشرط،،،،،،، ومد يده يجلسها عالكنبه
ليان مسكت يده تجلس عالكنبه وقالت بعصبيه: وشووو
خالد ضحك بمكر، وقرب منها يمسكها من خصرها مره ثانيه، وأشر على شفايفه بدون اي كلمه
ليان فهمت وبققت عيونها، وضربته من صدره: اقوول انت ما تستحي، ترى لساتنا مملكين، احلم اسوي كذه، بعدين وش ذه الخفه؟ اثقل اشوي تراني احب الرجال الثقيل
خالد بهدوء: خلاص زواج السنه الجايه مافي، بيصير الشهر الجاي يعني الشهر الجاي
ليان بتوتر وزعل واشوي وتبكي: خااالد والله ما يصير كذه، حراام عليك، ما اقدر اسويها
خالد ضحك من ردها:هههه،طيب اسويها أنا
ليان بحده: خااالد لييه قليل أدب كذه
خالد بابتسامه:أولا لا تقعدين تعيدين كلمة قليل أدب،وبعدين ترى شخصيتي هذه ما تطلع إلا معك
ليان بتهديد قربت من وجهه وبدلع وتتمايل بجسدها: احلم حتى تخرج شخصيتك ذي مع غيري، هذه الشخصيه لي أنا وحدي، فاهم
خالد هز راسه بهدوء وقرب من وجهها أكثر وطبع جبينه على جبينها وغمض عيونه وقال بحب يكرر نفس سؤاله اللي ضل يسألها أسبوعين عليه ويبغى جواب له، هو عارف الجواب بس يبغى يسمعه منها:ههه،ي غيوره، لساتك تحبيني؟
ليان استغربت من سؤاله اللي يتكرر دايم وللحين ما عطيته جواب، مع انها عارفه انه يعرف الجواب، توترت من قربه وارتخت ملامحها معه وغمضت عيونها هي بعد،ونسوا انه ممكن يدخل احد وقالت بهدوء: ولييه مهتم تعرف الجواب مع إنك عارف فيه؟
خالد بحده: لييه تجاوبين السؤال بسؤال.؟ترى ما يعجبني
ليان تنرفزه،: أحب أعاندك في الشيء اللي ما يعجبك
خالد قرب من شفايفها وطبع قبله، لكن هذه المره كانت أكبر لدرجه إنه انطبع الروج على شفايفه، وبعد ما خلص قال بهدوء وثقه وابتسامه تحت نظرات ليان المصدومه: وهذي نتيجة عنادك، انا قايل لك من زمان لا تعاندين لأنه ما بيعجبك اللي بيصير لك،والبوسه الأولى كانت حقت عناد المره الأوله في المكتب، وهذه البوسه حق عناد هذه المره، ولو زدتي عنادك بتشوفين شي أكبر
ليان بصدمه بعدته عنها وراحت للمرايا تشوف نفسها تتأكد لو في خربطه في الروج،وبعدها أخذت منديل وقربت من عند خالد تمسح شفايفه اللي صار لونها أحمر من روجها:الله يآخذ قلة أدبك هذي،وش ذه اتجننت ولا وش
خالد بهدوء يتأملها وهي تمسح شفايفه: ايوه اتجننت، اتجننت بحبك
ليان التفتت. له بحب: خااالد بس، رومانسيه، أخاف لو تآخذني اليوم بيتكم من شدة الحب
خالد بابتسامه: والله ما امانع، بالعكس بتسعديني بهالشيء
ليان تذكرت وقالت بزعل وعصبيه: لييه ما جيت لبستني انت الشبكه
خالد: تبغيني اتمادى قدامهم، وانتي عارفه اني ما قدرت اصبر هنا كيف امامهم، وبعدين انتي عارفه إني ما أحب أدخل لمكان فييه حريم
ليان حست إنه صح لأنه هي أساسا ما ودها تدخل ويشوفونه الحريم، قالت بدلع: ياااي حبيبي فدييتك، ابغاك كذه دايم تحبني انا وبس
خالد مسك انفها بحنيه وحركه حركه بسيطه: ابشري ي البخيله، بعدين لييه كذه كلمة حبيبي حلوه على لسانك
ليان بدلع:كل الكلام بلساني عسل
،
انقطع حديثم على صوت الباب ينفتح ودخل عمر بثقه، وضحكه وقال بمزح: اقوول بلا قلة ادب انت وهي بس يكفيكم، معاكم من اول نص ساعه وزود ولساتها ما كفتكم
ليان رمت الفاين للزباله وقالت بعصبيه: ترى في شي اسمه استئذان قبل ما تدخل الباب
عمر بعربجيه: لييه خايفين ادخل عليكم بوضعية غلط،،،،، وغمز لخالد بضحكه
خالد: ههههه، اقوول اسكت بس وانقلع دقايق واجي
عمر هز راسه وقال بتهديد يمزح: ترى خمس دقايق وارجع،،،، وراح
خالد قرب من ليان وعطاها كيس هديه: اتفضلي، هذه هدية الملكه
ليان بحب واحراج اخذتها منه: شكرااا، لييه تعبت حالك
خالد: هدية بسيطه وإن شاء الله تعجبك
ليان تركت الهديه فوق الكنبه واتقدمت لعنده وحضنته حضن مفاجىء ملياان بالحب وقالت بحب:الله يخليك لي دايم
خالد بادلها الحضن منصدم من حركتها المفاجئه وابتسم:آميين،وش سر ذه الحضن المفاجىء
ليان التفتت لوجهه: عباره عن شكر مقابل الهديه
خالد ضحك بمكر:هههه، اوكي بالملكه حضن، إن شاء الله بعد الزواج نتطور شوي
ليان فهمت قصده وضربته من عند كتفه بشويش،:استحي على وجهك، يالله انا بروح، اخاف عمر يسويها صدق ويجي يهددنا مره ثانيه
خالد قرب منها:احممم،بوسه قبل ما تروحين
ليان بحده: خالد وش ذه اتعودت ولا وشوو، اصبر إللين الزواج
خالد ببرود:ومين ما يتعود على قربك؟، وبعدين وش يصبرني للزواج
ليان قربت من وجهه وباسته من خده بنعومه،وبعدها بعدت:خلاص اعتقد يكفيك ذه تصبر سنه
خالد ابتسم وباسها من خدودها هي كمان وقال بحب: عشانك تبغين، بسوي اللي تبغين، وبانتظر سنه
ليان ابتسمت بحب: يالله سلام
خالد: لا تنسين تكلميني، رقمي معك صح؟
ليان هزت راسه: إييه أخذته من نسيبه
خالد بحب: يالله، الله معك، ولا تنسين إقري على نفسك كل شوي
ليان هزت راسها، وابتسمت من حبه وحنيته عليها، الزايدين فيه، ما اتوقعت ولا واحد بالميه إن بيحبها يوم من الأيام وبيبادلها نفس الشعور، وبيتزوجها بعد، وهاقد تحقق الحلم اليوم، لكن لا ندري ما تخبأ الأيام الجايه لأبطال روايتنا،،،، ليان،ودعته وراحت لمجلس الحريم، وهو بعد راح لمجلس الرجال
،،،
دخلت للمجلس، وأول ما شافوها البنات، قفزوا لعندها بسرعه وكل وحده تسأل بحب وإحراج واستفهام وعربجيه
،،،
نسيبه بعربجيه: الللله وأكبر وش ذه صرتي طماطه بلدي من الإحراج
البنات كلهم ضحكوا عليها، وأردفت بعدها فاطمه تقول بمصخره: والله شكلكم ارتحتوا مرره، ساعه يالحيوانه ساعه منتظرين تخرجي، اقوول لو هو زواج وش بيصير، أعتقد ما عاد بتعرفينا
غيداء تكمل: اييه والله رجولي صاروا يوجعوني من الرقص، من أول أرقص منتظره تخرجين
شيماء: هههه، حتى انا والله،، اساسا ما اتوقعت تخرج كنت احسبها بتروح معه البيت على ذه التأخير
ليان بحده: اقوول اسكتوا انتي واياها، ترى مالي إلا أربعين دقيقه، وبعدين وش فيكم علي هدوا هدوا، نشوف ان شاء الله ملكتكم انتوا
دعاء ضربتها من كتفها بشويش: اييه وش قال خالد، عجبتيه صح
ليان بدلع: أكيد عجبته،أنا أعجب الكل
نسيبه: والله البنت واثقه
ندى بحماس: بنات قوموا خلونا نرقص
ليان تسوي نفسها مستحيه واتكلمت بحركات خجل: لااا عيب انا صرت انسانه متزوجه،بعدين اليوم ملكتي ما يصير ارقص بيضحكون علي
نسيبه قربت منها ومسكت ذراعها وقومتها غصب عنها: اقوول قومي بلا حياء متصنع، وبعدين من قالك إنه من تزوج عقل، ترى انا بالذات اشوف من تزوج جنن، وازداد هبال
فاطمه بتأكيد: اي والله حتى انا
غيداء وشيماء: الله يشفيكم
فاطمه بهمس وتهدد ما يشوفون او يأشرون للمكان: بنات شوفوا لكن لا تلتفتوا او تأشروا، مها وريما ملتفتين علينا من اول شوي ويأكلونا
دعاء بهبال أشرت بيدها لعندهم باستفهام تتبغى تتأكد: ميين؟ هذوك، صح؟
فاطمه نقزت لها تنزل يدها وتضربها بشويش وعصبيه: ي حيوانه، مو انا قايله لا تأشرين
دعاء ببراءه: هههه، اسفه والله نسيت
ليان كشرت حواجبها لمن تذكرت مها وتبريكها اللي كان عباره عن تهديد، وصحت من تفكيرها على صوت فاطمه تناديها تقوم ترقص معهم، وفعلا قامت وصاروا يرقصون ويتمايلون على صوت حسين بأغنية:{فرس فرس من حسنها الحسن انخرس،تتزاحم قلوب البشر بقبالها}
وكل وحده تستهبل مع الثانيه
،،،
عند الحريم
،،،
أم خالد بحب تكلم ام عمر،وكانت ملتفته لليان : بسم الله عليها تجنن، ما غلط خالد يوم اختارها
أم عمر بمزح: أكيد دامها بنتي
أم خالد: هههه، أكيد، أكيد
أم عمر: سبحان الله صار كل شي فجأه، النصيب عجيب وغلاب
أم خالد: إي والله ماصدقت يوم خالد جاء يقولي يبغى ملكه مع زواج، استغربت وفرحت بنفس الوقت، أبغى أشوف أولاده قبل ما يآخذ الله روحي
أم عمر تهديها:لا تخافين ي أم خالد، إن شاء الله ما يصير إلا كل خير، وأحفادك إن شاء الله بيملون بيتك، من خالد ومن نسيبه، وبعدين فال الله ولا فالك وش ذا الكلام
أم خالد بتنهيده: إن شاء الله ي خيتي، الله يسمع منك
،،،
بجهة ثانية بالمجلس
،،،
أم مها تكلم أم قصي: إييه سبحان الله النصيب غلاب
أم قصي: اي والله، إلاا اقولك مها مازعلت
أم مها: زعلت شوي، مسكينه كانت متأمله بكلام أم خالد، وكانت تحسب بأنها بتخطبها جد لكن خالد يبغى ليان، وهذا نصيب ومافي حد معترض
أم قصي ملتفته لعند البنات وهم يرقصون: اي والله وانتي صادقه،،، إلا شوفي ذيك إللي لابسه أسود، نسيبه صح
أم مها بحب: ايووه، ما شاء الله عليها تجنن
أم قصي بابتسامه: والله نفسي أخطبها لقصي،أحبها حييل
أم مها: كلمي أم خالد إنك تبغينها
أم قصي: خيير إن شاء الله، خليها بعد الملكه بفتره، وبشوف قصي وش بيقول
أم مها قامت: خلينا نروح لعند أم خالد وأم عمر
أم قصي قامت: يالله
،،،
أم أنس باستفهام تكلم أم عمر،وتأشر على دعاء: إلا ي أم عمر،هذيك مين؟
أم عمر التفتت لدعاء: هذيك دعاء صديقة ليان
أم أنس بنفس الإستفهام: وش رايك فيها؟
أم عمر بضحكه: ههههه، ليكون ودك تخطبينها ل أنس
أم أنس بضحكه: هههه، اي والله دخلت في نفسي
أم عمر: ههه، والله البنت تجنن وتمام،ولساتها سنجل، وحتى لساتها جات هذا الشهر تسكن هنا بالرياض،،،،،،، وأشرت لأمها،،،،،، وهذيك أمها شوفيها
أم أنس التفتت ل أم دعاء: واااي ما شاء الله نسخه منها
أم عمر: ايووه ما شاء الله يشبهون بعض مررره
أم أنس: عندك رقم امها
أم عمر هزت راسها: اييه
أم أنس: جيبيه
أم عمر جابته لها، وكملت سوالف مع خواتها وصديقاتها
،،،
بجهة ثانيه بالمجلس، عند العجاوز
،،،
الجده نوره التفتت لموضي: هااا ي موضي أخبار مرضك عساكي تحسنتي
الجده موضي: الحمدلله ي خيتي اتحسنت مع العلاج مرره، ولساتني رحت هذا الشهر العوده وصرف لي علاج، وقال إنه يمكن آخر علاج أستخدمه
الجده نوره ابتسمت: إن شاء الله، وانتي انتبهي على نفسك بعد، ولا تتحركين واجد
الجده موضي ربتت على فخذ الجده نوره: إن شاء الله ي خيتي، إن شاء الله
الجده هنادي قامت:خلونا نروح لعند الحريم،،،،وقاموا
،،،
عند البنات
،،،
كملوا رقص، وراحوا يجلسون بالكنب يرتاحون
،،،
ساره جات معصبه: ي حيوانا ترقصون بدوني
ليان:عميمه وين كنتي، نسيتك
ساره تمثل الصدمه: تنسيني ي كلبه
ليان: هههه، طيب وين كنتي
ساره بدلع: كنت أكلم زوجي حبيب قلبي
فاطمه بمزح: اقوول عميمه وكيف لك ما جيتي طماطه
نسيبه ضحكت وضربت كفها بكف فاطمه: ههههه، يمكن لأنه مو مباشر مثل ليان
البنات كلهم ضحكوا عليهم، وكملوا سوالف وضحك، ورقص
دعاء شافت جوالها يرن،لأنه أبوها يتصل، أخذت الجوال وأشرت للبنات بأنها بتروح تكلم، وخرجت للصاله وكان صوت الأغاني عالي، وفتحت المكالمه، وما فهمت شي من عصبية أبوها لأنه كان يسمع صوت الأغاني وما يسمعها، خافت لو يكون شي مهم ويرجع يعصب عليها، خرجت من باب المجلس للحوش بحكم إنه مافي أحد ومجلس الرجال بعيد،وحتى مالبست طرحه من شدة خوفها من عصبية ابوها،
واتقدمت لعند المسبح تحاول تبتعد عن صوت الأغاني العالي،ورجعت تتصل على أبوها تكلمه
،،،
عند الرجال
،،،
كانوا يسولفون وكل واحد عنده سالفه،وأبو عمر التفتت لأنس اللي قاعد بيمينه،وقال بأمر:أنس روح وأنا أبوك شوف أبو عامر جاء دلة على الطريق لأنه أول مره يجي،تعرفه صح
أنس هز راسه:اييه يبه(كان يناديه يبه مثل ما يناديه ي ابني،ويعتبره ابوه بالدم أكثر من أبوه كزوج أم من الرضاعه) اعرفه،وابشر بروح الحين،،وراح
،
مشى أنس للحوش،وبحكم إنه يعرف البيت كان يمشي بثقه،وتقدم من عند نص الحوش يبي يعدي عشان يروح لعند الباب،وارتخت ملامحه لمن شاف وحده قاعده تكلم بالجوال معطيته ظهرها،ملتفته على المسبح، بفستانها الأزرق السماوي،وشعرها المتطاير مع الهواء،وحركات يدها تدل على إنها تحاول تترجى شخص،خجج عليها ونسى نفسه،صحى على نفسه والتفت يبي يشوف مخرج بحكم إنه منطقه المسبح منطقه هاديه ومنعزله شوي عن الأبواب والشبابيك،تقدم بهدوء يبي يروح بدون ما تشوفه،وقبل ما يمشي حتى خطوتين سمع صوتها تسكر المكالمه، وتقول بخوف،(يمممه،بسم الله،من انت)،التفت لها بصدمه،وشاف وجهها وانصدم،وقال بصدمه واستفهام:انتيييي
دعاءبنفس الصدمه ونست شكلها:انتتتت،بس كيف،وويش جابك هنا
أنس تقدم لها بعصبيه ونسى الإحراج :بالأول انتي وش جابك هنا
دعاء بنفس العصبيه:بيت أبوك وأنا ما أدري
أنس تكتف بثقه:إيي والله بيت أبوي وملك ابوي
دعاء باستفهام:ليييه وش يقربون لك
أنس عطاها نظره وقال بحده:وش دخلك
دعاء نست إنها مو متغطيه،قربت أكثر:من أنت
أنس بهدوءبدون ما يناظر لها:أنس
دعاءبنرفزه:أدري إنك أنس،بس أبغى أعرف وش تقرب لهذه العايله
أنس شاف جواله إنه أبو عمر يتصل،رد عليه وقبل ما يروح قال بهدوء وبرد مختصر:أنا أخو ليان من الرضاعه،،،،،وراح بدون أي كلمه زايده،ودعاء ضلت تفكر واتذكرت إنه فعلا ليان معها أخ من الرضاعه وما قد شافته أبدا،واستوعبت إنه هذا نفس الشخص اللي كان يوصلها للمدرسه من قبل في جده،وهو أخ ليان من الرضاعه إللي يشتغل مع أبوها،واتذكرت إنه شاف شكلها كذا واستحت،بعدها راحت تكلم أمها إنه أبوها قال يروحون،وزعلت لأنه ما رضي يخليها تنام الليله
،
وانتهت الملكه الحلوه بحمد الله، وبعد مساعدة الكل ماعدا ليان لأنها عباره عن عروسه،،تم ترتيب البيت وبعدها راح الكل بيته وغرفته ينامون، وكل واحد يفكر ببكره
————————————————
🌼
وبكذا انتهى البارت الرابع والعشرون
🌼
سبحان الله، الحمدلله، لا إله إلا الله، الله أكبر، لاحول ولا قوة إلا بالله، اللهم صلي على نبينا محمد