بعد ما تبادلنا نفس الشعور * وما فرقنا غير الحسد والغيره - ﴾Part (19)﴿ - بقلم الغامضه | روايتك

في بيت أبو خالد، الساعه:9م ،،، خالد قاعد في مكتبه يراجع الأوراق ودق الباب ،،، خالد: اتفضل أم خالد دخلت معها القهوه وجلست على الكرسي أمام خالد:هاا ي وليدي عسى الشغل معاك زين خالد بابتسامه: زين ي الغاليه زين أم خالد سكتت:..... ١ خالد عرف إنه جيتها هذي، يعني إنها تبغى تقول شي، وابتسم بشويش: قولي ي أمي قولي أم خالد التفتت له باحراج وانصدمت انه عرفها من نظراتها: هههه، والله ي وليدي قلبي مضايقني من ذه الموضوع وابغاك تريحني خالد عرف إنه قصدها الخطوبه، وعقد حواجبه لأنه كان فرحان بسكوتها ذي الفتره على الموضوع، والحين هذاهي رجعت وقال ببرود ونظراته على الأوراق: خير يمه خير أم خالد بحده: ي وليدي ادري انه خير، لكن انت مو راضي تخليه خير بتأخرك ذا خالد ولساته يناظر للأوراق نطق ببرود ويرشف من القهوه: كل تأخيره وراها خيره أم خالد بحسره: لمتى بتضل كذا خالد بهدوء التفت لها: لين ربي يكتبها لي أم خالد بغضب: خالد وبعدين معاك، لمتى بنضل نتكلم بذا الموضوع، تراني كلمت خالتك أم مها إنه نبعى نخطب مها، وقلت لها يردوا لنا خبر خالد بصدمه وغضب وبحده رفع ظهره عن الكرسي: تتكلمين جد أم خالد طبعا كانت تكذب، وأساسا لو فعلتها تدري إنه خالد بيعصب مررره وما بيرضى بشي هو ما طلبه، ولكنها حبت تجرب حظها تشوف وش بيقول، مع إنها خايفه من ردت فعله، تكتفت وقالت تسوي نفسها معصبه: إييه كلمتهم ويومين ويردوا لنا خبر خالد نثر الأوراق قدامه وقام من على الكرسي بغضب وقال:خلاص اتزوجوها انتم، انى ما ابغاها أم خالد قامت تتقدم نحوه تطبطب على كتفه:إهدأ وأنا أمك إهدأ، كنت أمزح معك خالد رجع يقعد على الكرسي واتنرفز من المزحه البايخه والمخيفه وقال ببرود: يمه وش ذا المزح اللي ما احبه، ما حد يمزح بكذا مواضيع أم خالد تنهدت وقالت بحسره،ومسكت كتفه: طيب ي وليدي ليه ما تجيب لي حل ونهاية لذا الموضوع خالد مسك يدينها وقال بتسليك،لأنه يكره الزواج وطاريه: يمه صبرك علي، قريب إن شاء الله، خليني افكر يومين ثلاثه أم خالد رجعت لكرسيها: يوووه منك، آخر مره قلت بفكر يومين وصارت أسبوعين بدل اليومين، وياليتك رديت لي خبر، ضليت تسلك لي مثل كل مره خالد بتعب ونرفزه: يمه الله يخليك ابغى الحين أخلص الملفات ضروري أم خالد قامت: إييه صرفني مثل كل مره خالد كان يبغى يقوم يفهمها، لكنه خايف إنها تتأمل ظل ساكت وما ناظر لهت أم خالد كانت بتروح، وفجأه اتذكرت: اااه صح خالد يمه خالد: هلا أم خالد: بكره ابغاك ترجع بدري، عشان خالتك أم عمر بتجي هي وعيالها خالد هز راسه بهدوء وظل يرشف من فنجانه أم خالد تنهدت وخرجت من المكتب ———————————————— في بيت أبو غسان ،،، أم عمر:والله إنه قصتها تقطع القلب المسيكينه عانت كثير، اااه إن شاء الله ربي يعوضها أم وليد: إييه والله، حتى ماشاء الله عليها حلوه ومزيونه أم غسان ابتسمت: احمم بقولكن شي أم عمر: قولي ي خيتي أم وليد ابتسمت: والله شكله شي مهم، ههه أم غسان هزت راسها: غسان أمس كلمني، وقال يبغى يخطب ويملك على البنت،عشان تدرون الناس وكلامهم ما بيقصرون أم عمر: بالبركه إن شاء الله، بس الولد لساته ما تخرج، والوظيفه وكذا أم وليد: طيب هو يبغاها ولا عشان كذا بس أم غسان: بالنسبه للجامعه، هو قال بيملك سنه ويتوظف بعدها يتزوجها، وإييه الولد حاجج عليها ويحبه، والله إنه أمس يكلمني فرحان ومستانس، ويبغى نستعجل في الملكه، هههه أم وليد: ههه، الله يوفقه إن شاء الله،،،،والتفتت على ام عمر،،،،، عقبال عيالنا ي أم عمر أم عمر:إن شاء الله ،،، وظلوا يسولفون ويسولفون وأكيد سوالفهم ما بتنتهي ———————————————— في بيت أبو عمر ،،، دعاء بحماس: بنااااااات البنات كلهم لفوا لها بصدمه وكل وحده ردت بقول: هلا، وش في، بسم الله، خرعتيني الله ياخذك، قلبي طار دعاء: تدرون إنه أنا من اليوم ورايح بسكن هنا في الرياض،،،، والتفتت على ليان تشوف ردة فعلها ليان بصدمه: احلفي دعاء ضحكت من شكلها: هههه، والله، وابشرك قريب من بيتكم بعد، وحبيت تكون مفآجأه لك ليان قامت وضربتها من الفرحه: ي كلبه والله فرحتي ما تنوصف،،، ونااااسه ي وناااسه،، هههه نسيبه: حلووو بتكونين قريب مننا، بنقدر نكون نجتمع شيماء، غيداء: اي والله وناسه ندى: بنات الفيلم بدأ فاطمه قعدت جنب ندى، وليان قعدت بكنبه فرديه لحالها، وشيماء وغيداء ودعاء ونسيبه قعدوا بكنبه، وعم السكوت والظلام على الغرفه،وبدأ الفيلم الرومانسي إللي عباره عن مسلسل بس حلقات متجمعه، ومدته 4 ساعات،وكان من إختيار ليان لأنها حسته يتناسب مع وضعها، البطله فيه كانت تحب البطل لكن مشاعره تجاهها جامده ومافي أي حب، او مشاعر من ناحية البطل وكان متجاهل وبارد جدا تجاهها، ومرر الوقت لمن صار الفيلم بنصه والبنات كلهم مندمجين ومافي أي صوت، وفجأه ضحكت فاطمه بصوت مكبوت على ندى إللي انهمرت دموعها لمن البطل تزوج غير البطله، والبطله بكت وندى ماقصرت وبكت معها، ههههه، والبنات ضلوا يضحكون على حساسية ندى، إلا ليان لأنها هي بعد كانت دموعها تنزل بدون صوت او حركه منها، دموع مكبوته بقلبها من اياام، ضلت تكابر وتقول ما بتبكي عشان رجال ما يبغاها وما يشوفها الا اخته، لكن الحين اندمجت مع الاجواء وبكت بهدوء وما كان همها لأنه الكنبه لحالها وماحد بيشوفها،،مسحت دموعها تناظر للبنات وحده وحده،، وشافت غيداء منزله راسها على كتف شيماء، ونسيبه لامه ركبها على صدرها ومتمسكه فيهم، وتشاهد بهدوء، وابتسمت لليان اللي التفتت لها، وكأنها عرفه باللي تفكر فيه،وكان طبعا نفس التفكير، اللي هو خالد،، وبعدها ناظرت لندى اللي تبكي وفاطمه اللي قاعده تهديها وتضحك عليها بنفس الوقت، ودعاء اللي قاعده تقضم اضافر يدها من التوتر اللي سواه المشهد،وابتسمت بتنهيده، ماتدري ليه كذا قلبها يحرقها من داخل،لمن تذكر انه يعتبرها كأخت ويعتبر علاقتهم عادية، تذكرت كيف كانت متأمله منه انه يحبها لكنها كانت غلطانه، رجعت تنام على الكنبه وتتغطى من البرد اللي يجي من التكييف المشغل لآخر درجه،وكملت الفيلم وهي كل تفكيرها بخالد، وحبها له وكيف بتقدر تنساه وهل يمكن إنها تنسى حبها الأول العذب النقي، ظلت تهوجس وتروح بعيد بأفكارها ما يقارب النصف ساعه، وفجأه صحت من هواجيسها على صوت البنات يتكلمون، والتفتت للتلفزيون وشافت اغنية الفيلم او المسلسل، وعرفت انه قد انتهى وهي اساسا ما شاهدت الا نصفه والنصف الثاني اخترعت فيلم بافكارها، قامت بسرعه قبل ما يشغلوا البنات الضوء عشان تروح تغسل وجهها، ما تبغاهم يحسون لأنها ما بتسلم من أسألتهم،راحت ورجعت وشافتهم متجمعين ومسويين شكل دائره وبيدهم جوالاتهم ليان باستفهام: وش تسوون؟ نسيبه رئيسة الدائره: ااه جيتي، تعالي اجلسي جنبي بسرعه ندور لعبة صراحه بسرعه ليان: بجي اجلس لكن ما بلعب فاطمه عقدت حواجبها: ليييه إن شاء الله دعاء: كلنا بنلعب ما يصير ما تلعبين ندى: اييه لازم نكون كلنا ولااا نكنسل اللعبه فاطمه هزت راسها: ايووه صح غيداء: بعدين ترى عادي ليان تطمني، اول سؤال باللعبه بيكون،،،،،، ورفعت يدينها تشرح بضحكه(من الذي تحبينه)هههههه شيماء، فاطمه، ندى: هههههه نسيبه: هههه، بذي والله انا معاكي لأنه حتى لومافي سؤال مثل كذا باللعبه، أنا اللي بضيفه، هههه، وغمزت لليان ليان ضربتها بشويش: سؤال سخيف دعاء بحماس انتفضت: بنات ترى اليوم ذه ما بيتعوض، ياحليلنا واحنا مجتمعات كذا، لازم نفل امها، ونجنن قليل ونستهبل كثيرر، هههه صح ولا لا فاطمه تشارك دعاء الحماس، تربعت بجلستها: اييه والله انك صادقه غيداء هزت راسها: أنا أوافقكن الرأي شيماء التفتت لها تضحك: اوخس ي غيداء قلبتي لي لغة عربيه فصحى،،،،، والتفتت تشتت نظرها بين البنات،،،، احم احم والله صدق لازم نستغل هذا اليوم لأنه لا قدر الله ما بيتكرر نسيبه: اييه خلونا نهستر شوي،،،،،، والتفتت على ليان برجاء،،،،،، بليز ليان العبي مافي متعه بدونك البنات كلهم بردود مختلفه: اييه، بسرعه، يالله عاد لا تتدلعين، ليان الوقت يمشي عالفاضي بسرعه، بسرعه ولا بنسحب عليك ليان بدلع متصنع مسكت خصلة شعرها تدورها باصبعها وتضحك بهدوء: اممم، بفكر شوي وبرد لكن خبر دعاء: لا امانه، جينا نخطبك ولا وش نسيبه بحده: اقوول لا تتطنزين انتي ووجهك ترى بنسحب عليك من جد غيداء التفتت لنسيبه: اقوول نسيبه العبي واتركيها تدلع على الماشي ليان التفتت لهم بملل: اوكي خلاص،انتم الواحد ما يقدر يمزح معاكم، خلاص بلعب البنات كلهم اتحمسوا، وبدأوا يلعبون وكانت اللعبه تحدد مين اللي يسأل الثاني ———————————————— عند العيال، بالمجلس ،،، قاعدين يلعبون بلايستيشن للمره الخامسه، عشان عمر يبغى ينتقم من غسان، وطبعا وليد قاعد على الجوال مثل عادته ،،، غسان ينرفز عمر: مابتقدر مابتقدر لو تلعب من الحين لين بكره ما بتقدر تهزمني عمر عصب: اسكت يالواثق بهزمك الحين غسان ضحك: ههههه بنشوف عمر بصراخ لأنه خسر للمره السادسه: لااااااا، ما يصير انت غشاش غسان ضحك: هههههه، قلت لك لكن انت ما صدقتني، شوفت الحين وليد ابتسم على شكل عمر المعصب وقام لعنده: اقوول قوم خلني اهزمه انا وانتقم لك عمر قام: حيا الله ولد العم، اتفضل لساحة المعركه غسان: ههههه، لاا تتآمرون علي وليد ببرود وابتسم بشويش: اييه، ويالله العب وانت ساكت، لأنك بتخسر بجميع الأحوال غسان بتحدي: بنشوف ———————————————— نسيبه ضغطت على الزر إللي يدور العجله ويشوف مين تسأل مين وقالت: بسم الللله،،،،، وضغطت واتوقفت العجله بين ندى وغيداء، وكانت العجله لونين، نصها باللون الأحمر اللي هو السؤال، ونصها باللون الأخضر اللي هو الجواب، وكان السؤال لندى ندى كشرت حواجبها وبزعل متصنع: لاااا، مابي مابي غيداء:وغصبا عنك،،،، وبدأت تتنحنح،،،،، احم احم،سؤالي يقول،،،،، وغمزت لها،تتقصد تسألها هذا السؤال،،،،، مين اللي تحبينه البنات كلهم ضحكوا عليها نسيبه: ههههه قبل شوي تشكين من السؤال والحين تقدميه غيداء: ندى يالله بسرعه ندى التفتت على فاطمه اللي قالت لها:عادي ندووش قولي إنك تحبيه ترانا كلنا نعرف،،،، وغمزت لها بضحكه ندى خدودها صاروا حمر من الإحراج، ودها تقول إنه غسان وودها تكذب وتقول إنها ما قد حبت وضلت ساكته، وفزت من صوت عيداء تصارخ بشويش: افففف منك ندووه يالله ورانا طوابير دعاء: هههه، حلوه ذي طوابير ليان التفتت لندى: ندووشه عادي لا تخجلين ترى والله إنه بيجي الدور عليهن وبينحرجين، تطمني غيداء التفتت لليان: ياهوووه تراكي معنا ليان: اننننن ادري ادري فاطمه التفتت على ندى: يالله ندى الوقت يروح عالفاضى ندى رفعت راسها وحاولت تخلي نفسها قويه، وقالت بأمر تتشرط،،،،، لكن اوعدوني انه ما تكلمون احد غيداء بطفش: ياليييل، اللي بيسمعك بيقول إنك بتتكلمين عن اسرار الدوله البنات ضحكوا والتفتوا لندى يأكدون لها إنهم ما بيكلمون أحد، وأخيرا تكلمت ندى وقالت بصوت كله خجل وحتى ما رفعت راسها ندى: احممم، غسان فاطمه تصنعت الصدمه وهي اساسا تدري انه تحبه وهو يحبها وقالت بمصخره متقصده تحرج ندى،وضربت كتفها بكتف ندى بشويش: هههه، يوووه يعني مرت اخوي جمبي وانا ما دريت عنها،، فديتك والله ليان، ودعاء ضحكوا بدود رد: ههههههه غيداء: يااااي والله إنه اختيارك حلووو متناسقين مع بعض شيماء بمصخره: حلوو حلوو يعني غسان حصل من تحبه فاطمه تخصرت ورفعت يدها تنثر شعرها وقالت بدلع: لا بالله، ترى اخوي في الف وحده تتمناه نسيبه بمصخره: ااااه يعني حلوه، باقي تسعمائه وتسعه وتسعين البنات كلهم ضحكوا على كلام نسيبه، حتى ندى اللي كانت منحرجه ضحكت نسيبه رجعت تدور العجله، وجات بين فاطمه، وغيداء، وكان السؤال لغيداء فاطمه فركت يدينها تضحك بمكر: هههه، والله لأردها لك ي غيداء عشانك خجلتي على مرت اخوي غيداء بتوتر: فطووم ما يصير الخيانه فاطمه ضحكت بصوت اكبر: ههههه، اقوول لا تتفلسفين قولي بسرعه بدون لف ودوران من اللي تحبينه غيداء بثقه وهدوء : للحين ما احب احد البنات كلهم ناظروا لها بصدمه، وقالت ليان: يااا كذاببه غيداء بتأكيد: والله اني اتكلم جد للحين ما حصلت اللي يستحق قلبي فاطمه بصدمه: غريبه ما تحبين غيداء: ترى ماهو حرام نسيبه دورت العجله تسكتهم: اوش اوش بلفها،،،،،، ولفتها وجات بين ليان و دعاء، كان السؤال لليان ليان: لا ما يصيير دورينها مره ثانيه دعاء بسرعه: اقوول اسكتي واسمعي،،،،، وقالت بعد ثواني من التفكير،،،،، ليان لو مثلا كنتي متزوجه، وكنتي تحبين زوجك حييل، وفجأه بيوم عرفتي إنه يخونك،، وش اللي بتسوينه ليان بثقه وبسرعه وبدون تفكير: والله ي قلبي ببدأ افضحه واصيح عليه واطلع حرتي فيه،، وبعدها اروح بيت اهلي وهو ينقلع بالطجاج اللي يطجه البنات كلهم رفعوا صوتهم يحيونها ويصفقون لها: حركااااات، والله طلعتي مو بهينه، الله يرحم اللي بيخونك، حلوو حلووو، فديت الحرمه حقتنا، ايوه كذا ليان تتصنع الإحراج وغطت على وجهها بكفوفها بدلع: يووه خلاص عاد، لا تحرجوني نسيبه بمزح: اسكتي يالواثقه،،،،،، وبعدها تنحنحت ورجعت تدور العجله وجات بين شيماء وندى، وكان السؤال لشيماء ندى بسرعه لأنها قد كانت مجهزه للسؤال من قبل: لووو حبيتي شخص وجاء اليوم اللي تعترفي له بحبك وش بتقوليين شيماء: اففف، انتو كل أسألتكم عن الحب والغرام نسيبه بحده: اقوول جاوبي ولا تتهربين غيداء غمزت لليان وراحت لجنبها، وقالوا: احنا بنوريكن ويش بتقول بالصوت والصوره لكن الأشخاص غير البنات كلهم ماعدا شيماء اللي ضحكت على سخافتهم وعارفه انه وراهم شي محرج: يالللله ورونا غيداء بدأت التمثيل والتفتت لليان بنظره رومانسيه ودلع ومصخره: وليدووووووه ي عمري،، تراني احبك،،،، وضحكت ضحكه دلع ومصخره وتغطي ووجها تسوي نفسها انحرجت ليان غطت على فمها تمثل انها مصدومه، ورفعت يدينها تشيل يدين غيداء عن وجهها،وقالت بصوت رجولي مصحوب برومانسية ومصخره: ي قلببيبي انتي،، وانا احبك واموت فيك،، لا تنحرجين بالله عليك غيداء انفجرت ضحك وصارت تضرب على فخذها وتنتفض من الضحك وتمسك بطنها، وليان والبنات شاركوها بالضحك والتصفير شيماء بخجل: قسم انكن سخيفات نسيبه: هههه ممثلات نمبر ون ندى:هههههه، ااااخ بطني ما اتحمل، ههههه فاطمه التفتت لشيماء وغمزت: حركااات شيوومه طلعتي تحبين وليد شيماء غطت وجهها بدينها تمثل الخجل: افف منكن تراني استحي دعاء ناظرت للساعه اللي صارت 3ص: بنااااات الساعه صارت ثلاثه الفجر ليان: يوووه ي ربي الوقت مر بسرعه فاطمه بتثآؤب: اييه والله، حتى انه جاني النوم نسيبه تفرك عيونها: بنااات قبل ما ننام لازم نسوي شي اخييير البنات كلهم لفوا عليها ينتظرون وش بتقول نسيبه بضحكه مكر: نقوم نرقص شوي ليان: لاا ما يصير العيال نايمين نسيبه برجاء: عادي بنوطي الصوت، يالله ليان وافقي بما انه امك مو بالبيت او شخص كبير يمنعنا ليان حبت الفكره وقررت تخرج طاقتها السلبيه وهزت راسها: اوكي يالله نتونس البنات كلهم بصراخ خفيف: يالله يالله يالله نسيبه فتحت التلفزيون وشغلت شيلة لماجد المهندس، ورفعت الصوت للنص، وبدأوا يرقصون ويتمايلون، واللي تهز بخصرها واللي تحاول تتعلم كيف ترقص، واللي تضحك واللي تسوي حركات مضحكه واللي تهز بشعرها ———————————————— في نفس البيت، وتحديدا بالمجلس عند العيال، اللي كانوا نايمين بعد مالعبوا وسولفوا سوالف خفيفه مع بعض مو مثل البنات، وبحكم انهم قليل ناموا بدري ،،، قام عمر بانزعاج على صوت ماجد المهندس، وبحكم إنه نومه خفيف،والمجلس قريب من غرفة الضيوف اللي فيها البنات قام بسرعه، وشاف العيال نايمين،ولا هم سامعين شي،وقام يبغى يروح الحمام ويشرب مويه،ووقف يمدد جسمه ويتثاوب، ويآخذ جواله ويشغل الفلاش، ولمن وصل للصاله سكر الفلاش لأنه كان ضوء الصاله شغال، واتوقف بصدمه يفتح عيونه ويفركهم يبغى يستوعب لمن شافها تتمايل بجسمها وتدندن مندمجه مع الأغنيه، وما شافته، وكانت ببجامتها البنفسجي، وشعرها الكستنائي الطويل المنسدح لعند نهاية ظهرها،ظل يتأملها بصدمه وتوتر وحب ويدري إنها هي لأنه قد شافها من قبل،ادكأ على الجدار،وظل يتأملها ببرود لأنه يحب هالحركات يبغاها تلتفت وتشوفه ،،،،،،،، قبل اللي صار بدقايق ،،،،،،،، كانوا البنات مستمرين بالرقص والجنون والهستره، وفاطمه اتوقفت، وقالت للبنات بأنها تبغى تروح تشرب مويه، وراحت وهي فيها نوم لكنه صوت ماجد المهندس شال النوم منها، وشيلته الحماسيه اللي خلتها ترقص حتي وهي تمشي في الطريق، مشت وهي تتمايل وتسوي حركات، وتدندن على نغمة الشيله، وقربت لعند المغسله القريبه من مجلس الرجال، وفتحت الحنفية وانتظرت للكاسه تتعبى بهدوء وعيونها تتسكر وتنفتح بتعب من النوم،ولفت عن المغسله تدندن وترقص وتسوي حركات، ورشفت من الماء تستمتع في شربه، وشهقت بصدمه تشوفه واقف مدكئ على الجدار قريب اشوي منها وعيونه عليها، شرغت بالماء، وفتحت عيونها بصدمه تشوفه يتقدم لها ويضرب على ضهرها بشويش ،،، عمر ببرود وابتسامه جذابه: هههه، صحه صحه انصدمت من جرآئته وبروده وحركاته،وقالت بسرعه، ونست شكلها انها مو متغطيه: كح كح،، احمم انت وش تسوي هنا عمر بنفس بروده وابتسم: والله كنت رايح الحمام، بتمنعيني،،،،، وبعدها سكت شوي وقال حابب ينرفزها ويحرجها وضحك بمكر: بالمناسبه شعرك مرره حلووو فاطمه فتحت عيونها اللي كانت تنعس: هااااا،،،،،، واستوعبت على نفسها وجرت ركض للبنات عمر ضحك بقووه بدون صوت، ومشى للحمام، وصار يدندن على صوت الشيله اللي صارت مسموعه بقوه لمسامعه ،،،،،، عند البنات، دخلت فاطمه وحاولت تهدأ وحمدت ربها انه مافي احد رد عليها، ورجعت ترقص مع البنات، عشان ما تخليهم يشكون،،، وبعدها بربع ساعه توقفوا عن الرقص، وراحوا ينامون ،،،،،، ———————————————— 🌼 وبكذا انتهى البارت التاسع عشر 🌼 سبحان الله، الحمدلله، لا إله إلا الله، الله أكبر، لاحول ولا قوة إلا بالله، اللهم صلي على نبينا محمد