ذكري ولكنها دمرتني - الفصل الاول - بقلم ملك محمود - مكتملة | روايتك

الهواء في القصر كان تقيل.... مش بس حر الصعيد اللي بيخنق النفس لكن احساس غريب كأن المكان نفسه بيراقبني وقفت قدام السلم أيدي على السور البارد بصيت لفوق دا الدور التاني لقيته غرقان في الضلمه مع ان الشمس داخله من الشبابيك كان ديما كدا الشمس مبتوصلش فوق *انتِ لسا واقفه* صوت ماما جه من ورايا حاد زي كل مره لفيت لها حاولت ابتسم بس ابتسامتي اختفت في نصها *كنت طالعه اوضتي* بصيت لي لحظه زياده عن اللزوم.... كأنها محتاجه حاجه وبعدين قالت *خليكي بعيد عن الدور التاني النهارده* الكلمه دي بقت عاديه في البيت خليكي بعيد عن الدور التاني متطلعيش الدور التاني واياكي تدخلي الاوضه اللي في الدور التاني هزيت راسي وسكت زي كل مره طلعت السلم ببطء وكل خطوه بتعمل صوت أعلى من اللي قبلها لما وصلت النص وقفت كان في صوت خفيف... شبه خربشه جاي من فوق حبست نفسي وقفت يمكن الصوت ينعاد تاني بس لا الصوت وقف ابتسمت لنفسي بسخريه وقولت تاني بتخيل حاجه مش موجوده وكملت طلوع اول م وصلت الدور التاني قلبي دق جامد الباب كان مفتوح كان موارب حاجه بسيطه بس وراه ضلمه عميقه بس ازاي ازاي الباب كان مقفول الصبح ايوه والله كان مقفول انا متأكده قربت خطوه وبعدها خطوه وبعدها خطوه لحد م وصلت للباب الجو حواليا كان في دوشه بس داخل الاوضه كان صمت مديت ايدي لمست الباب كان ساقع.... كأن مفيش شمس عدت عليه من سنين الباب فتح ببطء.... صوت احتكاكه بسيط بس حاد اول حاجه شفتها كانت الكرسي كرسي صغير في نص الاوضه وعليه فستان فستان لونه ابيض. اتجمدت مكاني من الصدمه. انا عارفه الفستان دا ايوه انا عارفاه دا بتاعي في اللحظه دي الباب اتقفل اتلفت بسرعه أيدي بتدور على المقبض بس ملقيتش حاجه وفي لحظه الباب اختفى رجعت ابص على الاوضه انفاسي بقت اسرع الفستان كان لسا هنا بس الكرسي..... اتحرك خطوه لقدام وصوت خافت طلع من أخر الاوضه دا صوتي انا *انتي فاكره* وقفت مكاني... جسمي كله بيرتعش قولت : فاكره ايه؟!!! الصوت ضحك نفس ضحكتي.... بس اقدم وأتقل *انتي اللي قفلتي الباب* سكتت والصوره قدامي بدأت تتشوه... الجدران اتلطخت بلون احمر... دم الفستان الأبيض... كان بيغرق