الجزائري في كرة القدم"الجزئ الأول"
في تاريخ كورة القدم، كاين ماتشوات يتلعبوا على جال الكاس، وكاين ماتشوات يتلعبوا على جال الشهرة، وبالمقابل.. كاين ماتش واحد في تاريخ البشرية اتلعب على جال باش تولد دولة! باش تفهم هاد السالفة، لازم تنفض الغبار على كتب التاريخ ونرجعوا لـ 9 ماي 1958، بالتحديد في ملعب الشاذلي زويتن في تونس. في هذاك النهار، كانت كاين ريحة السلاح والبارود نتاع الثورة الجزائرية تعبق في الجو، ودخلت تيران كرة القدم تشكيلة غريبة، حداش لراجل لابسين شورت وقميص أخضر وأبيض، وفوق صدرهم مكتوب جبهة التحرير الوطني (FLN). هداك ما كانش مجرد أول ماتش رسمي يلعبوه ضد منتخب تونس، هداك كان إعلان حرب ديبلوماسية بالبالون طير النوم من عينين فرنسا وهز كيانها في العالم كامل. قبل ما تصفر الصفارة، ترفعت الراية الجزائرية وتعزف النشيد الوطني "قسماً" لأول مرة في محفل رياضي دولي، والبلاد ما زال ما استقلتش كاع! تماك العالم كامل، من المدرجات حتى لوسائل الإعلام العالمية، حبس راسو وبدأ يفهم باللي كاين شعب راهو يحارب على جاله حريته وقضيته شرعية، وبلي الكورة في الدزاير عمرها ما كانت مجرد جلد منفوخ نجروا وراه تسعين دقيقة باش نضيعوا الوقت، الكورة عندنا هي سياسة، هي حرب، وهي نيف مكتوب بالعرق والدم. وباش تفهم هاد الرجال كيفاش لحقوا لهاد النقطة، لازم تعرف باللي قبل هاد الماتش بشهر برك، في أفريل 1958، فرنسا كانت مدايرة على الثورة الجزائرية حصار إعلامي مغلوق، وتقول للعالم باللي هادو مجرد "فلاڨة وإرهابيين". وفي نفس الوقت، كان كاين ملاعبية جزائريين نجوما كبار في البطولة الفرنسية، يخلصوا ملايين الفرانكات وعايشين في الفوخ والزوخ، ورايحين يشاركو في مونديال السويد مع منتخب فرنسا، كيما رشيد مخلوفي ومصطفى زيتوني ومحمد معوش. تماك جبهة التحرير دارت عفسة عبقرية طيحت السقف على راس باريس؛ بعتوا ليهم رسالة وقالوا ليهم باللي الثورة تحتاجكم والبلاد أولى بيكم. هاد الرجال، بلا ما يخمموا دقيقة وبلا ما يشوفوا للدراهم والشهرة، سمحوا في كلش وهربوا في السر من فرنسا، خلو ديارهم وطوموبيلاتهم، وتجمعوا في تونس باش يؤسسوا فريق الـ FLN. هاد الخبطة كانت كافية باش ترجع فرنسا مكلبة وطير ليها البرج اللي في راسها! الفيفا بضغط من فرنسا هددت ديريكت باللي أي دولة تلعب ضد الدزاير راح تقصيها من المونديال، بصح النيف نتاع الرجال ما حبسش. داروا دورة حول العالم، لعبوا في تونس، ليبيا، المغرب، وزادوا راحوا لروسيا، الصين، وفيتنام، وربحوا أغلب الماتشوات بـ سكور كبير، وكانوا المجاهدين نتاع هاد المعركة هما ملاعبية فوق التيران بسلاح وسمو الڨرينطا وعزة النفس.
ودارت السنين واستقلينا، وبقى هاد الجين نتاع الكورة والنيف يمشي في الدم من جيل لجيل. الدزيري رضع مع الحليب باللي الكورة هي اللعبة الوحيدة اللي يقدر يرجع فيها حقه بالذراع من اللي ظلمه وعفس عليه في التاريخ، واسألوا برك الألمان واش صرا ليهم في مونديال خيخون 1982. الألمان جاو متكبرين وقالوا باللي راح نربحو الدزاير بسبعة لزيرو، وواحد من الملاعبية نتاعهم قال باللي راح نلعب ضد الاستحمام بـ "الكوسشيم"، وجيرمان آخر قال باللي راح نهدوا ليهم الفوز لنساء نتاعنا كادو. خرجوا ليهم الرجال نتاع بلومي، ماجر، وعصاد، وعطاوهم درس في الرجولية والتكتيك فوق التيران وربحناهم باثنين لواحد في أول ماتش لينا في هداك المونديال وبلعنا لهم فمهم. وكي تآمروا علينا الألمان والنمسا في "مباراة العار" الخبيثة وباعوا الماتش عيناي عيناك باش يقصونا، بكينا بالدموع من الغدر بصح خرجنا بريسان مرفوعة، والفيفا بالسيف عليها من هداك النهار بدلت قوانين المونديال على جال الدزاير وولاو الماتشوات التوالى نتاع المجموعات يتلعبوا في نفس الدقيقة ونفس الساعة.
ولحقت القصة لواحد العام ما يتنساش قاع من ذاكرة الدزاير، عام 1990 نهار اللي استقبلنا كاس إفريقيا فوق أرضنا. في هداك الوقت، كانت البلاد تمر بظروف صعيبة بزاف، وجاء المكتوب باللي الكورة ترجع هي الأكسجين نتاع الغاشي. الماتشوات كانوا يتلعبوا في ملعب 5 جويلية في العاصمة، وهداك السطاد كان عبارة على بركان شاعل نتاع بشر، أكثر من مية ألف دزيري يعمروا المدرجات والناس راكبة فوق البلوط باش تدفع بالقرينطا لليكيب ناصيونال. كان جيل ذهبي يقودهم الشيخ رابح ماجر وبإشراف الشيخ عبد الحميد كرمالي اللي عرف كيفاش يزرع فيهم الروح نتاع المحاربين. بدأت الدورة وكلنا الخضر واليابس؛ ربحنا نيجيريا بخمسة لزيرو في الماتش الأول وصدمنا القارة كامل، وزدنا كملنا على مصر وساحل العاج، حتى لحقنا للفينال الكبير في 16 مارس 1990 ضد الماكينات نتاع نيجيريا اللي جاو حابين يرجعوا حقهم وثأرهم. هداك النهار الدزاير كامل حبست، وفي الدقيقة 38، رفد شريف الوزاني الكورة ومدها لعماني، وعماني أطلق قذيفة صاروخية سكنت ديريكت في الشباك وڤلعت السقف نتاع السطاد بالهول نتاع الغاشي! قعدنا شادين في كرشنا والرجال فوق التيران ياكلوا في الحشيش، حتى صفر لاربتر الصافرة التالية، وطارت أول كاس إفريقية للدزاير ودخلت البلاد في حالة نتاع هبال وفرحة هربانة بزاف.
ودارت السنين ولحقنا لعام 2014، العام اللي صرا فيه المونديال الأسطوري في بلاد السامبا: البرازيل. الدزاير دخلت في مجموعة صعيبة، والماتش الأول كان ضد بلجيكا وين سفيان فيغولي جاب بينالتي ومركاها ديريكت، بصح الطول والياقة البدنية نتاع البلجيكيين غلبتنا في التالي وخسرنا اثنين لواحد. وجاء الماتش الثاني نتاع "الكونفيرماسيون" ضد كوريا الجنوبية، وتماك صرات المجزرة الكروية التاريخية؛ في الشوط الأول برك، بلعناهم بثلاثة لزيرو بفضل إسلام سليماني، رافيش حليش، وعبد المومن جابو، وفي الشوط الثاني زاد ياسين براهيمي البيت الرابع بعد تيكي تاكا هربانة بزاف تدرس في المدارس، وخلص الماتش بربعة لاثنين ورجعت الثقة للڨلوب. الماتش الثالث والفاصل كان ضد روسيا بقيادة كابيلو؛ الروس فاجؤونا ومركاو علينا بيت في الدقيقة السادسة، بصح في الشوط الثاني ناض النيف، وفي الدقيقة 60 جابو أطلق كورة دقيقة من كود فرّان، وطلع إسلام سليماني، السبع نتاع عين بنيان، طار فوق الديفونس وحطها براسية ذهبية في الشباك! شدينا الماتش بالدموع وتأهلت الدزاير لأول مرة في تاريخها للدور الثاني نتاع المونديال. وتماك طحنا راس لراس مع الماكينات الألمانية في ماتش تحول لحرب عالمية؛ رايس مبولحي تحول لـ "جدار برلين" وبلع الكاجا ونحى كرات مستحيلة خلت مولر يحكم راسو، الماتش خلاص زيرو لزيرو ورحنا للأشواط الإضافية وعرقنا الموت، الألمان مركاوا زوج بيوت، بصح في الدقيقة 121، فيغولي هرب ومد عرضية مليمترية ديريكت لـ جابو اللي حطها في الشباك ومركى بيت تاريخي، وخلاص الماتش اثنين لواحد لألمانيا بصح خرجنا بريسان مرفوعة والعالم كامل يصفق للمحاربين.
ولحقنا لصيف 2019، الصيف اللي طارت فيه "الكحلوشة" الكأس الإفريقية الثانية من قلب العاصمة المصرية القاهرة. وجاء المدرب "جمال بلماضي"، السبع اللي زرع الروح نتاع المحاربين في جيل جديد يقودهم الساحر رياض محرز، يوسف بلايلي، وبغداد بونجاح. دخلنا البطولة وفي المجموعات بلعنا كينيا بزوج لزيرو، وزدنا كملنا على السنغال بواحد لزيرو بصاروخ نتاع بلايلي، وتنزانيا بثلاثة لزيرو وخرجنا بالعلامة الكاملة. في الدور الثاني كلنا غينيا بثلاثة لزيرو، بصح الحرب الحقيقية بدأت في الربع النهائي ضد ساحل العاج؛ ماركا فيغولي الأول، ورحنا للبيلانتيات وتماك ناض السبع الرايس مبولحي وجابها بالذراع وتأهلنا للدمي فينال. وفي النصف النهائي لعبنا ضد نيجيريا في ماتش أسطوري كان رايح للأشواط الإضافية، وفي الدقيقة 95، في آخر ثانية نتاع الماتش، جتنا مخالفة وقف عليها الأمير رياض محرز، وبثقة الأسود أطلق صاروخ مليمتري جاز فوق الحيط البشري وسكن في التسعين نتاع الكاجا! السطاد نتاع القاهرة تزلزل، وتأهلنا للفينال الكبير ضد السنغال للمرة الثانية. الماتش بدأ بقنبلة ديريكت؛ في الدقيقة الأولى والثانية 20، رفد بغداد بونجاح الكورة وضرب قذيفة ضربت في الديفونس وسكنت الكاجا، ومن هذيك الدقيقة الماتش تحول لحرب شوارع، بن العمري سال دمه على وجهه وقعد يحارب، ومبولحي بلع الكاجا، حتى صفر لاربتر وطارت الكحلوشة الثانية في تاريخ الدزاير.
وتكمل الملحمة في شهر ديسمبر من عام 2021، العام اللي صرات فيه البطولة الأسطورية "كأس العرب" في قطر. الدزاير هبطت لتيرانات الدوحة بفرقة وسمها "المحليين" ويقودهم الماجيك "مجيد بوقرة". بدأت الحكاية في أول ماتش في المجموعات ضد السودان وين كلناهم بربعة لزيرو ديريكت (دوبلي بونجاح، بن دبكة وسوداني)، وزدنا عطينا للبنان زوج لزيرو، وتأهلنا بعد ما تعادلنا مع مصر واحد لواحد. في الربع النهائي طحنا راس لراس مع المغرب، ماركا براهيمي الأول، ورحنا للأشواط الإضافية، وتماك صرات اللقطة اللي هبلت العالم؛ يوسف بلايلي رفد الكورة من وسط التيران وأطلق صاروخ عابر للقارات من مسافة 40 متر سكن ديريكت في الشباك! المغرب عدلوا ورحنا للبيلانتيات وتماك مبولحي بلع الكاجا وتأهلنا. وفي النصف النهائي لعبنا ضد قطر في ماتش سيكاردي حسب فيه لربتر البولندي وقت بدل ضائع خيالي ومركاو علينا قطر بيت التعادل في الدقيقة 97، بصح يوسف بلايلي جاب بيلانتي في الدقيقة 114 وسددها وحطها في الشباك وخلص الماتش في الدقيقة 119 وتأهلنا للفينال ضد تونس في ملعب البيت. الماتش كان صعيب وقفلوا علينا اللعب ورحنا للأشواط الإضافية؛ وفي الدقيقة 99، أمير سعيود أطلق قذيفة يسارية مقوسة سكنت في التسعين وفجر الفرحة في قلب الدزاير! وفي آخر ثانية، الحارس نتاعهم طلع في كود فرّان، الكورة رجعت لينا وهرب بيها ياسين براهيمي وحده ديريكت للكاجا الفارغة وحط البيت الثاني وصفر لربتر الصافرة التالية. تماك، طارت كاس العرب ديريكت لـ خزينة الدزاير، وثبتنا للعالم كامل باللي من 1958 لـ 2021، النيف والقرينطا نتاع الرجال دايماً يجيبوا الفوز بالذراع، وسواء بالسلاح في الجبل ولا بالبالون فوق التيران، الدزيري الصريح عمره ما يطيح الأرض.