الفصل 11
.
البـارت 11 ☆
غصـن مكسـور 🥀
للكـاتبتـين: هـدى قطـران ومنـاهـل العـريقـي
👌🏻👇🏻 😍
📚 @rewayatyamania 🇾🇪
كيان رجعت تبكي قوي😭: ليش يماه محد رضي يقيمش؟
غيم قومي أمي قلي لها تقوم تبسرنا من عيقوم علينا من عيدافع علينا لما أبي يضربنا من عيوبه(ينتبه) لنا قلي لها ياغيم ، غيم بدأ صوت بكاها يعلى وبسرت أختها وحجفتها (حضنتها) ويبكين جمعة😭
كيان رجعت تبسر أمها وتهزها: خلاص أبردي منهم قومي لي أنا،،، أنا كيان حبيبتش مش أنتِ كنتِ تقلي لي هكذا ليش مابتسمعيش كلام حبيبتش ليش ماقمتيش لها؟! يمااااه قووووومييييي قوى😭😭
غيم دريت أن أمها ماتت وأن أختها ما استوعبتش أن أمها ماتت 💔🥺
في هذك اللحظة كانت تدعي الله يقويها ويقوي أختها ويصبرهن على فراق أمهن ويعينها على تحمل المسؤولية التي عتتحملها في هذا العمر الصغير وكانت تبكي بس ماعد طلعتش ولاصوت وحبت أمها وغطت وجهها وكيان صاحت لا تغطيش وجه أمي.. أمي ما ماتتش ولا عتفلتنا صح قولي صح ياغيم
غيم حضنت أختها بدون ولا كلمة
الحجة حميدة: خلاص يا بناتي قوى قطعتين قلبي فوق ما خواتكن بيبكين أحمدين الله وبعدا أنا موجودة ماعتفلتكنش لما يجي الحق لحقه
الأب مسح دموعه وقام على طول لعند باب البيت وفتحه🚪
غيم: وين عتسيروا ياباه وتفلتونا؟
شجير جالس يتفرج لعندها وخرج
الحجة حميدة ورعت(انتظرت) ساعة بعد ماخرج شجير بسرت أنه ماجاش قامت لعند غيم: يابنتي الله يرضا عليش أنتِ قدش العاقلة أوبهي للبيت وللبنات لما أجي
غيم: وين عتسيروا ياخالة والا تشتتوا تفلتونا مثل أمي والا مثل ما خرج أبي وماعد جاش؟
الحجة حميدة: ماعتفلتكنش يابناتي إلا عتسير أمدي وأرجع وعتسير أدعي بناتي يجين عندكن تمام
غيم: تمام حاضر بس لاتتأخروش
الحجة حميدة: تمام يابنتي
@rewayatyamania المصدر الأول للروايات
الحجة حميدة سارت لعند بيتها ودقت لبناتها يسيرين لعند البنات وبعدا خطيت لعند القيم وقالت له يفتحوا الدريس علاميد يتجمعوا الناس علاميد يصلوا على حبيبة ويقبروها وقالت له يدي لها كفن، القيم سألها وين زوجها وبعدا قالت له أن هو مختفي من لما ماتت واكرام الميت دفنه القيم غثي على حبيبة وقال لحميدة يلاه الغايب عذره معه وحميدة ماقالتش لحد أنه ضرب مرته لأنها دارية أنه بدون قصد وأنه بيحبها بس لأنها في ساعة غضب رغم أن هذه الحاجات ما ينسكتش عليها حتى لو في ساعة الغضب ولا بد أنه كل واحد يأخذ جزاته...
المهم ***
القيم فتح الدريس وهي شلت الكفن، نسوان الحارة لما سمعين الاسم كلهن أنصدمين واللي رحمت عليها واللي كانت تبكي وسارين كلهن لَبيتها يوقفين جنب بناتها والبنات كلما كانت تدخل واحدة تواسيهن بكاهن يزيد لكن غيم كانت تحاول تسيطر على نفسها وتتقوى
غابت طفولة غيم وتساقطت كما تتساقط أوراق الشجرة في فصل الخريف وانكسرت كما ينكسر "غصن الشجرة"
الحجة حميدة رجعت لعند البنات وقالت لثنتين من النسوان الثقات يقومين يغسلين حبيبة معها وغيم طلبت تشاركهن في تغسيل أمها كملين يغسلنها ويكفننها والبنات ودعنها مع نسوان الحارة، ورجع الحجة حميدة دعت القيم علاميد يشلوها يصلوا عليها ويقبروها
بعد المقبار نسوان الحارة كل واحدة أدت من بيتها غداء وغدين الرجال الذي قبروا وكانين يراشين البنات يتغدين ولارضيين
بعدا قامت غيم لعند كيان
غيم: قومي ياكيان نتغدا لاحزننا عيرجع أمي ولابطالنا للغداء قومي نتغدا علاميد نقوم على أنفسنا وعلى خواتنا، بعدا أمي عتزعل مننا ولو كانت بيننا ماكانتش عترضا نجلس بغير غداء تذكري والا ماشي لما ماتغديتيش هذاك اليوم كيف زعلت ومرضت
كيان: حاضر يا أختي عتقوم علاميد أمي ماتزعلش
مرت الأيام وحال البنات كل يوم يتدهور الناس في أيام الموت كانوا يدوا لهن مصاريف واللي معه زلط كان يدي وهذه عادات اليمنيين يد واحدة وقت المحن، بس بعد الموت قلوا الذي كانوا يدوا ويا رحمتاه الظروف صعبة على الأغلب وكل الناس كانت مستغربة من اختفاء شجير وكل واحد كان يسأل الثاني وخلوا ناس يدوروا عليه بس محدش دري أين مكانه؟!
.
.
مر شهرين وشجير مختفي وصاحب الإيجار محد دفع له وكلما كان يسير لعند العاقل يقل له أصبر لما يظهر الأب لأنه اللي بيدوها أهل الخير لهم يلاه تكفيهم صرفة وصاحب البيت ضبح سار لعند الحجة حميدة وقال لها تقلهن يايدين إيجار يا يفضين البيت لأنه محتاج زلط وما مصدر رزقه إلا إيجار البيت
الحجة حميدة زعلت وما دريت كيف توصل للبنات الكلام
الحجة حميدة : غيم ياحبيبتي... ما رأيش تجي عندي أنتِ وخواتش
غيم: ليش ياخالة مليتوا تجوا عندنا أنتِ والبنات؟
الحجة حميدة: ماشي بس يابنتي عتحاكيش ولا تزعليش
كيان في قلبها "قد سكن الزعل في أعماقي وأستوطنه من لما ماتت أمي وفلتنا أبي وقد أحنا عالة على الباقي"
: تمام ياخالة
الحجة حميدة: صاحب البيت يابنتي قال يا تدفعين الأيجار يا تخرجين...
📚 @rewayatyamania 🇾🇪