غصن مكسور - الفصل 8 - بقلم هدى قطران ومناهل العريقي | روايتك

. البـارت 8 ☆ غصـن مكسـور 🥀 👌🏻👇🏻 😍 📚 @rewayatyamania 🇾🇪 صالح: اليوم خطبتك ياطه تجهز طه بفرح: صدق ياباه قد رد لكم عمي شجير خبر؟ صالح: أيوه يا ابني الله يكتب لك مافيه الخير طه بفرح: آمين آمين ياباه وقام حب على رأس أبوه وخرج يتجهز وكأنه اليوم عرسه . . في العشي صالح وطه مع القيم محمد ورجال من الحارة ساروا يخطبوا كيان لطه وتمت الخطبة على خير.....💍 . .. ... بعد مرور خمس سنين كيان تزوجت طه وماعد فعلوش لها عرس.. صح كانت بتحلم أنها تتعرس وتلبس الفستان الأبيض بس الظروف حكمت عليها المهم أنها تزوجت طه الذي كانت تحس تجاهه بالحب والأحترام وعاشت في البيت الذي  كانت تتمنى بس تدخله ورجعت الحياة تبتسم لها من أول وجديد رغم كل حاجة حصلت من قبل .. كيان بعد ماتزوجت ادت بنت وولد حالييييين قوي 👶🏻👧🏻 .. وزوجها طه وقع محامي كبير وأشتهر لأنه بيوقف مع المظلوم أمام الظالم وما كانش يخاف أحد إلا الله @rewayatyamania المصدر الأول للروايات في بيت القيم محمد القيم محمد على الفراش من التعب بسبب كبر سنه سلطان كبر  وكان جالس جالس جنب القيم محمد: مالكم ياباه ما أدي لكم ما افعل لكم قلوا لي؟ القيم محمد والتعب ظاهر على وجهه: ولا شي سلامتك اسمعني يا ابني عتقل لك حاجة قبل ما أموت لأني بين أحس أن ساعتي قريبة سلطان: بعيد الشر عليكم ياباه وخير والله يطول في عمركم القيم محمد: مع يا ابني خلاص أنا قد كملت عمري وقد جاء لي الثلاث الرسولات حق قبل الموت الضعف من بعد القوة والشيب من بعد الشباب وانحناء الظهر ماعد بعدهن يا ابني إلا أنه يجي الحق لحقه سلطان: أول تعافى ياباه وبعدا نتجابر بكل شي تشتي تقوله القيم محمد: ماينفعش يا ابني ضروري اليوم خلاص ماعاد بش وقت من زمان وأنا مخبي عليك هذا السر وماكانش عليا سهل وكان نفسي أحاكيك وكنت أبكي كل يوم لما أذكر القصة يا ابني وما كنتش عتستوعب كلامي كان عادك صغير بس اليوم جاء الوقت المناسب اللي أقول لك السر الذي كنت مخبيه علاميد أموت وأنا مرتاح وينزاح الهم الذي كتمته في صدري من زمان وأجلس اتذكر ياسلطان ان انا حبيتك ويمكن لو كان معي ولد من صلبي ماحبيته مثلك ياولدي سلطان والقلق بدى عليه من كلام القيم وبيقل في نفسه ما هو هذا الكلام يمكن أبي بيهلوس مع الحُمى كيف لو كان معه ولد من صلبه وأنا من اين أنا؟ 😳 القيم محمد بدأ تنفسه يزداد وكان العرق على وجهه وجبهته يقوى والوجع يزداد وكلامه بيتقطع تقطاع وبدأت سكرات الموت تشد عليه سلطان: أباه مالكم شكلكم تاعبين قوي اليوم قوموا أسعفكم المستشفى ماعتجلسش أتفرج عليكم هكذا القيم محمد بصوت متقطع: مع ياولدي وقتي كمل أسمعني ولا تقاطعنيش سلطان عيونه بتدمع: حاضر يا باه ما في نفسكم؟ القيم محمد: أنا يا ولدي مش أنا أبوك الحقيقي أنا لقيتك في باب الجامع والسيدة حميدة ............ ومات القيم محمد ومات الكلام معه قبل أن يكمل وترك سلطان في حيرة وحزن 🥺💔💔 "المشاعر المكتوبة لاتموت أبداً، إنها مدفونة وهي على قيد الحياة بس تظهر لاحقاً بطرق بشعة " ___ سلطان بعد ماكملوا صلوا على القيم محمد ودفنوه جلس في البيت وماعاد أحد زد بسره من أصحابه ولا وجيرانه إلا لَو سار للجامع وإلا للمقبرة فوق قبر القيم محمد فاطمة: مالك يا ابني؟ من لما مات أبوك وأنت ما عاد انت سلطان الذي أعرفك يا ابني أخرج تواله مع الناس أبسرني كيف أنا بكيت وحزنت أول مابه على أبي وأمي لا البكاء رجعهم ولا الحزن رجعهم والواحد مابيموتش بعد احد كل واحد ياابني بيعيش حياته لما يجي الحق لحقه صح فرقة الدنيا لكن ما بلا الواحد يصبر وعيعين الله يا ابني سلطان بيسمع وهو ساكت وعيونه بس الذي بيعبرين عن شعوره بدموعهن وجالس في نفسه يحس بالأسف على نفسه: رقدت ضابح هذه الأيام ياربي وأنتَ أعلم بحالي مني ويدي على صدري مفتجع أن قلبي يوقف من كثرة الهم والتفكير ماعاد دريت ليش روحي غرقت في بحر عميق من الهم والحيرة.. يارب من أنااا؟ ليش فلتني ابي قبل مايقول لي  من أنا ولا يقول لي أنه بيمزح معي  ليييش؟😔 ، يارب اربط على قلبي بالصبر و الأيمان وأمي فاطمة هل هي دارية من أنا والا ماشي بس كيف أبدأ الموضوع معها ماقد عتحاكيهاش إلا لما ألقى الحجة حميدة يارب دلني على مكانها ، يارب وكلت أمري إليك وحالي مايُخفى عليك🤲🏻 فاطمة: يا ابني خلاص قوم كملت روحك وقطعت قلبي عليك سلطان مسح دموعه وحب على راسها وقام توضى وخرج بعد ماصلى خرج بيحاول يتطقس أخبار على الحجة حميدة . . ومن هذاك اليوم وسلطان بيبحث عن الحجة حميدة ورغم أنه مالقيها بس مافقدش الأمل وأستعان باللّه ثم بمساعدة طه الذي لقيها بسبب أنه محامي ومعه معارف خيرات بعد ما طه دله على بيت الحجة حميدة سلطان ماقدرش يورع سار لعند البقعة الذي قال له طه   عليها.. . . سلطان وهو يدق باب الحجة حميدة بتوتر وخوف... 📚 @rewayatyamania 🇾🇪