الكنز المخفي - الفصل 6 - بقلم عبير الكبسي | روايتك

. البـارت 6 •• الكنــز المـخـفـي 💎 👌🏻👇🏻 😍 📚 @rewayatyamania 🇾🇪 بسمة: هيا نسير نرقد عند جدة نور: ولو يخرجوا لنا في الدرج عصماء بكيت: يمه يمه بتسمعين الصوت من هذا؟ نور: يمكن دمة والا حمامة جنب الطاقة بسمة فتحت القران بتلفونها: خلاص هيا نقرأ قرآن بدل مانفجع نفسنا... جلسين يقرأين قرآن ونعسين وهن راقدات جنب بعض الثلاث جالسات من الخوف . . بيت صهيب داخل المنزل اغلبه مغطى مقفل مش ساكن غير بجناح في الطابق الاول ، متنقل مابين الديوان والحمام وغرفته بقية الغرف مقفلة ، لأن أهله مسافرين في الخارج مش في البيت صهيب صحي من النوم على صوت التلفون: الو، ايوه ، يوووه صح نسيت الآن اخرج، ياسعم امس سهرت لاقبل الفجر بس ظلام ماقدرت احدد شي ، الآن شاخرج.. اخذ دش ودخل يفعل له صبوح شاف المطبخ ناقص اشياء رجع يلبس ويموه شكله ( كان لبسه عشوائي مش مرتب الثوب واسع شويه ومش مكوى ، رفعه وربطه بشال رغم أفخم الجنابي واغلاهن معلقة، لبس كوت عادي قديم ضيق عليه شوية.. دقنته اللي مغطيه نص وجهه شعفلها شوية وشعفل شعره اللي طوله للاذان ولف شال حول راسه ،) شاف نفسه مش معروف ولا واضحة ملامحه شل فلوس وطرح تلفوناته وخرج للبقالة @rewayatyamania المصدر الأول للروايات بيت المنذر نور بتسمع لجدتها: تمام زبادي وبيض وسكر وصابون بس؟ جدتها: بس نور: هيا يا بسمة خرجين للبقالة ينفعين جدتها الجدة لنسوان عيالها: لو خلفتين عيال مابنخرج بنات في سن زواجه ينافعين، إلا من حلاكن ما اعولتين عيال ولا قدرتين تضبطين ازواجكن رقدة للظهر نسوان ابنها سمير كل واحدة بتنافس الثانية في المطبخ وكأنهن فاعلات مسابقة.. مرة فؤاد بترتب البيت بهدوء وتفنن ، مرة أنور جالسة تنتقد الجدة على كلامها . . في البقالة.. نور دخلت: السلام عليكم ياعم شيبان ، ادي سكر وزبادي تاريخ سوا مش عينتهي بكره بسمة بتداعيها وفي يدها الشطة: يانور تشتي شطة!؟ واقف بيلفلف للكيس روتي سمع صوتها بهرر ولفت لهن نور شافته خافت قربت شاورت بسمة (اسكتي لاتلفتي انتباه المجنون هذا) صاحب البقالة ناولهن الكيس وشل الحساب من صهيب وخرجين بيمشين ويلتفتين شوية وهو يمشي بعدهن صهيب مستغرب ليش بيتفرجين لاعنده نور: يمه والله انه بيلحقنا بسمة: جي نغير الطريق نخطى يسار نور: قد البيت قريب امشي بس اسكه الفتي انتي بسمة تلفت وهو وراها بالضبط: يمه المجنون قفانا كان بيسمعنا اخطي بسرعة صهيب سرع خطواته ومشي ذكر انهن عيشوفين وين عيدخل رجع يمشي دلا نور: ماله هذا بيسابقنا، يو الحمدلله وصلنا البيت بسمة: جالس واقف هانك نور: كان عيوقف من اول شلوه فجعنا ، دخلين وقفلين الباب صهيب دخل البيت بسرعة وقفل غير ملابسه لبس برمودا وتيشرت لف شعره وبيفعل صبوح . . بيت المنذر فوق الصبوح نور: من كان سامر امس بياكل آخر الليل؟ جدتها شافتها: من غيركن بيسمر ويمكنها خورات بسمة: هيا صدق من منكم امس قام سمعنا صوت في البيت الجدة شافت عيالها: الصدق ياجهالي بين افتجع من البيت الاي جنبنا ساع من هو ومهجور ، قد الجيران والكل بيشكوا بيسمعوا صوت في الحوي آخر الليل بسمة ونور وعصماء شافين بعض بخوف... نور: عاد الجيران هولا مرتاحين، اكيد بيقع اصوات في الحوش ، دمم وعصافير وحشرات يعني سهل بسمة: وشطة عادي عصماء ضحكت ام بسمة: ايش من شطة؟ مالش يابنتي بتخرفي نور: هي هكذا ياعمه فاصلة واصل الجدة: وين زوجش ينزل يصتبح؟؟ نسوان سمير الثنتين ردين نفس الوقت: خرج الحوش نور بصوت واطي جنب بسمة وهي بتحش: (كأنهن صدى صوت) بسمة ماسكة ضحكتها.. الجدة: وين عصماء؟ نور ضحكت: راقدة مسكينة مارقدت إلا الصبح ام نور: ليش؟ بسمة كانت بتفضح سرهن: كانت خايفة نور قاطعتها: كانت خايفة مراعية للقارح الثاني.. دخل فؤاد (ابو عصماء) من الحوش: مابش شي، لكن الجدر من الامطار قدو بيهتد الجدة: هذك البقعه لحد يقربها يا ابني لايأذونا اعوذ بالله منهم وساعتهم ، ماخلوا لبيت جيراننا حالهم، كانوا راس في الدولة وجهالهم جهال ماشاءالله والتربية وماخلوا لهم حالهم كيف وقعوا يا سااتر سمير بغضب: هو من الفساد حق جارنا من سرقته للبلاد وخيراتها و... فؤاد: الله المستعان يااخي ، إن بعض الظن إثم، كان جار طيب وفي أصيل شابع وخيره سابق للحارة كلها ، الكلام اللي طلع عليه بعد احداث البلاد ماعلينا منه احنا نتحاكى باللي شافته عيننا هيا مه، وين الدين حقك سمير: خيره هذا الاي بتقل عليه من اين له !! كيف جمعه؟ قصر معه مش بيت، يعني كان يزكي على المال المسروق حين يفتح بيته لعزاء او عرس حق جيران الحارة وتقل لي فاعل خير ! الجدة قاطعته: ياااي كانوا شابعين من قبل مايتعين منصب في الدولة عاد البيت هذا حق أمه ورثه منها ماعينوه وزير إلا وهم في هذا البيت 📚 @rewayatyamania 🇾🇪